Yehowa Mumɔŋ Sɔlemɔtsu Kpeteŋkpele Lɛ
“Nɛkɛ osɔfonukpa wɔyɔɔ, . . . he krɔŋkrɔŋ lɛ kɛ anɔkwa buu lɛ ni Nuntsɔ [Yehowa] diɛŋtsɛ shi ni jeee gbɔmɔ ko shi lɛ mli sɔɔlɔ.”—HEBRIBII 8:1, 2.
1. Mɛɛ gbɛjianɔ ni suɔmɔ yɔɔ mli Nyɔŋmɔ to kɛha adesai eshafeelɔi?
YEHOWA NYƆŊMƆ jɛ suɔmɔ kpele ni eyɔɔ kɛha adesai lɛ mli ekɛ afɔleshaa hã koni ejie je lɛ he eshai kɛya. (Yohane 1:29; 3:16) Enɛ bi ni ejie ekromɔ Bi lɛ wala kɛjɛ ŋwɛi kɛbawo Yudanyo obalayoo foro ni atsɛɔ lɛ Maria fɔmɔ kotoku mli. Yehowa bɔfo lɛ tsɔɔ mli jogbaŋŋ eha Maria akɛ bi ni ebaahiɛ lɛ musu lɛ, ‘aaatsɛ lɛ krɔŋkrɔŋ, Nyɔŋmɔ Bi.’ (Luka 1:34, 35) Akɛɛ Yosef, ni etsɛ Maria he baa ni ekɛ lɛ baahi shi lɛ, Yesu hɔ-ŋɔɔ ni yɔɔ naakpɛɛ lɛ, ni ebale akɛ lɛ “ebaahere emaŋ lɛ yiwala kɛjɛ amɛhe eshai lɛ amli.”—Mateo 1:20, 21.
2. Mɛni Yesu fee beni eye aaafee afii 30, ni mɛni hewɔ?
2 Beni Yesu daa lɛ, eka shi faŋŋ akɛ enu anɔkwa saji ni kɔɔ efɔmɔ yɛ naakpɛɛ gbɛ nɔ nɛɛ he lɛ ekomɛi ashishi. Ele akɛ eŋwɛi Tsɛ lɛ yɛ yiwalaheremɔ nitsumɔ ko kɛha lɛ ni ebaatsu yɛ shikpɔŋ nɔ. No hewɔ lɛ, beni etsɔ nuu diɛŋtsɛ ni eye aaafee afii 30 lɛ, Yesu ba Nyɔŋmɔ gbalɔ Yohane ŋɔɔ, koni ebaptisi lɛ yɛ Yordan Faa lɛ mli.—Marko 1:9; Luka 3:23.
3. (a) Mɛni Yesu kɛ wiemɔi “Afɔle kɛ nikeenii lɛ osumɔɔɔ” lɛ tsɔɔ? (b) Mɛɛ nɔkwɛmɔ nɔ fɛfɛo Yesu fee efɔ̃ shi eha mɛi fɛɛ ni miisumɔ ni amɛtsɔmɔ ekaselɔi lɛ?
3 Beni abaptisiɔ Yesu lɛ, no mli lɛ eesɔle. (Luka 3:21) Eka shi faŋŋ akɛ, kɛjɛ eshihilɛ mli be nɛɛ nɔ kɛyaa lɛ, eha wiemɔi ni yɔɔ Lala 40:7-9 lɛ ba mli, taakɛ bɔfo Paulo tsɔɔ mli yɛ sɛɛ mli lɛ, akɛ: “Afɔle kɛ nikeenii lɛ osumɔɔɔ, shi gbɔmɔtso osaa oha mi.” (Hebribii 10:5) Enɛ hewɔ lɛ, Yesu kɛ enɛ tsɔɔ akɛ ele akɛ Nyɔŋmɔ “sumɔɔɔ” ni aya nɔ akɛ kooloi ashã afɔle yɛ Yerusalem sɔlemɔtsu lɛ mli dɔŋŋ. Yɛ no najiaŋ lɛ, eyoo akɛ Nyɔŋmɔ esaa adesa gbɔmɔtso ni eye emuu eha lɛ, Yesu, koni ekɛha akɛ afɔleshaa nɔ. Enɛ baajie kooloi afɔleshaai ahiamɔ lɛ fɛɛ kɛjɛ jɛmɛ. Beni etsɔɔ bɔ ni ejɛɔ etsui mli ebaa ehe shi ehaa Nyɔŋmɔ suɔmɔnaa nifeemɔ lɛ, Yesu tee nɔ esɔle akɛ: “Naa, miba, aŋma mihe sane yɛ wolokpo lɛ mli, ni mibafee bo, Nyɔŋmɔ, osuɔmɔnaa nii lɛ.” (Hebribii 10:7) Kwɛ ekaa kɛ hetuu-kɛhamɔ ni pɛsɛmkunya bɛ mli he nɔkwɛmɔ nɔ fɛfɛo ni Yesu fee efɔ̃ shi nakai gbi lɛ, kɛha mɛi fɛɛ ni baatsɔmɔ ekaselɔi yɛ sɛɛ mli lɛ!—Marko 8:34.
4. Nyɔŋmɔ tsɔɔ akɛ ekpɛlɛ Yesu he ni ekɛha lɛ nɔ yɛ mɛɛ gbɛ nɔ?
4 Ani Nyɔŋmɔ kpɛlɛ Yesu baptisimɔ sɔlemɔ lɛ nɔ? Wɔha Yesu bɔfoi ni ehala lɛ ateŋ mɔ kome aha wɔ hetoo: “Ni beni abaptisi Yesu lɛ, ejɛ nu lɛ mli amrɔ eje kpo; ni naa, agbele ŋwɛi naa aha lɛ, ni ena Nyɔŋmɔ mumɔ lɛ miikpeleke shi tamɔ okpo kɛmiiba enɔ. Ni naa, gbee ko jɛ ŋwɛi kɛɛ: ‘Mɔnɛ ji misuɔmɔ bi ni mina ehe tsui lɛ.’ ”—Mateo 3:16, 17; Luka 3:21, 22.
5. Mɛni akɛ sɔlemɔtsu diɛŋtsɛ lɛ mli afɔleshaa latɛ lɛ fee he mfoniri?
5 Kpɛlɛmɔ ni Nyɔŋmɔ kpɛlɛ Yesu gbɔmɔtso ni ekɛha kɛha afɔleshaa lɛ nɔ lɛ tsɔɔ akɛ, yɛ mumɔŋ shishinumɔ naa lɛ, afɔleshaa latɛ ko ni da fe nɔ ni hi Yerusalem sɔlemɔtsu lɛ mli lɛ eje kpo faŋŋ. Afɔleshaa latɛ diɛŋtsɛ ni akɛ kooloi shwieɔ nɔ kɛha afɔleshaa lɛ fee nakai mumɔŋ afɔleshaa latɛ, ni yɛ naagbee lɛ eji Nyɔŋmɔ “suɔmɔnaa nii” loo gbɛjianɔtoo kɛha Yesu adesa wala ni ekɛha akɛ afɔleshaa nɔ lɛ nɔkpɛlɛmɔ lɛ he mfoniri. (Hebribii 10:10) No hewɔ ni bɔfo Paulo nyɛ eŋma enanemɛi Kristofoi akɛ: “Wɔyɛ afɔleshaa latɛ ko ni mɛi ni sɔmɔɔ yɛ buu [loo, sɔlemɔtsu] lɛ mli lɛ bɛ hegbɛ akɛ amɛyeɔ enɔ nii.” (Hebribii 13:10) Yɛ wiemɔ kroko mli lɛ, anɔkwa Kristofoi náa afɔleshaa ni nɔ kwɔ, ni kpataa haa esha, ni Yudafoi osɔfoi lɛ ateŋ mɛi pii kpoo lɛ he sɛɛ.
6. (a) Mɛni baje kpo faŋŋ yɛ Yesu baptisimɔ be lɛ mli? (b) Mɛni ji sabala Mesia, loo Kristo lɛ shishi?
6 Mumɔ krɔŋkrɔŋ ni akɛfɔ Yesu mu lɛ tsɔɔ akɛ, agbɛnɛ Nyɔŋmɔ kɛ emumɔŋ sɔlemɔtsu gbɛjianɔtoo muu lɛ ema shi kwraa, ni Yesu miisɔmɔ akɛ Osɔfo Nukpa. (Bɔfoi lɛ Asaji 10:38; Hebribii 5:5) Akɛ mumɔ tsirɛ kaselɔ Luka ni etsɔɔ afi pɔtɛɛ ni nɛkɛ nifeemɔ ni sa kadimɔ waa nɛɛ ba mli lɛ akɛ “Kaisare Tiberio maŋtsɛyeli afi ni ji nyɔŋma kɛ enumɔ lɛ mli.” (Luka 3:1-3) No kɛ afi 29 Ŋ.B. nyiɛɔ pɛpɛɛpɛ—ni ji otsii 69 ni feɔ afii, loo afii 483, kɛjɛ be mli ni Maŋtsɛ Artashasta kɛ famɔ ha akɛ ayasaa atswa Yerusalem gbogboi lɛ ekoŋŋ lɛ. (Nehemia 2:1, 5-8) Taakɛ gbalɛ lɛ tsɔɔ lɛ, “mɔ ni afɔ lɛ mu ni ji lumɔ” lɛ baapue yɛ nakai afi ni agba afɔ̃ shi lɛ nɔ. (Daniel 9:25) Eka shi faŋŋ akɛ Yudafoi pii le enɛ. Luka bɔɔ amaniɛ akɛ “maŋ lɛ hiɛ kã” Mesia lɛ, loo Kristo lɛ, ni ji sabalai ni jɛ Hebri kɛ Hela wiemɔi amli, ni fɛɛ hiɛ shishinumɔ kome, ni ji “mɔ ni afɔ lɛ mu” lɛ puemɔ lɛ “nɔ.”—Luka 3:15.
7. (a) Mɛɛ be Nyɔŋmɔ fɔ “He Krɔŋkrɔŋ Fe Fɛɛ” lɛ mu, ni mɛni enɛ tsɔɔ? (b) Mɛni hu ba Yesu nɔ yɛ ebaptisimɔ be lɛ mli?
7 Yɛ Yesu baptisimɔ be lɛ mli lɛ, afɔ Nyɔŋmɔ ŋwɛi shihilɛ he lɛ mu, loo akɛma afã, akɛ “he krɔŋkrɔŋ fe fɛɛ” yɛ mumɔŋ sɔlemɔtsu kpeteŋkpele lɛ he gbɛjianɔtoo lɛ mli. (Daniel 9:24) “Anɔkwa buu lɛ [loo, sɔlemɔtsu], ni Nuntsɔ [Yehowa] diɛŋtsɛ shi ni jeee gbɔmɔ ko shi lɛ” ebɔi nitsumɔ. (Hebribii 8:2) Agbɛnɛ hu, kɛtsɔ ebaptisimɔ kɛ nu kɛ mumɔ krɔŋkrɔŋ lɛ nɔ lɛ, abafɔ gbɔmɔ Yesu Kristo ekoŋŋ akɛ Nyɔŋmɔ mumɔŋ Bi. (Okɛto Yohane 3:3 he.) Enɛ tsɔɔ akɛ yɛ be ni sa mli lɛ, Nyɔŋmɔ baatsɛ e-Bi lɛ kɛku sɛɛ kɛya ŋwɛi wala mli ekoŋŋ, ni ebaasɔmɔ yɛ e-Tsɛ ninejurɔ nɔ akɛ Maŋtsɛ kɛ Osɔfo Nukpa kɛya naanɔ “yɛ Melkizedek gbɛjianɔ lɛ naa.”—Hebribii 6:20; Lala 110:1, 4.
Ŋwɛi He Krɔŋkrɔŋ Fe Fɛɛ Lɛ
8. Mɛɛ shishinumɔi heei Nyɔŋmɔ maŋtsɛsɛi ni yɔɔ ŋwɛi lɛ ebana agbɛnɛ?
8 Yesu baptisimɔ gbi lɛ nɔ lɛ, Nyɔŋmɔ ŋwɛi maŋtsɛsɛi lɛ baná shishinumɔi heei. Nɔ ni ataoɔ ni ji adesa afɔleshaa ni eye emuu koni akɛkpata aha je lɛ he eshai lɛ ma Nyɔŋmɔ krɔŋkrɔŋ feemɔ, kɛji akɛto adesa he esha he lɛ nɔ mi. Ema Nyɔŋmɔ mɔbɔnalɛ hu nɔ mi, ejaakɛ etsɔɔ akɛ agbɛnɛ ekpɛlɛ nɔ akɛ asaa akɛ lɛ teŋ, loo akpãtã lɛ. Enɛ hewɔ lɛ, Nyɔŋmɔ maŋtsɛsɛi ni yɔɔ ŋwɛi lɛ ebatsɔ tamɔ sɔlemɔwe lɛ mli tsu ni yɔɔ mligbɛ fe fɛɛ, he ni osɔfonukpa lɛ kɛ kooloo la boteɔ shikome yɛ afi mli koni ekɛkpata eha esha lɛ, yɛ mfoniri feemɔ gbɛ nɔ.
9. (a) Mɛni muhɔɔ ni yɔɔ He Krɔŋkrɔŋ lɛ kɛ He Krɔŋkrɔŋ Fe Fɛɛ lɛ fee he mfoniri? (b) Yesu nyɛ etsɔ̃ Nyɔŋmɔ mumɔŋ sɔlemɔtsu lɛ mli muhɔɔ lɛ mli kɛtee yɛ mɛɛ gbɛ nɔ?
9 Muhɔɔ ni foɔ He Krɔŋkrɔŋ lɛ kɛ He Krɔŋkrɔŋ Fe Fɛɛ lɛ teŋ lɛ feɔ Yesu heloo gbɔmɔtso lɛ he mfoniri. (Hebribii 10:19, 20) Eji gbɛtsii nii ni haaa Yesu anyɛ ayapue yɛ e-Tsɛ hiɛ beni eji gbɔmɔ yɛ shikpɔŋ lɛ nɔ lɛ. (1 Korintobii 15:50) Yɛ Yesu gbele beaŋ lɛ, “sɔlemɔtsu lɛŋ muhɔɔ lɛ mli gba enyɔ kɛjɛ yiteŋ kɛbayi shi.” (Mateo 27:51) Enɛ tsɔɔ yɛ gbɛ ni yɔɔ faŋŋ nɔ akɛ ajie gbɛtsii nii ni haaa Yesu anyɛ aya ŋwɛi lɛ kwraa agbɛnɛ. Gbii etɛ sɛɛ lɛ, Yehowa Nyɔŋmɔ fee naakpɛɛ nii ko ni sa kadimɔ waa. Etee Yesu shi kɛjɛ gbohii ateŋ, jeee akɛ gbɔmɔ adesa ni hiɛ heloo kɛ la ni gboɔ, shi moŋ akɛ anunyam mumɔŋ bɔɔ nɔ “ni ehiɔ shi kɛyaa naanɔ.” (Hebribii 7:24) Gbii nyɔŋmai ejwɛ sɛɛ lɛ, Yesu kwɔ kɛtee ŋwɛi ni eyabote “he krɔŋkrɔŋ fe fɛɛ” lɛ diɛŋtsɛ, “koni agbɛnɛ eyapue yɛ Nyɔŋmɔ hiɛ eha wɔ.”—Hebribii 9:24.
10. (a) Mɛni ba yɛ be mli ni Yesu kɛ efɔleshaa lɛ jarawalɛ lɛ eyaha eŋwɛi Tsɛ lɛ sɛɛ? (b) Mɛni mumɔ krɔŋkrɔŋ ni akɛfɔ Kristo kaselɔi lɛ mu lɛ tsɔɔ kɛhaa amɛ?
10 Ani Nyɔŋmɔ kpɛlɛ Yesu la ni efɔse eshwie shi akɛ kpatamɔ nɔ kɛha je lɛ he eshai lɛ jarawalɛ lɛ nɔ? Hɛɛ, efee nakai. Enɛ he odaseyeli ba yɛ Yesu gbohiiashitee lɛ sɛɛ gbii 50 pɛpɛɛpɛ, yɛ gbi ni akɛye Pentekoste gbijurɔ lɛ nɔ. Afɔse Nyɔŋmɔ mumɔ krɔŋkrɔŋ lɛ ashwie Yesu kaselɔi 120 ni ebua amɛhe naa kutuu yɛ Yerusalem lɛ anɔ. (Bɔfoi lɛ Asaji 2:1, 4, 33) Taakɛ amɛ Osɔfo Nukpa, Yesu Kristo ji lɛ, agbɛnɛ afɔ amɛ mu koni amɛsɔmɔ akɛ “osɔfoi aweku krɔŋkrɔŋ, koni aŋɔshã mumɔŋ afɔlei” yɛ Nyɔŋmɔ mumɔŋ sɔlemɔtsu kpeteŋkpele lɛ he gbɛjianɔtoo shishi. (1 Peter 2:5) Kɛfata he lɛ, nɛkɛ mɛi ni afɔ amɛ mu nɛɛ feɔ jeŋmaŋ hee, Nyɔŋmɔ “jeŋmaŋ krɔŋkrɔŋ” ni ji mumɔŋ Israel. Kɛjɛ no nɔ kɛbaa lɛ, gbalɛi fɛɛ ni kɔɔ Israel he nibii kpakpai ahe, tamɔ “kpaŋmɔ hee” he shiwoo ni aŋma yɛ Yeremia 31:31 lɛ, baakɔ Kristofoi asafo ni afɔ lɛ mu, ni ji “Nyɔŋmɔ Israel” diɛŋtsɛ lɛ he.—1 Petro 2:9; Galatabii 6:16.
Nyɔŋmɔ Mumɔŋ Sɔlemɔtsu lɛ he Kadimɔ Nii Krokomɛi
11, 12. (a) Mɛni osɔfoi akpo lɛ nɔ lɛ fee he mfoniri yɛ Yesu gbɛfaŋ, ni mɛni eji yɛ esɛɛnyiɛlɔi ni afɔ amɛ mu lɛ hu agbɛfaŋ? (b) Mɛni lalakã kɛ nu lɛ feɔ he mfoniri, ni te akɛtsuɔ nii ahaa tɛŋŋ?
11 Eyɛ mli akɛ He Krɔŋkrɔŋ Fe Fɛɛ lɛ feɔ “ŋwɛi diɛŋtsɛ,” he ni Nyɔŋmɔ ta maŋtsɛsɛi nɔ yɛ lɛ he mfoniri moŋ, shi Nyɔŋmɔ mumɔŋ sɔlemɔtsu lɛ he kadimɔ nii krokomɛi lɛ fɛɛ kɔɔ shikpɔŋ nɔ nibii ahe. (Hebribii 9:24) Yɛ Yerusalem sɔlemɔtsu lɛ mli lɛ, ayɛ osɔfoi amligbɛ kpo nɔ, ni afɔleshaa latɛ yɛ jɛmɛ kɛha afɔleshaa, kɛ lalakã agbo ni nu yɔɔ mli, ni osɔfoi lɛ kɛfɔflɔɔ amɛhe dani amɛtsuɔ sɔɔmɔ krɔŋkrɔŋ he nii. Mɛni nibii nɛɛ feɔ he mfoniri yɛ Nyɔŋmɔ mumɔŋ sɔlemɔtsu gbɛjianɔtoo lɛ mli?
12 Yɛ Yesu Kristo gbɛfaŋ lɛ, osɔfoi amligbɛ kpo lɛ feɔ eshihilɛ ni esha ko bɛ mli akɛ Nyɔŋmɔ Bi adesa ni eye emuu lɛ he mfoniri. Kɛtsɔ Yesu afɔleshaa lɛ mli hemɔkɛyeli namɔ nɔ lɛ, abuɔ Kristo sɛɛnyiɛlɔi ni afɔ amɛ mu lɛ akɛ jalɔi. Enɛ hewɔ lɛ, Nyɔŋmɔ baanyɛ ekɛ amɛ aye yɛ gbɛ ni ja nɔ akɛ mɛi ni esha ko bɛ amɛhe. (Romabii 5:1; 8:1, 33) No hewɔ lɛ, nɛkɛ kpo nɛɛ hu feɔ adesai ajalɛ shihilɛ ni akɛha osɔfoi aweku krɔŋkrɔŋ lɛ mli bii ni amɛnaa mli ŋɔɔmɔ aŋkroaŋkro yɛ Nyɔŋmɔ hiɛ lɛ he mfoniri. Yɛ nakai beaŋ nɔŋŋ lɛ, Kristofoi ni afɔ amɛ mu lɛ kã he amɛyeee emuu lolo ni amɛnyɛɔ amɛfeɔ esha. Lalakã kɛ nu ni yɔɔ kpo lɛ nɔ lɛ feɔ Nyɔŋmɔ Wiemɔ, ni Osɔfo Nukpa lɛ yaa nɔ ekɛtsuuɔ osɔfoi aweku krɔŋkrɔŋ lɛ he fiofio lɛ he mfoniri. Amɛhe shi ni amɛbaa amɛhaa hetsuumɔ gbɛ nɛɛ hewɔ lɛ, eha amɛna agbojee ko ni woɔ Nyɔŋmɔ hiɛ nyam, ni egbalaa mɛi ni yɔɔ sɛɛ lɛ kɛbaa ejamɔ ni yɔɔ krɔŋŋ lɛ mli.—Efesobii 5:25, 26; okɛto Maleaki 3:1-3 he.
He Krɔŋkrɔŋ Lɛ
13, 14. (a) Mɛni sɔlemɔtsu lɛ mli He Krɔŋkrɔŋ lɛ feɔ he mfoniri yɛ Yesu kɛ esɛɛnyiɛlɔi ni afɔ amɛ mu lɛ agbɛfaŋ? (b) Mɛni shika kanetso lɛ feɔ he mfoniri?
13 Sɔlemɔtsu lɛ klɛŋklɛŋ mlijaa lɛ feɔ shihilɛ ko ni nɔ kwɔ fe kpo lɛ nɔ nɔ̃ lɛ he mfoniri. Yɛ adesa ni eye emuu, Yesu Kristo gbɛfaŋ lɛ, klɛŋklɛŋ mlijaa lɛ feɔ fɔmɔ ni asaa afɔ lɛ ekoŋŋ akɛ Nyɔŋmɔ mumɔŋ Bi ni ato akɛ ebaaku esɛɛ kɛya ŋwɛi shihilɛ mli ekoŋŋ lɛ he mfoniri. Yɛ be mli ni adamɔ Kristo la ni efɔse eshwie shi lɛ mli hemɔkɛyeli namɔ nɔ abu amɛ jalɔi sɛɛ lɛ, nɛkɛ esɛɛnyiɛlɔi ni afɔ amɛ nɛɛ náa Nyɔŋmɔ mumɔ lɛ nitsumɔ krɛdɛɛ nɛɛ mli niiashikpamɔ. (Romabii 8:14-17) Atsɔɔ “nu [ni ji, amɛ baptisimɔ] kɛ mumɔ” nɔ ‘afɔɔ amɛ ekoŋŋ’ akɛ Nyɔŋmɔ mumɔŋ bii. No hewɔ lɛ, amɛyɛ hiɛnɔkamɔ akɛ abaatee amɛ shi kɛya ŋwɛi wala mli akɛ Nyɔŋmɔ mumɔŋ bii, kɛji amɛtee nɔ amɛye anɔkwa aahu kɛtee gbele mli.—Yohane 3:5, 7; Kpojiemɔ 2:10.
14 Nyɔŋmɔ jalɔi ni yɔɔ agbo lɛ naa lɛ enaaa osɔfoi ni sɔmɔɔ yɛ shikpɔŋ nɔ sɔlemɔtsu lɛ mli He Krɔŋkrɔŋ lɛ. Nakai nɔŋŋ hu Kristofoi ni afɔ amɛ mu lɛ náa mumɔŋ shihilɛ ko ni Nyɔŋmɔ jalɔi ateŋ mɛi babaoo, ni amɛ hiɛnɔkamɔ ji akɛ amɛbaahi shi kɛya naanɔ yɛ paradeiso shikpɔŋ nɔ lɛ naaa mli gbɛfaŋnɔ loo amɛnuuu shishi kɛmɔɔɔ shi lɛ mli niiashikpamɔ. Shika kanetso ni yɔɔ kpee buu lɛ mli lɛ feɔ sɛɛyoomɔ shihilɛ ni Kristofoi ni afɔ amɛ mu lɛ yɔɔ mli lɛ he mfoniri. Nyɔŋmɔ mumɔ krɔŋkrɔŋ lɛ nitsumɔ, tamɔ mu ni yɔɔ kanei lɛ amli lɛ, kpɛɔ la eshwieɔ Biblia lɛ nɔ. Shishinumɔ ni Kristofoi náa kɛjɛɔ enɛ mli lɛ, ehiii shi kɛhaaa amɛ kome amɛhe. Shi moŋ, amɛboɔ Yesu toi, mɔ ni wie akɛ: “Nyɛ ji je lɛŋ la lɛ. . . . Nakai nyɛhaa nyɛla atsoa yɛ gbɔmɛi ahiɛ, koni amɛna nyɛ nifeemɔ nii kpakpai lɛ, ni amɛwo nyɛtsɛ ni yɔɔ ŋwɛi lɛ hiɛ nyam.”—Mateo 5:14, 16.
15. Mɛni aboloo ni jwere hiɛmaa aboloo okpɔlɔ lɛ nɔ lɛ feɔ he mfoniri?
15 Kɛji amɛaaya nɔ amɛhi nɛkɛ sɛɛyoomɔ shihilɛ nɛɛ mli lɛ, no lɛ esa akɛ Kristofoi ni afɔ amɛ mu lɛ aye nɔ ni aboloo ni jwere hiɛmaa aboloo okpɔlɔ lɛ nɔ lɛ feɔ he mfoniri lɛ. Amɛ mumɔŋ niyenii jɛɛhe titri ji Nyɔŋmɔ Wiemɔ lɛ, ni amɛbɔɔ mɔdɛŋ akɛ amɛaakane ni amɛjwɛŋ nɔ daa gbi. Yesu wo amɛ shi hu akɛ ebaaha amɛ “ŋmaa yɛ be ni sa nɔ” kɛtsɔ “[etsulɔ] anɔkwafo kɛ nilelɔ” lɛ nɔ. (Mateo 24:45) Nɛkɛ “tsulɔ” nɛɛ ji Kristofoi ni afɔ amɛ mu ni yɔɔ shikpɔŋ nɔ lɛ akuu muu lɛ fɛɛ yɛ bei pɔtɛɛ fɛɛ mli. Kristo kɛ kuu ni afɔ amɛ mu nɛɛ etsu nii ni eŋmala saji yɛ Biblia gbalɛi amlibaa he, ni ekɛ gbɛtsɔɔmɔ ni sa yɛ be naa eha yɛ Biblia shishitoo mlai kɛ nitsumɔ he, yɛ ŋmɛnɛŋmɛnɛ beaŋ daa gbi shihilɛ mli. Enɛ hewɔ lɛ, Kristofoi ni afɔ amɛ mu lɛ kɛ hiɛsɔɔ yeɔ nɛkɛ mumɔŋ niyenii nɛɛ fɛɛ. Shi amɛ mumɔŋ shihilɛ wajemɔ damɔ nibii babaoo nɔ fe Nyɔŋmɔ he nilee ni amɛkɛaawo amɛjwɛŋmɔi kɛ amɛtsuii amli kɛkɛ. Yesu kɛɛ: “Miŋmaa ji akɛ mafee mɔ ni tsu mi lɛ suɔmɔnaa nii, ni magbe enitsumɔ lɛ naa.” (Yohane 4:34) Nakai nɔŋŋ hu Kristofoi ni afɔ amɛ mu lɛ atsuii nyɔɔ amɛmli kɛtsɔɔ Nyɔŋmɔ suɔmɔnaa nii ni ajie lɛ kpo ni amɛfeɔ daa gbi lɛ nɔ.
16. Mɛni tsofa-kɛ-ŋma afɔleshaa latɛ lɛ he sɔɔmɔ lɛ feɔ he mfoniri?
16 Osɔfo yashãa tsofa-kɛ-ŋma ehaa Nyɔŋmɔ yɛ tsofa-kɛ-ŋma afɔleshaa latɛ lɛ nɔ leebi kɛ gbɛkɛ, yɛ He Krɔŋkrɔŋ lɛ. Yɛ nakai beaŋ nɔŋŋ lɛ, jálɔi ni jeee osɔfoi lɛ sɔleɔ amɛhaa Nyɔŋmɔ beni amɛdamɔ esɔlemɔtsu lɛ agbo lɛ naa kpo lɛ nɔ. (Luka 1:8-10) “Tsofai-kɛ-ŋmai,” taakɛ Biblia lɛ tsɔɔ mli lɛ, “ji krɔŋkrɔŋbii lɛ asɔlemɔi lɛ.” (Kpojiemɔ 5:8) Lalatsɛ David ŋma akɛ: “Ha mifaikpamɔi abaje tamɔ tsofa-kɛ-ŋma yɛ ohiɛ.” (Lala 141:2) Kristofoi ni afɔ amɛ mu lɛ hu buɔ hegbɛ ni amɛyɔɔ, akɛ amɛaabɛŋkɛ Yehowa yɛ sɔlemɔ mli kɛtsɔ Yesu Kristo nɔ lɛ akɛ nɔ ni jara wa waa. Sɔlemɔi ni mli wa ni jɛɔ tsui mli lɛ tamɔ tsofa-kɛ-ŋma ni jeɔ ŋma. Kristofoi ni afɔ amɛ mu lɛ jieɔ Nyɔŋmɔ yi yɛ gbɛi krokomɛi hu nɔ, ni amɛkɛ amɛ naabui tsuɔ nii kɛtsɔɔ mɛi krokomɛi anii. Amɛ tsuishiŋmɛɛ yɛ jaramɔ shihilɛi amli kɛ amɛ emuuyeli mlihiɛmɔ yɛ kaa shishi lɛ titri saa Nyɔŋmɔ hiɛ jogbaŋŋ.—1 Petro 2:20, 21.
17. Mɛni fata gbalɛ mli mfoniri ni akɛha, kɛtsɔ osɔfonukpa lɛ He Krɔŋkrɔŋ Fe Fɛɛ lɛ yaa klɛŋklɛŋ kwraa, yɛ Kpatamɔ Gbi lɛ nɔ lɛ mlibaa he?
17 Yɛ Kpatamɔ Gbi lɛ nɔ lɛ, esa akɛ Israel osɔfonukpa lɛ abote He Krɔŋkrɔŋ Fe Fɛɛ lɛ ni eyashã tsofa-kɛ-ŋma yɛ shika ŋɛsu ni ŋãi la yɔɔ mli lɛ nɔ. Esa akɛ efee enɛ dani ekɛ kooloi ni akɛbashã eshai afɔlei lɛ ala aba jɛmɛ. Yɛ gbalɛ mli mfoniri nɛɛ mlibaa mli lɛ, Yesu hiɛ emuuyeli diɛŋtsɛ mli eha Yehowa Nyɔŋmɔ dani ekɛ ewala ha akɛ afɔleshaa kome pɛ ni hiɔ shi daa kɛha wɔhe eshai lɛ. Enɛ hewɔ lɛ etsɔɔ akɛ adesa ni eye emuu baanyɛ ahiɛ emuuyeli mli kɛha Nyɔŋmɔ, ni nɔnyɛɛ ni Satan kɛaaba enɔ lɛ kɔɔɔ he eko. (Abɛi 27:11) Beni akaa Yesu lɛ, ekɛ sɔlemɔ tsu nii, “ni bolɔmɔi ni naa wa kɛ yaafonui fata he, . . . ni abo lɛ toi hu, ejaakɛ ebuɔ Nyɔŋmɔ.” (Hebribii 5:7) Etsɔ nɛkɛ gbɛ nɔ ewo Yehowa hiɛ nyam akɛ jalɔ kɛ jeŋ muu fɛɛ Maŋtsɛ yɛ gbɛ ni ja nɔ. Nyɔŋmɔ tee Yesu shi kɛtee ŋwɛi wala ni gbele bɛ mli mli ni ekɛwo lɛ nyɔmɔ. Yesu jɛɔ egbɛhe ni nɔ kwɔ nɛɛ mli egbalaa ejwɛŋmɔ kɛbaa yiŋtoo ni ji enyɔ hewɔ ni eba shikpɔŋ nɔ lɛ nɔ, ni ji akɛ, koni esaa adesai eshafeelɔi ni baatsake amɛtsui lɛ kɛ Nyɔŋmɔ teŋ.—Hebribii 4:14-16.
Nyɔŋmɔ Mumɔŋ Sɔlemɔtsu lɛ Anunyam Kpele Lɛ
18. Yehowa kɛ anunyam kpele eba emumɔŋ sɔlemɔtsu lɛ nɔ yɛ mɛɛ gbɛ nɔ?
18 “Shia nɛɛ sɛɛkpee anunyam lɛ aaada fe tsutsu nɔ lɛ,” taakɛ Yehowa gba efɔ̃ shi lɛ. (Hagai 2:9) Yehowa tsɔ shi ni etee Yesu akɛ Maŋtsɛ kɛ Osɔfo Nukpa ni gbooo lɛ nɔ ekɛ anunyam kpele ba emumɔŋ sɔlemɔtsu lɛ nɔ. Amrɔ nɛɛ Yesu yɛ gbɛhe akɛ “mɔ mli ni naanɔ yiwalaheremɔ jɛɔ ehaa mɛi fɛɛ ni boɔ lɛ toi lɛ.” (Hebribii 5:9) Klɛŋklɛŋ mɛi ni jie toiboo ni tamɔ nɛkɛ kpo ji kaselɔi 120 ni ná mumɔ krɔŋkrɔŋ yɛ Pentekoste yɛ afi 33 Ŋ.B. lɛ. Kpojiemɔ wolo lɛ gba efɔ̃ shi akɛ yɛ naagbee lɛ, nɛkɛ mumɔŋ Israel bii nɛɛ ayifalɛ baafee 144,000. (Kpojiemɔ 7:4) Yɛ amɛ gbele sɛɛ lɛ, ehe bahia ni amɛteŋ mɛi pii awɔ yɛ adesai akwamaŋ gbonyo bu lɛ mli, ni amɛmɛ be mli ni Yesu eba yɛ maŋtsɛyeli hewalɛ mli lɛ. Gbalɛ mli be he akɔntaabuu ni yɔɔ Daniel 4:10-17, 20-27 gbalaa jwɛŋmɔ kɛyaa 1914 nɔ akɛ be mli ni Yesu baabɔi maŋtsɛyeli yɛ ehenyɛlɔi ateŋ. (Lala 110:2) Kristofoi ni afɔ amɛ mu lɛ kɛ afii nyɔŋmai abɔ tsɔ̃ hiɛ amɛkɛ gbɛkpamɔ ni mli wa waa mɛ nakai afi lɛ. Klɛŋklɛŋ jeŋ ta lɛ kɛ jaramɔ shihilɛi ni fata he kɛba adesai anɔ lɛ kɛ odaseyeli hã kɛtsɔɔ akɛ, akɛ Yesu ta maŋtsɛsɛi nɔ akɛ Maŋtsɛ yɛ 1914. (Mateo 24:3, 7, 8) No sɛɛ etsɛɛɛ, beni be eshɛ ni “abaaje kojomɔ shishi kɛjɛ Nyɔŋmɔ we lɛ,” Yesu baaha shiwoo ni ekɛha ekaselɔi ni afɔ amɛ mu, ni amɛwɔ yɛ gbele mli lɛ aba mli, akɛ: “Mibaba ekoŋŋ ni mibaŋɔ nyɛ kɛya he ni mi diɛŋtsɛ miyɔɔ lɛ.”—1 Petro 4:17; Yohane 14:3.
19. Mɛɛ gbɛ nɔ 144,000 lɛ ateŋ shwɛɛnii lɛ baatsɔ ana gbɛ kɛya ŋwɛi He Krɔŋkrɔŋ Fe Fɛɛ lɛ?
19 Asɔoko osɔfoi aweku krɔŋkrɔŋ lɛ mli bii 144,000 lɛ fɛɛ anaa agbeko naa, ní abaabua amɛnaa kɛya amɛ ŋwɛi shihilɛ he lɛ. Amɛteŋ shwɛɛnii ko yɛ shikpɔŋ nɔ lolo yɛ mumɔŋ shihilɛ ni He Krɔŋkrɔŋ lɛ fee he mfoniri lɛ mli, ni akɛ “muhɔɔ,” loo gbɛtsii nii, ni ji amɛ helooŋ gbɔmɔtsei lɛ efo amɛkɛ Nyɔŋmɔ hiɛ ni yɔɔ krɔŋkrɔŋ lɛ teŋ. Be mli ni mɛnɛɛmɛi gboiɔ yɛ anɔkwayeli mli lɛ, ateeɔ amɛ shi amrɔ nɔŋŋ akɛ mumɔŋ bɔɔ nii ni gboiii, ni amɛyafataa 144,000 lɛ ateŋ mɛi ni yɔɔ ŋwɛi momo lɛ ahe.—1 Korintobii 15:51-53.
20. Mɛɛ nitsumɔ ni he hiaa osɔfoi aweku krɔŋkrɔŋ lɛ ateŋ shwɛɛnii lɛ tsuɔ yɛ be nɛɛ mli, ni mɛni jɛɔ mli baa?
20 Akɛni osɔfoi pii kɛ Osɔfo Nukpa Kpeteŋkpele lɛ miisɔmɔ yɛ ŋwɛi hewɔ lɛ, eha Nyɔŋmɔ mumɔŋ sɔlemɔtsu lɛ ena anunyam babaoo efata he. Yɛ nakai beaŋ nɔŋŋ lɛ, osɔfoi aweku krɔŋkrɔŋ lɛ ateŋ mɛi ni eshwɛ lɛ miitsu nitsumɔ ni he yɔɔ sɛɛnamɔ yɛ shikpɔŋ nɔ. Nyɔŋmɔ miitsɔ amɛ shiɛmɔ lɛ nɔ ‘eehoso jeŋmaji lɛ fɛɛ’ kɛ ekojomɔ wiemɔi ni amɛjajeɔ lɛ, taakɛ agba afɔ̃ shi yɛ Hagai 2:7 lɛ. Yɛ nakai beaŋ nɔŋŋ lɛ, jálɔi akpekpei abɔ ni awie amɛhe akɛ “jeŋmaji lɛ fɛɛ anii ni jara wa lɛ” miike yuu kɛmiiba Yehowa sɔlemɔtsu lɛ shikpɔŋ nɔ kpo lɛ nɔ. Nɛgbɛ sa kɛha mɛnɛɛmɛi yɛ Nyɔŋmɔ gbɛjianɔtoo kɛha jamɔ lɛ mli, ni mɛɛ wɔsɛɛ be anunyam wɔbaanyɛ wɔkpa gbɛ akɛ emumɔŋ sɔlemɔtsu kpeteŋkpele lɛ baaná? Abaasusu sanebimɔi nɛɛ ahe yɛ nikasemɔ ni nyiɛ sɛɛ lɛ mli.
Sanebimɔi ni Akɛtĩɔ Mli
◻ Mɛɛ nɔkwɛmɔ nɔ fɛfɛo Yesu fee efɔ̃ shi yɛ afi 29 Ŋ.B.?
◻ Mɛɛ gbɛjianɔtoo bɔi nitsumɔ yɛ afi 29 Ŋ.B.?
◻ Mɛni He Krɔŋkrɔŋ kɛ He Krɔŋkrɔŋ Fe Fɛɛ lɛ feɔ he mfoniri?
◻ Awo mumɔŋ sɔlemɔtsu kpeteŋkpele lɛ hiɛ nyam yɛ mɛɛ gbɛ nɔ?
[Mfoniri ni yɔɔ baafa 17]
Beni akɛ mumɔ krɔŋkrɔŋ fɔ Yesu mu yɛ afi 29 Ŋ.B. lɛ, kɛkɛ ni Nyɔŋmɔ mumɔŋ sɔlemɔtsu kpeteŋkpele lɛ bɔi nitsumɔ