Yehowa Le Bɔ ni Efeɔ Ejieɔ Ewebii

“Nuŋtsɔ [Yehowa] le bɔ ni efeɔ ejieɔ Nyɔŋmɔ gbeyeishelɔi yɛ kaa mli.”—2 PET. 2:9, Ga Biblia hee.

MƐNI HEWƆ WƆBAANYƐ WƆNÁ NƆMIMAA AKƐ YEHOWA:

Toɔ nibii ahe gbɛjianɔ bɔ ni baaha eyiŋtoo lɛ aba mli lɛ?

Kɛ ehewalɛ baatsu nii kɛhere ewebii lɛ ayiwala lɛ?

Le bɔ ni nibii baaya nɔ aha yɛ amanehulu babaoo lɛ mli lɛ?

 1. Mɛɛ nibii baaya nɔ yɛ “amanehulu babaoo” lɛ mli?

KOJOMƆ ni Nyɔŋmɔ kɛbaaba Satan je lɛ nɔ lɛ baaba trukaa. (1 Tes. 5:2, 3) Beni “Yehowa gbi wulu lɛ” bɛŋkɛɔ lɛ, je lɛŋ fɛɛ baafee butubutu. (Zef. 1:14-17) Shihilɛ lɛ mli baawo wu yɛ he fɛɛ he. Ebaafee be ni amanehulu “ni anako nɔ dã kɛjɛ je lɛŋ shishijee mli kɛbashi ŋmɛnɛŋmɛnɛ” beaŋ lɛ baaba.—Nyɛkanea Mateo 24:21, 22.

2, 3. (a) Mɛni Nyɔŋmɔ webii lɛ kɛbaakpe yɛ “amanehulu babaoo” lɛ mli? (b) Mɛni baanyɛ awaje wɔ kɛha nɔ ni kã wɔhiɛ lɛ?

² Beni “amanehulu babaoo” lɛ bɛŋkɛɔ enaagbee lɛ, “Gog ní yɔɔ Magog shikpɔŋ lɛ nɔ” lɛ baatutua Nyɔŋmɔ webii lɛ. Yɛ tutuamɔ nɛɛ mli lɛ, “ta ní wa” ko baate shi awo Nyɔŋmɔ webii lɛ “tamɔ atatu ní baaha shikpɔŋ lɛ nɔ.” (Ezek. 38:2, 14-16) Adesai agbɛjianɔtoo ko fãŋ Yehowa webii lɛ ahe. Nyɔŋmɔ pɛ ji mɔ ni baanyɛ ahere amɛyiwala. Te amɛbaafee amɛnii amɛha tɛŋŋ kɛ́ amɛhenyɛlɔi lɛ miiba abakpata amɛhiɛ lɛ?

³ Kɛ́ oji Yehowa tsulɔ lɛ, ani oyɛ hemɔkɛyeli akɛ Yehowa baanyɛ abaa ewebii lɛ ayi kɛtsɔ amanehulu babaoo lɛ mli, ni ebaafee nakai hu? Bɔfo Petro ŋma akɛ: “Nuŋtsɔ [Yehowa] le bɔ ni efeɔ ejieɔ Nyɔŋmɔ gbeyeishelɔi yɛ kaa mli, kɛ bɔ ni efeɔ etoɔ mɛi fɔji yɛ piŋmɔ mli kɛyashi kojomɔ gbi lɛ nɔ.” (2 Pet. 2:9, Ga Biblia hee.) Kɛ́ wɔjwɛŋ gbɛi anɔ ni Yehowa tsɔ ehere mɛi ayiwala yɛ blema lɛ nɔ lɛ, ebaawaje wɔ kɛha nɔ ni kã wɔhiɛ lɛ. Nyɛhaa wɔsusua nɔkwɛmɔnii etɛ ni baaha wɔná hekɛnɔfɔɔ yɛ nyɛmɔ ni Yehowa yɔɔ ni ebaanyɛ ekɛkpɔ̃ ewebii lɛ he.

ABAA EYI YƐ NU AFUA LƐ MLI

 4. Mɛɛ nibii komɛi ehe bahia ni atsu he nii dani Nu Afua lɛ aba?

⁴ Klɛŋklɛŋ lɛ, susumɔ sane ni kɔɔ Nu Afua ni ba yɛ Noa gbii lɛ amli lɛ he lɛ he okwɛ. Bɔni afee ni Yehowa yiŋtoo lɛ aba mli lɛ, ehe bahia ni atsu nibii komɛi ahe nii dã. Ehe bahia ni akpɛ adeka agbo lɛ agbe naa, ni abua kooloi lɛ anaa awo adeka lɛ mli shweshweeshwe dani nu lɛ abɔi nɛmɔ. Sane ni yɔɔ Mose Klɛŋklɛŋ Wolo lɛ mli lɛ tsɔɔ akɛ, Yehowa haaa akpɛ adeka lɛ agbe naa dani etsɔɔ be ni nu lɛ baabɔi nɛmɔ, oookɛɛ nɔ ni ehe baahia ni etsake be ni Nu Afua lɛ kɛbaaje shishi, kɛ́ ebalɛ akɛ agbeee adeka lɛ naa yɛ be naa. Moŋ lɛ, mra mli kwraa dani Nyɔŋmɔ kɛ Noa baawie adeka lɛ kpɛɛ he lɛ, no mli lɛ eto be ni Nu Afua lɛ baaje shishi lɛ momo. Te wɔfeɔ tɛŋŋ wɔleɔ enɛ?

 5. Mɛni Yehowa ha ale yɛ sane ni yɔɔ 1 Mose 6:3 lɛ, ni mɛɛ be ekɛ sane nɛɛ ha?

⁵ Biblia lɛ kɛɔ wɔ akɛ, Yehowa kɛ fãmɔ ko ha yɛ ŋwɛi. Taakɛ 1 Mose 6:3 lɛ tsɔɔ lɛ, ekɛɛ akɛ: “Mimumɔ lɛ kɛ gbɔmɛi epeleŋ he daa yɛ amɛgbɛduu lɛ mli; ejaakɛ heloo ji amɛ, ni amɛgbii afee afii oha kɛ nyɔŋmai enyɔ.” Afii nɛɛ etsɔɔɔ afii ni adesai baaye lɛ sɛɛkɛlɛ. Eji adafitswaa ni Yehowa kɛmiiha ale be ni ekɛbaajie efɔŋfeemɔ fɛɛ ni yaa nɔ yɛ shikpɔŋ lɛ nɔ lɛ kɛya.a Akɛni Nu Afua lɛ je shishi yɛ afi 2370 D.Ŋ.B. hewɔ lɛ, wɔbaanyɛ wɔkɛɛ akɛ Nyɔŋmɔ tsĩ nakai sane lɛ tã yɛ afi 2490 D.Ŋ.B. Nakai beaŋ lɛ, Noa eye afii 480. (1 Mose 7:6) Aaafee afii 20 sɛɛ, yɛ afi 2470 D.Ŋ.B. lɛ, Noa bɔi ebihii lɛ fɔmɔ. (1 Mose 5:32) Eshwɛ aaafee afii 100 dani Nu Afua lɛ baaje shishi, shi Yehowa etsɔko Noa nɔ krɛdɛɛ ni ebaaha efee ní ekɛbaa adesa weku lɛ yi lolo. Be enyiɛ Nyɔŋmɔ kɛbaamɛ dani eha Noa ale?

 6. Mɛɛ be Yehowa fã Noa ní ekpɛ adeka lɛ?

⁶ Eeenyɛ efee akɛ Yehowa mɛ afii nyɔŋmai abɔ dani eha Noa le nɔ ni Etaoɔ ni efee. Mɛni nɔ wɔdamɔɔ wɔmuɔ sane naa nakai? Biblia lɛ tsɔɔ akɛ beni Nyɔŋmɔ fã Noa koni ekpɛ adeka lɛ, nakai beaŋ lɛ Noa bii lɛ edara momo ni amɛbote gbalashihilɛ mli. Yehowa kɛɛ lɛ akɛ: “Matee kpaŋmɔ shi mama mikɛo teŋ, ni ooobote adeka lɛ mli, bo kɛ obihii lɛ kɛ oŋa kɛ obihii lɛ aŋamɛi lɛ.” (1 Mose 6:9-18) No hewɔ lɛ, eeenyɛ efee akɛ beni Noa nine shɛ fãmɔ nɔ akɛ ekpɛ adeka lɛ, no mli lɛ eshwɛ afii 40 loo 50 pɛ ni Nu Afua lɛ baaba.

 7. (a) Mɛɛ gbɛ nɔ Noa kɛ eweku lɛ jie hemɔkɛyeli ni amɛyɔɔ lɛ kpo? (b) Yɛ naagbee mli lɛ, mɛɛ be Nyɔŋmɔ ha Noa le be ni Nu Afua lɛ baaje shishi?

⁷ Eeenyɛ efee akɛ beni Noa kɛ eweku lɛ kpɛɔ adeka lɛ, amɛsusu bɔ ni baafee ni Nyɔŋmɔ baaha eyiŋtoo lɛ aba mli, kɛ be ni Nu Afua lɛ baaje shishi lɛ he. Eyɛ mli akɛ amɛlé saji nɛɛ ahe nɔ ko kwraa moŋ, shi no etsiii amɛnaa koni amɛkakpɛ adeka lɛ. Ŋmalɛ lɛ kɛɔ akɛ: “Noa fee nakai; bɔ ni Nyɔŋmɔ fã lɛ lɛ, nakai pɛpɛɛpɛ efee.” (1 Mose 6:22) Agbɛnɛ beni eshwɛ gbii kpawo ní nu lɛ baabɔi nɛmɔ lɛ, Yehowa kɛɛ Noa be tuuntu ni Nu Afua lɛ baaje shishi, ni enɛ ji be ni sa ni Noa kɛ eweku lɛ kɛbaabua kooloi lɛ anaa amɛwo adeka lɛ mli. No hewɔ lɛ, beni agbele ŋwɛi samfɛji lɛ yɛ “Noa wala be mli afi ni ji afi ohai ekpaa lɛ mli, yɛ nyɔɔŋ ni ji enyɔ lɛ nɔ gbi ni ji gbi nyɔŋma kɛ kpawo lɛ nɔ” lɛ, no mli lɛ nɔ fɛɛ nɔ efee klalo.—1 Mose 7:1-5, 11.

 8. Mɛɛ gbɛ nɔ Nu Afua lɛ he sane lɛ haa wɔnáa hekɛnɔfɔɔ yɛ Yehowa mli akɛ ele be ni ekɛkpɔ̃ɔ ewebii lɛ?

⁸ Sane ni kɔɔ Nu Afua lɛ he lɛ haa wɔnaa akɛ Yehowa he esa akɛ Bebulɔ kɛ Kpɔ̃lɔ fɛɛ. Beni Yehowa buɔ be ni nibii agbɛjianɔtoo nɛɛ kɛbaaba enaagbee lɛ, wɔbaanyɛ wɔná nɔmimaa akɛ nɔ fɛɛ nɔ ni eto eyiŋ akɛ ebaafee lɛ baaya nɔ yɛ ebe naa, kɛyashi ‘gbi lɛ kɛ ŋmɛlɛtswaa lɛ’ aaashɛ.—Mat. 24:36; nyɛkanea Habakuk 2:3.

AKPƆ̃ AMƐ YƐ ŊSHƆ TSURU LƐ MLI

9, 10. Mɛɛ gbɛ nɔ Yehowa kɛ ewebii lɛ tsu nii kɛtsɔ̃ Mizraimbii ata lɛ akpá?

⁹ Kɛbashi biɛ lɛ, wɔna akɛ Yehowa buɔ be ní ekɛtsuɔ saji ahe nii bɔni afee ni eyiŋtoo aba mli lɛ jogbaŋŋ. Nɔkwɛmɔnɔ ni ji enyɔ ni wɔbaasusu he lɛ haa wɔnaa yiŋtoo kroko hu hewɔ ni wɔbaanyɛ wɔkɛ wɔhe afɔ̃ Yehowa nɔ akɛ ebaakpɔ̃ ewebii lɛ: Ekɛ ehewalɛ kpeteŋkpele lɛ baatsu nii bɔni afee ni eyiŋtoo lɛ aba mli. Yehowa yɛ nyɛmɔ ni ekɛaakpɔ̃ ewebii lɛ aahu akɛ, bei komɛi po lɛ ekɛ ewebii lɛ tsɔ̃ɔ ehenyɛlɔi lɛ akpá. Nakai eba lɛ beni eha Israelbii lɛ ye amɛhe kɛjɛ Mizraimbii lɛ anɔyeli shishi lɛ.

¹⁰ Israelbii ni shi Mizraim lɛ ayifalɛ aaashɛ akpekpei etɛ. Yehowa ha Mose nyiɛ amɛhiɛ kɛyatsɔ he ko ní ha Farao susu akɛ amɛmiitsomolo ní amɛleee he ni amɛyaa. (Nyɛkanea 2 Mose 14:1-4.) Enɛ laka Farao ni ekɛ etabilɔi lɛ tiu etsutsu nyɔji lɛ, ni eyasa amɛnaa yɛ Ŋshɔ Tsuru lɛ naa. Etamɔ nɔ ni tsɔmɔhe ko kwraa bɛ. (2 Mose 14:5-10) Shi yɛ anɔkwale mli lɛ, enɛ jeee oshãra kɛha Israelbii lɛ kwraa. Mɛni hewɔ? Ejaakɛ etsɛŋ ni Yehowa baahere amɛ.

11, 12. (a) Mɛɛ gbɛ nɔ Yehowa tsɔ ekpɔ̃ ewebii lɛ? (b) Mɛni jɛ Nyɔŋmɔ he ni ekɛwo sane lɛ mli lɛ mli kɛba, ni mɛni amaniɛbɔɔ nɛɛ tsɔɔ wɔ yɛ Yehowa he?

¹¹ “Atatu kutuu lɛ” ni nyiɛ Israelbii lɛ ahiɛ lɛ yaje amɛsɛɛgbɛ, ni etsĩ Farao asraafoi lɛ agbɛ, ni ewo amɛ duŋ. Shi yɛ Israelbii lɛ agbɛfaŋ lɛ, atatu lɛ kpɛɔ haa amɛ nyɔɔŋ yɛ naakpɛɛ gbɛ nɔ. (Nyɛkanea 2 Mose 14:19, 20.) Kɛkɛ ni Yehowa ha boka kɔɔyɔɔ ko ni naa wa tswa ni egba ŋshɔ lɛ mli, “ni eha ŋshɔ lɛ tsɔ shikpɔŋ gbiŋ.” Ŋwanejee ko bɛ he akɛ enɛ he be kpalaŋŋ, ejaakɛ sane lɛ tsɔɔ mli akɛ: “Ni Israelbii lɛ nyiɛ shikpɔŋ gbiŋ nɔ kɛtsɔ ŋshɔ lɛ teŋ.” Israelbii lɛ nyiɛ shɔ̃ɔ kɛ́ akɛ amɛ to Farao asraafoi ni tara amɛta shwiilii amli lɛ ahe lɛ. Kɛlɛ, nɔ ko nɔ ko etsɔɔɔ akɛ Mizraimbii lɛ baanina Israelbii lɛ, ejaakɛ Yehowa miiwu eeha Israelbii lɛ. “Ehao Mizraim ta lɛ; ni efamɔ amɛshwiilii lɛ anaji, ni ewo amɛ hejaramɔ.”—2 Mose 14:21-25.

¹² Beni Israelbii lɛ fɛɛ efo ŋshɔ lɛ shweshweeshwe lɛ, Yehowa kɛɛ Mose akɛ: “Kpã onine mli yɛ ŋshɔ lɛ nɔ, koni nui lɛ aku sɛɛ aba Mizraimbii lɛ kɛ amɛshwiilii kɛ amɛkpɔŋɔiatsɛmɛi lɛ anɔ!” Beni Mizraim asraafoi lɛ ka akɛ amɛbaajo nu ni eke kɛbaa lɛ naa foi lɛ, “Yehowa shɛrɛ amɛ eshwie ŋshɔ lɛ teŋ.” Mɔ ko mɔ ko ejeee mli. “Eshwɛɛɛ amɛteŋ mɔ kome tete po.” (2 Mose 14:26-28) No hewɔ lɛ, Yehowa ha ana akɛ eyɛ hewalɛ ni ekɛaakpɔ̃ ewebii lɛ kɛjɛ shihilɛ fɛɛ shihilɛ mli.

AMƐJE YERUSALEM HIƐKPATAMƆ LƐ MLI

13. Mɛɛ gbɛtsɔɔmɔi Yesu kɛha, ni mɛni ekolɛ esɛɛnyiɛlɔi lɛ susu he?

¹³ Yehowa le bɔ ni nibii baaya lɛ aha bɔni afee ni eyiŋtoo lɛ aba mli. Wɔnaa bɔ ni sane nɛɛ he hiaa ha lɛ yɛ nɔkwɛmɔnɔ ni ji etɛ ni wɔbaasusu he lɛ mli: Yerusalem maŋ lɛ he ka ni awo yɛ klɛŋklɛŋ afii 100 lɛ mli lɛ. Yehowa tsɔ e-Bi lɛ nɔ ekɛ gbɛtsɔɔmɔ ni baaha Kristofoi ni yɔɔ Yerusalem kɛ Yudea lɛ aje hiɛkpatamɔ ni baa lɛ mli lɛ ha, dani akpatã maŋtiase lɛ hiɛ yɛ afi 70 Ŋ.B. Yesu wie akɛ: “Kɛ́ nyɛna amaŋfɔ̃ nihii nii lɛ ní gbalɔ Daniel wie he lɛ akɛ ema hé krɔŋkrɔŋ lɛ . . . no lɛ mɛi ni yɔɔ Yudea lɛ ajo foi kɛya gɔji lɛ anɔ.” (Mat. 24:15, 16) Shi te Yesu sɛɛnyiɛlɔi lɛ aaafee tɛŋŋ amɛyɔse gbalɛ nɛɛ mlibaa lɛ?

14. Mɛɛ gbɛ nɔ shihilɛi ni tee nɔ lɛ ha gbɛtsɔɔmɔi ni Yesu kɛha lɛ fee faŋŋ?

¹⁴ Beni be shwieɔ mli lɛ, nɔ ni Yesu wiemɔi lɛ tsɔɔ lɛ bafee faŋŋ. Yɛ afi 66 Ŋ.B. lɛ, Cestius Gallus kɛ Roma asraafoi lɛ ba Yerusalem koni amɛbaku atua ko ni Yudafoi lɛ tseɔ lɛ naa. Beni Yudafoi atuatselɔi ni atsɛɔ amɛ Zelotibii lɛ yatee amɛhe yɛ sɔlemɔwe lɛ, Roma asraafoi lɛ bɔi sɔlemɔwe lɛ gbogboi lɛ ashishi tsaa. Kristofoi ni hiɛ yɔɔ amɛhe nɔ lɛ yɔse nɔ ni enɛ tsɔɔ lɛ faŋŋ akɛ: Wɔŋjalɔi ata ko kɛ ewɔŋjamɔ aflaŋai (“amaŋfɔ̃ nihii nii”) lɛ yashɛ sɔlemɔwe lɛ gbogbo lɛ (“he krɔŋkrɔŋ lɛ”) he tɔ̃ɔ. Be eshɛ ni esa akɛ Yesu sɛɛnyiɛlɔi lɛ “ajo foi kɛya gɔji lɛ anɔ.” Shi te amɛaafee tɛŋŋ amɛshi maŋ ni awo he ka lɛ mli lɛ? Nɔ ko ni akpaaa gbɛ miiba.

15, 16. (a) Mɛɛ gbɛtsɔɔmɔ ni yɔɔ tɛ̃ɛ Yesu kɛha, ni mɛni hewɔ ehe bahia ni esɛɛnyiɛlɔi lɛ abo toi lɛ? (b) Mɛni nɔ abaadamɔ ahere wɔyiwala?

¹⁵ Yɛ yiŋtoo ko ni aleee hewɔ lɛ, Cestius Gallus kɛ esraafoi lɛ gbala amɛhe shi kɛjɛ Yerusalem. Zelotibii lɛ tiu amɛ. Akɛni fãi ni kɛ amɛhe wuɔ ta lɛ eshi maŋ lɛ mli hewɔ lɛ, hegbɛ ba trukaa kɛha Yesu sɛɛnyiɛlɔi lɛ akɛ amɛjo foi. Yesu ekɛɛ amɛ yɛ faŋŋ mli akɛ amɛshi amɛheloonaa nibii lɛ ni amɛjo foi oyayaayai. (Nyɛkanea Mateo 24:17, 18.) Shi ani ehe miihia kwraa ni amɛshi nɔŋŋ? Etsɛɛɛ ni hetoo lɛ fee faŋŋ. Gbii fioo komɛi asɛɛ lɛ, Zelotibii lɛ ku amɛsɛɛ ni amɛbanyɛ Yerusalem kɛ Yudeabii lɛ anɔ koni amɛkɛ amɛhe awo atuatsemɔ lɛ mli. Beni Yudafoi akui srɔtoi lɛ kɛ amɛhe tswaa kɛha nɔyeli hegbɛ lɛ, shihilɛ ni yɔɔ maŋ lɛ mli lɛ fite oyayaayai. Maŋ lɛ mli shimɔ bawa waa diɛŋtsɛ. Beni Romabii lɛ ku amɛsɛɛ yɛ afi 70 Ŋ.B. lɛ, mɔ ko mɔ ko nyɛɛɛ ashi maŋ lɛ mli dɔŋŋ. (Luka 19:43) Mɛi ni shiii lɛ fɛɛ ka maŋ lɛ mli! Kristofoi ni bo Yesu fãmɔi lɛ atoi ní amɛjo foi kɛtee gɔji lɛ anɔ lɛ ayi ná wala. Amɛ diɛŋtsɛ amɛna akɛ Yehowa le bɔ ni efeɔ ekpɔ̃ɔ ewebii. Mɛni wɔbaanyɛ wɔkase yɛ sane nɛɛ mli?

¹⁶ Beni amanehulu kpeteŋkpele lɛ yaa nɔ lɛ, ehe baahia ni Kristofoi abo gbɛtsɔɔmɔi ni Nyɔŋmɔ Wiemɔ lɛ kɛ egbɛjianɔtoo lɛ kɛhaa lɛ toi. Ákɛ nɔkwɛmɔnɔ lɛ, Yesu fãmɔ akɛ “ajo foi kɛya gɔji lɛ anɔ” lɛ hiɛ shishinumɔ ko kɛha wɔ ŋmɛnɛ. Shi wɔleee bɔ ni wɔfoijee lɛ baaba lɛ aha.b Kɛlɛ, wɔbaanyɛ wɔná nɔmimaa akɛ Yehowa baaha nakai fãmɔi lɛ afee faŋŋ aha wɔ yɛ be ni sa mli. Akɛni toiboo ni wɔfeɔ lɛ nɔ abaadamɔ ahere wɔyiwala hewɔ lɛ, nilee yɛ mli akɛ wɔɔbi wɔhe akɛ: ‘Te mifeɔ minii yɛ gbɛtsɔɔmɔi ni Yehowa kɛhaa ewebii lɛ amrɔ nɛɛ he mihaa tɛŋŋ? Ani mihe feɔ oya kɛboɔ toi, aloo mishashaoɔ shi?’—Yak. 3:17.

AWAJE WƆ KƐHA NƆ NI KÃ WƆHIƐ LƐ

17. Mɛni Habakuk gbalɛ lɛ haa wɔleɔ yɛ tutuamɔ ni akɛbaaba Nyɔŋmɔ webii anɔ lɛ he?

¹⁷ Nyɛhaa wɔsaa wɔsusua tutuamɔ ni Gog kɛbaaba ni awie he yɛ shishijee gbɛ lɛ he ekoŋŋ. Yɛ gbalɛ ko ni kɔɔ enɛ he lɛ mli lɛ, Habakuk wie akɛ: “Minu, ni mimusu kpokpo, minaabui jo bliblibli yɛ gbee lɛ hewɔ; sharamɔ bote miwui amli, ni mihe kpokpo yɛ he ni midamɔ lɛ, akɛ mata shi diŋŋ kɛyashi [Nyɔŋmɔ] haomɔ gbi lɛ, beni mɔ ni kɛ maŋ lɛ baawu lɛ aaafã kɛaaba lɛ.” (Hab. 3:16) Tutuamɔ ni akɛbaaba Nyɔŋmɔ webii lɛ anɔ lɛ he amaniɛbɔɔ ni gbalɔ lɛ nu lɛ kɛkɛ ha emusuŋ tsɔ, enaabu kpokpo, ni ehewalɛ fɛɛ tã. Habakuk nifeemɔ lɛ haa wɔnaa bɔ ni shihilɛ lɛ baafee nɔ ni jaraa beni Gog kɛ eta babaoo lɛ keɔ kɛbaa wɔnɔ lɛ. Kɛlɛ, gbalɔ lɛ miisumɔ ni eto etsui shi kɛmɛ Yehowa gbi wulu lɛ, ni eyɛ nɔmimaa akɛ Yehowa baakpɔ̃ ewebii lɛ. Wɔ hu wɔbaanyɛ wɔná nɔmimaa ni tamɔ nakai nɔŋŋ.—Hab. 3:18, 19.

18. (a) Mɛni hewɔ esaaa akɛ wɔsheɔ tutuamɔ ni baa lɛ gbeyei lɛ? (b) Mɛni he wɔbaasusu yɛ nikasemɔ ni nyiɛ sɛɛ lɛ mli?

¹⁸ Ŋwanejee ko bɛ he akɛ nɔkwɛmɔnii etɛ ni wɔsusu he lɛ haa wɔnaa faŋŋ akɛ Yehowa le bɔ ni efeɔ ekpɔ̃ɔ ewebii. Eyiŋtoo lɛ efeŋ efolo; bɔ fɛɛ bɔ ni fee lɛ, ebaaye kunim. Shi dani wɔbaaná nakai kunimyeli ni yɔɔ nyam lɛ mli gbɛfaŋnɔ lɛ, esa akɛ wɔye anɔkwa kɛyawula shi. Mɛɛ gbɛ nɔ Yehowa yeɔ ebuaa wɔ koni wɔhiɛ wɔnɔkwayeli lɛ mli amrɔ nɛɛ? No ji nɔ ni abaasusu he yɛ nikasemɔ ni nyiɛ sɛɛ lɛ mli lɛ.

[Shishigbɛ niŋmai]

[Mfoniri ni yɔɔ baafa 24]

Ani Farao ta lɛ ha Israelbii lɛ yaje oshãra ko mli?