Be ni amɛshɛ abɔɔ fɛfɛo nɛɛ mli yɛ oliv tsei lɛ ateŋ lɛ, Yesu shi bɔfoi lɛ ateŋ mɛi kpaanyɔ yɛ sɛɛ. Eeenyɛ efee akɛ bɔfoi nɛɛ mɛ yɛ abɔɔ lɛ naa, ejaakɛ ekɛɛ amɛ akɛ: “Nyɛtaraa shi yɛ biɛ, miiya miyasɔle yɛ jɛmɛ.” Yesu ŋɔ bɔfoi lɛ etɛ​—Petro, Yakobo, kɛ Yohane​—kɛtee abɔɔ lɛ mligbɛ tɔ̃ɔ. Ehe jara lɛ waa, ni ekɛɛ bɔfoi etɛ lɛ akɛ: “Miwerɛ eho mihe waa, kɛyashi gbele mli tete. Nyɛhia biɛ, ni nyɛkɛ mi ayaa nɔ abua.”​—Mateo 26:36-38.

Be ni Yesu yɔɔ ŋwɛi lɛ, ena bɔ ni Romabii lɛ piŋɔ mɛi waa ni amɛgbeɔ amɛ lɛ. Amrɔ nɛɛ, akɛni Yesu ji adesa ni yɔɔ henumɔ ni nuɔ piŋmɔ hu he hewɔ lɛ, enyaaa nɔ ni ekɛbaakpe lɛ he. Shi nɔ ni fe fɛɛ lɛ, ehao waa ejaakɛ eena akɛ, gbe ni abaagbe lɛ tamɔ efɔŋfeelɔ kpanaku ko lɛ baagbe e-Tsɛ lɛ gbɛ́i he guɔ. Etsɛŋ kwraa, abaasɛŋ lɛ yɛ tso jaŋŋ nɔ oookɛɛ mɔ ko ni ebɔ musu eshi Nyɔŋmɔ.