Nisan 14—Gbi Ni Akaiɔ
“Nyɛfea enɛ ni nyɛŋɔkai mi.”—1 KORINTOBII 11:24.
1. Te fee tɛŋŋ ni Yesu ye je lɛ nɔ kunim?
1 “NYƐTSUI anyɔa nyɛmli: miye je lɛ nɔ kunim.” Miishɛjemɔ kɛ hewalɛwoo wiemɔi ni tamɔ nɛkɛ Yesu kɛwaje ebɔfoi anɔkwafoi 11 lɛ yɛ gbɛkɛ ni enɔjetsɛremɔ egbo lɛ. Yesu ejie ehe kpo akɛ je lɛ nɔ kunimyelɔ! Ekɛ omanyeyeli eku mɔdɛŋ ni e-Henyɛlɔ, Satan Abonsam aaabɔ ni ekɛkumɔ anɔkwa ni eyeɔ Yehowa lɛ mli lɛ naa. Ni agbɛnɛ yɛ sɛŋmɔtso nɔ gbele ni ka ehiɛ yɛ ŋmlɛtswaa fioo ni baa nɛɛ mli hewɔ lɛ, eyɛ hekɛnɔfɔɔ akɛ ebaanyiɛ gbɛ ni enyiɛ nɔ ni ji anɔkwayeli kɛ emuuyeli mlihiɛmɔ gbɛ lɛ nɔ kɛyashi naagbee kwraa—Yohane 16:33; Hebribii 12:2.
2. Mɛni hewɔ Yesu to “Nuŋtsɔ lɛ gbɛkɛnaashi niyenii” lɛ?
2 Nɛkɛ je muu fɛɛ hiamɔ sane ni ba nɛɛ ba yɛ afii akpe kome, ohai nɛɛhu kɛ nyɔŋmai enumɔ kɛ enyɔ ni eho nɛ, yɛ Nisan, ni ji Yudafoi akalenda krɔŋkrɔŋ lɛ klɛŋklɛŋ nyɔŋ lɛ nɔ gbi ni ji 14. Nɛkɛ gbi nɛɛ baafee gbi ko ni enanemaahei asɛɛnyiɛlɔi ni amɛtu amɛhe amɛha lɛ lɛ ahiɛ kpaŋ nɔ gbi ko gbi ko. Bɔni afee ni ena nɔmimaa akɛ esɛɛnyiɛlɔi anɔkwafoi lɛ ekuŋ amɛhiɛ amɛshwieŋ nɔ ni nii ni baaba nɛɛ tsɔɔ lɛ nɔ lɛ, Yesu to gbɛkɛnaashi niyenii ko ni baafee kaimɔ nii krɛdɛɛ ko he gbɛjianɔ, ni bɔfo Paulo tsɔɔ mli akɛ eji “Nuŋtsɔ lɛ gbɛkɛnaashi niyenii.” Yɛ ŋwɛi hewalɛ naa lɛ Paulo tsɔɔ mli akɛ Yesu fa ekaselɔi ni yɔɔ jɛmɛ yɛ nakai be lɛ mli lɛ akɛ: “Nyɛyaa nɔ nyɛfea enɛ ni nyɛŋɔkai mi.” (1 Korintobii 11:20, 24, NW) Kɛ osusuɔ Yesu sɛɛnyiɛlɔ ni oooji lɛ he lɛ, belɛ ani ole nɔ hewɔ ni ekɛ nakai famɔ lɛ ha, nɔ ni ebiɔ yɛ odɛŋ akɛ ofee, kɛ nɔ ni wɔsɛɛ be baaji aha bo?
Gbi Ni Sa Kaimɔ
3. Mɛni hewɔ, ni mɛɛ shihilɛi amli afee Nisan 14 akɛ gbi ni akaiɔ klɛŋklɛŋ kwraa?
3 Enɛ jeee klɛŋklɛŋ be mli yɛ adesa yinɔsane mli ni akɛ Nisan 14 ema shi akɛ gbi ni akɛkaiɔ nɔ ko. Afi 1513 D.Ŋ.B. mli ni Yehowa tsɔ etsulɔ Mose nɔ efa Israelbii lɛ akɛ: “Nɛkɛ gbi nɛɛ [Nisan 14] atsɔ kaimɔ gbi ahanyɛ, ni nyɛye lɛ gbijurɔ nyɛha Yehowa nyɛ kɛ nyɛseshibii fɛɛ.” Mɛni ha aye nakai gbijurɔ lɛ yɛ nakai be lɛ mli lɛ? Yehowa diɛŋtsɛ ha hetoo: “Yehowa Hehoo lɛ afɔle ni, ejaakɛ beni etswia Mizraimbii lɛ anii lɛ, eho Israelbii lɛ ashiai lɛ ahe yɛ Mizraim.”—2 Mose 12:14, 27.
4. Mɛɛ saji otii kɔɔ Israel kpɔmɔ kɛmiijɛ Mizraim lɛ he?
4 Nakai kpɔmɔ ni yɔɔ gbeyei ni ba yɛ Mizraim ni kɔɔ Israel kromɔbii fɛɛ, gbɔmɔ kɛ koolo he lɛ ba mli yɛ Nisan 14 lɛ gbɛkɛ. Eji haomɔi sɔrɔtoi nɛɛhu ni etsɔ hiɛ lɛ naagbee nɔ̃ ni ekɛshiɔ daimonioi nyɔŋmɔi ni Mizraimbii lɛ jaa amɛ lɛ, ni ema Yehowa yiŋtoo ni etsɔ hiɛ ejaje etsɔɔ Farao henɔwolɔ lɛ nɔ mi: “Shi kɛlɛ enɛ hewɔ miha odamɔ shi, koni majie mihewalɛ kpo matsɔɔ bo, ni atsi migbɛi ata yɛ jeŋ fɛɛ.” Yɛ gbii fioo ko sɛɛ lɛ, ajie Yehowa gbɛi lɛ kɛ ehewalɛ lɛ kpo ekoŋŋ, beni ekpɔ Israelbii akpekpei abɔ kɛ futufutu gbɔmɛi asafo yuu ko yɛ Ŋshɔ Tsuru lɛ mli, ni no mli eha Farao asraafoi lɛ amli gbɔmɛi titrii lɛ shiu. Belɛ ebɛ naakpɛɛ mɔ akɛ Mose kɛ Israelbii lɛ la: “Mala maha Yehowa, ejaakɛ awo enɔ gojoo”!—2 Mose 9:16; 15:1, NW.
5. Hehoo gbijurɔyeli lɛ tsu mɛɛ yiŋtoo he nii?
5 Yɛ sɛɛ mli beni Israelbii lɛ ebahi shikpɔŋ ni akɛwo amɛ blematsɛ Abraham shi lɛ nɔ lɛ, amɛbaaya nɔ amɛye Hehoo lɛ yɛ maŋ muu lɛ fɛɛ mli daa afi shikome yɛ Yerusalem, yɛ toiboo ni yɔɔ famɔ ni yɔɔ 5 Mose 16:1-8 lɛ naa. No hewɔ lɛ Yehowa to akɛ Nisan 14 adamɔ shi yɛ be fɛɛ mli yɛ ewebii lɛ ajwɛŋmɔ mli. Mɛɛ yiŋtoo he nii enɛ baatsu? Ebaa fee gbi ni akɛbaawó Yehowa gbɛi lɛ nɔ, ni akɛkai eyiwalaheremɔ nifeemɔi wuji lɛ. No hewɔ lɛ, yɛ afii ohai babaoo sɛɛ lɛ, nɔ ni nɛkɛ Hehoo nɛɛ tsɔɔ lɛ baahi Yesu fɔlɔi ni akɛɛ wɔ akɛ “daa afi lɛ efɔlɔi lɛ yaa Yerusalem amɛyayeɔ Hehoo gbijurɔ” lɛ atsui kɛ jwɛŋmɔ mli yɛ be fɛɛ mli. Taakɛ Yudafoi akusum lɛ ji lɛ, amɛbi ni ji Yesu baafata amɛhe.—Luka 2:41, 42.
6. Mɛɛ yiŋtooi ahewɔ ni Yesu taoɔ waa akɛ ekɛ ebɔfoi anɔkwafoi lɛ aaaye Hehoo lɛ yɛ afi 33 Ŋ. B lɛ?
6 Yɛ Yesu baptisimɔ yɛ Yordan mli kɛ esɔɔmɔ lɛ shishijee lɛ sɛɛ lɛ, eka shi faŋŋ akɛ ebaaya nɔ ni ekɛ Maria, eshikpɔŋ nɔ nyɛ lɛ kɛ ebihii ni ji enyɛ bii lɛ aye Hehoo lɛ. Shi, Yesu to gbɛjianɔ akɛ ekɛ ebɔfoi 12 lɛ baaye Nisan 14, afi 33 Ŋ.B. niyenii lɛ. Luka sane lɛ kɛɔ wɔ bɔ ni Yesu nu nɛkɛ be nɛɛ he eha: “Taomɔ mitaoɔ akɛ mikɛnyɛ aye nɛkɛ Hehoo nɛɛ dani mana amanehulu!” (Luka 22:15) Mɛni hewɔ Yesu shweɔ enɛ pii nakai lɛ? Ejaakɛ ele nɔ ni nibii ni etsɛŋ ebaaba yɛ gbi ni sa kaimɔ ni eje shishi yɛ be mli ni hulu enyɔ shi lɛ tsɔɔ lɛ jogbaŋŋ. Yesu le hu akɛ nɛkɛ nibii ni baaba nɛɛ baada kwraa fe nɔ ni ba yɛ afi 1513 D.Ŋ.B. lɛ. Amɛbaawó Yehowa gbɛi lɛ nɔ gojoo fe be fɛɛ, ni no ji nɔ ni baafee shishitoo aha shikpɔŋ lɛ nɔ wekui fɛɛ ni aaajɔɔ amɛ yɛ naagbee. Agbɛnɛ, eyɛ saji pii ni ebaagba ekaselɔi lɛ dani egbo, koni ewo amɛ ekaa ni amɛhi shi akɛ esɛɛnyiɛlɔi anɔkwafoi. Nɔ ni aŋma yɛ Sanekpakpa lɛ mli lɛ ŋmɛɔ wɔ gbɛ koni wɔbo nɔ ni Yesu kɛɛ ni efee lɛ toi.—Yohane 12:31; 17:26.
Mɛni ba? Mɛni ji nɛ ni etsɔɔ?
7. (a) Mɛɛ nibii ni ba yɛ Yesu naagbee Hehoo niyenii lɛ yeli mli ha eto egbele lɛ Kaimɔ lɛ? (Yohane 13:1-30) (b) Tsɔɔmɔ gbɛ ni Yesu tsɔ nɔ eto Nuŋtsɔ lɛ Gbɛkɛnaashi Niyenii lɛ.
7 Yɛ be mli ni amɛyeɔ nii lɛ, Yesu te shi ni efɔ ekaselɔi lɛ anaji ahe, ni ekɛto okadi ni yeɔ emuu ni kɔɔ heshibaa he eha amɛ. Kɛkɛ ni Yesu kɛɛ, “Nyɛteŋ mɔ kome baatsɔɔ misɛɛ gbɛ.” Etsɛɛɛ kwraa ni etsɔ ehiɛ eha Yuda ni ekɛɛ, “Nɔ ni ofeɔ lɛ, feemɔ mra mra.” Yohane sane lɛ tee nɔ akɛ: “Eje kpo. Shi je ena.” (Yohane 13:21, 27, 30) Enɛ sɛɛ dani Yesu to egbele lɛ Kaimɔ lɛ. Nyɛhaa wɔboa bɔ ni Mateo ni kɛ ehiŋmɛi na nɔ ni tee nɔ lɛ tsɔɔ nɔ ni ba lɛ mli eha: “Shi beni amɛyeɔ nii lɛ, Yesu kɔ aboloo, ni ejɔɔ nɔ, ni ekumɔ mli, ni eŋɔha ekaselɔi lɛ, ni ekɛɛ: ‘Nyɛhea, nyɛyea! Enɛ damɔ shi kɛba migbɔmɔtso lɛ.’ Ni ewo kpulu lɛ, ni beni eda shi lɛ, eŋɔha amɛ ni ekɛɛ: ‘Nyɛ fɛɛ nyɛnua eko; ejaakɛ enɛ damɔ shi kɛha “milá ni ji kpaŋmɔ hee lɛ nɔ lɛ,” ni aaafɔse ashwie shi yɛ mɛi pii ahewɔ ha eshaifaa lɛ. Shi miikɛɛ nyɛ akɛ, minuŋ weintso yibii nɛɛ eko dɔŋŋ, kɛyashi gbi nɔ ni mikɛnyɛ aaanu lɛ ehee yɛ mi-Tsɛ maŋtsɛyeli lɛ mli. Ni beni amɛla yijiemɔ lala ko lɛ, amɛje kpo kɛtee Mugɔŋ lɛ nɔ.”—Mateo 26:26-30; kwɛmɔ Marko 14:22-26, Luka 22:19, 20, kɛ 1 Korintobii 11:23-26 hu.
8. Mɛni hewɔ ehe hiaa waa akɛ aaanu Yesu wiemɔi kɛ enifeemɔi ni ekɛto nɔ ni Kaimɔ lɛ tsɔɔ lɛ shishi lɛ shishi lɛ?
8 Nɔ ni Yesu kɛɛ ni efee yɛ nakai be lɛ mli lɛ he shishinumɔ diɛŋtsɛ ji mɛni? Paulo ma bɔ ni ehe hiaa akɛ Kristo sɛɛnyiɛlɔi fɛɛ ni afɔ amɛ mu lɛ aaale enɛ lɛ nɔ mi akɛ: “No hewɔ lɛ, mɔ fɛɛ mɔ ni yeɔ nɛkɛ aboloo nɛɛ ni enuɔ Nuŋtsɔ lɛ kpulu lɛ bɔ ni esaaa lɛ, eetɔ Nuŋtsɔ lɛ gbɔmɔtso lɛ kɛ elá lɛ nɔ.” Yɛ anɔkwale mli lɛ, mɛi ni afɔ amɛ mu lɛ ateŋ mɔ ko sumɔŋ ni efee ‘mɔ ni esaaa’ yɛ Yehowa hiɛ, ni nɔ ni baajɛ mli aba ji fɔbuu kojomɔ lɛ. Agbɛnɛ, “asafo babaoo” lɛ hu baasumɔ ni abu amɛ akɛ shwɛɛnii ni afɔ amɛ mu lɛ ananemɛi ni sa. No hewɔ lɛ, yɛ be mli ni Kaimɔ kroko baa yɛ Soo, April 4, 1985 lɛ, be eshɛ ni esa akɛ wɔ fɛɛ wɔku sɛɛ wɔsusu sane nɛɛ he ekoŋŋ fitsofitso.—1 Korintobii 11:27.
9. (a) Mɛni hewɔ Yesu wiemɔi ni afee lɛ, “Enɛ damɔ shi kɛha migbɔmɔtso lɛ” ja kwraa fe “Enɛ ji migbɔmɔtso lɛ”? (Kwɛmɔ shishi gbɛ niŋmaa.) (b) Mɛɛ shishinumɔ krɛdɛɛ Yesu kɛha aboloo lɛ? (d) Kɛha wein lɛ?
9 Yesu kɛɛ, “Enɛ damɔ shi kɛha migbɔmɔtso.”a Yesu kɛ shishinumɔ krɛdɛɛ ko ha nɔ ni aboloo lɛ damɔ shi kɛha lɛ yɛ nɛkɛ wiemɔi nɛɛ amli—eji lɛ diɛŋtsɛ eheloo gbɔmɔtso ni esha bɛ mli ni ekɛha “yɛ je lɛ wala hewɔ” lɛ he okadi. (Yohane 6:51) Nakai nɔŋŋ hu beni ewie yɛ kpulu ni wein yɔɔ mli lɛ he akɛ “enɛ damɔ shi kɛha mila ni ji kpaŋmɔ hee lɛ nɔ̃ lɛ, ni aaafɔse ashwie shi yɛ mɛi pii ahewɔ ha eshaifaa” Iɛ, no mli lɛ ekɛ wein ni ábuu loo etsɛ ni yɔɔ kpulu lɛ mli lɛ miitsu nii akɛ lɛ diɛŋtsɛ ela lɛ he okadi. Nɛkɛ lá nɛɛ ji nɔ ni abaadamɔ nɔ akɛ “eshaifaa” aha.—Mateo 26:28; Yeremia 31:31-33; Hebribii 9:22.
10. Mɛni ji nɔ ni aboloo lɛ yeli kɛ wein lɛ numɔ tsɔɔ?
10 Belɛ mɛni ji nɔ ni mɛi ni yeɔ aboloo lɛ ni amɛnuɔ wein lɛ yɛ Kaimɔ gbijurɔyeli lɛ shishi lɛ tsɔɔ? Nifeemɔ lɛ diɛŋtsɛ haa mɛi ni yeɔ lɛ kɛ mɛi ni kwɛɔ nɔ ni yaa nɔ lɛ leɔ akɛ ámɛna Kristo Yesu kpɔmɔ afɔleshaa lɛ he sɛɛ momo, shi yɛ gbɛ krɛdɛɛ ko nɔ ni kɛha yiŋtoo krɛdɛɛ ko. Te enɛ baa lɛ nakai ehaa tɛŋŋ? Yɛ amɛhemɔkɛyeli yɛ Kristo afɔleshaa lɛ kɛ amɛ he nɔ ni amɛjɔɔ amɛha Yehowa lɛ hewɔ lɛ, Nyɔŋmɔ kɛ Yesu adesa afɔleshaa lɛ jara lɛ tsuɔ amɛhe nii. Kɛha mɛɛ yiŋtoo? Koni abu amɛ akɛ adesai ni yeɔ emuu koni amɛna jalɛ shidaamɔ yɛ Nyɔŋmɔ hiɛ. Kɛkɛ lɛ Yehowa hu etsɔ emumɔ krɔŋkrɔŋ lɛ nɔ efɔ́ amɛ, kɛkɛ lɛ amɛbatsɔmɔ emumɔŋ bii. Agbɛnɛ hegbɛ baa akɛ amɛkɛ hegbɛ ni amɛyɔɔ akɛ amɛaahi shikpɔŋ nɛɛ nɔ lɛ aaasha afɔle ni amɛku sɛɛ amɛya ŋwɛi kɛha gboshiniyeli. Enɛɛmɛi fɛɛ etee nɔ momo dani amɛnaa Nuŋtsɔ lɛ gbɛkɛnaashi Niyenii lɛ mli gbɛfaŋnɔ lɛ.—Romabii 5:1, 2, 8; 8:15-17; Yakobo 1:18.
11, 12. (a) Mɛɛ nibii krokomɛi enyɔ hu wein lɛ numɔ tsɔɔ? (b) Tsɔɔmɔ kpaŋmɔ ni Yesu kɛ mɛi ni yɔɔ lɛ feɔ lɛ mli.
11 Agbɛnɛ susumɔ nɔ ni wein lɛ numɔ lɛ hu tsɔɔ lɛ he. Eyɛ mli akɛ Yehowa ebu emumɔŋ bii lɛ jalɔi ni eŋɔ amɛ akɛ ebii moŋ, shi amɛyɛ heloo ni yeee emuu lɛ mli lolo. Amɛbaanyɛ amɛfee esha ni amɛle enɛ. Wein lɛ ni amɛnuɔ lɛ haa amɛkpɛlɛɔ nɔ daa gbi akɛ esa akɛ amɛkɛ amɛhe afɔ Kristo Yesu lá lɛ “ni aaafɔse ashwie shi yɛ mɛi pii ahewɔ ha eshaifaa” lɛ nɔ gbi fɛɛ gbi.—1 Yohane 1:9, 10; 2:1.
12 Shi nɔ kroko hu yɛ ni wein lɛ numɔ tsɔɔ. Mɛi ni yeɔ eko lɛ yeɔ odase akɛ ahe amɛ awo “kpaŋmɔ hee” ni Yehowa jɛ jeeŋmɔ beebe egba he sane efɔ shi kɛtsɔ gbalɔ Yeremia nɔ lɛ mli. Nɛkɛ kpaŋmɔ nɛɛ bɔi nitsumɔ kɛtsɔ Yesu lá lɛ nɔ. Mɛi ni yɔɔ nɛkɛ kpaŋmɔ nɛɛ mli ji Yehowa Nyɔŋmɔ kɛ emumɔŋ bii ni amɛ fɛɛ amɛfeɔ mumɔŋ Israel lɛ. Nyɔŋmɔ ji mɔ ni hala amɛteŋ mɔ fɛɛ mɔ. Yesu ji nakai kpaŋmɔ lɛ Teŋdamɔlɔ, ni lɛ eyeɔ ebuaa 144,000 lɛ ni ji kpaŋmɔ lɛ mli bii lɛ ni amɛbafee Abraham seshi lɛ fii. (Yeremia 31:31-34; 2 Tesalonikabii 2:13; Hebribii 8:10, 12; 12:22-24; Galatabii 3:29) Mɛnɛɛmɛi hu ji mɛi ni Yesu ŋɔɔ amɛ ewoɔ ‘kpaŋmɔ kɛha maŋtsɛyeli’ lɛ mli lɛ. Nɔ ni jɛɔ mli baa ji akɛ yɛ naagbee lɛ amɛkɛ amɛ Maŋtsɛ Yesu Kristo baahi shi ni amɛkudɔ Yehowa jɔɔmɔi ni haa wala lɛ amɛha shikpɔŋ nɔ wekui fɛɛ.—Luka 22:28-30; Yohane 6:53; Kpojiemɔ 5:9, 10; 1 Mose 22:15-18.
13. Mɛni ji nibii ni esa akɛ akai yɛ Nisan 14 agbɛnɛ?
13 Yɛ anɔkwale mli lɛ, yɛ be mli ni wɔpɛiɔ shishinumɔ ni yɔɔ Yesu wiemɔi kɛha nakai gbi ni esa akɛ akai lɛ mli lɛ, enyɛɔ wɔ nɔ ni wɔkai Yehowa suɔmɔ ni ha eto gbɛjianɔ koni ekɛ esuɔmɔ Bi lɛ aha lɛ. Akaiɔ wɔ suɔmɔ ni Yesu yɔɔ ni ha ekɛ ewala ha akɛ kpɔmɔ kɛha adesai fɛɛ ni heɔ yeɔ lɛ. (Yohane 3:16; Romabii 5:8; 1 Timoteo 2:5, 6) Shi anɔkwalei komɛi yɛ ni jara wa waa ni Yesu kɛ esɛɛnyiɛlɔi lɛ susu he yɛ nakai gbɛkɛ lɛ. Biblia ŋmalɔi lɛ ateŋ mɔ pɛ ni ŋma nɛkɛ teemɔŋ sanegbaa nɛɛ ji Yohane.
Anunyam, Suɔmɔ kɛ Ekomefeemɔ
14. (a) Awoɔ Yehowa hiɛ nyam yɛ Kaimɔ gbijurɔyeli lɛ eko fɛɛ eko shishi yɛ mɛɛ gbɛ nɔ?(b) Mɛni suɔmɔ tsuɔ yɛ Yesu ni akaiɔ lɛ lɛ mli, mɛɔ he kaa-kɛ-kwɛmɔ esa aka enɛ atee lɛ shi yɛ mɛi fɛɛ ni naa mli gbɛfaŋnɔ lɛ ajwɛŋmɔi amli?
14 Yesu kɛɛ: “Agbɛnɛ awo gbɔmɔ bi lɛ hiɛ nyam, ni awo Nyɔŋmɔ hiɛ nyam yɛ emli.” (Yohane 13:31) Kɛjɛ be mli ni akpɔ Israel kɛjɛ Mizraim nɛɛ, akɛ Nisan 14 ekpɛtɛ Nyɔŋmɔ gbɛi lɛ bembuu, ejeŋ muu fɛɛ maŋtsɛyeli kɛ ehewalɛ he. Agbɛnɛ, akɛni Yesu eye anɔkwale kɛtee gbele mli, ni atsɔ Nyɔŋmɔ hewalɛ nɔ atee lɛ shi kɛtee anunyam mli hewɔ lɛ, akɛ anunyam kɛ woo babaoo miiba Nyɔŋmɔ gbɛi lɛ nɔ. (Okɛto Abɛi 27:11 he.) Yesu kɛɛ ekaselɔi lɛ akɛ amɛbaaye kaselɔi ni amɛji lɛ he odase kɛtsɔ “kpaŋmɔ hee” lɛ ni ji ‘ni amɛsumɔ amɛhe taakɛ bɔ ni esumɔ amɛ’ lɛ ni amɛaaye nɔ lɛ nɔ. (Yohane 13:34, 35) Wɔ nyɛmimɛi asuɔmɔ lɛ mlikwɔlɛ jieɔ wɔ hiɛsɔɔ kɛha suɔmɔ ni Yesu jie lɛ kpo etsɔɔ wɔ yɛ nakai be lɛ mli lɛ kpo.—1 Yohane 4:19.
15. (a) Mɛɛ wala he hiɛnɔkamɔ akɛmaa mɛi fɛɛ ni yeɔ yɛ gbɛ ni sa nɔ lɛ ahiɛ? (b) Mɛɛ gbɛ nɔ atsɔɔ ayeɔ suɔmɔ kɛha Yesu Iɛ he odase yɛ?
15 Hiɛnɔkamɔ akɛ be ko baaba ni amɛbaahi ŋwɛi shia ko mli lɛ ji miishɛɛ ni akɛma mɛi ni baafee Kristo hefatalɔi nɔyelɔi lɛ ahiɛ. (Kpojiemɔ 20:6) Yesu jie nɛkɛ hiɛnɔkamɔ nɛɛ kpo beni ekɛɛ: “Miiya ni miyasaa gbɛhe matonyɛ. . . . Mibaba ekoŋŋ ni mibabaŋɔnyɛ kɛya he ni mi diɛŋtsɛ miyɔɔ lɛ.” (Yohane 14:2-4) Mɛɛ shĩabaa po mɛɔ mɛi fɛɛ ni hiɔ shi akɛ anɔkwafoi kɛyashiɔ naagbee lɛ nɛkɛ! No hewɔ lɛ Yesu wo amɛ ŋaa akɛ, “Kɛji nyɛmiisumɔ mi lɛ nyɛaaye mikitai lɛ anɔ.” Enɛ tsɔɔ ekitai lɛ fɛɛ, ni kita akɛ atsɔɔ nii ni afee kaselɔi lɛ fata he.—Yohane 14:15, 21; Mateo 28:19, 20.
16. (a) Yesu ma ekomefeemɔ yɛ esɛɛnyiɛlɔi lɛ ateŋ lɛ nɔ mi yɛ mɛɛ gbɛ nɔ, ni mɛni hewɔ ekomefeemɔ nɛɛ he hiaa waa lɛ? (b) Esa akɛ Yesu sɛɛnyiɛlɔi lɛ fɛɛ kɛ mɛni akpe, ni mɛni yeɔ buaa amɔ ni amɛnyɛɔ amɛfeɔ enɛ?
16 Kwɛ bɔ ni ehe hiaa akɛ Yesu sɛɛnyiɛlɔi lɛ kɛ Iɛ kɛ amɛhe amɛhe hu aaahi shi yɛ ekomefeemɔ mli! Yesu kɛ weintso kɛ enɔ niji lɛ he abɛbua lɛ tsu nii ni ekɛma anɔkwasane nɛɛ nɔ mi. Nɔ ni jɛɔ ekomefeemɔ nɛɛ mli baa ji yibiiwoo, ni enɛ hu woɔ Tsɛ lɛ hiɛ nyam. (1 Korintobii 1:10; Yohane 15:1, 5, 8) Yiwaa kɛ shitee kɛ woo ka Yesu sɛɛnyiɛlɔi fɛɛ ahiɛ. Shi kwɛ bɔ ni ewoɔ wɔhemɔkɛyeli hewalɛ akɛ Yesu hiɛ emuuyeli mli akɛ je lɛ nɔ kunimyelɔ yɛ Satan tutuamɔi lɛ fɛɛ sɛɛ!—Yohane 15:18-20; 16:2, 33.
17. Wiemɔ nibii ni Yesu bi yɛ sɔlemɔ ni áŋma afɔ shi yɛ Yohane yitso 17 lɛ mli lɛ ekomɛi ahe.
17 Yesu kɛ nakai gbɛkɛ lɛ ba naagbee kɛ sɔlemɔ ko ni jɛ etsuiŋ ni ekɛfɔ e-Tsɛ lɛ hiɛ. E-tsɛ lɛ hiɛnyamwoo ji nɔ ni ye klɛŋklɛŋ gbɛhe yɛ esɔlemɔ lɛ mli. Esɔle akɛ abu esɛɛnyiɛlɔi lɛ ahe kɛjɛ mɔ fɔŋ, Satan Abonsam he, yɛ be mli ni amɛhiɔ shi akɛ mɛi ni ámɛtse amɛhe kɛjɛ je lɛ he lɛ. Ni esɔle hu akɛ nakai ekomefeemɔ ni suɔmɔ yɔɔ mli ni hi shi yɛ lɛ kɛ e-Tsɛ lɛ teŋ lɛ aya nɔ ada yɛ enanemaahei asɛɛnyiɛlɔi ni amɛyi faa be fɛɛ be Iɛ ateŋ.—Yohane yitso 17.
18. Kɛ wɔsusu gbɔmɛi ayibɔ ni ba Kaimɔ lɛ shishi yɛ 1984 lɛ he lɛ, mɛni hewɔ mɛi fioo ko pɛ ye Kaimɔ lɛ shishi nibii lɛ?
18 Wɔsusu anɔkwalei ni jara wawai kɛ Yesu wiemɔi ni ekɛ ekaselɔi lɛ wie yɛ nakai gbɛkɛ ni amrɔ nɛɛ aaafee afii 1,952 ni eho nɛ lɛ fioo ko he, shi kɛlɛ enɛ yeɔ ebuaa wɔ ni wɔnuɔ nɔ hewɔ ni Nisan 14 ji gbi ni sa kaimɔ lɛlɛŋ lɛ shishi. Belɛ ebɛ naakpɛɛ mɔ akɛ Yehowa Odasefoi kɛ amɛnanemɛi 7,416, 974 na bɔ ni ehe hiaa akɛ amɛaabua amɛhe naa kutuu ni amɛye Nuŋtsɔ lɛ Gbɛkɛnaashi Niyenii lɛ akɛ gbijurɔ yɛ nyɛsɛɛ afi ni ho lɛ mli. Ni kɛlɛ, mɛi 9,081 pɛ ye nakai niyenii lɛ eko yɛ nakai asafo babaoo lɛ fɛɛ mli. Mɛni hewɔ? Ejaakɛ Yehowa Odasefoi ni yɔɔ ŋmɛnɛ lɛ ateŋ mɛi ni faa naa amɛ diɛŋtsɛ amɛhe akɛ amɛfata “asafo babaoo” ni “damɔ maŋtsɛsɛi lɛ kɛ Toobi lɛ hiɛ” lɛ ahe. Mɛnɛɛmɛi miikpa gbɛ akɛ amɛbaahi shibɔlemɔ ŋulami Shikpɔŋ lɛ nɔ akɛ amɛ naanɔ shĩa, shi jeee ni amɛbaahi ŋwɛi, he ni 144,000 lɛ “kɛ lɛ [Kristo] baaye maŋtsɛ afii akpe” yɛ lɛ.—Kpojiemɔ 7:9; 20:6; Lala 37:11.
19. Mɛni kɛ nɔ ni abaadamɔ nɔ asusu nikasemɔ ni nyiɛ enɛ sɛɛ lɛ he lɛ baa, ni mɛni hewɔ ehe hiaa akɛ mɔ fɛɛ mɔ aba nikasemɔ lɛ shishi lɛ?
19 Shi sanebimɔi komɛi ete shi ni kɔɔ bɔ ni Nuŋtsɔ lɛ Gbɛkɛnaashi Niyenii lɛ kɔɔ “asafo babaoo” lɛ ni ji “tooi krokomɛi” lɛ ahe lɛ he. (Yohane 10:16) Belɛ etamɔ nɔ ni esa akɛ asusu nɛkɛ saji nɛɛ ahe yɛ nikasemɔ ni nyiɛ enɛ sɛɛ lɛ mli, bɔni afee ni shishinumɔ ko ni ejaaa akaba yɛ mɔ ko gbɛfaŋ yɛ be mli ni Kaimɔ gbijurɔyeli lɛ bɛŋkɛɔ lɛ.—1 Tesalonikabii 5:21.b
[Shishigbɛ niŋmai]
a Ajie kɛjɛ February 15, 1985 Watchtower lɛ mli.
b Biblia shishitsɔɔmɔi komɛi kaneɔ akɛ, “Enɛ ji migbɔmɔtso lɛ.” (Kwɛmɔ King James Version, Catholic Douay Version, The New English Bible, kɛ ŋmɛnɛŋmɛnɛ beaŋ shishitsɔɔmɔi komɛi.) Shi Hela wiemɔ ni akɛtsu nii kɛha “ji” lɛ ji e·stin, kɛ shishinumɔ akɛ eetsɔɔ, edamɔ shi kɛba nɔ ko. (Kwɛmɔ Mateo 26:26 shishigbɛ niŋmaa yɛ NW Ref. Bi.) Nakai Hela wiemɔ lɛ nɔŋŋ jeɔ kpo yɛ Mateo 9:13 kɛ 12:7 ni atsɔɔ shishi akɛ “enɛ shishi (ji) ” (KJ) kɛ “eshishi” (NE kɛ ŋmɛnɛŋmɛnɛ beaŋ shishitsɔɔmɔi krokomɛi amli) .
Ani Obaanyɛ Okai—
◻ Mɛi ni yeɔ Kaimɔ Iɛ niyenii lɛ eko lɛ?
◻ Saji ni he hiaa ni esa okɛ Kaimɔ lɛ kɛba wɔjwɛŋmɔ mli?
◻ Bɔ ni ayeɔ odase daa gbi okɛ okaiɔ Yesu?
◻ Sane titri ni kɔɔ Nisan 14 he yɛ be fɛɛ mli?