Yitso 16
Bɔ ni Ooofee Otsi Obɛŋkɛ Nyɔŋmɔ
1. Mɛni ni je amɛhe anaa yɛ jamɔi babaoo mli?
HIƐTSERƐJIEMƆ gbɛfalɔ ko ni miisara Bokagbɛ maŋ ko lɛ naa kpɛ ehe yɛ jamɔ mli kusum nifeemɔi ni ena yɛ Buddhafoi asɔlemɔtsu ko mli lɛ he. Eyɛ mli akɛ amagai lɛ jeee Maria loo Kristo nɔ moŋ, shi kusum nifeemɔi lɛ pii tamɔ esɔlemɔ lɛ nɔ yɛ emaŋ. Akɛ nɔkwɛmɔ nɔ lɛ, eyoo ashinao ni akaneɔ kɛ sɔlemɔi ni akɛfee lalai. Mɛi krokomɛi hu kɛ nibii eto he nɛkɛ. Bokagbɛ jio, Anaigbɛ jio, gbɛi sɔrɔtoi anɔ ni mɛi ni amɛtu amɛhe amɛha lɛ bɔɔ mɔdɛŋ ni amɛkɛbɛŋkɛ Nyɔŋmɔ loo nibii ni amɛjaa amɛ lɛ je amɛhe waa.
2. Te atsɔɔ sɔlemɔ mli aha tɛŋŋ, ni mɛni hewɔ mɛi pii sɔleɔ?
2 Mɛi pii bɔɔ mɔdɛŋ ni amɛbɛŋkɛ Nyɔŋmɔ titri kɛtsɔ sɔlemɔ ni amɛsɔleɔ amɛhaa lɛ lɛ nɔ. Atsɔɔ sɔlemɔ mli akɛ “sharamɔ ni gbɔmɔ kɛ—Nyɔŋmɔ, nyɔŋmɔi, shihilɛ hé ni kwɔ lɛ, loo hewalɛi ni fe adesai anɔ̃, ni yɔɔ krɔŋkrɔŋ lɛ yeɔ.” (The New Encyclopædia Britannica) Shi kɛ mɛi komɛi miibɛŋkɛ Nyɔŋmɔ yɛ sɔlemɔ mli lɛ, nibii ni amɛbaanyɛ amɛna kɛjɛ mli lɛ pɛ he amɛsusuɔ. Akɛ nɔkwɛmɔ nɔ lɛ, nuu ko bi Yehowa Odasefoi ateŋ mɔ kome akɛ: “Kɛji akɛ osɔle oha mi lɛ, ani naagbai ni mináa yɛ miweku, minitsumɔ hé, kɛ migbɔmɔtsoŋ hewalɛnamɔ mli lɛ baaba naagbee lo?” Eka shi faŋŋ akɛ nuu lɛ susu nakai, shi mɛi pii sɔleɔ ni amɛnaa akɛ amɛ naagbai lɛ yɛ lolo. No hewɔ lɛ wɔbaanyɛ wɔbi akɛ, ‘Mɛni hewɔ kwraa esa akɛ wɔtsi wɔbɛŋkɛ Nyɔŋmɔ?’
NƆ HEWƆ NI ESA AKƐ OTSI OBƐŊKƐ NYƆŊMƆ
3. Esa akɛ wɔkɛ wɔ sɔlemɔi aha namɔ, ni mɛni hewɔ?
3 Sɔlemɔ jeee kusum folo ko kɛkɛ ni afeɔ, ni asaŋ ejeee nɔ ko kɛkɛ hu ni atsɔɔ nɔ anáa nɔ ko kɛjɛɔ mli. Yiŋtoo titri ni haa abɛŋkɛɔ Nyɔŋmɔ ji ni akɛ lɛ ana wekukpaa ni bɛŋkɛ kpaakpa. No hewɔ lɛ esa akɛ wɔkudɔ wɔsɔlemɔi lɛ kɛya Yehowa Nyɔŋmɔ ŋɔɔ. Lalatsɛ David kɛɛ: “Yehowa bɛŋkɛɔ mɛi fɛɛ ni tsɛɔ lɛ lɛ.” (Lala 145:18) Yehowa fɔɔ nine etsɛɔ wɔ ni wɔkɛ lɛ abote toiŋjɔlɛ wekukpaa mli. (Yesaia 1:18) Mɛi ni kpɛlɛɔ ninefɔɔ nɛɛ nɔ lɛ kɛ lalatsɛ ni wieɔ nɛkɛ lɛ kpaa gbee: “Shi mi lɛ, Nyɔŋmɔ ŋɔɔ hilɛ hi ha mi.” Mɛni hewɔ? Ejaakɛ mɛi ni bɛŋkɛɔ Yehowa Nyɔŋmɔ lɛ baana anɔkwa miishɛɛ kɛ jwɛŋmɔŋ toiŋjɔlɛ.—Lala 73:28.
4, 5. (a) Mɛni hewɔ ehe hiaa akɛ wɔsɔle wɔha Nyɔŋmɔ? (b) Mɛɛ wekukpaa wɔbaanyɛ wɔtswa wɔma wɔkɛ Nyɔŋmɔ teŋ kɛtsɔ sɔlemɔ nɔ?
4 Mɛni hewɔ esa akɛ wɔsɔle wɔha Nyɔŋmɔ kɛha yelikɛbuamɔ kɛji akɛ ‘ele nɔ ni he hiaa wɔ dani wɔbi lɛ’? (Mateo 6:8; Lala 139:4) Sɔlemɔ tsɔɔ akɛ wɔyɛ hemɔkɛyeli yɛ Nyɔŋmɔ mli ni wɔbuɔ lɛ akɛ “duromɔ nii kpakpai fɛɛ kɛ nikee nii ni hi kɛwula shi fɛɛ” Jɛɛhe. (Yakobo 1:17; Hebribii 11:6) Yehowa nyaa wɔ sɔlemɔi ahe. (Abɛi 15:8) Eŋɔɔ enaa akɛ eeenu wɔ hiɛsɔɔ kɛ yijiemɔ wiemɔi ni shishinumɔ yɔɔ mli lɛ, tamɔ bɔ ni tsɛ mli filiɔ lɛ kɛ enu ni ebi fioo kɛ shidaa wiemɔi miiwie lɛ. (Lala 119:108) Kɛ tsɛ kɛ bi teŋ wekukpaa kpakpa yɛ lɛ, sanegbaa ni miishɛɛ yɔɔ mli baa. Bi ni asumɔɔ lɛ lɛ sumɔɔ ni ekɛ etsɛ awie. Nakai nɔŋŋ eji anɔkwale yɛ wekukpaa ni ka wɔkɛ Nyɔŋmɔ teŋ lɛ he. Kɛ wɔhiɛ sɔɔ nɔ ni wɔkaseɔ yɛ Yehowa kɛ suɔmɔ ni ejie lɛ kpo kɛha wɔ lɛ he diɛŋtsɛ lɛ, wɔɔna suɔmɔ ni mli wa akɛ wɔɔjaje wɔ saji wɔtsɔɔ lɛ yɛ sɔlemɔ mli.—1 Yohane 4:16-18.
5 Kɛ wɔmiibɛŋkɛ Ŋwɛi Flooflo Nyɔŋmɔ lɛ, esa akɛ wɔkɛ bulɛ afee, eyɛ mli akɛ ehe ehiaaa ni wɔhao wɔhe tsɔ yɛ wiemɔi pɔtɛɛ ni wɔkɛaatsu nii lɛ he. (Hebribii 4:16) Wɔnyɛɔ wɔyaa Yehowa hiɛ be fɛɛ be. Ni mɛɛ hegbɛ enɛ ji akɛ ‘wɔfɔse wɔtsui’ wɔshwie Nyɔŋmɔ hiɛ yɛ sɔlemɔ mli! (Lala 62:9) Hiɛsɔɔ kɛha Yehowa kɛ wekukpaa ni miishɛɛ yɔɔ mli baa wɔkɛ lɛ teŋ, tamɔ nɔ ni nuu anɔkwafo Abraham na mli ŋɔɔmɔ akɛ Nyɔŋmɔ shieŋtsɛ lɛ. (Yakobo 2:23) Shi kɛ wɔmiisɔle wɔha jeŋ muu fɛɛ Nuntsɔ Maŋtsɛ lɛ, esa akɛ wɔkɛ etaomɔ nii ni akɛbaa ehiɛ lɛ atsu nii.
TAOMƆ NII NI ATSƆƆ NƆ ABƐŊKƐƆ NYƆŊMƆ
6, 7. Eyɛ mli akɛ Nyɔŋmɔ biii ni wɔwo wɔ sɔlemɔi ni eboɔ toi lɛ ahe nyɔmɔ moŋ, shi mɛni etaoɔ yɛ wɔdɛŋ beni wɔsɔleɔ?
6 Ani shika he miihia dani obɛŋkɛ Nyɔŋmɔ? Mɛi pii woɔ osɔfoi anyɔmɔ koni amɛsɔle amɛha amɛ. Mɛi komɛi po susuɔ akɛ bɔ ni too ni amɛwo lɛ dalɛ yɔɔ lɛ nɔ abaadamɔ ni abo amɛ sɔlemɔi atoi. Shi, Nyɔŋmɔ Wiemɔ lɛ ekɛɛɛ akɛ shika ni akɛaaha he miihia wɔ koni wɔbɛŋkɛ Yehowa yɛ sɔlemɔ mli. Mumɔŋ nibii ni eto he gbɛjianɔ kɛ jɔɔmɔi ni wɔnaa yɛ wɔkɛ lɛ teŋ wekukpaa mli yɛ sɔlemɔ mli lɛ yɛ ni jara bɛ he.—Yesaia 55:1, 2.
7 Belɛ mɛni ataoɔ? Su ni ji tsui kpakpa ji hiamɔ nii lɛ ekome. (2 Kronika 6:29, 30; Abɛi 15:11) Esa akɛ wɔhe Yehowa Nyɔŋmɔ wɔye yɛ wɔtsui mli akɛ “Sɔlemɔ toibolɔ” ni akɛ “eji mɛi ni taoɔ esɛɛ gbɛ lɛ anyɔmɔwolɔ hu.” (Lala 65:2, NW; Hebribii 11:6) Esa akɛ wɔna heshibaa tsui hu. (2 Maŋtsɛmɛi 22:19; Lala 51:19) Yesu Kristo tsɔɔ yɛ enɔkwɛmɔ nii lɛ ekome mli akɛ, beni toohelɔ heshibalɔ ko kɛ heshibaa tsui bɛŋkɛ Nyɔŋmɔ lɛ, ebafee mɔ ni ji jalɔ babaoo fe Farisifonyo henɔwolɔ lɛ. (Luka 18:10-14) Beni wɔbɛŋkɛɔ Nyɔŋmɔ yɛ sɔlemɔ mli lɛ, nyɛhaa wɔkaia akɛ “Yehowa miihi mɔ fɛɛ mɔ ni woɔ ehe nɔ yɛ etsui mli.”—Abɛi 16:5.
8. Kɛ wɔmiisumɔ ni Nyɔŋmɔ abo wɔsɔlemɔi atoi lɛ, esa akɛ wɔtsuu wɔhe kɛjɛ mɛni he?
8 Kɛ wɔmiisumɔ ni Nyɔŋmɔ aha wɔsɔlemɔi ahetoo lɛ, esa akɛ wɔjie eshafeemɔ su kɛjɛ wɔhe. Beni kaselɔ Yakobo wo mɛi krokomɛi ahewalɛ ni amɛbɛŋkɛ Nyɔŋmɔ lɛ, ekɛfata he akɛ: “Nyɛtsuua nyɛniji ahe, nyɛ eshafeelɔi, ni nyɛhaa nyɛtsuii ahe atsea, nyɛ jwɛŋmɔi enyɔnyɔtsɛmɛi.” (Yakobo 4:8) Efɔŋ feelɔi po baanyɛ ana amɛkɛ Yehowa teŋ wekukpaa ni toiŋjɔlɛ yɔɔ mli kɛji akɛ amɛtsake amɛtsui ni amɛshi amɛtsutsu shihilɛ gbɛ lɛ. (Abɛi 28:13) Wɔnyɛŋ wɔya Yehowa hiɛ kɛji akɛ wɔkwa wɔfee akɛ wɔtsuu wɔ gbɛ he. Nyɔŋmɔ Wiemɔ lɛ kɛɔ akɛ: “Yehowa hiŋmɛii ka jalɔi ahe, ni eboɔ amɛfaikpamɔ toi; shi mɛi ni feɔ nifɔjianii lɛ, Yehowa ejie ehiɛ eka amɛ.”—1 Petro 3:12, NW.
9. Namɔ nɔ esa akɛ wɔtsɔ wɔbɛŋkɛ Yehowa, ni mɛni hewɔ?
9 Biblia lɛ kɛɔ akɛ: “Gbɔmɔ ko bɛ shikpɔŋ lɛ nɔ, ni ji jalɔ, ni feɔ ekpakpa ni efeee esha.” (Jajelɔ 7:20) No hewɔ lɛ obaanyɛ obi akɛ: ‘Belɛ te wɔɔfee tɛŋŋ wɔbɛŋkɛ Yehowa Nyɔŋmɔ?’ Biblia lɛ haa hetoo: “Ni kɛ mɔ ko fee esha jiŋŋ, wɔyɛ mlidamɔlɔ yɛ Tsɛ lɛ ŋɔɔ, Yesu Kristo, jalɔ lɛ.” (1 Yohane 2:1) Eyɛ mli akɛ wɔji eshafeelɔi moŋ, shi wɔbaanyɛ wɔbɛŋkɛ Nyɔŋmɔ kɛ wiemɔ mli heyeli kɛtsɔ Yesu Kristo, mɔ ni gbo akɛ kpɔmɔ nɔ kɛha wɔ lɛ nɔ. (Mateo 20:28) Lɛ pɛ ji gbɛ ni wɔbaanyɛ wɔtsɔ enɔ wɔbɛŋkɛ Yehowa Nyɔŋmɔ. (Yohane 14:6) Esaaa akɛ wɔkuɔ wɔhiɛ wɔshwieɔ Yesu kpɔmɔ afɔleshaa lɛ jara lɛ nɔ, ni wɔje gbɛ wɔkã eshafeemɔ he. (Hebribii 10:26) Shi, kɛji akɛ wɔmiifee nɔ ni hi fe fɛɛ ni wɔɔnyɛ ni wɔtsi wɔhe kɛjɛ nakai nɔ fɔŋ lɛ he, ni kɛlɛ wɔtɔ̃ yɛ bei komɛi amli lɛ, wɔbaanyɛ wɔtsake wɔtsui ni wɔbi Nyɔŋmɔ dɛŋ eshaifaa. Kɛ wɔbɛŋkɛ lɛ kɛ heshibaa tsui lɛ, ebaabo wɔ toi.—Luka 11:4.
HEGBƐI NI WƆƆTSƆ NƆ WƆKƐ NYƆŊMƆ AWIE
10. Kɛ eba sɔlemɔ he lɛ, mɛɛ gbɛ nɔ wɔɔtsɔ wɔkase Yesu yɛ, ni mɛɛ bei nɛkɛ wɔnaa kɛhaa sɔlemɔ yɛ teemɔŋ?
10 Yesu Kristo bu wekukpaa ni ka ekɛ Yehowa teŋ lɛ akɛ ejara wa waa. No hewɔ lɛ, Yesu to be ni ekɛ Nyɔŋmɔ wie yɛ sɔlemɔ mli yɛ teemɔ mli. (Marko 1:35; Luka 22:40-46) Wɔɔfee jogbaŋŋ akɛ wɔɔkase Yesu nɔkwɛmɔ nɔ lɛ ni wɔsɔle wɔha Nyɔŋmɔ daa. (Romabii 12:12) Ehi jogbaŋŋ akɛ aaaje gbi lɛ shishi kɛ sɔlemɔ wiemɔi, ni kɛ wɔbaawɔ lɛ, wɔbaanyɛ wɔda Yehowa shi yɛ gbɛ ni ja nɔ yɛ gbi lɛ mli nitsumɔi ahewɔ. Ha efee oti ni ma ohiɛ akɛ ooobɛŋkɛ Nyɔŋmɔ yɛ gbi lɛ mli ‘be fɛɛ be.’ (Efesobii 6:18) Wɔbaanyɛ wɔsɔle diŋŋ yɛ wɔtsui mli po, ejaakɛ wɔle akɛ Yehowa baanyɛ abo wɔ toi. Nyɔŋmɔ ni wɔkɛ lɛ aaawie yɛ teemɔŋ lɛ yeɔ ebuaa wɔ koni wɔha wekukpaa ni ka wɔkɛ lɛ teŋ lɛ mli awa gbagbalii, ni Yehowa ni wɔsɔleɔ wɔhaa lɛ daa gbi hu yeɔ ebuaa wɔ ni wɔtsiɔ wɔbɛŋkɛɔ lɛ kpaakpa.
11. (a) Mɛni hewɔ esa akɛ wekui asɔle kutuu? (b) Kɛ okɛɛ “Amen” yɛ sɔlemɔ ko naagbee lɛ mɛni etsɔɔ?
11 Yehowa boɔ sɔlemɔi ni afeɔ ahaa gbɔmɛi akui lɛ hu toi. (1 Maŋtsɛmɛi 8:22-53) Wɔbaanyɛ wɔbɛŋkɛ Nyɔŋmɔ akɛ weku, koni weku yitso lɛ anyiɛ hiɛ. Enɛ woɔ weku ekomefeemɔ lɛ mli hewalɛ, ni Yehowa baafee mɔ ni yɔɔ pɔtɛɛ kɛhaa gbekɛbii lɛ yɛ be mli ni amɛboɔ amɛfɔlɔi lɛ aheshibaa sɔlemɔ kɛha Nyɔŋmɔ lɛ toi lɛ. Shi kɛji akɛ mɔ ko miidamɔ kuu lɛ najiaŋ yɛ sɔlemɔ mli, ekolɛ yɛ Yehowa Odasefoi akpee shishi hu? Kɛ wɔfata kuu lɛ he lɛ, nyɛhaa wɔboa toi jogbaŋŋ koni yɛ sɔlemɔ lɛ naagbee lɛ, wɔnyɛ wɔjɛ wɔtsui mli wɔkɛɛ “Amen,” ni eshishi ji “Aba mli nakai.”—1 Korintobii 14:16.
SƆLEMƆI NI YEHOWA BOƆ TOI
12. (a) Mɛni hewɔ Nyɔŋmɔ haaa sɔlemɔi komɛi ahetoo lɛ? (b) Mɛni hewɔ esaaa akɛ wɔsusuɔ wɔ diɛŋtsɛ wɔ hiamɔ nii ahe pɛ beni wɔsɔleɔ?
12 Mɛi komɛi baanu he akɛ Nyɔŋmɔ booo amɛsɔlemɔi atoi kɛ amɛsɔle amɛha lɛ kɛtsɔ Kristo nɔ po. Shi kɛlɛ, bɔfo Yohane kɛɛ: “Kɛji wɔba nɔ ko yɛ [Nyɔŋmɔ] suɔmɔ naa lɛ, eboɔ wɔ toi.” (1 Yohane 5:14) No hewɔ lɛ, esa akɛ wɔbi nii yɛ Nyɔŋmɔ suɔmɔ naa. Akɛni eyɔɔ wɔ mumɔŋ hilɛ-kɛhamɔ he miishɛɛ hewɔ lɛ, nɔ fɛɛ nɔ ni saa wɔ mumɔŋ shihilɛ he lɛ ji nii ni sa akɛ asɔleɔ yɛ he. Esa akɛ wɔte shi wɔwo kaa ni aaaha wɔjwɛŋ heloonaa hiamɔ nibii pɛ he lɛ. Akɛ nɔkwɛmɔ nɔ lɛ, yɛ be mli ni esa akɛ wɔsɔle wɔbi sane shishinumɔ kɛ nyɛ̃mɔ ni wɔkɛaatsu helai ahe nii lɛ, esaaa akɛ naagbai ni kɔɔ gbɔmɔtsoŋ hewalɛnamɔ he lɛ haà wɔ mumɔŋ nibii anɔ. (Lala 41:2-4) Beni Kristofonyo yoo ko yóo akɛ eesusu ehewalɛnamɔ he waa fe nine lɛ, esɔle ebi Yehowa kɛha yelikɛbuamɔ koni ena jwɛŋmɔ ni ja yɛ ehela lɛ he. Nɔ ni jɛ mli ba ji akɛ, ehewalɛnamɔ mli haomɔi lɛ bafee sane bibioo ko, ni enu he akɛ aha lɛ “hewalɛ ni fa kɛteke nɔ.” (2 Korintobii 4:7) Bɔ ni eshweɔ ni eye ebua mɛi krokomɛi yɛ mumɔŋ lɛ mli bawa, ni ebatsɔ be-fɛɛ Maŋtsɛyeli shiɛlɔ.
13. Taakɛ atsɔɔ yɛ Mateo 6:9-13 lɛ, mɛni ji saji komɛi ni sa ni wɔbaanyɛ wɔkɛfata wɔ sɔlemɔi ahe?
13 Mɛni wɔbaanyɛ wɔkɛfata wɔ sɔlemɔi ahe koni esa Yehowa hiɛ akɛ eeebo toi? Yesu Kristo tsɔɔ bɔ ni esa akɛ ekaselɔi lɛ asɔle aha. Efee nibii ni wɔbaanyɛ wɔsɔle yɛ he yɛ gbɛ ni ja nɔ lɛ he nɔkwɛmɔ nɔ efɔ shi yɛ sɔlemɔ nɔkwɛmɔ nɔ ni aŋma afɔ shi yɛ Mateo 6:9-13 lɛ mli. Mɛni esa akɛ efee nɔ titri yɛ wɔ sɔlemɔi amli? Esa akɛ Yehowa Nyɔŋmɔ gbɛ́i kɛ Maŋtsɛyeli lɛ afee nɔ ni he hiaa fe fɛɛ. Wɔ heloonaa hiamɔ nii ni wɔɔbi lɛ sa. Ehe miihia hu ni wɔbi eshaifaa kɛha wɔhe eshai lɛ kɛ kpɔmɔ kɛmiijɛ kaai kɛ mɔ fɔŋ, Satan Abonsam dɛŋ. Yesu sumɔɔɔ ni wɔkɛ sɔlemɔ nɛɛ afee lala loo ni wɔti mli shii abɔ, ni wɔɔti mli wɔkɛɛ ni wɔsusuuu eshishinumɔ he. (Mateo 6:7) Mɛɛ wekukpaa nɛkɛ eeefee kɛ gbekɛ ko kɛ wiemɔi ni ekɛ etsɛ wieɔ be fɛɛ be lɛ nɔŋŋ tsuɔ nii?
14. Yɛ faikpamɔi asɛɛ lɛ, mɛɛ sɔlemɔi esa akɛ wɔkɛha?
14 Kɛfata faikpamɔi kɛ sɔlemɔi ni jɛ tsuiŋ lɛ ahe lɛ, esa akɛ wɔkɛ yijiemɔ kɛ shidaa sɔlemɔ hu aha. (Lala 34:2; 92:2; 1 Tesalonikabii 5:18) Wɔbaanyɛ wɔsɔle wɔha mɛi krokomɛi hu. Sɔlemɔi ni kɔɔ wɔ mumɔŋ nyɛmimɛi hii kɛ yei ni he yeɔ loo awaa amɛyi lɛ ahe lɛ tsɔɔ akɛ wɔsusuɔ amɛhe, ni eŋɔɔ Yehowa naa akɛ eeenu wiemɔi ni tamɔ nɛkɛ ni tsɔɔ mɛi ahe susumɔ lɛ kɛaajɛ wɔnaa. (Luka 22:32; Yohane 17:20; 1 Tesalonikabii 5:25) Yɛ anɔkwale mli lɛ, bɔfo Paulo ŋma akɛ: “Nyɛkahaoa yɛ nɔ ko nɔ ko he, shi moŋ nɔ fɛɛ nɔ mli lɛ, nyɛkɛ sɔlemɔ kɛ faikpamɔ kɛ shidaa atsia nyɛtutɔmɔi lɛ ata yɛ Nyɔŋmɔ hiɛ; ni Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Kristo Yesu mli!”—Filipibii 4:6, 7.
KÃ SƆLEMƆ HE DAA
15. Mɛni esa akɛ wɔkai kɛ etamɔ nɔ ni abooo wɔsɔlemɔi atoi?
15 Eyɛ mli akɛ ooná Nyɔŋmɔ he nilee moŋ, shi ekolɛ obaanu he yɛ bei komɛi amli akɛ ahaaa osɔlemɔi lɛ ahetoo. Enɛ baanyɛ aba lɛ nakai ejaakɛ ekolɛ ejeee be ni Nyɔŋmɔ kɛaaha sɔlemɔ pɔtɛɛ ko hetoo. (Jajelɔ 3:1-9) Yehowa baanyɛ aŋmɛ gbɛ koni shihilɛ ko aya nɔ kɛyashi be ko, shi ehaa sɔlemɔi ahetoo ni ele be ni hi fe fɛɛ ni ekɛaafee nakai.—2 Korintobii 12:7-9.
16. Mɛni hewɔ esa akɛ wɔkã sɔlemɔ he, ni enɛ feemɔ baanyɛ asa wekukpaa ni kã wɔkɛ Nyɔŋmɔ teŋ lɛ he yɛ mɛɛ gbɛ nɔ?
16 Sɔlemɔ ni wɔkãa he lɛ jieɔ bɔ ni wɔtsui ji yɛ nii ni wɔkɛɔ Nyɔŋmɔ lɛ he lɛ kpo. (Luka 18:1-8) Akɛ nɔkwɛmɔ nɔ lɛ, wɔbaanyɛ wɔbi Yehowa ni eye ebua wɔ ni wɔye gbɔjɔmɔ ko nɔ kunim. Kɛ wɔkã sɔlemɔ he ni wɔfee nii yɛ wɔ faikpamɔi lɛ kɛ gbeekpamɔ naa lɛ, wɔtsɔɔ wɔ anɔkwayeli. Esa akɛ wɔ faikpamɔi lɛ afee nɔ ko pɔtɛɛ ni ji anɔkwale hu. Ehe miihia waa ni wɔsɔle waa yɛ be mli ni wɔkɛ kaa kpeɔ lɛ. (Mateo 6:13) Yɛ be mli ni wɔyaa nɔ wɔsɔleɔ ni wɔbɔɔ mɔdɛŋ wɔyeɔ wɔ eshafeemɔ kanyamɔi lɛ anɔ lɛ, wɔbaana bɔ ni Yehowa yeɔ ebuaa wɔ ehaa. Enɛ baatswa wɔ hemɔkɛyeli ama shi ni ebaawaje wekukpaa ni kã wɔkɛ lɛ teŋ lɛ.—1 Korintobii 10:13; Filipibii 4:13.
17. Sɔlemɔ su ni wɔsɔmɔɔ Nyɔŋmɔ yɛ mli lɛ he baaba sɛɛnamɔ aha wɔ yɛ mɛɛ gbɛ nɔ?
17 Kɛ wɔtee nɔ wɔna sɔlemɔ su yɛ sɔɔmɔ krɔŋkrɔŋ ni wɔkɛhaa Yehowa Nyɔŋmɔ lɛ mli lɛ, wɔbaayoo akɛ jeee wɔ diɛŋtsɛ wɔ hewalɛ mli wɔjɛɔ wɔsɔmɔɔ lɛ lɛ. Yehowa ji mɔ ni haa afeɔ nii. (1 Korintobii 4:7) Enɛ ni wɔɔkpɛlɛ nɔ lɛ baaye abua wɔ ni wɔba wɔhe shi ni ebaaha wekukpaa ni kã wɔkɛ lɛ teŋ lɛ mli awa. (1 Petro 5:5, 6) Hɛɛ, wɔyɛ yiŋtoi ni ja ni wɔɔdamɔ nɔ wɔkã sɔlemɔ he. Wɔ anɔkwa sɔlemɔi kɛ nilee ni jara wa waa ni kɔɔ bɔ ni wɔɔfee wɔbɛŋkɛ wɔ ŋwɛi Tsɛ ni yɔɔ suɔmɔ lɛ he lɛ baaha wɔ shihilɛ afee nɔ ni miishɛɛ yɔɔ mli diɛŋtsɛ.
SHÃRAMƆ NI AKƐ YEHOWA YEƆ LƐ JEEE AFA KOME SANE
18. Te wɔɔfee tɛŋŋ wɔbo Nyɔŋmɔ toi?
18 Kɛ wɔmiisumɔ ni Nyɔŋmɔ abo wɔ sɔlemɔi atoi lɛ, esa akɛ wɔbo nɔ ni ekɛɔ lɛ toi. (Zakaria 7:13) Ekɛ eshɛɛ saji tsɔɔɔ egbalɔi ni Nyɔŋmɔ mumɔ tsirɛ amɛ lɛ nɔ dɔŋŋ, ni yɛ anɔkwale mli lɛ efeee nakai kɛtsɔɔɔ mumɔi atsɛmɔ nifeemɔi anɔ. (5 Mose 18:10-12) Shi wɔbaanyɛ wɔbo Nyɔŋmɔ toi kɛtsɔ e-Wiemɔ, ni ji Biblia lɛ kasemɔ nɔ. (Romabii 15:4; 2 Timoteo 3:16, 17) Taakɛ bɔ ni ehe baahia ni niyenii kpakpa ni hi kɛha wɔ aba wɔ tsine lɛ, awoɔ wɔ hewalɛ ni ‘wɔshwe wiemɔ lɛ mli fufɔ krɔŋŋ lɛ.’ Ha mumɔŋ niyenii aba otsine kɛtsɔ Nyɔŋmɔ Wiemɔ lɛ kanemɔ daa gbi lɛ nɔ.—1 Petro 2:2, 3; Bɔfoi lɛ Asaji 17:11.
19. Mɛɛ sɛɛnamɔ yɔɔ nɔ ni okaneɔ yɛ Biblia lɛ mli lɛ ni ojwɛŋɔ he lɛ he?
19 Jwɛŋmɔ nɔ ni okaneɔ yɛ Biblia lɛ mli lɛ he. (Lala 1:1-3; 77:12, 13) No tsɔɔ akɛ esa akɛ wɔsusu sane lɛ he. Obaanyɛ okɛ enɛ ato niyenii agbɛlɛmɔ yɛ musuŋ he. Obaanyɛ ogbɛlɛ mumɔŋ niyenii lɛ kɛtsɔ nɔ ni okaneɔ lɛ ni okɛaato nibii ni ole momo he lɛ nɔ. Susumɔ bɔ ni sane lɛ saa oshihilɛ he ehaa, loo susumɔ nɔ ni ejieɔ lɛ kpo yɛ Yehowa sui kɛ nifeemɔi ahe lɛ he. Nɛkɛ gbɛ nɔ obaatsɔ oteemɔŋ nikasemɔ nɔ oye mumɔŋ niyenii ni Yehowa kɛhaa lɛ. Enɛ baatsi bo kɛbɛŋkɛ Nyɔŋmɔ he ni ebaaye ebua bo ni onyɛ otsu daa gbi naagbai ahe nii.
20. Kristofoi akpeei ni wɔyaa lɛ yeɔ ebuaa wɔ ni wɔbɛŋkɛɔ Nyɔŋmɔ yɛ mɛɛ gbɛ nɔ?
20 Obaanyɛ otsi obɛŋkɛ Nyɔŋmɔ he kpaakpa hu kɛtsɔ e-Wiemɔ ni asusuɔ he yɛ Kristofoi akpeei ashishi lɛ toiboo nɔ, taakɛ Israelbii lɛ bo toi waa beni amɛbua amɛhe naa ni amɛbo Nyɔŋmɔ Mla ni akaneɔ yɛ faŋŋ lɛ toi lɛ. Nakai be lɛ mli tsɔɔlɔi lɛ tsɔɔ Mla ni amɛkaneɔ lɛ shishi, ni amɛye amɛbua amɛ toibolɔi lɛ koni amɛnu shishi ni no atsirɛ amɛ ni amɛtsu nɔ ni amɛnuɔ lɛ he nii. Enɛ kɛ miishɛɛ babaoo ba. (Nehemia 8:8, 12) No hewɔ lɛ ha efee osubaŋ akɛ oooya Yehowa Odasefoi akpeei ashishi. (Hebribii 10:24, 25) Enɛ baaye abua bo ni onu Nyɔŋmɔ nilee lɛ shishi koni okɛtsu nii yɛ oshihilɛ mli ni ekɛ miishɛɛ baaba abaha bo. Jeŋ muu fɛɛ Kristofoi anyɛmifeemɔ lɛ fã ni oji lɛ baaye abua bo ni ofee mɔ ni hiɔ shi kɛbɛŋkɛɔ Yehowa he. Ni taakɛ wɔbaana lɛ, obaana anɔkwa shweshweeshwe shihilɛ yɛ Nyɔŋmɔ webii ateŋ.
KAA ONILEE OKWƐ
Mɛni hewɔ esa akɛ otsi obɛŋkɛ Yehowa?
Mɛni ji taomɔ nii komɛi ni haa anyɛɔ atsiɔ abɛŋkɛɔ Nyɔŋmɔ?
Mɛni obaanyɛ okɛfata osɔlemɔi ahe?
Mɛni hewɔ esa akɛ okã sɔlemɔ he daa?
Mɛɛ gbɛ nɔ oootsɔ obo Yehowa toi ŋmɛnɛ?
[Baafa muu mfoniri ni yɔɔ baafa 157]