Jalɛ Jeee Kɛtsɔ Blema Saji Ni Akɛ Naabu Jaje Lɛ Anɔ

“Kɛji nyɛjalɛ lɛ faaa tekeee woloŋmalɔi kɛ Farisifoi anɔ lɛ nɔ lɛ, nyɛboteŋ ŋwɛi maŋtsɛyeli lɛ mli kwraa.”​—MATEO 5:⁠20.

 1, 2. Mɛni ba yɛ be fioo ni tsɔ Yesu Gɔŋ nɔ Shiɛmɔ lɛ hiɛ lɛ mli?

YESU eye jenamɔ lɛ yɛ gɔŋ ko nɔ. Ŋwɛi ni ŋulamii eyi jɛmɛ obɔ lɛ mli elɛɛ yɛ eyiteŋ. Kooloi bibii ni jeɔ kpo yɛ jenamɔ mli lɛ miibolɔ blɛoo yɛ jwɛi lɛ amli. Galilea Ŋshɔ lɛ yɛ boka gbɛ ni eeku blɛoo ni emli nui lɛ miishwie ŋshɔ lɛ naa. Shi ekolɛ Yesu jwɛŋmɔ ba nɛkɛ toiŋjɔlɛ, kɛ nibii fɛfɛji ni ebɔle ehe kɛkpe nɛɛ anɔ yɛ gbɛ bibioo pɛ nɔ. Eye jenamɔ muu lɛ fɛɛ ni ekɛsɔle eha eŋwɛi Tsɛ lɛ, Yehowa. E-Tsɛ lɛ gbɛtsɔɔmɔ he miihia lɛ. Gbi ni ka ehiɛ kɛbaa lɛ he miihia waa.

² Ni jeŋ bɔi tsemɔ yɛ boka gbɛ. Loofɔji bɔi filikimɔ kɛmiiya kɛmiiba, ni amɛmiibolɔ blɛoo. Kɔɔyɔɔ hu miitswa fɔfɔii ni ekwɛ yɛ jwɛi lɛ amli lɛ blɛoo. Beni hulu la lɛ mli klɛŋklɛŋ nɔ gbala kɛjɛ atatui lɛ asɛɛ lɛ, kɛkɛ ni Yesu tsɛ ekaselɔi lɛ kɛba ni ehala mɛi 12 kɛjɛ amɛteŋ koni amɛfee ebɔfoi. Kɛkɛ ni, ekɛ amɛ fɛɛ tsa mulu kɛkpeleke shi kɛba gɔŋ lɛ shishi gbɛ. No mli lɛ aana gbɔmɛi asafo babaoo ko ni amɛke yuu kɛjɛ Galilea, Tiro kɛ Sidon, Yudea kɛ Yerusalem. Amɛba koni atsa amɛhelai lɛ. Hewalɛ ni jɛ Yehowa ŋɔɔ miiho kɛmiijɛ Yesu mli, yɛ be mli ni mɛi pii taraa ehe ni etsaa amɛ lɛ. Amɛba koni amɛbabo ewiemɔi ni tamɔ tsofa ni tsaa amɛsusumai ni ehao lɛ hu toi.​—Mateo 4:​25; Luka 6:​12-19.

 3. Mɛni hewɔ ni kaselɔi lɛ kɛ gbɔmɛi asafo babaoo lɛ kpaa nɔ ko gbɛ beni Yesu je shishi ebɔi wiemɔ lɛ?

³ Kɛ rabifoi lɛ miitsɔɔ nii yɛ nitsɔɔmɔ hei lɛ, nɔ ni amɛfɔɔ feemɔ daa ji ni amɛtara shi, ni yɛ nɛkɛ agbiɛnaa gbi titri nɛɛ leebi mli yɛ afi 31 Ŋ.B. lɛ, nakai ji bɔ ni Yesu fee, ekolɛ yɛ gɔŋ lɛ afa ko ni yɔɔ tɛtrɛɛ lɛ nɔ. Beni ekaselɔi lɛ kɛ asafo babaoo lɛ na enɛ lɛ, amɛyoo akɛ amɛnine baashɛ nɔ titri ko nɔ, no hewɔ lɛ amɛbua amɛhe naa kɛbɔle lɛ ni amɛmiikpa enɛ gbɛ. Beni eje shishi ebɔi wiemɔ lɛ, no mli lɛ amɛmiikpa ewiemɔi lɛ agbɛ; beni ewie egbe naa yɛ no sɛɛ be fioo mli lɛ, nɔ ni amɛnu lɛ ha amɛnaa kpɛ amɛhe. Nyɛhaa wɔkwɛa nɔ hewɔ.​—Mateo 7:⁠28.

Jalɛi Sɔrɔtoi Enyɔ

 4. (a) Mɛɛ jalɛi sɔrɔtoi enyɔ he baje sane lɛ mli lɛ? (b) Mɛni ji yiŋtoo ni yɔɔ blema saji ni akɛ naabu jajeɔ lɛ he, ni ani nakai yiŋtoi lɛ ye omanye?

⁴ Yesu kɛ kuui sɔrɔtoi enyɔ komɛi to amɛhe yɛ gbɛ ni yɔɔ faŋŋ nɔ, yɛ e-Gɔŋ nɔ Shiɛmɔ, ni aŋma yɛ Mateo 5:​1–7:29 kɛ Luka 6:​17-49 lɛ mli: woloŋmalɔi lɛ kɛ Farisifoi lɛ kɛ agbɛnɛ gbɔmɛi foji ni amɛnyɛɔ amɛnɔ lɛ. Ewie jalɛi sɔrɔtoi enyɔ he, Farisifoi lɛ asato jalɛ lɛ kɛ Nyɔŋmɔ anɔkwa jalɛ lɛ. (Mateo 5:​6, 20) Farisifoi lɛ ahe ni amɛbuɔ jalɔi lɛ damɔ blema saji ni akɛ naabu wieɔ atsɔɔ lɛ anɔ. Aje enɛ feemɔ shishi yɛ afii ohai enyɔ D.Ŋ.B. lɛ mli gbɛ akɛ “afabaŋ ni afo awo Mla lɛ he” bɔni afee ni ebu he kɛjɛ Helabii anifeemɔ (Hela blema saji) ni gbɛɔ eshwaa lɛ he. Amɛbatsɔmɔ Mla lɛ fa ni abuɔ amɛ akɛ nakai amɛji. Yɛ anɔkwale mli lɛ, woloŋmalɔi lɛ po buɔ blema saji ni akɛ naabu wieɔ atsɔɔ nɛɛ akɛ amɛnɔ kwɔlɔ fe Mla ni aŋma lɛ po. Mishnah lɛ kɛɔ akɛ: “Abuɔ Woloŋmalɔi lɛ awiemɔi [amɛ blema saji ni akɛ naabu wieɔ atsɔɔ] lɛ anɔ yeli akɛ nɔ ni hiɛdɔɔ yɔɔ he waa fe bɔ ni abuɔ Mla ni aŋma afɔ shi lɛ nɔ yeli.” No hewɔ lɛ, ni amɛ blema saji lɛ aaafee “afabaŋ ni afo awo Mla lɛ he” koni ebu he moŋ lɛ, eha Mla lɛ gbɔjɔ ni ebaafee nɔ ni sɛɛnamɔ ko bɛ he, taakɛ bɔ ni Yesu kɛɛ lɛ pɛpɛɛpɛ: “Gbɛ po nyɛje nyɛkwa Nyɔŋmɔ kita lɛ, koni nyɛye nyɛ blema sane lɛ nɔ.”​—Marko 7:​6, 9; Mateo 15:​1-9.

 5. (a) Mɛni ji shihilɛ mli ni mɛi foji ni ba koni amɛbabo Yesu toi lɛ yɔɔ, ni te woloŋmalɔi lɛ kɛ Farisifoi lɛ buɔ amɛ amɛhaa tɛŋŋ? (b) Mɛni ha blema saji lɛ bafee tamɔ jatsui ni tsii ni jwere mɛi ni tsuɔ nii lɛ akɔji anɔ lɛ?

⁵ Gbɔmɛi foji ni ba babaoo koni amɛbabo Yesu toi lɛ ji mɛi komɛi ni aha amɛtsɔmɔ mumɔŋ ohiafoi, ni “etɔ amɛ ni amɛfee yuuyaa tamɔ tooi ni bɛ kwɛlɔ;” (Mateo 9:36) Woloŋmalɔi lɛ kɛ Farisifoi lɛ kɛ amɛ henɔwomɔ kɛ hewoo lɛ ebuuu amɛ kwraa, ni amɛtsɛɔ amɛ ʽam ha·ʼaʹrets (shikpɔŋ lɛ nɔ bii), ni amɛkɛ heguɔgbee buɔ amɛ akɛ mɛi ni leee nɔ ko nɔ ko, kɛ eshafeelɔi ni alomɔ amɛ ni amɛsaaa gbohii ashitee ejaakɛ amɛyeee blema saji ni akɛ naabu jajeɔ atsɔɔ lɛ nɔ. Beni shɛɔ Yesu bei amli lɛ, no mli lɛ blema saji nɛɛ efa babaoo ni etsɔ mla naa nɔnyɛɛ tsɔne ni akɛduɔ mɛi ni bɛ nilee lɛ​—ni eyi obɔ kɛ kusum nifeemɔi ni heɔ bei babaoo​—aahu akɛ enyɛɛɛ ebalɛ akɛ mɔ ko ni tsuɔ nii lɛ baanyɛ aye nɔ kɔkɔɔkɔ. Ŋwanejee ko bɛ he akɛ no hewɔ ni Yesu wie eshi blema saji lɛ ni etsɛ lɛ ‘jatsui ni tsii ni afimɔ ashwie mɛi akɔji anɔ’ lɛ.​—Mateo 23:4; Yohane 7:​45-49.

 6. Mɛni yɔɔ Yesu shishijee wiemɔi lɛ amli ni haa mɔ he jɔ̃ɔ lɛ, ni mɛɛ tsakemɔi etsɔɔ kɛhaa ekaselɔi lɛ kɛ agbɛnɛ kɛha woloŋmalɔi lɛ kɛ Farisifoi lɛ?

⁶ No hewɔ lɛ beni Yesu yata gɔŋ lɛ shishi lɛ, mɛi ni tsi bɛŋkɛ lɛ kpaakpa koni amɛbo lɛ toi lɛ ji ekaselɔi lɛ kɛ asafoi babaoo ni aha hɔmɔ eye amɛ yɛ mumɔŋ lɛ. Ekolɛ gbɔmɛi nɛɛ anaa kpɛ amɛhe yɛ hiɛkpamɔ wiemɔi ni ejaje lɛ ahewɔ. ‘Miishɛɛ ji ohiafoi lɛ, miishɛɛ ji mɛi ni hɔmɔ yeɔ amɛ lɛ, miishɛɛ ji mɛi ni foɔ lɛ, miishɛɛ ji mɛi ni anyɛɔ amɛ lɛ.’ Shi namɛi baanyɛ ana miishɛɛ kɛji amɛmiiye ohia, hɔmɔ miiye amɛ, ni amɛmiifo, ni aanyɛ amɛ? Ni ejaje kpoo etsɔɔ mɛi ni yɔɔ nii babaoo, mɛi ni yeɔ niyenii kpakpa, mɛi ni ŋmɔɔ, kɛ mɛi ni asumɔɔ amɛsane lɛ! (Luka 6:​20-26) Yesu tsɔ nibii ni abuɔ akɛ nibii kpakpai kɛ adesai ashihilɛ mli nibii ni akpɛlɛɔ nɔ lɛ fɛɛ sɛɛsɛɛ yɛ wiemɔi fioo ko pɛ mli. Ebafee gbɛhei atsakemɔ sɛɛsɛɛ yɛ gbɛ ni yɔɔ naakpɛɛ nɔ, yɛ wiemɔi ni Yesu wie yɛ sɛɛ mli lɛ kɛ gbeekpamɔ naa: “Mɔ fɛɛ mɔ ni woɔ ehe nɔ lɛ, aaaba lɛ shi; shi mɔ ni baa ehe shi lɛ, aaawo enɔ.”​—Luka 18:​9-14.

 7. Mɛɛ hewalɛ Yesu wiemɔi lɛ na yɛ gbɔmɛi asafoi babaoo ni mumɔŋ hɔmɔ yeɔ amɛ ni boɔ Yesu toi lɛ anɔ?

⁷ Kɛ akɛ mɛnɛɛmɛi to woloŋmalɔi kɛ Farisifoi ni amɛshihilɛ sa amɛhiɛ lɛ ahe lɛ, mɛi ni ba Yesu ŋɔɔ yɛ nɛkɛ leebi nɛɛ le amɛmumɔŋ shihilɛ ni yɔɔ mɔbɔ lɛ. Wiemɔi ni ekɛ je shishi lɛ ha amɛ hiɛnɔkamɔ: “Miishɛɛ ji mɛi ni hiɛ yɔɔ amɛmumɔŋ hiamɔ nii anɔ lɛ, ejaakɛ amɛnɔ ji ŋwɛi maŋtsɛyeli lɛ.” Ni kwɛ bɔ ni amɛmumɔ aaanya hu yɛ be mli ni etsa nɔ akɛ: “Miishɛɛ ji mɛi ni jalɛ he hɔmɔ kɛ kumai yeɔ amɛ lɛ, ejaakɛ amɛaatɔrɔ” lɛ! (Mateo 5:​3, 6; Yohane 6:​35; Kpojiemɔ 7:​16, 17) Amɛaatɔrɔ kɛ jalɛ, hɛɛ, shi jeee kɛ Farisifoi lɛ anɔ lɛ eko.

Ni Aaafee “Jalɔi yɛ Gbɔmɛi Ahiɛ” lɛ Kɛkɛ Faaa

 8. Mɛni hewɔ ni ekolɛ mɛi komɛi ahiɛ baafee amɛ yaa yɛ bɔ ni amɛaafee ni amɛjalɛ lɛ afa fe woloŋmalɔi lɛ kɛ Farisifoi lɛ anɔ lɛ, ni kɛlɛ mɛni hewɔ ni esa akɛ ebalɛ nakai lɛ?

⁸ Yesu kɛɛ: “Kɛji nyɛjalɛ lɛ faaa tekeee woloŋmalɔi kɛ Farisifoi anɔ lɛ nɔ lɛ, nyɛboteŋ ŋwɛi maŋtsɛyeli lɛ mli kwraa.” (Mateo 5:​17-20; kwɛmɔ Marko 2:​23-28; 3:​1-6; 7:​1-13 hu.) Ekolɛ mɛi komɛi po baasusu akɛ: ‘Ni wɔfe Farisifoi lɛ jalɔi? Amɛhiɔ ŋmaa ni amɛsɔleɔ ni amɛhaa mlijaa nyɔŋma ni amɛkeɔ nii ni amɛkɛ amɛshihilɛ be fɛɛ kaseɔ Mla lɛ hu. Te aaafee tɛŋŋ ni wɔjalɛ lɛ aaafe amɛnɔ lɛ hu?’ Shi esa akɛ efa kwraa fe nakai. Ekolɛ gbɔmɛi adesai buɔ Farisifoi lɛ akɛ mɛi ni nɔ kwɔlɔ waa, shi Nyɔŋmɔ ebuuu amɛ nakai. Yɛ be kroko hu mli lɛ, Yesu kɛɛ nɛkɛ Farisifoi nɛɛ akɛ: “Nyɛ ji mɛi ni nyɛbuɔ nyɛhe jalɔi yɛ gbɔmɛi ahiɛ lɛ, shi Nyɔŋmɔ lɛ ele nyɛtsuiiaŋ; ejaakɛ nɔ ni ji gojoo yɛ gbɔmɛi ateŋ lɛ, nihiinii ni yɛ Nyɔŋmɔ hiɛ.”​—Luka 16:​15, New World Translation.

 9-11. (a) Mɛni ji gbɛ kome ni woloŋmalɔi lɛ kɛ Farisifoi lɛ susuɔ akɛ amɛaanyɛ amɛtsɔ nɔ amɛna jalɛ shidaamɔ yɛ Nyɔŋmɔ hiɛ? (b) Mɛɛ gbɛ ni ji enyɔ amɛsusuɔ akɛ amɛaanyɛ amɛtsɔ nɔ amɛna jalɛ? (d) Mɛni ji gbɛ ni ji etɛ ni amɛkɛ amɛhiɛ fɔɔ nɔ, ni mɛni ji nɔ ni bɔfo Paulo kɛɛ ni haa enɛ feɔ efolo?

⁹ Rabifoi lɛ efee amɛ diɛŋtsɛ amɛmlai ni amɛdamɔɔ nɔ amɛkɛnaa jalɛ. Ekome ji sa ni amɛsusuɔ akɛ amɛsa yɛ Abraham seshibii ni amɛji lɛ hewɔ: “Wɔtsɛ Abraham kaselɔi lɛ naa je nɛɛ mli miishɛɛ ni amɛnine baashɛ jeŋ ni baaba lɛ hu nɔ.” (Mishnah) Ekolɛ enɛ hewɔ ni Yohane Baptisilɔ lɛ bɔ Farisifoi ni ba eŋɔɔ lɛ kɔkɔ, koni ekɛte shi ewo enɛ lɛ: “Belɛ nyɛwoa yibii ni sa tsuitsakemɔ mɔ! Ni nyɛkasusua yɛ nyɛmli ni nyɛkɛɛ akɛ: ‘Wɔ lɛ wɔtsɛ ji Abraham [tamɔ nɔ ni no kɛkɛ fa].’”​—Mateo 3:​7-9; kwɛmɔ Yohane 8:​33, 39 hu.

¹⁰ Gbɛ ni ji enyɔ ni amɛkɛɔ akɛ atsɔɔ nɔ anaa jalɛ ji, kɛtsɔ nikee nɔ. Apocrypha loo woji ni abuɔ amɛ krɔŋkrɔŋ shi amɛjeee Biblia mli woji lɛ fa ni Yudafoi ni abuɔ amɛ Nyɔŋmɔ jalɔi lɛ ŋmala yɛ afii ohai enyɔ D.Ŋ.B. lɛ mli lɛ jieɔ blema saji amli susumɔ nɛɛ kpo. Wiemɔ nɛɛ ekome jeɔ kpo yɛ Tobit mli akɛ: “Nikee hereɔ mɔ yiwala kɛjɛɔ gbele mli ni ejieɔ eshai fɛɛ kɛyaa.” (12:​9, The New Amɛrican Bible) Sirach Wolo Lɛ (Ecclesiasticus) kɛ enɛ kpaa gbee: “Nu gbeɔ la ni miitso girigiri, ni nikeenii kpataa ehaa esha.”​—3:​29, NAB.

¹¹ Gbɛ ni ji etɛ ni amɛtsɔɔ nɔ amɛtaoɔ jalɛ ji kɛtsɔ Mla lɛ he nitsumɔi anɔ. Amɛ blema saji ni akɛ naabui jajeɔ lɛ tsɔɔ akɛ kɛji mɔ ko nitsumɔi lɛ amli pii ji nitsumɔi kpakpai lɛ, no lɛ abaahere eyiwala. Kojomɔ “damɔ nitsumɔi babaoo ni atsu kɛteke nɔ akɛ nitsumɔi kpakpai aloo nitsumɔi gbohii lɛ anɔ.” (Mishnah) Akɛni amɛmiitao ni abu amɛ bem yɛ kojomɔ mli hewɔ lɛ, nɔ ni amɛsusuɔ he waa ji “ni amɛfee nibii ni sa ni baafa fe eshai ni amɛfee.” Kɛji mɔ ko nitsumɔi kpakpai lɛ fa kɛteke enitsumɔi fɔji lɛ kɛ yibɔ kome po lɛ, abaahere eyiwala​—tamɔ nɔ ni Nyɔŋmɔ kaneɔ amɛnitsumɔi bibii lɛ fɛɛ ekomekome ni edamɔɔ nɔ ekojoɔ! (Mateo 23:​23, 24) Yɛ be mli ni Paulo kɛ susumɔ ni ja lɛ haa lɛ, eŋma akɛ: “No hewɔ lɛ atsɔŋ mla nitsumɔ nɔ abuŋ heloo ko heloo ko bem yɛ [Nyɔŋmɔ] hiɛ.” (Romabii 3:20) Belɛ, eka shi faŋŋ akɛ esa akɛ Kristofoi ajalɛ lɛ afa babaoo kɛteke nɔ fe woloŋmalɔi lɛ kɛ Farisifoi lɛ anɔ lɛ!

“Nyɛnu Akɛ Akɛɛ”

12. (a) Mɛɛ tsakemɔ ko Yesu fee yɛ e-Gɔŋ nɔ Shiɛmɔ lɛ mli yɛ gbɛ ni etsɔɔ nɔ ejeɔ wiemɔi ni etsɛɔ sɛɛ kɛjɛɔ Hebri Ŋmalɛi lɛ amli lɛ ashishi lɛ mli, ni mɛni hewɔ? (b) Mɛni ni ji nɔ ni wɔkaseɔ kɛjɛɔ wiemɔ ni ji “Nyɛnu akɛ akɛɛ” ni ekɛtsu nii nɔ ni ji shii ekpaa nɔ lɛ mli?

¹² Beni Yesu tsɛ wiemɔi asɛɛ kɛjɛ Hebri Ŋmalɛi lɛ amli kɛtsɔ hiɛ yɛ be ko mli lɛ, ekɛɛ: “Aŋma akɛ.” (Mateo 4:​4, 7, 10) Shi yɛ Gɔŋ nɔ Shiɛmɔ lɛ mli lɛ, ekɛ wiemɔi ni tamɔ nɔ ni jɛ Hebri Ŋmalɛi lɛ amli lɛ fata he shii ekpaa sɔŋŋ kɛ nɛkɛ wiemɔi nɛɛ: “Akɛɛ akɛ.” (Mateo 5:​21, 27, 31, 33, 38, 43) Mɛni hewɔ? Ejaakɛ eewie Ŋmalɛi lɛ ahe yɛ bɔ ni atsɔɔ shishi ahaa yɛ Farisifoi lɛ ablema saji ni teɔ shi woɔ Nyɔŋmɔ kitai lɛ ashishinumɔ naa lɛ naa. (5 Mose 4:2; Mateo 15:⁠3) Enɛ jeɔ kpo faŋŋ yɛ Yesu wiemɔ ni ji ekpaa kɛ naagbee nɔ ni atsɛ yisɛɛ yɛ enɛɛmɛi amli lɛ mli: “Nyɛnu akɛ, akɛɛ akɛ: ‘Suɔmɔ onaanyo, ni onyɛ ohenyɛlɔ.’” Shi Mose mlai lɛ ateŋ eko eko ekɛɛɛ akɛ: “Onyɛ ohenyɛlɔ.” Woloŋmalɔi lɛ kɛ Farisifoi lɛ ji mɛi ni kɛɛ. Nakai ji bɔ ni amɛtsɔɔ Mla ni tsɔɔ akɛ osumɔ onaanyo lɛ shishi​—onaanyo Yudafonyo, ni jeee mɛi krokomɛi.

13. Mɛɛ gbɛ nɔ Yesu bɔ kɔkɔ eshi jeŋba ni baanyɛ eje gbɔmɔgbee diɛŋtsɛ po shishi lɛ yɛ?

¹³ Agbɛnɛ susumɔ wiemɔi ekpaa ni tsara nɔ lɛ amli klɛŋklɛŋ nɔ lɛ he okwɛ. Yesu jaje akɛ: “Nyɛnu akɛ, akɛɛ blemabii lɛ akɛ: ‘Kaagbe gbɔmɔ! Shi mɔ fɛɛ mɔ ni aaagbe gbɔmɔ lɛ, eeeye kojomɔ lɛŋ fɔ.’ Shi mi lɛ, miikɛɛ nyɛ akɛ: Mɔ fɛɛ mɔ ni mli fuɔ enyɛmi yaka lɛ, eeeye kojomɔ lɛŋ fɔ.” (Mateo 5:​21, 22) Mlifu ni akɛwoɔ tsui mli lɛ baanyɛ ekɛ jɛmɔ wiemɔi aba ni no sɛɛ lɛ ekɛ mɔ baaya fɔbuu kojomɔ mli, ni yɛ naagbee lɛ ebaanyɛ ekɛ mɔ awo gbɔmɔgbee nifeemɔ mli diɛŋtsɛ. Mlifu ni ahaa ehiɔ tsui mli ni esɛɛ tsɛɔ babaoo lɛ baanyɛ aye awui: “Mɔ fɛɛ mɔ ni nyɛɔ enyɛmi lɛ, gbɔmɔgbelɔ ji lɛ.”​—1 Yohane 3:⁠15.

14. Mɛɛ gbɛ nɔ Yesu woɔ wɔ ŋaa koni wɔkaje shishi akɛ wɔmiikɔ gbɛ ni baanyɛ ekɛwɔ aya gbalafitemɔ mli lɛ yɛ?

¹⁴ Yesu tee nɔ ni ekɛɛ: “Nyɛnu akɛ akɛɛ blemabii lɛ akɛ: ‘Kaafite gbala!’ Shi mi lɛ, miikɛɛ nyɛ akɛ: Mɔ fɛɛ mɔ ni kwɛɔ yoo ni ehe feɔ lɛ akɔnɔ lɛ, ekɛ lɛ efite gbala momo yɛ etsui mli.” (Mateo 5:​27, 28) Ofiteŋ gbala? No lɛ esaaa ni oyiɔ gbɛ lɛ nɔ kwraa po kɛtsɔ ehe susumɔi ni oooha ahi ojwɛŋmɔ mli lɛ nɔ. Esa akɛ obu otsui he, he ni nɛkɛ nibii nɛɛ naa amɛshishijee kɛjɛɔ lɛ. (Abɛi 4:​23; Mateo 15:​18, 19) Yakobo 1:​14, 16 bɔɔ kɔkɔ akɛ: “Shi mɔ fɛɛ mɔ lɛ, lɛ diɛŋtsɛ ekɔnɔ ni gbalaa lɛ ni lakaa lɛ lɛ kaa lɛ. No sɛɛ lɛ akɔnɔ lɛ, kɛ eŋɔ hɔ lɛ, efɔɔ esha, ni esha lɛ hu, kɛ afee agbe naa lɛ, efɔɔ gbele.” Bei komɛi lɛ, mɛi komɛi kɛɔ akɛ: ‘Kaaje nɔ ni onyɛŋ ogbe naa lɛ shishi.’ Shi yɛ enɛ mli lɛ esa akɛ wɔkɛɛ akɛ: ‘Kaaje nɔ ni onyɛŋ okpa lɛ shishi.’ Mɛi komɛi ni be ko mli lɛ amɛye anɔkwa yɛ be mli ni akɛ tutswaa gbele woɔ amɛhe gbeyei po lɛ eyanyɔ nɛkɛ bɔlɛnamɔ mli jeŋba shara ni lakaa mɔ kɛyaa awuiyeli mli yɛ gbɛ nigii nɔ nɛɛ mli.

15. Mɛɛ gbɛ nɔ esoro shidaamɔ ni Yesu kɔ yɛ yooshwiemɔ he lɛ yɛ nɔ ni awie yɛ Yudafoi ablema saji lɛ amli lɛ yɛ?

¹⁵ Agbɛnɛ wɔmiiba Yesu wiemɔ ni ji etɛ lɛ nɔ. Ekɛɛ: “Asaŋ akɛɛ akɛ: ‘Mɔ fɛɛ mɔ ni aaashwie eŋa lɛ, eha lɛ shwiemɔ wolo.’ Shi mi lɛ, miikɛɛ nyɛ akɛ: Mɔ fɛɛ mɔ ni aaashwie eŋa ni jeee ajwamaŋbɔɔ sane hewɔŋ lɛ, ehaa no fiteɔ gbala; ni mɔ fɛɛ mɔ ni aaawɛ mɔ ni ashwie lɛ [ni ji, mɔ ko ni ashwie lɛ yɛ yiŋtoo kroko ni jeee bɔlɛnamɔ mli jeŋba shara hewɔ] lɛ, efite gbala.” (Mateo 5:​31, 32) Yudafoi lɛ ekomɛi yeɔ amɛŋamɛi kutumpoɔ ni amɛshwieɔ amɛ yɛ saji bibii ni he ehiaaa lɛ po ahewɔ. (Maleaki 2:​13-16; Mateo 19:​3-9) Blema saji ni akɛ naabu jajeɔ atsɔɔ lɛ ŋmɛɔ gbɛ ni nuu ashwie eŋa “kɛji efite eniyenii po eha lɛ” aloo “kɛji ena mɔ kroko ni hewolo ka fe lɛ lɛ.”​—Mishnah.

16. Mɛɛ Yudafoi lɛ anifeemɔ ko ha kitakamɔ bafee efolo lɛ, ni mɛɛ shidaamɔ Yesu kɔ yɛ enɛ he?

¹⁶ Yesu tee nɔ yɛ nakai gbɛ nɔ nɔŋŋ akɛ: “Asaŋ nyɛnu akɛ, akɛɛ blemabii lɛ akɛ: ‘Kaakã amale kita,’ . . . Shi mi lɛ, miikɛɛ nyɛ akɛ: Nyɛkakaa kita kwraa!” Yɛ nɛkɛ be nɛɛ mli lɛ, no mli lɛ Yudafoi lɛ kɛ kita-kamɔ miitsu nii yɛ gbɛ fɔŋ nɔ ni amɛmiikamɔ kitai babaoo yɛ nibii ni he ehiaaa ahe ni amɛyeee nɔ hu. Shi yesu kɛɛ: “Nyɛkakãa kitaa kwraa! . . . Shi nyɛhaa nyɛwiemɔ afea: Hɛɛ, hɛɛ! Dabi, dabi!” Emla lɛ yɛ mlɛo: Ye anɔkwa yɛ bei fɛɛ mli, ni ehe ehiaaa ni okɛ kitakamɔ ama owiemɔi anɔ mi. Shi kitakamɔi oha saji ni he hiaa waa lɛ.​—Mateo 5:​33-37; okɛto 23:​16-22 he.

17. Mɛɛ gbɛ ni hi fe “akɛ hiŋmɛi ato hiŋmɛi najiaŋ, ni akɛ nyanyɔŋ hu ato nyanyɔŋ najiaŋ” Yesu tsɔɔ?

¹⁷ Ni Yesu tee nɔ ekɛɛ: “Nyɛnu akɛ akɛɛ: ‘Akɛ hiŋmɛi ato hiŋmɛi najiaŋ; ni akɛ nyanyɔŋ ato nyanyɔŋ najiaŋ.’ Shi mi lɛ, miikɛɛ nyɛ akɛ: Nyɛkakua efɔŋ lɛ naa; shi moŋ mɔ fɛɛ mɔ ni aaagba oninejurɔ toiŋ lɛ, tsɔ eko lɛ hu oha lɛ.” (Mateo 5:​38-42) Jeee toigbamɔ kɛ yiŋtoo akɛ akɛmiiye awui ji nɔ ni Yesu wieɔ he lɛ, shi moŋ jɛmɔ toigbamɔ ni akɛ ninesɛɛ gbaa lɛ. Kaashwie ohiɛ shi kɛtsɔ jɛmɔ ni ooojɛ mɔ lɛ oto najiaŋ lɛ nɔ. Okɛ efɔŋ akato efɔŋ najiaŋ. Shi moŋ, okɛ ekpakpa ato najiaŋ koni otsɔ no nɔ “okɛ ekpakpafeemɔ aye efɔŋ nɔ kunim.”​—Romabii 12:​17-21.

18. (a) Mɛɛ gbɛ nɔ Yudafoi lɛ tsake mla ni kɔɔ onaanyo ni ooosumɔ lɛ lɛ he lɛ yɛ, shi mɛɛ gbɛ nɔ Yesu te shi wo enɛ yɛ? (b) Mɛni ji hetoo ni Yesu kɛha mlalelɔ ko ni taoɔ atsɔɔ akɛ wiemɔ “naanyo” lɛ kɔɔ mɛi fioo ko pɛ he lɛ?

¹⁸ Yesu tsɔɔ bɔ ni rabifoi lɛ ablema saji lɛ eha Mose Mla lɛ egbɔjɔ kwraa lɛ mli faŋŋ yɛ enɔkwɛmɔ nɔ ni ji ekpaa kɛ naagbee nɔ lɛ mli akɛ: “Nyɛnu akɛ, akɛɛ akɛ: ‘Suɔmɔ onaanyo, ni onyɛ ohenyɛlɔ.’ Shi mi lɛ, miikɛɛ nyɛ akɛ: Nyɛsumɔa nyɛhenyɛlɔi, nyɛjɔa mɛi ni lomɔɔ nyɛ, nyɛfea mɛi ni nyɛɔ nyɛ lɛ ekpakpa, ni nyɛsɔlea nyɛhaa mɛi ni haoɔ nyɛ ni amɛwaa nyɛ yi lɛ.” (Mateo 5:​43, 44) Mose Mla ni aŋma afɔ shi lɛ kɛ husu ko wooo suɔmɔ he: “Suɔmɔ onaanyo, taakɛ bɔ ni osumɔɔ bo diɛŋtsɛ ohe lɛ.” (3 Mose 19:18) Farisifoi lɛ ji mɛi ni tsiɔ nɛkɛ kita nɛɛ naa, ni akɛni amɛmiitao amɛjo foi yɛ naa hewɔ lɛ, amɛtsi wiemɔ ni ji “naanyo” lɛ naa akɛ etsɔɔ mɛi ni yeɔ blema saji lɛ anɔ lɛ pɛ. Nakai ji bɔ ni eji, no hewɔ ni sɛɛ mli beni Yesu kai mlalelɔ ko kita ni kɛɔ akɛ ‘suɔmɔ onaanyo, tamɔ bɔ ni osumɔɔ bo diɛŋtsɛ ohe’ lɛ, nuu lɛ jo naa foi ni ebi akɛ: “Ni namɔ ji minaanyo?” lɛ. Yesu kɛ Samarianyo ejurɔfeelɔ lɛ he abɛbua lɛ ha lɛ hetoo​—feemɔ ohe naanyo oha mɔ ni ohe hiaa lɛ lɛ.​—Luka 10:​25-37.

19. Mɛɛ gbɛ ni Yehowa tsɔɔ nɔ ekɛ mɛi fɔji yeɔ Yesu jie yi eha wɔ ni wɔnyiɛ sɛɛ?

¹⁹ Beni Yesu yaa nɔ kɛ eshiɛmɔ lɛ, ejaje akɛ ‘Nyɔŋmɔ jieɔ suɔmɔ kpo etsɔɔ mɛi fɔji. Ehaa hulu tsoɔ haa amɛ ni enugbɔnɛmɔ hu shwieɔ amɛnɔ. Nɔ ko sɔrɔto ko bɛ suɔmɔ ni ooosumɔ mɛi ni sumɔɔ bo lɛ mli. Mɛi fɔji lɛ hu feɔ nakai. Yiŋtoo ko bɛ ni aaadamɔ nɔ akpa nyɔmɔwoo gbɛ yɛ no hewɔ. Nyɛhaa mɛi alea akɛ Nyɔŋmɔ bii ji nyɛ. Nyɛfea bɔ ni efeɔ lɛ. Feemɔ ohe naanyo oha mɛi fɛɛ ni osumɔ onaanyo hu. Koni nyɛtsɔa no nɔ “nyɛhia kɛwulaa shi tamɔ bɔ ni nyɛ-Tsɛ ni yɔɔ ŋwɛi lɛ hi kɛwula shi lɛ.’” (Mateo 5:​45-48) Mɛɛ shishitoo tɛ ni nɔ kwɔ ni esa akɛ ahi shi yɛ naa enɛ ji nɛkɛ! Ni kwɛ bɔ ni ehaa anaa bɔ ni woloŋmalɔi lɛ kɛ Farisifoi lɛ ajalɛ lɛ eyaaa shɔŋŋ kwraa lɛ ehaa!

20. Ni Yesu kɛ Mose Mla lɛ aaafɔ afa moŋ lɛ, mɛɛ gbɛ nɔ etsɔ elɛɛ hewalɛ ni enaa lɛ mli ni eha emli kwɔ ni eha enɔ kwɔ po fe tsutsu lɛ yɛ?

²⁰ No hewɔ lɛ beni Yesu tsɛ wiemɔi asɛɛ kɛjɛ Mla lɛ mli ni ekɛ wiemɔi “Shi mi lɛ, miikɛɛ nyɛ akɛ” lɛ fata he lɛ, jeee ni eetsi Mose Mla lɛ eefɔ afa ni ekɛ nɔ kroko miito najiaŋ. Dabi, shi moŋ eeha hewalɛ ni yɔɔ mli lɛ mli miikwɔ ni eelɛɛ hu kɛtsɔ tsɔɔmɔ ni etsɔɔ yiŋtoo ni yɔɔ sɛɛ lɛ nɔ. Mla ni nɔ kwɔ ni ji nyɛmimɛi ashihilɛ lɛ kojoɔ yiwalɛ jwɛŋmɔ ni anaa lɛ akɛ eji gbɔmɔgbee. Mla ni nɔ kwɔ ni ji jeŋba mli hetsemɔ lɛ buɔ bɔlɛnamɔ mli susumɔi ni anaa lɛ hu fɔ akɛ eji gbalafitemɔ. Gbalashihilɛ he mla ni nɔ kwɔ lɛ kpooɔ yooshwiemɔ ni yiŋtoo kpakpa bɛ sɛɛ lɛ hu akɛ nɔ ni kɛ gbalafitemɔ ni haa aboteɔ gbalashihilɛ mli ekoŋŋ hu baa. Mla ni nɔ kwɔ ni ji anɔkwayeli lɛ haa anaa akɛ kitai ni akaa babaoo lɛ ahe ehiaaa. Mla ni nɔ kwɔ ni ji mlijɔlɛ lɛ tsiɔ najiaŋtoo emaa afa. Mla ni nɔ kwɔ ni ji suɔmɔ lɛ biɔ ni ajie Nyɔŋmɔ mla naa suɔmɔ ni husui bɛ he lɛ kpo.

21. Mɛni Yesu ŋaawoo lɛ jie lɛ kpo yɛ jalɔi ni rabifoi lɛ buɔ amɛhe lɛ he, ni mɛɛ nɔ kroko hu gbɔmɛi asafoi babaoo lɛ baakase?

²¹ Mɛɛ hewalɛ ni mli wa nɛkɛ ŋaawoo wiemɔi ni anuko da nɛɛ baana yɛ mɛi lɛ anɔ nɛkɛ yɛ be mli ni wiemɔi nɛɛ boteɔ amɛtoiiaŋ klɛŋklɛŋ kwraa lɛ! Kwɛ bɔ ni amɛhaa osatofeemɔ ni amɛkɛbuɔ amɛhe jalɔi yɛ nyɔji ni amɛtsɔmɔ amɛha rabifoi ablema saji lɛ hewɔ lɛ feɔ efolo ehaa! Shi yɛ be mli ni Yesu yaa nɔ yɛ e-Gɔŋ nɔ Shiɛmɔ lɛ mli lolo lɛ, gbɔmɛi babaoo ni Nyɔŋmɔ jalɛ lɛ he hɔmɔ kɛ kumai yeɔ amɛ lɛ baakase gbɛ pɔtɛɛ ni amɛaatsɔ nɔ ni amɛnine ashɛ nɔ, taakɛ nikasemɔ ni nyiɛ sɛɛ lɛ baatsɔɔ lɛ.

 1, 2. Mɛni woloŋmalɔi lɛ kɛ Farisifoi lɛ ha nifeemɔi ni hi diɛŋtsɛ lɛ batsɔmɔ, ni mɛɛ kɔkɔbɔɔ Yesu ha esɛɛnyiɛlɔi lɛ?

WOLOŊMALƆI lɛ kɛ Farisifoi lɛ taoɔ jalɛ yɛ amɛ diɛŋtsɛ amɛgbɛ nɔ, ni enɛ jeee Nyɔŋmɔ gbɛ. Jeee enɛ pɛ kɛkɛ, shi kɛji amɛtsu nitsumɔi ni ja po lɛ, amɛhaa etsɔɔ osatofeemɔ nitsumɔi bɔni afee ni gbɔmɛi adesai ana. Jeee Nyɔŋmɔ amɛsɔmɔɔ, shi moŋ amɛ diɛŋtsɛ amɛyakayaka nii lɛ. Yesu bɔ ekaselɔi lɛ kɔkɔ eshi nɛkɛ nii ni afeɔ atsɔɔ nɛɛ akɛ: “Nyɛkwɛa ni ahia ni nyɛkafea nyɛjalɛ lɛ yɛ gbɔmɛi ahiɛ, koni amɛna nyɛ; no lɛ, nyɛbɛ nyɛ-Tsɛ ni yɔɔ ŋwɛi lɛ ŋɔɔ nyɔmɔwoo ko.”​—Mateo 6:⁠1.

² Yehowa hiɛ sɔɔ mɛi ni feɔ ohiafoi lɛ ejurɔ lɛ​—shi jeee mɛi ni feɔ taakɛ Farisifoi lɛ feɔ lɛ. Yesu bɔ ekaselɔi lɛ kɔkɔ eshi amɛ nifeemɔ gbɛ nɛɛ ni amɛaakɔ lɛ: “No hewɔ lɛ kɛ oofee ejurɔ lɛ, kaakpa tɛtrɛmaŋtɛrɛ yɛ ohiɛ, taakɛ bɔ ni osatofoi lɛ feɔ yɛ kpee hei lɛ kɛ blohui lɛ amli, koni gbɔmɛi ajie amɛyi lɛ. Lɛlɛŋ, miikɛɛ nyɛ akɛ: Amɛnine eshɛ amɛnyɔmɔwoo nɔ momo.”​—Mateo 6:⁠2.

 3. (a) Mɛɛ gbɛ nɔ woloŋmalɔi lɛ kɛ Farisifoi lɛ anine shɛ amɛnyɔmɔwoo nɔ kwraa yɛ yɛ nikeenii ni amɛkɛhaa lɛ hewɔ? (b) Mɛɛ gbɛ nɔ esoro shidaamɔ ni Yesu kɔ yɛ nikee he lɛ kwraa yɛ?

³ Hela wiemɔ ni akɛtsu nii aha “amɛnine eshɛ . . . nɔ momo” (a·peʹkho) lɛ ji wiemɔ ko ni afɔɔ kɛ nitsumɔ yɛ woji ni akɛtsɔɔ nibii ni nine eshɛ nɔ lɛ amli. Bɔ ni akɛtsu nii yɛ Gɔŋ nɔ Shiɛmɔ lɛ mli lɛ tsɔɔ akɛ “amɛnine eshɛ amɛnyɔmɔwoo nɔ,” ni tsɔɔ akɛ, “amɛkɛ amɛnine ewo wolo shishi kɛmiitsɔɔ akɛ amɛnyɔmɔwoo eshɛ amɛdɛŋ: hegbɛ ni amɛyɔɔ akɛ amɛnine ashɛ nyɔmɔwoo nɔ lɛ eba mli, tamɔ nɔ ni amɛŋma wolo kɛha akɛ amɛnine eshɛ nɔ pɛpɛɛpɛ.” (An Expository Dictionary of New Testament Words, ni W. E. Vine fee lɛ) Amɛbakãa nikeenii ni amɛkɛbaake ohiafoi lɛ ahe kita yɛ gbɛjegbɛi anɔ yɛ faŋŋ mli. Atsiɔ mɛi ni kɛ nibii lɛ keɔ lɛ agbɛi ata yɛ kpee hei lɛ amli. Awoɔ mɛi ni kɛ nibii wuji bakeɔ lɛ ahiɛ nyam yɛ gbɛi pɔtɛɛ anɔ kɛtsɔ shitaramɔ hei ni ahaa amɛ kɛbɛŋkɛɔ rabifoi lɛ yɛ be mli ni amɛjaa lɛ nɔ. Amɛkɛ nibii lɛ keɔ bɔni afee ni gbɔmɛi ana amɛ; gbɔmɛi naa amɛ ni amɛwoɔ amɛhiɛ nyam; ni no hewɔ lɛ amɛbaanyɛ amɛkɛdi nyɔmɔwoo ni amɛnine shɛɔ nɔ lɛ yɛ nikeenii ni amɛkɛhaa lɛ hewɔ lɛ akɛ “Awo Amɛ Nyɔmɔ lɛ Fɛɛ Kɛmɔ Shi.” Kwɛ bɔ ni shidaamɔ ni Yesu kɔ yɛ enɛ he lɛ yɔɔ sɔrɔto ha: Okɛ enikeenii lɛ aha yɛ “teemɔ mli, ni o-Tsɛ lɛ ni naa teemɔ mli nii lɛ diɛŋtsɛ aaawoo nyɔmɔ yɛ faŋŋ.”​—Mateo 6:​3, 4; Abɛi 19:⁠17.

Sɔlemɔi ni Saa Nyɔŋmɔ Hiɛ

 4. Mɛni hewɔ ni Farisifoi lɛ asɔlemɔi lɛ ha Yesu tsɛ nɛkɛ hii nɛɛ akɛ osatofoi lɛ?

⁴ Yehowa hiɛ sɔɔ sɔlemɔi ni akɛhaa lɛ lɛ ​—shi jeee nɔ ni asɔleɔ tamɔ bɔ ni Farisifoi lɛ sɔleɔ lɛ. Yesu kɛɛ esɛɛnyiɛlɔi lɛ akɛ: “Ni kɛ oosɔle lɛ, kaatamɔ osatofoi lɛ; shi amɛsumɔɔ akɛ amɛdamɔ kpee hei lɛ kɛ gbɛjegbɛi akoji lɛ anaa amɛsɔle, koni mɛi ana amɛ. Lɛlɛŋ, miikɛɛ nyɛ akɛ: amɛnine eshɛ amɛnyɔmɔwoo nɔ momo.” (Mateo 6:⁠5) Farisifoi lɛ yɛ sɔlemɔi babaoo ni amɛbaakɛɛ daa gbi, yɛ bei pɔtɛɛ komɛi amli, ni he ni amɛyɔɔ lɛ kɔɔɔ he eko. Kulɛ yɛ mla naa lɛ, esa akɛ amɛkɛha yɛ teemɔŋ. Shi kɛlɛ, amɛtsɔ ŋaatsɔɔ nɔ ni amɛyaje “gbɛjegbɛi lɛ akoji lɛ anaa,” koni kɛ eshɛ ŋmɛlɛtswaa ni asɔleɔ lɛ, mɛi ni hoɔ yaa kɛjɛ koji sɔrɔtoi ejwɛ lɛ fɛɛ ana amɛ.

 5. (a) Mɛɛ nifeemɔi krokomɛi haaa ni Nyɔŋmɔ abo Farisifoi lɛ asɔlemɔi atoi lɛ? (b) Mɛni nibii Yesu kɛye gbɛhe yɛ esɔlemɔ nɔkwɛmɔ nɔ lɛ amli, ni ani gbɔmɛi kɛ enɛ kpaa gbee ŋmɛnɛ?

⁵ “Lakpatoo hewɔ ni amɛsɔleɔ sɔlemɔi kakadaji lɛ,” bɔni afee hu ni amɛkɛjie amɛ apasa krɔŋkrɔŋ feemɔ lɛ kpo amɛtsɔɔ. (Luka 20:47) Blema saji ni akɛ naabu jaje lɛ ateŋ ekome kɛɔ akɛ: “Blemabii ni jɔɔ amɛhe nɔ jogbaŋŋ amɛha jamɔ lɛ mɛɔ aaafee ŋmɛlɛtswaa kome dani amɛkɛɔ Tefillah [sɔlemɔ] lɛ.’ (Mishnah) Yɛ nakai beaŋ lɛ, amɛyɛ nɔmimaa akɛ mɔ fɛɛ mɔ baana bɔ ni amɛtuu amɛhe amɛha jamɔ lɛ koni efee amɛ naakpɛɛ! Sɔlemɔi ni tamɔ nɛkɛ eyaaa ŋwɛi kɛtekeee amɛ diɛŋtsɛ amɛyitsei po. Yesu kɛɛ asɔle yɛ teemɔ mli, ni akati saji kometoo lɛ mli bɔ ni he ehiaaa, ni ekɛ ehe nɔkwɛmɔ nɔ ko ni yɔɔ mlɛo ha. (Mateo 6:​6-8; Yohane 14:​6, 14; 1 Petro 3:12) Sɔlemɔ he nɔkwɛmɔ nɔ ni Yesu kɛha lɛ kɛ klɛŋklɛŋ nibii yeɔ klɛŋklɛŋ gbɛhe: “Wɔ-Tsɛ ni yɔɔ ŋwɛi, ha ogbɛi lɛ he atse. Ha omaŋtsɛyeli lɛ aba. Ha afee nɔ ni osumɔɔ.’ (Mateo 6:​9-18, NW) Mɛi fioo ko pɛ le Nyɔŋmɔ gbɛi, aahu ni amɛaaha ehe atse. Enɛ hewɔ lɛ amɛbuɔ lɛ tamɔ nyɔŋmɔ ko ni bɛ gbɛi. Ni Nyɔŋmɔ Maŋtsɛyeli lɛ aba? Mɛi pii susuɔ akɛ eyɛ biɛ momo, yɛ amɛmli. Ekolɛ amɛbaasɔle ni afee esuɔmɔnaa nii, shi amɛteŋ mɛi pii feɔ amɛ diɛŋtsɛ amɛsuɔmɔnaa nii.​—Abɛi 14:⁠12.

 6. Mɛni hewɔ ni Yesu wie eshi Yudafoi lɛ aŋmaahilɛ lɛ akɛ eji nɔ ko folo lɛ!

⁶ Yehowa kpɛlɛɔ ŋmaahilɛ nɔ​—shi jeee yɛ bɔ ni Farisifoi lɛ feɔ lɛ naa. Taakɛ Yesu fee yɛ nikeenii lɛ kɛ woloŋmalɔi lɛ kɛ Farisifoi lɛ asɔlemɔi lɛ ahe lɛ, efee nakai nɔŋŋ kɛtsɔ wiemɔ ni ewie eshi gbɛ ni amɛtsɔɔ nɔ amɛhiɔ ŋmaa lɛ akɛ nɔ ni shishinumɔ bɛ he lɛ nɔ: “Shi kɛ nyɛmiihi ŋmaa lɛ, nyɛkafea nyɛhiɛ mɔbɔmɔbɔ tamɔ osatofoi lɛ; shi amɛfeɔ amɛhiɛ nyanyaanya, koni mɛi ana akɛ amɛmiihi ŋmaa. Lɛlɛŋ, miikɛɛ nyɛ akɛ: Amɛnine eshɛ amɛnyɔmɔwoo nɔ momo.” (Mateo 6:16) Amɛblema saji ni akɛ naabu ejaje lɛ tsɔɔ akɛ yɛ be mli ni Farisifoi lɛ hiɔ ŋmaa lɛ, esaaa ni amɛjuɔ amɛhe loo amɛkɛ mu kpaa amɛhe, shi moŋ ni amɛkɛ lamulu awo amɛyiteŋ. Kɛ amɛhii ŋmaa lɛ, Yudafoi lɛ juɔ amɛhe daa gbi ni amɛkɛ mu kpaa amɛgbɔmɔtsei ahe.

 7. (a) Te esa akɛ Yesu sɛɛnyiɛlɔi lɛ afee amɛnii amɛha tɛŋŋ yɛ be mli ni amɛhiɔ ŋmaa lɛ? (b) Mɛni Yehowa tao ni afee yɛ ŋmaahilɛ he yɛ Yesaia gbii lɛ amli?

⁷ Yesu kɛɛ esɛɛnyiɛlɔi lɛ yɛ ŋmaahilɛ he akɛ: “Shi bo lɛ, kɛ oohi ŋmaa lɛ, kpa oyi mli mu ni ofɔ ohiɛ; koni mɛi ekana akɛ oohi ŋmaa, shi o-Tsɛ ni yɔɔ teemɔ mli lɛ moŋ.” (Mateo 6:​17, 18) Yɛ Yesaia gbii lɛ amli lɛ, Yudafoi ni kuɔ amɛsɛɛ kɛyaa amɛtsutsu shihilɛi fɔji lɛ amli lɛ naa ŋmaahilɛ, amɛsusumai ni amɛwaa amɛ yi, kɛ amɛyi shi ni amɛmamɔɔ tamɔ ŋtoo lɛ ahe miishɛɛ, ni amɛŋmɛɔ kpekpei kɛ lamulu ni amɛtaraa nɔ. Shi Yehowa miitao ni amɛŋmɛɛ mɛi ni amɛwaa amɛyi lɛ ahe, ni amɛha mɛi ni hɔmɔ yeɔ amɛ lɛ niyenii, ni amɛha mɛi ni bɛ shihilɛ hei lɛ shia ni amɛhi mli, ni amɛha mɛi ni nyiɛ yayai lɛ atadei ni amɛwo.​—Yesaia 58:​3-7.

Too Jwetrii yɛ Ŋwɛi

 8. Mɛni ha woloŋmalɔi lɛ kɛ Farisifoi lɛ jie amɛhiɛ kɛjɛ bɔ ni amɛaafee amɛna Nyɔŋmɔ nɔkplɛmɔ nɔ lɛ, ni mɛɛ shishitoo mla ko, ni Paulo wie he yɛ sɛɛ mli amɛku amɛhiɛ amɛfɔ nɔ?

⁸ Yɛ be mli ni amɛdiɔ jalɛ sɛɛ lɛ, woloŋmalɔi lɛ kɛ Farisifoi lɛ jie amɛhiɛ kɛjɛ bɔ ni amɛaafee ni amɛna Nyɔŋmɔ nɔkpɛlɛmɔ lɛ nɔ kwraa ni amɛha amɛjwɛŋmɔ hi bɔ ni amɛaafee ni amɛsa gbɔmɛi ahiɛ lɛ moŋ nɔ. Amɛkɛ amɛhe ha gbɔmɛi ablema saji lɛ aahu akɛ amɛtsi Nyɔŋmɔ Wiemɔ ni aŋma afɔ shi lɛ kɛyafɔ afa. Amɛkɛ amɛtsuii yashwie shikpɔŋ nɔ gbɛhei anamɔ nɔ moŋ fe ŋwɛi jwetri nɔ. Amɛku amɛhiɛ amɛfɔ shishijee anɔkwale ko ni Farisifonyo ko ni ebatsɔ Kristofonyo lɛ ŋma efɔ shi yɛ afii komɛi asɛɛ lɛ nɔ: “Ni nɔ fɛɛ nɔ ni nyɛfeɔ lɛ, nyɛjiea nyɛmusuŋ nyɛtsua, taakɛ Nuŋtsɔ lɛ [Yehowa] nyɛtsuɔ nyɛhaa ni jeee gbɔmɛi, ni nyɛle akɛ Nuŋtsɔ lɛ [Yehowa] dɛŋ nyɛnine baashɛ gboshinii lɛ anɔ yɛ akɛ nyɛnyɔmɔwoo.”​—Kolosebii 3:​23, 24.