Wɔhi Shi Akɛ Mɛi Ni Ato Amɛ Gbɛjianɔ Aha Yibaamɔ Ni Kɛ Mɔ Yaa Afii Akpe Lɛ Mli
“Ni tooi lɛ fee kuu kome kɛ kwɛlɔ kome.”—YOHANE 10:16.
1. Afii akpe tamɔ mɛni kɛha Nyɔŋmɔ ni hiɔ shi daa lɛ?
YEHOWA ji Bɔlɔ ni fee be kɛha adesai. Ni kɛha lɛ, ni ji Nyɔŋmɔ ni gbooo ni yɔɔ kɛjɛ naanɔ kɛyaa naanɔ lɛ, afii akpe tamɔ gbi ni hoɔ oya aloo tamɔ nyɔɔŋ buu be yɛ wɔ gbɛkɛ gbɛkɛi lɛ ekome mli.—Lala 90:4; 2 Petro 3:8.
2. Mɛɛ be kpalaŋŋ Yehowa eto ema shi kɛha adesai fɛɛ ajɔɔmɔ?
2 Nyɔŋmɔ eto okadi gbi ko ni ji afii akpe ni emli ni ebaajɔɔ shikpɔŋ lɛ nɔ wekui fɛɛ ema shi. (1 Mose 12:3; 22:17, 18; Bɔfoi lɛ Asaji 17:31) Mɛi ni fata he ji mɛi ni amrɔ nɛɛ amɛgboi kɛ mɛi ni yɔɔ wala mli. Mɛɛ gbɛ nɔ Nyɔŋmɔ baatsɔ afee enɛ yɛ? Kɛtsɔ E-Maŋtsɛyeli ni yɔɔ Yesu Kristo, Nyɔŋmɔ ekadi yoo lɛ “seshi” lɛ dɛŋ lɛ nɔ!—1 Mose 3:15.
3. (a) Mɛɛ gbɛ nɔ atsɔ atswa Nyɔŋmɔ yoo lɛ Seshi lɛ nanetsitsi nɔ, ni te fee tɛŋŋ ni atsa nakai pilamɔ lɛ? (b) Yɛ Yesu Kristo Afii Akpe Nɔyeli lɛ naagbee lɛ, mɛni ebaafee okadi onufu lɛ?
3 Atswa Nyɔŋmɔ yoo lɛ (aloo ŋwɛi gbɛjianɔtoo lɛ) Seshi lɛ okadi nanetsitsi nɔ beni Yesu Kristo gbo loo ena nɔ akɛ la odasefonyo ni ehi shi akɛ mɔ ni egbo gbii etɛ mli fai komɛi yɛ wɔ Ŋmɛnɛŋmɛnɛ Beaŋ afi 33 mli lɛ. Shi yɛ gbi ni ji etɛ lɛ nɔ lɛ, Nyɔŋmɔ Ofe lɛ, Wala-Halɔ Kpeteŋkpele lɛ tsa nakai pilamɔ lɛ kɛtsɔ shi ni etee e-Bi anɔkwafo lɛ shi kɛtee wala ni gbele bɛ mli yɛ mumɔŋ shihilɛ he lɛ nɔ. (1 Petro 3:18) Akɛni Yesu gboŋ dɔŋŋ hewɔ lɛ eyɛ gbɛhe ni baaha eye nɔ akɛ Maŋtsɛ yɛ adesai anɔ kɛha afii akpe koni “etswa” ekadi onufu lɛ yitso nɔ, ni ekpata ehiɛ kwraa kɛjɛ shihilɛ mli kɛjɛ Afii Akpe Nɔyeli lɛ sɛɛ lɛ mli. Mɛɛ jɔɔmɔ enɛ baaji kɛha adesai anɔkwafoi ni ato amɛ gbɛjianɔ ekoŋŋ lɛ nɛkɛ!
4. Mɛɛ gbɛjianɔtoo nɛkɛ Nyɔŋmɔ kɛ ewebii lɛ tsuɔ he nii?
4 Atee nɔ ato nibii ahe gbɛjianɔ babaoo yɛ Yehowa webii ni yɔɔ shikpɔŋ nɔ lɛ ateŋ yɛ “nibii agbɛjianɔtoo nɛɛ naagbee” ni je shishi kɛjɛ Jeŋmaji Abe lɛ naagbee yɛ 1914 lɛ. (Mateo 24:3; 21:24, New World Translation) Aatsu nɛkɛ asafoŋ gbɛjianɔtoo ni tsɔɔ Afii Akpe lɛ hiɛ lɛ yɛ Gbɛjianɔtolɔ Kpeteŋkpele lɛ, Yehowa Nyɔŋmɔ suɔmɔnaa nifeemɔ kɛ egbɛtsɔɔmɔ shishi. Eshiwoo Maŋtsɛyeli kɛtsɔ Yesu Kristo nɔ, ni eyoo, ni ji eŋwɛi gbɛjianɔtoo ni tamɔ ŋa lɛ fɔ lɛ lɛ ba mli yɛ 1914, taakɛ Biblia gbalɛ mlibaa yeɔ he odase lɛ.
5. Mɛɛ fɔmɔ agba he sane afɔ shi yɛ Kpojiemɔ 12:5,ni mɛɛ be atsɔɔ enɛ mli klɛŋklɛŋ yɛ Buu-Mɔɔ lɛ mli?
5 No hewɔ lɛ, Kpojiemɔ 12:5 wiemɔi nɛɛ eba mli yɛ anunyam mli: “Ni efɔ binuu ni kɛ dadetso baakpala jeŋmaji lɛ fɛɛ lɛ; ni asha ebi lɛ kɛtee Nyɔŋmɔ ŋɔɔ yɛ emaŋtsɛsɛi lɛ masɛi.” Yehowa Maŋtsɛyeli kɛtsɔ Kristo nɔ lɛ fɔmɔ, taakɛ Nyɔŋmɔ yoo lɛ binuu ni efɔ lɛ ehee lɛ feɔ he mfoniri lɛ ji sane ko ni atsɔɔ mli klɛŋklɛŋ kwraa yɛ March 1, 1925 The Watch Tower lɛ mli. Nɛkɛ Mesia Maŋtsɛyeli lɛ fɔmɔ yɛ ŋwɛi yɛ 1914 nɛɛ yɛ sɔrɔto yɛ Zion ‘bii’ lɛ “maŋ” lɛ fɔmɔ yɛ shikpɔŋ nɔ yɛ 1919 he.—Yesaia 66:7, 8.
6. (a) Maŋtsɛyeli lɛ fɔmɔ bi ni atsu mɛni ni Yesu gba fɔ shi? (b) Nitsumɔ nɛɛ ni aaatsu lɛ biɔ mɛni yɛ Yehowa webii agbɛfaŋ, ni mɛni naa amɛdamɔɔ bianɛ lɛ?
6 Yehowa Maŋtsɛyeli lɛ ni ebaatsɔ nɔ ebu ja ni jeŋ muu fɛɛ maŋtsɛ ni eji lɛ ja lɛ bem lɛ fɔmɔ—ah, naa nɔ ko ni esa akɛ atswa he adafi yɛ shikpɔŋ muu lɛ fɛɛ nɔ! Ni naa be ni nɛkɛ Yesu wiemɔi nɛɛ ni kɔɔ “ba ni eba” ni anaaa lɛ lɛ he odaseyeli lɛ he lɛ baaba emli: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.” (Mateo 24:3, 14) No hewɔ lɛ, shiɛmɔ yɛ ekomefeemɔ mli yɛ majimaji ateŋ, yɛ jeŋ muu fɛɛ lɛ baabi ni ato Yehowa jaa muu fɛɛ gbɛjianɔtoo lɛ fa ni anaa, lɛ gbɛjianɔ diɛŋtsɛ. Buu Mɔɔ Biblia Wolo Bibioo Asafo lɛ ni J. F. Rutherford, ni no mli lɛ eji amɛsɛinɔtalɔ ni damɔ enajiaŋ lɛ miisumɔ ni afee nakai. No hewɔ lɛ, kɛjɛ ta lɛ sɛɛ afi ni ji 1919 kɛyaa lɛ, Asafo lɛ sɛɛfilɔi anɔkwafoi lɛ agbɛjianɔtoo akɛ maŋ ni asaa ato amɛ gbɛjianɔ ekoŋŋ lɛ tee nɔ kɛ faishitswaa, kɛ sɔlemɔ kɛha Gbɛjianɔtolɔ ni fe fɛɛ, Yehowa Nyɔŋmɔ gbɛtsɔɔmɔ kɛ ejɔɔmɔ. Yɛ shitee-kɛ-woo ni mli wa ni Fasistbii kɛ Hitler Nazi kuu lɛ kɛ Katolek Nifeemɔ lɛ kɛba lɛ kɛ Jeŋ Ta II ni yaa nɔ lɛ fɛɛ sɛɛ lɛ, Yehowa Odasefoi ni yɔɔ jeŋ muu fɛɛ lɛ fee ekome yɛ jeŋ ni nyɛɔ amɛ lɛ hiɛ.
7. (a) Mɛɛ wekukpaa ni amɛkɛ amɛhe aaahi mli pɛ Yehowa webii baakpa gbɛ akɛ no baaha amɛje amanehulu kpeteŋkpele lɛ mli? (b) Te fee tɛŋŋ ni mɛi ni je Nu Afua mli lɛ je nɛkɛ jeŋ muu Nu Afua nɛɛ mli lɛ, ni amɛfeɔ namɛi ahe mfoniri?
7 Yehowa Odasefoi pɛ, shwɛɛnii ni afɔ amɛ mu lɛ kɛ “asafo babaoo” lɛ ni ji gbɛjianɔtoo ni afee amɛ ekome yɛ Gbɛjianɔtolɔ ni fe fɛɛ lɛ hebuu shishi lɛ pɛ yɔɔ Ŋmalɛ naa hiɛnɔkamɔ akɛ amɛbaaje gbɛjianɔtoo ni abu lɛ fɔ ni Satan Abonsam yeɔ nɔ nɛɛ naagbee ni baa lɛ mli. (Kpojiemɔ 7:9-17; 2 Korintobii 4:4) Ni amɛ amɛbaafee “heloo” ni Yesu Kristo kɛɛ akɛ abaahere amɛyiwala kɛtsɔ amanehulu ni fe fɛɛ yɛ adesa yinɔsane be fɛɛ mli lɛ mli. Yesu kɛɛ, taakɛ eji yɛ Noa gbii lɛ amli lɛ, nakai hu ebaaba mli yɛ gbi nɔ ni abaajie Lɛ kpo lɛ mli. Susumai kpaanyɔ pɛ ni yɔɔ adeka ni he afii babaoo kɛ mɔdɛŋbɔɔ ni ato he gbɛjianɔ dani akɛgbe naa lɛ mli lɛ pɛ je jeŋ muu fɛɛ Nu Afua lɛ mli. Amɛje mli akɛ weku ni efee ekome. (Mateo 24:22, 37-39; Luka 17:26-30) Noa ŋa lɛ feɔ Kristo ayemforo lɛ he mfoniri, ni ebihii kɛ eshaayeimɛi lɛ feɔ Yesu ŋmɛnɛŋmɛnɛ beaŋ “tooi krokomɛi” lɛ ni amɛyi efa amɛtsɔ asafo babaoo, ni bɔ ni amɛyikulɛ baafee lɛ wɔleee lɛ ahe mfoniri. (Yohane 10:16) Dani amɛaajɛ mli kɛyabote Afii Akpe lɛ ni yɔɔ Noa Kpeteŋkpele, Yesu Kristo shishi lɛ mli lɛ, esa akɛ amɛhi shi akɛ mɛi ni ato amɛ gbɛjianɔ kɛ shwɛɛnii ni afɔ amɛ mu lɛ, “mɛi ni ahala lɛ” ni amɛhewɔ afoɔ “amanehulu babaoo” lɛ nɔ kpitioo lɛ.—Mateo 24:21, 22.
Yiwalaheremɔ Kɛmiiya Afii Akpe Lɛ Mli
8. Yɛ be mli ni ekɛ egbalɛ ni kɔɔ ba ni eba lɛ he lɛ baa naagbee lɛ, mɛɛ nɔkwɛmɔ nɔ Yesu kɛha, ni yɛ mɛɛ gbɛ nɔ June 1, 1935 sa kadimɔ yɛ eshishinumɔ hewɔ?
8 Taakɛ Mateo Sanekpakpa lɛ tsɔɔ lɛ, Yesu mu egbalɛ ni kɔɔ ba ni eba lɛ he Okadi lɛ naa kɛ nɔkwɛmɔ nɔ ko. Afɔɔ lɛ tsɛmɔ akɛ gwantɛŋi lɛ kɛ abotiai lɛ he abɛbua lɛ, ni ehaa mli ŋmɛnɛ, yɛ nibii agbɛjianɔtoo nɛɛ naagbee ni je shishi yɛ Jeŋmaji Abe lɛ naagbee yɛ 1914 lɛ mli. (Mateo 25:31-46) Hɔɔ, yɛ June 1, 1935 ji be ko ni sa kadimɔ jogbaŋŋ yɛ mɛi ni nɛkɛ gwantɛŋi nɛɛ yoomɔ ji akɛ asafo babaoo lɛ mlibii lɛ he shishinumɔ hewɔ. Yɛ nakai gbi lɛ nɔ, yɛ Yehowa Odasefoi akpee ko ni afee yɛ Washington D.C. lɛ shishi, ni abaptisi aŋkroaŋkroi 840 akɛfee amɛhe nɔ ni amɛjɔɔ kwraa amɛha Yehowa Nyɔŋmɔ kɛtsɔ Yesu Kristo nɔ lɛ he okadi. Gbɔmɛi nɛɛ ateŋ mɛi ni fa ji mɛi ni fee nakai amɛkɛkpɛlɛ wiemɔ ko ni kɔɔ Kpojiemɔ 7:9-17 ni J. F. Rutherford kɛha lɛ nɔ. Amɛsuɔmɔnaa nii ji ni amɛtsɔmɔ Tookwɛlɔ Kpakpa lɛ tooi krokomɛi ni ji asafo babaoo lɛ fa, koni amɛna hegbɛ akɛ amɛaajɛ amanehulu kpeteŋkpele ni baa lɛ mli ni amɛhi wala mli kɛtsɔ gbɛjianɔtoo nɛɛ naagbee lɛ mli kɛyabote Yesu Kristo, Tookwɛlɔ-Maŋtsɛ lɛ Afii Akpe Nɔyeli lɛ mli. Yɛ naagbee lɛ, amɛnine shɛɔ naanɔ wala nɔ yɛ shikpɔŋ nɔ paradeiso ko nɔ.—Mateo 25:46; Luka 23:43.
9. Mɛni hewɔ afɔ gwantɛŋi lɛ anine akɛ amɛba e-Maŋtsɛyeli lɛ, ni mɛɛ gbɛ nɔ amɛyɔɔ gbɛhe ni hi jogbaŋŋ fe fɛɛ mli ni amɛaanyɛ amɛfee Maŋtsɛ lɛ nyɛmimɛi lɛ ejurɔ lɛ?
9 Mɛni hewɔ afɔɔ mɛi ni tamɔ gwantɛŋi nɛɛ anine akɛ “nyɛbaŋɔa maŋtsɛyeli lɛ ni asaa ato nyɛ kɛjɛ jeŋ shishijee lɛ”? Maŋtsɛ lɛ kɛɔ amɛ akɛ akɛni amɛfee ‘enyɛmimɛi’ lɛ ejurɔ hewɔ lɛ, lɛ amɛfee amɛha lɛ lɛ. Maŋtsɛ lɛ kɛ wiemɔ ‘minyɛmimɛi’ lɛ miitsɔɔ emumɔŋ nyɛmimɛi lɛ ateŋ shwɛɛnii ni yɔɔ shikpɔŋ nɔ lolo yɛ nibii agbɛjianɔtoo nɛɛ naagbee lɛ mli lɛ. Akɛni amɛkɛ Maŋtsɛ kɛ Tookwɛlɔ, Yesu Kristo nyɛmimɛi nɛɛ efee kuu kome hewɔ lɛ, amɛkɛ shwɛɛnii nɛɛ baabɔ gbagbalii ni enɛ baaha amɛna hegbɛ ni amɛfee amɛ ejurɔ. Amɛbaaye amɛbua, Yesu nyɛmimɛi lɛ yɛ heloo naa gbɛi sɔrɔtoi anɔ po koni amɛshiɛ Maŋtsɛyeli ni ato ama shi lɛ he sane lɛ yɛ jeŋ muu fɛɛ dani naagbee lɛ aba. Yɛ enɛ hewɔ lɛ, gwantɛŋi lɛ baabu hegbɛ ni amɛna akɛ aaato amɛkɛ shwɛɛnii lɛ gbɛjianɔ akɛ Tookwɛlɔ kome lɛ kuu kome lɛ akɛ jwetri ko ni jara wa.
10. Akɛ gwantɛŋi lɛ ‘abaŋɔ maŋtsɛyeli ni asaa abo amɛ kɛjɛ je lɛ shishijee’ lɛ tsɔɔ mɛni?
10 Ni amɛaaŋɔ maŋtsɛyeli ni asaa ato amɛ lɛ etsɔɔɔ akɛ nɛkɛ gwantɛŋi nɛɛ kɛ Yesu Kristo kɛ enyɛmimɛi lɛ baaye maŋtsɛ yɛ ŋwɛi afi akpe. Shi moŋ, Afii Akpe lɛ shishijee mli nɔŋŋ lɛ, gwantɛŋi lɛ baana Maŋtsɛyeli lɛ nɔyeli he ni yɔɔ shikpɔŋ lɛ nɔ lɛ amɛye. Akɛni amɛji Adam kɛ Hawa seshibii hewɔ lɛ, asaa shikpɔŋ nɛɛ ni Nyɔŋmɔ Maŋtsɛyeli ni yɔɔ Kristo dɛŋ lɛ baaye nɔ lɛ aha amɛ ‘kɛjɛ be mli ni ato’ adesai ni abaanyɛ akpɔ amɛ lɛ. ‘aje lɛ.’ Agbɛnɛ hu, akɛni gwantɛŋi lɛ batsɔmɔɔ Maŋtsɛ lɛ shikpɔŋ nɔ bii, ni agbɛnɛ ebatsɔɔ amɛ “Naanɔ Tsɛ” hewɔ lɛ, amɛbahiɔ shikpɔŋ nɔ nɔyeli he ko, aloo shihilɛ he ko, yɛ Nyɔŋmɔ Maŋtsɛyeli lɛ shishi—Yesaia 9:6, 7, New World Translation
11. Mɛɛ gbɛ nɔ gwantɛŋi lɛ tsɔɔ yɛ akɛ amɛdamɔ shi kɛha Maŋtsɛyeli lɛ, ni yɛ enɛ hewɔ lɛ, mɛɛ jɔɔmɔ ji amɛnɔ?
11 Nɔ ni tamɔɔɔ okadi abotiai lɛ anɔ lɛ,mɛi ni tamɔ gwantɛŋi lɛ atsɔɔ akɛ amɛdamɔɔ shi amɛhaa Maŋtsɛ lɛ ni tɔmɔ ko bɛ he. Yɛ mɛɛ gbɛ nɔ? Kɛtsɔ nifeemɔi anɔ, jeee wiemɔi kɛkɛ anɔ. Akɛni anaaa Maŋtsɛ ni yɔɔ ŋwɛi lɛ hewɔ lɛ, amɛnyɛŋ amɛfee lɛ ejurɔ tɛɛ ni amɛkɛfi e-Maŋtsɛyeli lɛ sɛɛ. No hewɔ lɛ, amɛfeɔ emumɔŋ nyɛmimɛi ni yɔɔ shikpɔŋ nɛɛ nɔ lɛ ejurɔ. Eyɛ mli akɛ enɛ haa abotiai lɛ nyɛɔ amɛ, amɛteɔ shi amɛwoɔ amɛ, ni amɛwaa amɛ yi yɛ ejurɔ ni amɛfeɔ nɛɛ hewɔ lɛ moŋ, shi Maŋtsɛ lɛ kɛɔ gwantɛŋi lɛ akɛ ‘e-Tsɛ ejɔɔ amɛ.’
12. Gwantɛŋi ni jeɔ mli lɛ baana hegbɛ ni amɛhere namɛi kɛba wala mli, ni yɛ enɛ hewɔ lɛ mɛni shwɛɛnii lɛ amlibii lɛ esusu?
12 Akɛ hegbɛ ni miishɛɛ yɔɔ mli ni kɛ yiwalaheremɔ ni kɛ mɔ yaa Afii Akpe lɛ mli lɛ baajɔɔ asafo babaoo lɛ ni tamɔ gwantɛŋi ni feɔ Maŋtsɛ lɛ mumɔŋ nyɛmimɛi lɛ ejurɔ lɛ. Yɛ be ni sa mli lɛ amɛbaana adesai ni egboi ni yɔɔ amɛkaimɔ bui amli ni ateɔ amɛ shi kɛbaa wala mli ekoŋŋ lɛ mli gbɛfaŋnɔ. (Yohane 5:28, 29; 11:23-25) Mɛi ni baafata mɛnɛɛmɛi ahe ji blematsɛmɛi anɔkwafoi lɛ kɛ gbalɔi lɛ ni na amanehulu ni ŋmɛ amɛtsui shi babaoo kɛha Yehowa maŋtsɛyeli lɛ bembuu bɔni afee ni “amɛnine ashɛ shitee ni hi fe no,” ekolɛ mra nɔ lɛ nɔ lɛ. (Hebribii 11:35) Mɛi ni baafata nɛkɛ hii kɛ yei ni yɔɔ hemɔkɛyeli ni atee amɛ shi ni atsi amɛteŋ mɛi komɛi agbɛi ata yɛ Hebribii yitso 11 lɛ ahe ji Yohane Baptisilɔ lɛ. (Mateo 11:11) Shwɛɛnii ni afɔ amɛ mu lɛ ateŋ mɛi komɛi esusu akɛ amɛbaahi wala mli ni amɛhere anɔkwafoi ni gboi dani Pentekoste afi 33 Ŋ.B. shɛ ni ateeɔ amɛ shi kɛbaa wala mli nɛɛ atuu. Ani mɛi ni afɔ amɛ mu lɛ baana hegbɛ ni tamɔ nɛkɛ?
13. Mɛni hewɔ ehe ehiaaa ni shwɛɛnii lɛ ahere ni amɛkwɛ mɛi ni ateeɔ amɛ shi kɛbaa shikpɔŋ nɔ lɛ?
13 Enɛ he ebahiaŋ. Asafo babaoo lɛ ni jeɔ amanehulu kpeteŋkpele lɛ mli lɛ yɛ ni amɛyi fa bɔ ni amɛaanyɛ amɛtsu shihilɛ lɛ he nii ni amɛha mɛi ni ateeo amɛshi lɛ ale “shikpɔŋ hee” lɛ ni yɔɔ “ŋwɛi hee” lɛ shishi lɛ. (2 Petro 3:13) Amrɔ nɛɛ po, aato asafo babaoo lɛ gbɛjianɔ kɛha enɛ. Ŋmɛnɛ, ni Yesu mumɔŋ nyɛmimɛi ni yɔɔ shikpɔŋ nɔ lɛ ayikulɛ ni abɔ he amaniɛ lɛ shɛɛɛ 9,000 nɛɛ, mɛi ni baahi wala mli yɛ no be mli lɛ baafee mɛi ni amɛyi faaa kwraa bɔ ni amɛbaanyɛ amɛkwɛ hesaamɔ nitsumɔ ni kɛ mɔ boteɔ gbohiiashitee ni baaba lɛ mli lɛ nɔ. (Ezekiel 39:8-16) Biɛ ji he ni asafo babaoo lɛ ni amɛyibɔ shɛɔ akpekpei abɔ lɛ baasɔmɔ jogbaŋŋ yɛ. Ni ŋwanejee ko bɛ he akɛ asaa hegbɛ ko ni tamɔ nɛkɛ ato amɛ.
14. (a) Aatsɔse asafo babaoo lɛ mli bii lɛ ateŋ mɛi pii kɛmiiha mɛni, ni mɛni hewɔ esa akɛ amɛteŋ mɛi komɛi aŋɔ gbɛnaa nii lɛ bianɛ lɛ? (b) Mɛni nibii etsɛŋ ebaaba, ni mɛɛ nitsumɔ mɛɔ tooi krokomɛi lɛ?
14 Aatsɔse asafo babaoo lɛ mlibii lɛ po bianɛ yɛ asafoŋ gbɛnaa nii amli kɛ agbɛnɛ kɛtsɔ tsumaa he gbɛjianɔtoi ni Nyɔŋmɔ gbɛjianɔtoo loo esafo lɛ kudɔɔ yɛ jeŋ muu fɛɛ lɛ mli. Ni eji hewalɛwoo akɛ aaana bɔ ni akɛ nitsumɔ woɔ hii ni amɛdara yɛ mumɔŋ ni jɛ asafo babaoo lɛ ateŋ lɛ ateŋ mɛi pii adɛŋ koni amɛŋɔ gbɛnaa nii ni tsii yɛ gbɛjianɔtoo ni amrɔ nɛɛ Yehowa kɛtsuɔ nii yɛ shikpɔŋ nɔ lɛ koni amɛtsu he nii. Mɛi ni afɔ amɛ mu lɛ ateŋ mɛi ni eshwɛ lɛ miidara yɛ afii amli ni amɛnyɛɛɛ amɛtsu nitsumɔ lɛ babaoo. Nɛkɛ Maŋtsɛ nɛɛ nyɛmimɛi nɛɛ ahiɛ sɔɔ yelikɛbuamɔ yɛ gbɛjianɔtoo ni suɔmɔ yɔɔ mli ni onukpai kɛ asafoŋ sɔɔlɔi ni jɛ tooi krokomɛi lɛ ateŋ ni amɛdara yɛ mumɔŋ lɛ kɛhaa lɛ. Etsɛŋ, ni abaajie Babilon Kpeteŋkpele lɛ kɛjɛ shikpɔŋ lɛ nɔ. Kɛkɛ lɛ, taakɛ Kpojiemɔ 19:1-8 tsɔɔ lɛ, Toobi lɛ yookpeemɔ kɛ eyemforo ni ji 144,000 lɛ fɛɛ baaba mli loo ebaaye emuu yɛ ŋwɛi, ni tooi krokomɛi lɛ, ni sɔmɔɔ akɛ shikpɔŋ hee yɛ ŋwɛi hee lɛ shishi lɛ ji mɛi ni baadamɔ Maŋtsɛ lɛ najiaŋ ni amɛtsu saamɔ nitsumɔ kpeteŋkpele lɛ he nii kɛyashi be mli ni shikpɔŋ lɛ fɛɛ aaafee paradeiso ni gbɔmɛi eyi nɔ obɔ kɛha Yehowa yijiemɔ.—Yesaia 65:17; okɛto Yesaia 61:4-6 he.
15. Mɛɛ gbɛkpamɔi asafo babaoo lɛ hiɛ ka nɔ yɛ Afii Akpe lɛ mli?
15 Yɛ Kristo Afii Akpe Nɔyeli lɛ mli, beni atee adesai ni akpɔ amɛ ni gboi lɛ ashi lɛ, asafo babaoo lɛ ni je mli lɛ baana hegbɛi ni dara ni woo babaoo yɔɔ mli. Amɛbaatsɔmɔ biyei kɛ bihii amɛha Maŋtsɛ lɛ. Bihii nɛɛ ateŋ mɛi komɛi baanyɛ atsɔmɔ lumɛi, taakɛ bɔ ni Maŋtsɛ David bihii lɛ po tsɔmɔ lumɛi ni hiɛ gbɛnaa nii sɔrɔtoi lɛ.a Enɛ kaiɔ wɔ Lala 45, ni ala akɛto “maŋtsɛ” ni Yehowa efɔ lɛ mu lɛ he lɛ.
16. Lala 45 kɔɔ namɛi ahe diɛŋtsɛ, ni mɛɛ gbɛ nɔ abaatsɔ aye enɛ he odase yɛ?
16 Mɛɛ maŋtsɛ Lala 45 wieɔ ehe diɛŋtsɛ lɛ? Yesu Kristo! Hebribii 1:9 ŋɔɔ nakai sane lɛ ekɛtsuɔ nii yɛ be mli ni etsɛɔ wiemɔ kɛjɛɔ Lala 45:8 ni kaneɔ nɛkɛ lɛ: “Osumɔɔ jalɛ ni onyɛɔ nifɔɔjianii; hewɔ lɛ Nyɔŋmɔ ni ji o-Nyɔŋmɔ lɛ, kɛ mlifilimɔ mu lɛ efɔo fe onanemɛi.” No hewɔ lɛ Yesu Kristo ni awo ehiɛ nyam lɛ diɛŋtsɛ Lala 45:17 kɛɔ nɛkɛ yɛ ehe lɛ: “Obihii lɛ aaabaye otsɛmɛi lɛ anajiaŋ; ooowo amɛ lumɛi yɛ shikpɔŋ lɛ nɔ fɛɛ.”
17. Maŋtsɛ Yesu Kristo yɛ mɛni kɛ namɛi ahe miishɛɛ diɛŋtsɛ?
17 No hewɔ lɛ Yesu yɛ ewɔsɛɛ be nɔyeli akɛ Maŋtsɛ lɛ he miishɛɛ fe etsutsu shihilɛ yɛ shikpɔŋ nɔ lɛ. Shi, ehiɛ kpaaa tsutsu be ni eho lɛ nɔ kɛ agbɛnɛ titri lɛ eshikpɔŋ nɔ blematsɛmɛi ni kɛ amɛhe wo Yehowa shiwoo akɛ ebaatsɔ Abraham Seshi lɛ nɔ ejɔɔ shikpɔŋ lɛ nɔ wekui lɛ fɛɛ mli lɛ. Shi amrɔ nɛɛ nɔ ni enyaa he titri lɛ yɛ wɔsɛɛ be ni ebɛŋkɛ kpaakpa ni Maŋtsɛwolɔ, Yehowa Nyɔŋmɔ eto eyiŋ yɛ he lɛ. No hewɔ lɛ Yesu shikpɔŋ nɔ bii, titri lɛ bihii ni yɔɔ amɛteŋ ni he saa akɛ amɛaasɔmɔ yɛ eshishi yɛ gbɛhei akɛ lumɛi amli lɛ ji nɔ ni ebaanya he—babaoo po fe eshikpɔŋ nɔ blematsɛmɛi lɛ.
18. Yɛ mɛɛ bɛ nɔ Lala 45:16 wiemɔi lɛ ekomɛi maa bɔ ni esu nyaa bihii ni ji lumɛi lɛ ahe babaoo fe eshikpɔŋ nɔ blematsɛmɛi lɛ nɔ mi?
18 Bɔ ni Yesu nyaa bihii ni ji gbɔmɛi nɛɛ ahe babaoo fe blematsɛmɛi lɛ ji nɔ ko ni Biblia shishitsɔɔmɔi babaoo ema nɔ mi. Bɔ ni ekrokomɛi tsɔɔ Lala 45:16 shishi nɛ: “Obihii aaaba abaye otsɛmɛi anajiaŋ, koni amɛte shi amɛtsɔmɔ lumɛi yɛ shikpɔŋ lɛ fɛɛ nɔ.” (Moffatt) “Otsɛmɛi egbɛhe lɛ obihii baana enɛ; obaafee amɛ lumɛi yɛ shikpɔŋ lɛ fɛɛ nɔ.” (Kuku 17, The New American Bible) “Yɛ otsɛmɛi anajiaŋ lɛ, afɔɔ bii ahaa bo: obaafee amɛ lumɛi yɛ shikpɔŋ lɛ fɛɛ nɔ.”—The Septuagint Version ni Samuel Bagster and Sons fee.
19. Asafo babaoo lɛ mli bii komɛi yɛ mɛɛ gbɛnaa nii yɛ asafo lɛ mli, ni mɛɛ gbɛhei ekolɛ Maŋtsɛ Yesu Kristo baahala amɛ awo mli yɛ ebe ni ji Afii Akpe Nɔyeli lɛ mli?
19 Wɔ miishɛɛ sane ji akɛ, lumɛi ni akpaa amɛ gbɛ nɛɛ yɛ wɔteŋ diɛŋtsɛ. Amɛyɛ tooi krokomɛi lɛ ni boɔ Tookwɛlɔ Kpakpa Yesu Kristo toi lɛ ateŋ. Amɛbɔi toiboo titri lɛ kɛjɛ 1935, beni atsɔɔ Kpojiemɔ 7:9-17 mli yɛ Yehowa Odasefoi akpee yɛ Washington D.C. lɛ shishi lɛ. Ŋmɛnɛ, asafo babaoo ni ji tooi krokomɛi nɛɛ ateŋ akpei abɔ miisɔmɔ akɛ onukpai, loo nɔkwɛlɔi, yɛ Yehowa Odasefoi asafoi ni fe 57,670 yɛ maji 212 ni yɔɔ jeŋ muu fɛɛ amli lɛ mli. Kɛ amɛtee nɔ amɛkɛ Yesu mumɔŋ nyɛmimɛi ni yɔɔ shikpɔŋ nɔ lolo lɛ ateŋ shwɛɛnii lɛ bɔ yɛ gbɛjianɔtoo mli lɛ, hegbɛ yɛ kɛha nɛkɛ gbɔmɛi nɛɛ akɛ aaaŋɔ amɛ kwraa akɛ Maŋtsɛ Yesu Kristo shikpɔŋ nɔ nyɛmimɛi yɛ Afii Akpe Nɔyeli ni ebaaye yɛ shikpɔŋ hee lɛ nɔ lɛ mli. (2 Petro 3:13) Ni yɛ nɛkɛ ni amɛji hewɔ lɛ, abaahala amɛ akɛ lumɛi ni amɛsɔmɔ yɛ shikpɔŋ hee lɛ nɔ.
20. (a) Mɛɛ su Maŋtsɛ lɛ baajie lɛ kpo yɛ mɛi ni ehala amɛ yɛ shikpɔŋ nɔ lɛ ahe? (b) Asafo babaoo lɛ baahere namɛi kɛba shihilɛ mli, ni mɛɛ hegbɛ akɛma mɛi ni kuɔ amɛsɛɛ amɛbaa lɛ ahiɛ?
20 Maŋtsɛ Yesu Kristo baana he miishɛɛ akɛ eeekpɛlɛ lumɛi heei ni ahala amɛ nɛɛ anɔ, taakɛ bɔ ni ekpɛlɛɔ nɔkwɛlɔi ni ji tooi krokomɛi anɔkwafoi ni yɔɔ ŋmɛnɛŋmɛnɛ beaŋ Yehowa Odasefoi asafoi lɛ amli lɛ anɔ lɛ. Asafo babaoo lɛ ni ji tooi krokomɛi lɛ fɛɛ—hii kɛ yei lɛ fɛɛ—baana hegbɛ ni miishɛɛ yɔɔ mli akɛ amɛaahere mɛi fɛɛ ni baanu Yesu gbee ni amɛte shi kɛba hegbɛ akɛ amɛaana naanɔ wala yɛ adesa emuuyeli mli yɛ shikpɔŋ ni atsuu nɔ ni abaatsake lɛ ni afee lɛ jeŋ muu fɛɛ paradeiso lɛ nɔ lɛ atuu kɛaajɛ gbohii ateŋ. (Yohane 5:28, 29) Mɛi ni baafata mɛi ni ateeɔ amɛ shi ni aduro amɛ babaoo nɛɛ ahe ji Yesu Kristo blematsɛmɛi ni akpɔ amɛ lɛ, hii ni yɔɔ hemɔkɛyeli ni miisumɔ ni amɛye amɛhe ni amɛtuu amɛha Yehowa Nyɔŋmɔ lɛ he odase kɛyashi gbele mli kɛ hiɛnɔkamɔ akɛ amɛnine baashɛ “shitee ni hi” lɛ nɔ lɛ. (Hebribii 11:35) Shi, ni aaawo mɔ ko nɔ kɛyashɛ adesa wala ni yeɔ emuu mli yɛ amɛ Maŋtsɛ-kɛ-Kpɔlɔ Yesu Kristo Afii Akpe Nɔyeli lɛ mli lɛ ji shishijee pɛ kɛkɛ. Kɛ amɛhi shi shiŋŋ akɛ mɛi ni ato amɛ gbɛjianɔ yɛ Yehowa Nyɔŋmɔ shishi yɛ naagbee kaa ni baa adesai ni asaa amɛ ekoŋŋ lɛ anɔ yɛ Afii Akpe lɛ naagbee lɛ mli lɛ, amɛbaajie amɛhe kpo akɛ mɛi ni sa ni abu amɛ bem akɛ amɛnaa naanɔ wala yɛ Paradeiso akɛ Yehowa jeŋ muu fɛɛ gbɛjianɔtoo lɛ fa ni yɔɔ shikpɔŋ nɔ.—Mateo 25:31-46; Kpojiemɔ 20:1–21:1.
[Shishigbɛ niŋmai]
a Okɛto 2 Samuel 8:18 he, New World Translation Reference Bible, shishigbɛ niŋmaa.
Te Obaaha Hetoo Oha Tɛŋŋ?
◻ Mɛɛ be kpalaŋŋ ko Yehowa eto ema shi koni ekɛjɔɔ adesai fɛɛ?
◻ Mɛɛ wekukpaa ni wɔkɛ wɔhe aaahi mli pɛ wɔɔnyɛ wɔtsɔ nɔ ni wɔje amanehulu kpeteŋkpele lɛ mli?
◻ Gwantɛŋi lɛ ni ‘aaaŋɔ maŋtsɛyeli ni asaa ato amɛ kɛjɛ jeŋ shishijee lɛ’ tsɔɔ mɛni?
◻ Mɛɛ hegbɛi ni tsii asafo babaoo lɛ baana mli gbɛfaŋnɔ yɛ Afii Akpe lɛ mli?