Yitso 119

Akɛ lɛ Tee Hana Ŋɔɔ, No Sɛɛ lɛ Kaiafa Ŋɔɔ

ANYIƐ Yesu ni afimɔ lɛ tamɔ awuiyelɔ ko kɛkɛ lɛ hiɛ kɛmiiya tsutsu osɔfonukpa Hana, ni ale lɛ waa lɛ hiɛ. Beni Yesu ha rabifoi tsɔɔlɔi lɛ anaa kpɛ amɛhe yɛ sɔlemɔ we lɛ beni eji gbekɛnuu ni eye afii 12 lɛ, no mli lɛ Hana ji osɔfonukpa. Yɛ sɛɛ mli lɛ, Hana bihii lɛ ateŋ mɛi pii sɔmɔ akɛ osɔfonukpai, ni amrɔ nɛɛ eshaanuu Kaiafa ji mɔ ni hiɛ nakai gbɛhe lɛ.

Ekolɛ anyiɛ Yesu hiɛ kɛtee Hana shia lɛ klɛŋklɛŋ kwraa yɛ bɔ ni nakai osɔfonukpa lɛ he gbɛi waa yɛ Yudafoi ajamɔ shihilɛ mli lɛ hewɔ. Nɛkɛ wa ni amɛwa ni amɛyana Hana nɛɛ ha Osɔfonukpa Kaiafa na be ni ekɛbua Sanhedrin loo Akuashɔŋ, ni ji Yudafoi asaneyeli he wulu fe fɛɛ ni emlibii feɔ mɛi 71 lɛ naa, koni agbɛnɛ ebua amale odasefoi hu anaa.

Agbɛnɛ osɔfonukpa Hana bi Yesu ekaselɔi lɛ kɛ etsɔɔmɔ lɛ ahe saji. Shi kɛlɛ, Yesu ha hetoo ni ekɛɛ lɛ akɛ: “Faŋŋ miwieɔ yɛ mitsɔɔ je lɛ. Daa nɛɛ mitsɔɔ nii yɛ kpee hei lɛ kɛ sɔlemɔ we lɛ, he ni Yudafoi lɛ fɛɛ kpeɔ yɛ lɛ, ni miwieee nɔ ko nɔ ko yɛ dujiaŋ. Mɛɛba obiɔ mi moŋ? Bi mɛi ni baboɔ mi toi lɛ nɔ ni mikɛɔ amɛ; naa, mɛnɛɛmɛi le nii ni mikɛɔ lɛ.”

Beni ewie nɛkɛ lɛ, tsuji ni damɔ Yesu masɛi lɛ ateŋ mɔ kome gba ehiɛ ma, ni ekɛɛ: “Hetoo ni ohaa osɔfonukpa lɛ nɛ?”

Yesu ha lɛ hetoo akɛ: “Kɛji mikɛɛ efɔŋ ko lɛ, ye efɔŋ lɛ he odase, shi kɛ ekpakpa ni lɛ, mɛɛ hewɔ oyiɔ mi mɔ?” Yɛ enibimɔ nɛɛ sɛɛ lɛ, Hana ha afimɔ lɛ kɛ kpai ni akɛ lɛ tee Kaiafa ŋɔɔ.

Yɛ nɛkɛ be nɛɛ mli lɛ, agbɛnɛ osɔfonukpai lɛ fɛɛ kɛ maŋ onukpai lɛ kɛ woloŋmalɔi lɛ, hɛɛ, Sanhedrin muu lɛ fɛɛ, ebɔi amɛhe naabuamɔ. Eka shi faŋŋ akɛ amɛkpee he ji Kaiafa shia lɛ. Shi kɛlɛ, eyɛ faŋŋ akɛ ni amɛaakojo mɔ ko yɛ nakai Hehoo gbi lɛ gbɛkɛ lɛ teɔ shi ewoɔ Yudafoi amla lɛ. Shi enɛ etsiii jamɔ mli hiɛnyiɛlɔi lɛ anaa yɛ amɛyiŋtoo fɔŋ lɛ he nitsumɔ mli.

Otsii fioo ni eho, beni Yesu tee Lazaro shi kɛjɛ gbohii ateŋ lɛ, no mli lɛ Sanhedrin lɛ ekpɛ mli yɛ amɛteŋ momo po akɛ esa akɛ egbo. Ni agbɛnɛ gbii enyɔ pɛ ni tsɔ be nɛɛ hiɛ, ni ji Shɔ lɛ, jamɔ mli onukpai lɛ yakpe ni amɛkpɛ amɛyiŋ akɛ amɛbaatsɔ ŋaa gbɛ nɔ ni amɛmɔ Yesu ni amɛgbe lɛ. Susumɔ he okwɛ, abu lɛ gbele fɔ momo dani akojo lɛ!

Agbɛnɛ amɛmiibɔ mɔdɛŋ ni amɛnine ashɛ odasefoi ni baaye amale odase amɛshi lɛ lɛ nɔ koni amɛna sane ko amɛkɛshi Yesu. Shi kɛlɛ, amɛnaaa odasefoi ni kɛ odaseyeli ni amɛkɛshiɔ lɛ lɛ kpaa gbee. Yɛ naagbee lɛ, mɛi enyɔ ba ni amɛbakɛɛ: “Wɔ diɛŋtsɛ wɔnu ni ekɛɛ akɛ: ‘Mi lɛ makumɔ sɔlemɔ tsu nɛɛ ni akɛ niji fee lɛ, ni gbii etɛ mli lɛ, mama ekroko ni jeee niji akɛfee.’ ”

Ni Kaiafa bi lɛ akɛ: “Otooo he eko? Mɛɛ odase mɛnɛɛmɛi yeɔ yɛ ohe nɛɛ?” Shi Yesu fee dioo ni etswaaa esɛŋ. Ni yɛ be mli ni amɛmaleɔ kɛfolɔɔ enaa po lɛ, odasefoi lɛ anaafolɔmɔi lɛ kɛ amɛhe kpaaa gbee, ni enɛ ha Sanhedrin lɛ hiɛ gbo waa diɛŋtsɛ. No hewɔ lɛ osɔfonukpa lɛ tao ŋaa gbɛ kroko ni ebaatsɔ nɔ.

Kaiafa le bɔ ni Yudafoi lɛ nuɔ he waa amɛhaa yɛ mɔ ko ni kɛɔ akɛ eji Nyɔŋmɔ Bi diɛŋtsɛ lɛ he lɛ jogbaŋŋ. Yɛ shii enyɔ ni amɛka lɛ lɛ fɛɛ mli lɛ, amɛkɛ oyaiyeli tsɛɔ Yesu akɛ musubɔlɔ ni sa gbele, ni yɛ be lɛ ekome mli po lɛ, amɛkɛ tɔmɔ susu akɛ eekɛɛ akɛ ekɛ Nyɔŋmɔ yeɔ egbɔ. Kɛkɛ ni agbɛnɛ Kaiafa tsɔ ŋaa ni ebi lɛ akɛ: “Mina Nyɔŋmɔ, hiɛkalɔ lɛ, akɛ, kɛji bo ji Kristo, Nyɔŋmɔ bi lɛ, kɛɛmɔ wɔ!”

Bɔ fɛɛ bɔ ni Yudafoi lɛ susuɔ kɔɔɔ he eko, Yesu ji Nyɔŋmɔ Bi lɛ lɛlɛŋ. Ni ni eeefee dioo ni etswaaa esɛŋ lɛ baaha akɛɛ yɛ gbɛ ni ejaaa nɔ akɛ ekpɛlɛɛɛ nɔ akɛ lɛ ji Kristo lɛ. No hewɔ lɛ Yesu kɛ ekaafeemɔ ha hetoo akɛ: “Mi ni; ni nyɛaana gbɔmɔ Bi lɛ akɛ eta hewalɛ lɛ ninejurɔ nɔ ni eeba yɛ ŋwɛi atatui lɛ amli.”

Ni ewie nɛkɛ lɛ, Kaiafa gbala ehe etadei yɛ nifeemɔ ko ni yɔɔ naakpɛɛ mli, ni ekɛɛ: “Ebɔ musu! Mɛni wɔsaa wɔtaoɔ odasefoi wɔfee dɔŋŋ? Naa, agbɛnɛ nyɛnu emusubɔɔ lɛ. Te nyɛsusuɔ tɛŋŋ?”

Ni Sanhedrin lɛ here nɔ akɛ: “Esa gbele!” Kɛkɛ ni amɛbɔi ehe fɛoyeli, ni amɛwie musubɔɔ wiemɔi pii amɛshi lɛ. Amɛgbala ehiɛ mai ni amɛfɛ̃ lajɔ amɛshwie ehiɛ. Mɛi krokomɛi tsimɔ ehiɛ fɛɛ ni amɛmamɔ lɛ atswɛrɛ ni amɛkɛ hefɛoyeli kɛɛ lɛ akɛ: “Kristo, gbaa otsɔɔ wɔ. Namɔ ji mɔ ni yio lɛ?” Nɛkɛ efɔŋfeemɔ, kɛ nifeemɔ ni mla fiii sɛɛ nɛɛ fɛɛ ba mli yɛ nyɔɔŋteŋ kojomɔ lɛ mli. Mateo 26:57-68; 26:3, 4; Marko 14:53-65; Luka 22:54, 63-65; Yohane 18:13-24; 11:45-53; 10:31-39; 5:16-18.

▪ Nɛgbɛ akɛ Yesu tee klɛŋklɛŋ, ni mɛni ba enɔ yɛ jɛmɛ?

▪ Kɛjɛ jɛmɛ lɛ, nɛgbɛ ekoŋŋ akɛ Yesu tee, ni yɛ mɛɛ yiŋtoo hewɔ?

▪ Mɛɛ gbɛ nɔ Kaiafa tsɔ ni enyɛ eha Sanhedrin lɛ jaje akɛ Yesu sa gbele yɛ?

▪ Mɛɛ efɔŋfeemɔ, kɛ nifeemɔ ni mla fiii sɛɛ tee nɔ yɛ kojomɔ lɛ mli?