Kpɔmɔ Kɛmiiya Jalɛ Jeŋ Hee ko Mli
“Amɛmii aaashɛ amɛhe yɛ hejɔlɛ babaoo mli.”—LALA 37:11.
1, 2. (a) Esoro kpɔmɔ ni Yehowa kɛbaaha yɛ wɔbe nɛɛ mli lɛ yɛ blema beaŋ kpɔmɔi ahe yɛ mɛɛ gbɛ nɔ? (b) Mɛɛ jeŋ Yehowa kɛ ewebii lɛ baaya mli?
YEHOWA ji Nyɔŋmɔ ni kpɔ̃ɔ mɔ. Yɛ blema beaŋ lɛ, ekpɔ̃ ewebii lɛ yɛ bei babaoo mli. Nakai kpɔmɔi lɛ hi shi yɛ be kukuoo pɛ mli, ejaakɛ Yehowa tsuuu ekojomɔi ahe nii yɛ Satan jeŋ muu lɛ fɛɛ nɔ yɛ gbɛ ni hiɔ shi daa nɔ, yɛ nakai bei lɛ eko kwraa mli. Shi etsɛŋ ni Yehowa baatsu kpɔmɔ kpeteŋkpele fe fɛɛ he nii yɛ etsuji agbɛfaŋ, yɛ wɔgbii nɛɛ amli. Yɛ be nɛɛ mli lɛ, ebaakpata Satan gbɛjianɔtoo lɛ he kadimɔ nii fɛɛ hiɛ yɛ jeŋ fɛɛ, ni ekɛ etsuji lɛ baaya jalɛ jeŋ hee ni baahi shi daa mli.—2 Petro 2:9; 3:10-13.
2 Yehowa ewo shi akɛ: “Eshwɛ fioo kɛkɛ ni mɔ fɔŋ lɛ bɛ dɔŋŋ . . . Shi mɛi ni he jɔ lɛ, shikpɔŋ lɛ aaatsɔ amɛnɔ, ni amɛmii aaashɛ amɛhe yɛ hejɔlɛ babaoo mli.” (Lala 37:10, 11) Kɛyashi mɛɛ be? “Jalɔi lɛ, shikpɔŋ lɛ aaatsɔ amɛnɔ ni amɛaahi nɔ daa.” (Lala 37:29; Mateo 5:5) Shi, dani no aaaba lɛ, je nɛɛ kɛ jaramɔ be kpeteŋkpele fe eko fɛɛ eko ni eba enɔ dã lɛ baakpe.
“Amanehulu Babaoo” Lɛ
3. Te Yesu wie “amanehulu babaoo” lɛ he eha tɛŋŋ?
3 Je nɛɛ bote ‘enaagbee gbii’ amli yɛ 1914 mli. (2 Timoteo 3:1-5, 13) Amrɔ nɛɛ, wɔkɛ afii 83 ehi nakai be lɛ mli, ni wɔmiibɛŋkɛ enaagbee, be mli ni, taakɛ Yesu gba efɔ shi lɛ, nibii ni nyiɛ sɛɛ nɛɛ baaba mli lɛ: “Amanehulu babaoo baaba ni eko bako ni tamɔ nakai dã kɛjɛ je lɛ shishijee mli kɛbashi ŋmɛnɛ, dabi, ni eko baŋ nakai dɔŋŋ.” (Mateo 24:21, NW) Hɛɛ, emli baawa fe Jeŋ Ta II po, beni gbɔmɛi aaashɛ akpekpei 50 awala hiɛ kpata lɛ. Mɛɛ be ni yɔɔ gbeyei waa bɛŋkɛɔ oyayaayai nɛkɛ!
4. Mɛni hewɔ Nyɔŋmɔ kojomɔ baaba “Babilon kpeteŋkpele lɛ” nɔ lɛ?
4 “Amanehulu babaoo” lɛ baaba trukaa yɛ gbɛ ni hãa mɔ he jɔ̃ɔ ehe nɔ, yɛ “ŋmɛlɛtswaa kome mli.” (Kpojiemɔ 18:10) Nɔ ni baakadi eshishijee ji kojomɔ ni Nyɔŋmɔ baatsu he nii yɛ apasa jamɔ fɛɛ, ni Nyɔŋmɔ Wiemɔ lɛ tsɛɔ lɛ akɛ “Babilon kpeteŋkpele lɛ” nɔ lɛ. (Kpojiemɔ 17:1-6, 15) Blema Babilon he kadimɔ nii ni ale fe fɛɛ ji apasa jamɔ. Ŋmɛnɛŋmɛnɛ beaŋ Babilon tamɔ ehenɔ ni hi shi yɛ blema lɛ, ni edamɔ shi kɛha jeŋ apasa jamɔ maŋtsɛyeli lɛ. Ebɔ ajwamaŋ kɛtsɔ maŋkwramɔŋ nɔyelɔi lɛ ni ekpɛlɛ ni ekɛ amɛ efee ekome lɛ nɔ. Efĩ amɛtai lɛ asɛɛ ni ejɔɔ asraafoi ni yɔɔ fãi enyɔ ni kɛ amɛhe wuɔ ta lɛ fɛɛ, ni enɛ eha gbɔmɛi ni yɔɔ jamɔ kome mli lɛ egbegbee amɛhe babaoo. (Mateo 26:51, 52; 1 Yohane 4:20, 21) Eku ehiɛ efɔ̃ mɛi ni kɛ amɛhe ekpɛtɛ ehe lɛ anifeemɔi fɔji lɛ anɔ, ni ewa anɔkwa Kristofoi ayi.—Kpojiemɔ 18:5, 24.
5. “Amanehulu babaoo” lɛ baaje shishi yɛ mɛɛ gbɛ nɔ?
5 “Amanehulu babaoo” lɛ baaje shishi beni maŋkwramɔŋ nɔyelɔi lɛ baatsɔ amɛhe amɛwo “Babilon kpeteŋkpele lɛ” trukaa lɛ. “Amɛaanyɛ ajwamaŋ lɛ, ni amɛaafee lɛ amaŋfɔ, ni amɛaaŋmɛ lɛ yayai, ni amɛaaye eheloo, ni amɛkɛ la aaashã lɛ.” (Kpojiemɔ 17:16) Yɛ no sɛɛ lɛ, etsutsu sɛɛfilɔi lɛ “aaafo lɛ, ni amɛaawo yara yɛ ehewɔ.” (Kpojiemɔ 18:9-19) Shi Yehowa tsuji kɛ be kakadaŋŋ ekpa enɛ gbɛ aahu, ni amɛkɛ miishɛɛ aaabolɔ akɛ: “Haleluya! . . . akɛni ekojo ajwamaŋ kpeteŋkpele lɛ ni kɛ ejwamaŋbɔɔ lɛ efite shikpɔŋ lɛ, ni etɔ etsuji lɛ alá lɛ he owele yɛ enɔ lɛ.”—Kpojiemɔ 19:1, 2.
Atutua Nyɔŋmɔ Tsuji
6, 7. Mɛni hewɔ Yehowa tsuji baanyɛ aná hekɛnɔfɔɔ kɛji atutua amɛ yɛ “amanehulu babaoo” lɛ mli lɛ?
6 Akɛni amɛkpata apasa jamɔ hiɛ hewɔ lɛ, maŋkwramɔŋ nɔyelɔi lɛ baatsɔ amɛhiɛ amɛwo Yehowa tsuji. Satan, ni ji “Gog ni yɔɔ Magog shikpɔŋ lɛ nɔ” lɛ, wie yɛ gbalɛ wiemɔ mli akɛ: “Mayatua mɛi ni yɔɔ kpoo ni amɛhiɔ shi shweshweeshwe [lɛ].” Akɛni esusuɔ akɛ amɛji haanii ni enine baanyɛ ashɛ amɛnɔ yɛ gbɛ ni waaa nɔ hewɔ lɛ, etutuaa amɛ kɛ “ta ni wa . . . , tamɔ atatu ni baha shikpɔŋ lɛ nɔ.” (Ezekiel 38:2, 10-16) Yehowa webii le akɛ tutuamɔ nɛɛ yeŋ omanye ejaakɛ amɛkɛ amɛhiɛ fɔ̃ɔ Yehowa nɔ.
7 Beni Farao kɛ etai lɛ nu he akɛ amɛdũ Nyɔŋmɔ webii lɛ yɛ amɛ kɛ Ŋshɔ Tsuru lɛ teŋ lɛ, Yehowa jie ewebii lɛ yɛ naakpɛɛ gbɛ nɔ ni ekpata Mizraim tai lɛ ahiɛ. (2 Mose 14:26-28) Yɛ “amanehulu babaoo” lɛ mli, beni jeŋmaji lɛ nuɔ he akɛ amɛdũ Yehowa webii lɛ, ebaatsɔ naakpɛɛ gbɛ nɔ ehere amɛ hu amɛyiwala tamɔ nakai: “Nakai gbi lɛ nɔ [lɛ], . . . mimlila lɛ aaate shi kɛaaba migugɔŋ; ejaakɛ miwie yɛ miwuŋayeli kɛ mimlifu la lɛŋ.” (Ezekiel 38:18, 19) Nakai beaŋ lɛ “amanehulu babaoo” lɛ naagbee kwraa lɛ miihe ashɛ!
8. Mɛɛ adebɔɔ mli nibii ni adesai ajwɛŋmɔ shɛɛɛ he baaba dani Yehowa baakpata mɛi fɔji lɛ ahiɛ, ni mɛni baajɛ mli aba?
8 Kɛ shihilɛ lɛ yashɛ he ko yɛ “amanehulu babaoo” lɛ shishijee sɛɛ, shi dani Yehowa baatsu ekojomɔ he nii yɛ je nɛɛ fã ni eshwɛ lɛ nɔ lɛ, adebɔɔ mli nibii ni adesai ajwɛŋmɔ shɛɛɛ he baaba. Kadimɔ hewalɛ ni amɛbaana yɛ mɛi anɔ. “Kɛkɛ ni gbɔmɔ bi lɛ [Kristo] okadi lɛ aaapue yɛ ŋwɛi, ni no lɛ shikpɔŋ lɛ nɔ akutsei lɛ fɛɛ aaawo yara, ni amɛaana gbɔmɔ bi lɛ akɛ eeba yɛ ŋwɛi atatui lɛ anɔ kɛ hewalɛ kɛ anunyam babaoo.” (Mateo 24:29, 30) “Ni okadii aaaba hulu kɛ nyɔŋtsere kɛ ŋulamii amli, . . . ni nɔ aaanyɔnyɔɔ gbɔmɛi anɔ yɛ gbeyei kɛ nibii ni baa je lɛŋ lɛ agbɛkwɛmɔ hewɔ.”—Luka 21:25, 26.
“Nyɛkpɔmɔ lɛ Miibɛŋkɛ”
9. Mɛni hewɔ Yehowa tsuji baanyɛ ‘ahole amɛyitsei anɔ’ kɛji adebɔɔ mli nibii ni adesai ajwɛŋmɔ shɛɛɛ he bɔi baa lɛ?
9 Nakai be lɛ mli titri, ni gbalɛ ni yɔɔ Luka 21:28 lɛ baaba mli. Yesu kɛɛ: “Beni nɛkɛ nibii nɛɛ eje shishi lɛ, nyɛdamɔa shi ni nyɛholea nyɛyitsei anɔ, ejaakɛ nyɛkpɔmɔ lɛ miibɛŋkɛ.” Nyɔŋmɔ henyɛlɔi lɛ ahe baakpokpo kɛ gbeyeishemɔ ejaakɛ amɛbaaná amɛle akɛ adebɔɔ mli nibii ni baa, ni adesai ajwɛŋmɔ shɛɛɛ he lɛ jɛ Yehowa ŋɔɔ. Shi Yehowa tsuji baana miishɛɛ ejaakɛ amɛbaale akɛ amɛkpɔmɔ lɛ miibɛŋkɛ.
10. Te Nyɔŋmɔ Wiemɔ lɛ wieɔ “amanehulu babaoo” lɛ naagbee he ehaa tɛŋŋ?
10 Yehowa kɛ naagbee hiɛkpatamɔ kwraa baaba Satan gbɛjianɔtoo lɛ nɔ: “Matsɔ gbele hela kɛ lá nɔ mikɛ [Gog] aaakojo, ni maha nyɔŋmɔnɛmɔ ni looɔ nibii kɛyaa kɛ nyɔŋmɔŋtɛi kɛ la kɛ swɔɔ anɛ ashwie lɛ kɛ etai lɛ [anɔ], . . . Ni amɛaana amɛle akɛ miji Yehowa lɛ.” (Ezekiel 38:22, 23) Abaakpata Satan gbɛjianɔtoo lɛ he kadimɔ nii fɛɛ hiɛ. Abaakpata adesai fɛɛ ni kũ amɛhiɛ amɛfɔ̃ Nyɔŋmɔ nɔ lɛ ahiɛ kwraa. No ji “amanehulu babaoo” lɛ naagbee kwraa ni baaba yɛ Harmagedon lɛ.—Yeremia 25:31-33; 2 Tesalonikabii 1:6-8; Kpojiemɔ 16:14, 16; 19:11-21.
11. Mɛni hewɔ abaakpɔ̃ Yehowa tsuji kɛfo “amanehulu babaoo” lɛ?
11 Abaakpɔ̃ Yehowa jalɔi akpekpei abɔ ni yɔɔ shikpɔŋ lɛ nɔ fɛɛ lɛ kɛjɛ “amanehulu babaoo” lɛ mli. Mɛnɛɛmɛi feɔ “asafo babaoo” ni jɛ “jeŋmaŋ fɛɛ jeŋmaŋ kɛ akutsei kɛ maji kɛ maji anɔ wiemɔi amli” lɛ. Mɛni hewɔ akpɔ̃ɔ amɛ yɛ gbɛ ni yɔɔ naakpɛɛ tamɔ nɛkɛ nɔ lɛ? Ejaakɛ ‘amɛkɛ sɔɔmɔ krɔŋkrɔŋ haa Yehowa nyɔɔŋ kɛ shwane.’ No hewɔ lɛ amɛyi baana wala kɛfo je nɛɛ naagbee lɛ, ni akɛ amɛ baaya jalɛ jeŋ hee ko mli. (Kpojiemɔ 7:9-15) Nɛkɛ gbɛ nɔ amɛtsɔɔ amɛyeɔ Yehowa shiwoo nɛɛ mlibaa he odase, akɛ: “Kwɛmɔ Yehowa gbɛ ni onyiɛ egbɛ lɛ nɔ, ni eeewo onɔ, koni shikpɔŋ lɛ atsɔ onɔ̃; beni aaafolɔ mɛi fɔji lɛ, ooona.”—Lala 37:34.
Jeŋ Hee Lɛ
12. Mɛni mɛi ni yi baana wala kɛfo Harmagedon lɛ baanyɛ amɛkpa gbɛ?
12 Mɛɛ be ni yɔɔ miishɛɛ eeeji nɛkɛ—efɔŋ feemɔ jiemɔ kɛ be ni yɔɔ nyam fe fɛɛ yɛ adesai ayinɔsane be fɛɛ mli lɛ shishijee! (Kpojiemɔ 20:1-4) Kwɛ bɔ ni mɛi ni yi baaná wala kɛfo Harmagedon lɛ baada Yehowa shi amɛha, akɛ amɛbote hiŋmɛigbelemɔ ni kpɛɔ kaŋkaŋ, ni he tse, ni Nyɔŋmɔ fee lɛ mli, jeŋ hee ko mli, yɛ shikpɔŋ ni abaatsake lɛ afee lɛ paradeiso lɛ nɔ! (Luka 23:43) Ni ehe ehiaŋ ni amɛgboi dɔŋŋ! (Yohane 11:26) Lɛlɛŋ, kɛjɛ nakai be lɛ mli kɛyaa lɛ, amɛbaaná gbɛkpamɔ ni yɔɔ naakpɛɛ akɛ amɛaahi shi daa, bei abɔ ni Yehowa hu yɔɔ lɛ!
13. Yesu baaje tsamɔ nitsumɔ ni eje shishi yɛ shikpɔŋ nɔ lɛ shishi ekoŋŋ yɛ mɛɛ gbɛ nɔ?
13 Yesu, mɔ ni Yehowa ehala lɛ akɛ ŋwɛi Maŋtsɛ lɛ baakwɛ jɔɔmɔi ni yɔɔ naakpɛɛ, ni mɛi ni akpɔ̃ amɛ lɛ baana mli ŋɔɔmɔ lɛ nɔ. Beni eyɔɔ shikpɔŋ nɔ lɛ, egbele hiŋmɛii ni eshwila kɛ toii ni nuuu nii lɛ ni etsa “hela fɛɛ hela kɛ hejaramɔ fɛɛ hejaramɔ.” (Mateo 9:35; 15:30, 31) Ebaaje nakai tsamɔ nitsumɔ kpele lɛ shishi ekoŋŋ yɛ jeŋ hee lɛ mli, shi ebaaha ekpele jeŋ fɛɛ. Akɛ Nyɔŋmɔ Najiaŋdamɔlɔ lɛ, ebaaha shiwoo nɛɛ aba mli, akɛ: “Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.” (Kpojiemɔ 21:4) Tsofafeelɔi loo yarafeemɔ kɛ gbonyofuu he gbɛjianɔtolɔi ahe ebahiaŋ kɔkɔɔkɔ dɔŋŋ!—Yesaia 25:8; 33:24.
14. Mɛɛ kpɔmɔ Yehowa tsuji ni amɛgboi momo lɛ baana?
14 Abaakpɔ̃ Nyɔŋmɔ tsuji anɔkwafoi ni gboi yɛ blema beaŋ lɛ hu fɛɛ. Abaajie amɛ kɛjɛ gbonyobu lɛ dɛŋ, yɛ jeŋ hee lɛ mli. Yehowa ewo shi kɛ nɔmimaa akɛ: “Gbohiiashitee baaba, ni jalɔi kɛ mɛi ni ejaaa fɛɛ baate shi.” (Bɔfoi lɛ Asaji 24:15) Eka shi faŋŋ akɛ, abaatee “jalɔi” lɛ ashi mra kɛtsɔ hiɛ koni amɛye amɛbua yɛ Paradeiso lɛ mlilɛɛmɔ mli. Kwɛ bɔ ni eeefee miishɛɛ kɛha mɛi ni baafo Harmagedon lɛ akɛ amɛaanu anɔkwafoi ni egboi bei babaoo ni eho nɛ, ni amrɔ nɛɛ akɛ amɛ eba wala mli ekoŋŋ lɛ aniiashikpamɔi!—Yohane 5:28, 29.
15. Tsɔɔmɔ shihilɛi ni baahi shi yɛ jeŋ hee lɛ mli lɛ ekomɛi amli.
15 Mɛi fɛɛ ni yɔɔ wala mli yɛ nakai beaŋ lɛ baaná nɔ ni lalatsɛ lɛ wie yɛ Yehowa he nɛɛ mli niiashikpamɔ, akɛ: “Ogbɛɔ odɛŋ ni ohaa nɔ fɛɛ nɔ ni hiɛ kã tɔɔ kɛ nii ni etaoɔ.” (Lala 145:16) Hɔmɔ bɛ dɔŋŋ: Abaasaa aha shikpɔŋ nɔ bɔɔ nii sɔrɔtoi lɛ kɛ amɛhe ahi shi ni amɛŋmɛ pɛpɛɛpɛ, ni ebaaba nii babaoo. (Lala 72:16) Gbɔmɔ ko bɛ ni naŋ shia ehi mli: “Amɛaamamɔ tsũi, ni amɛaahi mli,” ni mɔ fɛɛ mɔ baata “eweintso kɛ egbamitso shishi, ni mɔ ko woŋ amɛhe gbeyei.” (Yesaia 65:21, 22; Mika 4:4) Gbeyeishemɔ bɛ dɔŋŋ: Ta, yiwalɛ, kɛ awuiyeli ehiŋ shi dɔŋŋ. (Lala 46:9, 10; Abɛi 2:22) “Shikpɔŋ muu lɛ fɛɛ ena hejɔlɛ, ni enɔ ejɔ, ni amɛmiila nyamɔ lalai.”—Yesaia 14:7.
16. Mɛni hewɔ jalɛ nifeemɔ baakpele jeŋ hee lɛ mli fɛɛ lɛ?
16 Abaajie Satan shishiumɔ kɛ lakamɔ adafitswaa gbɛi sɔrɔtoi lɛ fɛɛ kɛya, yɛ jeŋ hee lɛ mli. Yɛ no najiaŋ lɛ, “je lɛŋ bii lɛ [baakase] jalɛ.” (Yesaia 26:9; 54:13) Akɛni amɛnaa mumɔŋ tsɔsemɔ kpakpa daa afi kɛtsaraa nɔ hewɔ lɛ, “shikpɔŋ lɛ nɔ aaayi obɔ kɛ Yehowa he nilee lɛ, tamɔ bɔ ni nu ha ŋshɔ shishi lɛ.” (Yesaia 11:9) Susumɔi kɛ nifeemɔi ni tswaa mɔ emaa shi baagbɛ ashwã adesai ateŋ. (Filipibii 4:8) Feemɔ jeŋ muu fɛɛ asafo, ni ji gbɔmɛi ni eye amɛhe kɛjɛ awuiyeli, yaka anunyam, awuŋayeli—majimaji ateŋ nyɛmifeemɔ, hé ni mɛi fɛɛ woɔ Nyɔŋmɔ mumɔ lɛ yibii yɛ lɛ he mfoniri okwɛ. Lɛlɛŋ, asafo babaoo lɛ miiwo nakai sui lɛ amrɔ nɛɛ po.—Galatabii 5:22, 23.
Mɛni Hewɔ Esɛɛ Etsɛ Nɛkɛ?
17. Mɛni hewɔ Yehowa kɛ be kakadaŋŋ emɛ aahu dani efo efɔŋ feemɔ sɛɛ lɛ?
17 Shi, mɛni hewɔ Yehowa emɛ be kakadaŋŋ dani ejie efɔŋ feemɔ, koni ekpɔ̃ ewebii kɛya jeŋ hee lɛ mli lɛ? Susumɔ nɔ ni esa akɛ atsu lɛ he okwɛ. Nɔ ni he hiaa fe fɛɛ ji maŋtsɛ ni Yehowa ji, kɛ hegbɛ ni eyɔɔ akɛ eyeɔ nɔ lɛ bembuu. Yɛ be ni fa ni eha eho lɛ hewɔ lɛ, eha efee faŋŋ bɔ ni yiŋkɔshikɔshi feemɔ ko bɛ he akɛ adesai anɔyeli ni etsi ehe kɛjɛ emaŋtsɛyeli shishi lɛ yi eyahɛ shi diɛŋtsɛ. (Yeremia 10:23) No hewɔ lɛ amrɔ nɛɛ Yehowa yeɔ bem kɛmɔɔ shi akɛ ekɛ eŋwɛi Maŋtsɛyeli ni yɔɔ Kristo shishi lɛ aaaye adesai anɔyeli najiaŋ.—Daniel 2:44; Mateo 6:9, 10.
18. Mɛɛ be Abraham seshibii anine baashɛ Kanaan shikpɔŋ lɛ nɔ akɛ gboshinii?
18 Nɔ ni etee nɔ yɛ afii ohai abɔ nɛɛ mli fɛɛ lɛ tamɔ nɔ ni ba yɛ Abraham beaŋ lɛ pɛpɛɛpɛ. Yehowa kɛɛ Abraham akɛ eseshibii anine baashɛ Kanaan shikpɔŋ lɛ nɔ akɛ gboshinii—shi esa akɛ amɛmɛ kɛyashi afii ohai ejwɛ sɛɛ dã, “ejaakɛ Amorbii lɛ anɔ sha lɛ nako ayi.” (1 Mose 12:1-5; 15:13-16) Eka shi faŋŋ akɛ wiemɔ “Amorbii” (ni ji akutso ni ehe shi fe fɛɛ) ni akɛtsu nii yɛ biɛ lɛ, damɔɔ shi kɛhaa Kanaan bii lɛ fɛɛ akɛ kuu. No hewɔ lɛ, aaafee afii ohai ejwɛ baaho dani Yehowa baaha ewebii lɛ ayaŋɔ Kanaan. Shi yɛ nɛkɛ be nɛɛ mli fɛɛ lɛ, Yehowa ha jeŋmaji ni yɔɔ Kanaan lɛ tsu amɛshihilɛ gbɛjianɔtoi ahe nii. Mɛni jɛ mli ba?
19, 20. Mɛɛ shihilɛ gbɛjianɔtoi hi Kanaanbii lɛ ateŋ?
19 Bible Handbook, ni Henry H. Halley ŋma lɛ wie akɛ, mɛi ni tsaa shi ni amɛtaoɔ blema nibii lɛ yana Ashtoret, ni ji Baal ŋa nyɔŋmɔyoo lɛ gbatsu ni etsɔ koikoi yɛ Megido. Eŋma akɛ: “Kɛ́ onyiɛ kɛtee hiɛ fioo kɛjɛ gbatsu nɛɛ he lɛ, fuuhe yɛ jɛmɛ, ni ana kpuji pii yɛ mli, ni abifabii ni akɛ amɛ esha afɔle yɛ gbatsu nɛɛ mli lɛ agbohii yɛ mli . . . Baal kɛ Ashtoret Gbalɔi lɛ ji gbɔmɔgbelɔi diɛŋtsɛ ni gbeɔ gbekɛbii bibii.” “Nifeemɔ kroko hu ni yɔɔ gbeyei ji [nɔ ni] amɛtsɛɔ lɛ akɛ ‘shishitoo afɔleshaai’ lɛ. Kɛ́ abaama shia ko lɛ, akɛ abifao shãa afɔle, ni atswaa egbɔmɔtso lɛ awoɔ gbogbo lɛ mli.”
20 Halley wie akɛ: “Nyenyeŋtswibɔɔ diɛŋtsɛ ni naatsii bɛ he ji nɔ ni akɛjaa Baal, Ashtoret, kɛ Kanaanbii anyɔŋmɔi krokomɛi lɛ; amɛ sɔlemɔtsui lɛ amli ji efɔŋ feemɔ shikwɛ̃ɛ hei. . . . Ajwamaŋbɔɔ ji Kanaanbii ajamɔ, . . . kɛkɛ lɛ amɛgbe amɛ kromɔbii lɛ akɛ afɔleshaa nii amɛha nɛkɛ nyɔŋmɔi nɛɛ nɔŋŋ. Etamɔ nɔ ni Kanaan shikpɔŋ lɛ ebatsɔ tamɔ Sodom kɛ Gomora yɛ gbɛ ni da ni ekpele maŋ muu fɛɛ mli lɛ nɔ. . . . Ani hiŋmɛigbelemɔ ko ni he yɔɔ nyaŋemɔ, ni bɔɔ musu, ni yi wa waa nɛkɛ lɛ yɛ hegbɛ akɛ eyaa nɔ ehiɔ shi? . . . Mɛi ni tsaa shi amɛkaseɔ blema nibii ahe nii, ni tsa Kanaan maji ni etsɔmɔ amaŋfɔi lɛ biɔ nɔ hewɔ ni Nyɔŋmɔ kpataaa nɛkɛ maŋ nɛɛ hiɛ mra fe be mli ni E-fee lɛ.”—Okɛto 1 Maŋtsɛmɛi 21:25, 26 he.
21. Mɛni je amɛhe yɛ Kanaanbii lɛ ashihilɛ kɛ wɔgbii nɛɛ amli nɔ̃ lɛ he?
21 Amorbii lɛ anɔ fɔŋ feemɔ lɛ ‘eyi’ agbɛnɛ. No hewɔ lɛ, Yehowa sane ja kɛmɔ shi akɛ ekpata amɛhiɛ kwraa. Nakai nɔŋŋ eji ŋmɛnɛ. Je lɛ eyi obɔ kɛ yiwalɛ, jeŋba shara, kɛ bulɛ ni abɛ kwraa kɛha Nyɔŋmɔ mlai. Ni akɛni gbekɛbii ni akɛ amɛ shãa afɔle ni yɔɔ taŋ, ni tee nɔ yɛ blema Kanaan lɛ haa wɔhe jɔ̃ɔ wɔhe hewɔ lɛ, obalahii akpekpei nyɔŋmai abɔ ni akɛ amɛ eshã afɔle yɛ je nɛŋ tai amli, ni ehiii kwraa fe nɔ fɛɛ nɔ ni afee yɛ Kanaan lɛ hu? Eka shi faŋŋ akɛ, amrɔ nɛɛ Yehowa sane ja kɛmɔ shi akɛ ekɛ nɛkɛ gbɛjianɔtoo fɔŋ nɛɛ aaaba naagbee.
Nɔ Kroko Hu ni Abaatsu Agbe Naa
22. Mɛni Yehowa tsui shi ni eto yɛ wɔgbii nɛɛ amli lɛ tsuɔ?
22 Yehowa tsui shi ni eto yɛ naagbee gbii nɛɛ amli lɛ miitsu nɔ kroko hu. Eeŋmɛ gbɛ koni ana be ni akɛbua asafo babaoo, ni amrɔ nɛɛ amɛyifalɛ fe akpekpei enumɔ lɛ anaa, koni atsɔse amɛ. Ato amɛhe gbɛjianɔ akɛ asafo ni miishwere kɛmiiya hiɛ, yɛ Yehowa gbɛtsɔɔmɔ shishi. Atsɔseɔ hii, yei, kɛ gbekɛbii fɛɛ koni amɛ hu amɛtsɔɔ mɛi krokomɛi Biblia mli anɔkwalei lɛ. Amɛkaseɔ Nyɔŋmɔ gbɛ̀i ni suɔmɔ yɔɔ mli lɛ ahe nii kɛtsɔɔ amɛ kpeei kɛ Biblia kasemɔ woji anɔ. (Yohane 13:34, 35; Kolosebii 3:14; Hebribii 10:24, 25) Kɛfata he lɛ, amɛmiikase ŋaa nitsumɔi yɛ tsumaa, ɛlɛktrɔnik tsɔnei, woji akalamɔ, kɛ nitsumɔi krokomɛi amli bɔni afee ni amɛkɛfi “sanekpakpa” shiɛmɔ nitsumɔ lɛ sɛɛ. (Mateo 24:14) Eka shi faŋŋ akɛ, akɛ nɛkɛ nitsɔɔmɔ kɛ tsumaa he ŋaa nitsumɔi nɛɛ baatsu nii waa yɛ jeŋ hee lɛ mli.
23. Mɛni hewɔ eji hegbɛ akɛ wɔɔhi wala mli yɛ nɛkɛ be nɛɛ mli lɛ?
23 Hɛɛ, Yehowa miisaa etsuji ŋmɛnɛ koni amɛfo “amanehulu babaoo” lɛ kɛyabote jalɛ jeŋ hee ko mli. Nakai beaŋ lɛ, Satan kɛ ejeŋ fɔŋ ko bɛ dɔŋŋ ni amɛbaawu amɛshi, ni hela, awerɛho, kɛ gbele bɛ dɔŋŋ. Nyɔŋmɔ webii kɛ ekãa kɛ miishɛɛ kpele baaje nitsumɔ ni yɔɔ miishɛɛ, ni ji paradeiso lɛ feemɔ shishi, he ni daa gbi shihilɛ baafee ‘miishɛɛ diɛŋtsɛ’ lɛ. Kwɛ hegbɛ ni wɔna akɛ wɔɔhi wala mli yɛ yinɔi lɛ anaagbee kwraa nɛɛ mli, ni wɔbale Yehowa ni wɔmiisɔmɔ lɛ, ni wɔbayɔse akɛ etsɛŋ ni ‘wɔɔkwɛ ŋwɛi ni wɔhole wɔyitsei anɔ, ejaakɛ wɔkpɔmɔ lɛ miibɛŋkɛ’!—Luka 21:28; Lala 146:5.
◻ Mɛni ji “amanehulu babaoo” lɛ, ni mɛɛ gbɛ nɔ ebaaje shishi yɛ?
◻ Mɛni hewɔ tutuamɔ ni Gog baatutua Yehowa tsuji lɛ yeŋ omanye lɛ?
◻ Te “amanehulu babaoo” lɛ baaba naagbee eha tɛŋŋ?
◻ Mɛɛ sɛɛnamɔi ni yɔɔ naakpɛɛ jeŋ hee lɛ baaha wɔná?
◻ Mɛni hewɔ Yehowa emɛ be kakadaŋŋ dani ekɛ gbɛjianɔtoo nɛɛ aba naagbee lɛ?
[Mfoniri ni yɔɔ baafa 16]
Abaatsake shikpɔŋ muu lɛ fɛɛ ni afee lɛ paradeiso