Nuŋtsɔ lɛ Gbɛkɛnaashi Niyenii lɛ Yɛ Shishinumɔ Kpele Kɛha Bo

ANI Nuŋtsɔ lɛ Gbɛkɛnaashi Niyenii lɛ yɛ shishinumɔ ni sa kadimɔ ni sɛɛ tsɛɔ kɛha bo? Bɔni afee ni wɔna naa lɛ, klɛŋklɛŋ lɛ, ha ni wɔtao nɔ̃ shishinumɔ ni Yesu Kristo diɛŋtsɛ ná yɛ nifeemɔ ni nɔ kwɔ waa nɛɛ he lɛ mli wɔkwɛ.

Yɛ Nisan 14 gbɛkɛnaashi, yɛ afi 33 Ŋ.B. lɛ, Yesu kɛ ebɔfoi 12 lɛ bua amɛhe naa yɛ ŋwɛitsu ko nɔ yɛ Yerusalem koni amɛye daa afi Hehoo lɛ. Beni amɛye Hehoo niyenii lɛ sɛɛ lɛ, sɛɛgbɛtsɔɔlɔ Yuda shi tsũ lɛ mli koni eyatsɔɔ Yesu sɛɛgbɛ. (Yohane 13:21, 26-30) Yesu to “Nuŋtsɔ lɛ gbɛkɛnaashi niyenii” lɛ shishi eha bɔfoi 11 ni eshwɛ lɛ. (1 Korintobii 11:20, NW) Atsɛɔ lɛ hu akɛ Kaimɔ, akɛni Yesu fã esɛɛnyiɛlɔi lɛ akɛ: “Nyɛfea enɛ ni nyɛŋɔkai mi” lɛ hewɔ. Enɛ pɛ ji nifeemɔ ko ni afã Kristofoi ni amɛkai.—1 Korintobii 11:24.

Taakɛ Webster’s wiemɔ komekomei ashishitsɔɔmɔ wolo lɛ tsɔɔ mli lɛ, kaimɔ nɔ̃ ji nɔ ko ni yeɔ ebuaa “ni akɛbaa nikaimɔ yi” aloo “akɛhaa nikaimɔ hiɔ shi.” Yɛ hei babaoo lɛ, mɛi shɔ̃ɔ okadi ko aloo amɛtoɔ gbi krɛdɛɛ ko amɛmaa shi kɛkaiɔ nii, aloo akɛyeɔ mɔ ko aloo nɔ ko ni sa kadimɔ waa lɛ he gbi jurɔ. Yɛ shihilɛ ni tamɔ nɛkɛ mli lɛ, Yesu to kaimɔ niyenii ko shishi—niyenii ko ni baaha anyɛ akai, ni baaye abua ekaselɔi lɛ koni amɛbaa nakai gbi lɛ mli nifeemɔi ni sa kadimɔ waa lɛ ayi. Kɛha yinɔi ni baanyiɛ sɛɛ aba lɛ, nɛkɛ kaimɔ niyenii nɛɛ baaha mɛi ni yeɔ gbi jurɔ lɛ akai shishinumɔ ni mli kwɔ ni yɔɔ nibii ni Yesu fee nakai gbɛkɛ lɛ he, titri lɛ yɛ nɔ ni kɔɔ okadi nibii ni ekɛtsu nii lɛ ahe lɛ. Mɛɛ okadi nibii Yesu kɛtsu nii, ni mɛni nomɛi tsɔɔ? Ha wɔpɛi Biblia mli sane ni kɔɔ nɔ ni tee nɔ yɛ nakai gbɛkɛnaashi afi 33 Ŋ.B. lɛ he lɛ mli wɔkwɛ.

Okadi Nifeemɔi ni Yɔɔ Krɔŋkrɔŋ

“Ekɔ aboloo, ni eda shi, ni ekumɔ mli, ni eŋɔha amɛ ni ekɛɛ: ‘Enɛ tsɔɔ migbɔmɔtso ni abaaŋɔ aha yɛ nyɛhewɔ lɛ. Nyɛyaa nɔ nyɛfea enɛ ni nyɛŋɔkai mi.’”—Luka 22:19, NW.

Beni Yesu kɔ aboloo lɛ ni ekɛɛ akɛ, “enɛ tsɔɔ migbɔmɔtso” lɛ, no mli lɛ eetsɔɔ akɛ, akpiti aboloo lɛ damɔ shi kɛha lɛ diɛŋtsɛ egbɔmɔtso, aloo okadi ko kɛha egbɔmɔtso ni esha bɛ he ni eŋɔ eha “yɛ je lɛ wala hewɔ” lɛ. (Yohane 6:51) Eyɛ mli akɛ Biblia shishitsɔɔmɔi komɛi kɛɔ akɛ “enɛ ji [Hela, es·tinʹ] migbɔmɔtso” moŋ, shi Thayer Greek-English Lexicon of the New Testament lɛ kɛɔ akɛ, bei pii lɛ feemɔ wiemɔ nɛɛ tsɔɔ “nɔ ko ni akɛdamɔɔ shi ahaa nɔ kroko, afee he okadi, akɛtsɔɔ nɔ ko.” Etsɔɔ shishinumɔ ni ji nɔ ko ni akɛaadamɔ shi aha nɔ kroko, aloo ehe nɔkwɛmɔnɔ ni aaafee.—Mateo 26:26.

Nakai nɔŋŋ hu eji yɛ kpulu lɛ gbɛfaŋ. Yesu kɛɛ akɛ: “Nɛkɛ kpulu nɛɛ tsɔɔ kpaŋmɔ hee lɛ, yɛ milá lɛ hewɔ, nɔ ni abaafɔse ashwie shi yɛ nyɛhewɔ lɛ.”—Luka 22:20, NW.

Yɛ Mateo niŋmaa lɛ mli lɛ, Yesu wie kpulu lɛ he akɛ: “Enɛ tsɔɔ ‘milá ni ji kpaŋmɔ hee lɛ nɔ̃ lɛ,’ ní abaafɔse ashwie shi yɛ mɛi pii ahewɔ ha eshaifaa lɛ.” (Mateo 26:28, NW) Yesu kɛ wein ni yɔɔ kpulu lɛ mli lɛ miitsu nii kɛmiidamɔ shi kɛha lɛ diɛŋtsɛ elá lɛ aloo ákɛ elá lɛ he okadi. Elá ni efɔse eshwie shi lɛ bafee “kpaŋmɔ hee” kɛha kaselɔi ni ajɛ mumɔŋ afɔ amɛ mu, mɛi ni baafata ehe kɛye nɔ akɛ maŋtsɛmɛi kɛ osɔfoi yɛ ŋwɛi lɛ.—Yeremia 31:31-33; Yohane 14:2, 3; 2 Korintobii 5:5; Kpojiemɔ 1:5, 6; 5:9, 10; 20:4, 6.

Wein ni yɔɔ kpulu lɛ mli lɛ tsu nii hu akɛ kaimɔ nɔ̃ ni tsɔɔ akɛ Yesu lá ni efɔse eshwie shi lɛ baafee nɔdaamɔ nɔ kɛha “eshaifaa,” koni egbele gbɛ kɛha mɛi ni nuɔ ni amɛyeɔ lɛ koni atsɛ amɛ kɛya ŋwɛi shihilɛ mli akɛ Kristo hefatalɔi gboshiniyelɔi. Shishinumɔ yɛ he akɛ, mɛi ni yɔɔ nɛkɛ ŋwɛi tsɛmɔ nɛɛ—yibɔ ko ni husu yɔɔ he lɛ—ji mɛi pɛ ni yeɔ aboloo lɛ ni amɛnuɔ wein lɛ yɛ Kaimɔ lɛ shishi.—Luka 12:32; Efesobii 1:13, 14; Hebribii 9:22; 1 Petro 1:3, 4.

Belɛ, yɛ Yesu sɛɛnyiɛlɔi fɛɛ ni fataaa kpaŋmɔ hee lɛ he lɛ agbɛfaŋ hu? Mɛnɛɛmɛi ji Nuŋtsɔ lɛ “tooi krokomɛi” lɛ, mɛi ni kpaaa gbɛ akɛ amɛkɛ Kristo baaye nɔ yɛ ŋwɛi, shi moŋ akɛ amɛbaaná naanɔ wala mli miishɛɛ yɛ paradeiso shikpɔŋ nɔ lɛ. (Yohane 10:16; Luka 23:43; Kpojiemɔ 21:3, 4) Ákɛ “asafo babaoo” ni ji Kristofoi anɔkwafoi ni ‘jáa Nyɔŋmɔ nyɔɔŋ kɛ shwane’ lɛ, amɛmii shɛɔ amɛhe akɛ amɛaafee mɛi ni yeɔ Nuŋtsɔ lɛ Gbɛkɛnaashi Niyenii lɛ he odase ni yɔɔ hiɛsɔɔ. No hewɔ lɛ, amɛtsɔɔ amɛwiemɔi kɛ nifeemɔi anɔ amɛjajeɔ akɛ: “Yiwalaheremɔ lɛ ji wɔ-Nyɔŋmɔ ni ta maŋtsɛsɛi lɛ nɔ lɛ, kɛ toobi lɛ nɔ̃!”—Kpojiemɔ 7:9, 10, 14, 15.

Shii Enyiɛ?

“Nyɛfea enɛ ni nyɛŋɔkai mi.”—Luka 22:19.

Shii enyiɛ esa akɛ aye Kaimɔ lɛ bɔni afee ni akɛbaa Kristo gbele lɛ kaimɔ lɛ yi? Yesu etsɔɔɔ mli fitsofitso. Shi kɛlɛ, akɛni Yesu to Nuŋtsɔ lɛ Gbɛkɛnaashi Niyenii lɛ ema shi yɛ Nisan gbi 14 ni ji Hehoo gbi jurɔ ni Israelbii lɛ ye lɛ afi fɛɛ afi lɛ gbɛkɛnaashi hewɔ lɛ, eka shi faŋŋ akɛ eyiŋtoo ji ni aye Kaimɔ lɛ yɛ nakai gbɛ nɔŋŋ nɔ. Yɛ be mli ni Israelbii lɛ ye amɛkpɔmɔ kɛmiijɛ Mizraim nomŋɔɔ mli lɛ he gbi jurɔ afi fɛɛ afi lɛ, Kristofoi yeɔ amɛkpɔmɔ kɛmiijɛ esha kɛ gbele nomŋɔɔ mli lɛ he gbi jurɔ afi fɛɛ afi.—2 Mose 12:11, 17; Romabii 5:20, 21.

Eka shi faŋŋ akɛ susumɔ ni ayɔɔ yɛ afi fɛɛ afi gbijurɔyeli ni akɛkaiɔ nifeemɔ ko ni sa kadimɔ waa lɛ he lɛ jeee nɔ ko hee. Ákɛ nɔkwɛmɔnɔ lɛ, susumɔ beni gbalashihilɛ mli hefatalɔi yeɔ amɛgbalashihilɛ mlibotemɔ gbi he gbi jurɔ aloo beni maŋ ko yeɔ nifeemɔ ko ni he hiaa waa yɛ eyinɔsane mli lɛ he gbi jurɔ lɛ he okwɛ. Bei babaoo lɛ atsuɔ gbijurɔyeli nifeemɔ lɛ he nii shikome yɛ afi mli yɛ nakai nifeemɔ lɛ gbi lɛ nɔ. Miishɛɛ sane ji akɛ, yɛ afii ohai abɔ ni ho yɛ Kristo gbele sɛɛ lɛ, atsɛ́ mɛi ni tsɛɔ amɛhe Kristofoi lɛ ateŋ mɛi babaoo akɛ Quartodecimans, ni shishi ji “Nyɔŋma kɛ Ejwɛ Tsɛmɛi,” ejaakɛ amɛye Yesu gbele lɛ kaimɔ lɛ he gbi jurɔ shikome yɛ afi mli, yɛ Nisan gbi 14 lɛ nɔ.

Ebɛ Haŋtsii Kɛlɛ Ehe Yɛ Sɛɛnamɔ

Bɔfo Paulo tsɔɔ mli akɛ, Nuŋtsɔ lɛ Gbɛkɛnaashi Niyenii lɛ he gbijurɔyeli ni Yesu kaselɔi lɛ kɛ amɛhe aaawo mli lɛ baaha ‘amɛjaje Nuŋtsɔ lɛ gbele lɛ amɛtsɔɔ.’ (1 Korintobii 11:26) No hewɔ lɛ, nɛkɛ gbijurɔyeli nɛɛ baakɔ gbɛfaŋnɔ ni mli wa waa ni Yesu tsu he nii kɛtsɔ egbele ni ekɛtsu Nyɔŋmɔ yiŋtoi ahe nii lɛ nɔ lɛ he diɛŋtsɛ.

Kɛtsɔ anɔkwa ni Yesu Kristo ye aahu kɛyashi gbele mli lɛ nɔ lɛ, ebu Yehowa Nyɔŋmɔ bem akɛ Bɔlɔ ni yɔɔ nilee kɛ suɔmɔ kɛ Nɔyelɔ ni ja. Yɛ nɔ ni tamɔɔɔ Satan naafolɔmɔi lɛ, kɛ agbɛnɛ ákɛ mɔ ni tamɔɔɔ Adam lɛ, Yesu tsɔɔ akɛ adesa baanyɛ aya nɔ aye Nyɔŋmɔ anɔkwa yɛ nɔnyɛɛi ni naa wawai po mli.—Hiob 2:4, 5.

Nuŋtsɔ lɛ Gbɛkɛnaashi Niyenii lɛ báa hiɛsɔɔ ni ayɔɔ kɛha Yesu suɔmɔ hetuu-kɛhamɔ lɛ hu yi. Yɛ kaai ni naa wawai fɛɛ sɛɛ lɛ, Yesu tee nɔ efee toiboo ni yeɔ emuu eha e-Tsɛ lɛ. No hewɔ lɛ, enyɛ ekɛ lɛ diɛŋtsɛ ewala ni yeɔ emuu lɛ ha kɛye Adam esha ni naa wa lɛ najiaŋ. Taakɛ Yesu diɛŋtsɛ tsɔɔ mli lɛ, eba “ni eŋɔ esusuma lɛ eha yɛ mɛi pii akpɔmɔ hewɔ.” (Mateo 20:28) No hewɔ lɛ, akɛ mɛi fɛɛ ni baahe Yesu nɔ aye lɛ ahe eshai baafa amɛ koni amɛná naanɔ wala taakɛ Yehowa shishijee yiŋtoo ji kɛha adesai lɛ.—Romabii 5:6, 8, 12, 18, 19; 6:23; 1 Timoteo 2:5, 6.a

Enɛɛmɛi fɛɛ maa Yehowa ekpakpafeemɔ ni fa babaoo kɛ mlihilɛ ni esaaa wɔ ni eyɔɔ kɛha wɔ kɛtsɔ gbɛjianɔ ni eto kɛha adesai awala námɔ lɛ nɔ lɛ nɔ mi. Biblia lɛ kɛɔ akɛ: “Enɛ mli Nyɔŋmɔ suɔmɔ ni ekɛsumɔɔ wɔ lɛ je kpo yɛ, akɛ Nyɔŋmɔ tsu lɛ diɛŋtsɛ ebi koome lɛ kɛba je lɛŋ, koni wɔtsɔ enɔ wɔna wala. Enɛ mli suɔmɔ lɛ yɔɔ: jeee akɛ wɔ ni wɔsumɔ Nyɔŋmɔ, shi moŋ akɛ lɛ ni esumɔ wɔ, ni etsu ebi lɛ akɛ ebafee wɔhe eshai lɛ ahe kpatamɔ nɔ̃.”—1 Yohane 4:9, 10.

Hɛɛ, mɛɛ gbijurɔyeli ni nɔ bɛ Kaimɔ lɛ ji nɛkɛ! Ebɛ haŋtsii ni eji nɔ ni abaanyɛ atsu he nii yɛ je lɛŋ he fɛɛ he yɛ shihilɛi srɔtoi ashishi, kɛlɛ, eji okadi nifeemɔ ko ni baaha mɛi ajwɛŋmɔ ahi nɔ be kpalaŋŋ.

Nɔ ni Etsɔɔ Kɛha Bo

Wɔ-Nuŋtsɔ Yesu Kristo gbele afɔleshaa lɛ sa ekɛ e-Tsɛ Yehowa fɛɛ he waa diɛŋtsɛ. Ákɛ nuu ni eye emuu lɛ, Yesu gbooo gbele ni wɔ fɛɛ wɔgboɔ akɛ gboshinii lɛ eko. (Romabii 5:12; Hebribii 7:26) Kulɛ ebaanyɛ eya nɔ ehi shi kɛya naanɔ. Kulɛ anyɛŋ akpata ehiɛ yɛ ekãa naa kɛji akɛ jeee lɛ ji mɔ ni ŋmɛ gbɛ. Ekɛɛ akɛ: “Mɔ ko shɔ̃ɔɔ [miwala] yɛ midɛŋ, shi moŋ mi diɛŋtsɛ miŋɔŋmɛɔ shi.”—Yohane 10:18.

Kɛlɛ, Yesu jɛ esuɔmɔ mli eŋɔ ewala ni eye emuu lɛ eha akɛ afɔleshaa nɔ̃ bɔni afee ni “etsɔ egbele nɔ ekpata mɔ ni yɔɔ gbele nɔ hewalɛ ni ji abonsam lɛ hiɛ, ni ekpɔ̃ mɛi ni gbele gbeyeishemɔ hewɔ lɛ amɛtsɔmɔ nyɔji yɛ amɛwala be fɛɛ mli lɛ.” (Hebribii 2:14, 15) Anaa Kristo suɔmɔ hetuu-kɛhamɔ ni ejie lɛ kpo lɛ hu yɛ gbele henɔ ni etuu ehe eha lɛ mli. Ele bɔ ni ebaapiŋ kɛ gbɛ nɔ ni ebaatsɔ egbo lɛ jogbaŋŋ diɛŋtsɛ.—Mateo 17:22; 20:17-19.

Kaimɔ lɛ haa wɔkaiɔ suɔmɔ ni fe fɛɛ ni ajie lɛ kpo pɛŋ ni wɔŋwɛi Tsɛ, Yehowa fee lɛ. Kwɛ bɔ ni ebaadɔ mɔ ni “mli tsɔ̃ɔ lɛ babaoo, ni emli jɔ hu” lɛ waa eha, akɛ eeena ni enu Yesu “bolɔmɔ ni naa wa kɛ yaafonui” lɛ yɛ Getsemane abɔɔ lɛ mli, kɛ epiŋmɔ gbele ni yɔɔ blɛoo lɛ. (Yakobo 5:11; Hebribii 5:7; Yohane 3:16; 1 Yohane 4:7, 8) Enɛ kɛkɛ po ni aaasusu he bianɛ, yɛ afii ohai abɔ sɛɛ lɛ, haa mɛi babaoo piŋɔ yɛ henumɔŋ.

Bɔɔ mɔdɛŋ ni osusu bɔ ni Yehowa Nyɔŋmɔ kɛ Yesu Kristo wo nyɔmɔ ni da tamɔ nɛkɛ amɛha wɔ ni wɔji eshafeelɔi lɛ he okwɛ! (Romabii 3:23) Daa gbi lɛ, wɔkɛ piŋmɔ ni jɛɔ wɔ eshafeemɔ su kɛ emuu ni wɔyeee lɛ mli kɛbaa lɛ kpeɔ. Shi kɛlɛ, yɛ Yesu kpɔmɔ afɔleshaa lɛ hewɔ lɛ, wɔbaanyɛ wɔkpa Nyɔŋmɔ fai kɛha eshaifaa. (1 Yohane 2:1, 2) Enɛ haa wɔnáa hegbɛ akɛ wɔɔná wiemɔ mli heyeli yɛ wɔkɛ Nyɔŋmɔ teŋ kɛ henilee ni he tse. (Hebribii 4:14-16; 9:13, 14) Nɔ ni fe fɛɛ lɛ, wɔbaanyɛ wɔná shihilɛ yɛ paradeiso shikpɔŋ nɔ kɛmiiya naanɔ he gbɛkpamɔ. (Yohane 17:3; Kpojiemɔ 21:3, 4) Enɛɛmɛi kɛ jɔɔmɔi krokomɛi babaoo ji nɔ ni jɛɔ Yesu hetuu-kɛhamɔ nifeemɔ ni fe fɛɛ lɛ mli kɛbaa.

Hiɛsɔɔ Kpo ni Wɔɔjie Wɔha Nuŋtsɔ lɛ Gbɛkɛnaashi Niyenii Lɛ

Ŋwanejee ko bɛ he akɛ Nuŋtsɔ lɛ Gbɛkɛnaashi Niyenii lɛ ji “Nyɔŋmɔ duromɔ ni yɔɔ . . . kɛteke nɔ” lɛ kpojiemɔ faŋŋ. Ni gbɛjianɔ ni Yehowa Nyɔŋmɔ to kɛha kpɔmɔ afɔleshaa—ni Yesu ha eba mli kɛtsɔ esuɔmɔ hetuu-kɛhamɔ nɔ lɛ—ji “enikeenii ni anyɛŋ agba” lɛ diɛŋtsɛ. (2 Korintobii 9:14, 15) Ani nɛkɛ ekpakpafeemɔ nifeemɔi ni Nyɔŋmɔ jie lɛ kpo etsɔɔ kɛtsɔ Yesu Kristo nɔ nɛɛ eteee hiɛsɔɔ ni mli wa ni sɛɛ tsɛɔ shi yɛ omli?

Wɔyɛ nɔmimaa akɛ amɛfeɔ nakai. No hewɔ lɛ, wɔkɛ suɔmɔ miifɔ̃ bo nine koni ofata Yehowa Odasefoi ahe kɛye Yesu gbele lɛ Kaimɔ lɛ he gbi jurɔ. Abaaye afi nɛɛ Kaimɔ lɛ Shɔ, April 16, beni hulu enyɔ shi sɛɛ. Yehowa Odasefoi ni yɔɔ okutso lɛ mli lɛ baaná he miishɛɛ akɛ amɛaaha ole be pɔtɛɛ kɛ he ni abaatsu nɛkɛ nifeemɔ ni he hiaa waa nɛɛ he nii yɛ.

[Shishigbɛ niŋmaa]

[Akrabatsa/Mfonirii ni yɔɔ baafa 6]

“ENƐ JI MIGBƆMƆTSO” ALOO “ENƐ TSƆƆ MIGBƆMƆTSO” TE NƆ NI JI?

Beni Yesu kɛɛ akɛ, ‘Mi ji shinaa lɛ’ kɛ akɛ, “Mi ji anɔkwa weintso” lɛ, no mli lɛ, mɔ ko mɔ ko eyasusuuu akɛ eji shinaa aloo weintso diɛŋtsɛ. (Yohane 10:7; 15:1, wɔma efã ko nɔ mi.) Nakai nɔŋŋ hu beni The New Jerusalem Bible lɛ tsɛ́ Yesu wiemɔ yisɛɛ ni ekɛɛ akɛ: “Nɛkɛ kpulu nɛɛ ji kpaŋmɔ hee” lɛ, wɔmuuu sane naa akɛ kpulu lɛ diɛŋtsɛ ji kpaŋmɔ hee lɛ. No hewɔ lɛ, beni ekɛɛ akɛ aboloo lɛ “ji” egbɔmɔtso lɛ, nakai nɔŋŋ ŋwanejee ko bɛ he akɛ aboloo lɛ miitsɔɔ egbɔmɔtso lɛ, aloo ehe okadi. No hewɔ lɛ, Charles B. Williams shishitsɔɔmɔ lɛ kɛɔ akɛ: “Enɛ damɔ shi kɛha migbɔmɔtso.”—Luka 22:19, 20.

[Mfoniri ni yɔɔ baafa 5]

Akpiti aboloo kɛ wein lɛ ji okadi nibii ni sa kɛha Yesu gbɔmɔtso ni esha bɛ he kɛ elá ni efɔse eshwie shi lɛ

[Mfoniri ni yɔɔ baafa 7]

Kaimɔ lɛ haa wɔkaiɔ suɔmɔ ni fe fɛɛ ni Yehowa Nyɔŋmɔ kɛ Yesu Kristo jie lɛ kpo amɛtsɔɔ lɛ