Amɛje Nɔyelɔ ko ni Yi Wa Dɛŋ

Yosef tsĩɛ Maria koni ehã ele sane ko ni biɔ ni atsu he nii oya nɔŋŋ. No mli lɛ, Yehowa bɔfo ejie ehe kpo etsɔɔ lɛ yɛ lamɔ mli, ni ekɛɛ lɛ akɛ: “Tee shi, ŋɔɔ gbekɛ bibioo lɛ kɛ enyɛ ni ojo foi kɛya Ejipt, ni ohi jɛmɛ kɛyashi makɛɛ bo nɔ ko, ejaakɛ Herode miiba ebatao gbekɛ bibioo lɛ ni egbe lɛ.”​—Mateo 2:13.

Amrɔ nɔŋŋ lɛ, Yosef, Maria, kɛ amɛbinuu lɛ jo foi kɛshi maŋ lɛ mli nakai nyɔɔŋ lɛ mli. Amɛfee nakai yɛ be naa, ejaakɛ no mli lɛ Herode eyɔse akɛ ŋulamiiaŋkwɛlɔi lɛ elaka lɛ. Ekɛɛ amɛ akɛ amɛku amɛsɛɛ amɛbabɔ lɛ nɔ ni amɛbaayana lɛ he amaniɛ. Shi amɛshi maŋ lɛ mli amɛtee ní amɛfeee nakai. Enɛ hã Herode mli wo la waa. Akɛni eetao egbe Yesu lolo hewɔ lɛ, efã akɛ agbe gbekɛbii hii fɛɛ ni eye afii enyɔ kɛ mɛi ni yeko nakai ni yɔɔ Betlehem kɛ ehewɔ kpokpai lɛ anɔ lɛ. Edamɔ nɔ ni ŋulamiiaŋkwɛlɔi ni jɛ Boka lɛ bakɛɛ lɛ mra mli lɛ nɔ ebu be nɛɛ.

Gbekɛbii hii lɛ fɛɛ ni agbe lɛ yɛ gbeyei waa! Wɔleee gbekɛbii hii abɔ ni agbe moŋ, shi bɔ ni nyɛmɛi ni agbe amɛbii lɛ fó waa ni amɛwo yara lɛ hã Biblia mli gbalɛ ko ni Nyɔŋmɔ gbalɔ Yeremia gba lɛ ba mli.​—Yeremia 31:15.

Be ni enɛɛmɛi yaa nɔ lɛ, no mli lɛ Yosef kɛ eweku lɛ ejo foi kɛtee Ejipt, ni amɛtee nɔ amɛhi jɛmɛ. Kɛkɛ ni gbi ko nyɔɔŋ lɛ, Yehowa bɔfo saa jie ehe kpo etsɔɔ Yosef yɛ lamɔ mli. Ŋwɛibɔfo lɛ kɛɛ akɛ: “Tee shi, ŋɔɔ gbekɛ bibioo lɛ kɛ enyɛ ni oya Israel shikpɔŋ lɛ nɔ, ejaakɛ mɛi ni taoɔ gbekɛ bibioo lɛ wala lɛ egboi.” (Mateo 2:20) No hewɔ lɛ, Yosef mu sane naa agbɛnɛ akɛ, eweku lɛ baanyɛ aku amɛsɛɛ kɛya amɛmaŋ. Enɛ hã Biblia mli gbalɛ kroko ba mli​—atsɛ Nyɔŋmɔ Bi lɛ kɛjɛ Ejipt.​—Hoshea 11:1.

Eeenyɛ efee akɛ Yosef to eyiŋ akɛ ekɛ eweku lɛ baayahi Yudea, ekolɛ yɛ he ko ni bɛŋkɛ Betlehem, he ni amɛyɔɔ dani amɛjo foi kɛtee Ejipt lɛ. Shi ená ele akɛ, amrɔ nɛɛ Herode binuu Arkelao ni yitsoŋ wa lɛ ji mɔ ni yeɔ Yudea nɔ. Nyɔŋmɔ tsɔ lamɔ kroko nɔ ebɔ Yosef kɔkɔ yɛ bɔ ni enɛ yɔɔ oshara lɛ he. No hewɔ lɛ, Yosef kɛ eweku lɛ fã gbɛ kɛtee shɔŋŋ yɛ kooyigbɛ, ni amɛyahi Nazaret maŋ lɛ mli yɛ Galilea kpokpaa lɛ nɔ, ni jɛmɛ kɛ he titri ni Yudafoi lɛ jáa Nyɔŋmɔ yɛ lɛ teŋ jekɛ. Maŋ nɛɛ mli Yesu da yɛ, ni no hã gbalɛ kroko hu ba mli akɛ: “Abaatsɛ lɛ Nazarenyo.”​—Mateo 2:23.