Nyɛholea Niji Ni He Tse Nɔ Yɛ Sɔlemɔ Mli
“Miitao akɛ hii asɔle yɛ he fɛɛ he, ni amɛhole niji ni he tse nɔ, ni mlifu loo ŋwanejee akaba mli.”—1 TIMOTEO 2:8.
1, 2. (a) Timoteo Klɛŋklɛŋ Wolo lɛ 2:8 kɔɔ sɔlemɔ ni kɔɔ Yehowa webii ahe lɛ he yɛ mɛɛ gbɛ nɔ? (b) Mɛni wɔbaasusu he agbɛnɛ?
YEHOWA miikpa gbɛ akɛ ewebii aaaye lɛ kɛ amɛ diɛŋtsɛ amɛhe anɔkwale. Bɔfo Paulo kɛ hetsemɔ [anɔkwayeli] to sɔlemɔ he beni eŋma akɛ: “Miitao akɛ hii asɔle yɛ he fɛɛ he, ni amɛhole [anɔkwa] niji ni he tse nɔ, ni mlifu loo ŋwanejee akaba mli.” (1 Timoteo 2:8) Eyɛ faŋŋ akɛ Paulo miiwie sɔlemɔ yɛ faŋŋ mli “yɛ he fɛɛ he” ni Kristofoi kpeɔ kutuu yɛ lɛ he. Namɛi baadamɔ Nyɔŋmɔ webii anajiaŋ yɛ sɔlemɔ mli yɛ asafoŋ kpeei ashishi? Hii ni he tse, ni ja, ni jaa Nyɔŋmɔ, ni yeɔ Ŋmalɛ mli gbɛnaa nii kɛha Nyɔŋmɔ lɛ fɛɛ nɔ jogbaŋŋ. (Jajelɔ 12:13, 14) Esa akɛ amɛhe atse yɛ mumɔŋ kɛ jeŋba mli, ni amɛtu amɛhe amɛha Yehowa Nyɔŋmɔ ni sanebimɔ ko bɛ he.
2 Asafoŋ onukpai titri esa akɛ ‘amɛhole niji ni he tse nɔ yɛ sɔlemɔ mli.’ Amɛ sɔlemɔi ni jɛ tsui mli kɛtsɔ Yesu Kristo nɔ lɛ jieɔ anɔkwa ni ayeɔ Nyɔŋmɔ lɛ kpo, ni eyeɔ ebuaa amɛ koni amɛkwa ŋwanejeei kɛ mlifu ni fɛ́ɔ. Yɛ anɔkwale mli lɛ, nuu fɛɛ nuu ni aaaná hegbɛ akɛ eeedamɔ Kristofoi asafo lɛ najiaŋ yɛ sɔlemɔ mli yɛ faŋŋ lɛ afee mɔ ni eye ehe kɛjɛ mlifu, hetsɛ̃, kɛ anɔkwa ni ayeee Yehowa kɛ egbɛjianɔtoo lɛ he. (Yakobo 1:19, 20) Mɛɛ Biblia mli gbɛtsɔɔmɔi lolo yɔɔ kɛha mɛi ni náa hegbɛ akɛ amɛaadamɔ mɛi krokomɛi anajiaŋ yɛ sɔlemɔ mli yɛ gbɔmɛi pii ahiɛ lɛ? Ni mɛni ji Ŋmalɛ mli shishitoo mlai komɛi ni esa akɛ wɔkɛtsu nii yɛ wɔteemɔŋ kɛ weku sɔlemɔi amli?
Tsɔ Hiɛ Osusu Sɔlemɔ He
3, 4. (a) Mɛni hewɔ sɛɛnamɔ yɔɔ he akɛ aaatsɔ hiɛ asusu sɔlemɔ yɛ faŋŋ mli lɛ he lɛ? (b) Mɛni Ŋmalɛi lɛ tsɔɔ yɛ sɔlemɔi asɛɛkɛlɛmɔ he?
3 Kɛji akɛ abi wɔ ni wɔsɔle yɛ mɛi ahiɛ lɛ, eeenyɛ eba akɛ kɛ hoo lɛ wɔbaanyɛ wɔtsɔ hiɛ wɔsusu wɔsɔlemɔ lɛ he. Enɛ feemɔ baaha wɔnyɛ wɔwie saji titrii ni sa lɛ ahe ni wɔfooo shi kɛ sɔlemɔ kakadaŋŋ. Shi wɔbaanyɛ wɔwie waa yɛ wɔteemɔŋ sɔlemɔi lɛ amli. Amɛsɛɛ baanyɛ akɛlɛ bɔ ni wɔsumɔɔ. Yesu kɛ jenamɔ fɛɛ sɔle dani ehala ebɔfoi 12 lɛ. Shi beni eto egbele lɛ Kaimɔ lɛ he gbɛjianɔ lɛ, eyɛ faŋŋ akɛ esɔlemɔi yɛ aboloo lɛ kɛ wein lɛ he lɛ yɛ kuku. (Marko 14:22-24; Luka 6:12-16) Ni wɔle akɛ Nyɔŋmɔ kpɛlɛ Yesu sɔlemɔi kukuji lɛ anɔ kɛmɔ shi.
4 Ŋɔɔ lɛ akɛ wɔná hegbɛ akɛ wɔɔdamɔ weku ko najiaŋ wɔsɔle dani aye niyenii ko. Sɔlemɔ ni tamɔ nɛkɛ baanyɛ afee kuku bɔ ni sa—shi esa akɛ shidaa kɛha niyenii lɛ afata nɔ fɛɛ nɔ ni wɔɔwie lɛ he. Kɛji akɛ wɔmiisɔle yɛ faŋŋ dani aje Kristofoi akpee shishi loo yɛ no sɛɛ lɛ, ehe ehiaaa ni wɔsɔle kakadaŋŋ ni wɔwie saji otii pii ahe. Yesu wie eshi woloŋmalɔi lɛ ni ‘lakpatoo hewɔ amɛsɔleɔ sɔlemɔi kakadaji lɛ.’ (Luka 20:46, 47) Mɔ ni sheɔ Nyɔŋmɔ gbeyei lɛ sumɔŋ ni efee nakai kɔkɔɔkɔ. Shi yɛ bei komɛi amli lɛ, sɔlemɔ yɛ faŋŋ mli ni sɛɛ kɛ lɛ baanyɛ afee nɔ ni sa. Ákɛ nɔkwɛmɔnɔ lɛ, esa akɛ onukpa ko ni ahala lɛ akɛ ekɛ naagbee sɔlemɔ aha yɛ kpokpaa nɔ kpee ko shishi lɛ atsɔ hiɛ asusu he, ni ekolɛ ebaasumɔ ni etsĩ saji otii pii atã. Ni kɛlɛ, esaaa akɛ sɔlemɔ po ni tamɔ nɛkɛ lɛ sɛɛ kɛɔ fe nine.
Okɛ Woo Aya Nyɔŋmɔ Ŋɔɔ
5. (a) Mɛni esa akɛ wɔha ahi wɔjwɛŋmɔ mli beni wɔsɔleɔ yɛ faŋŋ mli lɛ? (b) Mɛni hewɔ esa akɛ wɔsɔle yɛ gbɛ ni woo kɛ bulɛ yɔɔ mli nɔ lɛ?
5 Kɛji akɛ wɔmiisɔle yɛ faŋŋ lɛ esa akɛ wɔkai akɛ jeee gbɔmɛi wɔwieɔ wɔtsɔɔ amɛ lɛ. Shi moŋ, wɔji bɔɔ nii ni feɔ esha ni miikpa Nuntsɔ Maŋtsɛ Yehowa fai. (Lala 8:3-5, 9; 73:28) No hewɔ lɛ esa akɛ wɔjie woo ni gbeyeishemɔ akɛ wɔsumɔŋ ni wɔfee nɔ ko ni esaŋ ehiɛ yɔɔ mli lɛ kpo, kɛtsɔ nɔ ni wɔwieɔ kɛ bɔ ni wɔwieɔ enɛ wɔhaa lɛ nɔ. (Abɛi 1:7) Lalatsɛ David la akɛ: “Shi mi lɛ, omlihilɛ falɛ naa lɛ, maba owe lɛ, makoto osɔlemɔwe krɔŋkrɔŋ lɛ hiɛ yɛ ogbeyeishemɔ mli.” (Lala 5:8) Kɛji akɛ wɔyɛ su ni tamɔ nɛkɛ lɛ, mɛɛ gbɛ nɔ wɔɔtsɔ wɔwie, kɛ́ abi ni wɔsɔle yɛ faŋŋ mli yɛ Yehowa Odasefoi akpee ko shishi? Ojogbaŋŋ, kɛji akɛ wɔmiiwie wɔmiitsɔɔ adesa maŋtsɛ ko lɛ, wɔbaafee nakai yɛ bulɛ kɛ woo mli. Ani esaaa akɛ woo kɛ bulɛ babaoo hiɔ wɔsɔlemɔi ahe, akɛni wɔmiisɔle wɔha Yehowa, ‘naanɔ Maŋtsɛ’ lɛ? (Kpojiemɔ 15:3) No hewɔ lɛ, esa akɛ wɔkwa wiemɔi tamɔ “Ojekoo, Yehowa,” “Wɔkɛ wɔsuɔmɔ miimajeo,” aloo, “Hii shi jogbaŋŋ” kɛ́ wɔmiisɔle. Ŋmalɛi lɛ tsɔɔ akɛ, Nyɔŋmɔ Bi koome, Yesu Kristo kɛ eŋwɛi Tsɛ lɛ ewieee yɛ gbɛ ni tamɔ nɛkɛ nɔ kɔkɔɔkɔ.
6. Mɛni esa akɛ wɔha ahi wɔjwɛŋmɔ mli beni wɔkɛ ‘wiemɔ mli heyeli bɛŋkɛɔ duromɔ maŋtsɛsɛi lɛ’?
6 Paulo kɛɛ: ‘Nyɛhaa wɔkɛ wiemɔ mli heyeli atsia abɛŋkɛa duromɔ maŋtsɛsɛi lɛ.’ (Hebribii 4:16) Wɔbaanyɛ ni wɔkɛ ‘wiemɔ mli heyeli’ atsi abɛŋkɛ Yehowa yɛ wɔ esha shihilɛ lɛ fɛɛ sɛɛ, yɛ hemɔkɛyeli ni wɔyɔɔ yɛ Yesu Kristo kpɔmɔ afɔleshaa lɛ mli lɛ hewɔ. (Bɔfoi lɛ Asaji 10:42, 43; 20:20, 21) Ni kɛlɛ, ‘wiemɔ mli heyeli’ ni tamɔ nɛkɛ etsɔɔɔ akɛ wɔkɛ Nyɔŋmɔ miigba sane; ni asaŋ esaaa akɛ wɔwieɔ nibii ni bulɛ bɛ mli wɔtsɔɔ lɛ. Kɛji akɛ wɔsɔlemɔi yɛ faŋŋ mli lɛ aaasa Yehowa hiɛ lɛ, belɛ esa akɛ afee lɛ yɛ bulɛ kɛ woo ni sa mli, ni efeŋ nɔ ni sa akɛ wɔkɛaatsu nii ni wɔkɛtswa adafii, wɔkɛwo aŋkroaŋkroi aŋaa, loo wɔkɛshiɛ wɔtsɔɔ toibolɔi.
Okɛ Heshibaa Mumɔ Asɔle
7. Mɛɛ gbɛ nɔ Salomo tsɔ ejie heshibaa kpo beni esɔleɔ yɛ Yehowa sɔlemɔtsu lɛ nɔjɔɔmɔ mli lɛ?
7 Kɛji akɛ wɔmiisɔle yɛ faŋŋ mli loo yɛ teemɔŋ lɛ, Ŋmalɛ naa shishitoo mla ko ni he hiaa ni esa akɛ wɔha ahi wɔjwɛŋmɔ mli ji akɛ, esa akɛ wɔjie heshibaa mumɔ kpo yɛ wɔsɔlemɔi amli. (2 Kronika 7:13, 14) Maŋtsɛ Salomo jie heshibaa kpo yɛ esɔlemɔ ni efee yɛ faŋŋ mli yɛ Yehowa sɔlemɔtsu ni yɔɔ Yerusalem lɛ nɔjɔɔmɔ mli lɛ mli. Salomo gbe tsũi ni yɔɔ fɛo fe fɛɛ eko ni ama yɛ shikpɔŋ nɔ pɛŋ lɛ ateŋ ekome lɛ naa etsɛko. Ni kɛlɛ, ekɛ heshibaa sɔle akɛ: “Shi aso Nyɔŋmɔ aaabahi shikpɔŋ nɛɛ nɔ lɛɛlɛŋ? Naa, ŋwɛi kɛ ŋwɛii amli ŋwɛi lɛ nyɛɛɛo ato, aahu ni mbasoroo tsũ nɛɛ ni mima nɛɛ!”—1 Maŋtsɛmɛi 8:27.
8. Mɛni ji gbɛ̀i komɛi ni atsɔɔ nɔ ajieɔ heshibaa kpo beni asɔleɔ yɛ faŋŋ mli lɛ?
8 Taakɛ Salomo ji lɛ, esa akɛ wɔba wɔhe shi kɛji akɛ wɔmiidamɔ mɛi krokomɛi anajiaŋ yɛ mɛi ahiɛ yɛ sɔlemɔ mli. Eyɛ mli akɛ esaaa akɛ wɔfeɔ wɔhe hetselɔi moŋ, shi abaanyɛ ajie heshibaa kpo kɛtsɔ wɔgbee nɔ. Heshibaa sɔlemɔi bɛ hoo ni akɛmiitsɔɔ saji anaa. Amɛgbalaa jwɛŋmɔ kɛyaa Mɔ ni asɔleɔ ahaa lɛ lɛ nɔ, shi jeee mɔ ni sɔleɔ lɛ nɔ. (Mateo 6:5) Heshibaa jeɔ kpo yɛ nɔ ni wɔwieɔ yɛ sɔlemɔ mli lɛ hu mli. Kɛji akɛ wɔsɔle yɛ heshibaa mli lɛ, wɔwiemɔi efeŋ tamɔ nɔ ni wɔmiibi ni Nyɔŋmɔ afee nibii komɛi yɛ wɔgbɛ nɔ. Shi moŋ, wɔbaakpa Yehowa fai koni efee nii yɛ gbɛ ni kɛ esuɔmɔnaa nii krɔŋkrɔŋ lɛ kpãa gbee lɛ nɔ. Lalatsɛ lɛ fee su kpakpa lɛ he nɔkwɛmɔnɔ beni ekpa fai akɛ: “Oo Yehowa, heremɔ wɔyiwala! Oo Yehowa, ha omanye aba ko!”—Lala 118:25; Luka 18:9-14.
Sɔlemɔ Kɛjɛ Tsui Mli
9. Mɛɛ ŋaawoo kpakpa ko ni Yesu kɛha anaa yɛ Mateo 6:7, ni mɛɛ gbɛ nɔ aaatsɔ ni akɛtsu nii?
9 Kɛji akɛ wɔsɔlemɔ yɛ faŋŋ mli loo yɛ teemɔŋ lɛ aaasa Yehowa hiɛ lɛ, belɛ esa akɛ ejɛ tsui mli. Kɛkɛ lɛ, wɔtĩŋ sɔlemɔ nɔkwɛmɔnɔ ko mli shii abɔ ni wɔsusuuu nɔ ni wɔwieɔ lɛ he. Yesu wo ŋaa yɛ e-Gɔŋ nɔ Shiɛmɔ lɛ mli akɛ: “Kɛ nyɛmiisɔle lɛ, nyɛkawiea trilii tamɔ wɔŋjalɔi lɛ; shi amɛsusuɔ [yɛ gbɛ ni ejaaa nɔ] akɛ amɛwiemɔ babaoo hewɔ [lɛ] aaabo amɛ toi.” Yɛ gbɛ kroko nɔ lɛ, Yesu kɛɛ: “Nyɛkawiea fuu; nyɛkatĩa yaka wiemɔi amli babaoo.”—Mateo 6:7; (NW), shishigbɛ niŋmaa.
10. Mɛni hewɔ ebaafee nɔ ni sa akɛ aaasɔle yɛ sane kome too lɛ nɔŋŋ he fe shikome lɛ?
10 Shi kɛlɛ, ehe baahia ni wɔsɔle yɛ sane kome lɛ nɔŋŋ he shii abɔ. Enɛ efeŋ nɔ ni ejaaa, ejaakɛ Yesu wo hewalɛ akɛ: “Nyɛbia, ni aaaha nyɛ; nyɛtaoa, ni nyɛaana; nyɛshia, ni aaagbele aha nyɛ.” (Mateo 7:7) Ekolɛ ehe miihia ni aná Maŋtsɛyeli Asa hee ejaakɛ Yehowa miijɔɔ asafo lɛ shiɛmɔ nitsumɔ lɛ nɔ. (Yesaia 60:22) Ebaafee nɔ ni sa akɛ aaatsĩ hiamɔ nɛɛ tã kɛ aasɔle yɛ teemɔŋ loo kɛ aasɔle yɛ faŋŋ mli yɛ Yehowa webii akpeei ashishi. Nakai feemɔ etsɔɔɔ akɛ ‘wɔmiiti yaka wiemɔi amli babaoo.’
Kaimɔ Shidaa kɛ Yijiemɔ
11. Filipibii 4:6, 7 kɔɔ sɔlemɔ ni afeɔ yɛ teemɔŋ kɛ faŋŋ mli lɛ he yɛ mɛɛ gbɛ nɔ?
11 Mɛi pii sɔleɔ kɛhaa nɔ ko bimɔ pɛ, shi esa akɛ suɔmɔ ni wɔyɔɔ kɛha Yehowa Nyɔŋmɔ lɛ atsirɛ wɔ ni wɔda lɛ shi ni wɔjie eyi yɛ sɔlemɔ mli yɛ teemɔŋ kɛ faŋŋ mli. Paulo ŋma akɛ: “Nyɛkahaoa yɛ nɔ ko nɔ ko he, shi moŋ nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsia nyɛtutɔmɔi lɛ atã yɛ Nyɔŋmɔ hiɛ; ni Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Kristo Yesu mli!” (Filipibii 4:6, 7) Hɛɛ, esa akɛ wɔjie shidaa kpo wɔtsɔɔ Yehowa yɛ mumɔŋ kɛ heloo naa jɔɔmɔi lɛ ahewɔ, kɛfata faikpamɔi kɛ tutɔmɔi lɛ ahe. (Abɛi 10:22) Lalatsɛ lɛ lá akɛ: “Ŋɔɔ shidaa afɔle oha Nyɔŋmɔ, ni oye oshiwoi lɛ anɔ oha ŋwɛinyo lɛ!” (Lala 50:14) Ni wiemɔi ni taa mɔ tsuiŋ nɛɛ fata David sɔlemɔ lala lɛ he: “Mikɛ lala aaajie Nyɔŋmɔ gbɛi lɛ yi, ni mikɛ shidaa aaakafo lɛ.” (Lala 69:31) Ani esaaa akɛ wɔfeɔ nakai nɔŋŋ yɛ sɔlemɔ mli yɛ faŋŋ kɛ teemɔŋ?
12. Lala 100:4, 5 miiba mli ŋmɛnɛ yɛ mɛɛ gbɛ nɔ, ni no hewɔ lɛ, mɛni hewɔ wɔbaanyɛ wɔda Nyɔŋmɔ shi ni wɔjie eyi lɛ?
12 Lalatsɛ lɛ lá yɛ Nyɔŋmɔ he akɛ: “Nyɛbotea egbói lɛ amli kɛ shidaa, nyɛbaa ekpoi lɛ anɔ kɛ yijiemɔ; nyɛdaa lɛ shi, nyɛjiea egbɛi lɛ yi! Ejaakɛ Yehowa hi: emɔbɔnalɛ hiɔ shi kɛyaa naanɔ, ni enɔkwayeli lɛ hiɔ shi kɛyaa yinɔi fɛɛ nɔ.” (Lala 100:4, 5) Ŋmɛnɛ, gbɔmɛi ni jɛ jeŋmaji fɛɛ mli miibote Yehowa sɔlemɔwe lɛ kpoi lɛ anɔ, ni wɔbaanyɛ wɔjie eyi ni wɔda lɛ shi yɛ enɛ he. Ani odaa Nyɔŋmɔ shi yɛ Maŋtsɛyeli Asa ni oyaa mli lɛ hewɔ, ni ojieɔ ohiɛsɔɔ kpo kɛtsɔɔ mɛi ni sumɔɔ lɛ lɛ ni okɛ amɛ kpeɔ daa yɛ jɛmɛ lɛ nɔ? Beni oyɔɔ jɛmɛ lɛ, ani ojɛɔ otsui mli owóɔ ogbee nɔ yɛ yijiemɔ kɛ shidaa lalai amli ohaa wɔŋwɛi Tsɛ ni yɔɔ suɔmɔ lɛ?
Ohiɛ Akagbo Kɔkɔɔkɔ akɛ Ooosɔle
13. Mɛɛ Ŋmalɛ mli nɔkwɛmɔnɔ tsɔɔ akɛ esa akɛ wɔkpa Yehowa fai yɛ sɔlemɔ mli kɛji akɛ wɔnuɔ he akɛ wɔsaaa yɛ fɔyeli ko hewɔ po?
13 Kɛji akɛ wɔnuɔ he akɛ wɔsaaa yɛ fɔyeli ko hewɔ po lɛ, kɛlɛ, esa akɛ wɔtsɔ wɔhe kɛya Nyɔŋmɔ ŋɔɔ kɛ faikpamɔ ni hiɛdɔɔ yɔɔ mli. Beni Yudafoi lɛ fee esha kɛtsɔ maŋsɛɛ yei ni amɛŋɔ amɛ lɛ nɔ lɛ, Ezra kula shi, egbɛ eniji ni he tse lɛ amli eha Nyɔŋmɔ, ni ekɛ heshibaa sɔle akɛ: “Mi-Nyɔŋmɔ, mihiɛ eshwie shi, ni eefee mi hiɛgbele akɛ mawó mihiɛ nɔ makwɛ ohiɛ, mi-Nyɔŋmɔ; ejaakɛ wɔtɔmɔi lɛ efa aahu kɛyata wɔyiteŋ, ni wɔfɔ́ ni wɔye lɛ eda aahu kɛyashi ŋwɛi. Kɛjɛ wɔtsɛmɛi lɛ ayinɔ lɛ, fɔ́ kpeteŋkpele kã wɔnɔ aahu kɛbashi ŋmɛnɛ. . . . Ni nii ni ba wɔnɔ yɛ wɔnifɔjianii lɛ kɛ wɔfɔ́ kpeteŋkpele ni wɔye lɛ hewɔ nɛɛ fɛɛ sɛɛ lɛ, kɛlɛ bo, wɔ-Nyɔŋmɔ lɛ, owoko wɔ nyɔmɔ bɔ ni sa wɔnishaianii lɛ, ni oha wɔ shwɛɛnɔ ko kɛ̃ ni tamɔ enɛ. Aso wɔɔku okitai lɛ amli ekoŋŋ, ni wɔkɛ wɔhe ayabɔ maji ni feɔ nihii nii nɛɛ ahe yɛ yoowɛɛ gbɛfaŋ lo? Aso omli fuŋ wɔ kɛyashiŋ beyinɔ ni oookpata wɔhiɛ atã ni akashwɛ mɔ ko mɔ ko, ni asaŋ mɔ ko mɔ ko akaje mli lo? Yehowa, Israel Nyɔŋmɔ, jalɔ jio; ejaakɛ ashi wɔ akɛ shwɛɛnɔ, ni wɔje mli tamɔ bɔ ni yɔɔ ŋmɛnɛ nɛɛ: naa, wɔyɛ ohiɛ kɛ wɔfɔ́yeli lɛ, ejaakɛ enɛ hewɔ lɛ wɔnyɛɛɛ ohiɛ wɔdamɔ!”—Ezra 9:1-15; 5 Mose 7:3, 4.
14. Taakɛ afee he nɔkwɛmɔnɔ yɛ Ezra gbii lɛ amli lɛ, mɛni ataoɔ koni wɔnine ashɛ Nyɔŋmɔ dɛŋ eshaifaa nɔ?
14 Bɔni afee ni wɔnine ashɛ Nyɔŋmɔ dɛŋ eshaifaa nɔ lɛ, esa akɛ heshwamɔ kɛ “yibii ni sa tsuitsakemɔ” afata esha ni wɔjajeɔ wɔtsɔɔ lɛ lɛ he. (Luka 3:8; Hiob 42:1-6; Yesaia 66:2) Yɛ Ezra gbii lɛ amli lɛ, akɛ mɔdɛŋ ni abɔ koni asaa tɔmɔ lɛ kɛtsɔ maŋsɛɛ yei lɛ ashwiemɔ nɔ fata tsuitsakemɔ su lɛ he. (Ezra 10:44; okɛto 2 Korintobii 7:8-13 he.) Kɛji akɛ wɔmiitao ni Nyɔŋmɔ kɛ tɔmɔ ko ni hiɛdɔɔ yɔɔ mli ake wɔ lɛ, belɛ nyɛhaa wɔjajea tɔmɔ lɛ wɔtsɔɔa yɛ heshibaa sɔlemɔ mli, ni wɔwo yibii ni sa tsuitsakemɔ. Tsuitsakemɔ mumɔ kɛ bɔ ni ashweɔ ni ajaje tɔmɔ lɛ hu baatsirɛ wɔ koni wɔtao mumɔŋ yelikɛbuamɔ kɛjɛ Kristofoi onukpai lɛ adɛŋ.—Yakobo 5:13-15.
Ná Miishɛjemɔ Kɛjɛ Sɔlemɔ Mli
15. Mɛɛ gbɛ nɔ Hana niiashikpamɔ lɛ tsɔɔ yɛ akɛ wɔbaanyɛ wɔná miishɛjemɔ yɛ sɔlemɔ mli?
15 Kɛji akɛ wɔmiinu tsuiŋ dɔlɛ he yɛ yiŋtoo ko hewɔ lɛ, wɔbaanyɛ wɔná miishɛjemɔ yɛ sɔlemɔ mli. (Lala 51:19; Abɛi 15:13) Hana anɔkwafo lɛ fee nakai. Ehi shi yɛ be mli ni wekui ni dara fa babaoo yɛ Israel, shi efɔko. Ewu Elkana yɛ bihii kɛ biyei ni eŋa kroko lɛ, Penina, ni woɔ Hana mli la lɛ efɔ eha lɛ. Hana kɛ hiɛdɔɔ sɔle, ni ewo shi akɛ, kɛ akɛ binuu ko jɔɔ lɛ lɛ, ‘ekɛ lɛ baaha Yehowa ewala gbii abɔ fɛɛ.’ Akɛni esɔlemɔi lɛ kɛ Osɔfonukpa Eli wiemɔi lɛ shɛje emii hewɔ lɛ, Hana ‘hiɛ efeee tɔtɔɔtɔ dɔŋŋ.’ Efɔ binuu, ni ewo lɛ gbɛi akɛ Samuel. Yɛ sɛɛ mli lɛ, ekɛ lɛ ha koni eyasɔmɔ yɛ Yehowa we lɛ. (1 Samuel 1:9-28) Eda shi yɛ mlihilɛ ni Nyɔŋmɔ ejie lɛ kpo etsɔɔ lɛ lɛ hewɔ, ni ekɛ shidaa sɔlemɔ ha—nɔ ni jieɔ Yehowa yi akɛ mɔ ni mɔ ko kɛ lɛ yeee egbɔ. (1 Samuel 2:1-10) Taakɛ Hana ji lɛ, wɔbaanyɛ wɔná miishɛjemɔ kɛjɛ sɔlemɔ mli, kɛ hekɛnɔfɔɔ akɛ Nyɔŋmɔ haa nibimɔi fɛɛ ni kɛ esuɔmɔnaa nii kpãa gbee lɛ ahetoo. Kɛ wɔfɔse wɔtsui mli saji wɔshwie enɔ lɛ, nyɛkahaa ‘wɔhiɛ feɔ tɔtɔɔtɔ dɔŋŋ,’ ejaakɛ ebaajie wɔjatsu lɛ loo ebaaha wɔnyɛ wɔtere.—Lala 55:23.
16. Taakɛ afee he nɔkwɛmɔnɔ yɛ Yakob sane lɛ mli lɛ, mɛni hewɔ esa akɛ wɔsɔle kɛ́ wɔmiishe gbeyei loo wɔfee yeyeeye?
16 Kɛji akɛ shihilɛ ko kɛ gbeyeishemɔ, tsuiŋ dɔlɛ, loo yeyeeyefeemɔ baa lɛ, wɔkakwa Nyɔŋmɔ ni wɔɔtsɔ wɔhe kɛya eŋɔɔ yɛ sɔlemɔ mli kɛha miishɛjemɔ lɛ. (Lala 55:2-5) Yakob she gbeyei beni ekɛ enyɛmi nuu, Esau, ni ekɛ lɛ teŋ etɔtɔ lɛ miihe akpe lɛ. Kɛlɛ, Yakob sɔle akɛ: “Mitsɛ Abraham Nyɔŋmɔ kɛ mitsɛ Isak Nyɔŋmɔ, Yehowa, mɔ ni kɛɛ mi akɛ: Kuu osɛɛ oya oshikpɔŋ nɔ kɛ owekumɛi aŋɔɔ, ni mafeeo jogbaŋŋ lɛ; omɔbɔnalɛi kɛ onɔkwayeli fɛɛ ni ojie otsɔɔ otsulɔ lɛ, ekome folo nɛkɛ esaaa mi; shi tso mihiɛ kɛfo Yordan nɛɛ, ni agbɛnɛ mitsɔ asafokui enyɔ. Miikpao fai ni ojie mi kɛjɛ minyɛmi lɛ dɛŋ, kɛjɛ Esau dɛŋ; shi miishe lɛ gbeyei, koni ekaba ni ebatswia mi kɛ nyɛ kɛ bii lɛ fɛɛ nii. Shi bo okɛɛ akɛ: Mafeeo jogbaŋŋ, ni maha oseshi atsɔ tamɔ ŋshɔnaa shia ni anyɛŋ akane yɛ falɛ naa!” (1 Mose 32:9-12) Esau tutuaaa Yakob kɛ ewebii ni ekɛ amɛ nyiɛ kɛyaa lɛ. No hewɔ lɛ Yehowa ‘fee’ Yakob “jogbaŋŋ” yɛ nakai be lɛ mli.
17. Kɛ́ aaka wɔ waa lɛ, sɔlemɔ baanyɛ ashɛje wɔmii yɛ Lala 119:52 kɛ gbeekpamɔ naa yɛ mɛɛ gbɛ nɔ?
17 Yɛ wɔfaikpamɔi amli lɛ, ekolɛ saji ni awie yɛ Nyɔŋmɔ Wiemɔ lɛ mli lɛ ni wɔɔkai lɛ baashɛje wɔmii. Ekolɛ ebaanyɛ efee akɛ Maŋtsɛ bi Hezekia—ji mɔ ni lá lala ni kɛ fe fɛɛ—ni ji sɔlemɔ ni ŋɔɔ ni akɛfee lala lɛ akɛ: “Yehowa, mikaiɔ oblema kojomɔi lɛ, ni mikɛ-shɛjeɔ mimii.” (Lala 119:52) Kɛ́ aaka wɔ waa lɛ, ekolɛ wɔbaanyɛ wɔkai Biblia mli shishitoo mla loo mla ko ni baanyɛ aye abua wɔ koni wɔtsɔ gbɛ ko ni baaha wɔná miishɛjemɔ ni maa nɔ mi kɛhaa wɔ akɛ wɔmiisa wɔŋwɛi Tsɛ lɛ hiɛ lɛ nɔ yɛ heshibaa sɔlemɔ mli.
Anɔkwafoi Hiɛɔ Sɔlemɔ Mli Daa
18. Mɛni hewɔ abaanyɛ akɛɛ akɛ, ‘mɔ fɛɛ mɔ ni ji anɔkwafo [mɔkrɔŋkrɔŋ] lɛ baakpa Nyɔŋmɔ fai yɛ sɔlemɔ mli’ lɛ?
18 Mɛi fɛɛ ni yeɔ Yehowa Nyɔŋmɔ anɔkwa lɛ ‘baahiɛ sɔlemɔ mli daa.’ (Romabii 12:12) Yɛ Lala 32 ni ekolɛ ato he gbɛjianɔ beni David kɛ Batsheba fee esha lɛ sɛɛ lɛ, etsɔɔ bɔ ni epiŋmɔ lɛ ji akɛni etaooo eshaifaa kɛ hejɔlɛ ni tsuitsakemɔ kɛ esha ni ajajeɔ atsɔɔ Nyɔŋmɔ lɛ kɛbaa lɛ hewɔ. Kɛkɛ ni David lá akɛ: “[Akɛni Yehowa kɛfaa mɛi fɛɛ ni tsakeɔ amɛtsui lɛɛlɛŋ lɛ hewɔ lɛ] ha mɔ fɛɛ mɔ ni ji mɔkrɔŋkrɔŋ lɛ akpao enɛ he fai, be mli ni aaanao lɛ.”—Lala 32:6.
19. Mɛni hewɔ esa akɛ wɔhole niji ni he tse nɔ yɛ sɔlemɔ mli lɛ?
19 Kɛji akɛ wɔyɛ hiɛsɔɔ kɛha wekukpaa ni kã wɔkɛ Yehowa Nyɔŋmɔ teŋ lɛ, wɔbaadamɔ Yesu kpɔmɔ afɔleshaa lɛ nɔ wɔsɔle ni ena wɔ mɔbɔ. Wɔbaanyɛ ni wɔkɛ wiemɔ mli heyeli atsi abɛŋkɛ duromɔ maŋtsɛsɛi lɛ yɛ hemɔkɛyeli mli, koni wɔnine ashɛ mɔbɔnalɛ kɛ yelikɛbuamɔ nɔ yɛ be ni sa mli. (Hebribii 4:16) Shi, yiŋtoi babaoo yɛ ni adamɔɔ nɔ asɔleɔ! Belɛ nyɛhaa ‘wɔsɔlea daa ni wɔkafɔ̃ɔa’—shii abɔ kɛ yijiemɔ kɛ shidaa wiemɔi ni jɛ tsui mli kɛha Nyɔŋmɔ. (1 Tesalonikabii 5:17) Nyɛhaa wɔholea niji ni he tse nɔ yɛ sɔlemɔ mli, yɛ jetsɛremɔ mli kɛ jenamɔ mli.
Te Obaaha Hetoo Oha Tɛŋŋ?
◻ Mɛɛ sɛɛnamɔ yɔɔ sɔlemɔ yɛ faŋŋ mli lɛ ni atsɔɔ hiɛ asusuɔ he lɛ mli?
◻ Mɛni hewɔ esa akɛ wɔsɔle yɛ bulɛ kɛ woo su mli?
◻ Mɛɛ su esa akɛ wɔjie lɛ kpo beni wɔsɔleɔ?
◻ Kɛ́ wɔmiisɔle lɛ, mɛni hewɔ esa akɛ wɔkai shidaa kɛ yijiemɔ lɛ?
◻ Mɛɛ gbɛ nɔ Biblia lɛ tsɔɔ yɛ akɛ wɔbaanyɛ wɔná miishɛjemɔ kɛjɛ sɔlemɔ mli?
[Mfoniri ni yɔɔ baafa 17]
Maŋtsɛ Salomo jie heshibaa kpo yɛ esɔlemɔ yɛ faŋŋ mli lɛ mli beni ajɔɔ Yehowa sɔlemɔtsu lɛ nɔ lɛ
[Mfoniri ni yɔɔ baafa 18]
Taakɛ Hana ji lɛ, obaanyɛ oná miishɛjemɔ kɛjɛ sɔlemɔ mli