“O-Maŋtsɛyeli Lɛ Aba” SƆLEMƆ KO NI MƐI AKPEKPEI ABƆ SƆLEƆ
Ani osɔle ni Nyɔŋmɔ Maŋtsɛyeli lɛ aba pɛŋ? Yɛ afii ohai abɔ ni eho lɛ amli fɛɛ lɛ, mɛi akpekpei abɔ kɛ wiemɔi ni ji, “O-Maŋtsɛyeli lɛ aba” lɛ etsu nii shii abɔ yɛ sɔlemɔ mli. Mɛni hewɔ amɛkɛɔ nakai kɛ́ amɛmiisɔle? Ejaakɛ Yesu kɛɛ ekaselɔi lɛ ni amɛsɔle ni Nyɔŋmɔ Maŋtsɛyeli lɛ aba.
Shishijee lɛ, Yesu kaselɔi lɛ nuuu nɔ fɛɛ nɔ ni ewie yɛ Maŋtsɛyeli lɛ he lɛ shishi. Be ko lɛ, amɛbi lɛ akɛ: “Nuŋtsɔ, ani nɛkɛ be nɛɛ mli obaasaa oto maŋtsɛyeli lɛ oma shi ohã Israel lɛ?” Yesu hãaa amɛ hetoo tɛ̃ɛ, ni ekolɛ no hã amɛnaa kpɛ amɛhe. (Bɔfoi 1:6, 7) Ani no tsɔɔ akɛ wɔnyɛŋ wɔle nɔ ni Nyɔŋmɔ Maŋtsɛyeli lɛ ji, kɛ be ni ebaaba? Dabi kwraa!
Buu-Mɔɔ nɛɛ baawa bo ni oná sanebimɔi ni nyiɛ sɛɛ nɛɛ ahetoo:
Mɛni hewɔ Nyɔŋmɔ Maŋtsɛyeli lɛ he hiaa wɔ lɛ?
Namɔ ji Nyɔŋmɔ Maŋtsɛyeli lɛ nɔ Maŋtsɛ?
Mɛɛ be Nyɔŋmɔ Maŋtsɛyeli lɛ baaye shikpɔŋ lɛ nɔ?
Mɛni Nyɔŋmɔ Maŋtsɛyeli lɛ baafee?
Mɛni hewɔ esa akɛ wɔhala akɛ wɔbaafi Nyɔŋmɔ Maŋtsɛyeli lɛ sɛɛ bianɛ lɛ?
Mɛni ji Nyɔŋmɔ Maŋtsɛyeli lɛ?