Nyɛyaa Nɔ Nyɛtaoa Maŋtsɛyeli Lɛ Kɛ Nyɔŋmɔ Jalɛ Lɛ
“Shi nyɛtaoa Nyɔŋmɔ maŋtsɛyeli lɛ kɛ ejalɛ lɛ tsutsu, ni akɛ nii nɛɛ fɛɛ aaafata he aha nyɛ.—MATEO 6:33.
1, 2. Mɛni woloŋmalɔi lɛ kɛ Farisifoi lɛ ha nifeemɔi ni hi diɛŋtsɛ lɛ batsɔmɔ, ni mɛɛ kɔkɔbɔɔ Yesu ha esɛɛnyiɛlɔi lɛ?
WOLOŊMALƆI lɛ kɛ Farisifoi lɛ taoɔ jalɛ yɛ amɛ diɛŋtsɛ amɛgbɛ nɔ, ni enɛ jeee Nyɔŋmɔ gbɛ. Jeee enɛ pɛ kɛkɛ, shi kɛji amɛtsu nitsumɔi ni ja po lɛ, amɛhaa etsɔɔ osatofeemɔ nitsumɔi bɔni afee ni gbɔmɛi adesai ana. Jeee Nyɔŋmɔ amɛsɔmɔɔ, shi moŋ amɛ diɛŋtsɛ amɛyakayaka nii lɛ. Yesu bɔ ekaselɔi lɛ kɔkɔ eshi nɛkɛ nii ni afeɔ atsɔɔ nɛɛ akɛ: “Nyɛkwɛa ni ahia ni nyɛkafea nyɛjalɛ lɛ yɛ gbɔmɛi ahiɛ, koni amɛna nyɛ; no lɛ, nyɛbɛ nyɛ-Tsɛ ni yɔɔ ŋwɛi lɛ ŋɔɔ nyɔmɔwoo ko.”—Mateo 6:1.
2 Yehowa hiɛ sɔɔ mɛi ni feɔ ohiafoi lɛ ejurɔ lɛ—shi jeee mɛi ni feɔ taakɛ Farisifoi lɛ feɔ lɛ. Yesu bɔ ekaselɔi lɛ kɔkɔ eshi amɛ nifeemɔ gbɛ nɛɛ ni amɛaakɔ lɛ: “No hewɔ lɛ kɛ oofee ejurɔ lɛ, kaakpa tɛtrɛmaŋtɛrɛ yɛ ohiɛ, taakɛ bɔ ni osatofoi lɛ feɔ yɛ kpee hei lɛ kɛ blohui lɛ amli, koni gbɔmɛi ajie amɛyi lɛ. Lɛlɛŋ, miikɛɛ nyɛ akɛ: Amɛnine eshɛ amɛnyɔmɔwoo nɔ momo.”—Mateo 6:2.
3. (a) Mɛɛ gbɛ nɔ woloŋmalɔi lɛ kɛ Farisifoi lɛ anine shɛ amɛnyɔmɔwoo nɔ kwraa yɛ yɛ nikeenii ni amɛkɛhaa lɛ hewɔ? (b) Mɛɛ gbɛ nɔ esoro shidaamɔ ni Yesu kɔ yɛ nikee he lɛ kwraa yɛ?
3 Hela wiemɔ ni akɛtsu nii aha “amɛnine eshɛ . . . nɔ momo” (a·peʹkho) lɛ ji wiemɔ ko ni afɔɔ kɛ nitsumɔ yɛ woji ni akɛtsɔɔ nibii ni nine eshɛ nɔ lɛ amli. Bɔ ni akɛtsu nii yɛ Gɔŋ nɔ Shiɛmɔ lɛ mli lɛ tsɔɔ akɛ “amɛnine eshɛ amɛnyɔmɔwoo nɔ,” ni tsɔɔ akɛ, “amɛkɛ amɛnine ewo wolo shishi kɛmiitsɔɔ akɛ amɛnyɔmɔwoo eshɛ amɛdɛŋ: hegbɛ ni amɛyɔɔ akɛ amɛnine ashɛ nyɔmɔwoo nɔ lɛ eba mli, tamɔ nɔ ni amɛŋma wolo kɛha akɛ amɛnine eshɛ nɔ pɛpɛɛpɛ.” (An Expository Dictionary of New Testament Words, ni W. E. Vine fee lɛ) Amɛbakãa nikeenii ni amɛkɛbaake ohiafoi lɛ ahe kita yɛ gbɛjegbɛi anɔ yɛ faŋŋ mli. Atsiɔ mɛi ni kɛ nibii lɛ keɔ lɛ agbɛi ata yɛ kpee hei lɛ amli. Awoɔ mɛi ni kɛ nibii wuji bakeɔ lɛ ahiɛ nyam yɛ gbɛi pɔtɛɛ anɔ kɛtsɔ shitaramɔ hei ni ahaa amɛ kɛbɛŋkɛɔ rabifoi lɛ yɛ be mli ni amɛjaa lɛ nɔ. Amɛkɛ nibii lɛ keɔ bɔni afee ni gbɔmɛi ana amɛ; gbɔmɛi naa amɛ ni amɛwoɔ amɛhiɛ nyam; ni no hewɔ lɛ amɛbaanyɛ amɛkɛdi nyɔmɔwoo ni amɛnine shɛɔ nɔ lɛ yɛ nikeenii ni amɛkɛhaa lɛ hewɔ lɛ akɛ “Awo Amɛ Nyɔmɔ lɛ Fɛɛ Kɛmɔ Shi.” Kwɛ bɔ ni shidaamɔ ni Yesu kɔ yɛ enɛ he lɛ yɔɔ sɔrɔto ha: Okɛ enikeenii lɛ aha yɛ “teemɔ mli, ni o-Tsɛ lɛ ni naa teemɔ mli nii lɛ diɛŋtsɛ aaawoo nyɔmɔ yɛ faŋŋ.”—Mateo 6:3, 4; Abɛi 19:17.
Sɔlemɔi ni Saa Nyɔŋmɔ Hiɛ
4. Mɛni hewɔ ni Farisifoi lɛ asɔlemɔi lɛ ha Yesu tsɛ nɛkɛ hii nɛɛ akɛ osatofoi lɛ?
4 Yehowa hiɛ sɔɔ sɔlemɔi ni akɛhaa lɛ lɛ —shi jeee nɔ ni asɔleɔ tamɔ bɔ ni Farisifoi lɛ sɔleɔ lɛ. Yesu kɛɛ esɛɛnyiɛlɔi lɛ akɛ: “Ni kɛ oosɔle lɛ, kaatamɔ osatofoi lɛ; shi amɛsumɔɔ akɛ amɛdamɔ kpee hei lɛ kɛ gbɛjegbɛi akoji lɛ anaa amɛsɔle, koni mɛi ana amɛ. Lɛlɛŋ, miikɛɛ nyɛ akɛ: amɛnine eshɛ amɛnyɔmɔwoo nɔ momo.” (Mateo 6:5) Farisifoi lɛ yɛ sɔlemɔi babaoo ni amɛbaakɛɛ daa gbi, yɛ bei pɔtɛɛ komɛi amli, ni he ni amɛyɔɔ lɛ kɔɔɔ he eko. Kulɛ yɛ mla naa lɛ, esa akɛ amɛkɛha yɛ teemɔŋ. Shi kɛlɛ, amɛtsɔ ŋaatsɔɔ nɔ ni amɛyaje “gbɛjegbɛi lɛ akoji lɛ anaa,” koni kɛ eshɛ ŋmɛlɛtswaa ni asɔleɔ lɛ, mɛi ni hoɔ yaa kɛjɛ koji sɔrɔtoi ejwɛ lɛ fɛɛ ana amɛ.
5. (a) Mɛɛ nifeemɔi krokomɛi haaa ni Nyɔŋmɔ abo Farisifoi lɛ asɔlemɔi atoi lɛ? (b) Mɛni nibii Yesu kɛye gbɛhe yɛ esɔlemɔ nɔkwɛmɔ nɔ lɛ amli, ni ani gbɔmɛi kɛ enɛ kpaa gbee ŋmɛnɛ?
5 “Lakpatoo hewɔ ni amɛsɔleɔ sɔlemɔi kakadaji lɛ,” bɔni afee hu ni amɛkɛjie amɛ apasa krɔŋkrɔŋ feemɔ lɛ kpo amɛtsɔɔ. (Luka 20:47) Blema saji ni akɛ naabu jaje lɛ ateŋ ekome kɛɔ akɛ: “Blemabii ni jɔɔ amɛhe nɔ jogbaŋŋ amɛha jamɔ lɛ mɛɔ aaafee ŋmɛlɛtswaa kome dani amɛkɛɔ Tefillah [sɔlemɔ] lɛ.’ (Mishnah) Yɛ nakai beaŋ lɛ, amɛyɛ nɔmimaa akɛ mɔ fɛɛ mɔ baana bɔ ni amɛtuu amɛhe amɛha jamɔ lɛ koni efee amɛ naakpɛɛ! Sɔlemɔi ni tamɔ nɛkɛ eyaaa ŋwɛi kɛtekeee amɛ diɛŋtsɛ amɛyitsei po. Yesu kɛɛ asɔle yɛ teemɔ mli, ni akati saji kometoo lɛ mli bɔ ni he ehiaaa, ni ekɛ ehe nɔkwɛmɔ nɔ ko ni yɔɔ mlɛo ha. (Mateo 6:6-8; Yohane 14:6, 14; 1 Petro 3:12) Sɔlemɔ he nɔkwɛmɔ nɔ ni Yesu kɛha lɛ kɛ klɛŋklɛŋ nibii yeɔ klɛŋklɛŋ gbɛhe: “Wɔ-Tsɛ ni yɔɔ ŋwɛi, ha ogbɛi lɛ he atse. Ha omaŋtsɛyeli lɛ aba. Ha afee nɔ ni osumɔɔ.’ (Mateo 6:9-18, NW) Mɛi fioo ko pɛ le Nyɔŋmɔ gbɛi, aahu ni amɛaaha ehe atse. Enɛ hewɔ lɛ amɛbuɔ lɛ tamɔ nyɔŋmɔ ko ni bɛ gbɛi. Ni Nyɔŋmɔ Maŋtsɛyeli lɛ aba? Mɛi pii susuɔ akɛ eyɛ biɛ momo, yɛ amɛmli. Ekolɛ amɛbaasɔle ni afee esuɔmɔnaa nii, shi amɛteŋ mɛi pii feɔ amɛ diɛŋtsɛ amɛsuɔmɔnaa nii.—Abɛi 14:12.
6. Mɛni hewɔ ni Yesu wie eshi Yudafoi lɛ aŋmaahilɛ lɛ akɛ eji nɔ ko folo lɛ!
6 Yehowa kpɛlɛɔ ŋmaahilɛ nɔ—shi jeee yɛ bɔ ni Farisifoi lɛ feɔ lɛ naa. Taakɛ Yesu fee yɛ nikeenii lɛ kɛ woloŋmalɔi lɛ kɛ Farisifoi lɛ asɔlemɔi lɛ ahe lɛ, efee nakai nɔŋŋ kɛtsɔ wiemɔ ni ewie eshi gbɛ ni amɛtsɔɔ nɔ amɛhiɔ ŋmaa lɛ akɛ nɔ ni shishinumɔ bɛ he lɛ nɔ: “Shi kɛ nyɛmiihi ŋmaa lɛ, nyɛkafea nyɛhiɛ mɔbɔmɔbɔ tamɔ osatofoi lɛ; shi amɛfeɔ amɛhiɛ nyanyaanya, koni mɛi ana akɛ amɛmiihi ŋmaa. Lɛlɛŋ, miikɛɛ nyɛ akɛ: Amɛnine eshɛ amɛnyɔmɔwoo nɔ momo.” (Mateo 6:16) Amɛblema saji ni akɛ naabu ejaje lɛ tsɔɔ akɛ yɛ be mli ni Farisifoi lɛ hiɔ ŋmaa lɛ, esaaa ni amɛjuɔ amɛhe loo amɛkɛ mu kpaa amɛhe, shi moŋ ni amɛkɛ lamulu awo amɛyiteŋ. Kɛ amɛhii ŋmaa lɛ, Yudafoi lɛ juɔ amɛhe daa gbi ni amɛkɛ mu kpaa amɛgbɔmɔtsei ahe.
7. (a) Te esa akɛ Yesu sɛɛnyiɛlɔi lɛ afee amɛnii amɛha tɛŋŋ yɛ be mli ni amɛhiɔ ŋmaa lɛ? (b) Mɛni Yehowa tao ni afee yɛ ŋmaahilɛ he yɛ Yesaia gbii lɛ amli?
7 Yesu kɛɛ esɛɛnyiɛlɔi lɛ yɛ ŋmaahilɛ he akɛ: “Shi bo lɛ, kɛ oohi ŋmaa lɛ, kpa oyi mli mu ni ofɔ ohiɛ; koni mɛi ekana akɛ oohi ŋmaa, shi o-Tsɛ ni yɔɔ teemɔ mli lɛ moŋ.” (Mateo 6:17, 18) Yɛ Yesaia gbii lɛ amli lɛ, Yudafoi ni kuɔ amɛsɛɛ kɛyaa amɛtsutsu shihilɛi fɔji lɛ amli lɛ naa ŋmaahilɛ, amɛsusumai ni amɛwaa amɛ yi, kɛ amɛyi shi ni amɛmamɔɔ tamɔ ŋtoo lɛ ahe miishɛɛ, ni amɛŋmɛɔ kpekpei kɛ lamulu ni amɛtaraa nɔ. Shi Yehowa miitao ni amɛŋmɛɛ mɛi ni amɛwaa amɛyi lɛ ahe, ni amɛha mɛi ni hɔmɔ yeɔ amɛ lɛ niyenii, ni amɛha mɛi ni bɛ shihilɛ hei lɛ shia ni amɛhi mli, ni amɛha mɛi ni nyiɛ yayai lɛ atadei ni amɛwo.—Yesaia 58:3-7.
Too Jwetrii yɛ Ŋwɛi
8. Mɛni ha woloŋmalɔi lɛ kɛ Farisifoi lɛ jie amɛhiɛ kɛjɛ bɔ ni amɛaafee amɛna Nyɔŋmɔ nɔkplɛmɔ nɔ lɛ, ni mɛɛ shishitoo mla ko, ni Paulo wie he yɛ sɛɛ mli amɛku amɛhiɛ amɛfɔ nɔ?
8 Yɛ be mli ni amɛdiɔ jalɛ sɛɛ lɛ, woloŋmalɔi lɛ kɛ Farisifoi lɛ jie amɛhiɛ kɛjɛ bɔ ni amɛaafee ni amɛna Nyɔŋmɔ nɔkpɛlɛmɔ lɛ nɔ kwraa ni amɛha amɛjwɛŋmɔ hi bɔ ni amɛaafee ni amɛsa gbɔmɛi ahiɛ lɛ moŋ nɔ. Amɛkɛ amɛhe ha gbɔmɛi ablema saji lɛ aahu akɛ amɛtsi Nyɔŋmɔ Wiemɔ ni aŋma afɔ shi lɛ kɛyafɔ afa. Amɛkɛ amɛtsuii yashwie shikpɔŋ nɔ gbɛhei anamɔ nɔ moŋ fe ŋwɛi jwetri nɔ. Amɛku amɛhiɛ amɛfɔ shishijee anɔkwale ko ni Farisifonyo ko ni ebatsɔ Kristofonyo lɛ ŋma efɔ shi yɛ afii komɛi asɛɛ lɛ nɔ: “Ni nɔ fɛɛ nɔ ni nyɛfeɔ lɛ, nyɛjiea nyɛmusuŋ nyɛtsua, taakɛ Nuŋtsɔ lɛ [Yehowa] nyɛtsuɔ nyɛhaa ni jeee gbɔmɛi, ni nyɛle akɛ Nuŋtsɔ lɛ [Yehowa] dɛŋ nyɛnine baashɛ gboshinii lɛ anɔ yɛ akɛ nyɛnyɔmɔwoo.”—Kolosebii 3:23, 24.
9. Mɛɛ osharai baanyɛ aba shikpɔŋ nɔ jwetrii ahe, shi mɛni baaha anɔkwa jwetrii ahi shi shweshweeshwe?
9 Yehowa nyaa ohe ni otuuɔ ohaa lɛ lɛ he, shi jeee oshika ni okɛyato shikatoo he. Ele akɛ otsui yɛ he ni ojwetri yɔɔ lɛ. Ani ŋkanale kɛ omlɛgɛ baanyɛ afite ojwetri lɛ? Ani julɔi baanyɛ agbu gbɛ kɛtsɔ su gbogboi lɛ amli ni amɛyaju kɛya? Aloo yɛ wɔ ŋmɛnɛŋmɛnɛ beaŋ ni shika helɛtemɔ he saji damɔɔɔ shi shiŋŋ nɛɛ, ani nibii ajara ni yaa ŋwɛi baaha nɔ ni ebaanyɛ ehe lɛ aba shi aloo ani nibii ni abua naa yɛ majimaji amli lɛ ajara ni baa shi lɛ baaha efite? Ani awuiyeli ni yaa hiɛ babaoo lɛ baaha abaju ojwetri lɛ? Ejeee nakai kɛji akɛto ŋwɛi. Ejeee nakai kɛji ohiŋmɛi—ni ji la ni haa egbɔmɔtso muu lɛ fɛɛ mli tseɔ lɛ—nɔ tse, ni ekwɛɔ Nyɔŋmɔ Maŋtsɛyeli lɛ kɛ ejalɛ lɛ pɛ lɛ. Ninamɔ yɛ gbɛ ko ni etsɔɔ nɔ elaajeɔ. “Kaagbo deŋme okɛtao nii, ŋmɛɛmɔ bo diɛŋtsɛ onilee nɛɛ he. Aso ooojie ohiɛ oka nɔ ni bɛ lɛ? Ejaakɛ nii kwɛ̃ɔ fiji tamɔ okropɔŋ filikiɔ kɛyaa ŋwɛi.” (Abɛi 23:4, 5) No hewɔ lɛ mɛni hewɔ oshiɔ ohe kpe yɛ ninamɔ hewɔ? “Nii pii ni niiatsɛ yɔɔ lɛ haaa ewɔ.” (Jajelɔ 5:12) Kaimɔ Yesu kɔkɔbɔɔ lɛ: “Nyɛnyɛŋ Nyɔŋmɔ kɛ mamona [niifalɛ] nyɛsɔmɔ.”—Mateo 6:19-24.
Hemɔkɛyeli ni Shwieɔ Yeyeeyefeemɔ Kɛyaa Sɛɛ
10. Mɛni hewɔ ni ehe hiaa waa akɛ oooha ohemɔkɛyeli ahi Nyɔŋmɔ mli fe ni eehi heloonaa nii amli lɛ, ni mɛɛ ŋaawoo Yesu kɛha?
10 Yehowa miitao ni ona hemɔkɛyeli yɛ emli, jeee yɛ heloonaa nibii ni oyɔɔ lɛ mli. “Shi kɛ hemɔkɛyeli bɛ lɛ, anyɛŋ Nyɔŋmɔ hiɛ asa; ejaakɛ mɔ ni baa Nyɔŋmɔ ŋɔɔ lɛ, ja ehe eye akɛ eyɛ, ni eji mɛi ni taoɔ esɛɛ gbɛ lɛ anyɔmɔwolɔ hu.’ (Hebribii 11:6) Yesu kɛɛ: “Ejaakɛ jeee gbɔmɔ nii ni ena kɛteke nɔ lɛ mli ewala yɔɔ.” (Luka 12:15) Shika akpekpei abɔ ni akɛyato shikatoo he lɛ nyɛŋ aha flufla ni hela yeɔ lɛ lɛ atsu nii jogbaŋŋ aloo ni eeeha tsui ni etɔ lɛ lɛ aya nɔ ashi. No hewɔ lɛ Yesu tee nɔ yɛ e-Gɔŋ nɔ Shiɛmɔ lɛ mli akɛ: “No hewɔ lɛ miikɛɛ nyɛ akɛ: ‘Nyɛkafea yeyeeye yɛ nyɛwala hewɔ, nɔ ni nyɛaaye kɛ nɔ ni nyɛaanu, aloo nyɛ gbɔmɔtso lɛ hewɔ, nɔ ni nyɛaawo. Ani wala efeee ŋmaa, ni gbɔmɔtso efeee atade?”—Mateo 6:25.
11. Nɛgbɛ ji he ni Yesu na abɛbuai lɛ babaoo kɛjɛ, ni mɛɛ gbɛ nɔ ejeɔ kpo faŋŋ yɛ Gɔŋ nɔ Shiɛmɔ lɛ mli yɛ?
11 Yesu ji mɔ ko ni he esa yɛ wiemɔi amli jogbaŋŋ. Esusuɔ wiemɔi ahe yɛ be mli ni ekwɛɔ hei sɔrɔtoi fɛɛ lɛ. Ena yoo ko ni kɛ kane ni esu miima kanetso nɔ kɛkɛ ni etsɔ mli ekɛ abɛbua ko ha. Ena tookwɛlɔ ko hu ni miigbala gwantɛŋi kɛ abotiai amli; ebatsɔ abɛbua. Ena gbekɛbii ni amɛmiishwɛ yɛ jara nɔ; ebatsɔ abɛbua. Ni nakai nɔŋŋ ebalɛ yɛ Gɔŋ nɔ Shiɛmɔ lɛ mli. Yɛ be mli ni ewieɔ heloonaa nibii ahe yeyeeye-feemɔ he lɛ, ena abɛbuai yɛ loofɔji ni filikiɔ kɛyaa kɛbaa lɛ kɛ fɔfɔii ni eha gɔji lɛ anɔ fɛfɛo lɛ amli. Ani loofɔji lɛ duɔ nii ni amɛkpaa? Dabi. Ani fɔfɔii lɛ tsɛɔ kpaa ni amɛkɛloɔ mamai? Dabi. Nyɔŋmɔ ji mɔ ni fee amɛ; lɛ ebuɔ amɛhe. Ni kɛlɛ, nyɛjara wa aahu fe loofɔji kɛ fɔfɔii lɛ. (Mateo 6:26, 28-30) Ekɛ e-Bi lɛ ha yɛ ohewɔ, jeee yɛ amɛhewɔ.—Yohane 3:16.
12. (a) Ani loofɔji lɛ kɛ fɔfɔii lɛ ahe abɛbua lɛ tsɔɔ akɛ ehe ehiaaa ni Yesu kaselɔi lɛ atsu nii? (b) Mɛɛ oti ni kɔɔ nitsumɔ kɛ hemɔkɛyeli he ji nɔ ni Yesu maa nɔ mi lɛ?
12 Yesu ekɛɛɛ esɛɛnyiɛlɔi lɛ yɛ biɛ akɛ ehe ehiaaa ni amɛtsu nii ni amɛkɛna niyenii kɛ hehaa nii. (Kwɛmɔ Jajelɔi 2:24; Efesobii 4:28; 2 Tesalonikabii 3:10-12.) Yɛ nakai agbiɛnaa gbi lɛ leebi lɛ, no mli lɛ loofɔji lɛ ahiɛ edɔ ni amɛmiikpɛte shi kɛmiitao niyenii, amɛmiishwɛ, amɛmiimamɔ amɛtsui, amɛbu amɛwɔji anɔ, ni amɛmiiha amɛbii lɛ aniyenii. Amɛmiitsu nii, shi amɛhaooo amɛhe. Fɔfɔii lɛ hu ahiɛ edɔ ni amɛkɛ amɛfaji lɛ miigbu shikpɔŋ sũ lɛ mli kɛmiitao nu kɛ sũ mli niyenii ni amɛkɛ amɛbaai lɛ hu tsɔɔ hulu la lɛ. Esa akɛ amɛdara ni amɛgba afoforo ni amɛshwã amɛwui dani amɛgboi. Amɛmiitsu nii, shi amɛhaooo amɛhe. Nyɔŋmɔ ji mɔ ni lɛɔ loofɔji lɛ kɛ fɔfɔii lɛ. ‘Ani efeŋ nɔ ni fe enɛ ehaŋ nyɛ ni nyɛhemɔkɛyeli faaa nɛɛ?’—Mateo 6:30.
13. (a) Mɛni hewɔ ni eja jogbaŋŋ akɛ Yesu kɛ ninetalɔ kome aaatsu nii yɛ be mli ni ewieɔ mɔ ko wala sɛɛ jɛkɛmɔ nɔtsamɔ he lɛ? (b) Mɛɛ gbɛ nɔ oootsɔ, ni kɛ wɔɔkɛɛ lɛ, okɛ shitooi akpekpei abɔ ni bɛ naa atsa owala sɛɛ kɛlɛ nɔ yɛ?
13 No hewɔ lɛ na hemɔkɛyeli. Kaafee yeyeeye. Yeyeeye-feemɔ tsakeŋ nɔ ko nɔ ko. Yesu bi akɛ: “Shi nyɛteŋ namɔ kɛ yeyeeye-feemɔ aaanyɛ atsa ekɛlɛ naa ninetalɔ kome?” (Mateo 6:27) Shi mɛni hewɔ ni Yesu kɛ shihilɛ mli nii kɛlɛ susumɔ, ninetalɔ kome, to wala be sɛɛ jɛkɛmɔ he lɛ? Ekolɛ, akɛni yɛ bei babaoo mli lɛ, Biblia lɛ kɛ adesai awala sɛɛ jɛkɛmɔ toɔ gbɛfaa he, ni ekɛ wiemɔi tamɔ “eshafeelɔi agbɛ,” “jalɔi atempɔŋ,” ‘gbɛ tɛtrɛɛ ko ni kɛ mɔ yaa hiɛkpatamɔ mli,’ kɛ ‘gbɛ ni etsa ni kɛ mɔ yaa wala mli’ lɛ tsuɔ nii lɛ hewɔ. (Lala 1:1; Abɛi 4:18; Mateo 7:13, 14) Wɔ daa gbi shihilɛ mli hiamɔ nibii ahe yeyeeye-feemɔ nyɛŋ ekɛ kuku bibioo ko po afata mɔ ko wala he, aloo kɛ aaakɛɛ lɛ, “ninetalɔ kome.” Shi gbɛ ko yɛ ni ooonyɛ otsɔ nɔ, ni kɛ wɔɔkɛɛ lɛ, okɛ shitooi akpekpei abɔ ni bɛ naagbee aha owala sɛɛ akɛ. Jeee ni wɔɔfee yeyeeye yɛ “Mɛni wɔɔye?” aloo “Mɛni wɔɔnu?” aloo “Mɛni wɔɔŋɔha wɔhe?” lɛ he, shi moŋ kɛtsɔ hemɔkɛyeli ni wɔɔna lɛ kɛ nɔ ni Yesu ekɛɛ wɔ lɛ feemɔ nɔ: “Shi nyɛtaoa Nyɔŋmɔ maŋtsɛyeli lɛ kɛ ejalɛ lɛ tsutsu, ni akɛ nii nɛɛ fɛɛ aaafata he aha nyɛ.”—Mateo 6:31-33.
Nyɔŋmɔ Maŋtsɛyeli lɛ kɛ E-Jalɛ lɛ ni Wɔnine Aaashɛ Nɔ
14. (a) Mɛni ji Gɔŋ nɔ Shiɛmɔ lɛ mli saneyitso? (b) Mɛɛ gbɛ ni ejaaa nɔ woloŋmalɔi lɛ kɛ Farisifoi lɛ tsɔɔ amɛtaoɔ Maŋtsɛyeli lɛ kɛ ejalɛ lɛ yɛ?
14 Yesu wie ŋwɛi Maŋtsɛyeli lɛ he akɛ eji mɛi ni hiɛ yɔɔ amɛmumɔŋ hiamɔ nii anɔ lɛ anɔ, yɛ eklɛŋklɛŋ wiemɔ ni ekɛje e-Gɔŋ nɔ Shiɛmɔ lɛ shishi lɛ mli. Ewie yɛ wiemɔ ni ji ejwɛ lɛ hu mli akɛ mɛi ni jalɛ he hɔmɔ kɛ kumai yeɔ amɛ lɛ baatɔtɔ. Yɛ biɛ nɛɛ lɛ, Yesu kɛ Maŋtsɛyeli lɛ kɛ Yehowa jalɛ lɛ fɛɛ yeɔ klɛŋklɛŋ gbɛhe. Nomɛi ji saneyitso kɛha Gɔŋ nɔ Shiɛmɔ lɛ. Nomɛi ji adesai fɛɛ ahiamɔ nii lɛ ahetoo. Shi mɛɛ gbɛ nɔ atsɔɔ ni nine shɛɔ Nyɔŋmɔ Maŋtsɛyeli lɛ kɛ Nyɔŋmɔ jalɛ lɛ nɔ yɛ? Te wɔɔfee tɛŋŋ wɔya nɔ wɔtao lɛ? Jeee kɛtsɔ gbɛ ni woloŋmalɔi lɛ kɛ Farisifoi lɛ tsɔɔ nɔ amɛtaoɔ lɛ nɔ. Amɛ lɛ, amɛtaoɔ Maŋtsɛyeli lɛ kɛ ejalɛ lɛ kɛtsɔɔ Mose Mla lɛ, ni amɛkɛɔ akɛ blema saji ni akɛ naabu jaje lɛ fata he lɛ nɔ, ejaakɛ amɛheɔ amɛyeɔ akɛ Nyɔŋmɔ ji mɔ ni kɛ Mla lɛ ni aŋma lɛ kɛ blema saji lɛ fɛɛ ha Mose yɛ Sinai Gɔŋ lɛ nɔ.
15. (a) Taakɛ Yudafoi lɛ tsɔɔ lɛ, mɛɛ be mli amɛ blema saji lɛ je shishi, ni mɛɛ gbɛ nɔ amɛwo nɔ kɛteke Mose ni aŋma afɔ shi lɛ yɛ? (b) Mɛɛ be mli nɛkɛ blema saji nɛɛ je shishi diɛŋtsɛ, ni mɛɛ hewalɛ ena yɛ Mose Mla lɛ nɔ?
15 Amɛ blema sane ni kɔɔ enɛ he lɛ kɛɔ akɛ: “Mose nine shɛ Mla lɛ [shishigbɛ niŋmaa, “‘Mla ni Akɛ Naabu Wie’” lɛ] nɔ yɛ Sinai ni etuu ewo Yoshua dɛŋ, ni Yoshua kɛha onukpai lɛ, ni onukpai lɛ kɛha Gbalɔi lɛ; ni Gbalɔi lɛ tuu amɛwo hii ni yɔɔ Kpee He Kpeteŋkpele lɛ mli lɛ adɛŋ.” Beni be shwieɔ mli lɛ, amɛwo amɛmla ni akɛ naabu jaje lɛ nɔ ni eteke Mla ni aŋma afɔ shi lɛ tete po: “[Kɛji] etɔ̃ Mla [ni aŋma afɔ shi] lɛ mli wiemɔi lɛ anɔ lɛ, esaaa shwamɔ,” shi kɛji “ekɛ nɔ ko fata Woloŋmalɔi lɛ awiemɔi [blema saji ni amɛkɛ amɛnaabu wieɔ] lɛ ahe lɛ, no lɛ esa shwamɔ.” (Mishnah) Amɛ blema saji ni akɛ naabui jajeɔ lɛ ejeee shishi kɛjɛɛɛ Sinai. Yɛ anɔkwale mli lɛ, amɛbɔi naabuamɔ oyayaayai aaafee afi ohai enyɔ dani afɔ Kristo. Amɛkɛ ekomɛi fata he, ni amɛjie ekrokomɛi kɛjɛ mli, ni amɛha Mose Mla ni aŋma afɔ shi lɛ fee efolo.—Okɛto 5 Mose 4:2; 12:32 he.
16. Nyɔŋmɔ jalɛ lɛ baa haa adesai yɛ mɛɛ gbɛ nɔ?
16 Nyɔŋmɔ jalɛ lɛ baa, jeee kɛtsɔ Mla lɛ nɔ shi moŋ yɛ esɛɛ: “No hewɔ lɛ atsɔŋ mla nitsumɔ nɔ abuŋ heloo ko heloo ko bem yɛ ehiɛ; ejaakɛ mla nɔ atsɔɔ aleɔ esha. Shi agbɛnɛ lɛ ashi mla lɛ sɛɛ ajie Nyɔŋmɔ jalɛ lɛ kpo faŋŋ, ni no he odase Mla lɛ kɛ Gbalɔi lɛ yeɔ; no ji Nyɔŋmɔ jalɛ ni atsɔɔ Yesu Kristo nɔ hemɔkɛyeli nɔ akɛhaa mɛi ni heɔ yeɔ lɛ.” (Romabii 3:20-22) No hewɔ lɛ Nyɔŋmɔ jalɛ lɛ baa kɛtsɔɔ Yesu Kristo mli hemɔkɛyeli nɔ—ni “no he odase Mla lɛ kɛ Gbalɔi lɛ yeɔ” jogbaŋŋ. Awo Mesia lɛ he gbalɛi lɛ obɔ yɛ Yesu mli. Lɛ hu ewo Mla lɛ obɔ; ejie kɛjɛ jɛmɛ kɛtsɔ esɛŋmɔtso lɛ ni akala akpɛtɛ he lɛ nɔ.—Luka 24:25-27, 44-46; Kolosebii 2:13, 14; Hebribii 10:1.
17. Taakɛ bɔfo Paulo tsɔɔ lɛ, le ni Yudafoi lɛ aaale Nyɔŋmɔ jalɛ lɛ je amɛdɛŋ yɛ mɛɛ gbɛ nɔ?
17 No hewɔ lɛ, bɔfo Paulo ŋma yɛ jalɛ ni Yudafoi lɛ anine nyɛɛɛ ashɛ nɔ lɛ he akɛ: “Ejaakɛ miiye amɛhe odase akɛ amɛhiɛ dɔɔ yɛ Nyɔŋmɔ he moŋ, shi jeee nilee naa. Ejaakɛ ni amɛleee Nyɔŋmɔ jalɛ lɛ, shi amɛ diɛŋtsɛ amɛjalɛ moŋ amɛtaoɔ amɛŋɔma shi hewɔ lɛ, amɛbaaa amɛhe shi amɛhaaa Nyɔŋmɔ jalɛ lɛ. Ejaakɛ Kristo ji Mla lɛ naagbee, ni lɛ ji jalɛ ha mɔ fɛɛ mɔ ni heɔ yeɔ lɛ.” (Romabii 10:2-4) Paulo ŋma yɛ Yesu Kristo hu he akɛ: “Ejaakɛ mɔ ni leee esha lɛ, wɔ hewɔ lɛ eha etsɔ esha, koni wɔ lɛ wɔtsɔmɔ Nyɔŋmɔ jalɛ yɛ emli.”—2 Korintobii 5:21.
18. Te Yudafoi ni fiɔ blema saji asɛɛ, kɛ Hela jeŋ nilelɔi, kɛ “mɛi ni atsɛ amɛ lɛ” buɔ “Kristo ni asɛŋ lɛ” lɛ amɛhaa tɛŋŋ?
18 Yudafoi lɛ buɔ Mesia ni gboɔ lɛ akɛ mɔ ni egbɔjɔ ni ejeee nɔ ko hu. Hela jeŋ nilelɔi lɛ yeɔ Mesia ni tamɔ nɛkɛ he fɛo akɛ kwashiai asane. Shi kɛlɛ etamɔ bɔ ni Paulo jaje lɛ pɛpɛɛpɛ: “Ejaakɛ Yudafoi lɛ, okadii ashi amɛbiɔ, ni Helabii hu taoɔ nilee, shi wɔ lɛ, Kristo ni asɛŋ lɛ lɛ wɔshiɛɔ, mɔ ni tsɔ pampi eha Yudafoi kɛ kwashiai asane eha jeŋmaji lɛ; shi mɛi ni atsɛ amɛ lɛ fɛɛ lɛ, Yudafoi jio, Helabii jio, Kristo ni ji Nyɔŋmɔ hewalɛ kɛ Nyɔŋmɔ nilee lɛ lɛ wɔshiɛɔ wɔtsɔɔ amɛ. Ejaakɛ Nyɔŋmɔ kwashiai asane lɛ mli yɛ nilee fe gbɔmɛi, ni Nyɔŋmɔ gbɔjɔmɔ nɔ lɛ he wa fe gbɔmɛi.” (1 Korintobii 1:22-25) Kristo Yesu ji Nyɔŋmɔ hewalɛ kɛ nilee lɛ kpojiemɔ, ni lɛ ji Nyɔŋmɔ gbɛ kɛha jalɛ kɛ naanɔ wala kɛha adesai ni feɔ toiboo lɛ. “Ejaakɛ yiwalaheremɔ bɛ mɔ ko mɔ ko mli; ni asaŋ gbɛi kroko hu bɛ ŋwɛi shishi ni aŋɔha gbɔmɛi ni sa akɛ atsɔɔ nɔ ahereɔ wɔyiwala.’—Bɔfoi lɛ Asaji 4:12.
19. Mɛni nikasemɔ ni nyiɛ sɛɛ lɛ baatsɔɔ?
19 Nikasemɔ ni nyiɛ sɛɛ lɛ baatsɔɔ akɛ kɛji wɔɔje hiɛkpatamɔ mli ni wɔnine ashɛ naanɔ wala nɔ lɛ, no lɛ esa akɛ wɔya nɔ wɔtao Nyɔŋmɔ Maŋtsɛyeli lɛ kɛ ejalɛ lɛ. Esa akɛ wɔfee enɛ, jeee kɛtsɔ Yesu wiemɔi lɛ atoiboo pɛ nɔ, shi moŋ kɛtsɔ enɔ yeli hu nɔ.
Sanebimɔi Ni Akɛtiɔ Mli
◻ Mɛni Yudafoi ni hiɛ dɔɔ yɛ jamɔ he lɛ tsake amɛ mlihilɛ nikeenii, sɔlemɔi, kɛ ŋmaahilɛ lɛ amɛfee?
◻ Nɛgbɛ ji he ni yɔɔ shweshweeshwe ni esa akɛ okɛ ojwetri ato?
◻ Mɛni hewɔ esa akɛ wɔkwa yeyeeye ni wɔɔfee yɛ wɔheloonaa hiamɔ nii ahewɔ Iɛ?
◻ Mɛɛ amale wiemɔ ko Yudafoi lɛ wie yɛ he ni amɛ blema saji ni akɛ naabu jaje lɛ je shishi kɛjɛ lɛ he?
◻ Mɛni nɔ Nyɔŋmɔ Maŋtsɛyeli lɛ kɛ ejalɛ lɛ tsɔɔ baa?
[Mfoniri ni yɔɔ baafa 16]
Farisifoi lɛ sumɔɔ ni amɛsɔle ni amɛdamɔ gbɛjegbɛi akoji anɔ, yɛ hei ni gbɔmɛi baana amɛ yɛ