Namɔ Sɔlemɔi Toi Aboɔ?

YEHOWA ji Nyɔŋmɔ ni haa sɔlemɔi ahetoo. Yɛ anɔkwale mli lɛ, e-Wiemɔ ni ji Biblia lɛ tsɛɔ lɛ, “sɔlemɔ Toibolɔ.” (Lala 65:​2, New World Translation) Eesumɔ ni eha sɔlemɔi ahetoo. Shi namɔ sɔlemɔi atoi eboɔ diɛŋtsɛ?

Nyɔŋmɔ haa aŋkroaŋkroi ni saa ehiɛ lɛ asɔlemɔi ahetoo. Amɛyɛ bulɛ kɛ gbeyeishemɔ su ni lalatsɛ ni wie nɛkɛ lɛ yɔɔ lɛ eko: “Bɔ ni ofrote shweɔ faai lɛ, nakai misusuma shweɔ bo, Naa-Nyɔŋmɔ. Nyɔŋmɔ ni ji Mawu hiɛkalɔ lɛ he kumai miiye misusuma.” (Lala 42:​2, 3) Ni kɛlɛ, mɛɛ odaseyeli yɔɔ ni tsɔɔ akɛ Yehowa haa enɔkwa jalɔi lɛ asɔlemɔi ahetoo?

Odaseyeli ni Tsɔɔ akɛ Nyɔŋmɔ Haa Sɔlemɔi Ahetoo

Saji babaoo yɛ ni aŋmala yɛ Biblia lɛ mli ni tsɔɔ akɛ Yehowa haa etsuji anɔkwafoi lɛ asɔlemɔi ahetoo. Akɛ nɔkwɛmɔ nɔ lɛ, beni Yuda Maŋtsɛ Yehoshafat sɔle kɛha jiemɔ lɛ, Nyɔŋmɔ bo esɔlemɔ lɛ toi ni eha eye kunim kɛtsɔ ehenyɛlɔi lɛ ni eha amɛgbegbee amɛhe lɛ nɔ. (2 Kronika 20:​1-26) Beni Maŋtsɛ Hezekia hu kɛ esraafoi ni he wa waa yaawuu lɛ, ekɛ heshibaa sɔle ebi Nyɔŋmɔ yelikɛbuamɔ. Hezekia na Yehowa yiwalaheremɔ beni ŋwɛibɔfo ko tswia Ashur asraafoi 185,000 nii egbe amɛ yɛ gbekɛ kome mli lɛ.​—Yesaia 37:​14-20, 36-38.

Mɛni hewɔ Nyɔŋmɔ ha nakai sɔlemɔi lɛ ahetoo lɛ? Maŋtsɛmɛi lɛ kpa fai yɛ saji enyɔ lɛ fɛɛ mli akɛ, kɛ aye amɛnɔ kunim lɛ eeegbe Yehowa gbɛi lɛ he guɔ. (2 Kronika 20:​6-9; Yesaia 37:​17-20) Amɛmiisusu egbɛi lɛ he. The International Standard Bible Encyclopedia lɛ kɛɔ akɛ: “Naagbee yiŋtoo ni yɔɔ sɔlemɔ sɛɛ lɛ jeee kɛha faikpalɔ hilɛ kɛkɛ, shi moŋ Nyɔŋmɔ gbɛi lɛ hiɛnyamwoo.” No hewɔ lɛ, Yehowa tsuji anɔkwafoi lɛ baanyɛ ana nɔmimaa akɛ eeeye ebua amɛ “yɛ egbɛi lɛ hewɔ.” Nɔ ni aŋmala ashwie shi ni yeɔ odase akɛ aha sɔlemɔi nɛɛ ahetoo lɛ haa Nyɔŋmɔ webii naa hekɛnɔfɔɔ akɛ eboɔ amɛsɔlemɔi lɛ atoi.​—Lala 91:​14, 15; 106:8; Abɛi 18:⁠10.

Shi kɛji akɛ shihilɛi komɛi po kɔɔ Yehowa gbɛi lɛ he lɛ, Nyɔŋmɔ kpɛɔ eyiŋ akɛ eeebo sɔlemɔi komɛi atoi loo eboŋ toi. Ekolɛ eyɛ yiŋtoo ni ja hewɔ ni eboŋ sɔlemɔi komɛi atoi lɛ. Kɛ wɔnuɔ he akɛ abooo wɔsɔlemɔi atoi lɛ, eeefee nɔ ni hi akɛ wɔɔsusu nɔ hewɔ ni eyɔɔ nakai lɛ he.

Nɔ Hewɔ ni Ahaaa Sɔlemɔi Komɛi Ahetoo Lɛ

Yehowa kɛɛ Israelbii lɛ yɛ be ko mli akɛ: “Kɛ nyɛsɔle babaoo tete lɛ, miboŋ nyɛ toi.” Ni yɛ be mli ni etsɔɔ yiŋtoo hewɔ ni efeŋ nakai lɛ, etee nɔ akɛ: “Nyɛniji ahe eyimɔ kɛ la.” (Yesaia 1:15) Te aaafee tɛŋŋ ni mɔ ko aaaku ehiɛ eshwie Yehowa mlai anɔ ni mɔ lɛ ana hegbɛ akɛ eeebo lɛ toi hu? Biblia mli abɛbua ko kɛ hetoo ni mli ka shi faŋŋ haa, akɛ: “Mɔ ni jieɔ etoi yɛ mla toiboo nɔ lɛ, esɔlemɔ tete lɛ nihii nii ni.”​—Abɛi 28:⁠9.

Biblia lɛ kɛ yiŋtoo kroko ni tsɔɔ nɔ hewɔ ni abooo sɔlemɔi komɛi atoi haa, beni ekɛɔ akɛ: “Nyɛkpaa fai hu, ni nyɛnaaa, ejaakɛ fai fɔŋ nyɛkpaa, koni nyɛkpata nii lɛ ahiɛ yɛ nyɛkɔnɔi lɛ amli.” (Yakobo 4:⁠3) Dabi, Yehowa haŋ sɔlemɔi ni akɛbaatsu akɔnɔi fɔji ahe nii lɛ ahetoo. Esa akɛ wɔkai hu akɛ Nyɔŋmɔ booo adesa ko famɔ toi. Lɛ ji Mɔ ni kpɛɔ eyiŋ yɛ bɔ ni eeeha wɔsɔlemɔi ahetoo lɛ he.

Yɛ anɔkwale mli lɛ sɔlemɔi ni Nyɔŋmɔ baaha hetoo ji nɔ ni jɛɔ tsui krɔŋŋ mli, kɛ yiŋtoo kpakpa, yɛ gbɛ ni etsɔɔ​—kɛtsɔ Yesu Kristo nɔ lɛ nɔ. (Yohane 14:​6, 14) Shi mɛi ni anaa nɛkɛ taomɔ nii nɛɛ yɛ amɛsɔlemɔi ahe lɛ po enu he yɛ bei komɛi amli akɛ abooo amɛ toi. Mɛni hewɔ Nyɔŋmɔ haŋ etsuji asɔlemɔi komɛi ahetoo amrɔ nɔŋŋ lɛ?

Yehowa le be ni hi jogbaŋŋ ni ekɛaaha sɔlemɔi ahetoo. Eyɛ mli akɛ gbekɛnuu ko baanyɛ abi baisikel moŋ, shi etsɛ heŋ eko ehaŋ lɛ aahu kɛyashi be mli ni gbekɛ lɛ aaada bɔ ni sa ni eeenyɛ eta nɔ ni epilaŋ ehe. Abaanyɛ akɛɛ nakai nɔŋŋ yɛ mɛi ni sumɔɔ Nyɔŋmɔ lɛ ateŋ mɛi komɛi asɔlemɔi ahe. Akɛni ele nɔ ni hi fe fɛɛ kɛha amɛ hewɔ lɛ, ekɛ nɔ ni ataoɔ lɛ haa yɛ be ni sa jogbaŋŋ mli.

Ni kɛlɛ, Yehowa webii anine shɛɛɛ nɔ fɛɛ nɔ ni amɛsɔleɔ amɛbiɔ lɛ nɔ. Akɛni amɛyeee emuu hewɔ lɛ, ekolɛ amɛbaabi nibii komɛi ni ehiii haaa amɛ. Amɛŋwɛi Tsɛ ni yɔɔ suɔmɔ lɛ haŋ amɛ nii ni baaye amɛ awui, ejaakɛ lɛ ji “duromɔ nii kpakpai fɛɛ kɛ nikee nii ni hi kɛwula shi” lɛ a-Halɔ. (Yakobo 1:17) Nakai nɔŋŋ hu Nyɔŋmɔ kɛ nɔ ko ni he ehiaaa yɛ ehiɛ lɛ haŋ. (Okɛto 2 Korintobii 12:​7-10 he.) Ehaa sɔlemɔi ni kɛ esuɔmɔnaa nifeemɔ kɛ eyiŋtoo kɛha ewebii lɛ kpaa gbee lɛ ahetoo.​—1 Yohane 5:​14, 15.

“Abo” Yesu “’Toi”

Yesu Kristo ji nuu ni sɔleɔ. (Mateo 6:​9-13; Yohane 17:​1-26) Eyɛ hekɛnɔfɔɔ ni yeɔ emuu akɛ eŋwɛi Tsɛ lɛ baabo lɛ toi ni eha esɔlemɔi lɛ ahetoo. Yesu kɛɛ be ko akɛ: “Ataa, . . . mile akɛ daa oboɔ mi toi.” (Yohane 11:​41, 42) Shi ani Yesu hiɛnɔkamɔ efeee yaka yɛ eshikpɔŋ nɔ nitsumɔ lɛ naagbee kwraa lɛ? Ani ebolɔɔɔ akɛ: “Mi-Nyɔŋmɔ, mi-Nyɔŋmɔ, mɛɛba okwa mi?”​—Mateo 27:⁠46.

Beni Yesu wie nakai wiemɔi lɛ, no mli lɛ eka shi faŋŋ akɛ eeha gbalɛ ni kɔɔ egbele lɛ he lɛ aba mli. (Lala 22:⁠2) Yesu kɛ nakai kɛɛmɔ hu baanyɛ atsɔɔ akɛ Yehowa ejie E-hebuu lɛ fioo ni eŋmɛ gbɛ koni e-Bi lɛ agbo gbele ni piŋmɔ kɛ hiɛgbele yɔɔ mli koni ekɛka emuuyeli mli ni ehiɛ lɛ ekwɛ kɛyashi naagbee. Nibii ni tee nɔ yɛ nakai naagbee gbi yɛ Yesu shikpɔŋ nɔ shihilɛ be lɛ mli lɛ mlipɛimɔ tsɔɔ akɛ Nyɔŋmɔ bo esɔlemɔi lɛ atoi.

Yesu sɔle yɛ Getsemane abɔɔ lɛ mli yɛ gbɛkɛ ni amɔ lɛ lɛ. Ekpa fai shii etɛ akɛ: “Mi-Tsɛ, kɛji aaaho lɛ, ha ni kpulu nɛɛ aho mihe aya.” (Mateo 26:​39, 42, 44) Yesu jeee mɔ ni shashaoɔ shi akɛ ekɛ ewala aaafɔ shi akɛ kpɔmɔ nɔ eha adesai ni heɔ yeɔ. Dabi, shi moŋ eka shi faŋŋ akɛ eesusu ahorabɔɔ ni aaaba e-Tsɛ ni esumɔɔ lɛ waa lɛ gbɛi lɛ nɔ kɛtsɔ sɛŋmɔtso nɔ gbele akɛ musubɔlɔ ni alomɔ lɛ lɛ nɔ lɛ he. Ani Yehowa bo Yesu sɔlemɔ lɛ toi?

Afii pii sɛɛ lɛ, bɔfo Paulo ŋma akɛ: “Mɔ hu ni eheloo gbii lɛ amli lɛ, eŋɔ sɔlemɔi kɛ faikpamɔi ni bolɔmɔ ni naa wa kɛ yaafonui fata he esha afɔle eha mɔ ni yɔɔ hewalɛ ni ekɛaahere lɛ kɛaajɛ gbele mli lɛ, ni ebo lɛ toi hu, ejaakɛ ebuɔ Nyɔŋmɔ.” (Hebribii 5:7; Luka 22:​42, 44) Hɛɛ, “abo” Yesu “toi hu” yɛ piŋmɔ gbɛkɛ ni tsɔ egbele lɛ hiɛ lɛ mli. Shi yɛ mɛɛ gbɛ nɔ?

Yehowa tsu ŋwɛibɔfo ko kɛba ni “ebajie ehe kpo etsɔɔ [Yesu] ni ewo lɛ hewalɛ.” (Luka 22:43) Akɛni awo lɛ hewalɛ hewɔ lɛ, Yesu nyɛ edamɔ gbele naa yɛ sɛŋmɔtso lɛ nɔ. Eka shi faŋŋ akɛ, Yehowa ma nɔ mi kɛha lɛ akɛ egbele yɛ sɛŋmɔtso nɔ lɛ kɛ ahorabɔɔ baŋ gbɛi krɔŋkrɔŋ lɛ nɔ shi moŋ no baafee nɔ krɛdɛɛ ni yɛ naagbee lɛ akɛbaatsu nii ni akɛbu gbɛi lɛ bem. Yɛ anɔkwale mli lɛ, Yesu gbele yɛ sɛŋmɔtso nɔ lɛ gbele gbɛ kɛha Yudafoi lɛ, ni kulɛ alomɔ amɛ yɛ Mla lɛ shishi lɛ, koni ahere amɛyiwala kɛjɛ gbele fɔbuu mli.​—Galatabii 3:​11-13.

Gbii etɛ sɛɛ lɛ, Yehowa tee Yesu shi, ni eha eye bem kɛjɛ naafolɔmɔ ko ni ji musubɔɔ ni akɛaaba enɔ lɛ mli kɛtsɔ enɔ ni ewo kɛtee ŋwɛi gbɛhe ko ni kwɔ mli lɛ nɔ. (Filipibii 2:​7-11) Mɛɛ naakpɛɛ gbɛ po atsɔ nɔ aha Yesu sɔlemɔ ni kɔɔ “kpulu lɛ” he lɛ hetoo nɛkɛ! Aha nakai sɔlemɔ lɛ hetoo yɛ Yehowa diɛŋtsɛ gbɛ nɔ. Ni Yesu nine shɛ jɔɔmɔi ni yɔɔ naakpɛɛ anɔ ejaakɛ ekɛɛ eŋwɛi Tsɛ lɛ akɛ: “Jeee bɔ ni mi misumɔɔ lɛ, shi moŋ bɔ ni bo osumɔɔ.”​—Luka 22:⁠42.

Bɔ Ni Yehowa Haa Sɔlemɔi Ahetoo Ŋmɛnɛ

Taakɛ Yesu fee lɛ, esa akɛ mɛi ni taoɔ ni amɛsa Yehowa hiɛ ŋmɛnɛ lɛ abi ni Yehowa suɔmɔnaa nii aba mli be fɛɛ be. Esaaa akɛ amɛnaa hemɔkɛyeli akɛ Yehowa baaha amɛsɔlemɔi ahetoo yɛ gbɛ ni he aaaba sɛɛnamɔ aha amɛ babaoo nɔ. Yɛ anɔkwale mli lɛ, ‘ebaafee babaoo kɛteke nii ni amɛbiɔ loo amɛsusuɔ he lɛ.’​—Efesobii 3:⁠20.

Kristofonyo obalayoo fioo ko ni kɛ efɔlɔi ni heee yeee lɛ hi shi lɛ na anɔkwale ni nakai ŋmalɛ lɛ ji lɛ mli niiashikpamɔ. Akɛɛ lɛ yɛ wolo ko ni jɛ Buu Mɔɔ Asafo lɛ ŋɔɔ lɛ mli akɛ etsɔ sɔlemɔ nɔ esusu kpɛlɛmɔ ni eeenyɛ ekpɛlɛ maŋsɛɛ sanekpakpa shiɛmɔ nitsumɔ krɛdɛɛ nɔ lɛ he. Eyɛ mli akɛ nɔ ni eshweɔ yɛ etsui mli ji ni ehi shia ni eye ebua efɔlɔi lɛ ni amɛtsɔmɔ Kristofoi moŋ, shi ebi Nyɔŋmɔ yɛ sɔlemɔ mli akɛ: “Mɛni ji osuɔmɔnaa nii? Ani no ji akɛ mikpɛlɛ ninefɔɔ nɛɛ nɔ ni mifɔlɔi ashitee-kɛ-woo kɔɔɔ he eko, aloo osuɔmɔnaa nii ji ni miye mibua mifɔlɔi kɛtsɔ amɛmasɛi ni mahi lɛ nɔ?” Be fɛɛ be ni eeesɔle lɛ, ehenilee kɛɔ lɛ akɛ ekpɛlɛ ninefɔɔ lɛ nɔ. Ekpɛ eyiŋ akɛ enɛ ji hetoo ni jɛ Yehowa ŋɔɔ.

Nyɔŋmɔ waje nɛkɛ yoo nɛɛ koni ekɛ ehe akpɛtɛ eyiŋkpɛɛ lɛ he. Beni akɛɛ lɛ akɛ eya Awaji Ŋshɔkpɔ lɛ nɔ yɛ Japan lɛ, efɔlɔi lɛ ahe jɔ̃ amɛhe ni amɛwo shitee-kɛ-woo lɛ mli la. Shi akɛni amɛnyɛɛɛ ni amɛtsɔ eyiŋ ni etsake ejwɛŋmɔ hewɔ lɛ, enyɛ kpɛ eyiŋ akɛ ebaakase Biblia lɛ ni ekwɛ nɔ hewɔ ni ebiyoo lɛ kpɛ eyiŋ nɛkɛ lɛ. Nyɔji etɛ sɛɛ lɛ, efɔlɔi lɛ yasara lɛ. Beni amɛna bɔ ni Yehowa Odasefoi krokomɛi lɛ kwɛɔ enɔ jogbaŋŋ ha lɛ, ena etsɛ nɔ hewalɛ waa ni efo yɛ be mli ni mɔ ko enaaa lɛ lɛ. Etsɛɛɛ ni lɛ hu eje Biblia lɛ kasemɔ shishi. Yɛ be ni sa mli lɛ, abaptisi obalayoo nɛɛ fɔlɔi enyɔ lɛ fɛɛ ni amɛje shishi amɛsɔmɔ Yehowa yɛ anɔkwayeli mli. Ani Yehowa ejɔɔɔ Kristofonyo yoo nɛɛ kɛtekeee nɔ?

Ahaa Amɛ Sɔlemɔi lɛ Ahetoo

Ani okaiɔ yoo ni atsi eta yɛ sane ni tsɔ hiɛ lɛ mli lɛ wiemɔi lɛ? Enako henumɔ ko akɛ aaha esɔlemɔi ahetoo da. Shi yɛ sɛɛ mli lɛ eyoo akɛ Nyɔŋmɔ miiha esɔlemɔi lɛ ahetoo. Yoo lɛ eŋmala esɔlemɔi lɛ amli saji otii lɛ eshwie shi. Gbi ko lɛ egbele wolo ni eŋmalaa enɛɛmɛi yɛ mli lɛ mli ni eyoo akɛ Yehowa ebo sɔlemɔi lɛ pii toi, nɔ ni lɛ diɛŋtsɛ lɛ ehiɛ ekpa nɔ lɛ po! Kɛkɛ ni ena ele akɛ Nyɔŋmɔ miikwɛ enɔ ni eeha esɔlemɔi lɛ ahetoo yɛ mlijɔlɛ gbɛ ni haa ehe baa sɛɛnamɔ kɛhaa lɛ babaoo nɔ.

Kɛ onuɔ he akɛ ahaaa esɔlemɔi ahetoo lɛ, bi ohe akɛ: ‘Ani wekukpaa ko ka mikɛ Yehowa, “sɔlemɔi a-Toibolɔ” lɛ teŋ? Kɛ jeee nakai lɛ, ani miito gbɛjianɔ ni makase ehe nii ni matsɔ etsuji ni ejɔɔ amɛhe nɔ lɛ ateŋ mɔ kome?’ Ehaa mɛi ni sumɔɔ lɛ ni amɛfeɔ esuɔmɔnaa nii lɛ asɔlemɔi ahetoo. ‘Amɛhiɛɔ sɔlemɔ mli daa,’ ni aboɔ amɛ toi hu, taakɛ eji yɛ Yesu he lɛ. (Romabii 12:12) No hewɔ lɛ ‘fɔsemɔ otsui oshwie Yehowa hiɛ’ ni ofee esuɔmɔnaa nii. (Lala 62:⁠9) Kɛkɛ lɛ abaabo osɔlemɔi lɛ atoi.

Ŋmɛnɛ, gbɔmɛi akpekpei abɔ miisɔle kɛmiiha nɔ ko krɛdɛɛ ko. Hɛɛ, ni aabo amɛsɔlemɔi lɛ atoi. Nyɛhaa wɔkwɛa nɔ hewɔ ni wɔbaanyɛ wɔna nɔmimaa akɛ abaabo sɔlemɔi ni tamɔ nɛkɛ toi lɛ.