Yitso 118

Sɛɛgbɛtsɔɔmɔ kɛ Mɔmɔ

JE ENA ni nyɔɔŋ teŋ eho beni Yuda nyiɛɔ asafo babaoo ko ni asraafoi, osɔfonukpai, Farisifoi, ni mɛi krokomɛi fata he lɛ ahiɛ kɛbaa Getsemane trom lɛ mli lɛ. Osɔfoi lɛ ekpɛlɛ nɔ akɛ amɛbaawo Yuda nyɔmɔ ni ji jwiɛtɛi kukuji 30 koni etsɔɔ Yesu sɛɛ gbɛ.

Beni atsɔ hiɛ ashwie Yuda kɛjɛ Hehoo niyenii lɛ shishi lɛ sɛɛ lɛ, no mli lɛ eka shi faŋŋ akɛ etee osɔfonukpai lɛ aŋɔɔ momo. Kɛkɛ ni amɛbua amɛ diɛŋtsɛ amɛ sɔɔlɔi lɛ anaa, kɛ asraafoi akuu ko hu. Ekolɛ klɛŋklɛŋ lɛ Yuda nyiɛ amɛhiɛ kɛtee he ni Yesu kɛ ebɔfoi lɛ ye Hehoo niyenii lɛ yɛ lɛ. Akɛni eyoo akɛ amɛshi jɛmɛ hewɔ lɛ, asafo babaoo lɛ ni hiɛ tawuu nii kɛ kanei kɛ jatɛŋi lɛ nyiɛ Yuda sɛɛ kɛje kpo kɛjɛ Yerusalem kɛfo Kidron Jɔɔ lɛ.

Yɛ be mli ni Yuda nyiɛɔ gbɔmɛi asafo babaoo lɛ ahiɛ kɛkwɔɔ Mu Gɔŋ lɛ, no mli lɛ ele he ni ebaana Yesu yɛ lɛ jogbaŋŋ. Otsi ni tsɔ hiɛ lɛ mli, yɛ be mli ni Yesu kɛ ebɔfoi lɛ faa gbɛ kɛyaa kɛbaa yɛ Betania kɛ Yerusalem teŋ lɛ, yɛ be babaoo mli lɛ amɛwaa yɛ Getsemane trom lɛ mli ni amɛjɔɔ amɛhe ni amɛgbaa sane. Shi agbɛnɛ, akɛni ekolɛ duŋ kpii eha Yesu he yɛ mu tsei lɛ ashishi hewɔ lɛ, te aaafee tɛŋŋ ni asraafoi lɛ aaayoo lɛ? Ekolɛ amɛnako lɛ da po. No hewɔ lɛ Yuda kɛ okadi lɛ ha, akɛ: “Mɔ naa ni mashɔ lɛ, lɛ ni; nyɛmɔa lɛ; ni nyɛkpalaa lɛ kɛyaa shweshweeshwe.”

Yuda nyiɛ asafo babaoo lɛ hiɛ kɛtee trom lɛ mli, ni ena Yesu kɛ ebɔfoi lɛ, ni etee hiɛ tɛ̃ɛ kɛtee eŋɔɔ. Ni ekɛɛ lɛ akɛ: “Oshwiee, Rabi!” Ni eshɔ enaa blɛoo.

Kɛkɛ ni Yesu bi lɛ akɛ: “Naanyo, mɛni feemɔ oba yɛ biɛ?” Kɛkɛ ni yɛ be mli ni ehaa lɛ diɛŋtsɛ esanebimɔ lɛ hetoo lɛ, Yesu kɛɛ: “Yuda, okɛ naashɔmɔ miitsɔɔ gbɔmɔ Bi lɛ sɛɛ gbɛ?” Shi enɛ fa kɛha esɛɛgbɛtsɔɔlɔ lɛ! Yesu fa enane kɛtee ehiɛ, kɛtee jatɛŋi ni tsoɔ kɛ kanei lɛ ateŋ ni ebi akɛ: “Namɔ nyɛtaoɔ?”

Amɛha hetoo akɛ, “Yesu, Nazarenyo lɛ.”

Yesu ha hetoo akɛ, “Mi nɛ,” yɛ be mli ni ekɛ ekaa damɔ amɛ fɛɛ amɛhiɛ lɛ. Akɛni nɛkɛ ekaafeemɔ nɛɛ ha amɛnaa kpɛ amɛhe ni amɛleee nɔ ni amɛbaafee dɔŋŋ hewɔ lɛ, hii lɛ tee sɛɛsɛɛ ni amɛyagbeegbee shi.

Yesu kɛ mlijɔlɛ wie akɛ: “Mikɛɛ nyɛ akɛ miŋ; no hewɔ lɛ, kɛji mi nyɛtaoɔ lɛ, nyɛhaa mɛnɛɛmɛi ayaa.” Be fioo ko dani enɛ aaaba, beni amɛyɔɔ ŋwɛitsu lɛ nɔ lɛ, Yesu ekɛɛ e-Tsɛ yɛ sɔlemɔ mli akɛ ekwɛ ebɔfoi anɔkwafoi lɛ anɔ ni amɛteŋ mɔ ko mɔ ko elaajeee, “ja laajemɔ bi lɛ.” No hewɔ lɛ, bɔni afee ni ewiemɔ lɛ aba mli lɛ, ebi ni aha esɛɛnyiɛlɔi lɛ aya.

Beni asraafoi lɛ nyɛ amɛte shi amɛdamɔ amɛnaji anɔ ekoŋŋ ni amɛbɔi Yesu fiimɔ lɛ, bɔfoi lɛ yoo nɔ ni miihe aba lɛ. Amɛbi lɛ akɛ: “Nuŋtsɔ, wɔbamɔ klante lo?” Dani Yesu aaaha hetoo lɛ, Petro ni hiɛ klantei enyɔ ni bɔfoi lɛ kɛba lɛ ekome lɛ tutua Malko, ni ji osɔfonukpa lɛ tsulɔ lɛ. Petro klante lɛ shɛɛɛ osɔfonukpa lɛ tsulɔ lɛ yitso nɔ shi eho he kɛyafo eninejurɔ toi.

Yesu kɛ ehe wo mli ni ekɛɛ, ‘Enɛ fa.’ Kɛkɛ ni ekɔ toi lɛ ni ekɛta ni etsa fala lɛ. Kɛkɛ ni etsɔɔ amɛ nikasemɔ ko ni he hiaa waa, ni efa Petro akɛ: “Ŋɔɔ oklante lɛ oto etoohe; ejaakɛ mɛi fɛɛ ni kɔlɔɔ klante lɛ, klante nɔŋŋ akɛaakpata amɛhiɛ. Aloo osusuɔ akɛ minyɛŋ mi-Tsɛ fai makpa ni amrɔ nɛɛ nɔŋŋ eha mi ŋwɛibɔfoi fe asafoi nyɔŋma kɛ enyɔ?”

Yesu miisumɔ ni amɔ lɛ, ejaakɛ etsɔɔ mli akɛ: “Shi no lɛ te aaafee tɛŋŋ ni Ŋmalɛi lɛ aaaba mli, akɛ ja afee nɛkɛ nɔŋŋ?” Kɛkɛ ni ekɛfata he akɛ: “Ani kpulu ni mi-Tsɛ eŋɔha mi lɛ, mikanu?” Ekɛ Nyɔŋmɔ suɔmɔnaa nifeemɔ kɛha lɛ lɛ kpaa gbee kwraa!

Kɛkɛ ni Yesu wie etsɔɔ asafoi lɛ. Ebi amɛ akɛ: “Mi mɔmɔ nyɛba tamɔ amɔɔ ojotswalɔ ko, kɛ klante kɛ tsei nɛɛ. Mitaa sɔlemɔwe lɛ daa mitsɔɔ nii, ni nyɛmɔɔɔ mi. Shi afee enɛ fɛɛ, koni nii ni gbalɔi lɛ ŋma lɛ aba mli.”

Kɛkɛ ni asraafoi akuu lɛ kɛ tatsɛ lɛ kɛ Yudafoi anukpai lɛ mɔ Yesu ni amɛfimɔ lɛ. Ni yɛ be mli ni bɔfoi lɛ na enɛ lɛ, amɛshi Yesu ni amɛjo foi. Shi obalanyo ko—ekolɛ eeenyɛ efee kaselɔ Marko—hi asafo lɛ teŋ. Ekolɛ eyɛ shia ni Yesu kɛ amɛ ye Hehoo lɛ yɛ mli lɛ mli ni yɛ sɛɛ mli lɛ enyiɛ asafoi lɛ asɛɛ kɛjɛ jɛmɛ. Shi ayoo lɛ, ni abɔ mɔdɛŋ koni amɔ lɛ. Shi eshi eklala atade ni ewo lɛ yɛ esɛɛ ni ejo foi. Mateo 26:47-56; Marko 14:43-52; Luka 22:47-53; Yohane 17:12; 18:3-12.

▪ Mɛni hewɔ Yuda na nɔmimaa akɛ ebaana Yesu yɛ Getsemane trom lɛ mli lɛ?

▪ Mɛɛ gbɛ nɔ Yesu tsɔɔ yɛ akɛ esusuɔ ebɔfoi lɛ ahe?

▪ Mɛni Petro fee koni ekɛfa Yesu he, shi mɛni Yesu kɛɛ Petro yɛ enɛ he?

▪ Mɛɛ gbɛ nɔ Yesu jie lɛ kpo faŋŋ akɛ ekɛ Nyɔŋmɔ suɔmɔnaa nii kɛha lɛ lɛ kpaa gbee kwraa yɛ?

▪ Beni bɔfoi lɛ shi Yesu lɛ, namɔ shwɛ, ni mɛni ba enɔ?