Heshibaa Tsui Ni Akɛsɔleɔ Yɛ Mɛi Krokomɛi Ahiɛ
EJI MIISHƐƐ be yɛ Israel yinɔsane mli. Maŋtsɛ David eto gbɛjianɔ koni akɛ Yehowa Kpaŋmɔ Adeka lɛ aba maŋtiase hee ni ji Yerusalem mli. Ekɛ miishɛɛ jie Yehowa yi yɛ gbɔmɛi lɛ fɛɛ hiɛ, ni ekɛ sɔlemɔ ni jɛ tsuiŋ tɔŋŋ yɛ nɛkɛ wiemɔi nɛɛ amli lɛ ba naagbee akɛ: “Yijiemɔ aha Yehowa, Israel Nyɔŋmɔ lɛ, kɛjɛ naanɔ kɛyashi naanɔ.” Mɛi ni boɔ lɛ toi lɛ jɛ amɛtsuiŋ tɔɔ amɛha hetoo akɛ “Amen! Ni amɛjie Yehowa yi.”—1 Kronika 16:36.
Ejeee nɔ ni efɔɔɔ kaa yɛ blema bei amli akɛ mɔ ni sa yɛ Nyɔŋmɔ webii ateŋ aaadamɔ gbɔmɛi lɛ anajiaŋ yɛ sɔlemɔ mli yɛ nɛkɛ gbɛ nɔ. Ni Yehowa tsuji ni yɔɔ ŋmɛnɛ lɛ feɔ nakai nɔŋŋ. Asafoŋ kpeei, kpeei wuji, weku niyeli be kɛ shia Biblia mli nikasemɔ be ji be ni Kristofoi hii—kɛ bei komɛi lɛ yei—naa hegbɛ amɛdamɔɔ mɛi krokomɛi anajiaŋ yɛ sɔlemɔ mli. (1 Korintobii 11:4, 5) Mɛni jɛɔ mli baa? Taakɛ eji yɛ David gbii lɛ amli lɛ, atswaa mɛi ni boɔ toi ni amɛkɛɔ akɛ “Amen” lɛ amaa shi ni amɛnuɔ he akɛ awaje wekukpaa ni ka amɛ kɛ Yehowa teŋ lɛ.
Mɛi anajiaŋ ni adamɔɔ yɛ sɔlemɔ mli lɛ ji gbɛnaa nii ni tsii waa. Esa akɛ mɔ ni sɔleɔ lɛ awie wiemɔi loo susumɔi ni tsɔɔ nɔ ni yɔɔ mɛi ni boɔ toi lɛ atsui mli diɛŋtsɛ. Esɔlemɔ lɛ saa amɛmumɔŋ shihilɛ lɛ he. No hewɔ lɛ, mɛi ni naa hegbɛ ni tamɔ nɛkɛ mli gbɛfaŋnɔ lɛ baasumɔ ni amɛ hu amɛbi taakɛ David bi lɛ “Ha mifaikpamɔ abaje tamɔ tsofa-kɛ-ŋma yɛ ohiɛ.”—Lala 141:2.
Te wɔɔfee tɛŋŋ wɔsaa wɔsɔlemɔi koni eje ŋma tamɔ tsofa-kɛ-ŋma yɛ Yehowa hiɛ? No ji kɛtsɔ ni wɔɔtsɔ hiɛ wɔsusu nɔ ni wɔbaakɛɛ lɛ he yɛ gbɛtsɔɔmɔ ni Yehowa kɛha lɛ mli. Sɔlemɔ he nɔkwɛmɔ nii babaoo yɛ Biblia lɛ mli kɛ agbɛnɛ ŋaawoo kpakpa ni kɔɔ sɔlemɔ he. Kɛ wɔsusu enɛɛmɛi ahe lɛ, ebaatsɔɔ wɔ shishitoo mlai kpakpai ni he hiaa ni yeɔ buaa kɛ wɔmiisɔle ni mɛi krokomɛi anu.
Kɛ Heshibaa Tsui
Shishitoo mla nɛɛ ekome ji akɛ Yehowa boɔ sɔlemɔ ni heshibalɔi feɔ lɛ toi. (2 Kronika 7:13, 14) Lalatsɛ lɛ kɛɔ wɔ akɛ: “Yehowa yɛ ŋwɛi shɔŋŋ moŋ, shi kɛlɛ, ehiɛ ka heshibalɔi ahe; shi hewolɔ lɛ, eyoɔ lɛ yɛ shɔŋŋ.” (Lala 138:6) Yɛ enɛ he nɔkwɛmɔ nɔ lɛ, susumɔ Maŋtsɛ Salomo heshibaa yɛ sɔlemɔ ni efee yɛ maŋ lɛ hiɛ yɛ sɔlemɔtsu lɛ nɔjɔɔmɔ be mli lɛ he okwɛ. Egbe tsũ ni yɔɔ fɛo fe fɛɛ ko ni ama yɛ shikpɔŋ nɔ pɛŋ naa, shi enɛ haaa ewo ehe nɔ. Shi moŋ, esɔle akɛ: “Shi aso Nyɔŋmɔ kɛ gbɔmɛi aaaba hi shi yɛ shikpɔŋ nɛɛ nɔ lɛlɛŋ? Naa, ŋwɛi kɛ ŋwɛii amli ŋwɛi nyɛɛɛo ato, aahu ni mbasroo shia nɛɛ ni mima nɛɛ!”—2 Kronika 6:18.
Esa akɛ wɔ hu wɔba wɔhe shi, titri lɛ, kɛ́ wɔmiisɔle yɛ mɛi krokomɛi ahiɛ. Ni tsɔɔ akɛ esa akɛ heshibaa aje kpo yɛ wɔgbee mli. Ni kɛlɛ, esa akɛ Kristofoi akwa apasa heshibaa aloo akwa ni akwaa afeɔ he hetselɔ. Shi heshibaa sɔlemɔi egbɛɛɛ ni afeee atsɔɔɔ. (Mateo 6:5) Heshibaa hu jeɔ kpo yɛ nɔ ni wɔkɛɔ lɛ mli. Kɛ wɔsɔleɔ yɛ heshibaa mli lɛ, wɔbiŋ ni Yehowa afee nibii komɛi. Shi moŋ, wɔbaakpa fai akɛ efee nii yɛ gbɛ ko nɔ taakɛ ekɛ esuɔmɔnaa nifeemɔ kpaa gbee.—Okɛto Lala 118:25 he.
Heshibaa hu baaye abua wɔ koni wɔkwa sɔlemɔ ni wɔkɛaatsu nii ni wɔkɛ wɔ diɛŋtsɛ wɔŋaawoo aha mɛi krokomɛi. Kɛ jeee nakai lɛ, wɔbaaje mumɔ ni Farisinyo ni yɔɔ Yesu abɛbua lɛ mli lɛ jie lɛ kpo lɛ kpo. Yesu wie Farisinyo ko kɛ toohelɔ ko ni miisɔle yɛ be kome too mli yɛ sɔlemɔwe lɛ he. Farisinyo lɛ kɛɛ akɛ: “Nyɔŋmɔ, miida bo shi akɛ mitamɔɔɔ mɛi krokomɛi lɛ, wieyelɔi, kutumpɔfoi, gbalafitelɔi, loo tamɔ nɛkɛ toohelɔ nɛɛ hu; miyeɔ buada shii enyɔ yɛ otsi mli; miŋɔɔ nibii fɛɛ ni minaa lɛ mlijaa nyɔŋma mihaa.” Shi toohelɔ lɛ tee nɔ ekɛ enine shimɔ etsitsi ni ekɛɛ: “Nyɔŋmɔ, okɛ mi ni ji eshafeelɔ lɛ akpata!” Te Yesu mu sane lɛ naa eha tɛŋŋ? “Nɛkɛ nuu nɛɛ [toohelɔ lɛ] yiŋ etee ewe ni abu lɛ bem fe mɔ kome [Farisifonyo] lɛ.”—Luka 18:9-14.
Yehowa tsuji ni baa amɛhe shi diɛŋtsɛ lɛ le gbɛhe mli ni amɛyɔɔ lɛ yɛ ehiɛ. Amɛhaa shi fioo fe ŋwɛibɔfoi, yɛ be mli ni Yehowa ji jeŋ muu fɛɛ naanɔ Maŋtsɛ. (Lala 8:3-5, 9; 90:1-4) Kɛ aŋkroaŋkroi na hegbɛ akɛ amɛaawie amɛtsɔɔ je nɛŋ maŋtsɛmɛi kɛ nɔyelɔi lɛ, nɔ ni amɛfɔɔ feemɔ ji amɛkɛ bulɛ kɛ woo feɔ ni amɛhiɛ sɔɔ gbɛhe ni nɔ kwɔ ni amɛyɔɔ mli lɛ waa. Ani esa akɛ wɔfee mɛi ni ebuuu nii ni wɔhiɛ esɔɔɔ nii yɛ be mli ni wɔwieɔ wɔtsɔɔ “anɔkwa Nyɔŋmɔ lɛ, Nyɔŋmɔ hiɛkalɔ kɛ naanɔ Maŋtsɛ” lɛ? (Yeremia 10:10) Dabi, wɔfeŋ nakai. No hewɔ lɛ, wiemɔi tamɔ “Yehowa, Ojekoo” aloo, “Wɔmiisumɔ ni wɔkɛbo awie, Yehowa” lɛ ehiii kɛhaaa sɔlemɔ, kɛ sanegbaa wiemɔi tamɔ “Te oyɔɔ tɛŋŋ ŋmɛnɛ?” “Okɛɛ Yesu akɛ wɔmiiŋa lɛ,” aloo “Hii shi jogbaŋŋ.”—Okɛto Jajelɔ 5:1, 2 he.
Ani bɔfo Paulo ekɛɛɛ akɛ, esa akɛ wɔkɛ “wiemɔ mli heyeli” abɛŋkɛ Yehowa? (Hebribii 4:16; ekɛto 1 Yohane 3:21, 22 he.) Ani enɛ haaa wɔ heyeli ni wɔkɛaawie bɔ ni wɔsumɔɔ? Dabida Paulo wiemɔi lɛ miitsɔɔ akɛ yɛ Yesu afɔleshaa lɛ hewɔ lɛ, wɔbaanyɛ wɔbɛŋkɛ Yehowa yɛ eshafeemɔ shihilɛ ni wɔyɔɔ mli lɛ fɛɛ sɛɛ. Wɔbaanyɛ wɔbɛŋkɛ lɛ yɛ sɔlemɔ mli yɛ be fɛɛ be mli yɛ sane fɛɛ sane he. No hewɔ lɛ yɛ be mli ni wɔkɛ wiemɔ mli heyeli sɔleɔ lɛ, esa akɛ wɔkɛ heshibaa ayoo akɛ wɔjeee fɛi. No hewɔ lɛ Yehowa kɛɛ: “Shi mɔ ni makwɛ nɛ: mɔ ni nii yɔɔ mɔbɔ ni emumɔ tswiaa shi kɛ dɔlɛ, ni ehe kpokpoɔ yɛ miwiemɔ lɛ naa lɛ.”—Yesaia 66:2.
Kɔkɔbɔɔ Ŋaawoo
Yesu Kristo kɛ ŋaawoo kroko ha yɛ sɔlemɔ he yɛ e-Gɔŋ nɔ shiɛmɔ lɛ mli. Ebɔ kɔkɔ yɛ mli akɛ kɛji akɛ wɔmiisɔle lɛ, “nyɛkawiea trilii tamɔ wɔŋjalɔi lɛ.” (Mateo 6:7) Enɛ etsɔɔɔ akɛ wɔkasɔle shii abɔ yɛ sane kome he (yɛ bei abɔ ni wɔle akɛ eji nii ni ja ni wɔsɔleɔ yɛ he) . Akɛɔ wɔ akɛ: “Nyɛbia, ni aaahanyɛ; nyɛtaoa, ni nyɛaana; nyɛshia, ni aaagbele aha nyɛ.” (Mateo 7:7) No hewɔ lɛ, Yesu kɔkɔbɔɔ lɛ miitsɔɔ akɛ wɔkati nibii amli kɛyashɛ he ni eeefee nii ni shishinumɔ bɛ he. Yɛ gbɛ kroko nɔ lɛ, “Nyɛkatia sane mli yaka.”—Mateo 6:7, Ref. Bible., shishigbɛ niŋmaa.
Gbɔmɛi komɛi akusum nifeemɔ ji ni amɛti sɔlemɔ ni aŋma momo mli shii abɔ ni amɛsusuuu emli wiemɔi lɛ ahe. Yɛ bei komɛi amli lɛ, sɔlemɔ ni aŋma lɛ yɛ wiemɔ ni mɔ ni sɔleɔ lɛ nuuu shishi lɛ mli. Enɛ ji ‘yaka sane mlitii’ lɛ ekome. Naa ekroko: Susumɔ Kristofonyo ko ni kuɔ ehiɛ eshwieɔ nii anɔ, ni ebote su ko ni haa sɔlemɔ ni esɔleɔ daa gbi lɛ no nɔŋŋ etiɔ mli ekɛdaa Yehowa shi lɛ he okwɛ. Yɛ naagbee lɛ ewiemɔi lɛ bafeɔ nɔ ni shishinumɔ bɛ he. Abaanyɛ akɛ gbɛi krɔŋkrɔŋ Yehowa lɛ atsu nii po yɛ nɛkɛ gbɛ nɔ. Yɛ anɔkwale mli lɛ, akɛɔ wɔ akɛ wɔtse Yehowa gbɛi lɛ he. (Lala 105:1) Ni kɛji akɛ wɔkɛ nakai wiemɔ lɛ tsu nii yɛ wiemɔ fɛɛ wiemɔ naagbee yɛ wɔsɔlemɔ mli lɛ, ebafeɔ su ko ni eka wɔhe loo ‘yaka sane mlitii.’
Paulo tsi shishitoo mla kroko ni he hiaa ta beni eŋma akɛ: “Kɛji miisɔleɔ kɛ lilɛi sɔrɔto jiŋŋ, mimumɔ lɛ sɔleɔ moŋ, shi mijwɛŋmɔ lɛ wooo yibii. . . . Ejaakɛ kɛ okɛ mumɔ miijɔɔ lɛ, te aaafee tɛŋŋ ni mɔ ni ta mɛi ni leee mli eko lɛ agbɛhe lɛ aaakɛɛ ‘Amen’ ashi oshidaa lɛ nɔ akɛni eleee nɔ ni okɛɔ lɛ?” (1 Korintobii 14:14-16) Yɛ Paulo gbii lɛ amli lɛ, Kristofoi komɛi anine shɛ naakpɛɛ nikeenii ni ji lilɛi sɔrɔtoi lɛ anɔ, eka shi faŋŋ akɛ mɛi komɛi sɔle yɛ nɛkɛ wiemɔi nɛɛ amli yɛ asafo lɛ hiɛ. Shi taakɛ Paulo tsɔɔ lɛ, mɛi ni eshwɛ yɛ asafo lɛ mli lɛ nuuu nɔ ni ekɛɔ lɛ shishi. Ŋmɛnɛ, wɔbɛ nɛkɛ naakpɛɛ nikeenii nɛɛ. Shi Kristofoi ni sɔleɔ yɛ mɛi krokomɛi ahiɛ lɛ asɔle yɛ gbɛ ni aaanu shishi lɛ nɔ. Akɛ nɔkwɛmɔ nɔ lɛ, kɛ abaaje maŋshiɛmɔ lɛ shishi lɛ, wɔfɔɔ nine wɔtsɛɔ maŋ bii lɛ koni amɛbafata wɔhe ni wɔsɔle. Esa akɛ wɔkwa wiemɔi wuji loo saji ni mɛi ni amɛbasara wɔ lɛ nuŋ shishi lɛ yɛ wɔsɔlemɔi amli.
Te Esa Akɛ Sɔlemɔ Sɛɛjɛkɛmɔ Afee Aha Tɛŋŋ?
Teemɔŋ sɔlemɔ sɛɛ baanyɛ akɛ bɔ ni wɔsumɔɔ. Dani Yesu aaahala ebɔfoi 12 lɛ, esɔle gbɛkɛ muu lɛ fɛɛ. (Luka 6:12) Te esa akɛ sɔlemɔ ni afeɔ yɛ mɛi ahiɛ lɛ sɛɛjɛkɛmɔ afee aha tɛŋŋ? Ojogbaŋŋ, dani ekɛ aboloo lɛ kɛ wein lɛ aaaha ni aye yɛ egbele lɛ Kaimɔ lɛ shishi lɛ, Yesu ‘jɔɔ nɔ’ ni ‘eda shi.’ Eka shi faŋŋ akɛ efee enɛ yɛ sɔlemɔi kukuji amli. (Mateo 26:26-28) Yɛ gbɛ kroko nɔ lɛ, Salomo sɔlemɔ yɛ sɔlemɔwe lɛ kɛ enɔjɔɔmɔ he lɛ sɛɛ kɛ diɛŋtsɛ. Nakai eji yɛ Yesu sɔlemɔ yɛ gbɛkɛ ni agbe lɛ lɛ.—2 Kronika 6:14-42; Yohane 17:1-26.
No hewɔ lɛ, mla ko bɛ yɛ bɔ ni esa akɛ mɛi ahiɛ sɔlemɔ sɛɛjɛkɛmɔ afee he. Shi yɛ anɔkwale mli lɛ, nɔ ko bɛ ni tsɔɔ akɛ sɔlemɔi kakadaji yeɔ emuu. Yɛ anɔkwale mli lɛ, Yesu wie eshi wɔloŋmalɔi lɛ ‘ni miɔ okulafoi ashiai ni amɛkɛ lakpatoo sɔleɔ kakadaji lɛ.’ (Luka 20:46, 47) Esa akɛ sɔlemɔ ni afeɔ ahaa mɛi krokomɛi lɛ afee nɔ ni akɛbaatsi shihilɛ mli ni amɛyɔɔ loo amɛhiamɔ nii ata, ni esa akɛ esɛɛ kɛlɛ akpa gbee lɛ. Ehe ehiaaa ni osɔle sɔlemɔi kakadaji, ní wɔmiisɔle kɛmiitsi nibii ni he ehiaaa lɛ ata. Kɛ wɔmiisɔle yɛ niyenii ashishi lɛ, esa akɛ sɔlemɔ Iɛ afee kuku, ehe ehiaaa ni sɔlemɔ ni akɛgbeleɔ Kristofoi akpeei lɛ afee kakadaŋŋ. Mɔ ni damɔɔ weku lɛ najiaŋ yɛ gbi lɛ shishijee aloo gbi lɛ naagbee, aloo mɔ ni kɛ kpee wulu ko shishi sɔlemɔ baa naagbee lɛ baasumɔ ni etsi saji otii ni sa ni kɔɔ shihilɛ lɛ he lɛ ata.
Sɔlemɔ ni afeɔ ahaa mɛi krokomɛi lɛ ahe baaba sɛɛnamɔ kɛji akɛ afee kɛjɛ heshibaa tsui mli ni aha wiemɔ lɛ hu ŋmɛ pɛpɛɛpɛ kɛ mɛi krokomɛi ahe susumɔ. Ebaatswa mɛi ni boɔ toi lɛ amumɔŋ shidaamɔ lɛ ama shi shiŋŋ, ni ebaawo wekukpaa ni ka amɛkɛ Yehowa teŋ lɛ mli hewalɛ. Nɔ ni baajɛ mli aba ji akɛ, taakɛ mɛi ni nu David sɔlemɔ ni jɛ tsuiŋ tɔŋŋ lɛ, yɛ be mli ni ekɛ kpaŋmɔ adeka lɛ ba Yerusalem lɛ fee lɛ, no baatsirɛ amɛ ‘ni amɛkɛɛ akɛ: “Amen” kɛha Yehowa yijiemɔ.’—1 Kronika 16:36.
[Akrabatsa ni yɔɔ baafa 27]
Ani esa akɛ toibolɔi lɛ akɛɛ “Amen” ni anu yɛ be mli ni asɔleɔ yɛ mɛi ahiɛ?
Hɛɛ, kɛ amɛmiisumɔ nakai aloo amɛnuɔ he akɛ esa akɛ amɛfee nakai. Paulo wie “Amen” ni mɛi komɛi ni boɔ sɔlemɔ toi lɛ kɛmu sɔlemɔ lɛ naa lɛ he, eyɛ mli akɛ etsiii ta akɛ anu Amen lɛ aloo amɛkɛɛ nakai yɛ teemɔŋ yɛ amɛtsui mli. (1 Korintobii 14:16) Shi, yɛ Mose Mla lɛ shishi lɛ, be shɛ ni afa Israelbii lɛ diɛŋtsɛ akɛ amɛkɛɛ “Amen” waa ni anu. (5 Mose 27:14-26) No hewɔ lɛ, mɔ ni sɔleɔ lɛ tsɔɔ akɛ esɔlemɔ lɛ eba naagbee kɛtsɔ “Amen” kɛɛmɔ nɔ, ni esa akɛ toibolɔi akɛɛ “Amen” yɛ amɛtsui mli aloo bɔ ni aaanu kɛ gbee ni baa shi. Esa akɛ fɔlɔi etsɔse amɛbii ni amɛjie hiɛsɔɔ kpo yɛ nɛkɛ gbɛ nɔ yɛ gbɛ ni amɛkɛɔ “Amen” blɛoo lɛ mli.
[Akrabatsa ni yɔɔ baafa 28]
Kɛji akɛ fufɔoo ko bɔi aaafo, tɛlifon lɛ gbɛɛ aloo naagba kroko ba yɛ be mli ni asafo lɛ miisɔle lɛ, ani kɛ́ toibolɔ ko tsu nɔ ni eba lɛ he nii lɛ, etsɔɔ nii ni abuuu lo?
Dabi. Etsɔɔɔ nakai. Yɛ anɔkwale mli lɛ, ebaafee suɔmɔ kpojiemɔ akɛ asafoŋ sɔɔlɔi lɛ aaashi asafo ni sɔleɔ lɛ diŋŋ ni amɛtsu naagba ni eba lɛ he nii yɛ gbɛjianɔtoo kpakpa naa. (1 Korintobii 14:40) No hewɔ lɛ, mɛi ni eshwɛ yɛ asafo lɛ mli lɛ baanyɛ aya nɔ ni amɛsɔle ni agbaaa amɛ naa. Mɔ fɛɛ mɔ ni tsuɔ naagba nɛɛ he nii lɛ baanyɛ afata sɔlemɔ lɛ he ekoŋŋ kɛ naagba lɛ ba naagbee.