Mɛni Tsiɔ Obaptisimɔ Gbɛ?
“Naa nu; mɛni tsiɔ mibaptisimɔ gbɛ?”—BƆFOI LƐ ASAJI 8:26
1. Mɛni ji nɔ ni yaa nɔ yɛ gbɛ ni ka Yerusalem kɛ Gaza teŋ lɛ nɔ?
YEHOWA bɔfo lɛ ewie ni nɔ ko ni sa kadimɔ miiya nɔ yɛ shia ŋa nɔ gbɛ ni ka Yerusalem kɛ Gaza teŋ lɛ nɔ. Etiopianyo ko ta shwiili mli kɛmiiya ni eekane Ŋmalɛi lɛ. Etsɛɛɛ kɛkɛ ni nuu ko hu jo foi kɛba eshwiili lɛ he. Ebi lɛ akɛ: “Ani oonu nɔ ni okaneɔ lɛ shishi lo?” Etiopianyo lɛ ha hetoo akɛ: “Te mafee tɛŋŋ manyɛŋ, akɛ ja mɔ ko tsɔɔ mi?” Sanekpakpashiɛlɔ Filipo ni bɔfo lɛ tsu lɛ lɛ ji mɔ ni tsɔɔ lɛ. Filipo kwɔ shwiili lɛ ni ekɛ gbalɛ ni Yesaia ŋma lɛ je shishi “ni ejaje Yesu he sanekpakpa lɛ etsɔɔ lɛ.”
2, 3. (a) Te Etiopianyo lɛ here sanekpakpa lɛ nɔ eha tɛŋŋ? (b) Mɛɛ sanebimɔi enɛ teɔ amɛ shi?
2 Ni ashɛ gbɛ lɛ nɔ he ko lɛ, Etiopianyo lɛ wo enaa nɔ ni ekɛɛ: “Naa nu, mɛni tsiɔ mibaptisimɔ gbɛ?” No hewɔ lɛ, efa akɛ shwiili lɛ awa. Mɛi enyɔ lɛ fɛɛ bote nu lɛ mli ni Filipo baptisi lɛ. Kɛkɛ ni Yehowa mumɔ lɛ nyiɛ sanekpakpashiɛlɔ lɛ hiɛ kɛtee he kroko ni Etiopianyo lɛ hu yi gbɛ etee kɛ miishɛɛ.—Bɔfoi lɛ Asaji 8:26-39.
3 Kɛji akɛ okɛ Yehowa Odasefoi miibɔ shi abaptisiko bo lɛ, ekolɛ nibii ni tee nɔ nɛɛ baakanya bo ni obi akɛ: Mɛni hewɔ ni abaptisi Etiopianyo lɛ mra nɛkɛ? Mɛɛ gbɛ nɔ esa akɛ atsɔ abaptisi mɔ ko? Mɛni he Okadi ji no? Ní mɛni tsiɔ mibaptisimɔ gbɛ?
Abaptisiii Lɛ Mra Tsɔ
4. Namɔ ji Etiopianyo nɛɛ?
4 Akɛni Etiopianyo lɛ “baho Yerusalem eyaja Nyɔŋmɔ” hewɔ lɛ, eji mɔ ko ni etsake ni ebatsɔ Yudafonyo ni afolɛ ketia. Eji “piafonyo” moŋ nɛ, shi jeee yɛ heloo gbɛfaŋ, ejaakɛ hii ni asa amɛ lɛ baaa Israelbii agwabɔɔ mli. (5 Mose 23:1) Yɛ egbɛfaŋ lɛ, “piafonyo” tsɔɔ onukpa, ejaakɛ eji ‘nuu ni abuɔ lɛ ni kwɛɔ Etiopiabii amaŋnyɛ Kandake jwetrii lɛ fɛɛ nɔ.’—Bɔfoi lɛ Asaji 8:27.
5. Mɛni hewɔ ni abaanyɛ abaptisi Etiopia piafonyo lɛ mra nɛkɛ?
5 Jeŋmajiaŋnyo ji nuu Etiopianyo nɛɛ. Shi kɛlɛ, akɛni atsake lɛ kɛba Yudafoi lɛ ajamɔ lɛ mli hewɔ lɛ, abaanyɛ abaptisi lɛ akɛ Kristo kaselɔ dani akɛ Maŋtsɛyeli shɛɛsane lɛ aha Jeŋmajiaŋbii foolɔi tamɔ Kornelio yɛ afi 36 Ŋ.B. Akɛ mɔ ko ni etsake ebatsɔ Yudanyo hewɔ lɛ, Etiopianyo nɛɛ le Nyɔŋmɔ kɛ e-Wiemɔ lɛ he sane, eyɛ mli moŋ akɛ mumɔŋ yelikɛbuamɔ he miihia lɛ. No hewɔ lɛ, afa Filipo ni eyashiɛ etsɔɔ nuu nɛɛ, ni ebaanyɛ ebaptisi lɛ dani sanekpakpa lɛ ayashɛ Jeŋmajiaŋbii lɛ adɛŋ.
Mra Be Mli Kristofoi Lɛ Abaptisimɔ
6. Mɛɛ gbɛ nɔ atsɔ ni abaptisi Etiopianyo lɛ, ni mɛni hewɔ ni ohaa hetoo nakai?
6 Mɛɛ gbɛ nɔ atsɔ abaptisi Etiopianyo lɛ? Wiemɔ “baptisi” lɛ jɛ Hela wiemɔ ba·ptiʹzo mli, ni eshishi ji ‘akɛtsɔ nu mli, amu mle.’ Nakai wiemɔ lɛ henɔ ko akɛtsu nii aha “atsɔ mli” ni jeɔ kpo yɛ 2 Maŋtsɛmɛi 5:14 lɛ yɛ Hela Septuagint Shishitsɔɔmɔ lɛ mli lɛ. Ni esa kadimɔ jogbaŋŋ akɛ Etiopianyo lɛ bi ni abaptisi lɛ yɛ be mli ni ekɛ Filipo bashɛ “nu ko he” lɛ. Bɔni afee ni abaptisi lɛ lɛ, amɛ fɛɛ “amɛtee nu lɛ mli,” ni sɛɛ mli lɛ “amɛje nu lɛ mli.” (Bɔfoi lɛ Asaji 8:36-39) No hewɔ lɛ, akɛ Etiopia piafonyo lɛ wo nu shishi ni abaptisi lɛ.
7. Mɛɛ nɔkwɛmɔ nɔ ni afee afɔ shi yɔɔ kɛha nu mli baptisimɔ?
7 Akɛ Yesu Kristo diɛŋtsɛ hu wo nu shishi ni abaptisi lɛ. No hewɔ lɛ, yɛ ebaptisimɔ yɛ Yordan Faa lɛ mli sɛɛ lɛ, awie akɛ “eje nu lɛ mli amrɔ eje kpo.” (Mateo 3:13, 16) Yɛ anɔkwale mli lɛ, Yohane Baptisilɔ lɛ hala he ko yɛ Yordan Jɔɔ lɛ mli yɛ Salim masɛi, ni jɛmɛ hi kɛha baptisimɔ. Mɛni hewɔ? “Ejaakɛ nu pii yɛ jɛmɛ.” (Yohane 3:23) No hewɔ lɛ Ŋmalɛi lɛ faa akɛ abaptisi mɔ yɛ nu ni bua shi mli.
8. Te abaanyɛ amu sane naa tɛŋŋ yɛ Farisifoi lɛ kɛ Yudafoi krokomɛi lɛ anifeemɔ he yɛ baptisimɔ he?
8 Wɔbaanyɛ wɔmu sane ni kɔɔ baptisimɔ he nɛɛ naa yɛ gbɛ ni ja nɔ kɛji wɔsusu Farisifoi lɛ kɛ Yudafoi krokomɛi lɛ akusumii ahe. Sanekpakpaŋmalɔ Marko wie akɛ: “Kɛ amɛjɛ jaranɔ amɛba lɛ, . . . ja amɛkɛ nu efɔ amɛhe [Hela, ran·tiʹzo] dani amɛyeɔ nii. Ni nii krokomɛi pii hu yɛ ni ato aha amɛ ni amɛfeɔ yɛ kpuji kɛ gbɛi kɛ ayawai abaptisimɔ [ba·pti·smous] hewɔ.” (Marko 7:3, 4, New World Translation) Nɛkɛ gbɔmɛi nɛɛ kɛ nu fɔɔ amɛhe kɛtsuɔ amɛhe dani amɛyeɔ nii kɛ amɛjɛ jara nɔ amɛba. Shi amɛbaptisiɔ, aloo amɛkɛ amɛniyeli nibii sɔrɔtoi lɛ fɛɛ woɔ nu mli.
9. Mɛni ji nɔ ni Tertullian kɛɛ yɛ baptisimɔ he?
9 Yɛ be mli ni hemɔkɛyeli kwamɔ ebabote mli sɛɛ po lɛ, Tertullian (aaafee 160-230) ni atsɛɔ lɛ akɛ “sɔlemɔ lɛ tsɛ” lɛ kɛɛ yɛ baptisimɔ he akɛ: “Nɔ ko nɔ ko bɛ ni baaha gbɔmɛi lɛ ajwɛŋmɔi akpiliŋ fe bɔ ni anaa ŋwɛi nitsumɔi ni yɔɔ mlɛo lɛ yɛ nifeemɔ lɛ mli lɛ, kɛ akɛto agbojee ni awo he shi yɛ naagbee lɛ he lɛ; hewɔ lɛ yɛ anɔkwale ni eji akɛ aafee yɛ gbɛ ni yɔɔ mlɛo nɔ, ni henɔwomɔ bɛ mli, ni atsɔɔɔ hiɛ asaaa he ehee, ni yɛ naagbee mli lɛ ni nyɔmɔbɔɔ baaa mli lɛ, akɛ mɔ lɛ woɔ nu lɛ shishi, yɛ be mli ni ajajeɔ wiemɔi fioo komɛi lɛ, akɛ nu shwaa enɔ, ni ewoɔ ehe nɔ ekoŋŋ, jeee ni ehe etse fioo (aloo kwraa po) fe tsutsu lɛ, akɛtsɔɔ akɛ enɛ ni akɛmaa naanɔ nɔ mi lɛ nyɛŋ afee nɔ ni abaanyɛ ahe aye.” Kadimɔ akɛ Tertullian kɛɛ akɛ “akɛ mɔ lɛ woɔ nu lɛ shishi . . . ni ewoɔ ehe nɔ ekoŋŋ.”
10. Mɛni ji nɔ ni nilelɔi kɛɔ yɛ gbɛ ni mra be mli Kristofoi lɛ tsɔɔ nɔ amɛbaptisiɔ lɛ he?
10 Woloŋlelɔi hu tsɔɔ akɛ Kristofoi lɛ je shishi amɛbaptisi mɛi kɛtsɔ mɔ lɛ ni amɛkɛ woɔ nu lɛ shishi lɛ nɔ. French ensaiklopedia ko ni ale jogbaŋŋ lɛ kɛɔ akɛ: “Abaptisi klɛŋklɛŋ Kristofoi lɛ kɛtsɔ numiimɔ nɔ yɛ he fɛɛ he ni amɛbaana nu yɛ. Ni The Catholic Encyclopedia lɛ kɛɔ akɛ: “Ŋwanejee ko bɛ he akɛ tsutsu gbɛ ni etsɛ fe fɛɛ ni akɛtsu nii ji numiimɔ.”—Kpo II, bf. 261 (Nɔ ni aŋma yɛ 1907 lɛ) .
Ni Atsɔɔ Nii Ni Abaptisi
11. Mɛɛ famɔ Yesu kɛha ekaselɔi lɛ?
11 Dani aaabaptisi mɔ ko lɛ, esa akɛ mɔ lɛ ana anɔkwale nilee ni etsu he nii. Afee enɛ faŋŋ yɛ be mli ni Kristo kɛɛ ekaselɔi lɛ akɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ Mumɔ Krɔŋkrɔŋ lɛ gbɛi amli, ni nyɛtsɔɔ amɛ ni amɛye nii fiaa ni mikɛɛ nyɛ lɛ nɔ. Ni naa, mi lɛ mikɛnyɛ yɛ daa kɛyashi jeŋ naagbee lɛ.”—Mateo 28:19, 20.
12. Ni aaabaptisi mɔ ko “yɛ Tsɛ lɛ gbɛi amli” lɛ tsɔɔ mɛni?
12 Ni aaabaptisi mɔ awo “Tsɛ lɛ gbɛi amli” lɛ tsɔɔ akɛ mɔ ni saa ehe kɛha baptisimɔ nɛɛ eyoo Nyɔŋmɔ gbɛhe kɛ hegbɛ. Akpɛlɛɔ nɔ akɛ Yehowa ji “Mɔ Ni Kwɔ Fe Fɛɛ yɛ shikpɔŋ lɛ nɔ fɛɛ,” Bɔlɔ kɛ Jeŋ Muu Fɛɛ Maŋtsɛ. (Lala 36:10; 83:19; 2 Maŋtsɛmɛi 19:15) Mɔ ni tamɔ nɛkɛ lɛ hu kpɛlɛɔ nɔ akɛ Yehowa ji e-Kojolɔ, Mlawolɔ, kɛ Maŋtsɛ.—Yesaia 33:22; Lala 119:102; Kpojiemɔ 15:3, 4.
13. Ní aaabaptisi mɔ ko ‘yɛ Bi lɛ gbɛi amli’ lɛ tsɔɔ mɛni?
13 Ni aaabaptisi mɔ ko yɛ Bi lɛ gbɛi amli lɛ tsɔɔ akɛ mɔ lɛ ekpɛlɛ Kristo gbɛhe kɛ ehewalɛ lɛ nɔ ni ekpɛlɛ enɔ hu akɛ mɔ nɔ ni Nyɔŋmɔ tsɔ ni ekɛ ‘kpɔmɔ nɔ ni sa’ lɛ ha lɛ. (1 Timoteo 2:5, 6) Yɛ Yesu gbele sɛɛ akɛ anɔkwayeli mlihiɛlɔ lɛ, “Nyɔŋmɔ wo enɔ gojoo,” no hewɔ lɛ esa akɛ mɛi ni taoɔ ni abaptisi amɛ lɛ akpɛlɛ Kristo nɔ akɛ “Nuŋtsɔ kɛwo Tsɛ Nyɔŋmɔ lɛ hiɛ nyam.” (Filipibii 2:9-11) Esa akɛ amɛkpɛlɛ Yesu nɔ akɛ Yehowa “Odasefonyo Anɔkwafo” kɛ agbɛnɛ akɛ “maŋtsɛmɛi a-Maŋtsɛ.”—Kpojiemɔ 1:5; 19:16.
14. Mɛni ebiɔ ni abaptisi mɔ ko ‘yɛ mumɔ krɔŋkrɔŋ lɛ gbɛi amli’?
14 Esa akɛ abaptisi mɔ lɛ hu ‘yɛ mumɔ krɔŋkrɔŋ lɛ gbɛi amli.’ Esa akɛ eyoo akɛ mumɔ krɔŋkrɔŋ lɛ jeee gbɔmɔ shi moŋ Nyɔŋmɔ hewalɛ ni ekɛtsuɔ nii, ni ekɛbɔ nibii fɛɛ, ni ekɛkudɔ Biblia ŋmalɔi lɛ, kɛ nibii krokomɛi hu. (1 Mose 1:2; 2 Samuel 23:1, 2; 2 Petro 1:21) Esa akɛ eyoo akɛ Nyɔŋmɔ mumɔ lɛ he miihia kɛji akɛ wɔbaanu “Nyɔŋmɔ nibii ni mli kwɔlɔ lɛ ashishi” ni wɔwo mumɔ lɛ yibii ni ji “suɔmɔ, miishɛɛ, hejɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ, kɛ hiɛshikamɔ” lɛ. (1 Korintobii 2:10; Galatabii 5:22, 23) Agbɛnɛ, kɛfata he hu lɛ, esa akɛ eyoo akɛ Nyɔŋmɔ mumɔ lɛ he miihia wɔ bɔni afee ni wɔtsu Maŋtsɛyeli-shiɛmɔ nitsumɔ lɛ.—Yoel 2:28, 29.
Nɔ Ni Baptisimɔ Feɔ He Mfoniri
15. Mɛni hewɔ ni Kristofoi abaptisimɔ lɛ fɔɔɔ mɔ he eshai kɛyaaa lɛ?
15 Mumɔ krɔŋkrɔŋ lɛ sɛɛfimɔ ji nɔ ni Yohane Baptisilɔ lɛ kɛmii mɛi anu lɛ. (Bɔfoi lɛ Asaji 13:24) Ebaptisi amɛ, jeee ni ekɛfɔ amɛhe eshai lɛ kɛya, shi moŋ akɛ amɛ tsuitsakemɔ lɛ he okadi. (Bɔfoi lɛ Asaji 19:4) Yohane baptisi Yesu hu, “mɔ ni efeee esha” lɛ. (1 Petro 2:22) Ni Anania wo Saul ni jɛ Tarso lɛ hewalɛ akɛɛ “Tee shi ni oha abaptisio, ni obo otsɛ Nuŋtsɔ [Yesu] gbɛi, ni afɔ ohe eshai lɛ ashwie ahao.” (Bɔfoi lɛ Asaji 22:12-16 New World Translation) No hewɔ lɛ, Kristofoia nu mli baptisimɔ lɛ ejieee mɔ he eshai kɛyaaa. Jeee baptisimɔ shi moŋ Yesu la ni afɔse ashwie shi lɛ kɛ ‘egbɛi lɛ tsɛmɔ’ kɛ eshaifaa baa.—Hebribii 9:22; 1 Yohane 1:7.
16. (a) Akɛni baptisimɔ fɔɔɔ mɔ he eshai kɛyaaa hewɔ lɛ, mɛni ji nɔ ni edamɔ shi kɛha? (b) Yɛ mfonirifeemɔ mli lɛ, mɛni ji nɔ ni baa kɛ abaptisi mɔ ko?
16 Eyɛ mli akɛ Kristofoi abaptisimɔ lɛ ejieee mɔ he eshai kɛyaaa moŋ, shi eji okadi ni tsɔɔ akɛ mɔ aŋkro lɛ ni akɛwoɔ nu lɛ shishi lɛ ejɔɔ ehe nɔ kwraa eha Yehowa Nyɔŋmɔ kɛtsɔ Yesu Kristo nɔ. (Okɛto Mateo 16:24 he.) Ni aaajɔɔ he nɔ lɛ tsɔɔ akɛ “ni ajaje, ama nɔ mi, ni akɛ he aha.” Henɔjɔɔmɔ kɛha Nyɔŋmɔ lɛ tsɔɔ nifeemɔ ni tsɔɔ akɛ mɔ lɛ kɛ ehe eha kwraa kɛtsɔ kpaŋmɔ nɔ akɛ ebaafee Nyɔŋmɔ suɔmɔnaa nii kɛtsɔ Kristo nɔ. Yɛ mfonirifeemɔ gbɛ nɔ lɛ, kɛ “afu” mɔ ni abaptisiɔ lɛ lɛ yɛ nu yɛ shishi ni asaa awo enɔ ekoŋŋ lɛ, egboɔ ehaa etsutsu shihilɛ gbɛ lɛ ni awoɔ enɔ kɛbaa wala shihilɛ hee mli, akɛ ebaafee Yehowa suɔmɔnaa nii kwraa.—Okɛto Romabii 6:4-6 he.
17. Mɛni hewɔ ni abifabii abaptismɔ ejaaa gbɛ lɛ?
17 Eyɛ faŋŋ akɛ baptisimɔ ji nifeemɔ ko ni hiɛdɔɔ yɔɔ mli. Abifabii abaptisimɔ ejaaa, ejaakɛ abifao nyɛŋ anu sane shishi, ni ekpɛ eyiŋ, ni ebatsɔ kaselɔ. (Mateo 28: 19, 20) Mɛi ni abaptisi yɛ Filipo sɔɔmɔ lɛ mli yɛ Samaria lɛ ji “hii kɛ yei” shi jeee abifabii. (Bɔfoi lɛ Asaji 8:4-8, 12) Baptisimɔ sa kɛha mɛi ni edara bɔ ni amɛaanyɛ amɛkase nii, amɛhe amɛye, ni amɛna hemɔkɛyeli. (Yohane 17:3; Bɔfoi lɛ Asaji 5:14; 18:8; Hebribii 11:6) Yɛ enɛ gbɛfaŋ lɛ, nyɔŋmɔjamɔ he yinɔsaneŋmalɔ Dr. Augustus Neander ŋma akɛ: “Hemɔkɛyeli kɛ baptisimɔ kɛ amɛhe tsaa be fɛɛ be; ni enɛ hewɔ ni etamɔ nɔ ni nakai eji . . . akɛ abifabii abaptisimɔ lɛ jeee nɔ ni ale [yɛ Ŋ.B. klɛŋklɛŋ afii oha lɛ mli]. . . . Odaseyeli ni tsɔɔ akɛ abayoo enɛ yɛ afii ohai etɛ lɛ mli gbɛ akɛ bɔfoi lɛ anifeemɔ lɛ teɔ shi ewoɔ ni efiii sɛɛ akɛ bɔfoi lɛ je shishi.”—History of the Planting and Training of the Christian Church by the Apostles (New York, 1864) , baafa 162.
18. (a) Yɛ Ŋmalɛ naa lɛ, mɛni he hiaa dani mɔ ko abafee Yehowa Odasefoi lɛ ateŋ mɔ kome? (b) Mɛɛ hemɔkɛyeli kpojiemɔ baatsɔɔ akɛ abaanyɛ abaptisi mɔ ko? (d) Mɛɛ gbɛ nɔ amaa hemɔkɛyeli yɛ kpɔmɔ nɔ lɛ mli nɔ mi ahaa mɛi ni esaa amɛhe kɛha baptisimɔ lɛ?
18 Ŋmalɛi lɛ wieɔ heyelilɔi ni abaptisi amɛ lɛ ahe shii abɔ. (Bɔfoi lɛ Asaji 4:4; 5:14; 8:13; 16:27-34; 18:8; 19:1-7) No hewɔ lɛ, dani mɔ ko baatsɔ Yehowa Odasefoi lɛ ateŋ mɔ kome lɛ, esa akɛ mɔ lɛ afee heyelilɔ—mɔ ko ni yɔɔ hemɔkɛyeli ni abaptisi lɛ. Shi dani baptisimɔ lɛ aaaba lɛ, nakai hemɔkɛyeli lɛ jieɔ ehe kpo yɛ jeŋba ni Nyɔŋmɔ gbeyeishemɔ yɔɔ mli lɛ mli, hekɛnɔfɔɔ yɛ Yehowa mli, gbɛfaŋnɔ ni ebaana yɛ Maŋtsɛyeli-shiɛmɔ nitsumɔ lɛ mli, kɛ Yesu afɔleshaa lɛ nɔkpɛlɛmɔ. Amaa hemɔkɛyeli yɛ kpɔmɔ afɔleshaa lɛ mli nɔ mi ahaa mɛi ni taoɔ ni abaptisi amɛ lɛ, ejaakɛ sanebimɔi enyɔ ni wielɔ lɛ biɔ amɛ lɛ ateŋ klɛŋklɛŋ nɔ ji: “Ani oshwa ohe yɛ ohe eshai lɛ amli ni ojɔɔ ohe nɔ oha Yehowa akɛ obaafee esuɔmɔnaa nii yɛ Yesu Kristo afɔleshaa lɛ hewɔ?” Ja mɔ lɛ eha hetoo akɛ hɛɛ ni agbɛnɛ hu enuɔ shishi akɛ ehenɔjɔɔmɔ kɛ baptisimɔ lɛ haa aleɔ lɛ akɛ Yehowa Odasefoi asafo ni Nyɔŋmɔ mumɔ lɛ kudɔɔ lɛ ateŋ mɔ kome dani abaanyɛ akpɛlɛ enɔ kɛha nu mli baptisimɔ.
Henɔjɔɔmɔ Yɛ Sɔlemɔ Mli
19. Mɛni hewɔ ni esa akɛ ojɔɔ ohe nɔ oha Yehowa yɛ sɔlemɔ mli lɛ?
19 Esa akɛ mɛi ni abaptisiɔ amɛ lɛ ana Nyɔŋmɔ kɛ Kristo mli hemɔkɛyeli. Shi mɛni hewɔ ni Yehowa Odasefoi kɛɔ akɛ esa akɛ ajɔɔ he nɔ aha Nyɔŋmɔ yɛ sɔlemɔ mli lɛ? Ejaakɛ eja gbɛ akɛ wɔɔjaje wɔyiŋkpɛɛ lɛ wɔtsɔɔ Yehowa yɛ sɔlemɔ mli akɛ wɔkɛ henɔjɔɔmɔ kwraa ni sa ekome lɛ baaha lɛ. (5 Mose 5:8, 9; 1 Kronika 29:10-13) Eka shi faŋŋ akɛ Yesu tsɔ sɔlemɔ nɔ ejie bɔ ni eshweɔ akɛ ekɛ sɔɔmɔ krɔŋŋ baaha eŋwɛi Tsɛ lɛ pɛ lɛ kpo. (Hebribii 10:7-9) Hɛɛ, ni beni abaptisiɔ lɛ lɛ, no mli lɛ Yesu ‘miisɔle’! (Luka 3:21, 22) No hewɔ lɛ eyɛ faŋŋ akɛ esa akɛ afee henɔjɔɔmɔ kɛha Nyɔŋmɔ lɛ yɛ sɔlemɔ mli.
20. Mɛni hewɔ ni etamɔ ni nɔ mra be mli Kristofoi lɛ wo kaselɔi lɛ ekaa koni amɛjɔɔ amɛhe nɔ amɛha Nyɔŋmɔ yɛ sɔlemɔ mli lɛ?
20 Etamɔ nɔ ni mra be mli Kristofoi lɛ wo kaselɔi heei lɛ ekaa ni amɛjɔɔ amɛhe nɔ yɛ sɔlemɔ mli, ejaakɛ sɛɛ mli lɛ Tertullian kɛɛ akɛ: “Esa akɛ amɛ mɛi ni taoɔ abote baptisimɔ mli lɛ asɔle daa, kɛ ŋmaahilɛ, kɛ shikulamɔ.” Mra mli lɛ, Justin Martyr (100-165 Ŋ.B.) ŋma akɛ: “Mi hu matsɔɔ gbɛ ni wɔtsɔ nɔ wɔjɔɔ wɔhe nɔ wɔha Nyɔŋmɔ be mli ni afee wɔ ehee kɛtsɔ Kristo nɔ lɛ. . . . Afaa mɛi fɛɛ ni akanyaa amɛ ni amɛheɔ nɔ ni wɔshiɛɔ ni wɔjajeɔ lɛ amɛyeɔ akɛ anɔkwale, ni amɛbɔɔ mɔdɛŋ akɛ amɛaahi shi yɛ naa lɛ ni amɛsɔle ni amɛkpa Nyɔŋmɔ fai yɛ ŋmaahilɛ mli, ni ekɛ amɛtsutsu eshai lɛ ake amɛ, ni wɔkɛ amɛ sɔleɔ ni wɔkɛ amɛ hiɔ ŋmaa.”
21. Kɛji akɛ yɛ be mli ni abaptisi wɔ yɛ afii komɛi ni eho nɛɛ lɛ amli lɛ amaaa henɔjɔɔmɔ yɛ sɔlemɔ mli nɔ mi lɛ, te ebaanyɛ ebalɛ tɛŋŋ?
21 Kɛji akɛ amaaa henɔjɔɔmɔ yɛ sɔlemɔ mli nɔ mi yɛ be mli ni abaptisi wɔ afii babaoo ni eho nɛ lɛ, no efeee wɔbaptisimɔ lɛ efolo. Ŋwanejee ko bɛ he akɛ, yɛ nakai bei lɛ amli lɛ, mɛi babaoo ji mɛi ni tamɔ nuu ko ni kaiɔ bɔ ni ekula shi ni ejɔɔ ehe nɔ eha Yehowa yɛ sɔlemɔ ni mli wa mli yɛ be mli ni eji gbekɛ nuu, aaafee nɔ ni fe afii 40 nɛ lɛ. Ni yɛ nakai bei lɛ amli lɛ, kɛji mɔ ko tsɔko hiɛ ejɔko ehe nɔ yɛ sɔlemɔ mli yɛ faŋŋ mli lɛ, ekɛ sane lɛ woɔ sɔlemɔ mli yɛ be mli ni mɛi ni abaabaptisi amɛ lɛ kɛ mɛi krokomɛi ni eshwɛ lɛ sɔleɔ kutuu yɛ be mli ni aha baptisimɔ maŋshiɛmɔ lɛ agbe naa yɛ ebaptisimɔ gbi lɛ nɔ lɛ.
Nɔ Hewɔ Ni Mɛi Komɛi Kɛ Amɛhe Wooo Mli
22. Mɛni hewɔ ni mɛi komɛi tsiɔ amɛbaptisimɔ naa lɛ?
22 Akɛni eji hegbɛ ni jɔɔmɔ yɔɔ mli kɛ mɔ ko ji Yehowa Odasefonyo hewɔ lɛ, mɛni hewɔ mɛi komɛi kɛ amɛhe wooo mli ni abaptisi amɛ lɛ? Suɔmɔ krɔŋŋ ni amɛbɛ ji yiŋtoo kome hewɔ ni mɛi komɛi yeee Nyɔŋmɔ Wiemɔ lɛ nɔ, ni amɛnyiɛɛɛ Yesu sɛɛ ni abaptisi amɛ lɛ. (1 Yohane 5:3) Eji anɔkwale akɛ mɛi ni abaptisiko amɛ lɛ ekɛɛɛ akɛ amɛnyiɛŋ Yesu nɔkwɛmɔ nɔ lɛ sɛɛ aloo amɛboŋ Nyɔŋmɔ toi. Shi moŋ, amɛkɛ amɛhe woɔ je lɛŋ saji amli vii aahu akɛ bei fioo ko pɛ amɛnaa amɛhaa mumɔŋ nibii asɛɛtiumɔ. Kɛji enɛ baanyɛ afee onaagba lɛ, ani ejeee nilee gbɛ akɛ oootsake nibii ni onyaa he, ni onaa amɛhe miishɛɛ, ni okɛmamɔ ohiɛ lɛ? Mɛi ni sumɔɔ Nyɔŋmɔ diɛŋtsɛ lɛ nyɛŋ asumɔ je lɛ hu. (1 Yohane 2:15-17) Ni kaaŋmɛ gbɛ ni “nii pii ahe lakamɔ” lɛ miigbala bo kɛmiiwo amale shweshweeshwe shihilɛ mli. (Mateo 13:22) Anaa anɔkwale shweshweeshwe shihilɛ lɛ yɛ henɔjɔɔmɔ mli wekukpaa ni kaa mɔ kɛ Yehowa Nyɔŋmɔ teŋ lɛ pɛ mli.—Lala 4:9.
23. Mɛni hewɔ ni mɛi krokomɛi tsiɔ amɛhe kɛjɛɔ henɔjɔɔmɔ kɛha Yehowa kɛ ehe okadifeemɔ kɛtsɔ numiimɔ nɔ lɛ he lɛ?
23 Mɛi krokomɛi hu kɛɔ akɛ amɛsumɔɔ Nyɔŋmɔ shi amɛjɔɔɔ amɛhe nɔ amɛhaaa lɛ ejaakɛ amɛnuɔ he akɛ enɛ feemɔ kɛ sɔ ko efɔŋ amɛnɔ ni amɛbuŋ amɛhe akɔntaa. Amɛmiisumɔ ni amɛhi Paradeiso shi amrɔ nɛɛ ehe nɔ ko bibioo pɛ amɛfeɔ aloo amɛfeee he nɔ ko kwraa po. (Abɛi 13:4) Nɛkɛ gbɔmɛi nɛɛ nyɛŋ amɛjo akɔntaabuu naa foi ejaakɛ sɔ̃ lɛ bakã amɛnɔ yɛ be mli ni amɛnu Yehowa wiemɔ lɛ. (Ezekiel 33:7-9) Eji amɛaajɔɔ amɛhe nɔ kulɛ, amɛaatsɔɔ akɛ amɛnuɔ Nyɔŋmɔ suɔmɔnaa nii lɛ shishi, ni amɛmiisumɔ ni amɛfee. Ni ekɛ jatsu ni tsii aaafɔ amɛnɔ moŋ lɛ, nɛkɛ toiboo nɛɛ kɛ Yehowa jɔɔmɔi baaba ni miishɛɛ baajɛ mli aba ejaakɛ amɛbaahi shi yɛ amɛwiemɔ akɛ amɛsumɔɔ lɛ lɛ naa.
24. Mɛɛ yiŋtoo hewɔ ni lolo lɛ mɛi komɛi tsiɔ amɛbaptisimɔ naa lɛ?
24 Mɛi krokomɛi hu nuɔ he akɛ nɔ ni amɛle lɛ faaa bɔ ni amɛkɛaatsɔɔ Ŋmalɛi lɛ amli ni etsiɔ amɛgbɛ ni amɛkpoɔ baptisimɔ. Shi Etiopia piafonyo lɛ fee klalo akɛ ebaafee ehenɔjɔɔmɔ kɛha Nyɔŋmɔ lɛ he Okadi yɛ be mli ni Filipo kɛ lɛ esusu nii ahe yɛ shwiili lɛ mli lɛ. Hɛɛ, eka shi faŋŋ akɛ shishijee mli lɛ, Etiopianyo lɛ nyɛɛɛ aha mɛi ni ekɛwie anɔkwale lɛ he lɛ asanebimɔi lɛ fɛɛ ahetoo. Shi etsui yi obɔ kɛ hiɛsɔɔ yɛ nɔ ni enu lɛ hewɔ ni ekɛ gbeyeishemɔ etsiii ehe naa. “Gbeyeishemɔ bɛ suɔmɔ mli, shi moŋ suɔmɔ ni eye emuu lɛ shwieɔ gbeyeishemɔ.” (1 Yohane 4:18) Jeee yitso ni saji ahetoi eyi lɛ obɔ, shi moŋ tsui ni eyi obɔ kɛ suɔmɔ ji nɔ ni tsirɛɔ mɔ koni ejɔɔ ehe nɔ eha Nyɔŋmɔ ni abaptisi lɛ.—Luka 10:25-28.
25. Mɛni ji nɔ ni Yehowa Nyɔŋmɔ kpaa gbɛ yɛ mɛi ni kɛɔ akɛ amɛsumɔɔ lɛ lɛ agbɛfaŋ?
25 Kɛji abaptisiko bo lɛ, bi ohe akɛ: Mɛni ji nɔ ni Nyɔŋmɔ kpaa gbɛ yɛ mɛi ni kɛɔ akɛ amɛsumɔɔ lɛ lɛ agbɛfaŋ? Eetao he ni atuɔ ahaa ekome too ni eetao mɛi ni baaja lɛ yɛ “mumɔ kɛ anɔkwale” mli. (Yohane 4:23, 24; 2 Mose 20:4, 5; Luka 4:8) Etiopia piafonyo lɛ kɛ jamɔ ni tamɔ nakai ha, ni eshashaooo shi yɛ be mli ni akɛ hegbɛ lɛ ha lɛ ni ena baptisimɔ lɛ. Ani esaaa akɛ ohaa henɔjɔɔmɔ kɛha Yehowa feɔ nɔ ni osɔleɔ waa yɛ he kɛ hiɛdɔɔ amrɔ nɛɛ ni obi ohe akɛ: “Mɛni tsiɔ mibaptisimɔ naa” lo?
Sanebimɔi Ni Akɛtiɔ Mli
◻ Mɛni hewɔ ni abaanyɛ abaptisi Etiopia piafonyo lɛ mra nɛkɛ?
◻ Mɛɛ gbɛ nɔ atsɔɔ abaptisiɔ mɔ yɛ mra be mii Kristofoi Iɛ abei Iɛ amii?
◻ Ni aaabaptisi mɔ yɛ Tsɛ lɛ kɛ Bi Iɛ kɛ mumɔ krɔŋkrɔŋ Iɛ gbɛi amli Iɛ tsɔɔ mɛni?
◻ Kristofoi abaptisimɔ Iɛ feɔ mɛni he mfoniri?
◻ Mɛni hewɔ ni esa akɛ ajɔɔ he nɔ aha Yehowa yɛ sɔlemɔ mli Iɛ?
◻ Mɛɛ yiŋtoi ahewɔ ni mɛi komɛi tsiɔ amɛhe naa yɛ henɔjɔɔmɔ kɛ baptisimɔ he lɛ?