Kaaha Ekpakpafeemɔ Miitɔ Bo
“Shi nyɛkahaa ekpakpafeemɔ miitɔa wɔ ejaakɛ kɛ wɔnijiaŋ ejeee wui Iɛ, wɔbaakpa yɛ be ni sa mli.”—GALATABII 6:9.
1. Mɛɛ nitsumɔ Yesu kɛha esɛɛnyiɛlɔi lɛ?
MƐƐ nitsumɔ kpakpa po Kristofoi tsuɔ akɛ amɛjamɔ lɛ fa nɛkɛ! Ehɔ famɔ ni mli ka shi faŋŋ nɛɛ mli akɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ . . . ni nyɛtsɔɔ amɛ ni amɛye nii fiaa ni mikɛɛ nyɛ lɛ nɔ. Ni naa, mi lɛ mikɛ nyɛ yɛ daa kɛyashi jeŋ naagbee lɛ.” (Mateo 28:19, 20) Yesu Kristo diɛŋtsɛ ji mɔ ni kɛ nitsumɔ akɛ aya ni ayatsɔɔ nii yɛ jeŋ muu fɛɛ lɛ ha ekaselɔi lɛ.
2. (a) Mɛni hewɔ wɔbaanyɛ wɔkɛɛ akɛ kaselɔ-feemɔ nitsumɔ lɛ ji nitsumɔ ko ni he hiaa kɛ nitsumɔ kpakpa hu lɛ? (b) Kaselɔfeemɔ nitsumɔ lɛ tsuɔ mɛɛ yiŋtoo he nii?
2 Akɛni kaselɔ-feemɔ nitsumɔ lɛ ji naagbee wiemɔi ni Yesu kɛha eklɛŋklɛŋ kaselɔi lɛ dani ekwɔ kɛtee ŋwɛi lɛ ateŋ ekome hewɔ lɛ, ani eji nitsumɔ ko ni he hiaa fe fɛɛ? Hɛɛ, ejaakɛ emlibaa baahere gbɔmɛi ayiwala. (1 Timoteo 4:16) Enɛ haa efeɔ nitsumɔ kpakpa ni kɛ Biblia mli tsɔsemɔ ni hi haa mɛi ni boɔ Maŋtsɛyeli lɛ he sane lɛ toi lɛ, ni shiɛmɔ nitsumɔ lɛ hɛleɔ mɛi fɛɛ ni efee shikpilikpii lɛ ashi. (Luka 10:10, 11) No hewɔ lɛ, nitsumɔ nɛɛ ni amɛtsuɔ lɛ haa ayɔseɔ anɔkwale Kristofoi taakɛ bɔ ni Yesu tsɔɔmɔi krokomɛi ni amɛaabo toi lɛ feɔ amɛ lɛ.—Yohane 8:31.
3. (a) Te Yesu kaselɔi lɛ here lɛ diɛŋtsɛ enɔkwɛmɔ nɔ lɛ kɛ efɔmɔ lɛ nɔ amɛha tɛŋŋ? (b) Mɛɛ su Yesu tɛo yɛ ekaselɔi lɛ amli?
3 Akɛ Tsɔɔlɔ Kpeteŋkpele lɛ, Yesu to okadi ko ni nɔ bɛ eha esɛɛnyiɛlɔi lɛ. Etsɔɔ nii yɛ faŋŋ mli ni efee kaselɔi kɛtsɔ “maŋtsɛyeli lɛ he sanekpakpa lɛ shiɛmɔ” nɔ. (Mateo 9:35) Yɛ ekasemɔ mli lɛ, esɛɛnyiɛlɔi hee lɛ diɛŋtsɛ batsɔmɔ kaselɔi feelɔi, ejaakɛ anɔkwale kaselɔ ji “mɔ ni kpɛlɛɔ ni eyeɔ ebuaa ni agbɛɔ mɔ kroko tsɔɔmɔi ashwaa.” Kɛjɛ shishijee mli lɛ, amɛ kaselɔ-feemɔ nitsumɔ lɛ bakɔ Yudafoi kɛ mɛi ni amɛtsɔmɔ amɛhe Yudafoi lɛ pɛ he. Shi yɛ bɔ ni gbɔmɛi lɛ sumɔɔɔ shiɛmɔ nɛɛ kwraa ha lɛ fɛɛ sɛɛ lɛ, ani Yesu sɛɛnyiɛlɔi lɛ tsu efamɔ akɛ ‘amɛya daa’ ni ‘amɛkafɔɔ’ lɛ he nii? Hɛɛ, amɛtee “Israel we toi ni elaaje lɛ aŋɔɔ” kɛyashi be mli ni klɛŋklɛŋ Jeŋmajiaŋbii lɛ batsɔmɔ heyelilɔi yɛ afi 36 Ŋ. B. (Mateo 10:5, 6; Bɔfoi lɛ Asaji 5:42) Awie akɛ kaselɔi lɛ ‘ha Yerusalem yi obɔ kɛ amɛtsɔɔmɔ lɛ.’ (Bɔfoi lɛ Asaji 5:28) Amɛŋmɛɛɛ amɛnitsumɔ kpakpa lɛ he. Shi moŋ, amɛtsu he nii yɛ anɔkwayeli mli kɛgbe naa.
“Abɔɔ lɛ ji Je Nɛŋ”
4. Mɛɛ subaŋ Yesu sɛɛnyiɛlɔi lɛ kɛdi amɛnitsumɔ babaoo lɛ sɛɛ?
4 Yesu tsɔɔ akɛ “jeŋmaji fɛɛ” baafata abɔɔ lɛ he. (Mateo 28:19) Yɛ abɛbua ko ni kɔɔ Maŋtsɛyeli dumɔ wu ni atɛo lɛ he lɛ, ekɛɛ: “Abɔɔ lɛ ji je nɛŋ.” (Mateo 13:38) No hewɔ lɛ, Kristofoi baafee Maŋtsɛyeli “odasefoi” amɛha lɛ yɛ he fɛɛ he. ‘Amɛbaaya daa,’ shii abɔ “kɛyashi shikpɔŋ lɛ naagbee hei lɛ.” (Bɔfoi lɛ Asaji 1:8) Wiemɔ lɛ “ta Paulo mli ni eye odase veveeve etsɔɔ,” ni wɔbaanyɛ wɔna nɔmimaa akɛ Kristofoi krokomɛi lɛ hu fee nakai.—Bɔfoi lɛ Asaji 18:5.
5. Yɛ mɛɛ gbɛ nɔ Yesu tsɔɔ akɛ eekpa gbɛ akɛ ekaselɔi lɛ baafee mɛi ni bɛ deka kwraa yɛ odaseyeli nitsumɔ lɛ mli kɛyashi ŋmɛnɛŋmɛnɛ gbɛjianɔtoo nɛɛ naagbee?
5 Yesu kpa gbɛ akɛ odaseyeli nitsumɔ lɛ baahe Kristofoi abe fɛɛ kɛyashi ŋmɛnɛŋmɛnɛ nibii agbɛjianɔtoo nɛɛ naagbee. Enɛ jeɔ kpo yɛ nɔ ni egba efɔ shi yɛ Kristofoi asɔɔmɔ nitsumɔ lɛ kɛ shikpɔji ni akɛbaaya nɔ lɛ mli. Yesu kɛɛ: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.”—Mateo 24:14.
6. Be enyiɛ abaaya nɔ akɛtsu Maŋtsɛyeli-shiɛmɔ nitsumɔ lɛ, ni te esa akɛ enɛ ana su ni wɔhiɛ yɛ he lɛ nɔ hewalɛ aha tɛŋŋ?
6 Beni Yesu kɛ famɔ ha akɛ akɛ he awo Maŋtsɛyeli-shiɛmɔ kɛ kaselɔ-feemɔ nitsumɔ lɛ mli yɛ jeŋ fɛɛ lɛ, no mli lɛ ele akɛ nɛkɛ nitsumɔ kpakpa nɛɛ baashɛ enaagbee yɛ be ko mli, taakɛ eba mli yɛ Yudafoi aŋmɔ lɛ he lɛ. Shi ebaatsu eyiŋtoo he nii. Ni taakɛ ekɛɛ lɛ, “no dani naagbee lɛ aaaba.” No hewɔ lɛ dani naagbee lɛ aaaba lɛ, Yehowa Odasefoi kɛ hekɛnɔfɔɔ kɛ miishɛɛ yaa nɔ yɛ nitsumɔ ni akɛwo amɛdɛŋ lɛ mli. No yeɔ ebuaa amɛ koni amɛya nɔ yɛ nitsumɔ nɛɛ mli yɛ wɔgbii nɛɛ mli aahu kɛyashi eeeba naagbee.
Bɔ ni Atsuɔ Nitsumɔ lɛ Ahaa
7. Mɛɛ saneyitso kadi Yesu sɔɔmɔ nitsumɔ lɛ kɛ ekaselɔi lɛ anɔ lɛ hu?
7 Yesu tsɔɔ eklɛŋklɛŋ kaselɔi lɛ gbɛ ni amɛaatsɔ nɔ amɛtsu amɛmaŋ sɔɔmɔ nitsumɔ lɛ he nii. Amɛkɛ ekaa here efamɔ akɛ “nyɛyaa” lɛ nɔ. Beni etsɔseɔ amɛ kɛha amɛ odaseyeli nitsumɔ lɛ, Yesu kɛɛ: “Shi ni nyɛyaa nɛɛ, nyɛshiɛa nyɛkɛa akɛ: Ŋwɛi Maŋtsɛyeli lɛ eshɛ shi eta.” (Mateo 10:7) Enɛ kɛ Maŋtsɛyeli saneyitso kome too lɛ nɔŋŋ ni kadi esɔɔmɔ nitsumɔ lɛ ha amɛ. Ebaafee sanekpakpa kɛha mɛi ni yɔɔ tsuijurɔ lɛ. Beni Yesu sɛɛnyiɛlɔi lɛ je amɛnitsumɔ lɛ shishi pɛ lɛ, ani ekpa enɔ lɛ? Dabi, yɛ anɔkwale mli lɛ “ni eba mli akɛ, beni Yesu eto ekaselɔi nyɔŋma-kɛ-enyɔ lɛ gbɛjianɔ nɛkɛ egbe naa lɛ, eje jɛmɛ eyatsɔɔ nii ni eshiɛ yɛ amɛmaji lɛ amli.”—Mateo 11:1.
8. (a) Nɛgbɛ ni te Maŋtsɛyeli shiɛlɔi lɛ baafee tɛŋŋ aya gbɔmɛi lɛ aŋɔɔ? (b) Mɛni hewɔ ehi jogbaŋŋ akɛ akɛ sanekpakpa lɛ aaaya mɔ ko shia lɛ? (d) Mɛɛ sɛɛnamɔi yɔɔ kɛ aŋa shiatsɛ lɛ yɛ gbɛ kpakpa nɔ?
8 Nɛgbɛ ni te nɛkɛ Maŋtsɛyeli shiɛlɔi nɛɛ aaafee tɛŋŋ amɛbɛŋkɛ gbɔmɛi lɛ? Yesu kɛɛ amɛ akɛ: “Shi kɛ nyɛmiibote shia lɛ, nyɛŋaa shiabii lɛ.” (Mateo 10:12, New World Translation) Ni akɛ sanekpakpa lɛ aaaya mɔ ko shia lɛ woɔ shiatsɛ lɛ hiɛ nyam, ehaa enaa hegbɛ koni etsu Maŋtsɛyeli lɛ he sane lɛ he nii yɛ lɛ diɛŋtsɛ eshia. Jeee akɛ kusumii ni ji ŋamɔi sɔrɔtoi lɛ ji gbɛ ni hi ni atsɔɔ nɔ ajeɔ sanegbaa shishi pɛ kɛkɛ shi moŋ anaa he sɛɛ ejaakɛ nɛkɛ naanyobɔɔ kɛ miishɛɛ ŋamɔ nɛɛ haa ahereɔ mɔ ko ni afɔko nine atseko lɛ lɛ kɛbaa mli. (Okɛto Mateo 28:9; Luka 1:28 he.) Ogbee ni okɛbaaŋa kɛ mɔ lɛ hetoo yɛ shinaa lɛ naa lɛ hu kɛɔ bo babaoo yɛ mɔ lɛ subaŋ he. Ehe miihia ni oyɔse enɛ dani oya nɔ ejaakɛ nilee ni tamɔ nɛkɛ haa efeɔ mlɛo kɛhaa bo akɛ okɛ owiemɔi aaato shiatsɛ lɛ hiamɔnii ahe.—Okɛto Bɔfoi lɛ Asaji 22:1, 2; 23:6 he.
9. Mɛni tsɔɔ akɛ jeee mɛi fɛɛ baabo Maŋtsɛyeli sane lɛ toi kɛ hiɛsɔɔ, ni mɛni baafee mɛi ni bɛ wiemɔ lɛ he miishɛɛ lɛ asubaŋ?
9 Yesu ha ekaselɔi lɛ le akɛ jeee gbɔmɛi fɛɛ ni yɔɔ shikpɔŋkuku lɛ mli lɛ baahere amɛ. Ekɛɛ: “Shi maŋ fɛɛ maŋ aloo akrowa fɛɛ akrowa mli ni nyɛaatee lɛ, nyɛbia mɔ ni sa shi yɛ jɛi.” Kɛji akɛ mɛi fɛɛ baakpɛlɛ Maŋtsɛyeli he sane lɛ nɔ lɛ, kulɛ ehe ebahiaŋ ni ekɛ wiemɔ “nyɛbia” aloo nyɛtaoa atsu nii. Mɛni baafee mɛi ni naŋ wiemɔ lɛ he miishɛɛ lɛ asubaŋ? “Ni kɛji mɔ ko hereee nyɛ ni ebooo nyɛwiemɔi lɛ atoi lɛ, nyɛjea no shia lɛ aloo no maŋ lɛŋ, ni nyɛkpokpoa nyɛnajiashi mulu lɛ,” nyɛshia yɛ toiŋjɔlɛ mli ni nyɛshia nɔ ni baajɛ mli aba lɛ nyɛhaa Yehowa kojomɔ.—Mateo 10:11, 14.
Bɔ ni Shihilɛ lɛ yɔɔ Ŋmɛnɛ
10. Mɛni awie yɛ Yehowa Odasefoi a-Maŋtsɛyeli-shiɛmɔ nitsumɔ lɛ he?
10 Yɛ Kristofoi anitsumɔ lɛ nɔkpɛlɛmɔ yɛ anɔkwayeli mli lɛ, Yehowa Odasefoi kɛ Maŋtsɛyeli he sane lɛ miikpa jeŋ muu fɛɛ. No hewɔ lɛ A. P. Wisse, ni ji adafitswaa wolo ŋmalɔ ko ni yɔɔ Netherlands lɛ kɛɛ: “Esoro amɛ yɛ gbɔmɛi krokomɛi ahe. Nɛkɛ sɔrɔtofeemɔ nɛɛ fa jɛ ekaa ni amɛkɛ jajeɔ sanekpakpa lɛ. Amɛsusuɔ anɔkwale Kristojamɔ he akɛ ejeee jamɔ kɛ sɔlemɔtsui wuji, kɛ mɛi ni sɔlemɔ lɛ yeɔ amɛnɔ yɛ amɛshikpɔŋ kukuji amli yɛ amɛshihilɛ hei ni amɛjamɔ lɛ biii babaoo ko kɛjɛɛɛ amɛdɛŋ fe ni amɛbaabo toi. Amɛwieɔ tamɔ Paulo wie yɛ faŋŋ mli etsɔɔ mɔ fɛɛ mɔ ni baabo toi lɛ.” Yɛ anɔkwale mli lɛ Yehowa Nyɔŋmɔ ejɔɔ ekaa ni tamɔ nɛkɛ kɛha sɔɔmɔ nitsumɔ lɛ nɔ.
11, 12. (a) Mɛni ejɛ sɔɔmɔ nitsumɔ lɛ mli eba yɛ nyɛsɛɛ afi nɛɛ amli? (b) Yɛ be mli ni wɔyi faa lɛ, mɛni baa yɛ shikpɔŋkuku ni wɔyɔɔ nɔ ni wɔshiɛɔ yɛ mli lɛ amli? (d) Mɛɛ sanebimɔi teɔ shi?
11 Maŋtsɛyeli shiɛlɔi fe 3,000,000 kɛ ekaa tsuɔ nii yɛ shikpɔji fe 210 nɔ bianɛ. Wɔnaa nɔyaa fɛfɛo yɛ kaselɔi heei amli—1,246,204 ni abaptisi amɛ yɛ afii kpawo ni eho lɛ pɛ mli. Yehowa jɔɔmɔ ni yɔɔ mɔdɛŋbɔɔ diɛŋtsɛ nɔ lɛ ka shi faŋŋ. (Yesaia 60:8-10, 22) Ejaakɛ kɛ hoo lɛ, Odasefonyo kome shiɛɔ tsɔɔ gbɔmɛi 300 aloo nɔ ni shɛɛɛ nakai, yɛ maji kɛ ŋshɔkpɔi aaafee 40 nɔ, kɛ aja mli, aloo mɔ kome ni miishiɛ miitsɔɔ shiabii 100! Agbɛnɛ, hei komɛi yɛ tamɔ maji tamɔ Kanada kɛ Guadeloupe nɛkɛ ni kɛ aja mli lɛ, Odasefonyo kome baashiɛ aha gbɔmɛi 45 loo 50 yɛ asafo ni amɛyɔɔ mli lɛ shikpɔŋkuku mli—ni kɛ aja mli lɛ aaafee shiai 15 loo nɔ ni shɛɛɛ nakai kɛha shiɛlɔ fɛɛ shiɛlɔ ni baaya jɛmɛ! Shikpɔŋkukuji nɛɛ pii yɛ ni atsuɔ mli nii daa nyɔŋ nɔ. Yɛ shikpɔji ni gbɔmɛi ni baabo toi lɛ po fa yɛ mli lɛ, amɛmaŋtiase lɛ ekomɛi yɛ ni akɛ odaseyeli nitsumɔ lɛ miikpa mli shii abɔ. Yɛ Seoul, Republic of Korea nɛkɛ lɛ, atsuɔ maŋtiase lɛ shikpɔŋkukuji lɛ ekomɛi amli nii shikome daa gbii enumɔ! Yɛ be mli ni wɔyi faa yɛ yibɔ naa, ni agbɛnɛ yɛ be mli ni Odasefoi babaoo kɛ amɛhe woɔ gbɛgbamɔ kɛ gbɛgbalɔi awamɔ nitsumɔ lɛ mli lɛ, wɔbaaya wɔ akutseiaŋbii lɛ ashinaai anaa shii abɔ fe nine. Ani enɛ kɛ naagbai baa?
12 Esa akɛ akpɛlɛ nɔ akɛ naagbai yɛ hei komɛi, kɛha Yehowa Odasefoi kɛ mɛi ni wɔyaa amɛŋɔɔ lɛ fɛɛ. Ni nɔ ni kɛ eko bafataa naagbai lɛ ahe ji shikpilikpiifeemɔ ni yaa nɔ yɛ gbɔmɛi ni yɔɔ shikpɔji pii anɔ lɛ ateŋ lɛ. Ojogbaŋŋ, yɛ be mli ni wɔyifalɛ lɛ yaa hiɛ lɛ, ani ekpakpafeemɔ lɛ jeɔ shishi etɔɔ wɔ fiofio? Ani wɔmuɔ sane naa kɛ etamɔ nɔ ni wɔgbe wɔnitsumɔ lɛ naa ni akɛ ‘wɔtao’ mɛi fɛɛ ni baabo toi lɛ momo ni amɛbatsɔmɔ kaselɔi? Ani bo diɛŋtsɛ lɛ eetɔ bo ni ekolɛ onijiaŋ miije wui yɛ mɛi ni oyaa amɛŋɔɔ shii abɔ ni amɛbooo bo toi lɛ hewɔ? Mɛni abaanyɛ afee koni oya nɔ fɛfɛo yɛ onitsumɔ nɛɛ mli?
Jwɛŋmɔ Kpakpa Mli ni Aaahiɛ
13, 14. (a) Te esa akɛ wɔsusu shikpɔŋkukuji ni atsuɔ mli nii kpitiokpitio lɛ ahe wɔha tɛŋŋ? (b) Mɛni hewɔ mɛi ni “amɛtsui ekpliŋŋ” lɛ haaa wɔnijiaŋ aje wui lɛ? (d) Te wɔɔfee tɛŋŋ wɔnyiɛ bɔfoi l[ anɔkwɛmɔ nɔ yɛ mɛi ni sumɔɔɔ amɛŋɔɔ ni wɔbaa lɛ sɛɛ?
13 Tsabaa lɛ damɔ subaŋ ni wɔjieɔ lɛ kpo akɛ odasefoi kɛha Yehowa lɛ nɔ titri. Nɔ kome ji akɛ, nyɛhaa wɔkwɛa nɔ ni hi lɛ yɛ be fɛɛ mli. Bɔ ni wɔkpaa shikpɔŋkuku lɛ mli shii abɔ akɛni kɛ akɛto he lɛ shiɛlɔi lɛ ayi efa hewɔ lɛ baaba mli nakai kɛ̃ yɛ hei pii yɛ be mli ni wɔnitsumɔ lɛ baa naagbee lɛ. Shi ani jeee wɔ wɔsɔle wɔbi enɛ? (2 Tesalonikabii 3:1) Esa akɛ nɔ ni wɔnaa bianɛ lɛ aha wɔmli afili wɔ ni etsɔ wɔyiŋ ni wɔhe wɔye akɛ wɔyɛ kaselɔ-feemɔ nitsumɔ lɛ naagbee fa lɛ mli! Aashiɛ Maŋtsɛyeli lɛ, taakɛ Yesu gba fɔ shi lɛ. Ni yɛ hei ni gbɔmɛi ‘booo wɔwiemɔi atoi’ yɛ lɛ po lɛ, aatsɔ wɔ Maŋtsɛyeli-shiɛmɔ nitsumɔ lɛ nɔ aabɔ amɛ kɔkɔ. Kaimɔ akɛ, yɛ kaselɔi afeemɔ sɛɛ lɛ, wɔmiishiɛ sanekpakpa lɛ “ni akɛye odase.”—Mateo 10:14; 24:14.
14 Agbɛnɛ hu, abaakpa gbɛ akɛ mɛi pii baakpoo Maŋtsɛyeli lɛ he sane lɛ yɛ be mli ni naagbee lɛ bɛŋkɛɔ lɛ. Nɔ ni agba afɔ shi lɛ mli ka shi faŋŋ, ni Yesu kɛ Paulo niiashikpamɔi lɛ fɛɛ maa nɔ mi kɛhaa wɔ akɛ mɛi yɛ ni “amɛtsui ekpliŋ” kɛ mɛi ni “amɛtoii ewa.” No hewɔ lɛ, esa akɛ wɔkwɛ jogbaŋŋ yɛ nɛkɛ bei nɛɛ mli koni wɔkakpiliŋ wɔtsui yɛ wɔnitsumɔ lɛ he. Esa akɛ wɔya mɛi ni “amɛtoii ewa” lɛ po lɛ aŋɔɔ ‘shii abɔ.’ (Yesaia 6:9-11; Mateo 13:14, 15; Abɛi 10:21) Lɛlɛŋ, ebiɔ ekaa dani wɔya mɛi ni sumɔɔɔ wɔwiemɔ lɛ ŋɔɔ shii abɔ. Shi, shikpɔŋ kroko ko bɛ ni shihilɛ ni yɔɔ jɛmɛ lɛ baanyɛ akɛɛ wɔ akɛ: ‘nyɛkpaa wiemɔ.’ Shi moŋ, taakɛ bɔfoi lɛ fee lɛ, esa akɛ wɔsɔle wɔbi ekaafeemɔ “koni wɔya nɔ wɔjaje wiemɔ lɛ”—yɛ suɔmɔ ni abɛ kɛha enɛ aloo basabasafeemɔ fɛɛ sɛɛ—kɛyashi be mli ni wɔɔgbe nitsumɔ lɛ naa.—Bɔfoi lɛ Asaji 4:18-20, 24-31.
15. Mɛɛ hewalɛwoo akɛha yɛ Galatabii 6:9, ni te esa akɛ ena hewalɛ yɛ jwɛŋmɔ ni wɔhiɛ yɛ wɔ akutseiaŋbii ni wɔkɛ sanekpakpa lɛ yaa amɛŋɔɔ lɛ he eha tɛŋŋ?
15 Gbɔmɛi sɔrɔtoi enyɔ pɛ yɔɔ wɔ shikpɔŋkukuji lɛ fɛɛ mli—mɛi ni amrɔ nɛɛ amɛyɔɔ he miishɛɛ kɛ mɛi ni bɛ he miishɛɛ. No hewɔ lɛ, esa akɛ wɔya nɔ yɛ ‘mɛi ni sa lɛ ataomɔ loo amɛshibimɔ mli.’ Enɛ ni wɔɔfee lɛ fata nitsumɔi kpakpai pii ni esa akɛ wɔtsu akɛ Kristofoi ni wɔkɛtsɔɔ suɔmɔ ni wɔyɔɔ kɛha Yehowa kɛ anɔkwale ni wɔyeɔ lɛ lɛ. No hewɔ lɛ, “nyɛkahaa ekpakpafeemɔ miitɔa wɔ, ejaakɛ kɛ wɔnijiaŋ ejeee wui lɛ, wɔbaakpa hu yɛ be ni sa mli.” (Galatabii 6:9) Akɛni wɔbɛŋkɛ nibii agbɛjianɔtoo nɛɛ naagbee lɛ he kpaakpa hewɔ lɛ, jeee be ni nijiaŋ jeɔ wui loo wɔ akutseiaŋbii ni wɔkɛ Maŋtsɛyeli lɛ he sanekpakpa lɛ aaasara amɛ lɛ tɔɔ wɔ lɛ nɛ. Yehowa ekɛko lolo akɛ nitsumɔ lɛ eba naagbee.
Nɔ Hewɔ ni Ehe Hiaa ni ‘Wɔya nɔ Wɔshiɛ’
16. (a) Mɛni ji shihilɛi komɛi ni baanyɛ atsake bɔ ni gbɔmɛi ni yɔɔ shikpɔŋkuku ko mli lɛ hereɔ sane lɛ nɔ amɛhaa lɛ? (b) Mɛɛ tsakemɔ yɛ wiemɔ lɛ nɔkpɛlɛmɔ mli obaanyɛ okɛha akɛ nɔkwɛmɔ nɔ?
16 Ebaaye ebua wɔ hu ni wɔna jwɛŋmɔ kpakpa kɛ wɔkai akɛ ajieɔ anɔkwale ni ayeɔ Yehowa lɛ kpo kɛtsɔɔ Maŋtsɛyeli-shiɛmɔ nitsumɔi yɛ ekaa mli lɛ nɔ. Agbɛnɛ, shikpɔŋkukuji lɛ tsakeɔ yɛ gbɛi sɔrɔtoi anɔ. Gbɔmɛi faa kɛyaa he kroko, aloo amɛshihilɛi tsakeɔ. Ekolɛ be ni wɔbaa amɛŋɔɔ nyɛsɛɛ ko lɛ no mli lɛ amɛbɛ he miishɛɛ. Shi ekolɛ nitsumɔ ni amɛbɛ dɔŋŋ, amɛsuɔlɔ ko gbele, tsakemɔ ni etee nɔ yɛ jeŋ hewalɛi mpleshii lɛ mli, hela ko ni naa wa ni baa mɔ ko nɔ—enɛɛmɛi kɛ tsakemɔi krokomɛi baanyɛ atsɔɔ akɛ amɛbaabo bo toi kɛ otee jɛmɛ ekoŋŋ. Mɛi krokomɛi hu yɛ ni be mli ni amɛnu akɛ amɛnaanyo loo suɔlɔ ko ebatsɔ Yehowa Odasefoi lɛ ateŋ mɔ kome lɛ, agbɛnɛ amɛbaasumɔ ni amɛkɛ wɔ awie ni amɛle nɔ ni wɔheɔ wɔyeɔ ni ha tsakemɔ ni tamɔ nɛkɛ ba.
17. Mɛni ji mɛi komɛi anifeemɔ yɛ Maŋtsɛyeli lɛ he sane lɛ he bianɛ? Okɛ he ni oyɔɔ lɛ he nɔkwɛmɔ nɔ ko aha.
17 Kaimɔ hu akɛ, mɛi ni amɛdara yɛ nyɛsɛɛ afii nɛɛ amli lɛ hu ena wekui, amɛkɛ hiɛdɔɔ miisusu shihilɛ he, ni amɛmiibi saji ni Nyɔŋmɔ Wiemɔ lɛ pɛ baanyɛ aha hetoo. Akɛ nɔkwɛmɔ nɔ lɛ, obalayoo fioo ko ni efɔ bi fɔ nine etsɛ Odasefoi enyɔ kɛba eshia ni ekɛɛ: ‘Beni miji gbekɛyoo fioo lɛ, minuuu nɔ hewɔ ni minyɛ shwieɔ Odasefoi lɛ ni ekɛɔ amɛ akɛ ebɛ wiemɔ lɛ he miishɛɛ lɛ shishi, yɛ be mli ni nɔ pɛ ni nyɛtaoɔ ni nyɛfee ji ni nyɛwie Biblia lɛ he lɛ. Mikpɛ miyiŋ akɛ kɛ mida, ni mibote gbalashihilɛ mli ni mina mi diɛŋtsɛ mishia lɛ, mabi ni Yehowa Odasefoi aba miŋɔɔ ni amɛbagbala Biblia lɛ mli amɛtsɔɔ mi.’
18. Yɛ mɛɛ gbɛ nɔ tsakemɔ ni yaa nɔ yɛ jamɔ mli lɛ saa shikpɔŋkuku ni wɔshiɛɔ ni wɔtsuɔ nii yɛ mli lɛ he?
18 Ani oyɔse akɛ gbɔmɛi komɛi ni yɛ afii komɛi ni eho lɛ amli lɛ amɛkɛ wɔ ewieŋ akɛni amɛsusuɔ akɛ “ahere amɛyiwala” hewɔ lɛ miibibii wɔ saji yɛ anɔkwayeli mli diɛŋtsɛ ŋmɛnɛ? Mɛni hewɔ? Tsakemɔ eba yɛ amɛsusumɔ mli yɛ jamɔ mli. Amɛmiikɛɛ akɛ alaka amɛ kwraa ni amɛnaa ekpɛ amɛhe yɛ jeŋba shara, maŋkwramɔŋ ni akɛhe woɔ, kɛ sɔlemɔ lɛ shika ni televishin nɔ sanekpakpashiɛlɔi ni be ko lɛ amɛkɛ amɛhiɛ fɔ amɛnɔ lɛ juɔ ni amɛfiteɔ lɛ lɛ kɛ amɛhe woɔ mli lɛ hewɔ. Eka shi faŋŋ akɛ obaanu saji ni tamɔ nɛkɛ babaoo yɛ be mli ni shihilɛi ni yɔɔ Babilon Kpeteŋkpele lɛ mli lɛ yaa nɔ efiteɔ kɛyashɛɔ ehiɛkpatamɔ be lɛ.—Kpojiemɔ 18:1-8.
19, 20. Mɛni tsɔɔ nɔ hewɔ ni esaaa akɛ wɔnijiaŋ jeɔ wui yɛ mɛi ni kpooɔ sane lɛ aŋɔɔ ni wɔyaa shii abɔ lɛ he?
19 Yɛ fɛɛ sɛɛ lɛ, esaaa akɛ wɔnijiaŋ jeɔ wui kɛ gbɔmɛi kpiliŋ amɛtsui ni amɛbooo sane lɛ toi. Beni wɔshi amɛ lɛ, ekolɛ amɛbaajwɛŋ wɔhe lolo. Yɛ Kanada Lɛ, shiatsɛ ko ni Odasefoi enyɔ tee eŋɔɔ lɛ kɛɛ amɛ faŋŋ akɛ ebɛ wiemɔ lɛ he miishɛɛ. Sɛɛ mli lɛ, yoo nɛɛ je shishi esusu nɔ ni nyɛmimɛi lɛ wie lɛ he ni etao ni ena amɛ koni amɛha saji ni teɔ shi yɛ ejwɛŋmɔ mli lɛ ahetoo. No hewɔ lɛ ebote ekar mli ni eje shishi akɛ eeetao amɛ yɛ gbɛjegbɛi anɔ yɛ akutsoŋ he ni eyɔɔ lɛ, shi enaaa amɛ. Shi ani eŋmɛɛ he? Dabi, eyawa yɛ enaanyo ko shia ni ebi kɛji akɛ amɛba jɛmɛ. Amɛbako jɛmɛ, shi enaanyo lɛ kɛɛ lɛ akɛ Odasefonyo ko yɛ enitsumɔ he lɛ, no hewɔ lɛ ebaaha nɛkɛ yoo nɛɛ kɛ Odasefonyo nɛɛ akpe. Nɔ ni jɛ mli ba ji sɛɛsaramɔi shii abɔ yɛ yoo ni ena wiemɔ lɛ he miishɛɛ lɛ shia, ni yoo nɛɛ fɔ nine etsɛ enanemɛi, ekutsoŋbii, ewekumɛi kɛ enanemɛi nitsulɔi. Eshɛɔ be ni gbɔmɛi ni buaa amɛhe naa yɛ yoo nɛɛ shia lɛ shɛɔ 15 ni nyɛmimɛi lɛ kɛ woji wuji kɛ Bibliai 430 eha kɛ agbɛnɛ woji tɛtrɛbii 2,015.
20 Mɛi pii ahiɛ sɔɔ amɛŋɔɔ ni wɔyaa lɛ. Yoo ko ŋma yɛ wolo ko ni ekɛyaha Buu-Mɔɔ Asafo lɛ nitsumɔ he nine ko lɛ mli akɛ: “Miida nyɛ shi akɛ nyɛtɛo henɔjɔɔmɔ kpele yɛ mɛi ni hiɛ nyɛhemɔkɛyeli lɛ atsuii amli. Wɔmiida nyɛ shi akɛ nyɛba . . . ni nyɛkɛ mɛi krokomɛi miija Nuŋtsɔ lɛ suɔmɔ lɛ. Nakai nifeemɔ ni yɔɔ mlɛo lɛ feɔ babaoo kɛhaa mɛi krokomɛi. . . . Eyɛ mli akɛ mɛi komɛi yɛ ni amɛyitseiaŋ wala, mɛi krokomɛi hu efee shikpilikpii, ni mɛi krokomɛi hu boɔ toi moŋ, . . . shi kɛlɛ ehi babaoo diɛŋtsɛ kɛji akɛ mɔ ko ba oŋɔɔ koni ebakai bo mumɔŋ nibii ni he hiaa bo. Minaa akɛ enɛ hi jogbaŋŋ, akɛ akɛ mɔ ko aaawie Nuŋtsɔ lɛ he.” Yɛ wolo kroko hu mli lɛ, shiatsɛ ko bi wɔ ni ‘wɔnijiaŋ akaje wui,’ yɛ nɔ ni mɛi feɔ wɔ lɛ fɛɛ sɛɛ. “Shi nyɛkahaa ekpakpafeemɔ miitɔa wɔ, ejaakɛ kɛ wɔnijiaŋ ejeee wui lɛ, wɔbaakpa hu yɛ be ni sa mli.” (Galatabii 6:9) Yehowa jɔɔmɔ kɛ enɔkpɛlɛmɔ yɛ nitsumɔ nɛɛ nɔ, ni wɔhe ni wɔkɛwoo mli lɛ tsɔɔ suɔmɔ ni wɔyɔɔ kɛha Lɛ kɛ wɔnaanyo gbɔmɔ. (Mateo 22:37-39) No hewɔ lɛ nyɛhaa wɔtsua nitsumɔ lɛ kɛyaa enaagbee.—Okɛto Filipibii 1:6 he.
21. (a) Nɛgbɛ eeenyɛ eba akɛ shikpɔŋkuku ni afɔɔ mli nitsumɔ lɛ mli naagba lɛ eko ka? (b) Mɛni wɔbaasusu he yɛ nikasemɔ ni nyiɛ sɛɛ lɛ mli?
21 Esa akɛ wɔkpɛlɛ anɔkwale lɛ nɔ akɛ ekolɛ jeee gbɔmɛi lɛ ji mɛi ni haa shikpɔŋkuku lɛ mli nitsumɔ feɔ nɔ ni wa yɛ be fɛɛ mli. Yɛ bei komɛi amli lɛ wɔ diɛŋtsɛ wɔfeɔ nakai. Ani wɔjeɔ shishi kɛ jwɛŋmɔ ni ejaaa, ni wɔnuɔ he akɛ wɔle gbɔmɛi ni yɔɔ shikpɔŋkuku lɛ mli lɛ fɛɛ kɛ bɔ ni amɛbaafee amɛnii yɛ sane lɛ he? Enɛ baasa wɔsubaŋ he ni ekolɛ kɛ wɔgbee kɛ wɔhiɛ su hu. Ani wiemɔ kɛ gbɛ kome too lɛ nɔŋŋ ni wɔtsɔɔ nɔ afii abɔ ko ni eho lɛ wɔkɛtsuɔ nii lolo? Akɛni shikpɔŋkuku lɛ miitsake hewɔ lɛ, nɔ ni tsutsu ko lɛ eyeɔ omanye lɛ shɛŋ ‘mɛi ni sa’ lɛ atsui he. Ekolɛ ebi ni wɔya amɛŋɔɔ yɛ gbɛ kroko nɔ ni wɔna jwɛŋmɔ kroko yɛ wɔnitsumɔ lɛ he. Nɔ ni nyiɛ sɛɛ lɛ, nyɛhaa wɔkwɛa nɔ ni wɔbaanyɛ wɔfee ‘koni wɔnijiaŋ akaje wui shi moŋ wɔkpa yɛ be ni sa mli.a
[Shishigbɛ niŋmai]
a Ajie kɛjɛ July 15, 1988 Watchtower lɛ mli.
Ani Obaanyɛ Otsɔɔ Mli?
◻ Mɛni hewɔ ni ‘esaaa akɛ etɔɔ wɔ’ yɛ wɔ akutseiaŋ bii aŋɔɔ ni wɔkɛ sanekpakpa lɛ yaa lɛ?
◻ Namɔ kɛɛ wɔ akɛ wɔfee kaselɔi yɛ gbɛ ni wɔtsɔɔ nɔ wɔfeɔ lɛ lɛ, ni mɛni ji nifeemɔ nɛɛ mli shishijee gbɛi komɛi?
◻ Mɛni ji shihilɛ ni eba yɛ shikpɔŋkukuji pii amli, ni mɛni baaye ebua wɔ ni wɔna nakai shihilɛ lɛ he jwɛŋmɔ kpakpa?
◻ Mɛni hewɔ esa akɛ ‘wɔya nɔ wɔshiɛ’ sanekpakpa lɛ ‘ni wɔŋmɛɛɛ he’ Iɛ?
[Akrabatsa ni yɔɔ baafa 12]
“ETƆŊ WƆ YƐ MAŊTSƐYELI SHIƐ LƐ MLI KƐ WƆKAI:
◻ Mɔ ni kɛ nitsumɔ kɛ famɔ ha wɔ yɛ gbɛ ni esa akɛ wɔtsɔ nɔ wɔtsu nitsumɔ lɛ
◻ Akɛ Yehowa jɔɔmɔ yɛ nɔ ni atsu momo yɛ jeŋ fɛɛ lɛ nɔ
◻ Ni wɔna jwɛŋmɔ kpakpa yɛ mɛi ni “amɛkpiliŋ amɛtsui” lɛ fɛɛ sɛɛ
◻ Ni wɔsɔle ‘ni wɔtee no wɔshiɛ’ taakɛ bɔfoi Iɛ fee Iɛ