Ani Naagbee Gbii lɛ Nɛ Lɛlɛŋ?

OTA lɛlɛ ko yitsogbɛ beni eshɛɔ faa ko fã ni efee hamahama lɛ. Tɛi wuji komɛi eje kpo yɛ nu ni hoɔ waa ni etswaa afũi kɛshwãa lɛ mli. Oobɔ mɔdɛŋ ni owiri kɛtsɔmɔ tɛi lɛ amli koni okashi eko. Esa akɛ mɔ ni ta osɛɛ lɛ amɔ lampado lɛ mli jogbaŋŋ koni ekɛye ebua kɛkudɔ lɛlɛ lɛ, shi niiashikpamɔ bibioo pɛ eyɔɔ. Nɔ ni ehiii fe fɛɛ ji akɛ, ohiɛɛɛ gbɛtsɔɔmɔ wolo, no hewɔ lɛ oleee akɛ nɛkɛ hei ni emamɔ enaa shi yɛ faa lɛ mli nɛɛ baatsa nɔ kɛyabote hei ni nu lɛ miiho yɔɔ yɛ, loo ebaaya eyabote jɔɔ mli.

Enɛ jeee nifeemɔ ni yɔɔ miishɛɛ, aloo jeee nakai? No hewɔ lɛ nyɛhaa wɔtsakea. Ŋɔɔ lɛ akɛ gbɛtsɔɔlɔ ko ni yɔɔ niiashikpamɔ waa, mɔ ni le faa nɛɛ mli tɛi lɛ fɛɛ, kɛ hei ni faa lɛ gbaa afã yɛ lɛ hu fɛɛ fata ohe. Ele kɛtsɔ hiɛ kwraa akɛ nyɛmiibɛŋkɛ nɛkɛ he ni faa lɛ mãa enaa shi kɛboteɔ jɔɔ mli yɛ nɛɛ, ele bɔ ni ebaagbe naa eha, ni ele bɔ ni ebaafee ni ekudɔ lɛlɛ lɛ kɛtsɔ mli. Ani onuŋ he akɛ oyɛ shweshweeshwe kwraa fe tsutsu lɛ?

Lɛlɛŋ, wɔ fɛɛ wɔyɛ haomɔ shihilɛ ni tamɔ nɛkɛ mli. Wɔnaa wɔhe yɛ adesa yinɔsane be ni mli wa fe fɛɛ mli, shi jeee wɔtɔmɔ hã wɔyaje shihilɛ nɛɛ mli. Mɛi babaoo bɛ be sɛɛkɛlɛ ni shihilɛ lɛ kɛbaaya nɔ nɛkɛ lɛ hesusumɔ ko kwraa, kɛji ekolɛ shihilɛ lɛ baahi, aloo gbɛ ni hi fe fɛɛ ni aaatsɔ nɔ ahi shi yɛ mli. Shi esaaa ni wɔnuɔ he akɛ wɔlaaje loo wɔnyɛŋ nɔ ko wɔfee. Wɔ Bɔlɔ lɛ eha wɔ gbɛtsɔɔmɔ—nɔ ni gba yinɔsane mli be fɔŋ nɛɛ efɔ shi, ni egbaa bɔ ni ebaaba naagbee eha, ni ekɛ gbɛtsɔɔmɔ ni he hiaa wɔ bɔni afee ni wɔyi ana wala lɛ haa wɔ. Nakai gbɛtsɔɔmɔ lɛ ji wolo ko, Biblia lɛ. E-Ŋmalɔ, Yehowa Nyɔŋmɔ, tsɛɔ lɛ diɛŋtsɛ ehe akɛ Tsɔɔlɔ Kpeteŋkpele, ni ekɛ nɔmimaa kɛɔ wɔ kɛtsɔɔ Yesaia nɔ akɛ: “Otoii hu aaanu wiemɔ ko yɛ osɛɛ akɛ: ‘Gbɛ lɛ nɛ! nyɛnyiɛa nɔ!’ ninejurɔgbɛ nyɛtsɔ jio, abɛkugbɛ nyɛtsɔ jio.” (Yesaia 30:20, 21) Ani obaasumɔ gbɛtsɔɔmɔ ni tamɔ nɛkɛ? No lɛ ha wɔsusu he akɛ ani Biblia lɛ gba bɔ ni wɔgbii nɛɛ baafee aha lɛ efɔ shi lɛlɛŋ lo.

Yesu Sɛɛnyiɛlɔi lɛ Bi Sane ko ni Shishinumɔ Yɔɔ He

Eka shi faŋŋ akɛ Yesu sɛɛnyiɛlɔi lɛ anaa ekpɛ amɛhe. Etsɛko tsɔ ni Yesu kɛɛ amɛ, ni ema nɔ mi eha amɛ yɛ wiemɔ ni mli kã shi faŋŋ mli akɛ, abaakpata Yerusalem sɔlemɔtsui fɛfɛji lɛ ahiɛ kwraa! Gbalɛ ni tamɔ nɛkɛ ha amɛnaa kpɛ amɛhe. No sɛɛ be fioo ko, beni amɛtara shi yɛ Mu Gɔŋ lɛ nɔ lɛ, kaselɔi lɛ ateŋ mɛi ejwɛ bi Yesu akɛ: “Kɛɛmɔ wɔ, Mɛɛ be mli nibii nɛɛ baaba, ni mɛni baafee ba ni oba lɛ kɛ nibii agbɛjianɔtoo lɛ naagbee lɛ he okadi?” (Mateo 24:3, NW; Marko 13:1-4) Kɛji amɛyoo sɛɛ jio, amɛyooo sɛɛ jio, Yesu hetoo lɛ baakɔ shihilɛi ni fa fe ekome he.

Yerusalem sɔlemɔtsu lɛ hiɛkpatamɔ lɛ kɛ Yudafoi anibii agbɛjianɔtoo lɛ naagbee lɛ, kɛ be mli ni Kristo eba lɛ kɛ jeŋ muu fɛɛ nibii agbɛjianɔtoo lɛ naagbee lɛ jeee nɔ koome lɛ nɔŋŋ. Shi kɛlɛ, yɛ ehetoo kakadaŋŋ lɛ mli lɛ, Yesu kɛ ŋaalee hã sanebimɔ lɛ fãi sɔrɔtoi nɛɛ fɛɛ ahetoo. Ekɛɛ amɛ bɔ ni shihilɛ lɛ baatamɔ aha dani Yerusalem hiɛkpatamɔ lɛ baaba; ekɛɛ amɛ nɔ ni esa akɛ amɛkpa gbɛ akɛ je lɛŋ shihilɛ baafee yɛ be mli ni eba, beni ebaaye nɔ akɛ Maŋtsɛ yɛ ŋwɛi, ní no mli lɛ eshwɛ fioo ni ekɛ je lɛŋ nibii agbɛjianɔtoo muu lɛ fɛɛ baaba enaagbee lɛ.

Yerusalem Naagbee Lɛ

Klɛŋklɛŋ lɛ, susumɔ nɔ ni Yesu wie yɛ Yerusalem kɛ esɔlemɔtsu lɛ he lɛ he okwɛ. Egba jaramɔ bei ni mli wa waa, ni baaba je lɛŋ maŋtiasei wuji lɛ ateŋ ekome nɔ lɛ efɔ shi, nɔ ni fa fe afii nyɔŋmai etɛ kɛtsɔ hiɛ. Kadimɔ ewiemɔi ni aŋmala ashwie shi yɛ Luka 21:20, 21 (NW) lɛ titri: “Kɛ nyɛna akɛ asraafoi egba ebɔle Yerusalem he lɛ, no lɛ nyɛnaa nyɛlea akɛ emaŋfɔ-feemɔ ebɛŋkɛ. No lɛ ha mɛi ni yɔɔ Yudea lɛ aje shishi ajo foi aya gɔji lɛ anɔ, ni mɛi ni yɔɔ maŋ lɛŋ lɛ aje kpo, ni mɛi ni yɔɔ akrowai lɛ akaba mli.” Kɛji abaaba ababɔle Yerusalem he, ni asraafoi baagba amɛbɔle ehe lɛ, no lɛ te “mɛi ni yɔɔ maŋ lɛŋ” lɛ aaafee tɛŋŋ “aje kpo,” taakɛ Yesu efa amɛ akɛ amɛfee lɛ? Eka shi faŋŋ akɛ, Yesu miitsɔɔ akɛ hegbɛ ko naa baagbele kɛha amɛ. Ani eba lɛ nakai?

Yɛ afi 66 Ŋ.B. lɛ Roma asraafoi ni yɔɔ Cestius Gallus famɔ shishi lɛ, ye Yudafoi atuatselɔi asraafoi lɛ anɔ kunim ni amɛshwie amɛ kɛku sɛɛ kɛtee Yerusalem, ni amɛtsĩ amɛnaa amɛwo maŋtiase lɛ mli. Romabii lɛ tutua amɛ kɛba maŋtiase lɛ mli diɛŋtsɛ ni amɛtee shɔŋŋ kɛyashɛ sɔlemɔtsu lɛ gbogbo lɛ he tɔ̃ɔ. Shi no mli nɔŋŋ kɛkɛ ni Gallus kɛ famɔ ha esraafoi lɛ ni amɛfee nɔ ko ni yɔɔ naakpɛɛ waa. Efã amɛ akɛ amɛgbala amɛhe shi! Yudafoi asraafoi ni woɔ amɛhe nɔ lɛ je kpo kɛnyiɛ amɛsɛɛ ni amɛyagbe amɛ henyɛlɔi Romabii ni joɔ foi lɛ ekomɛi. Nɛkɛ gbɛ nɔ tsɔ̃, ni hegbɛ ni Yesu gba efɔ shi lɛ naa gbele. Anɔkwa Kristofoi bo ekɔkɔbɔɔ lɛ toi ni amɛjo foi kɛshi Yerusalem. Yiŋkpɛɛ ni nilee yɔɔ mli nɛ, ejaakɛ afii ejwɛ pɛ sɛɛ lɛ, Roma asraafoi lɛ ku amɛsɛɛ amɛba ekoŋŋ, ni Tatsɛ Tito nyiɛ amɛhiɛ. Ehiii foijee yɛ enɛ mli.

Roma asraafoi lɛ babɔle Yerusalem he kɛkpe ekoŋŋ; amɛkɛ tsei ni ajɔ naa piɔpiɔ fo afabaŋ amɛwo maŋ lɛ he fɛɛ. Yesu egba efɔ shi momo yɛ Yerusalem he akɛ: “Ogbii miiba, ni ohenyɛlɔi lɛ aaatsa bu awo ohe, ni amɛaabɔleo kpula ni amɛaasa oyi yɛ he fɛɛ he.”a (Luka 19:43) Etsɛɛɛ kwraa kɛkɛ ni Yerusalem gbee shi; akpata esɔlemɔtsu ni yɔɔ fɛo waa lɛ hiɛ kwraa. Yesu wiemɔi lɛ amli nɔ fɛɛ nɔ ba mli fitsofitso kɛmɔ shi!

Shi, nibii babaoo yɛ Yesu jwɛŋmɔ mli, fe Yerusalem hiɛkpatamɔ kɛkɛ. Ekaselɔi lɛ ebabi lɛ ba ni eba lɛ hu he okadi. No mli lɛ amɛleee amɛ sanebimɔ lɛ mlilɛɛmɔ, shi enɛ kɔɔ be mli ni akɛ lɛ baata maŋtsɛsɛi nɔ koni eye nɔ akɛ Maŋtsɛ yɛ ŋwɛi lɛ he. Mɛni ji nɔ ni egba efɔ shi?

Ta yɛ Naagbee Gbii lɛ Amli

Kɛji okane Mateo yitsei 24 kɛ 25, Marko yitso 13, kɛ Luka yitso 21 lɛ, obaana odaseyeli ni tsɔɔ faŋŋ akɛ Yesu miiwie wɔyinɔ nɛɛ he. Egba be ni tai baate shi efɔ shi—jeee “tai kɛ tai atatsĩi” ni efite adesai ayinɔsane yɛ bei fɛɛ mli lɛ kɛkɛ, shi moŋ tai ni tsɔɔ ‘maŋ ni ete shi ewo maŋ kɛ maŋtsɛyeli hu ni ete shi ewo maŋtsɛyeli’—hɛɛ, majimaji ateŋ tai wuji.—Mateo 24:6-8.

Susumɔ bɔ ni tawuu etsake yɛ wɔ afii oha nɛɛ mli lɛ he fioo okwɛ. Tsutsu beni ta tsɔɔ asraafoi ni damɔ shi kɛha jeŋmaji enyɔ ni teɔ shi woɔ amɛhe lɛ ni kɛ amɛhe ekpe kɛha nɔmɔ, ni kɛ klantei bamɔ̃ɔ amɛhe loo amɛtswiaa amɛhe tui po yɛ tawuu hé lɛ, no kɛkɛ po yɛ gbeyei waa diɛŋtsɛ. Shi Ta Kpeteŋkpele lɛ fɛ yɛ afi 1914. Jeŋmaji lɛ tsara nɔ amɛkɛ amɛhe wo nɔmɔ lɛ mli, ákɛ shihilɛ ni saa mɔ fɛɛ mɔ he—klɛŋklɛŋ jeŋ fɛɛ ta. Afee tawuu nibii ni lɛ diɛŋtsɛ etsuɔ nii koni akɛgbe gbɔmɛi babaoo, koni anyɛ atswa kɛjɛ hei ni yɔɔ shɔŋŋ hu. Tui ni tswaa tuŋtɛi babaoo shikome tswia tuŋtɛi kɛtee hei ni ataoɔ ni eya lɛ pɛpɛɛpɛ; mustard gas ni akɛwuɔ ta lɛ shã, ni epiŋ mɛi, ni eje mɛi komɛi kpá, ni egbe asraafoi akpei abɔ; tawuu tsɔnei miigbɛɛ kɛmiiho yɛ henyɛlɔi ateŋ ni mɔbɔnalɛ bɛ mli, ni tawuu tsɔnei nɛɛ anɔ tui wuji lɛ miigbɛɛ. Akɛ kɔɔyɔŋ lɛlɛ kɛ nu shishi tawuu lɛlɛ hu tsu nii—amɛji bɔ ni amɛbaatsɔmɔ yɛ sɛɛ mli lɛ he okadi bibioo ko kɛkɛ.

Jeŋ Ta II mli wa kɛyashɛ he ni adesa jwɛŋmɔ shɛɛɛ he—yɛ anɔkwale mli lɛ, eha nɔ ni awu kɛtsɔ hiɛ lɛ fee bibioo kwraa, ni egbe gbɔmɛi akpekpei nyɔŋmai abɔ. Lɛji wuji ni kɔɔyɔŋ lɛji mamɔ̃ɔ nɔ, kɛ lɛji ni eloo asraafoi babaoo ni yifalɛ miihe ashɛ maŋ muu, nyiɛ ŋshɔi lɛ ahiɛ ni amɛŋmɛɛɔ tawuu kɔɔyɔŋ lɛji ahe ni kɔɔyɔŋ lɛji nɛɛ hu jɛɔ ŋwɛi amɛŋmɛɛɔ okpɛlɛmii ahe amɛshwieɔ amɛ henyɛlɔi anɔ. Ŋshɔ shishi tawuu lɛji tswiaa henyɛlɔi alɛji okpɛlɛmii ni amɛbutuɔ amɛ. Ni atswia atɔmik okpɛlɛmii, ni eko fɛɛ eko ni bagbeɔ shi lɛ kpataa mɛi akpei abɔ awala hiɛ! Taakɛ Yesu gba efɔ shi lɛ, “gbeyei nibii” eba, ni ekadi tawuu yinɔ nɛɛ lɛlɛŋ.—Luka 21:11.

Ani tawuu nɔ egbɔ kɛjɛ Jeŋ Ta II sɛɛ kɛbaa nɛɛ? Dabi kwraa. Bei komɛi lɛ, awuɔ tai diɛŋtsɛ babaoo yɛ afi kome mli—yɛ 1990 afii nyɔŋma nɛɛ po mli—ni egbeɔ gbɔmɛi ni yifalɛ shɛɔ akpekpei abɔ. Ni tsakemɔ eba yɛ mɛi titri ni gboiɔ yɛ ta mli lɛ agbɛfaŋ. Mɛi ni gboiɔ lɛ ateŋ mɛi babaoo jeee asraafoi dɔŋŋ. Ŋmɛnɛ, mɛi ni gboiɔ yɛ ta mli lɛ ateŋ mɛi babaoo—yɛ anɔkwale mli lɛ, amɛteŋ mɛi ni fa fe oha mlijaa 90—ji maŋbii foji.

Okadi lɛ He Kadimɔ Nii Krokomɛi

Ta ji okadi ni Yesu tsĩ tã lɛ fã kome pɛ. Ebɔ kɔkɔ akɛ “hɔji” hu baaba. (Mateo 24:7) Ni nakai ji bɔ ni eba lɛ, eyɛ mli akɛ ewa akɛ aaahe aye akɛ shikpɔŋ lɛ baa niyenii babaoo fe bɔ ni he hiaa ni akɛlɛ adesai fɛɛ, eyɛ mli akɛ okwaayeli he nilee etee hiɛ babaoo fe bei fɛɛ ni eho yɛ adesai ayinɔsane mli, eyɛ mli akɛ gbɛi ni atsɔɔ nɔ afãa gbɛ oya yɛ ni hãa anyɛɔ akɛ niyenii yaa he fɛɛ he yɛ je lɛŋ. Yɛ enɛɛmɛi fɛɛ sɛɛ lɛ, hɔmɔ yeɔ aaafee je nɛŋ gbɔmɛi ayifalɛ mlijaa enumɔ mli ekome daa gbi.

Yesu gba efɔ shi hu akɛ “gbele helai” baaba “hei sɔrɔtoi fɛɛ.” (Luka 21:11) Shikome ekoŋŋ lɛ, wɔyinɔ nɛɛ kɛ shihilɛ ni yɔɔ naakpɛɛ, ni tamɔ nɔ ni anyɛŋ ahe aye ekpe—tsofafeemɔ kpakpa fe bei fɛɛ ni eho, hiɛyaa kpele ni eba yɛ tsɔnei ahe nitsumɔ mli, tsofai ni akɛtsĩɔ helai babaoo ni fɔɔ mɛi mɔ̃mɔ̃ lɛ anaa; ni kɛlɛ, helai ni kɛ gbele baa lɛ etee nɔ efa babaoo nakai nɔŋŋ, bɔ ni anako shihilɛ ni tamɔ nakai dã. Spanish Influenza hela lɛ nyiɛ Jeŋ Ta I sɛɛ kɛba oya nɔŋŋ, ni egbe gbɔmɛi babaoo fe bɔ ni ta lɛ gbe. Hela lɛ tsɛŋeɔ mɔ aahu akɛ yɛ maŋtiasei tamɔ New York nɛkɛ lɛ, anyɛɔ abuɔ mɔ shika gbele fɔ loo awoɔ mɔ tsuŋ po yɛ tsinemɔ hewɔ kɛkɛ! Ŋmɛnɛ, kansa kɛ tsui hela gbeɔ gbɔmɛi akpekpei abɔ daa afi—gbele helai diɛŋtsɛ nɛ. Ni AIDS miiya nɔ eekpata gbɔmɛi awala hiɛ, ni eji hela ni tsofafeemɔ mli nilee bɛ enaa tsabaa.

Eyɛ mli akɛ Yesu wie naagbee gbii lɛ ahe yɛ yinɔsane kɛ maŋkwramɔŋ shihilɛi ni baakpele je lɛŋ fɛɛ lɛ gbɛfaŋ moŋ, shi bɔfo Paulo gbala jwɛŋmɔ kɛtee shihilɛ mli naagbai kɛ sui komɛi ni baagbɛ ashwã he fɛɛ he lɛ anɔ titri. Nɔ ni eŋma lɛ fã ko kaneɔ akɛ: “Ná enɛ ole akɛ naagbee gbii lɛ anɔ lɛ jaramɔ bei baaba. Ejaakɛ gbɔmɛi aaatsɔmɔ hesuɔlɔi, . . . mɛi ni he tseee, mɛi ni edɔɔɔ mɔ he, kpaŋmɔ mlikulɔi, . . . mɛi ni nyɛɛɛ amɛkɔnɔ nɔ amɛye, mɛi ni hiɛ yɔɔ la, mɛi ni sumɔɔɔ ekpakpa, sɛɛgbɛtsɔɔlɔi, yiwalɔi, henɔwolɔi, mɛi ni sumɔɔ shwɛmɔ kɛ ŋɔɔmɔ fe Nyɔŋmɔ.”—2 Timoteo 3:1-5.

Ani wiemɔi nɛɛ tamɔ wiemɔi komɛi ni onu dã? Susumɔ adesai ashihilɛ fitemɔ ni yɔɔ ŋmɛnɛ je nɛɛ mli lɛ fã kome pɛ he okwɛ—weku mligbalamɔ. Wekui babaoo ni mli egbala, gbalashihilɛ mli hefatalɔi ni ayiɔ amɛ, gbekɛbii ni afeɔ amɛ niseniianii, kɛ fɔlɔi ni amɛdara yɛ afii amli ni awaa amɛ yi—kwɛ bɔ ni shihilɛi nɛɛ tsɔɔ lɛlɛŋ akɛ gbɔmɛi “edɔɔɔ mɔ he,” ni amɛji “mɛi ni hiɛ yɔɔ la,” kɛ “sɛɛgbɛtsɔɔlɔi” po, “mɛi ni sumɔɔɔ ekpakpa”! Hɛɛ, wɔnaa subaŋi nɛɛ akɛ egbɛ eshwã he fɛɛ he ŋmɛnɛ.

Ani Wɔyinɔ Nɛɛ Ji Nɔ ni Agba yɛ He Afɔ Shi Lɛ?

Shi, ekolɛ obaabi akɛ, ‘Ani nɛkɛ shihilɛi nɛɛ haoko adesai aahu be fɛɛ be? Te wɔfeɔ tɛŋŋ wɔleɔ akɛ wɔ ŋmɛnɛŋmɛnɛ beaŋ yinɔ nɛɛ ji nɔ ni agba yɛ he afɔ̃ shi yɛ blema gbalɛi nɛɛ amli?’ Hã wɔsusu odaseyeli gbɛi etɛ ni maa nɔ mi akɛ Yesu miiwie wɔbe nɛɛ he lɛ he wɔkwɛ.

Klɛŋklɛŋ lɛ, eyɛ mli akɛ ená emlibaa fioo ko ni ba mra yɛ Yerusalem kɛ esɔlemɔtsu lɛ hiɛkpatamɔ lɛ mli moŋ, shi eka shi faŋŋ akɛ Yesu wiemɔ lɛ gbalaa jwɛŋmɔ kɛyaa wɔsɛɛ be ni tekeɔ nakai be lɛ nɔ. Aaafee afii 30 yɛ amanehulu ni kpata Yerusalem hiɛ lɛ sɛɛ lɛ, Yesu jie ninaa ko kpo etsɔɔ bɔfo Yohane ni egbɔ lɛ, ni miitsɔɔ akɛ shihilɛi ni agba yɛ he afɔ̃ shi—ta, hɔmɔ, tsɛŋemɔ hela, kɛ gbele ni jɛɔ mli baa lɛ—baaba yɛ je lɛŋ fɛɛ yɛ wɔsɛɛ be mli. Hɛɛ, jeee he kome pɛ nɛkɛ haomɔi nɛɛ baaba, shi moŋ ebaakpele “shikpɔŋ” muu lɛ fɛɛ nɔ.—Kpojiemɔ 6:2-8.

Nɔ ni ji enyɔ lɛ, Yesu okadi lɛ he kadimɔ nii komɛi miiba mli yɛ afii oha nɛɛ mli yɛ nɔ ni wɔbaanyɛ wɔtsɛ lɛ akɛ gbɛ ni nɔ kwɔ fe fɛɛ nɔ. Akɛ nɔkwɛmɔ nɔ lɛ, ani eeenyɛ eba akɛ tai amli baawa waa fe bɔ ni amɛji kɛjɛ 1914 sɛɛ kɛbaa nɛɛ? Kɛji Jeŋ Ta III baaba, ni nuklea hewalɛi ni yɔɔ ŋmɛnɛ lɛ kɛ amɛ tawuu nibii lɛ fɛɛ baatsu nii lɛ, no lɛ ekolɛ nɔ ni baanyiɛ sɛɛ kɛba lɛ baaha shikpɔŋ lɛ atsɔ shikpɔŋ folo ni eshã—ni adesai aseshi baabule kwraa. Nakai nɔŋŋ hu Kpojiemɔ 11:18 gba efɔ shi akɛ adesai ‘baafite shikpɔŋ lɛ,’ yɛ naagbee gbii nɛɛ amli, beni jeŋmaji lɛ “amli efu” lɛ. Enɛ ji klɛŋklɛŋ kwraa yɛ yinɔsane mli, ni mujiwoo kɛ nibii ni ebɔle wɔ kɛkpe lɛ afitemɔ miiwo shibɔlemɔ ŋulami nɛɛ nɔ hilɛ he gbeyei! No hewɔ lɛ okadi lɛ fã nɛɛ hu miina emlibaa ni da loo kɛmiibɛŋkɛ nɔ ni da fe fɛɛ. Ani tai kɛ mujiwoo baaya nɔ lɛlɛŋ ni emli awo wu aahu kɛyashi beni adesai baakpata amɛ diɛŋtsɛ kɛ shibɔlemɔ ŋulami nɛɛ hiɛ? Dabi; ejaakɛ Biblia lɛ diɛŋtsɛ ewo akpɔ akɛ shikpɔŋ lɛ baahi shi kɛya naanɔ, ni adesai ni yɔɔ jalɛ tsuii lɛ baahi nɔ.—Lala 37:29; Mateo 5:5.

Nɔ ni ji etɛ lɛ, naagbee gbii lɛ ahe okadi lɛ tsɔɔ mɔ yiŋ waa kɛji aasusu fɛɛ he kutuu. Yɛ fɛɛ mli lɛ, kɛ wɔsusu kadimɔ nii ni Yesu tsĩ tã yɛ Sanekpakpai etɛ lɛ amli lɛ, kɛ nɔ ni yɔɔ Paulo niŋmaai lɛ amli, kɛ nɔ ni yɔɔ Kpojiemɔ lɛ ahe lɛ, nɛkɛ okadi nɛɛ hiɛ kadimɔ nii babaoo diɛŋtsɛ. Ekolɛ mɔ ko baawie ashi kadimɔ nii nɛɛ ekomekome, kɛ sane naataamɔ akɛ yinɔi krokomɛi hu kɛ naagbai ni tamɔ nakai nɔŋŋ ekpe, shi kɛji wɔsusu fɛɛ he kutuu lɛ, amɛtsɔɔ yɛ gbɛ ni tɔmɔ ko bɛ mli nɔ akɛ ekɔɔ yinɔ kome pɛ he—wɔyinɔ nɛɛ.

Shi kɛlɛ, mɛni enɛ fɛɛ tsɔɔ? Ani etsɔɔ akɛ Biblia lɛ wieɔ wɔyinɔ nɛɛ he akɛ haomɔ be, ni hiɛnɔkamɔ ko kwraa bɛ? Eka shi faŋŋ akɛ dabi!

Sanekpakpa

Aŋma naagbee gbii lɛ ahe okadi lɛ fãi ni sa kadimɔ waa lɛ ateŋ ekome yɛ Mateo 24:14, akɛ: “Aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.” Yehowa Odasefoi etsu nitsumɔ ko ni yɔɔ sɔrɔto kwraa yɛ adesai ayinɔsane mli, yɛ afii oha nɛɛ mli. Amɛkpɛlɛ Biblia mli shɛɛ sane ni kɔɔ Yehowa Nyɔŋmɔ Maŋtsɛyeli lɛ he lɛ nɔ—nɔ ni eji, bɔ ni eyeɔ nɔ ehaa, kɛ nɔ ni ebaatsu—ni amɛgbɛ nakai shɛɛ sane lɛ amɛshwã shikpɔŋ muu lɛ fɛɛ nɔ. Amɛfee woji ni kɔɔ saneyitso nɛɛ he yɛ wiemɔi ni fa kwraa fe 300 mli, ni amɛkɛtee gbɔmɛi aŋɔɔ yɛ amɛshiai amli aloo yɛ gbɛjegbɛi anɔ loo yɛ amɛ nitsumɔ hei, yɛ shikpɔŋ fɛɛ shikpɔŋ nɔ yɛ je lɛŋ.

Amɛmiiha gbalɛ nɛɛ miiba mli, kɛtsɔ nakai feemɔ nɔ. Shi amɛmiigbɛ hiɛnɔkamɔ hu amɛmiishwã. Kadimɔ akɛ Yesu tsɛ́ enɛ akɛ “sanekpakpa,” jeee sane fɔŋ. Te eeefee tɛŋŋ eba lɛ nakai yɛ nɛkɛ be fɔŋ nɛɛ mli? Ejaakɛ Biblia lɛ shɛɛ sane titri lɛ kɔɔɔ bɔ ni nibii baafite aha yɛ jeŋ momo nɛɛ naagbee lɛ sɛɛ lɛ he. Eshɛɛ sane titri lɛ kɔɔ Nyɔŋmɔ Maŋtsɛyeli lɛ he, ni nakai Maŋtsɛyeli lɛ ewo shi yɛ nɔ ko ni adesa fɛɛ adesa ni sumɔɔ toiŋjɔlɛ lɛ tsui nyaa he waa lɛ he—kpɔmɔ.

Mɛni kwraa ji nakai kpɔmɔ lɛ, ni te ooofee tɛŋŋ ni onine ashɛ nɔ? Ofainɛ susumɔ saji ni nyiɛ sɛɛ, ni kɔɔ saneyitso nɛɛ he lɛ ahe okwɛ.

[Shishigbɛ niŋmai]

[Wiemɔ ni akɔ ni akɛmiitsu nii ni yɔɔ baafa 5]

Gbɔmɛi miitao hetooi kɛha sanebimɔi ni haoɔ mɔ, tamɔ akɛ, Mɛni hewɔ nibii efite kwraa nɛkɛ? Mɛni baaba adesai anɔ wɔsɛɛ?

[Wiemɔ ni akɔ ni akɛmiitsu nii ni yɔɔ baafa 6]

Ŋmɛnɛ, mɛi ni gboiɔ yɛ ta mli lɛ ateŋ mɛi ni fa fe oha mlijaa 90 ji maŋbii foji

[Mfoniri ni yɔɔ baafa 7]

Yesu gbalɛ ni kɔɔ Yerusalem hiɛkpatamɔ lɛ he lɛ mli nɔ fɛɛ nɔ ba mli kɛmɔ shi