Chapter 16
“Asafo Babaoo” ko Nyá Maŋtsɛ lɛ He
1, 2. (a) Mɛɛ gbɛ nɔ Yehowa tsɔ eha egbalɛ ni yɔɔ Yesaia 60:22 lɛ bɔi mlibaa? (b) Mɛɛ ŋwɛi anɔkwale ko kpojiemɔ ni yɔɔ naakpɛɛ ba mli yɛ 1935?
YEHOWA tsɔ egbalɔ lɛ nɔ ejaje akɛ: “Mɔ bibioo aaatsɔ mɛi akpe, ni mɔ fioo hu aaatsɔ maŋ ni wa. Kɛ shɛ ebe lɛ, mi, Yehowa, maha afee oya!” (Yesaia 60:22) Ni Yehowa ha “afee oya” hu, yɛ naakpɛɛ gbɛ nɔ. Yɛ 1935 mli lɛ, Yehowa Odasefoi bua amɛhe naa yɛ kpee wulu ko shishi yɛ Washington, D.C., yɛ U.S.A. Jɛmɛ afee lɛ faŋŋ yɛ akɛ Yehowa miije shishi eebua “asafo babaoo” ni ji “tooi krokomɛi”—gbɔmɛi ni sheɔ Nyɔŋmɔ gbeyei, ni baana naanɔ wala yɛ paradeiso shikpɔŋ nɔ kɛtsɔ Nyɔŋmɔ Maŋtsɛyeli lɛ ‘baa’ nɔ lɛ anaa.—Yohane 10:16; Kpojiemɔ 7:9.
2 Kpojiemɔ yitso 7 lɛ wieɔ he yɛ nɛkɛ gbɛ nɔ akɛ: Yɛ “asafoku bibioo” ni ji Maŋtsɛyeli niyelɔi, ni amɛyifalɛ ji mɛi 144,000 lɛ anaasɔomɔ lɛ “sɛɛ” lɛ, ana “asafo babaoo ni mɔ ko mɔ ko nyɛŋ akane ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli” damɔ Nyɔŋmɔ maŋtsɛsɛi lɛ hiɛ. Amɛkpɛlɛɔ Yehowa maŋtsɛyeli taakɛ etsuɔ he nii kɛtsɔɔ e-Kristo lɛ nɔ lɛ nɔ. Amɛkɛ miishɛɛ wieɔ akɛ yiwalaheremɔ jɛɔ Nyɔŋmɔ kɛ Toobi lɛ ŋɔɔ. Ákɛ kuu lɛ, ehe ehiaŋ kɔkɔɔkɔ ni amɛgboi ejaakɛ amɛji “mɛi ni jɛ amanehulu kpeteŋkpele lɛ mli,” ni amɛnine baashɛ naanɔ wala nɔ yɛ shikpɔŋ ni atsuu he nɔ.—Kpojiemɔ 7:4, 9, 10, 14; Luka 12:32.
3. (a) Ani “mɔ bibioo” lɛ etsɔ “mɛi akpe” lɛlɛŋ? (b) Mɛɛ gbɛ nɔ oootsɔ ona Kpojiemɔ 7:15-17 mlibaa mli gbɛfaŋnɔ?
3 Ani ofata nɛkɛ “asafo babaoo” ni ji jálɔi nɛɛ ahe ŋmɛnɛ? Ani oji gbɔmɛi 4,900,000 loo nɔ ni fa fe nakai, ni amɛkɛ ‘sɔɔmɔ krɔŋŋ haa Nyɔŋmɔ’ yɛ shikpɔŋ nɔ he fɛɛ he nɛɛ ateŋ mɔ kome? Lɛlɛŋ, Satan yiwalɛ jeŋ ni nyɛɔ mɔ nɔ lɛ ebɔle ohe lolo kɛkpe, ni ekolɛ ehe baahia ni okpee nɔnyɛɛ babaoo naa yɛ odaa gbi shihilɛ mli. Shi kɛji Nuŋtsɔ lɛ “tooi” lɛ ekome ji bo lɛ, no lɛ oyɛ Nyɔŋmɔ hebuu kɛ ekwɛmɔ shishi. Ehe ehiaaa ni hɔmɔ loo kumai aye bo dɔŋŋ yɛ mumɔŋ hewalɛwoo nibii ni onaaa hewɔ. Ehe ehiaaa ni oshe Nyɔŋmɔ mlifu ni shãa mɔ tamɔ la lɛ hu gbeyei dɔŋŋ, ejaakɛ Toobi lɛ miikwɛ onɔ ni eetsɔɔ bo gbɛ kɛmiiya “wala nu bui ahe.” Enɛ hewɔ lɛ, yɛ mfoniri feemɔ mli lɛ, oona shiwoo nɛɛ mlibaa mli gbɛfaŋnɔ momo, akɛ: “Ni Nyɔŋmɔ aaatsumɔ amɛhiɛaŋ yaafo nui fɛɛ.”—Kpojiemɔ 7:15-17.
MAŊTSƐ LƐ MIIJƆƆ ‘ETOOI’ LƐ
4. Mɛɛ wekukpaa kã Yesu kɛ “[e]safoku bibioo” lɛ teŋ?
4 Yɛ Biblia bei amli, kɛ agbɛnɛ kɛbashi wɔgbii nɛɛ amli po lɛ, Bokagbɛnyo ni ji tookwɛlɔ náa ekɛ etooi lɛ ateŋ tsakpaa ko ni bɛŋkɛ kpaakpa. Ekɛ eko fɛɛ eko gbɛi tsɛɔ lɛ, ni amɛle egbee ni amɛhereɔ nɔ oya nɔŋŋ beni enyiɛɔ amɛhiɛ kɛjɛɔ tooi atsũ lɛ mli aloo ekɛ amɛ baa mli lɛ. Yesu gbala jwɛŋmɔ kɛtee enɛ nɔ yɛ Yohane yitso 10 lɛ, beni efeɔ, klɛŋklɛŋ lɛ, suɔmɔ wekukpaa ni kã lɛ diɛŋtsɛ kɛ “[e]safoku bibioo” ni ji esɛɛnyiɛlɔi 144,000 ni afɔ amɛ mu lɛ ateŋ lɛ he mfoniri lɛ, ni ekɛɛ: “Mi ji tookwɛlɔ kpakpa lɛ, ni mile mɛi ni ji mimɛi, ni mimɛi lɛ hu le mi, taakɛ bɔ ni Tsɛ lɛ le mi, ni mi hu mile Tsɛ lɛ; ni miŋɔɔ miwala miŋmɛɔ shi yɛ tooi lɛ anajiaŋ lɛ.” Mɛnɛɛmɛi batsɔmɔɔ “Abraham seshibii,” mɛi anɔ ni aaatsɔ ni shikpɔŋ lɛ nɔ “wekui fɛɛ” ana jɔɔmɔi amɛha amɛhe lɛ.—Yohane 10:14, 15; 1 Mose 12:3; Galatabii 3:28, 29.
5. (a) Mɛɛ wekukpaa kroko ni miishɛɛ yɔɔ mli awie he yɛ Yohane 10:16? (b) Mɛɛ hegbɛi “tooi krokomɛi” lɛ naa mli ŋɔɔmɔ bianɛ, ni mɛni wɔsɛɛ be gbɛkpamɔ yɔɔ kɛha nɛkɛ kuu nɛɛ?
5 Belɛ, mɛɛ wekukpaa yɔɔ “tookwɛlɔ kpakpa lɛ” kɛ adesai awekui ni baahi shi kɛya naanɔ yɛ shikpɔŋ nɔ lɛ teŋ mɔ? Nɔ ni jɔɔmɔ diɛŋtsɛ yɔɔ mli! Ejaakɛ Yesu wie mɛnɛɛmɛi ahe akɛ:
“Ni miyɛ tooi krokomɛi ni jɛɛɛ tooi [ni ji “asafoku bibioo” lɛ] atsu nɛɛ mli; ni nomɛi hu, ja miŋɔ amɛ kɛba, ni amɛbanu migbee, ni tooi lɛ fee kuu kome kɛ kwɛlɔ kome.”
Ŋmɛnɛ, anaa nɛkɛ “asafo babaoo” ni ji “tooi krokomɛi” nɛɛ ni amɛkɛ “asafoku bibioo” lɛ fɛɛ yeɔ nii kutuu—ni amɛ fɛɛ amɛfee ekome kɛmiibo amɛkwɛlɔ lɛ “gbee” toi ni amɛmiishiɛ “maŋtsɛyeli lɛ he sanekpakpa nɛɛ . . . [yɛ] je nɛŋ fɛɛ, ni akɛye jeŋmaji lɛ fɛɛ odase.” Miishɛɛ ji ogbɛfaŋnɔ, kɛ oji mɛnɛɛmɛi ateŋ mɔ ko! (Yohane 10:16; Mateo 24:14) “Tooi krokomɛi” lɛ ayifalɛ lɛ baaya hiɛ waa kɛyashɛ akpekpei akpei abɔ, yɛ Maŋtsɛyeli nɔyeli lɛ shishi, kɛtsɔ mɛi ni egboi yɛ shikpɔŋ nɔ lɛ ashitee nɔ, beni Nyɔŋmɔ yiŋ ni eto akɛ ebaaha adesai ni ji jalɔi ayi shikpɔŋ lɛ nɔ obɔ lɛ yaa hiɛ kɛyashɛɔ enaagbee lɛ.—1 Mose 1:28.
6. Mɛɛ gbɛ nɔ Yesu gbalɛ lɛ tsɔɔ be mli ni abale “tooi krokomɛi” lɛ jogbaŋŋ yɛ?
6 Anaa nɔ ni tsɔɔ akɛ aleɔ “tooi krokomɛi” lɛ jogbaŋŋ yɛ “nibii agbɛjianɔtoo lɛ naagbee” lɛ mli lɛ yɛ abɛbua ni Yesu kɛgbe egbalɛ ni kɔɔ ba ni eba lɛ he “okadi” lɛ he lɛ naa lɛ mli. (Mateo 24:3) Ewie akɛ:
“Shi beni gbɔmɔ Bi lɛ aaaba yɛ enunyam lɛ mli, ni bɔfoi krɔŋkrɔŋi lɛ fɛɛ aaafata ehe lɛ, no mli lɛ eeeta enunyam sɛi lɛ nɔ; ni aaabua jeŋmaji lɛ fɛɛ naa yɛ ehiɛ, ni eeegbala amɛmli, taakɛ bɔ ni tookwɛlɔ gbalaa gwantɛŋi kɛ abotiai amli lɛ. Ni eeeŋɔ gwantɛŋi lɛ edamɔ eninejurɔ nɔ, shi abotiai lɛ, eeeŋɔ amɛ edamɔ ebɛku nɔ.” (Mateo 25:31-33)
Akɛni akɛ adesai ahiŋmɛii enaaa Maŋtsɛ ni yɔɔ anunyam mli nɛɛ kɛ ebɔfoi lɛ hewɔ lɛ, mɛɛ gbɛ nɔ etsuɔ nɛkɛ mligbalamɔ nitsumɔ nɛɛ yɛ?
7. (a) Te akudɔɔ mligbalamɔ nitsumɔ lɛ ahaa tɛŋŋ? (b) Mɛni esa akɛ ofee koni ona kojomɔ kpakpa, ni mɛni hewɔ?
7 Ŋwɛibɔfoi krɔŋkrɔŋi lɛ kɛ gbɛtsɔɔmɔ haa yɛ nakai nitsumɔ lɛ he. (Kpojiemɔ 14:6-12; okɛto Bɔfoi lɛ Asaji 8:26-29; 10:1-8 he.) Ni yɛ biɛ yɛ shikpɔŋ nɛɛ nɔ lɛ, “asafoku bibioo,” ni atsɛɔ amɛ Maŋtsɛ lɛ “nyɛmimɛi” yɛ Mateo 25:40 lɛ ateŋ mɛi ni eshwɛ lɛ nyiɛɔ hiɛ yɛ “sanekpakpa” lɛ shiɛmɔ mli. Maŋtsɛ lɛ kojoɔ gbɔmɛi yɛ bɔ ni amɛhereɔ “[e]nyɛmimɛi” lɛ kɛ Maŋtsɛyeli shɛɛ sane ni amɛjajeɔ lɛ nɔ amɛhaa lɛ naa. Ebuɔ nɔ ni amɛfeɔ amɛhaa “[e]nyɛmimɛi” lɛ akɛ amɛmiifee amɛmiiha lɛ diɛŋtsɛ. Gbɔmɛi ni hereɔ Maŋtsɛ lɛ “nyɛmimɛi” lɛ hiɛmɛɛ lɛ kɛ amɛhe eha kɛha jɔɔmɔ. Ani oji mɛnɛɛmɛi ateŋ mɔ ko? Lɛlɛŋ, esa akɛ odi Maŋtsɛyeli shɛɛ sane lɛ nɔkpɛlɛmɔ sɛɛ kɛ otsui fɛɛ, koni obatsɔ Yehowa tsulɔ ni ejɔɔ ehe nɔ ni abaptisi lɛ, kɛtsɔ Yesu gbɛi lɛ nɔ—ejaakɛ “yiwalaheremɔ bɛ mɔ ko mɔ ko mli.”—Bɔfoi lɛ Asaji 4:12; Mateo 25:35-40.
8. Mɛɛ ninefɔɔ kɛ shiwoi obaanyɛ ona mli gbɛfaŋnɔ?
8 Ákɛ Nuŋtsɔ lɛ “tooi krokomɛi” lɛ ateŋ mɔ ko lɛ, mɛni obaanyɛ okpa gbɛ? Mɛni baajɛ “[o]tookwɛlɔ kpakpa” kɛ “maŋtsɛ” lɛ “gbee” toi ni ooobo lɛ mli aba? Beni ejajeɔ kojomɔ lɛ, Maŋtsɛ lɛ kɛɔ “tooi” heshibalɔi ni damɔ eninejurɔ nɔ, ni tsɔɔ duromɔ lɛ akɛ: “Nyɛbaa, nyɛ mɛi ni mi-Tsɛ ejɔɔ nyɛ, nyɛbaŋɔa maŋtsɛyeli lɛ ni asaa ato nyɛ kɛjɛ jeŋ shishijee lɛ!” Obaanyɛ okpa gbɛ akɛ obaana nɛkɛ Maŋtsɛyeli jɔɔmɔi ni jɛɔ wɔ-Tsɛ lɛ dɛŋ kɛbaa nɛɛ amli gbɛfaŋnɔ, beni ‘jalɔi lɛ yaa naanɔ wala mli lɛ.’ (Mateo 25:34, 46) Hɛɛ, obaanyɛ okpa gbɛ akɛ obaana gbalɛ mli shiwoi babaoo amlibaa mli gbɛfaŋnɔ, tamɔ nɔ ni yɔɔ Yesaia lɛ nɛkɛ, ni wieɔ Yehowa he akɛ: “Eeemi gbele kɛaatee naanɔ; ni Nuŋtsɔ Yehowa aaatsumɔ hiɛaŋ fɛɛ yaafo nui, ni eeejie emaŋ lɛ hiɛgbele lɛ yɛ shikpɔŋ muu lɛ fɛɛ nɔ; ejaakɛ Yehowa ekɛɛ.” Be fioo ko pɛ gbɔmɛi fɔji baanyɛ aya nɔ amɛkɛgbe ohe guɔ. Ejaakɛ Nyɔŋmɔ shiwoo ji akɛ, etsɛŋ ni mɛi fɛɛ ni kɛ amɛhiɛ fɔɔ Yehowa nɔ lɛ baabote ‘okpɔlɔŋmɛɛ’ diɛŋtsɛ ko mli kɛha nibii kpakpai yɛ “shikpɔŋ hee” nɔ. Oosumɔ ni ona nakai ‘okpɔlɔŋmɛɛ’ lɛ mli gbɛfaŋnɔ, aloo osumɔɔɔ?—Yesaia 25:6-9; 66:22.
“ABOTIAI” LƐ KƐ YIWAAI
9, 10. (a) Mɛni hewɔ ni ebɛ mlɛo akɛ aaatiu jalɛ sɛɛ ŋmɛnɛ lɛ? (b) Mɛɛ su esa akɛ ona yɛ shitee-kɛ-wolɔi ahe, ni mɛɛ yelikɛbuamɔ obaanyɛ ona kɛjɛ Nyɔŋmɔ ŋɔɔ?
9 Ekolɛ efeŋ mlɛo kɛhaŋ bo akɛ ooodi jalɛ nifeemɔ sɛɛ yɛ nɛkɛ “naagbee gbii” nɛɛ amli. Satan kɛ emɛi ni elaka amɛ lɛ baaye ohe fɛo, beni amɛbɔɔ amɛnaagbee mɔdɛŋ fɛɛ ni amɛaanyɛ ni amɛkɛfite shikpɔŋ nɛɛ kɛ adesai ni yɔɔ nɔ lɛ. (2 Petro 3:3, 4; 2 Timoteo 3:1) Kɛ okɛ Maŋtsɛyeli shɛɛ sane lɛ tee okutsoŋbii aŋɔɔ lɛ, obaana akɛ okɛ mɛi komɛi baakpe ni amɛjieɔ abotia su kpo. Amɛfeɔ enɛ kɛtsɔɔ sane lɛ toi ni amɛbooo aloo bulɛ ni amɛjieee lɛ kpo lɛ nɔ, aloo kɛtsɔ shitee-kɛ-woo diɛŋtsɛ nɔ.—Mateo 25:33, 42-45.
10 Shi, akɛ Nuŋtsɔ lɛ “tooi” lɛ ateŋ mɔ kome lɛ, esaaa akɛ obɔɔ mɔdɛŋ akɛ oookojo mɔ ni ekolɛ eji “abotia” lɛ. Maŋtsɛ lɛ ji mɔ ni baakojo, shi jeee ‘etooi’ ni yɔɔ shikpɔŋ nɛɛ nɔ lɛ. (Okɛto Romabii 14:10-12 he.) Ni eyɛ mli akɛ ekolɛ okɛ shitee-kɛ-woo baakpe yɛ “sanekpakpa” jajelɔ ni otsɔ lɛ hewɔ moŋ, shi Nyɔŋmɔ baawo bo hewalɛ ni ofee esuɔmɔnaa nii, taakɛ bɔfo Petro tsɔɔ yɛ nɛkɛ wiemɔi nɛɛ amli lɛ, akɛ: “Shi duromɔ fɛɛ Nyɔŋmɔ . . . lɛ, lɛ diɛŋtsɛ eeesaa nyɛ pɛ ni eeewaje nyɛ ni eeewo nyɛ hewalɛ ni eeeha nyɛfi shi.” (1 Petro 5:10; okɛto 2 Korintobii 12:10 he.) Bɔfo Paulo hu kɛ ŋaawoo fɛfɛo nɛɛ haa, akɛ: “Nyɛ mɔdɛŋbɔɔ [yɛ Maŋtsɛyeli lɛ he lɛ] naa akabaa shi; nyɛmumɔ lɛ he adɔa la; nyɛsɔmɔa Nuŋtsɔ [Yehowa]. Nyɛyaa nɔ yɛ hiɛnɔkamɔ mli; nyɛmiaa nyɛhiɛ yɛ amanehulu mli; nyɛhiɛa sɔlemɔ mli daa.”—Romabii 12:11, 12.
11. Mɛɛ miishɛɛ nɔ ko baanyɛ ajɛ Kristofoi asubaŋ kpakpa he nɔkwɛmɔ nɔ ni afeɔ lɛ mli aba?
11 Anɔkwa sɔɔmɔ kɛ sɔlemɔ ni mli wa ni osɔleɔ ohaa Yehowa, kɛ o-Kristofoi asu kpakpa ni ojieɔ lɛ kpo lɛ baaha mɛi komɛi ni tsutsu lɛ amɛtamɔ “abotiai” lɛ atsake kɛbatsɔmɔ “gwantɛŋi.” Bei pii lɛ, ‘ashiɔ wiemɔ lɛ sɛɛ,’ ni Kristofoi ŋamɛi atsuishitoo kɛ amɛsubaŋ ni tsɔɔ bulɛ lɛ tsuɔ nii waa kɛmɔɔ shi ni nine shɛɔ wumɛi ni heee yeee lɛ anɔ. (1 Petro 3:1, 2) Eka shi faŋŋ akɛ wɔsumɔɔɔ ni wɔna ni gbɔmɛi ‘miiya naanɔ hiɛkpatamɔ mli,’ shi moŋ, esa akɛ wɔsumɔ akɛ wɔɔye wɔbua amɛ ni amɛjie abotiai asui lɛ yɛ amɛhe amɛshwie, bɔni afee ni amɛnine ashɛ naanɔ wala nɔ.—Mateo 25:41, 46.
“GWANTƐŊI” ANƆKWAFOI LƐ HIƐƆ EMUUYELI MLI
12. Maŋtsɛ lɛ “nyɛmimɛi” lɛ kɛ “tooi” lɛ eye ebua amɛhe yɛ ŋmɛnɛŋmɛnɛ beaŋ yɛ mɛɛ gbɛ nɔ?
12 Esa akɛ wɔkadi akɛ “gwantɛŋi” ni yɔɔ Yesu abɛbua lɛ mli lɛ je gbɛ amɛbɔ mɔdɛŋ waa ni amɛsɔmɔ Maŋtsɛ lɛ “nyɛmimɛi” lɛ beni mɛnɛɛmɛi ahe yeɔ kɛ beni awo amɛ tsuŋ lɛ. Ni yɛ shikpɔŋ lɛ nɔ hei komɛi ŋmɛnɛ lɛ, hiamɔ shihilɛ kɛ yiwaa, kɛ hela kɛ tsuŋwoo ji nɔ ni baa amɛnɔ, jeee “asafoku bibioo” lɛ pɛ kɛkɛ, shi moŋ “tooi krokomɛi” ni kɛ amɛ sɔmɔɔ yɛ anɔkwayeli kɛ ekomefeemɔ mli lɛ hu. Akɛ nɔkwɛmɔ nɔ lɛ, yɛ afi 1933 kɛyashi 1945 mli, beni Nazi nɔyelɔ Hitler kɛ ekaa bɔɔ mɔdɛŋ ni eye je lɛ fɛɛ nɔ lɛ, Yehowa Odasefoi kɛ yiwaa ni naa wa waa kpe—klɛŋklɛŋ lɛ yɛ Nazi-kɛ-Fascist nɔyeli maji lɛ amli, kɛ agbɛnɛ yɛ sɛɛ mli lɛ, yɛ maji ni kɛ amɛhe wuɔ ta lɛ hu fɛɛ mli. Agbe “asafoku bibioo” lɛ kɛ Nuŋtsɔ lɛ “tooi krokomɛi” lɛ hu fɛɛ amlibii lɛ ateŋ mɛi babaoo. Shi amɛye kunim yɛ naakpɛɛ gbɛ nɔ yɛ amɛ emuuyeli ni amɛhiɛ mli aahu amɛha Maŋtsɛ lɛ kɛ e-Maŋtsɛyeli lɛ hewɔ!
13, 14. Mɛɛ sɔrɔto feemɔ ko akadi jogbaŋŋ yɛ Kristendom jamɔi lɛ ashidaamɔ kɛ Yehowa Odasefoi anɔ teŋ?
13 Bei pii lɛ, yinɔsaneŋmalɔi wieɔ sɔrɔto feemɔ ni anaa yɛ Kristendom jamɔi lɛ asaji-ahe-ŋmɛɛmɔ shidaamɔ kɛ Yehowa Odasefoi a-emuuyeli mlihiɛmɔ mli, yɛ nɔnyɛɛ shishi lɛ he. Akɛ nɔkwɛmɔ nɔ lɛ, Paul Johnson wie Katolik kɛ Evangelikal jamɔi ni hi Hitler beaŋ Germany lɛ ahe klɛŋklɛŋ, yɛ wolo ko ni gbɛi ji A History of Christianity, ni afee yɛ London, England, yɛ 1976 mli lɛ mli akɛ: “Sɔlemɔi enyɔ lɛ fɛɛ kɛ amɛsɛɛfimɔ babaoo ha nɔyeli lɛ. Katolik osɔfonukpai lɛ kɛ miishɛɛ kpɛlɛ ‘nɔyeli hegbɛ nɔ mi hee ni ama waa yɛ German maŋ lɛ mli’ lɛ nɔ; Osɔfonukpa Bornewasser kɛɛ Katolik obalaŋtai yɛ Trier Sɔlemɔtsu lɛ mli akɛ: ‘Wɔkɛ wɔyitsei ni wɔhole nɔ kɛ shidaamɔ ni yɔɔ shiŋŋ ebote nɔyeli hee lɛ mli, ni wɔfee klalo akɛ wɔkɛ wɔgbɔmɔtso kɛ susuma nyɛmɔ fɛɛ baasɔmɔ lɛ.’ Yɛ January 1934 mli lɛ, Hitler kɛ Evangelical hiɛnyiɛlɔi nyɔŋma kɛ enyɔ kpe, ni yɛ nɛkɛ kpee nɛɛ sɛɛ lɛ, . . . amɛŋma wolo amɛha kɛma nɔ mi akɛ ‘German Evangelical Sɔlemɔ lɛ hiɛnyiɛlɔi lɛ fɛɛ kɛ ekomefeemɔ miima amɛ anɔkwayeli kɛha Nɔyeli ni Ji Etɛ lɛ kɛ ehiɛnyiɛlɔ lɛ nɔ mi kɛmiimɔ shi.’ ”
14 Kɛkɛ ni, beni ewieɔ mɛi fioo ni tsɛɔ amɛhe Kristofoi, ni ewie akɛ “amɛhiɛ amɛshishitoo mlai amli kpɛŋŋ” lɛ ahe lɛ, niŋmalɔ nɛɛ tee nɔ ewie akɛ: “Mɛi ni yɔɔ ekaa fe fɛɛ ji Yehowa Odasefoi, ni jaje amɛ shitee-kɛ-woo yɛ tsɔɔmɔi agbɛfaŋ lɛ yɛ faŋŋ mli kɛjɛ shishijee tɔ̃ɔ, ní amɛna amanehulu yɛ he lɛ. Amɛkpɛlɛɛɛ akɛ amɛkɛ Nazi nɔyeli, ni amɛwie amɛshi akɛ eji nɔyeli fɔŋ jogbaŋŋ lɛ aaafee ekome yɛ nɔ ko kwraa mli. . . . Abu amɛteŋ mɛi pii gbele fɔ yɛ amɛhe ni amɛkɛwooo asraafoi anitsumɔ mli lɛ hewɔ . . . ; loo amɛyagbe naa yɛ Dachau aloo sɛkɛyelɔi atsamɔ hei. Agbe amɛmlijaa etɛ mli ekome diɛŋtsɛ; amɛmlijaa oha mli nyɔŋmai-nɛɛhu kɛ kpawo kɛ yiwaa ni mli wa kpe yɛ gbɛ kome loo gbɛ kroko nɔ. Amɛ pɛ ji Kristofoi akuu ni Himmler hiɛ sɔ amɛ.”
15. (a) Te bo diɛŋtsɛ lɛ onuɔ wolo ni jeɔ kpo yɛ biɛ nɛɛ he ohaa tɛŋŋ? (b) Mɛni ji Satan mɔdɛŋbɔɔ yɛ Jeŋ Ta II mli, ni mɛni ji odaseyeli ni tsɔɔ akɛ enine nyɛ shi?
15 Odasefoi obalaŋtai kɛ tsuŋwoo kɛ gbele tete kpe, moŋ fe ni amɛaaku amɛ emuuyeli mli, jeee akɛ mɛi ni teɔ shi woɔ ta, shi moŋ akɛ Kristofoi ni kɛ amɛhe wooo maŋ saji amli, ni amɛfiɔ Nyɔŋmɔ Maŋtsɛyeli ni baa lɛ sɛɛ, taakɛ ‘naagbee wolo’ ko ni mɔ ko ŋma, ni jeɔ kpo yɛ biɛ nɛɛ yeɔ he odase lɛ. Yɛ je lɛŋ he fɛɛ he lɛ, Axis ni ji Germany, Italy, kɛ Japan maji lɛ amli jio, Maji ni Efee Ekome lɛ amli jio, afee Maŋtsɛ lɛ “nyɛmimɛi” lɛ kɛ amɛhefatalɔi “tooi” krokomɛi lɛ basabasa, ayi amɛ, awo amɛ tsuŋ ni afee amɛ nisenianii. Shi amɛye kunim yɛ amɛmumɔŋ ta ni amɛwuɔ lɛ mli. Abonsam nyɛɛɛ afite amɛ anɔkwayeli ni amɛkɛhaa Maŋtsɛyeli lɛ. Amɛjie amɛhe kpo akɛ ‘amɛjɛɛɛ’ Satan je lɛ mli, taakɛ Yesu ni hi shi kɛtsɔ amɛhiɛ lɛ fee lɛ.—Yohane 15:19.
MAŊTSƐYELI LƐ HE TSƆSEMƆ GBƐJIANƆTOO LƐ
16, 17. (a) Mɛɛ tsɔsemɔ he gbɛjianɔtoo kɛ nitsumɔ ni mli lɛɛ naa gbele agbɛnɛ? (b) Mɛɛ yibii nitsumɔ nɛɛ ewo ni anaa?
16 Buu Mɔɔ Asafo lɛ sɛinɔtalɔ, J. F. Rutherford, gbo yɛ 1942 mli, ni Nathan H. Knorr baye esɛɛ. Ato Teokrase Sɔɔmɔ Skul shishi yɛ Yehowa Odasefoi asafoi fɛɛ mli, ni enɛɛmɛi etsu nii waa ni etsɔse Odasefoi hii kɛ yei fɛɛ koni amɛnyɛ amɛwie Maŋtsɛyeli shɛɛ sane lɛ he ni emɔ shi jogbaŋŋ ni ekɔne mɛi krokomɛi ayiŋ hu. Akɛ nikasemɔ woji sɔrɔtoi eha kɛha nɛkɛ skul nɛɛ, yɛ afii abɔ ni eho lɛ amli. Nakai nɔŋŋ hu akuuu hiɛ afɔɔɔ maŋsɛɛ sanekpakpa shiɛmɔ nitsumɔ lɛ nɔ. Yɛ February 1, 1943 lɛ, aje Buu-Mɔɔ Biblia Gilead Skul lɛ shishi yɛ New York State. Akɛ be-fɛɛ sɔɔlɔi (“gbɛgbalɔi”) akpei abɔ ni yɔɔ niiashikpamɔ, ni jɛ maji babaoo mli yɛ je lɛŋ fɛɛ eba U.S.A., ni atsɔse amɛ ni atsu amɛ “kɛtee shikpɔŋ muu lɛ fɛɛ nɔ” koni amɛyashiɛ “maŋtsɛyeli lɛ he sanekpakpa nɛɛ.”—Mateo 24:14; Romabii 10:18.
17 Mɛɛ yibiwoo ni yɔɔ naakpɛɛ po ejɛ nɛkɛ jeŋ muu fɛɛ tsɔsemɔ gbɛjianɔtoo he tafaa nɛɛ mli eba nɛkɛ! Beni wɔyaa nɔ yɛ 1990 afii lɛ amli lɛ, mɛi abɔ ni yeɔ aboloo lɛ ni amɛnuɔ wein lɛ hu eko yɛ Yesu gbele lɛ Kaimɔ ni afeɔ daa afi lɛ shishi, ni amɛkɛtsɔɔ amɛhiɛnɔkamɔ akɛ amɛkɛ lɛ baafee ekome yɛ eŋwɛi Maŋtsɛyeli lɛ mli lɛ anɔ egbɔ kɛba nɔ ni shɛɛɛ 9,000, beni Maŋtsɛ lɛ “nyɛmimɛi” lɛ ateŋ mɛi babaoo gbeɔ amɛ shikpɔŋ nɔ nitsumɔ lɛ naa yɛ emuuyeli mlihiɛmɔ mli lɛ. Shi mɛi krokomɛi ni yaa, ni yɔɔ he miishɛɛ akɛ amɛaahi shi kɛya naanɔ yɛ shikpɔŋ nɔ akɛ Maŋtsɛyeli lɛ shishi bii lɛ fɛɛ ayifalɛ etee hiɛ kɛtɛke 12,000,000. Ni “asafo babaoo” ni ji “tooi krokomɛi” lɛ miitsu odaseyeli nitsumɔ lɛ mli fã ni da waa, yɛ Yehowa Odasefoi asafoi ni fe 75,000 lɛ amli yɛ je lɛŋ fɛɛ ŋmɛnɛ. Kwɛ hegbɛ kpele ni ona akɛ ooofee mɛnɛɛmɛi ateŋ mɔ ko!
18. (a) “Tsulɔ anɔkwafo kɛ nilelɔ” lɛ etee nɔ yɛ esɔɔmɔ lɛ mli yɛ mɛɛ gbɛ nɔ? (b) Mɛɛ nitsumɔ ni sa kadimɔ jogbaŋŋ obaanyɛ ona mli gbɛfaŋnɔ bianɛ?
18 Eyɛ mli akɛ amɛyifalɛ lɛ miiba shi moŋ, shi Yesu “asafoku bibioo” ni ji shwɛɛnii ni afɔ amɛ mu, “tsulɔ anɔkwafo kɛ nilelɔ” lɛ miiya nɔ eekwɛ Maŋtsɛyeli nitsumɔ lɛ nɔ lolo. (Mateo 24:45-47) Bɔni afee ni enyɛ eye omanye lɛ, etsuɔ nii kɛtsɔɔ nɔyeli kuu, ni ji gbɛjianɔtoo ni tamɔ nɔ ni hi shi yɛ klɛŋklɛŋ afii oha lɛ mli Kristofoi asafo lɛ mli lɛ nɔ. (Bɔfoi lɛ Asaji 15:6; Luka 12:42-44) Yɛ N. H. Knorr gbele yɛ 1977 mli lɛ sɛɛ lɛ, Frederick W. Franz bafee Buu Mɔɔ Asafo lɛ sɛinɔtalɔ ni ji ejwɛ, beni eye afii 83. Ni yɛ July 1, 1979 lɛ, Buu-Mɔɔ wolo tɛtrɛɛ lɛ diɛŋtsɛ ye afii 100! Ekɛ afii oha sɔŋŋ etsu Maŋtsɛyeli odaseyeli nitsumɔ lɛ he nii. Hɛɛ, ajaje Maŋtsɛyeli ni ato ama shi lɛ he “sanekpakpa nɛɛ” kɛtsɔ woji ni akala kɛ naabu kɛ wiemɔ nɔ, yɛ shikpɔŋ lɛ nɔ fɛɛ ni akɛye odase. Ani oji mɛi ni naa nɛkɛ nitsumɔ ni ji hegbɛ kpele nɛɛ mli gbɛfaŋnɔ yɛ nɔkwɛmɔ nɔ ni Yesu fee efɔ shi lɛ sɛɛnyiɛmɔ mli lɛ ateŋ mɔ ko? Taakɛ Paulo wo ŋaa lɛ:
“Nyɛhaa wɔtsɔa enɔ ni wɔkɛ yijiemɔ afɔle abahaa Nyɔŋmɔ daa; no ji naabui ni jajeɔ egbɛi lɛ ayibii lɛ.”—Hebribii 13:15.
19. (a) Mɛɛ gbɛ Paulo wo hewalɛ ni akɔ yɛ “tsui” kɛ “naabu” he? (b) Mɛɛ sanebimɔi ni baa yɛ ebe naa abiɔ yɛ biɛ, ni te obaaha hetoo tɛŋŋ?
19 Bɔfo Paulo jaje yɛ wolo kroko hu mli akɛ: “Tsui akɛheɔ ayeɔ kɛshɛɔ jalɛ he, ni naabu akɛjajeɔ kɛshɛɔ yiwalaheremɔ he.” (Romabii 10:10) Ani ojieɔ hemɔkɛyeli kpo yɛ “sanekpakpa,” ni amrɔ nɛɛ egbalaa jwɛŋmɔ kɛyaa Nyɔŋmɔ Maŋtsɛyeli, ni akɛma shi yɛ ŋwɛi kɛjɛ 1914 kɛbaa nɛɛ nɔ lɛ mli? Ani okɛ ‘onaabu miijaje kɛmiishɛ yiwalaheremɔ he,’ beni osɔleɔ ni Nyɔŋmɔ Maŋtsɛyeli lɛ “aba” kɛ ehewalɛ ni kpataa nii ahiɛ lɛ fɛɛ, ni ebajie Satan gbɛjianɔtoo lɛ kɛjɛ shikpɔŋ nɛɛ nɔ lɛ? Ani okɛ ekaa miigba mɛi krokomɛi Maŋtsɛyeli jɔɔmɔi ni baaba adesai fɛɛ anɔ, beni etsɛŋ ni abaafee Nyɔŋmɔ suɔmɔnaa nii “yɛ shikpɔŋ lɛ nɔ, taakɛ afeɔ yɛ ŋwɛi lɛ,” he sane ‘yɛ faŋŋ mli kɛ shia kɛ shia’? Ani okɛ anɔkwayeli miifi “tsulɔ anɔkwafo kɛ nilelɔ” kuu ni afɔ amɛ mu, ni ji anɔkwa Kristofoi lɛ asɛɛ, beni amɛyaa nɔ amɛnyiɛɔ hiɛ yɛ Maŋtsɛyeli shɛɛ sane lɛ jajemɔ mli yɛ “shikpɔŋ muu lɛ fɛɛ nɔ, . . . [kɛ] jeŋ naagbee hei lɛ,” ni amɛfeɔ ‘gbɔmɛi ni jɛ jeŋmaji fɛɛ mli lɛ kaselɔi ni amɛbaptisiɔ amɛ’ lɛ?—Mateo 6:10; 24:14, 45-47; 28:19, 20; Bɔfoi lɛ Asaji 5:42; 20:20; Romabii 10:18.
20. Mɛɛ hegbɛ ni yɔɔ nyam obaanyɛ ona mli ŋɔɔmɔ bianɛ?
20 Obaanyɛ ona hegbɛ ni yɔɔ nyam ŋmɛnɛ ni okɛ ‘sɔɔmɔ krɔŋŋ aha nyɔɔŋ kɛ shwane yɛ Nyɔŋmɔ maŋtsɛsɛi lɛ hiɛ’ kɛtsɔ nakai hegbɛ lɛ nɔ. Yɛ nakai beaŋ nɔŋŋ lɛ, okɛ ohe damɔɔ shi akɛ ooonyɛ ofee “asafo babaoo” ni baana naanɔ wala yɛ shikpɔŋ ni aha ehiɛ eba nyam nɔ lɛ ateŋ mɔ ko. (Kpojiemɔ 7:9-17) Shi klɛŋklɛŋ lɛ, esa akɛ Maŋtsɛyeli lɛ “aba” ni ebawuu Harmagedon ta lɛ! Mɛni Harmagedon baatsɔɔ aha adesai kɛ wɔ shikpɔŋ nɛɛ?
[Akrabatsa ni yɔɔ baafa 159]
EKƐ EHE WOOO MAŊ SAJI AMLI, AAHU KƐTEE GBELE MLI
Yɛ jeŋ ta ni ji enyɔ lɛ mli lɛ, Yehowa Odasefoi obalaŋtai pii kɛ amɛwala wo amɛhe ni amɛkɛwooo maŋ saji amli lɛ he nyɔmɔ. Wolo ni nyiɛ sɛɛ nɛɛ ji ‘naagbee woji’ krɛdɛɛi pii ni nɛkɛ Odasefoi ekaalɔi nɛɛ ŋmala amɛmaje amɛwekui lɛ ateŋ ekome. Mɔ ni ŋma ji Marcel Sutter, ni eye afii 23, ni jɛ Alsace-Lorraine lɛ, ŋmɛlɛtswai fioo dani akɛ lema fo eyi yɛ Torgau tsuŋwoo he lɛ, yɛ Germany, yɛ August 1942.
“Mifɔlɔi kɛ minyɛmimɛi yei ni misumɔɔ waa,”
“Kɛ nyɛnine shɛ wolo nɛɛ nɔ lɛ, no mli lɛ mibɛ wala mli. Ŋmɛlɛtswai fioo ko pɛ kã mikɛ gbele teŋ. Miikɛɛ nyɛ ni nyɛhe awa ni nyɛna ekaa hu; nyɛkafoa, ejaakɛ miye kunim. Migbe gbɛ ni minyiɛ nɔ lɛ naa, ni mihiɛ hemɔkɛyeli lɛ mli. Eba akɛ Yehowa Nyɔŋmɔ aaaye abua mi kɛyashi naagbee. Be kukuoo ko pɛ kã wɔkɛ wɔ Nuŋtsɔ Yesu Kristo Maŋtsɛyeli lɛ teŋ. Etsɛŋ ni wɔbaana wɔhe ekoŋŋ yɛ jeŋ ni hi, ni toiŋjɔlɛ kɛ jalɛ hiɔ mli lɛ mli. Mimii shɛɔ mihe waa kɛji misusu nakai gbi lɛ he, ejaakɛ nakai beaŋ lɛ, ŋkɔmɔyeli ko bɛ dɔŋŋ. Kwɛ bɔ ni eeefee nyam eha! Miishwe toiŋjɔlɛ. Miisusu nyɛhe waa yɛ nɛkɛ ŋmɛlɛtswai fioo ni eshwɛ nɛɛ amli, ni dɔlɛ fioo yɛ mitsui mli akɛ minyɛɛɛ mashɔ nyɛnaa ni mikɛ nyɛ aye shɛɛ. Shi esa akɛ wɔto wɔtsui shi kɛkɛ. Be ni Yehowa kɛbaabu E-gbɛi lɛ bem, ni ekɛma nɔ mi eha adebɔɔ nii fɛɛ akɛ lɛ pɛ ji anɔkwa Nyɔŋmɔ koome lɛ ebɛŋkɛ kpaakpa. Amrɔ nɛɛ miisumɔ ni majɔɔ miwala ŋmɛlɛtswai fioo nɛɛ nɔ maha lɛ, no hewɔ lɛ mikɛ wolo nɛɛ baawa biɛ, ni makɛɛ akɛ nyɛhia shi jogbaŋŋ kɛyashi wɔbaakpe ekoŋŋ yɛ be fioo sɛɛ. Yijiemɔ aha wɔ-Nyɔŋmɔ Yehowa! Mikɛ miishɛɛ suɔmɔ kɛ ŋamɔi miimaje nyɛ,
“Nyɛ suɔmɔ binuu kɛ nyɛminuu,
Marcel”