Ye Obua Mɛi Ni Okɛkaseɔ Nii Lɛ Ni Amɛye Kristo Famɔi Lɛ Anɔ

 1. Yɛ nɔ ni aŋma yɛ Mateo 28:18-20 lɛ naa lɛ, mɛni Yesu fã esɛɛnyiɛlɔi lɛ akɛ amɛyafee?

BE NI atee Yesu shi lɛ, ekɛ ekaselɔi lɛ kpe yɛ Galilea. No mli lɛ, eyɛ nɔ ko ni he hiaa ni eetao ekɛɛ amɛ. Ani ole nɔ ni ji? No ji nɔ ni wɔnaa yɛ Mateo 28:18-20 lɛ.​—Kanemɔ.

 2. Mɛɛ sanebimɔi wɔbaahã hetoo yɛ nikasemɔ nɛɛ mli?

² Esa akɛ Nyɔŋmɔ tsuji ni yɔɔ ŋmɛnɛ lɛ hu ateŋ mɔ fɛɛ mɔ aye famɔ ni Yesu kɛhã akɛ afee mɛi kaselɔi lɛ nɔ. Yɛ nikasemɔ nɛɛ mli lɛ, wɔbaahã sanebimɔi etɛ komɛi ni kɔɔ famɔ ni Yesu kɛhã wɔ lɛ he lɛ hetoo. Klɛŋklɛŋ nɔ lɛ ji, kɛ́ wɔtsɔɔ mɛi nɔ ni Nyɔŋmɔ kpaa gbɛ akɛ amɛfee lɛ wɔgbe naa lɛ, mɛni ekoŋŋ esa akɛ wɔfee? Nɔ ni ji enyɔ lɛ, mɛɛ gbɛ nɔ mɛi fɛɛ ni yɔɔ asafo lɛ mli lɛ baanyɛ aye abua Biblia mli nikaselɔi ni amɛya amɛhiɛ? Kɛ nɔ ni ji etɛ lɛ, mɛɛ gbɛ nɔ wɔbaanyɛ wɔye wɔbua wɔnyɛmimɛi Kristofoi ni ekpa shiɛmɔ yaa lɛ ni amɛbɔi shiɛmɔ yaa ekoŋŋ?

 3. Be ni Yesu fã esɛɛnyiɛlɔi lɛ akɛ amɛyafee mɛi kaselɔi lɛ, mɛɛ gbɛtsɔɔmɔ ni sa kadimɔ ekɛhã amɛ?

³ Eyɛ mli akɛ ehe miihia ni wɔtsɔɔ mɛi nibii ni Yesu fã wɔ lɛ moŋ, shi kadimɔ gbɛtsɔɔmɔ ni Yesu kɛhã lɛ jogbaŋŋ. Yesu ekɛɛɛ akɛ: ‘Nyɛtsɔa amɛ nibii fɛɛ ni mifã nyɛ lɛ.’ Moŋ lɛ, ewie akɛ: “Nyɛtsɔa amɛ ni amɛye nibii fɛɛ ni mifã nyɛ lɛ nɔ.” Gbɛtsɔɔmɔ nɛɛ mli kã shi faŋŋ, aloo jeee nakai? No hewɔ lɛ, esa akɛ wɔtsɔɔ wɔ-Biblia mli nikaselɔi lɛ nibii ni Yesu efã wɔ akɛ wɔfee lɛ, shi kɛfata he lɛ, esa akɛ wɔtsɔɔ amɛ bɔ ni amɛbaafee amɛye nɔ. (Bɔf. 8:31) Mɛni hewɔ enɛ he hiaa lɛ?

 4. Kɛ́ akɛɛ mɔ ko miiye famɔ ko nɔ lɛ, te atsɔɔ tɛŋŋ? Okɛ enɛ he nɔkwɛmɔnɔ ahã.

⁴ Kɛ́ akɛɛ mɔ ko ‘miiye’ famɔ ko nɔ lɛ, belɛ etsɔɔ akɛ, mɔ lɛ kɛ famɔ lɛ miitsu nii. No hewɔ lɛ, te wɔbaafee tɛŋŋ wɔye wɔbua mɛi ni amɛye nibii fɛɛ ni Kristo efã wɔ akɛ wɔfee lɛ nɔ loo amɛkɛtsu nii? Naa nɔkwɛmɔnɔ ko ni baanyɛ aye abua wɔ. Kɛ́ mɔ ko miitsɔɔ mɔ ko tsɔnekudɔmɔ lɛ, mɛɛ gbɛ nɔ eyeɔ ebuaa mɔ lɛ koni ele bɔ ni akɛ mlai ni kɔɔ tsɔnekudɔmɔ he lɛ tsuɔ nii ahãa? Klɛŋklɛŋ lɛ, etsɔɔ mɔ lɛ tsɔnekudɔmɔ he mlai lɛ. Shi kɛ́ egbe no naa lɛ, nɔ kroko yɛ ni efeɔ. Ehãa mɔ lɛ hiɛɔ tsɔne lɛ ni ekɛ lɛ yiɔ gbɛ lɛ nɔ koni eye ebua lɛ ni ele bɔ ni ebaafee ekɛ mlai ni ekase lɛ atsu nii. Mɛni wɔkaseɔ yɛ nɔkwɛmɔnɔ nɛɛ mli?

 5. (a) Yɛ nɔ ni awie yɛ Yohane 14:15 kɛ 1 Yohane 2:3 lɛ naa lɛ, mɛni esa akɛ wɔye wɔbua wɔ-Biblia mli nikaselɔi lɛ ni amɛfee? (b) Tsɔɔmɔ nibii komɛi ni wɔbaanyɛ wɔfee kɛye wɔbua wɔ-Biblia mli nikaselɔi.

⁵ Kɛ́ wɔkɛ mɛi miikase Biblia lɛ, wɔtsɔɔ amɛ nɔ ni Nyɔŋmɔ kpaa gbɛ yɛ amɛdɛŋ. Shi no pɛ kɛkɛ faaa. Esa akɛ wɔtsɔɔ amɛ bɔ ni amɛbaafee amɛkɛ nɔ ni amɛkaseɔ lɛ atsu nii yɛ amɛshihilɛ mli. (Kanemɔ Yohane 14:15; 1 Yohane 2:3.) Gbɛ kome ni wɔbaanyɛ wɔtsɔ nɔ wɔfee nakai ji, ni wɔbaafee nɔkwɛmɔnɔ kpakpa. Enɛ baanyɛ aye abua wɔ-Biblia mli nikaselɔi lɛ ni amɛna bɔ ni amɛbaafee amɛkɛ shishitoo mlai ni wɔtsɔɔ amɛ lɛ atsu nii yɛ skul, yɛ nitsumɔhe, loo be ni amɛmiijie amɛhiɛtserɛ. Agbɛnɛ hu, wɔbaanyɛ wɔgba amɛ bɔ ni Biblia shishitoo mla ko ni wɔkɛtsu nii lɛ ye ebua wɔ ni wɔtsi wɔhe kɛje nɔ ko ni baanyɛ aye wɔ awui lɛ he, loo bɔ ni eye ebua wɔ ni wɔkpɛ wɔyiŋ yɛ nilee mli. Kɛfata he lɛ, wɔbaanyɛ wɔkɛ amɛ afee ekome kɛsɔle ni wɔkpa Yehowa fai ni ekɛ emumɔ krɔŋkrɔŋ lɛ aye abua amɛ.​—Yoh. 16:13.

 6. Mɛni ji nɔ kome ni baatsɔɔ akɛ wɔmiitsɔɔ mɛi ni amɛye Yesu famɔi lɛ anɔ?

⁶ Nɔ kroko ni baatsɔɔ akɛ wɔmiiye wɔmiibua wɔ-Biblia mli nikaselɔi lɛ ni amɛye Yesu famɔi lɛ anɔ ji, ni wɔbaaye wɔbua amɛ ni amɛná shwelɛ akɛ amɛbaafee mɛi kaselɔi. Biblia mli nikaselɔi komɛi sheɔ gbeyei akɛ amɛbaashiɛ. No hewɔ lɛ, esa akɛ wɔto wɔtsui shi ni wɔye wɔbua amɛ ni amɛnu nibii ni wɔkɛ amɛ kaseɔ yɛ Biblia lɛ mli lɛ shishi jogbaŋŋ ni eta amɛtsuiŋ, kɛkɛ lɛ, no baatsirɛ amɛ ni amɛgba mɛi krokomɛi nibii ni amɛkaseɔ lɛ. Mɛɛ gbɛ nɔ wɔbaanyɛ wɔtsɔ wɔtsu enɛ he nii?

 7. Te wɔbaafee tɛŋŋ wɔye wɔbua wɔ-Biblia mli nikaselɔi lɛ ni amɛná he miishɛɛ akɛ amɛbaashiɛ sane kpakpa lɛ?

⁷ Ekolɛ obaanyɛ obi o-Biblia mli nikaselɔ lɛ saji ni nyiɛ sɛɛ nɛɛ: “Kɛjɛ be ni okɛ nibii ni okaseɔ yɛ Biblia lɛ mli lɛ bɔi nitsumɔ nɛɛ, mɛɛ tsakemɔi ona yɛ oshihilɛ mli? Kɛ́ okwɛ lɛ, ani mɛi krokomɛi baaná nibii ni okaseɔ yɛ Biblia lɛ mli lɛ ahe sɛɛ? Mɛni obaanyɛ ofee kɛye obua amɛ?” (Abɛi 3:27; Mat. 9:37, 38) Tsɔɔmɔ lɛ tratii ni fata wɔ-Nitsɔɔmɔ Dɛŋdadei Titrii lɛ ahe, ni obi lɛ ni etsɔɔ bo amɛmli nɔ ni kɛ́ ekwɛ lɛ, ewekumɛi, enanemɛi, loo mɛi ni ekɛtsuɔ nii lɛ baanya he waa. Hã lɛ tratii ni ebaatsɔɔ lɛ eko. Tsɔɔmɔ lɛ bɔ ni ebaafee ehã mɛi trati lɛ bɔ ni hãŋ amɛnu he akɛ ekɛmiifi amɛnɔ, ni ohã efee ni okwɛ. Kɛ́ etee ehiɛ ni akpɛlɛ enɔ akɛ shiɛlɔ ni abaptisiko lɛ lɛ, ehe baahia ni okɛ lɛ atsu nii yɛ shiɛmɔ nitsumɔ lɛ mli koni oye obua lɛ.​—Jaj. 4:9, 10; Luka 6:40.

 8. Mɛni hewɔ ehe miihia ni wɔtsɔɔ wɔ-Biblia mli nikaselɔi lɛ ni amɛsumɔ Nyɔŋmɔ kɛ amɛnyɛmi gbɔmɔ waa? (Kwɛmɔ akrabatsa ni yitso ji, “Bɔ Ni Wɔbaafee Wɔye Wɔbua Wɔ-Biblia Mli Nikaselɔi Lɛ Ni Amɛsumɔ Nyɔŋmɔ Waa.”)

⁸ Yesu kɛɛ wɔtsɔɔ mɛi ‘ni amɛye nibii fɛɛ ni efã wɔ lɛ anɔ.’ Ekã shi faŋŋ akɛ, famɔi enyɔ ni he hiaa fe fɛɛ, ni ji, famɔ akɛ wɔsumɔ Nyɔŋmɔ kɛ famɔ akɛ wɔsumɔ wɔnyɛmi gbɔmɔ lɛ, fata famɔi ni esa akɛ wɔtsɔɔ mɛi ni amɛye nɔ lɛ ahe, ni famɔi enyɔ lɛ fɛɛ kɛ shiɛmɔ kɛ kaselɔfeemɔ nitsumɔ lɛ yɛ tsakpãa. (Mat. 22:37-39) Nɔ hewɔ ni wɔkɛɔ nakai ji akɛ, kɛ́ mɔ ko basumɔ Nyɔŋmɔ kɛ enyɛmi gbɔmɔ lɛ, no baatsirɛ lɛ ni eshiɛ. Ekolɛ, wɔ-Biblia mli nikaselɔi komɛi baashashao shi akɛ amɛbaatsu shiɛmɔ nitsumɔ lɛ yɛ gbeyeishemɔ hewɔ, ni esaaa akɛ enɛ feɔ wɔ naakpɛɛ. Wɔbaanyɛ wɔwo Biblia mli nikaselɔi ni tamɔ nɛkɛ lɛ hewalɛ, ni wɔhã amɛle akɛ Yehowa baaye ebua amɛ fiofio koni amɛkashe gbɔmɔ gbeyei. (Lala 18:1-3; Abɛi 29:25) Akrabatsa ni yitso ji, “Bɔ Ni Wɔbaafee Wɔye Wɔbua Wɔ-Biblia Mli Nikaselɔi Lɛ Ni Amɛsumɔ Nyɔŋmɔ Waa,” ni yɔɔ nikasemɔ nɛɛ mli lɛ, hãa wɔnaa nibii komɛi ni wɔbaanyɛ wɔfee kɛye wɔbua wɔ-Biblia mli nikaselɔi lɛ ni amɛsumɔ Nyɔŋmɔ waa. Mɛni asafoŋbii lɛ hu baanyɛ amɛfee kɛye amɛbua mɛi ni akɛ amɛ miikase nii lɛ koni amɛsumɔ Nyɔŋmɔ kɛ amɛnyɛmi gbɔmɔ waa?

 9. Kɛ́ akɛ mɔ ni miikase tsɔnekudɔmɔ lɛ yi gbɛ lɛ nɔ lɛ, mɛɛ gbɛi enyɔ anɔ etsɔɔ ekaseɔ nii?

⁹ Hã wɔku wɔsɛɛ kɛya mɔ ni aatsɔɔ lɛ tsɔnekudɔmɔ lɛ sane lɛ nɔ ekoŋŋ. Kɛ́ akɛ lɛ yi gbɛ lɛ nɔ lɛ, ekaseɔ nibii kpakpai pii. Shi mɛɛ gbɛi anɔ etsɔɔ efeɔ nakai? Eboɔ mɔ ni tsɔɔ lɛ nii lɛ toi, ni ekwɛɔ tsɔnekudɔlɔi ni kɛ tsɔnekudɔmɔ he gbɛtsɔɔmɔi lɛ miitsu nii lɛ. Akɛ nɔkwɛmɔnɔ lɛ, ekolɛ tsɔɔlɔ lɛ baatsɔɔ lɛ tsɔnekudɔlɔ ko ni to etsui shi koni tsɔne kroko ni miitao abote gbɛ lɛ mli yɛ ehiɛ lɛ anyɛ afee nakai. Aloo ebaatsɔɔ lɛ tsɔnekudɔlɔ ko ni sukuru ekane lɛ nɔ koni ekatsurɔ tsɔnekudɔlɔi ni baa yɛ ehiɛ lɛ ahiŋmɛi mli. Enɛ baaye abua nikaselɔ lɛ ni ena nibii komɛi ni esa akɛ efee kɛ́ eekudɔ tsɔne.

10. Mɛni baaye abua Biblia mli nikaselɔ ko ni eya ehiɛ?

¹⁰ Nakai nɔŋŋ eji yɛ Biblia mli nikaselɔ ko ni eyi wala gbɛ lɛ nɔ lɛ gbɛfaŋ. Ekaseɔ nii kɛjɛɔ etsɔɔlɔ lɛ dɛŋ, kɛ agbɛnɛ hu, nɔkwɛmɔnɔ kpakpa ni Yehowa tsuji krokomɛi feɔ lɛ mli. No hewɔ lɛ kɛ́ okwɛ lɛ, mɛni baaye abua Biblia mli nikaselɔi waa ni amɛya amɛhiɛ? No ji, ni amɛbaaya asafoŋ kpeei. Kɛ́ amɛbo nibii ni ajɛɔ Biblia lɛ mli atsɔɔ wɔ yɛ asafoŋ kpeei ashishi lɛ toi lɛ, amɛbaakase nibii pii, amɛhemɔkɛyeli lɛ mli baawa, ni amɛbaasumɔ Nyɔŋmɔ waa. (Bɔf. 15:30-32) Agbɛnɛ hu, kɛ́ Biblia mli nikaselɔi ba asafoŋ kpeei lɛ, mɛi ni kɛ amɛ kaseɔ nii lɛ baanyɛ amɛkɛ amɛ aŋa nyɛmimɛi komɛi ni shihilɛ tamɔ amɛnɔ lɛ nɔŋŋ lɛ. Kɛfata he lɛ, nikaselɔ lɛ baana nibii komɛi ni nyɛmimɛi lɛ feɔ kɛtsɔɔ akɛ amɛsumɔɔ Yehowa kɛ amɛnyɛmi gbɔmɔ.

11. Kɛ́ mɔ ko ni akɛ lɛ miikase nii lɛ ba asafoŋ kpeei lɛ, mɛni ekolɛ ebaana, ni mɛɛ gbɛ nɔ no baanyɛ aye abua lɛ?

¹¹ Akɛ nɔkwɛmɔnɔ lɛ, kɛ́ Biblia mli nikaselɔ ko ni ekome ekwɛɔ ebii lɛ ba asafoŋ kpeei, ni ebana nyɛmi yoo ko ni hiɛ bii bibii ni ekome eekwɛ, shi ebɔ mɔdɛŋ ekɛ amɛ fɛɛ eba asafoŋ kpeei lɛ, te no baaná enɔ hewalɛ ehã tɛŋŋ? Ŋwanejee ko bɛ he akɛ, ebaata etsuiŋ waa. Aloo ŋɔɔ lɛ akɛ Biblia mli nikaselɔ ko ni ebɔ mɔdɛŋ aahu akɛ ebaakpa zigareti shɛremɔ shi enyɛɛɛ lɛ eba asafoŋ kpeei, ni mɔ ni kɛ lɛ kaseɔ nii lɛ kɛ lɛ eŋa nyɛmi ko ni lɛ hu etɔ lɛ aahu dani ekpa zigareti shɛremɔ. Mɛɛ gbɛ nɔ no baaye abua lɛ? Ekolɛ nyɛmi lɛ baagba lɛ nibii ni efee koni esumɔ Yehowa waa, kɛ bɔ ni no ye ebua lɛ ni enyɛ ekpa zigareti lɛ shɛremɔ, ni ebaakɛɛ lɛ akɛ, kɛ́ lɛ hu emia ehiɛ lɛ, ebaanyɛ ekpa. (2 Kor. 7:1; Fip. 4:13) Ŋwanejee ko bɛ he akɛ, enɛ baawo Biblia mli nikaselɔ lɛ hewalɛ waa. Aloo susumɔ nɔ ni baaya nɔ yɛ oblayoo ko ni akɛ lɛ miikase nii lɛ jwɛŋmɔ mli, kɛ́ eba asafoŋ kpeei ni ebana nyɛmi yoo oblayoo ko ni ji etipɛŋ ni ekɛ miishɛɛ miisɔmɔ Yehowa lɛ he okwɛ. Ŋwanejee ko bɛ he akɛ, nɔ ni ebaana lɛ baatsirɛ lɛ ni eya nɔ ekase nii lɛ, koni ele nɔ hewɔ ni wɔnyɛmi yoo lɛ yɔɔ miishɛɛ be fɛɛ be lɛ.

12. Mɛni hewɔ wɔbaanyɛ wɔwie akɛ, mɔ fɛɛ mɔ ni yɔɔ asafo lɛ mli lɛ baanyɛ afee nɔ ko kɛye ebua Biblia mli nikaselɔi?

¹² Kɛ́ Biblia mli nikaselɔ lɛ bale nyɛmimɛi anɔkwafoi srɔtoisrɔtoi lɛ, amɛnɔkwɛmɔnɔ kpakpa lɛ baaye abua lɛ ni ena nibii ni kɛ́ efee lɛ, no baatsɔɔ akɛ, eeye nibii fɛɛ ni Kristo efã lɛ anɔ, ni agbɛnɛ hu, esumɔɔ Nyɔŋmɔ kɛ enyɛmi gbɔmɔ. (Yoh. 13:35; 1 Tim. 4:12) Kɛfata he lɛ, tamɔ bɔ ni wɔbana lɛ, kɛ́ Biblia mli nikaselɔ lɛ bana nyɛmimɛi ni kɛ naagbai ni ekɛkpeɔ lɛ eko ekpe pɛŋ lɛ, no baaye abua lɛ ni ena akɛ, ebaanyɛ efee tsakemɔi ni he hiaa lɛ, koni lɛ hu ebatsɔ Kristo kaselɔ. (5 Mo. 30:11) Mɛi ni yɔɔ asafo lɛ mli lɛ ateŋ mɔ fɛɛ mɔ baanyɛ afee nɔ ko kɛye ebua Biblia mli nikaselɔi ni amɛya amɛhiɛ. (Mat. 5:16) No hewɔ lɛ, bi ohe akɛ: ‘Kɛ́ mɛi ni akɛ amɛ miikase nii lɛ ba asafoŋ kpeei lɛ, mɛni mifeɔ kɛwaa amɛ?’

13-14. Be ni bɔfoi lɛ anijiaŋ je wui lɛ, te Yesu kɛ amɛ ye ehã tɛŋŋ?

¹³ Esa akɛ wɔye wɔbua wɔnyɛmimɛi ni ekpa shiɛmɔ yaa lɛ ni amɛbɔi shiɛmɔ yaa ekoŋŋ, koni amɛye Kristo famɔ akɛ wɔfee mɛi kaselɔi lɛ nɔ. Mɛni wɔbaanyɛ wɔfee kɛye wɔbua amɛ? Nyɛhãa wɔkwɛa nɔ ni Yesu fee kɛye ebua bɔfoi lɛ be ni amɛnijiaŋ je wui lɛ, koni wɔkwɛ nɔ ni wɔbaanyɛ wɔkase yɛ mli.

¹⁴ Gbi gbɛkɛ ni enɔ jetsɛremɔ lɛ abaagbe Yesu lɛ, bɔfoi lɛ fɛɛ shi lɛ, ni “amɛjo foi.” (Mar. 14:50; Yoh. 16:32) Ŋwanejee ko bɛ he akɛ, enɛ hã amɛnijiaŋ je wui, ejaakɛ amɛnu he akɛ amɛbɔɔɔ mɔdɛŋ kwraa. Shi te Yesu kɛ amɛ ye ehã tɛŋŋ? Be ni atee lɛ shi lɛ sɛɛ etsɛɛɛ lɛ, ekɛɛ esɛɛnyiɛlɔi komɛi akɛ: “Nyɛkashea gbeyei!” Kɛkɛ ni etsu amɛ ni ‘amɛyabɔ enyɛmimɛi lɛ amaniɛ’ akɛ atee lɛ shi. (Mat. 28:10a) Wiemɔi ni Yesu kɛtsu nii lɛ hãa wɔnaa akɛ, eyɛ mli akɛ bɔfoi lɛ jo foi amɛshi lɛ moŋ, shi ekwaaa amɛ. Etsɛ amɛ akɛ, ‘enyɛmimɛi.’ Yesu kase Yehowa. Ena bɔfoi lɛ mɔbɔ, ni ekɛ amɛtɔmɔ lɛ ke amɛ.​—2 Maŋ. 13:23.

15. Te wɔnuɔ he wɔhãa tɛŋŋ yɛ wɔnyɛmimɛi ni ekpa shiɛmɔ yaa lɛ he?

¹⁵ Wɔ hu wɔsusuɔ mɛi ni ekpa shiɛmɔ yaa lɛ ahe waa; wɔnyɛmimɛi ji amɛ, ni wɔsumɔɔ amɛ waa. Wɔkaiɔ bɔ ni wɔnyɛmimɛi nɛɛ tsu nii waa yɛ Yehowa sɔɔmɔ lɛ mli. Amɛteŋ mɛi komɛi po yɛ ni amɛkɛ anɔkwayeli sɔmɔ Yehowa afii abɔ. (Heb. 6:10) Wɔhiɛ tseɔ amɛ waa! (Luka 15:4-7) Mɛɛ gbɛ nɔ wɔbaanyɛ wɔkase Yesu ni wɔhã amɛna akɛ amɛsane kã wɔtsui nɔ?

16. Mɛni ji nɔ kome ni wɔbaanyɛ wɔfee kɛtsɔɔ akɛ wɔnyɛmimɛi ni ekpa shiɛmɔ yaa lɛ asane kã wɔtsui nɔ?

¹⁶ Fɔ̃ɔ amɛ nine ni amɛba asafoŋ kpeei. Be ni Yesu bɔfoi lɛ anijiaŋ je wui lɛ, nɔ kome ni efee kɛwo amɛ hewalɛ ji, efɔ̃ amɛ nine ni amɛkɛ lɛ akpe. (Mat. 28:10b; 1 Kor. 15:6) Wɔ hu wɔbaanyɛ wɔfee nɔ ko ni tamɔ nakai. Kɛ́ wɔle mɛi ni ekpa shiɛmɔ yaa lɛ ateŋ mɛi komɛi ni baaa asafoŋ kpeei lɛ, wɔbaanyɛ wɔwo amɛ hewalɛ ni amɛfee nakai. Ekolɛ ehe baahia ni wɔfɔ̃ amɛ nine shii abɔ dani amɛbaaba. Ekã shi faŋŋ akɛ, be ni Yesu kaselɔi lɛ here eninefɔɔ lɛ nɔ ni amɛkɛ lɛ bakpe lɛ, ená miishɛɛ waa.​—Mat. 28:16; okɛto Luka 15:6 lɛ he.

17. Kɛ́ nyɛmi ko ni ekpa shiɛmɔ yaa lɛ ba asafoŋ kpeei lɛ, te esa akɛ wɔfee wɔnii wɔhã tɛŋŋ?

¹⁷ Heremɔ amɛ atuu. Be ni Yesu kaselɔi lɛ ba kpee ni etsɛ lɛ, ehere amɛ atuu. Lɛ klɛŋklɛŋ etsi ebɛŋkɛ amɛ ni ekɛ amɛ wie. (Mat. 28:18) Kɛ́ mɔ ko ni ekpa shiɛmɔ yaa lɛ ba Maŋtsɛyeli Asa lɛ nɔ lɛ, te esa akɛ wɔkɛ lɛ aye wɔhã tɛŋŋ? Esa akɛ wɔhere lɛ atuu. Kɛ́ wɔleee nɔ ni wɔbaawie po lɛ, wɔbaanyɛ wɔkɛɛ lɛ kɛkɛ akɛ, eŋɔɔ wɔnaa waa akɛ wɔna lɛ. Shi esa akɛ wɔkwɛ jogbaŋŋ ni wɔkawie nɔ ko ni baawo lɛ hiɛgbele.

18. Mɛni wɔbaanyɛ wɔfee kɛwo wɔnyɛmimɛi ni ekpa shiɛmɔ yaa lɛ hewalɛ?

¹⁸ Wo amɛ hewalɛ. Be ni Yesu kɛɛ ekaselɔi lɛ akɛ amɛyashiɛ yɛ je lɛŋ fɛɛ lɛ, ekolɛ amɛnu he akɛ nitsumɔ lɛ da fe amɛ. Shi Yesu wo amɛ hewalɛ. Ekɛɛ amɛ akɛ: “Mikɛ nyɛ yɛ gbii lɛ fɛɛ.” (Mat. 28:20) Ani nɔ ni ewie lɛ ye ebua kaselɔi lɛ? Hɛɛ. Be ni ekɛ amɛ wie lɛ sɛɛ etsɛɛɛ lɛ, amɛkɛ ekãa bɔi nitsɔɔmɔ, ni ‘amɛjaje sane kpakpa lɛ.’ (Bɔf. 5:42) Ekolɛ mɛi ni ekpa shiɛmɔ yaa lɛ baashe gbeyei akɛ amɛbaabɔi shiɛmɔ yaa ekoŋŋ. No hewɔ lɛ, ehe baahia ni wɔwo amɛ hewalɛ ni wɔhã amɛle akɛ, wɔshiŋ amɛ. Kɛ́ amɛbɔi shiɛmɔ yaa lɛ, wɔbaanyɛ wɔkɛ amɛ aya ni wɔye wɔbua amɛ, ni ŋwanejee ko bɛ he akɛ, amɛbaaná he miishɛɛ waa. Kɛ́ wɔhã mɛi ni ekpa shiɛmɔ yaa lɛ na akɛ amɛkã he amɛji wɔnyɛmimɛi Kristofoi lɛ, ekolɛ no baatsirɛ amɛ ni amɛbɔi shiɛmɔ yaa ekoŋŋ, ni no baahã asafo muu lɛ fɛɛ aná miishɛɛ.

19. Mɛni wɔmiisumɔ waa ni wɔfee? Ni mɛni hewɔ?

¹⁹ Mɛɛ be esa akɛ wɔtsu kaselɔfeemɔ nitsumɔ lɛ kɛyashi? Esa akɛ wɔtsu kɛyashi naagbee lɛ baaba. (Mat. 28:20; kwɛmɔ Wiemɔi Titrii Amligbalamɔ, “Shihilɛ gbɛjianɔtoo lɛ naagbee gbii lɛ.”) Ani wɔbaanyɛ wɔfee nakai? Hɛɛ, wɔbaanyɛ aahu! Wɔtswa wɔfai shi akɛ, wɔbaaya nɔ wɔjɛ wɔsuɔmɔ mli wɔkɛ wɔbe, wɔhewalɛ, kɛ wɔnibii ashã afɔle kɛtao ‘mɛi ni yɔɔ anɔkwale lɛ ni baanyɛ ahã amɛná naanɔ wala lɛ he tsui kpakpa lɛ.’ (Bɔf. 13:48) Kɛ́ wɔfee nakai lɛ, no baatsɔɔ akɛ wɔmiikase Yesu. Ewie akɛ: “Miniyenii ji akɛ mafee mɔ ni tsu mi lɛ suɔmɔnaa nii ni magbe enitsumɔ lɛ naa.” (Yoh. 4:34; 17:4) Wɔ hu wɔmiisumɔ waa ni wɔgbe nitsumɔ ni atu awo wɔdɛŋ lɛ naa. (Yoh. 20:21) Ni wɔmiisumɔ ni wɔkɛ mɛi ni ekpa shiɛmɔ yaa lɛ kɛ mɛi krokomɛi afee nakai.​—Mat. 24:13.

20. Yɛ nɔ ni awie yɛ Filipibii 4:13 lɛ naa lɛ, mɛni hewɔ wɔheɔ wɔyeɔ akɛ wɔbaanyɛ wɔtsu nitsumɔ ni Yesu kɛwo wɔdɛŋ lɛ wɔgbe naa?

²⁰ Nitsumɔ ni Yesu kɛwo wɔdɛŋ lɛ tsumɔ kãaa shi akɔɔɔ, shi jeee wɔ kome pɛ wɔtsuɔ. Biblia lɛ kɛɔ akɛ, “Nyɔŋmɔ nanemɛi nitsulɔi ji wɔ,” ni wɔkɛ Kristo efee ekome kɛmiitsu nii. (1 Kor. 3:9; 2 Kor. 2:17) Kɛ́ obaakai lɛ, Yesu wo shi akɛ ekɛ wɔ baahi shi. No hewɔ lɛ, wɔle akɛ wɔbaanyɛ wɔtsu nitsumɔ lɛ wɔgbe naa. Eji hegbɛ kpele ni wɔná akɛ wɔbaatsu nitsumɔ nɛɛ, ni wɔye wɔbua mɛi krokomɛi ni amɛ hu amɛfee nakai, ni enɛ hãa wɔmii shɛɔ wɔhe waa!​—Kanemɔ Filipibii 4:13.