Ani Wɔmiibɛŋkɛ Harmagedon?
“Ejaakɛ no belɛ mli lɛ amanehulu babaoo aaaba, ni anako nɔ da kɛjɛ je lɛŋ shishijee mli kɛbashi ŋmɛnɛŋmɛnɛ, ni asaŋ anaŋ enɔ gbi ko gbi ko dɔŋŋ.”—Mat. 24:21.a
1. (a) Gbɔmɛi nuɔ “Harmagedon” shishi akɛ eji mɛni? (b) Ani Harmagedon ji ta kroko ni ka majimaji ateŋ?
1 WIEMƆ “Harmagedon” gbɛɛɔ yɛ mɛi pii atoi mli akɛ nɔ ko ni yɔɔ gbeyei ni miiba. Mɛi komɛi nuɔ shishi akɛ eji “je lɛ naagbee” be mli ni abaakpata adesa wala fɛɛ hiɛ ni shikpɔŋ lɛ afee nɔ ni anyɛŋ ahi nɔ, ekolɛ kɛtsɔ nuklea tawuu ni baaka jeŋmaji lɛ ateŋ lɛ nɔ. Lɛlɛŋ, Ŋleshi wiemɔ “Harmagedon” lɛ tsɔɔ osharai ko ni baaba, tawuu ko. Shi Biblia lɛ kɛɔ akɛ eji “Nyɔŋmɔ Ofe lɛ gbi wulu lɛ nɔ ta,” ni awuɔ yɛ he ko ni atsɛɔ jɛi akɛ “Harmagedon.” Kpoj. 16:14, 16.
2. Ani Harmagedon baatsɔɔ adesai anaagbee, aloo shikpɔŋ lɛ naagbee?
2 Ani Nyɔŋmɔ ta ni ji Harmagedon lɛ aaanyɛ afee adesai fɛɛ anaagbee, aloo wɔshibɔlemɔ ŋulami nɛɛ naagbee? Dabida Nyɔŋmɔ diɛŋtsɛ Wiemɔ lɛ maa nɔ mi kɛhaa wɔ akɛ: “Bɔni Yehowa, mɔ ni bɔ ŋwɛi lɛ, Nyɔŋmɔ mɔ ni shɔ shikpɔŋ lɛ ni efee ni ekɛma shi, ni ebɔɔɔ lɛ efolo, shi eshɔ lɛ ni ahi nɔ lɛ kɛɛ nɛ.”—Yes. 45.18.
3. Mɛni Harmagedon baatsu?
3 Yɛ be mli ni Harmagedon efeŋ adesai fɛɛ, aloo shikpɔŋ lɛ naagbee lɛ, kɛlɛ ebaafee nibii agbɛjianɔtoo (aloo, “je”) ko taakɛ bɔni wɔle lɛ naagbee. Harmagedon baafee Nyɔŋmɔ gbɛ ni eeetsɔ nɔ ekpata maŋkwramɔ, shika-he-lɛtemɔ, kwasafo kɛ jamɔ gbɛjianɔtooi sɔrɔtoi ni fiteɔ ni kɛ awerɛho babaoo eba adesai anɔ lɛ kɛjɛ shihilɛ mli kwraa lɛ hiɛ. Yehowa kɛɛ akɛ: “Ejaakɛ miyiŋtoo ji akɛ mabua jeŋmaji lɛ anaa, ni makpee maŋtsɛyelii lɛ kɛaakpe, koni mafɔse mimlila kɛ mimlifu ni naa wa lɛ fɛɛ mashwie amɛnɔ.” (Zef. 3:8) No hewɔ lɛ Nyɔŋmɔ ta ni ji Harmagedon lɛ baatsɔɔ efɔbuu kojomɔ ni ekɛbaate shi ashi “maŋtsɛyelii.” Biblia lɛ kɛɔ akɛ mɛi krokomɛi ni baaná efɔbuu kojomɔ nɛɛ eko ji mɛi ni fiɔ ŋmɛnɛŋmɛnɛ yiwalɛ nibii agbɛjianɔtoo nɛɛ sɛɛ lɛ, “asafoiatsɛmɛi,” “hewalɔi,” “odehei,” “nyɔji” kɛ “mɛi bibii kɛ mɛi wuji.”—Kpoj. 16:14; 19:18.
4. Te Biblia gbalɛ tsɔɔ shihilɛi ni baaba yɛ Harmagedon sɛɛ lɛ mli ehaa tɛɛŋ?
4 ‘Ŋmɛnɛŋmɛnɛ nibii agbɛjianɔtoo nɛɛ naagbee baagbele gbɛ aha nibii agbɛjianɔtoo hee kwraa ni Nyɔŋmɔ ‘baafee, adesai aweku hee ni abaatsu Nyɔŋmɔ suɔmɔnaa nii yɛ amɛteŋ “yɛ shikpɔŋ nɔ taakɛ afeɔ yɛ ŋwɛi hu.” (Mat.6:10, NW) Biblia gbalɛ kɛɔ wɔ akɛ, yɛ nakai gbɛjianɔtoo hee lɛ mli yɛ Harmagedon sɛɛ lɛ, ‘jalɛ ji nɔ ni baahi mli.’ (2 Pet. 3:13) Kwɛ hejɔlɛ ni enɛ baaji, kwɛ miishɛɛ ni enɛ baaji, yɛ afii ohai babaoo ni ayeee jalɛsane, ana nɔ kɛ tsuiŋdɔlɛ akɛ yaafo nɛɛ fɛɛ sɛɛ! Kɛ́ aafee Nyɔŋmɔ suɔmɔnaa nii yɛ shikpɔŋ muu lɛ fɛɛ nɔ, ni ato jalɛ shihilɛi amamɔ shi lɛ, enɛ kɛ miishɛɛ be ni eko bako nakai da baaba. Biblia lɛ tsɔɔ hiɛ ekɛɔ wɔ akɛ: “Shi mɛi ni he jɔlɛ, shikpɔŋ lɛ aaatsɔ amɛnɔ, ni amɛmii aaashɛ amɛhe yɛ hejɔlɛ babaoo mli.” (Lala 37:11) Belɛ ebɛ naakpɛɛ mɔ akɛ Yesu tsɛ lɛ “Paradeiso.”——luka 23:43.
“Amanehulu Kpeteŋkpele” Ni Baa Lɛ
5. Mɛni ji “amanehulu kpeteŋkpele” lɛ, ni te wɔfeɔ tɛɛŋ wɔleɔ akɛ esɛɛ etsɛŋ kwraa?
5 Nyɔŋmɔ ta ni ji Harmagedon lɛ baafee be ko ni atsɛɔ lɛ akɛ “amanehulu kpeteŋkpele” be lɛ naagbee fa. Yesu wie he yɛ nɛkɛ gbɛ nɔ: “Ejaakɛ no be lɛ mli lɛ amanehulu kpeteŋkpele aaaba, ni anako nɔ da kɛjɛ je lɛŋ shishijee mli kɛbashi ŋmɛnɛŋmɛnɛ, ni asaŋ anaŋ enɔ gbi ko gbi ko dɔŋŋ.” (Mat. 24:21, NW) Kɛ́ asusu amanehului kɛ osharai ni eho yɛ tsutsu lɛ ahe lɛ, eka shi faŋŋ akɛ belɛ “amanehulu kpeteŋkpele” ni baa lɛ baafee haomɔ be ko ni eko bako nakai da yɛ adesa weku lɛ yinɔsane be fɛɛ mli. Shi yɛ mɔbɔnalɛ naa lɛ, esɛɛ etsɛŋ, nɔ ni Nyɔŋmɔ “aaafo no gbii lɛ anɔ kpitioo.”—Mat. 24:22.
6. Mɛni hewɔ wɔbaanyɛ wɔkpee “amɛmanehulu kpeteŋkpele” lɛ kɛ hekɛnɔfɔɔ lɛ?
6 Shi kɛlɛ, yɛ be mli ni “amanehulu kpeteŋkpele” lɛ baafee be ni ehiii fe fɛɛ lɛ, wɔbaanyɛ wɔna miishɛjemɔ kɛtsɔ anɔkwasane nɛɛ nɔ akɛ nɔ ni baanyiɛ sɛɛ aba nɔŋŋ ji bei kpakpai—yɛ Nyɔŋmɔ gbɛjianɔtoo hee lɛ mli. Agbɛnɛ hu miishɛɛ gbɛkpamɔ ko yɛ akɛ gbɔmɛi babaoo ni yɔɔ wala mli bianɛ baaje nakai haomɔ be ni baa lɛ mli! Nyɔŋmɔ Wiemɔ lɛ woɔ shi akɛ “asafo babaoo ni mɔ ko mɔ ko nyɛŋ akane ni jɛ jeŋ maŋ fɛɛ jeŋ maŋ kɛ akutsei kɛ maji kɛ majianɔwiemɔi amli” baaje “amanehulu kpeteŋkpele” lɛ mli akɛ mɛi ni amɛyi ena wala. Amrɔ nɛɛ po Nyɔŋmɔ etsumɔ amɛhiŋmɛiaŋ yaafonui fɛɛ. (Kpoj. 7:9, 14, 17) Yɛ enɛ hewɔ lɛ, Yesu yɛ wɔsɛɛ be he jwɛŋmɔ kpakpa, eyɛ mli akɛ ele akɛ esa akɛ adesai kɛ “amanehulu kpeteŋkpele” lɛ akpe. Ewiemɔi ni hiɛnɔkamɔ eyi mli obɔ tɔ lɛ ji akɛ: “Shi beni nibii nɛɛ aaatsɔ naa shi lɛ, no lɛ nyɛkwɛa ŋwɛi ni nyɛholea nyɛyitsei anɔ, ejaakɛ nyɛkpɔmɔ lɛ miibɛŋkɛ.”—Luka 21:28.
7. Mɛni hewɔ mɛi komɛi nuɔ he akɛ adesai asaji miibɛŋkɛ enaagbee lɛ?
7 Yehowa Odasefoi kɛ afii nyɔŋmanyɔŋmai abɔ kɛ hehiamɔ ejaje nɛkɛ kɔkɔbɔɔ ni kɔɔ haomɔ be ni baagbe naa yɛ Harmagedon lɛ he sane lɛ yɛ majimaji fɛɛ mli. (Mar. 13:10) Yɛ bei komɛi amli lɛ, eyɛ mli akɛ mɛi komɛi nuɔ he akɛ oshara ko miiba moŋ, ejaakɛ amɛnaa ni shihilɛ ni yɔɔ je lɛ mli lɛ miifite kwraa, ni anɔkwale hiɛnɔkamɔ ko kwraa bɛ mli aloo akɛ nibii aaahi kɛya naanɔ. Ákɛ nɔkwɛmɔnɔ lɛ, yɛ May 4, 1980 lɛ, Miami Herald lɛ niŋmalɔ, Jim Hampton, ŋma akɛ:
“Ani oyɛ gbeyeishemɔ ko ni miida yɛ omli yɛ nɛkɛ gbii nɛɛ amli, taakɛ bɔni mihu minuɔ he Iɛ? Nɔ ni yɔɔ gbeyei nɛɛ haaa owɔ gbɛkɛ, gbeyei ko ni kɛɔ bo akɛ nɔ ko ehiii kwraa yɛ omaŋ lɛ he, yɛ jeŋ muu lɛ fɛɛ he lo? Gbeyei ni haa ŋmiŋmi mɔɔ bo ni ohe kpokpoɔ yɛ bei komɛi amli ejaakɛ eha ole akɛ Harmagedon jeee Okadi ko ni akɛtoɔ nɔ ko he ni okaneɔ yɛ Biblia lɛ mli lɛ, shi moŋ eji nɔ̃ ko diɛŋtsɛ? Ní akɛ enɛ ji klɛŋklɛŋ be yɛ oshihilɛ mli ni la ni ohiɛ lɛ ebɛŋkɛ tu tsofa lɛ naa kpaakpa akɛ Harmagedon ebafee nɔ ko diɛŋtsɛ ni baanyɛ aba kɛha bo?
“Miyɛ nakai gbeyeishemɔ lɛ. Mihiɛ gbooo akɛ makpɛlɛ enɛ nɔ, ejaakɛ mibi minanemɛi fe nyɔŋma kɛ enyɔ kɛji akɛ amɛhu amɛnuɔ he nakai, ni amɛteŋ mɔ ko bɛ ni nuuu he nakai.
“Mɔ fɛɛ mɔ ni jwɛŋmɔŋ ka shi fioo lɛ baanyɛ abua osharai ni eba ni eho yɛ nyɛsɛɛ afii fioo nɛɛ amli lɛ anaa ni ena akɛ je lɛ ebɛŋkɛ yinɔsane be ko agbó naa. Eji be ko ni he hiaa waa tamɔ Tsakemɔ Be lɛ, srawa hewalɛ tsɔnei ahe nitsumɔ puemɔ be aloo Elɛktrɔnik be lɛ. Ebaatsake gbɛ ni‘gbɔmɛi’ tsɔɔ nɔ amɛhiɔ shi lɛ kɛya naanɔ.
“Shi nɔ ni tamɔɔɔ jetsɛremɔi ni pue nɛɛ, ni he hiaa ha adesai ahiŋmɛigbelemɔ kɛ nɔyaa kɛ amɛhilɛ kɛ hamɔ lɛ, enɛ kome nɛɛ lɛ; . . etere efɔŋ kpeteŋkpele ko ni je lɛ enako eko da kɛmiiba.”
Be mli ni jeee bɔni Biblia lɛ tsɔɔ lɛ nɔ nɛkɛ niŋmalɔ nɛɛ wieɔ yɛ lɛ, nɔ ni ewie akɛ adesa miibɛŋkɛ ehaomɔ be “ni je lɛ enako eko nakai da” lɛ ji anɔkwale; nɔ ni adesai bɛŋkɛɔ he diɛŋtsɛ lɛ ji “amanehulu kpeteŋkpele” ni anako nɔ da kɛjɛ je lɛŋ shishijee mli kɛbashi ŋmɛnɛŋmɛnɛ, “ni asaŋ enɔ gbi ko gbi ko dɔŋŋ” ni Yesu gba efɔ shi lɛ.’
8. Mɛɛ adafitwaa he hiaa wɔ, ni mɛni hewɔ?
8 No hewɔ lɛ, kɛji akɛ wɔmiisumɔ wala lɛ,’ ni wɔmiisumɔ ni wɔhi shi yɛ jalɛ nibii agbɛjianɔtoo hee ni Nyɔŋmɔ baafee lɛ mli lɛ, belɛ ehe miihia waa ni Wɔkase nɛkɛ amanehulu kpeteŋkpele” ni baa nɛɛ ni baagbe naa yɛ Harmagedon Iɛ he nii. Hetooi ni yɔɔ hewalɛ ni ji anɔkwale he miihia sanebimɔi ni tamɔ nɛkɛ: Te wɔfeɔ tɛɛŋ “wɔleɔ akɛ wɔmiibɛŋkɛ amanehulu kpeteŋkpele” lɛ he lɛlɛŋ? Mɛɛ okadii wɔbaana ni baatsɔɔ akɛ eje shishi lɛlɛŋ?
Bɔni Fee Ni Wɔle Akɛ Wɔmiibɛŋkɛ
9, 10. Te Biblia lɛ tsɔɔ be ni baaya ayagbe naa yɛ “amanehulu kpeteŋkpele” lɛ mli lɛ mli eha tɛɛŋ?
9 Beni Yesu wie “amanehulu kpeteŋkpele” ni baa lɛ he lɛ, ewie odaseyelii komɛi ni baatsɔɔ akɛ ebɛŋkɛ lɛ hu he efɔ shi. Be ko lɛ kaselɔi lɛ bi lɛ nɔ ni baafee “nibii agbɛjianɔtoo” lɛ he “okadi.” (Mat. 24:3, NW) Yesu wie yinɔ pɔtɛɛ ko ni baaje shishi amɛna haomɔi ni dara ni anako eko nakai da lɛ he. Etsɔɔ nibii tamɔ majimaji ateŋ ta, tsɛŋemɔhelai, hɔmɔ kɛ shikpɔŋ hosomɔi “ni baaba yɛ hei sɔrɔtoi fɛɛ” ni baaba yɛ nakai yinɔ lɛ mli. Etsɛ enɛ akɛ “kɔɔmɔi lɛ abɔimɔŋ.” Bɔni nibii amli baawa aha sɔŋŋ hewɔ lɛ, “jeŋmaji afimɔ lɛ aaaba shikpɔŋ lɛ nɔ, ni amɛaafee yeyeeye,” ni gbɔmɛi pii “atsui baafa ni nɔ baanyɔnyɔi amɛnɔ yɛ gbeyei kɛ nibii ni baa shikpɔŋ ni ayɔɔ nɔ lɛ nɔ lɛ hewɔ.”—Mat. 24:7, 8, 34; Luka 21:10, 11, 25, 26, NW.
10 Yɛ no sɛɛ afii 32 lɛ, bɔfo Paulo ŋma gbalɛ wiemɔ ko yɛ Nyɔŋmɔ mumɔ krɔŋkrɔŋ lɛ tsirɛmɔ naa yɛ “nibii agbɛjianɔtoo lɛ naagbee” he akɛ: ‘Naagbee gbii lɛ anɔ lɛ jaramɔ bei baaba Ejaakɛ gbɔmɛi aaatsɔmɔ hesuɔlɔi, shika suɔlɔi,‘shwalɔi, hewolɔi, musubɔlɔi, fɔlɔi anɔ toigbolɔi, trumui, mɛi ni he tseee, mɛi ni edɔɔɔ mɔ he, kpaŋmɔ mlikulɔi, oshekuyelɔi, mɛi ni nyɛɛɛ amɛ akɔnɔ nɔ amɛye, mɛi ni hiɛ yɔɔ la, mɛi ni sumɔɔɔ ekpakpa, sɛɛgbɛtsɔɔlɔi, yiwalɔi, henɔwolɔi.” Gbalɛ lɛ hu kɛɔ akɛ “shi gbɔmɛi fɔji kɛ shishiulɔi aaawo wu yɛ efɔŋ mli,” ni tsɔɔ akɛ kɛji akɛ “naagbee gbii” lɛ je shishi pɛ lɛ nɔ ni baanyiɛ sɛɛ aba ji fitemɔ yɛ adesa shihilɛ mli, ni nɔ ni baagbe naa aba kwraa ji “amanehulu kpeteŋkpele” lɛ.—2 Tim. 3:1-5, 13.
11, 12. Mɛni hewɔ afi 1914 ji tsakemɔ be yɛ adesa yinɔsane mli lɛ?
11 Ŋwanejee ko kwraa bɛ he akɛ, be ni Yesu kɛ Biblia mli ŋmalɔi ni mumɔ tsirɛ amɛ tamɔ Paulo tsɔɔ Iɛ ji nɔ ni wɔyɔɔ mli bianɛ lɛ! Yɛ anɔkwale mli lɛ, etee nɔ aahu kɛjɛ ŋmɛnɛŋmɛnɛ yinɔsane “tsakemɔ be lɛ mli yɛ 1914 ni na beni Jeŋ Ta I fɛ́ lɛ. Yinɔsane ŋmalalɔi babaoo wieɔ nakai afi lɛ he yɛ anɔkwale mli akɛ, be ni he hiaa waa kɛha adesai, ejaakɛ, no ji be ni je lɛ bote fimɔ be ni eko bako nakai da yɛ jeŋ fɛɛ lɛ mli. Jeŋ Ta yeɔ enɛ he odase, ejaakɛ eji ta ni ehiii fe nɔ ni etsɔ hiɛ lɛ fɛɛ eko, ni no hewɔ ni atsɛ lɛ yɛ nakai be lɛ mli akɛ “Ta Kpeteŋkpele” lɛ. No ji klɛŋklɛŋ jeŋ ta. Eji jeŋ muu fɛɛ ta ni sa maŋ fɛɛ maŋ he yɛ shikpɔŋ nɔ.
12 Martin Kieffer ŋma sane ko yɛ Jeŋ Ta I he ni ekɛtsɔɔ wolo The First World War ni General Richard Thoumin ŋma tsutsu kwraa yɛ France lɛ mli, yɛ wolo lɛ hiɛ, yɛ saneyitso ni ji “La Grande Guerre” (Ta Kpeteŋkpele) lɛ shishi, akɛ: “Klɛŋklɛŋ Jeŋ Ta lɛ lá kɛ yaafonui tsake shikpɔŋ lɛ hiɛ.” Tatsɛ nɛɛ ŋma hu akɛ:
“Beni akɛ tawuu nii lɛ shwie shi yɛ November 1918 lɛ, no mli Iɛ gbɔmɛi akpekpei nyɔŋma elaaje amɛwala, ni apila nakai toi enyɔ aloo amɛtsɔmɔ obubuafoi. Belɛ ebɛ naakpɛɛ mɔ akɛ atsɛ nakai ta lɛ akɛ ‘Ta Kpeteŋkpele’ lɛ . . .
“Bɔni Jeŋ Ta I lɛ dalɛ yɔɔ lɛ ba yɛ . . . elɛɛmɔ kɛ yifalɛ naa, ni ji akɛ yɛ tawuu nii ni akɛwo mli kɛ heloo gbɛfaŋ nibii ni efite lɛ naa. . . . Be ko bako ni maji babaoo kɛ asraafoi ni fa nakai ekpe hiɛ kɛ hiɛ yɛ tai ni dara nɛkɛ mli da; be bako ni agbɛ asraafoi babaoo nɛkɛ yɛ tawuu mli loo apila amɛ nɛkɛ da; be bako ni gbɔmɛi kɛ tawuu nii ni naa wa nɛkɛ ewu ta da.”
13. Mɛɛ shihilɛi krokomɛi ni ebɔle Jeŋ Ta I tsɔɔ akɛ “naagbee gbii” lɛ je shishi yɛ nakai be lɛ mli?
13 Yɛ afi 1918, dani ta lɛ aaaba naagbee lɛ, Spania Influenza ni ji tsɛŋemɔhela lɛ je shishi ebɔi shikpɔŋ lɛ nɔ bɛɛmɔ. Egbe gbɔmɛi fe akpekpei 20, nɔ ni fa fe gbɔmɛi ni gboi yɛ ta lɛ mli. Yɛ ta lɛ mli kɛ no sɛɛ hu lɛ, akpekpei babaoo gboi yɛ hɔmɔ hewɔ. Agbɛnɛ shikpɔŋhosomɔ gbe babaoo yɛ 1915 lɛ, nɔ ni miihe ashɛ 30,000 gboi yɛ Italia; yɛ 1920 lɛ aaafee 180,000 gboi yɛ China; 1928 lɛ, aaafee 143,000 hiɛ kpata yɛ Japan. Belɛ Frank Peters niŋmalɔ lɛ yɛ nɔ ni ebaanyɛ edamɔ nɔ ni eŋma yɛ St. Louis Post-Dispatch lɛ mli akɛ: “Hiŋmɛigbelemɔ bote hela ni yi wa ni ekolɛ kɛlɛ baaba naagbee mli yɛ 1914.” Hɛɛ, jeŋ ta, tsɛŋemɔhelai, hɔmɔ kɛ shikpɔŋhosomɔi “baaba yɛ hei sɔrɔtoi fɛɛ.” Yɛ anɔkwale mli lɛ, enɛɛmɛi ji “kɔɔmɔi lɛ abɔimɔŋ” ni Yesu gba fɔ shi lɛ. “Naagbee” lɛ “naagbee gbii” lɛ eje shishi lɛlɛŋ!—Mat. 24:8; 2 Tim. 3:1; Dan. 12:4.
Odaseyelii Babaoo
14. Mɛni hewɔ wɔbaanyɛ wɔkɛɛ akɛ wɔbote “naagbee gbii” lɛ mli vii kɛshɛ shɔŋŋ lɛ?
14 Agbɛnɛ yɛ heni wɔshɛ yɛ afi 1981 mli nɛɛ, afii 67 mli wɔyɔɔ nɛɛ kɛjɛ be mli ni be ni he hiaa ni ji 1914 ba. Jeŋ Ta II hu eba yɛ nɛkɛ be nɛɛ mli, ni egbe gbɔmɛi aaafee akpekpei 55, ni ekɛ atɔmik hiɛkpatamɔ ba maji enyɔ nɔ, ni ekɛ je lɛ bote nuklea be mli. Kɛjɛ nakai be lɛ mli kɛbaa nɛɛ, shihilɛ tsɔɔ akɛ adesa nyɛɛɛ atsu enaagbai ahe nii, ni nibii agbɛjianɔtoo nɛɛ fai krokomɛi lɛ fɛɛ miifite kɛmiiya. Enɛɛmɛi fɛɛ kɛɔ wɔ akɛ wɔbote “naagbee gbii” lɛ mli vii ni wɔshɛ shɔŋŋ, ni nibii miiho oyayaayai kɛmibɛŋkɛ “amanehulu kpeteŋkpele” lɛ.
15, 16. Mɛni ji nɔ ni mɛi krokomɛi Wieɔ yɛ shihilɛi ni yɔɔ wɔbe nɛɛ mli lɛ ahe?
15 Akɛ nɔkwɛmɔ nɔ lɛ, yɛ 1979 naagbee lɛ, niiahelɛtelɔ Leonard Silk ŋma akɛ: “Nii ni he ehia wala yɛ nɛkɛ gbɛhamɔ be nɛɛ mli ji, ekolɛ jeee petro, shi moŋ hiɛnɔkamɔ. Ejaakɛ, akɛni 1970 afii lɛ amli haomɔ be lɛ ebote enaagbee gbii amli hewɔ lɛ, eshara ni ma jeŋ shika he lɛtemɔ—kɛ toiŋjɔlɛ hiɛ—lɛ mli miiwo wu.” Niŋmalɔ Man Lerner kɛɛ yɛ afi 1980 agbiɛnaabe mli akɛ: “Etamɔ nɔ ni je lɛ eshɛ heko ni nibii ajarawalɛ, nitsumɔ ni akɛ mlifu fɔɔ etsumɔ, nyɔmɔ ni abɔɔ, nibii ahe sɛkɛ ni ayeɔ kɛ awuyeli eha amu sane naa akɛ nɔ ko nɔ ko bɛ ni abaanyɛ akɛtsu nii aloo akɛfee he nɔ ko, ni mɔ ko bɛ ni kudɔɔ nibii. Ani mɔ ko yɛ ni eeenyɛ eye nɔ jogbaŋŋ lɛ heko?
16 Beni abi U.S. Amerika maŋtiasei lɛ amli nɔkwɛlɔi lɛ nɔ hewɔ ni amɛmaji lɛ efite kwraa nɛkɛ lɛ he sane lɛ, amɛteŋ mɔ kome ha hetoo akɛ: “Anyɛŋ aye naagbai lɛ anɔ kunim. Kɛ́ mɔ ko yɛ ni enijiaŋ ejeko wui lɛ, belɛ mɔ lɛ susuuu nii ahe.” Maji lɛ amli onukpai lɛ ateŋ mɔ kroko ni abi lɛ akɛ: “Ani anyɛɛɛ aye nɔ bianɛ” lo lɛ wie anɔkwasaji nɛɛ ahe akɛ “anɔkwalei ni jwere shi lɛ baaha mɔ ko asusu, akɛ kɛ hoo kwraa lɛ, nakai ji bɔni sane lɛ yɔɔ.” Nakai nɔŋŋ hu Gus Tyler, mɔ ni ŋma wolo Scarcity lɛ kɛɛ akɛ: “Ojotswaa, juu, polisifoi agbee, tsofai fɔji ahɔɔmɔ kɛ shihilɛ ko ni tamɔ nɔ ni ayeee mla nɔ eba maji wuji babaoo mli.”
17. Nibii amli ni maŋkwramɔŋ onukpa ko ni ele lɛ jogbaŋŋ nyiɛ kuu ko hiɛ kɛ-tao mli nyɛsɛɛ nɛɛ lɛ mu sane naa yɛ mɛɛ gbɛ nɔ?
17 Tsutsu Federal Republic of Germany maŋnɔkwɛlɔ”Willy Brandt fee sɛinɔtalɔ kɛha kuu ko ni miitao jeŋ saji amli afii enyɔ kɛ fã. Bɔni amɛmu amɛsane lɛ naa nyɛsɛɛ nɛɛ amɛha nɛ:
“Be mli ni 1980 afii lɛ jeɔ shishi lɛ, no mli lɛ je lɛ kɛ osharai ni mliwawai miikpe fe be fɛɛ yɛ Jeŋ Ta ni ji Enyɔ be le mli. Eka shi faŋŋ akɛ bɔni je lɛ shika he saji etsɔ bianɛ kɛ gbɛ ni etsɔɔ nɔ etsuɔ nii lɛ ehiii kwraa dɔŋŋ akɛ agbɛnɛ eeye maji fɛɛ awui yɛ nibii ni jwere amɛhiɛ ni esa akɛ amɛtsu he nii amrɔ nɔŋŋ kɛ nɔ ni amɛbaatsu he nii yɛ wɔsɛɛ be mli lɛ awui. . . .
“Ohia kɛ hɔmɔ he naagba lɛ miifee nɔ ni hiɛdɔɔ yɔɔ mli yɛ be fɛɛ; amrɔ nɛɛ aaafee gbɔmɛi akpekpei 800 yɛ je lɛ mli ni amɛtsɔmɔ ohiafoi kwraa ni amɛyibɔ lɛ ayi miifa; ŋmãa ni anaaa lɛ babaoo kɛ niyenii krokomɛi miitsɔɔ akɛ hɔmɔ kɛ gbele ni jɛ hɔmɔ baaba. . . .
“Gbekɛbii ni amɛyeko afii enumɔ lɛ ateŋ aaafee akpekpei 20 kɛmiiya 25 gboiɔ daa afi yɛ maji ni eyako hiɛ babaoo lɛ amli . . .
“Nibii ni woɔ maji ni bɛ nii tsɔ lɛ ahe gbeyei bianɛ ji nibii ni ebɔle amɛhe kɛkpe lɛ fitemɔ ni miiya hiɛ yɛ be fɛɛ mli yɛ be mli ni babaoo hu naaa niyenii amɛyɛ ni amɛbɛ shika hu ni amɛkɛ-aahe eko, ni tsɔɔ akɛ hɔmɔ baagbe amɛteŋ mɛi pii. Yɛ majimaji ateŋ shika he nitsumɔ mli lɛ, maji babaoo yɛ ni amɛnyɛŋ amɛwo nyɔmɔ ni amɛhiɛ lɛ . . . ni shikatoohei agbɛjianɔtoo hu baafite . . . ni enɛ baaha apele nibii ahe ni akɛna gbɛi aloo akɛye nibii ni ayɔɔ lɛ nɔ ni enɛ kɛ tawuu baaba.’
18. Mɛni nibii ni ba nyɛsɛɛ nɛɛ yɛ jeŋ saji amli yeɔ odase akɛ aasaa gbɛ aha “amanehulu kpeteŋkpele” lɛ?
18 Nɔ ni akɛfataa enɛ he ji weku shihilɛ kɛ gbalashihilɛ ni fiteɔ yɛ afii nɛɛ amli kɛ efɔŋfeemɔ kɛ awuyelii sɔrɔtoi babaoo, tsofai ni akɛtsuɔ nii yɛ gbɛi fɔji anɔ kɛ daatɔɔ, kɛ gbekɛbii mlakwalɔi. Ani ejeee anɔkwale akɛ adesa weku lɛ shishifã diɛŋtsɛ miikumɔ kɛmiishwie shi, taakɛ Yesu kɛɛ ebaaba dani “amanehulu kpeteŋkpele” lɛ aba lɛ? (Mat. 24:12) Nɔ ni fata he lɛ, susumɔ nɔ ni baa nɛɛ he, taakɛ World Press Review) lɛ kɛɛ lɛ: “Afii nyɔŋmai kpaanyɔ je lɛ mlihilɛ yɛ gbeyei naakpa yɛ gbɛi sɔrɔtoi babaoo nɔ, jeee yɛ ohia kɛ jalɛsane ni ayeee ni mɛi pii naa nɔ̃ yɛ mli lɛ pɛ kɛkɛ shi moŋ yɛ tawuu nii ni abaanyɛ akɛkpata jeŋ muu fɛɛ hiɛ ni gbɔmɛi kɛ-shwɛɔ lɛ hewɔ.” Atsɛ́ nakai hiɛkpatamɔ tsɔne lɛ akɛ “nɔ ko ni haa ŋmiŋmi mɔɔ mɔ,” ni ebɛ naakpɛɛ, ejaakɛ Ŋleshi New Scientist lɛ bɔ amaniɛ akɛ: “Aaafee nuklea okpɛlɛmii 60,000 ji nɔ ni abua naa awo taawuu nii atoohei ŋmɛnɛ, ni hewalɛ ni amɛhiɛ lɛ fe TNT tɔŋ 16,000 (efalɛ lɛ feɔ okpɛlɛm ni atswa yɛ Hiroshima lɛ ekomekomei 1,250,000) .” Nakai tawuu nii lɛ ekomɛi yɛ gbeyei akɛ okpɛlɛm kome ni abaafɛ lɛ baanyɛ afite maŋ muu kome ni edaaa tsɔ aloo maŋwulu ko fa kɛjɛ shikpɔŋ nɔ. Hɛɛ, enɛ ji klɛŋklɛŋ be yɛ adesa yinɔsane mli ni gbɔmɔ baanyɛ akpata wala ni fa hiɛ kɛjɛ shikpɔŋ nɔ.
19. Namɔ esa akɛ wɔkɛ wɔhiɛ afɔ enɔ ni etsu ŋmɛnɛŋmɛnɛ shihilɛ mli naagbai lɛ ahe nii eha wɔ?
19 Ani esa akɛ wɔsusu akɛ akɛni je lɛ mli hiɛnyiɛlɔi lɛ ji anɔkwafoi, amɛle nii, amɛle nɔ ni yaa nɔ lɛ jogbaŋŋ ni amɛhe wa hu hewɔ lɛ, belɛ amɛbaatsɔ gbɛ ko nɔ kɛ̃ ni amɛkɛtsu naagbai nɛɛ ahe nii? Kadimɔ nɔ ni tsutsu U.S. Amerika Maŋsɔɔlɔ ni kwɛɔ Shika nɔ, Michael Blumenthal kɛɛ: “Mɔ ko mɔ ko bɛ ni nuɔ ŋmɛnɛŋmɛnɛ shihilɛ nɛɛ shishi jogbaŋŋ. Ní nɔyeli lɛ mli nitsulɔi onukpai fɛɛ ni toɔ yiŋ yɛ saji wuji ahe lɛ fata he. Amɛnaa ekpɛ amɛhe taakɛ bɔni ofeɔ kɛ egbele adafitswaa wolo mli leebi akɛ ookane. Anɔkwasane lɛ ji akɛ, mɔ ko bɛ . . . ni enyɛ etsɔ hiɛ egba bɔni fee ni wɔbote nɛkɛ naagbai nɛɛ amli lɛ he sane efɔ shi yɛ anɔkwale mli.” Shi Biblia lɛ efee nakai, ni ekɛ nɛkɛ ŋaawoo nɛɛ fataa he: “Nyɛkaŋɔa nyɛhiɛ nyɛfoa lumɛi loo gbɔmɔ bi ko ni yelikɛbuamɔ ko bɛ edɛŋ lɛ nɔ.” Shi moŋ, “ajɔɔ mɔ ni ehiɛ ka Yehowa, e-Nyɔŋmɔ lɛ nɔ lɛ; eyeɔ anɔkwa kɛyaa naanɔ.”—Lala 146:3-6.
20. Mɛni he nɔmimaa wɔyɔɔ, no hewɔ lɛ mɛɛ sanebimɔi ehe hiɛɛ ni aha hetoo?
20 Yɛ anɔkwale mli lɛ shihilɛi ni agba afɔ shi yɛ Biblia gbalɛ mli lɛ fɛɛ yɛ biɛ.Wɔbote nibii agbɛjianɔtoo nɛɛ “naagbee gbii” lɛ mli vii kɛ-shɛ shɔŋŋ, ni wɔmiibɛŋkɛ enaagbee fa lɛ ni ji “amanehulu kpeteŋkpele” lɛ ni baagbe naa yɛ Harmagedon lɛ he. Ní mɛni kwraa baakadi nakai “amanehulu kpeteŋkpele” lɛ famɔi? Shihilɛ ko ni etee nɔ aahu kɛ-shɛ shɔŋŋ. Mɛni ji shihilɛ nɛɛ? Abaasusu enɛ he yɛ nikasemɔ ni baanyiɛ enɛ sɛɛ lɛ mli.
[Shishigbɛ niŋmai]
a Ajie kɛjɛ October 15, 1980 Blɔfo Buu-Mɔɔ lɛ mli.
[Mfoniri ni yɔɔ baafa 12]
Gbɔmɛi “amii aaashɛ amɛhe yɛ hejɔlɛ babaoo mli” yɛ Nyɔmɔ jalɛ gbɛjianɔtoo hee lɛ mli