Yitso 114

Kaimɔ Gbɛkɛnaashi Niyenii Lɛ

BENI Yesu fɔ ebɔfoi lɛ anaji ahe sɛɛ lɛ, etsɛ ŋmalɛ ni yɔɔ Lala 41:10 lɛ: “Mɔ ni kɛ mi yeɔ aboloo lɛ, ewo enanetsitsi nɔ eshi mi.” Kɛkɛ ni ehao yɛ emumɔ mli, ni etsɔɔ amɛ mli akɛ: “Nyɛteŋ mɔ kome baatsɔɔ misɛɛ gbɛ.”

Kɛkɛ ni bɔfoi lɛ werɛ ho amɛhe ni amɛkɛɛ Yesu ekomekome akɛ: “Nuŋtsɔ miŋ lo?” Ni Yuda Iskariot hu po fata he ni abi lɛ nakai lɛ. Kɛkɛ ni Yohane, ni ka Yesu masɛi kpaakpa yɛ okpɔlɔ lɛ he lɛ ho egbee Yesu tsitsi mli ni ebi lɛ akɛ: “Nuŋtsɔ, namɔ ni?”

Ni Yesu ha hetoo akɛ: “Mɔ nine ni kɛ minine kpeɔ yɛ kã lɛ mli lɛ, lɛ nɔŋŋ ebatsɔɔ misɛɛ gbɛ lɛ. Gbɔmɔ Bi lɛ miiya taakɛ bɔ ni aŋma yɛ ehe lɛ moŋ; shi kpoo ha nɔ gbɔmɔ lɛ ni tsɔɔ gbɔmɔ Bi lɛ sɛɛ gbɛ lɛ; faŋ nɔ ni anaaa afɔ nakai gbɔmɔ lɛ.” Yɛ no sɛɛ lɛ, Satan saa bote Yuda mli ekoŋŋ, ni eŋɔ etsui ni eyi kɛ efɔŋ lɛ mli ni egbele lɛ he hegbɛ lɛ. Sɛɛ mli yɛ nakai gbɛkɛ lɛ nɔŋŋ lɛ, Yesu tsɛ Yuda yɛ gbɛ ni ja nɔ akɛ “laajemɔ bi lɛ.”

Agbɛnɛ Yesu kɛɛ Yuda akɛ: “Nɔ ni ofeɔ lɛ, feemɔ mra mra.” Bɔfoi lɛ ateŋ mɔ ko mɔ ko nuuu nɔ ni Yesu tsɔɔ lɛ shishi. Amɛteŋ mɛi komɛi susu akɛ akɛni Yuda ji mɔ ni hiɛ shika fotro lɛ hewɔ lɛ, Yesu miikɛɛ lɛ akɛ: “Yaahe nii ni he hiaa wɔ oto gbijurɔ lɛ,” aloo akɛ ekɛ nɔ ko ayaha ohiafoi lɛ.

Beni Yuda shi jɛmɛ lɛ, Yesu kɛ ebɔfoi anɔkwafoi lɛ to gbijurɔyeli, loo kaimɔ nɔ hee ko kwraa shishi. Ekɔ aboloo, ni ekɛ shidaa sɔlemɔ ha yɛ he, ni ekumɔ mli, ni eŋɔha amɛ ni ekɛɛ: “Nyɛhea nyɛyea.” Etsɔɔ mli akɛ: “Enɛ ji migbɔmɔtso ni aŋɔha yɛ nyɛ hewɔ lɛ; nyɛfea enɛ ni nyɛŋɔkai mi.”

Beni amɛteŋ mɔ fɛɛ mɔ eye aboloo lɛ eko lɛ, Yesu wo kpulu kɛ wein, ni eka shi faŋŋ akɛ no ji kpulu ni ji ejwɛ ni amɛkɛtsu nii yɛ Hehoo gbijurɔyeli lɛ shishi lɛ hu. Ni ekɛ shidaa sɔlemɔ ha yɛ no hu he, ni ekɛha amɛ, ni ekɛɛ amɛ ni amɛnu kɛjɛ mli, ni ejaje akɛ: “Nɛkɛ kpulu nɛɛ ji kpaŋmɔ hee lɛ yɛ mila ni aŋɔshwie shi aha nyɛ lɛ mli.”

No hewɔ lɛ, yɛ anɔkwale mli lɛ, enɛ ji Yesu gbele lɛ kaimɔ. Esa akɛ daa afi lɛ, ati mli afee yɛ Nisan 14, taakɛ Yesu kɛɛ lɛ, ni aŋɔkai lɛ. Ebaaha mɛi ni yeɔ ni amɛkɛkaiɔ lɛ lɛ akai nɔ ni Yesu kɛ eŋwɛi Tsɛ lɛ efee koni eha adesai ana hegbɛ ni amɛje gbele fɔbuu shishi lɛ be fɛɛ be. Kɛha Yudafoi ni batsɔmɔɔ Kristo sɛɛnyiɛlɔi lɛ, gbijurɔyeli nɛɛ bayeɔ Hehoo lɛ najiaŋ.

Kpaŋmɔ hee lɛ, ni ahaa etsuɔ nii yɛ Yesu la ni afɔse ashwie shi lɛ hewɔ lɛ yeɔ Mla kpaŋmɔ momo lɛ najiaŋ. Yesu ji teŋdamɔlɔ yɛ kui enyɔ ateŋ—Yehowa Nyɔŋmɔ yɛ afa kome, kɛ Kristofoi 144,000 ni akɛ mumɔ efɔ amɛ lɛ yɛ afa kroko. Kɛfata eshaifaa ni ekɛhaa lɛ he lɛ, kpaŋmɔ lɛ ŋmɛɔ gbɛ ni atoɔ ŋwɛi maŋtsɛmɛi kɛ osɔfoi amaŋ ko shishi. Mateo 26:21-29; Marko 14:18-25; Luka 22:19-23; Yohane 13:18-30; 17:12; 1 Korintobii 5:7.

▪ Mɛɛ Biblia gbalɛ ko Yesu tsɛ yisɛɛ yɛ ehefatalɔ ko hewɔ, ni te etsɔɔ bɔ ni ekɔɔ he lɛ mli eha tɛŋŋ?

▪ Mɛni hewɔ ni bɔfoi lɛ werɛ ho amɛhe waa lɛ, ni mɛni amɛteŋ mɔ fɛɛ mɔ bi?

▪ Mɛni Yesu kɛɛ Yuda ni efee, shi te bɔfoi krokomɛi ni eshwɛ lɛ nu nɛkɛ famɔi nɛɛ ashishi amɛha tɛŋŋ?

▪ Mɛɛ gbijurɔyeli Yesu to shishi yɛ be mli ni Yuda eshi jɛmɛ lɛ sɛɛ, ni mɛɛ yiŋtoo he nii etsuɔ?

▪ Namɛi ji kui ni yɔɔ kpaŋmɔ hee lɛ mli lɛ, ni mɛni kpaŋmɔ lɛ tsuɔ?