Sanebimɔi ni Jɛ Kanelɔi Adɛŋ

Ani amrɔ nɛɛ Yesu le be ni Harmagedon baaba?

Etamɔ nɔ ni nilee yɛ mli jogbaŋŋ akɛ aaahe aye akɛ ele.

Ekolɛ mɛi komɛi baasusu akɛ mɛni hewɔ po abiɔ nɛkɛ sane. Ekolɛ ejɛ Yesu wiemɔ ni wɔnaa yɛ Mateo 24:36 lɛ hewɔ, akɛ: “Shi no gbi lɛ kɛ no ŋmɛlɛtswaa lɛ mɔ ko mɔ ko leee he eko, bɔfoi ni yɔɔ ŋwɛi lɛ tete leee, ni bi lɛ tete leee, ja mitsɛ kome kɛkɛ.” Kadimɔ wiemɔ “bi lɛ tete leee” lɛ.

Nɛkɛ kuku nɛɛ fata hetoo ni Yesu kɛha bɔfoi lɛ asanebimɔ akɛ: “Tsɔɔmɔ wɔ beyinɔ ni aaafee nii nɛɛ, ni mɛni ji obaa lɛ kɛ jeŋ naagbee lɛ he okadi?” lɛ he. (Mateo 24:3) Yɛ egbalɛ ni ale waa amrɔ nɛɛ, ni kɔɔ odaseyelii ni feɔ “okadi” lɛ he lɛ mli lɛ, egba tai, hɔmɔ, shikpɔŋ hosomɔi, yiwaa ni akɛaaba anɔkwa Kristofoi anɔ, kɛ nibii krokomɛi ni baaba shikpɔŋ nɔ, ni baatsɔɔ ba ni eba lɛ efɔ̃ shi. Okadi nɛɛ nɔ esɛɛnyiɛlɔi baatsɔ amɛyoo akɛ naagbee lɛ ebɛŋkɛ. Ekɛ be mli ni agbami tso bɔiɔ baai fumɔ, ni tsɔɔ akɛ latsaa be ebɛŋkɛ lɛ, fee bɔ ni be lɛ ebɛŋkɛ kpaakpa eha lɛ he mfoniri. Ekɛfata he akɛ: “Nakai nɔŋŋ nyɛ hu, beni nyɛaana nii nɛɛ fɛɛ lɛ, nyɛlea akɛ eshɛ agboi lɛ anaa eta.”—Mateo 24:33.

Shi Yesu etsɔɔɔ be pɔtɛɛ ni naagbee lɛ baaba. Shi moŋ, ewie nɔ ni wɔkane yɛ Mateo 24:36 lɛ. Nakai ji bɔ ni ekaneɔ yɛ New World Translation of the Holy Scriptures lɛ mli, ni ŋmɛnɛŋmɛnɛ beaŋ Bibliai pii hu kaneɔ nakai nɔŋŋ. Shi kɛlɛ, “bi lɛ tete leee” lɛ bɛ blema shishitsɔɔmɔi komɛi amli.

Akɛ nɔkwɛmɔ nɔ lɛ, Katolik Douay Version lɛ kaneɔ akɛ: “Shi nakai gbi lɛ kɛ ŋmɛlɛtswaa lɛ mɔ ko mo ko leee, ŋwɛi bɔfoi lɛ leee, shi Tsɛ lɛ pɛ le.” King James Version lɛ kaneɔ nakai nɔŋŋ. Mɛni hewɔ ashĩ “bi lɛ tete [loo, lɛ hu] leee” lɛ, eyɛ mli akɛ anaa yɛ Marko 13:32 lɛ? Ejaakɛ mra mli yɛ afii ohai 17 lɛ shishijee gbɛ beni atsuɔ nakai shishitsɔɔmɔi enyɔ lɛ ahe nii lɛ, nakai wiemɔi lɛ bɛ woji ni akɛ niji ŋmala ni wiemɔi ashishitsɔɔlɔi lɛ kɛtsu nii lɛ mli. Shi, yɛ nakai beaŋ nɔŋŋ lɛ, ayana Hela woji ni akɛ niji ŋmala ni etsɛ waa lɛ ateŋ ekomɛi. Enɛɛmɛi, ni bɛŋkɛɔ be mli ni Mateo ŋmala shishijee niŋmaa lɛ kwraa lɛ, eŋma “bi lɛ tete leee” lɛ yɛ Mateo 24:36.

Miishɛɛ sane ji akɛ, Katolik Jerusalem Bible lɛ kɛ wiemɔ kuku lɛ efata he, kɛ shishigbɛ niŋmaa ni kɛɔ akɛ Latin Vulgate lɛ shi nakai wiemɔ kuku lɛ, “ekolɛ yɛ Nyɔŋmɔ jamɔ mli yiŋtoi komɛi ahewɔ.” Shi, mɛni hewɔ! Ekolɛ wiemɔi ashishitsɔɔlɔi loo mɛi ni kwɛɔ niŋmai anɔ amɛŋmalaa ekroko, ni amɛheɔ Triniti lɛ amɛyeɔ lɛ baasumɔ ni amɛshi wiemɔ kuku ko ni tsɔɔ akɛ Yesu bɛ nilee ni e-Tsɛ yɔɔ lɛ nɔŋŋ pɛpɛɛpɛ. Te eeefee tɛŋŋ eba akɛ Yesu leŋ anɔkwa sane ko kɛji ekɛ e-Tsɛ fɛɛ fata mɛi etɛ ni yɔɔ Nyɔŋmɔ kome mli lɛ he lɛ?

Nakai nɔŋŋ hu, A Textual Commentary on the Greek New Testament, ni B. M. Metzger fee lɛ, kɛɔ akɛ: “Wiemɔi ‘bi lɛ tete leee’ lɛ bɛ [woji ni akɛ niji ŋmala] ni yeɔ Mateo he odase lɛ amli babaoo mli, ni Byzantine nɔ ni aŋma yɛ sɛɛ mli lɛ hu fata he. Nɔ ni tamɔɔɔ nakai lɛ, nakai wiemɔ kuku lɛ yɛ nɔ ni yeɔ he odase fe fɛɛ, ni ji Alexandria, kɛ Anaigbɛ nɔ, kɛ Kaisarea nɔ lɛ amli. Eeenyɛ efee akɛ aje gbɛ ashi nakai wiemɔi lɛ yɛ tsɔɔmɔ mli naagbai ni ekɛbaa lɛ hewɔ fe ni aaakɛɛ akɛ sɛɛ mli ni akɛfata he” yɛ Marko 13:32.—Wɔma efã ko nɔ mi.

Nakai mra be mli woji ni akɛ niji ŋmala “ni yeɔ he odase fe fɛɛ” lɛ fiɔ bɔ ni ekaneɔ ehaa, ni tsɔɔ bɔ ni ato mɛi ni baanyɛ ale be lɛ naa aha lɛ sɛɛ. Ŋwɛibɔfoi lɛ leee ŋmɛlɛtswaa nɔ ni naagbee lɛ baaba; Bi lɛ tete leee; ja Tsɛ lɛ kɛkɛ le. Ni enɛ kɛ Yesu wiemɔi ni wɔnaa yɛ Mateo 20:23, he ni ewie yɛ akɛ ebɛ hegbɛ ni ekɛ gbɛhei ni nɔ kwɔlɔ haa yɛ Maŋtsɛyeli lɛ mli, shi Tsɛ lɛ pɛ baanyɛ afee nakai lɛ, kpaa gbee.

Enɛ hewɔ lɛ, Yesu diɛŋtsɛ wiemɔi tsɔɔ akɛ beni eyɔɔ shikpɔŋ nɔ lɛ, no mli lɛ eleee be ni ‘je lɛ naagbee lɛ baaba.’ Ani kɛjɛ no sɛɛ nɛɛ, ebana ele?

Kpojiemɔ 6:2 wieɔ Yesu he akɛ eta okpɔŋɔ yɛŋ ko nɔ ni eje kpo “eeye kunim, koni esaa eye kunim.” No sɛɛ lɛ, okpɔŋɔ nɔtaralɔi ni damɔ shi kɛha tai, hɔmɔ, kɛ haomɔi, tamɔ nɔ ni wɔna kɛjɛ be mli ni Jeŋ Ta I je shishi yɛ 1914 lɛ hu ba. Yehowa Odasefoi heɔ yeɔ akɛ akɛ Yesu ta maŋtsɛsɛi nɔ akɛ Nyɔŋmɔ ŋwɛi Maŋtsɛyeli lɛ nɔ Maŋtsɛ yɛ 1914, ni lɛ ji mɔ ni baanyiɛ ta ni abaawuu ashi efɔŋ feemɔ yɛ shikpɔŋ nɔ lɛ hiɛ. (Kpojiemɔ 6:3-8; 19:11-16) Akɛni amrɔ nɛɛ aha Yesu hewalɛ akɛ mɔ ni baaye kunim yɛ Nyɔŋmɔ gbɛi amli hewɔ lɛ, nilee yɛ mli akɛ aaasusu akɛ e-Tsɛ ekɛɛ lɛ be ni naagbee lɛ baaba, beni ‘ebaagbe ekunimyeli lɛ naa.’

Atsɔ̃ko wɔ mɛi ni wɔyɔɔ shikpɔŋ nɔ lɛ nakai gbi lɛ, no hewɔ lɛ, Yesu wiemɔi nɛɛ kɔɔ wɔhe lolo: “Nyɛkwɛa jogbaŋŋ, nyɛshia kpe ni nyɛsɔlea; ejaakɛ nyɛleee beyinɔ ni be lɛ shɛɔ. . . . Nɔ ni mikɛɔ nyɛ nɛɛ, mɛi fɛɛ mikɛɔ: Nyɛsaraa!”—Marko 13:33-37.