Sanebimɔi ni Jɛ Kanelɔi Adɛŋ
August 15, 1996, “Buu-Mɔɔ” lɛ kɛɛ akɛ: “Yɛ amanehulu lɛ naagbee fã lɛ mli lɛ, abaahere ‘heloo’ ni ejo foi kɛtee Yehowa masɛi lɛ yiwala.” Ani enɛ miitsɔɔ akɛ, yɛ amanehulu kpeteŋkpele lɛ klɛŋklɛŋ fã lɛ sɛɛ lɛ, mɛi heei pii baaba Nyɔŋmɔ masɛi?
Jeee no ji sane ni atsɔɔ mli lɛ.
Yesu wiemɔi ni anaa yɛ Mateo 24:22 lɛ baaba mli klɛŋklɛŋ yɛ wɔsɛɛ be mli, kɛtsɔ yiwalaheremɔ kɛmiitsɔ amanehulu kpeteŋkpele ni baa lɛ klɛŋklɛŋ fã, ni ji jamɔ tutuamɔ lɛ mli lɛ nɔ. Nikasemɔ lɛ kɛɛ: “Kaimɔ akɛ, no mli lɛ ahere ‘heloo,’ ni ji shwɛɛnii ni afɔ amɛ mu lɛ kɛ ‘asafo babaoo’ lɛ ayiwala momo, yɛ be mli ni Babilon Kpeteŋkpele lɛ hiɛ kpataa kwraa yɛ oyaiyeli mli yɛ amanehulu lɛ klɛŋklɛŋ fã lɛ mli lɛ.”
Anɔkwafoi nɛɛ ehiŋ oshara mli yɛ be mli ni Yesu kɛ eŋwɛi tai lɛ feɔ nii yɛ amanehulu lɛ naagbee fã lɛ mli lɛ. Shi namɛi baaje nakai amanehulu lɛ fã lɛ mli? Kpojiemɔ 7:9, 14 tsɔɔ akɛ asafo babaoo ko ni yɔɔ shikpɔŋ nɔ hiɛnɔkamɔ baaje mli. Ni Kristofoi ni akɛ mumɔ efɔ amɛ mu lɛ hu? “Sanebimɔi ni Jɛ Kanelɔi Adɛŋ” ni yɔɔ August 15, 1990 Buu-Mɔɔ lɛ mli lɛ wie nɔ hewɔ ni wɔnyɛŋ wɔgba mli kpoo wɔwie be mli ni abaaŋɔ shwɛɛnii ni afɔ amɛ mu lɛ kɛya ŋwɛi lɛ he lɛ. No hewɔ lɛ, nyɛsɛɛ nikasemɔ lɛ (August 15, 1996) shi sane lɛ ni emuuu naa, ni ewie he akɛ: “Nakai nɔŋŋ yɛ amanehulu lɛ naagbee fã lɛ mli lɛ, abaahere ‘heloo’ ni ejo foi kɛtee Yehowa masɛi lɛ yiwala.”
Yɛ nɔ ni kɔɔ mɛi heei ni ekolɛ amɛbaakase anɔkwale lɛ ni amɛba Nyɔŋmɔ masɛi, yɛ be mli ni amanehulu kpeteŋkpele lɛ eje shishi lɛ sɛɛ lɛ ahe lɛ, kadimɔ Yesu wiemɔi ni aŋmala ashwie shi yɛ Mateo 24:29-31 lɛ. Kɛ amanehulu lɛ fɛ́ sɛɛ lɛ, gbɔmɔ Bi lɛ okadi lɛ baapue. Yesu kɛɛ akɛ shikpɔŋ nɔ akutsei fɛɛ baawo yara. Ewieee nɔ ko yɛ mɛi ni baayoo shihilɛ lɛ, ni baatsake amɛtsui, ni amɛdamɔ Nyɔŋmɔ masɛi, ni amɛbatsɔmɔ anɔkwa kaselɔi lɛ ahe.
Nakai nɔŋŋ hu, yɛ gwantɛŋi lɛ kɛ abotiai lɛ ahe abɛbua lɛ mli lɛ, gbɔmɔ Bi lɛ pueɔ ni etsɔɔ kojomɔ nɔ egbálaa gbɔmɛi ateŋ yɛ nɔ ni amɛfee loo amɛfeee yɛ tsutsu ko lɛ nɔ. Yesu ewieee gbɔmɛi ni ejie abotiai asu kpo aahu ni tsakeɔ trukaa ni amɛbatsɔmɔɔ tamɔ gwantɛŋi lɛ ahe. Edamɔɔ nɔ ni gbɔmɛi lɛ ejie amɛhe kpo momo akɛ amɛji nɔ ekojoɔ.—Mateo 25:31-46.
Shi, shikome ekoŋŋ lɛ, esaaa akɛ wɔfeɔ keketee yɛ sane nɛɛ he. Nyɔŋmɔ webii, ni ji mɛi ni afɔ amɛ mu lɛ kɛ asafo babaoo lɛ fɛɛ le nɔ ni esa akɛ amɛfee bianɛ—amɛshiɛ ni amɛfee kaselɔi. (Mateo 28:19, 20; Marko 13:10) Amrɔ nɛɛ ji be ni esa akɛ wɔkɛ hiɛdɔɔ asusu ŋaawoo nɛɛ he: “Shi akɛ nɔ ni hefatalɔi nitsulɔi ji wɔ hewɔ lɛ, wɔwieɔ wɔtsɔɔ nyɛ hu, ni nyɛkahe Nyɔŋmɔ duromɔ lɛ yakatswaa; ejaakɛ ekɛɛ akɛ: ‘Be ni sa mli miboo toi yɛ, ni walaheremɔ gbi nɔ hu miye mibuao yɛ.’ Naa, be ni sa jogbaŋŋ nɛ; naa, walaheremɔ gbi nɛ.”—2 Korintobii 6:1, 2.