Nyɛkahãa Nyɛsuɔmɔ Lɛ He Jɔa

1, 2. (a) Namɛi ji mɛi klɛŋklɛŋ ni Yesu wiemɔi ni yɔɔ Mateo 24:12 lɛ ba mli yɛ amɛnɔ? (b) Mɛɛ gbɛ nɔ Bɔfoi awolo lɛ hãa wɔnaa akɛ, Kristofoi ni hi shi yɛ blema lɛ tee nɔ amɛjie suɔmɔ kpo? (Kwɛmɔ mfoniri ni yɔɔ nikasemɔ lɛ shishijee lɛ.)

BE NI Yesu tsɔɔ nibii ni baahã mɛi ana akɛ “shihilɛ gbɛjianɔtoo lɛ naagbee gbii lɛ” amli amɛyɔɔ lɛ, nibii ni etsĩ tã lɛ ateŋ ekome ji akɛ, “mɛi pii asuɔmɔ he baajɔ.” (Mat. 24:3, 12) Mɛi klɛŋklɛŋ ni Yesu wiemɔi lɛ ba mli yɛ amɛnɔ ji Yudafoi ni hi shi yɛ klɛŋklɛŋ afii 100 lɛ mli lɛ. Amɛkɛɛ Nyɔŋmɔ webii ji amɛ, shi amɛhã suɔmɔ ni amɛyɔɔ kɛhã Nyɔŋmɔ lɛ he jɔ.

² Kristofoi ni hi shi yɛ nakai beiaŋ lɛ ateŋ mɛi pii efeee amɛnii tamɔ Yudafoi lɛ. Amɛtee nɔ amɛkɛ ekãa ‘jaje Kristo lɛ he sane kpakpa lɛ.’ Amɛsumɔ Nyɔŋmɔ, ni amɛjie suɔmɔ kpo amɛtsɔɔ amɛnyɛmimɛi Kristofoi lɛ kɛ mɛi ni ebaleko anɔkwale lɛ po. (Bɔf. 2:44-47; 5:42) Kɛ̃lɛ, amɛteŋ mɛi komɛi hã amɛsuɔmɔ lɛ he jɔ.

 3. Mɛni eeenyɛ efee akɛ no hã Kristofoi komɛi asuɔmɔ he jɔ lɛ?

³ Yesu Kristo kɛɛ Kristofoi asafo ni yɔɔ Efeso lɛ akɛ: “Nɔ ni miyɔɔ kɛshi bo nɛ, no ji akɛ oŋmɛɛ o-klɛŋklɛŋ suɔmɔ lɛ he.” (Kpoj. 2:4) Mɛi ni yɔɔ Efeso lɛ fee nibii ni heloo lɛ shweɔ, ni eeenyɛ efee akɛ enɛ ná Kristofoi ni yɔɔ jɛmɛ lɛ anɔ hewalɛ. (Efe. 2:2, 3) No mli lɛ, niiatsɛmɛi yɛ Efeso waa, ni mɛi ni yɔɔ jɛmɛ lɛ kɛ amɛjwɛŋmɔ fɛɛ ma ogbɔjɔ shihilɛ, shwɛmɔ, hiɛtserɛjiemɔ, kɛ nibii krokomɛi ni tamɔ nakai lɛ anɔ. Amɛsusu amɛ pɛ amɛhe, ni amɛjieee suɔmɔ krɔŋŋ kpo. Amɛkɛ amɛhe wo jeŋba sha kɛ nifeemɔi gbohii srɔtoi amli, tamɔ bɔ ni afeɔ yɛ maji pii amli ŋmɛnɛ lɛ, ni amɛbuuu Nyɔŋmɔ mla lɛ amɛhãaa nɔ ko nɔ ko.

 4. (a) Mɛni hãa wɔnaa akɛ ŋmɛnɛ lɛ mɛi pii asuɔmɔ he ejɔ? (b) Mɛɛ nibii etɛ amli esaaa akɛ wɔhãa wɔsuɔmɔ lɛ he jɔɔ yɛ?

⁴ Yesu gbalɛ lɛ kɔɔ wɔbei nɛɛ hu he. Ŋmɛnɛ lɛ, suɔmɔ ni mɛi yɔɔ kɛhã Nyɔŋmɔ lɛ he ejɔ, ni ehe miiya nɔ eejɔ lolo. Mɛi akpekpei abɔ kɛ amɛhiɛ efɔ̃ adesai agbɛjianɔtoi anɔ moŋ fe Nyɔŋmɔ nɔ, ni amɛsusuɔ akɛ adesai diɛŋtsɛ baanyɛ atsu amɛnaagbai ahe nii. Anɔkwa Kristofoi hu asuɔmɔ lɛ he baanyɛ ajɔ, ni nɔ ni ba Efeso asafo lɛ nɔ lɛ maa enɛ nɔ mi. No hewɔ lɛ, amrɔ nɛɛ, wɔbaakwɛ nibii etɛ amli ni esaaa akɛ wɔhãa wɔsuɔmɔ lɛ he jɔɔ yɛ. Nomɛi ji, (1) suɔmɔ ni wɔyɔɔ kɛhã Yehowa, (2) suɔmɔ ni wɔyɔɔ kɛhã anɔkwalei ni wɔkase yɛ Biblia lɛ mli lɛ, kɛ (3) suɔmɔ ni wɔyɔɔ kɛhã wɔnyɛmimɛi Kristofoi lɛ.

 5. Mɛni hewɔ esa akɛ wɔsumɔ Nyɔŋmɔ?

⁵ Dani Yesu baabɔ etoibolɔi lɛ kɔkɔ akɛ mɛi pii asuɔmɔ he baajɔ lɛ, no mli lɛ etsɔ hiɛ ewie mɔ ni esa akɛ wɔsumɔ fe fɛɛ lɛ he momo. Ewie akɛ: “‘Esa akɛ osumɔ Yehowa o-Nyɔŋmɔ lɛ kɛ otsui muu fɛɛ kɛ osusuma muu fɛɛ kɛ ojwɛŋmɔ muu fɛɛ.’ Enɛ ji klɛŋklɛŋ kitã, kɛ nɔ ni he hiaa fe fɛɛ lɛ.” (Mat. 22:37, 38) Kɛ́ wɔsumɔɔ Nyɔŋmɔ waa lɛ, wɔbaaye ekitãi lɛ anɔ, wɔbaafi shi yɛ shihilɛi ni jaraa amli, ni wɔbaanyɛ nibii fɔji. (Kanemɔ Lala 97:10.) Shi Satan kɛ eje lɛ miibɔ mɔdɛŋ fɛɛ ni amɛbaanyɛ koni amɛhã suɔmɔ ni wɔyɔɔ kɛhã Nyɔŋmɔ lɛ he ajɔ.

 6. Kɛ́ suɔmɔ ni mɛi yɔɔ kɛhã Nyɔŋmɔ lɛ he jɔ lɛ, mɛni jɛɔ mli kɛbaa?

⁶ Ŋmɛnɛ lɛ, jwɛŋmɔ ni mɛi hiɛ yɛ suɔmɔ he lɛ ejaaa. Yɛ nɔ najiaŋ ni amɛbaasumɔ Nyɔŋmɔ lɛ, amɛtsɔmɔ “hesuɔlɔi.” (2 Tim. 3:2) “Nɔ ni heloo lɛ shweɔ lɛ kɛ nɔ ni hiŋmɛii lɛ shweɔ lɛ kɛ nii ni mɔ yɔɔ ni ekɛshwãa lɛ” ehe mɛi babaoo ajwɛŋmɔ kɛ amɛtsui fɛɛ. (1 Yoh. 2:16) Bɔfo Paulo bɔ enyɛmimɛi Kristofoi lɛ kɔkɔ akɛ amɛkadi nibii ni amɛheloo lɛ shweɔ lɛ sɛɛ. Ekɛɛ amɛ akɛ: “Jwɛŋmɔ ni akɛmaa heloo lɛ nɔ lɛ, gbele ni . . . ejaakɛ jwɛŋmɔ ni akɛmaa heloo lɛ nɔ lɛ ji nyɛɛ ni anyɛɔ Nyɔŋmɔ.” (Rom. 8:6, 7) Mɛi ni kɛ amɛbe kɛ amɛhewalɛ fɛɛ eyadi ninámɔ, loo amɛbɔlɛnamɔ henumɔi asɛɛ lɛ, anine enyɛ shi, ni amɛnii efee mɔbɔ waa.​—1 Kor. 6:18; 1 Tim. 6:9, 10.

 7. Mɛɛ susumɔi baanyɛ aná Kristofoi ni yɔɔ ŋmɛnɛ lɛ anɔ hewalɛ?

⁷ Yɛ maji komɛi anɔ lɛ, mɛi ni kɛɛ Nyɔŋmɔ bɛ, mɛi ni kɛɛ anyɛŋ ale kɛji Nyɔŋmɔ yɛ aloo ebɛ, kɛ mɛi ni heɔ sutsakemɔ amɛyeɔ lɛ bɔɔ mɔdɛŋ akɛ amɛbaakɔne mɛi ayiŋ koni amɛhe amɛye akɛ Nyɔŋmɔ bɛ, aloo kɛ́ eyɛ po lɛ, sɛɛnamɔ ko bɛ he akɛ wɔbaasumɔ lɛ. Amɛkɛɔ akɛ mɛi ni heɔ amɛyeɔ akɛ mɔ ko ni bɔ je lɛ leee nii loo amɛjwɛŋmɔ mli gbeleko. Kɛfata he lɛ, mɛi pii buɔ jeŋ shikpalɔi kwraa fe bɔ ni amɛbuɔ Nyɔŋmɔ, mɔ ni bɔ je lɛ. (Rom. 1:25) Kɛ́ wɔhã nibii ni mɛi ni tamɔ nɛkɛ lɛ wieɔ lɛ ná wɔjwɛŋmɔ nɔ hewalɛ lɛ, wɔbaakpalaŋ kɛje Yehowa he, ni wɔsuɔmɔ lɛ he baajɔ.​—Heb. 3:12.

 8. (a) Mɛɛ shihilɛi ni jeɔ mɔ nijiaŋ wui Yehowa webii kɛkpeɔ? (b) Mɛɛ miishɛjemɔ wiemɔi yɔɔ Lala 136?

⁸ Kɛ́ wɔnijiaŋ je wui lɛ, wɔhemɔkɛyeli lɛ mli baanyɛ agbɔjɔ, ni no baanyɛ ahã suɔmɔ ni wɔyɔɔ kɛhã Nyɔŋmɔ lɛ he ajɔ. Akɛni wɔyɛ Satan jeŋ fɔŋ nɛɛ mli hewɔ lɛ, wɔ fɛɛ wɔkɛ shihilɛi ni baanyɛ ahã wɔnijiaŋ aje wui kpeɔ. (1 Yoh. 5:19) Akɛ nɔkwɛmɔnɔ lɛ, amrɔ nɛɛ ni wɔwieɔ lɛ, ekolɛ gbɔlɛ, hela, loo shika he naagbai miisu otsui. Ekolɛ onyɛko otsu nibii komɛi ni kã otsui nɔ lɛ ahe nii, loo ookpa nibii komɛi gbɛ, shi amɛbako mli. Ofainɛ, kaahã naagbai nɛɛ eko kwraa hã onu he kɔkɔɔkɔ akɛ Yehowa ekwa bo. Moŋ lɛ, jwɛŋmɔ miishɛjemɔ wiemɔi, tamɔ nɔ ni jeɔ kpo yɛ Lala 136:23 lɛ anɔ. Jɛmɛ kɛɔ akɛ: “Mɔ ni kai wɔ, be ni wɔfee butuu lɛ; ejaakɛ naanɔ emɔbɔnalɛ [loo esuɔmɔ ni tsakeee lɛ] hiɔ shi kɛyaa.” Lɛɛlɛŋ, Yehowa jieɔ suɔmɔ ni tsakeee kpo etsɔɔ etsuji be fɛɛ be. No hewɔ lɛ, wɔbaanyɛ wɔná nɔmimaa akɛ, kɛ́ wɔsɔle ‘wɔkpa lɛ fai’ ni eye ebua wɔ lɛ, ebaabo wɔ toi ni ehã wɔ hetoo.​—Lala 116:1; 136:24-26.

 9. Mɛni Paulo fee koni suɔmɔ ni eyɔɔ kɛhã Nyɔŋmɔ lɛ he akajɔ?

⁹ Bɔfo Paulo jwɛŋ bɔ ni Yehowa yeɔ ebuaa lɛ daa lɛ nɔ, ni enɛ waje lɛ. Ewie akɛ: “Yehowa ji miyelikɛbualɔ; misheŋ gbeyei. Mɛni gbɔmɔ baanyɛ afee mi?” (Heb. 13:6) Paulo ná nɔmimaa akɛ, Yehowa sumɔɔ lɛ ni ebaakwɛ lɛ, ni enɛ ye ebua lɛ ni enyɛ ekpee shihilɛi ni jaraa ni ekɛkpe lɛ anaa. Ehãaa naagbai ni ekɛkpe lɛ aje enijiaŋ wui. Anɔkwa, be ni awo lɛ tsuŋ po lɛ, eŋmala woji kɛwo enyɛmimɛi Kristofoi lɛ hewalɛ. (Efe. 4:1; Fil. 1:7; File. 1) Yɛ kai ni ekɛkpe lɛ fɛɛ amli lɛ, suɔmɔ ni eyɔɔ kɛhã Nyɔŋmɔ lɛ he ejɔɔɔ, ejaakɛ etee nɔ ekɛ ehiɛ fɔ̃ “miishɛjemɔ fɛɛ Nyɔŋmɔ lɛ,” mɔ ni “shɛjeɔ wɔmii yɛ wɔjaramɔ shihilɛi fɛɛ mli” lɛ nɔ. (2 Kor. 1:3, 4) Mɛɛ gbɛ nɔ wɔbaanyɛ wɔkase Paulo koni suɔmɔ ni wɔyɔɔ kɛhã Yehowa lɛ he akajɔ?

10. Mɛni wɔbaanyɛ wɔfee koni suɔmɔ ni wɔyɔɔ kɛhã Yehowa lɛ he akajɔ?

¹⁰ Paulo wie nɔ kome ni he hiaa waa ni wɔbaanyɛ wɔfee koni suɔmɔ ni wɔyɔɔ kɛhã Yehowa lɛ he akajɔ lɛ he yɛ wolo ko ni eŋma lɛ mli. Ewie akɛ: “Nyɛsɔlea daa.” Yɛ wolo kroko ni eŋma sɛɛ mli lɛ mli lɛ, ewie akɛ: “Nyɛhiɛa sɔlemɔ mli daa.” (1 Tes. 5:17; Rom. 12:12) Kɛ́ wɔsɔle lɛ, wɔkɛ Yehowa miiwie, ni enɛ hãa wekukpaa kpakpa hiɔ wɔ kɛ lɛ teŋ. (Lala 86:3) Kɛ́ wɔhe be wɔfɔse wɔtsuiŋ susumɔi wɔshwie wɔ-Tsɛ ni yɔɔ ŋwɛi ni ‘boɔ sɔlemɔi atoi’ lɛ hiɛ, ni wɔhã ele bɔ ni wɔnuɔ he wɔhãa diɛŋtsɛ lɛ, wekukpaa ni yɔɔ wɔ kɛ lɛ teŋ lɛ mli baawa. (Lala 65:3) Kɛfata he lɛ, kɛ́ wɔyɔse akɛ Yehowa ehã wɔsɔlemɔi lɛ ahetoo lɛ, wɔbaasumɔ lɛ waa fe tsutsu lɛ po. Wɔbaana akɛ, lɛɛlɛŋ, “ebɛŋkɛɔ mɛi fɛɛ ni tsɛɔ lɛ lɛ.” (Lala 145:18) Kɛ́ wɔná nɔmimaa akɛ Yehowa sumɔɔ wɔ ni ebaaye ebua wɔ lɛ, no baawaje wɔ ni wɔnyɛ wɔkpee kai fɛɛ ni wɔkɛkpeɔ amrɔ nɛɛ kɛ nɔ ni wɔkɛbaakpe wɔsɛɛ lɛ anaa.

11, 12. Mɛni kɛ́ wɔfee lɛ, ebaahã suɔmɔ ni wɔyɔɔ kɛhã nibii ni wɔkaseɔ yɛ Biblia lɛ mli lɛ mli awa?

¹¹ Anɔkwa Kristofoi sumɔɔ anɔkwale lɛ ni amɛbuɔ lɛ akɛ ejara wa. Nyɔŋmɔ Wiemɔ lɛ mli wɔnaa anɔkwale lɛ yɛ. Yesu sɔle ehã e-Tsɛ akɛ: “Owiemɔ lɛ anɔkwale ni.” (Yoh. 17:17) No hewɔ lɛ, ja wɔkase Biblia lɛ dani wɔbaanyɛ wɔsumɔ anɔkwale lɛ. (Kol. 1:10) Shi jeee nilee lɛ pɛ kɛkɛ ni wɔbaaná lɛ ji nɔ ni he hiaa. Esa akɛ wɔsumɔ anɔkwale lɛ hu, ni mɔ ni ŋma Lala 119 lɛ wie nɔ ko ni baanyɛ aye abua wɔ ni wɔfee nakai. (Kanemɔ Lala 119:97-100.) Ani wɔjwɛŋɔ nibii ni wɔkaneɔ yɛ Biblia lɛ mli lɛ anɔ yɛ gbi lɛ mli fɛɛ? Kɛ́ wɔjwɛŋ anɔkwalei ni wɔkase yɛ Biblia lɛ mli lɛ anɔ, ni wɔkwɛ gbɛi srɔtoi anɔ ni wɔbaanyɛ wɔkɛtsu nii yɛ wɔshihilɛ mli lɛ, wɔhiɛ baasɔ anɔkwalei nɛɛ waa.

¹² Lalatsɛ lɛ wie hu akɛ: “Owiemɔi lɛ ŋɔɔ yɛ midaaŋ akɛ nɔ ko! eŋɔɔ minaa fe wo tete!” (Lala 119:103) Woji, vidioi, kɛ nibii krokomɛi ni Yehowa asafo lɛ feɔ lɛ damɔ Biblia lɛ nɔ, ni amɛtamɔ niyenii ko ni ŋɔɔ. Bei komɛi lɛ, kɛ́ wɔmiiye niyenii ko ni ŋɔɔ waa lɛ, wɔlɛteɔ he koni ekatã mra. Nakai nɔŋŋ esa akɛ wɔto wɔtsui shi be ni wɔkaseɔ nii lɛ. Kɛ́ wɔfee nakai lɛ, nibii ni wɔkaseɔ lɛ baata wɔtsuiŋ, ni ewaŋ kɛhãŋ wɔ akɛ wɔbaakai ni wɔkɛye wɔbua mɛi krokomɛi.​—Jaj. 12:10.

13. Mɛni ye ebua Yeremia koni esumɔ anɔkwalei ni ekase yɛ Nyɔŋmɔ Wiemɔ lɛ mli lɛ? Mɛɛ gbɛ nɔ enɛ ná enɔ hewalɛ?

¹³ Gbalɔ Yeremia hiɛ sɔ anɔkwalei ni ekase yɛ Nyɔŋmɔ Wiemɔ lɛ mli lɛ waa. Ewie akɛ: “Kɛ́ mina owiemɔi lɛ miyeɔ; owiemɔi lɛ ji mimiishɛɛ kɛ mitsui mlifilimɔ; ejaakɛ aŋɔ ogbɛ́i awo mi, Yehowa, Zebaot Nyɔŋmɔ.” (Yer. 15:16) Yeremia bu Nyɔŋmɔ wiemɔi lɛ akɛ nɔ ko ni jara wa waa, ni ejwɛŋ nɔ. Enɛ hewɔ lɛ, ehiɛ sɔ hegbɛ ni ená akɛ Nyɔŋmɔ gbɛ́i kã enɔ lɛ waa diɛŋtsɛ. Ani suɔmɔ ni wɔyɔɔ kɛhã anɔkwalei ni wɔkaseɔ yɛ Biblia lɛ mli lɛ ehã wɔhiɛ esɔ hegbɛ krɛdɛɛ ni wɔná akɛ Nyɔŋmɔ gbɛ́i lɛ kã wɔnɔ, ni wɔji mɛi ni shiɛɔ e-Maŋtsɛyeli lɛ he sane lɛ yɛ naagbee gbii nɛɛ amli?

14. Mɛɛ gbɛ kroko nɔ wɔbaanyɛ wɔtsɔ wɔhã suɔmɔ ni wɔyɔɔ kɛhã nibii ni wɔkaseɔ yɛ Biblia lɛ mli lɛ mli awa?

¹⁴ Yɛ Biblia lɛ ni wɔbaakane kɛ asafo lɛ woji lɛ ni wɔbaakase lɛ sɛɛ lɛ, mɛni ekoŋŋ wɔbaanyɛ wɔfee koni suɔmɔ ni wɔyɔɔ kɛhã anɔkwalei ni wɔkaseɔ yɛ Biblia lɛ mli lɛ mli awa? Esa akɛ wɔya asafoŋ kpeei daa. Daa otsi lɛ, wɔtsɔɔ Buu-Mɔɔ lɛ nɔ wɔkaseɔ Biblia lɛ, ni enɛ ji gbɛ kome ni he hiaa waa ni atsɔɔ nɔ atsɔɔ wɔ nii. Bɔ ni afee ni wɔnyɛ wɔnu nɔ ni abaakase yɛ Buu-Mɔɔ lɛ mli lɛ shishi jogbaŋŋ lɛ, esa akɛ wɔtsɔ hiɛ wɔkase lɛ jogbaŋŋ. Gbɛ kome ni wɔbaanyɛ wɔtsɔ nɔ wɔfee nakai ji, ni wɔbaakane ŋmalɛi fɛɛ ni atsɛ yisɛɛ shi aŋmalako amɛmli wiemɔi lɛ. Gbii etɛ nɛɛ, wɔbaanyɛ wɔná Buu-Mɔɔ lɛ eko yɛ jw.org wɛbsaiti lɛ loo JW Library lɛ nɔ. Buu-Mɔɔ ni wɔnáa yɛ hei nɛɛ ekomɛi yɛ ni kɛ́ onyɛ ŋmalɛi lɛ anɔ nɔŋŋ lɛ, ebaagbele ehã bo. Kɛ́ nomɛi eko wɔkɛtsuɔ nii jio, wolo lɛ diɛŋtsɛ wɔkɛtsuɔ nii jio lɛ, esa akɛ wɔto wɔtsui shi wɔkane ŋmalɛi nɛɛ jogbaŋŋ ni wɔjwɛŋ nɔ. Kɛ́ wɔfee nakai lɛ, suɔmɔ ni wɔyɔɔ kɛhã nibii ni wɔkaseɔ yɛ Biblia lɛ mli lɛ mli baawa.​—Kanemɔ Lala 1:2.

15, 16. (a) Mɛɛ famɔ Yesu kɛhã wɔ yɛ Yohane 13:34, 35? (b) Mɛɛ tsakpãa yɔɔ suɔmɔ ni wɔyɔɔ kɛhã wɔnyɛmimɛi lɛ kɛ suɔmɔ ni wɔyɔɔ kɛhã Nyɔŋmɔ kɛ Biblia lɛ teŋ?

¹⁵ Gbi gbɛkɛ ni enɔ jetsɛremɔ lɛ abaagbe Yesu lɛ, ekɛɛ ekaselɔi lɛ akɛ: “Miihã nyɛ kitã hee akɛ nyɛsumɔsumɔa nyɛhe; bɔ ni misumɔ nyɛ lɛ, nyɛ hu nyɛsumɔsumɔa nyɛhe nakai nɔŋŋ. Kɛji nyɛsumɔɔ nyɛhe lɛ, no mɛi fɛɛ kɛbaale akɛ mikaselɔi ji nyɛ.”​—Yoh. 13:34, 35.

¹⁶ Suɔmɔ ni wɔyɔɔ kɛhã wɔnyɛmimɛi lɛ kɛ suɔmɔ ni wɔyɔɔ kɛhã Yehowa lɛ yɛ tsakpãa. Anɔkwa, wɔnyɛŋ wɔsumɔ Nyɔŋmɔ ni wɔshi wɔnyɛmimɛi lɛ. Bɔfo Yohane ŋma akɛ: “Mɔ ni sumɔɔɔ enyɛmi ní enaa lɛ lɛ, enyɛŋ esumɔ Nyɔŋmɔ ní enaaa lɛ lɛ.” (1 Yoh. 4:20) Kɛfata he lɛ, suɔmɔ ni wɔyɔɔ kɛhã Yehowa kɛ wɔnyɛmimɛi lɛ kɛ suɔmɔ ni wɔyɔɔ kɛhã Biblia lɛ yɛ tsakpãa. Mɛni hewɔ wɔkɛɔ nakai? Ejaakɛ Biblia lɛ fãa wɔ ni wɔsumɔ Nyɔŋmɔ kɛ wɔnyɛmimɛi, ni akɛni wɔsumɔɔ anɔkwalei ni wɔkaseɔ yɛ Biblia lɛ mli lɛ hewɔ lɛ, wɔboɔ famɔi nɛɛ atoi.​—1 Pet. 1:22; 1 Yoh. 4:21.

17. Mɛni ji nibii komɛi ni wɔbaanyɛ wɔfee kɛtsɔɔ akɛ wɔsumɔɔ wɔnyɛmimɛi lɛ?

¹⁷ Kanemɔ 1 Tesalonikabii 4:9, 10. Mɛni ji nibii komɛi ni wɔbaanyɛ wɔfee kɛtsɔɔ akɛ wɔsumɔɔ wɔsafoŋbii lɛ? Wɔbaanyɛ wɔto tsɔne he gbɛjianɔ wɔhã nyɛmi ko ni eda yɛ afii amli lɛ koni enyɛ eba asafoŋ kpeei. Ekolɛ wɔbaanyɛ wɔsaa nɔ ko ni efite yɛ nyɛmi yoo okulafo ko shĩa lɛ wɔhã lɛ. (Yak. 1:27) Wɔnyɛmimɛi lɛ ekomɛi anijiaŋ eje wui, amɛhao, loo amɛkɛ naagbai krokomɛi miikpe. Ehe baahia ni wɔná dekã wɔhã amɛ ni wɔwo amɛ hewalɛ ni wɔshɛje amɛmii. (Abɛi 12:25; Kol. 4:11) Kɛ́ wɔtsɔ wɔwiemɔ kɛ wɔnifeemɔ nɔ wɔhã “mɛi ni etsɔmɔ wɔwekumɛi yɛ hemɔkɛyeli lɛ mli lɛ” lɛ na akɛ wɔsusuɔ amɛhe waa lɛ, no baatsɔɔ akɛ wɔsumɔɔ amɛ lɛɛlɛŋ.​—Gal. 6:10.

18. Mɛni baaye abua wɔ ni wɔsaa naagbai bibii ni baa wɔ kɛ wɔnyɛmimɛi Kristofoi lɛ ateŋ?

¹⁸ Biblia lɛ gba akɛ, yɛ jeŋ fɔŋ nɛɛ “naagbee gbii lɛ” amli lɛ, mɛi pii baafo amɛ pɛ amɛnɔ mli, ni amɛhiɛ baakɔ̃ nii anɔ. (2 Tim. 3:1, 2) No hewɔ lɛ akɛ Kristofoi lɛ, esa akɛ wɔmia wɔhiɛ waa ni wɔhã suɔmɔ ni wɔyɔɔ kɛhã Nyɔŋmɔ, anɔkwalei ni wɔkase yɛ Biblia lɛ mli lɛ, kɛ wɔnyɛmimɛi lɛ mli aya nɔ awa. Ekolɛ bei komɛi lɛ, naagbai bibii baaba wɔ kɛ wɔnyɛmimɛi Kristofoi lɛ ateŋ. Kɛ̃lɛ, kɛ́ wɔhã suɔmɔ tsirɛ wɔ ni wɔsaa naagbai fɛɛ ni baa wɔ kɛ wɔnyɛmimɛi lɛ ateŋ lɛ, asafo muu lɛ fɛɛ baaná he sɛɛ waa! (Efe. 4:32; Kol. 3:14) No hewɔ lɛ, nyɛhãa wɔyaa nɔ wɔsumɔa Yehowa, e-Wiemɔ lɛ, kɛ wɔnyɛmimɛi Kristofoi lɛ waa, ni wɔtswa wɔfai shi akɛ, wɔhãŋ wɔsuɔmɔ lɛ he ajɔ kɔkɔɔkɔ!