Ani Je lɛ Mumɔ lɛ Kɛ Ebɔɔ Miigbe Bo?

YƐ September 12, 1990 lɛ, nɔ ko fɛ yɛ Kazakstan nitsumɔhe ko. Ejie ebɔɔ ni gbeɔ mɔ ewo kɔɔyɔɔ lɛ mli, ni ewo gbɔmɛi 120,000 ni yɔɔ jɛmɛ lɛ ahewalɛnamɔ he gbeyei, ni amɛteŋ mɛi pii yi gbɛjegbɛi lɛ anɔ, ni amɛwie amɛshi ebɔɔ ni gbeɔ mɔ nɛɛ veveeve.

Shi yɛ be mli ni amaniɛbɔɔ babaoo bɔi kpojee faŋŋ lɛ, amɛyɔse akɛ, amɛhi shihilɛ ni ebɔɔ yɔɔ mli nɛɛ mli afii nyɔŋmai abɔ. Yɛ afii ni eho lɛ amli fɛɛ lɛ, ayatsi ebɔɔ tɔn 100,000 ashwie hei ni gbɔmɛi bɛ jɛmɛ, yɛ hei banee. Eyɛ mli akɛ oshara lɛ yɛ amɛshinaa naa nɔŋŋ moŋ, shi mɔ ko mɔ ko ebuuu lɛ akɛ nɔ ko ni hiɛdɔɔ yɔɔ mli. Mɛni hewɔ?

Daa gbi lɛ, nitsulɔi lɛ kɛ la kpɛlɛmɔi he akɔntaabuu ko bakpɛtɛɔ tao ko nɔ yɛ kpɔiaŋgbɔlemɔ stediɔm lɛ, ni enɛ ha mɛi lɛ nu he akɛ oshara ko kwraa bɛ. Yibɔi ni amɛkɛhaa lɛ ja, shi gamma la kpɛlɛmɔ pɛ he akɔntaabuu amɛkɛhaa. Shi Alpha la kpɛlɛmɔ, ni amɛbuuu he akɔntaa lɛ hu he yɛ oshara waa. Yeifɔyei babaoo bɔi nɔ hewɔ ni hela fɔɔ amɛbii lɛ mɔmɔ lɛ shishinumɔ.

Kɛ aaawie yɛ mumɔ naa lɛ, wɔ hu ebɔɔ baanyɛ agbe wɔ kɛtsɔ hemujiwoo ni anaaa lɛ nɔ. Ni taakɛ gbɔmɛi ni he eyabaaa nii ni yɔɔ Kazakstan lɛ ji lɛ, mɛi titri ni yɔɔ lɛ leee shihilɛ mli hegbeyeiwoo ni yɔɔ oshara nɛɛ. Biblia lɛ tsɛɔ nɛkɛ hemujiwoo nɛɛ akɛ “je lɛ mumɔ lɛ,” ní jeee mɔ ko mɔ ko to he gbɛjianɔ ákɛ ja Satan Abonsam. (1 Korintobii 2:12) Nyɔŋmɔ Henyɛlɔ lɛ kɛ je lɛ mumɔ nɛɛ—loo subaŋ ni egbɛ eshwa lɛ—tsuɔ nii koni ekɛfite Nyɔŋmɔ hetuu-kɛ-hamɔ ni wɔyɔɔ lɛ.

Mɛɛ gbɛ nɔ je lɛ mumɔ lɛ baanyɛ afite wɔ mumɔŋ hewalɛ yɛ? Kɛtsɔ hiŋmɛi lɛ sɛɛdii nii lɛ mli hewalɛ ni ewoɔ nɔ, kɛ agbɛnɛ hu kɛtsɔ pɛsɛmkunya su ni yɔɔ wɔ mli ni ekɛtsuɔ nii lɛ nɔ. (Efesobii 2:1-3; 1 Yohane 2:16) Wɔbaatsɔ nɔkwɛmɔnɔ nɔ wɔsusu gbɛi sɔrɔtoi etɛ ni je lɛŋ susumɔi baanyɛ ekɛ ebɔɔ agbe wɔ mumɔŋ shidaamɔ fiofio lɛ he.

Ní Aaatao Maŋtsɛyeli lɛ Klɛŋklɛŋ

Yesu wo Kristofoi hewalɛ koni ‘amɛtao Nyɔŋmɔ Maŋtsɛyeli lɛ kɛ ejalɛ lɛ tsutsu.’ (Mateo 6:33) Yɛ gbɛ kroko nɔ lɛ, je lɛ mumɔ lɛ baanyɛ anyiɛ wɔhiɛ koni wɔha nibii ni wɔsumɔɔ ni wɔnaa he miishɛɛ lɛ afee nɔ ni he hiaa fe fɛɛ. Jeee mumɔŋ nibii ni wɔɔkwa lɛ ji he ni oshara lɛ yɔɔ klɛŋklɛŋ, shi moŋ eyɛ gbɛhe ni ji enyɔ ni wɔkɛaawo lɛ. Ekolɛ wɔbaaku wɔhiɛ wɔfɔ̃ oshara ni yɔɔ mli lɛ nɔ—tamɔ bɔ ni Kazakstanbii lɛ fee lɛ—yɛ hebuu ni ejaaa henumɔ ni amɛna lɛ hewɔ. Afii abɔ ni wɔkɛsɔmɔ yɛ anɔkwale mli, kɛ hiɛsɔɔ ni wɔyɔɔ kɛha wɔmumɔŋ nyɛmimɛi hii kɛ yei lɛ baanyɛ alaka wɔ koni wɔsusu akɛ wɔnyɛŋ wɔkwa anɔkwale gbɛ lɛ kɔkɔɔkɔ. Etamɔ nɔ ni mɛi pii ni yɔɔ Efeso asafo lɛ mli lɛ nu he nakai.

Aaafee afi 96 Ŋ.B. lɛ, Yesu kɛ ŋaawoo ni nyiɛ sɛɛ nɛɛ ha amɛ: “Mikɛo yɛ sane ko, no ji akɛ oŋmɛɛ o-klɛŋklɛŋ suɔmɔ lɛ he.” (Kpojiemɔ 2:4) Nɛkɛ Kristofoi ni kɛ afii babaoo esɔmɔ nɛɛ eŋmɛ amɛtsui shi yɛ naagbai pii amli. (Kpojiemɔ 2:2, 3) Onukpai anɔkwafoi, ni bɔfo Paulo fata he etsɔɔ amɛ nii. (Bɔfoi lɛ Asaji 20:17-21, 27) Shi kɛlɛ, yɛ afii lɛ amli lɛ, amɛ suɔmɔ kɛha Yehowa lɛ ba shi, ni ekãa ni amɛyɔɔ yɛ mumɔŋ lɛ laaje.—Kpojiemɔ 2:5.

Etamɔ nɔ ni jarayeli kɛ shihilɛ ni etee hiɛ yɛ maŋ lɛ mli lɛ sa Efesobii lɛ ekomɛi ahe. Mɔbɔ sane ji akɛ, heloonaa nibii asɛɛtiumɔ ni yaa nɔ ŋmɛnɛ lɛ egbala Kristofoi komɛi kɛtee nakai nɔŋŋ. Bɔ fɛɛ bɔ ni fee lɛ, kɛ wɔtswa wɔfai shi akɛ wɔɔtiu shihilɛ kpakpa namɔ sɛɛ lɛ, ebaajie wɔjwɛŋmɔ kɛjɛ mumɔŋ otii anɔ.—Okɛto Mateo 6:24 he.

Beni Yesu bɔɔ kɔkɔ yɛ oshara nɛɛ he lɛ ekɛɛ: “Gbɔmɔtso lɛ kane ji hiŋmɛi. No hewɔ lɛ, kɛji ohiŋmɛi nɔ tse lɛ, ogbɔmɔtso muu lɛ aaayi kɛ la; shi kɛji ohiŋmɛi nɔ tseee [“eyeɔ awuŋa,” NW shishigbɛ niŋmaa] lɛ ogbɔmɔtso muu lɛ aaawo duŋ.” (Mateo 6:22, 23) Hiŋmɛi ni nɔ “tse” lɛ ji hiŋmɛi ni kwɛɔ nii yɛ mumɔŋ, eji hiŋmɛi ni akɛmaa Nyɔŋmɔ Maŋtsɛyeli lɛ nɔ. Yɛ gbɛ kroko nɔ lɛ, hiŋmɛi ni nɔ “tseee” loo “awuŋayeli” nɔ̃ lɛ ji nɔ ni kwɛɛɛ nii kɛyaaa shɔŋŋ, enyɛɔ ekwɛɔ heloo lɛ sɛɛdii nii ni yɔɔ ehiɛgbɛ nɔŋŋ lɛ pɛ. Eyɔseee mumɔŋ otii kɛ wɔsɛɛ nyɔmɔwoi.

Yesu kɛɛ yɛ kuku ni tsɔ hiɛ lɛ mli akɛ: “He ni nyɛ jwɛtri yɔɔ lɛ, jɛi nyɛtsui aaahi.” (Mateo 6:21) Te wɔbaafee tɛŋŋ wɔle kɛji wɔtsui yɛ mumɔŋ nibii loo eyɛ heloonaa nibii anɔ? Akɛni ‘nɔ ni eyi tsui lɛ kɛteke nɔ lɛ, no naabu lɛ wieɔ’ hewɔ lɛ, ekolɛ wɔ sanegbaa ji nɔ ni fe fɛɛ ni baaha wɔyɔse enɛ. (Luka 6:45) Kɛ wɔnaa akɛ wɔwieɔ heloonaa nibii loo je lɛŋ nibii ni wɔnine baashɛ nɔ lɛ he daa lɛ, belɛ eka shi faŋŋ akɛ wɔtsui mli eja enyɔ, ni ákɛ tɔmɔ yɛ bɔ ni wɔkwɛɔ nii yɛ mumɔŋ lɛ he.

Carmen, ni ji nyɛmi yoo ko ni yɔɔ Spain lɛ kɛ naagba nɛɛ wuu.a Carmen kɛɛ akɛ: “Atsɔse mi yɛ anɔkwale lɛ mli, shi beni miye afii 18 lɛ mije gbekɛbii askul nitsumɔ ni mi diɛŋtsɛ mito he gbɛjianɔ lɛ shishi. Afii etɛ sɛɛ lɛ, miná nitsulɔi ejwɛ, nitsumɔ lɛ miishwere waa, ni miina shika pii. Ekolɛ, anɔkwale ni eji akɛ mi diɛŋtsɛ mikwɛɔ mihe yɛ shika gbɛfaŋ, ni ‘miiye omanye’ lɛ haa mitsui nyɔɔ mimli fe fɛɛ. Kɛ mawie yɛ anɔkwale mli lɛ, mitsui kã mi nitsumɔ lɛ nɔ—no ji nɔ ni misumɔɔ fe fɛɛ.

“Minu he akɛ manyɛ mafee Odasefonyo lolo yɛ be mli ni mikɛ mibe titri woɔ minitsumɔ he nibii amli lɛ. Yɛ gbɛ kroko nɔ lɛ, minuɔ he daa akɛ manyɛ mafee babaoo kɛsɔmɔ Yehowa. Yɛ naagbee lɛ, minanemɛi enyɔ ni amɛji gbɛgbalɔi lɛ anɔkwɛmɔnii lɛ ji nɔ ni tsɔ̃ miyiŋ koni mikɛ Maŋtsɛyeli lɛ he nibii aye klɛŋklɛŋ gbɛhe. Juliana ni ji amɛteŋ mɔ kome lɛ yɛ asafo ni miyɔɔ mli lɛ mli. Enyɛɛɛ minɔ ni mikɛ mihe awo gbɛgbamɔ nitsumɔ lɛ mli, shi moŋ saji ni ekɛ mi gbaa, kɛ miishɛɛ ni enaa kɛjɛɔ esɔɔmɔ lɛ mli yɛ faŋŋ mli lɛ ye ebua mi ni misaa misusu mimumɔŋ shidaamɔ he ekoŋŋ.

“Yɛ be ko sɛɛ, be mli ni mitee hejɔɔmɔ yɛ United States lɛ, mikɛ Gloria, ni ji nyɛmi yoo gbɛgbalɔ ko hi shi. Ewu gbo etsɛko, ni eeekwɛ ebiyoo ni eye afii enumɔ, kɛ enyɛ ni kansa hela emɔ lɛ lɛ. Kɛlɛ eeetsu gbɛgbamɔ nitsumɔ lɛ. Nɔkwɛmɔnɔ ni efee lɛ kɛ hiɛsɔɔ ni jɛ tsuiŋ ni eyɔɔ kɛha sɔɔmɔ lɛ sa mitsui he. Gbii ejwɛ pɛ ni mikɛhi shi yɛ eshia lɛ ha mitswa mifai shi akɛ mikɛ nɔ ni fe fɛɛ baaha Yehowa. Klɛŋklɛŋ kwraa lɛ, mibatsɔ daa gbɛgbalɔ, ni afii fioo komɛi asɛɛ lɛ, afɔ̃ mi kɛ miwu nine koni wɔyasɔmɔ yɛ Betel. Mishi minitsumɔ lɛ—ni ji gbɛtsiinii kɛha mimumɔŋ nɔyaa lɛ—ni amrɔ nɛɛ, minuɔ he akɛ mishihilɛ eye omanye yɛ Yehowa hiɛ, ni no ji nɔ̃ titri ni he hiaa.”—Luka 14:33.

Ní wɔɔkase koni ‘wɔyoo nii ni hi titri lɛ,’ taakɛ Carmen fee lɛ, baaye abua wɔ koni wɔfee yiŋkpɛɛ ni ja ni kɔɔ wɔ nitsumɔ, wolokasemɔ, shia ni wɔɔhi mli, kɛ shihilɛ gbɛ ni wɔɔkɔ lɛ ahe. (Filipibii 1:10) Shi ani wɔyooɔ nii ni hi titri lɛ kɛ eekɔ hiɛtserɛjiemɔ hu he? Enɛ ji gbɛ kroko ni je lɛ mumɔ lɛ naa mɔ nɔ hewalɛ waa yɛ.

Ha Hiɛtserɛjiemɔ Ahi Egbɛhe ni Sa

Je lɛ mumɔ lɛ kɛ su ni gbɔmɛi yɔɔ akɛ amɛjɔɔ amɛhe ni amɛjie amɛhiɛtserɛ lɛ tsuɔ nii yɛ ŋaa gbɛ ni yɔɔ nigii nɔ. Akɛni gbɔmɛi babaoo bɛ hiɛnɔkamɔ diɛŋtsɛ ko kɛha wɔsɛɛ be hewɔ lɛ, shishinumɔ yɛ mli akɛ esa akɛ amɛha be ni wɔyɔɔ mli nɛɛ mli ayi obɔ kɛ hiɛtserɛjiemɔ kɛ hejɔɔmɔ sɔŋŋ. (Okɛto Yesaia 22:13; 1 Korintobii 15:32 he.) Ani wɔnaa akɛ wɔhaa hiɛtserɛjiemɔ feɔ nɔ ni he hiaa wɔ titri babaoo? No baanyɛ atsɔɔ akɛ je lɛ susumɔ gbɛi lɛ miikudɔ wɔ susumɔi.

Biblia lɛ bɔɔ kɔkɔ akɛ: “Mɔ ni sumɔɔ shwɛmɔ [“hiɛtserɛjiemɔ,” Lamsa] lɛ, eeetsɔ ohiafo.” (Abɛi 21:17) Ejeee tɔmɔ akɛ aaashwɛ, shi ni aaana suɔmɔ aha, loo ni aaaha efee nɔ ni he hiaa titri lɛ baanyiɛ wɔ hiɛ kɛya mumɔŋ ohia mli. Ni bɔ fɛɛ bɔ ni fee lɛ, suɔmɔ ni wɔyɔɔ kɛha mumɔŋ nibii lɛ he baajɔ, ni be fioo wɔbaana kɛha sanekpakpa lɛ shiɛmɔ.

Yɛ yiŋtoo nɛɛ hewɔ lɛ, Nyɔŋmɔ Wiemɔ lɛ woɔ wɔ ŋaa koni “wɔgbele wɔjwɛŋmɔ mli kɛha nitsumɔ, ni wɔye wɔhe nɔ kɛmɔ shi.” (1 Petro 1:13, The New English Bible) Henɔyeli he miihia koni wɔba be ni wɔkɛjieɔ wɔhiɛtserɛ lɛ shi bɔ ni sa. Ní wɔɔgbele wɔjwɛŋmɔ mli kɛha nitsumɔ lɛ tsɔɔ akɛ, wɔbaafee klalo kɛha mumɔŋ nitsumɔ, kɛ eji nikasemɔ, kpeei, loo shiɛmɔ nitsumɔ lɛ jio.

Ni hejɔɔmɔ ni he hiaa lɛ hu? Ani esa akɛ wɔnu fɔyeli he kɛ wɔhe be ni wɔkɛjɔɔ wɔhe? Dabi kwraa. Hejɔɔmɔ he miihia, titri lɛ yɛ ŋmɛnɛ jeŋ ni nɔnyɛɛ yɔɔ mli nɛɛ mli. Shi kɛlɛ, ákɛ Kristofoi ni ejɔɔ amɛhe nɔ lɛ, wɔnyɛŋ wɔŋmɛ gbɛ ni wɔshihilɛ adamɔ hiɛtserɛjiemɔ nɔ. Hiɛtserɛjiemɔ babaoo baanyɛ aha wɔfee kpɔkee ni wɔtsu nibii ni he ehiaaa kwraa lɛ ahe nii. Ebaanyɛ eha oyaiyeli henumɔ ni wɔyɔɔ lɛ aba shi, ni ebaawo he ni akɛwoɔ nɔ fɛɛ nɔ feemɔ mli lɛ hu mli hewalɛ. Belɛ, te wɔɔfee tɛŋŋ wɔna susumɔ ni ŋmɛɔ pɛpɛɛpɛ yɛ hejɔɔmɔ he lɛ?

Biblia lɛ jieɔ hejɔɔmɔ fioo yi, fe ni aaatsu nii dɛŋdɛŋ—titri lɛ kɛ heloo gbɛfaŋ nii ni wɔtsuɔ lɛ ji nɔ ni he ehiaaa lɛ. (Jajelɔ 4:6) Eyɛ mli akɛ hejɔɔmɔ haa wɔnaa hewalɛ ekoŋŋ moŋ, shi Nyɔŋmɔ nifeemɔ hewalɛ lɛ ji mumɔŋ hewalɛ jɛɛhe. (Yesaia 40:29-31) Wɔnine shɛɔ nɛkɛ mumɔ krɔŋkrɔŋ nɛɛ nɔ kɛtsɔɔ wɔhe ni wɔkɛwoɔ Kristofoi anitsumɔi amli lɛ nɔ. Aŋkroaŋkro nikasemɔ haa wɔtsui tɔɔ ni ekanyaa wɔ koni wɔfee ekpakpa. Kpeei ni wɔyaa lɛ haa wɔhiɛ sɔɔ wɔ-Bɔlɔ lɛ. Wɔhe ni wɔkɛwoɔ Kristofoi asɔɔmɔ lɛ mli lɛ woɔ henumɔi ni wɔyɔɔ kɛha mɛi krokomɛi lɛ mli hewalɛ. (1 Korintobii 9:22, 23) Taakɛ Paulo tsɔɔ mli diɛŋtsɛ ha lɛ, “kponɔgbɛ gbɔmɔ lɛ fiteɔ kwraa lɛɛlɛŋ, shi daa gbi lɛ mligbɛ gbɔmɔ lɛ naa hewalɛ hee.”—2 Korintobii 4:16, Phillips.

Ileana, ni ji yoofɔyoo ni yɔɔ bii ekpaa, ni ewu heee yeee lɛ bɛ dekã kwraa yɛ shihilɛ mli. Lɛ diɛŋtsɛ eweku lɛ, kɛ wekumɛi krokomɛi babaoo agbɛnaa nii kã enɔ, ni tsɔɔ akɛ, daa gbi lɛ etamɔ nɔ ni ekɛ oyaiyeli miiya kɛmiiba yɛ he fɛɛ he. Shi kɛlɛ, efee nɔkwɛmɔnɔ ni sa kadimɔ efɔ shi yɛ shiɛmɔyaa kɛ hesaamɔ kɛha kpeeiyaa mli. Te eeefee tɛŋŋ enyɛ etsu nitsumɔi babaoo ni tamɔ nɛkɛ he nii?

Ileana tsɔɔ mli akɛ: “Kpeei kɛ shiɛmɔ nitsumɔ lɛ ye ebua mi waa ni midamɔ migbɛnaa nii krokomɛi lɛ anaa. Akɛ nɔkwɛmɔnɔ lɛ, beni mikpa shiɛmɔ sɛɛ lɛ miyɛ nibii babaoo ni masusu he yɛ be mli ni mitsuɔ shia nitsumɔi lɛ. Mifɔɔ lámɔ kɛ́ miitsu enɛ he nii. Yɛ gbɛ kroko nɔ lɛ, kɛ kpee ko ho mihe, aloo mitsu nii fioo ko pɛ yɛ sɔɔmɔ nitsumɔ lɛ mli lɛ, no lɛ shia nitsumɔ bafeɔ nɔ ni wa waa kɛhaa mi.”

Kwɛ bɔ ni esoro enɛ kwraa yɛ bɔ ni ahaa hejɔɔmɔ feɔ nɔ ni he hiaa waa lɛ he!

Mumɔŋ Hefɛo Saa Yehowa Hiɛ

Wɔyɛ jeŋ ko ni gbɔmɔtsoŋ hefɛo miihe gbɔmɛi ajwɛŋmɔ daa gbi. Gbɔmɛi fiteɔ shika babaoo yɛ nibii ni afee koni eha mɔ he afee fɛo, ni baa nɔ ni haa anaa mɔ ko akɛ egbɔ lɛ shi lɛ. Nɔ ni fata enɛɛmɛi ahe ji yitsɔi ni akɛwoɔ he ni yitsɔi bɛ, sui ni akɛdikiɔ mli, fufɔ ni adesa efee ni akɛwoɔ tsitsiŋ, kɛ hiɛ ni atsakeɔ. Gbɔmɛi akpekpei abɔ yaa hei ni afee koni akɛba shwilɛ shi, hei ni agbɔleɔ kpɔiaŋ yɛ, nitsumɔ dɛŋdɛŋ tsumɔ, aloo amɛheɔ vidioi ni tsɔɔ kpɔiaŋgbɔlemɔ mli, kɛ woji ni wieɔ niyenii ahe. Je lɛ baaha wɔhe wɔye akɛ nɔ titri ni baaha wɔna miishɛɛ ji wɔ hefɛo, ni ákɛ bɔ ni “wɔpuemɔ” yɔɔ ha lɛ ji nɔ ni he hiaa fe fɛɛ.

Yɛ United States lɛ, nii amli pɛimɔ ko ni Newsweek adafitswaa wolo lɛ na ji akɛ, mɛi yɛji ni ji Amerikabii ni eye kɛjɛ afii nyɔŋma-kɛ-etɛ kɛyaa lɛ oha mlijaa 90 “bɛ bɔ ni amɛ gbɔmɔtso yɔɔ ha lɛ he miishɛɛ.” Gbɔmɔtso lɛ ni aaabɔ mɔdɛŋ fɛɛ ni aha efee fɛo lɛ baanyɛ asa wɔ mumɔŋ shidaamɔ he. Dora ji obalayoo Yehowa Odasefonyo ni bɔ ni egbɔmɔtso yɔɔ lɛ feɔ lɛ hiɛgbele ejaakɛ etamɔ nɔ ni eshwi tsɔ. Etsɔɔ mli akɛ, “kɛ mitee nihemɔ lɛ, ewa akɛ mana midalɛ he atade. Etamɔ nɔ ni atadei ni akpɛ lɛ yɛ kɛha gbɔmɛi ni daraaa lɛ pɛ. Nɔ ni ehiii fe fɛɛ ji akɛ, gbɔmɛi wieɔ mishwilɛ lɛ he kɛwoɔ mi hiɛgbele, ni enɛ gbaa minaa waa, titri lɛ, kɛ mɛi ni wieɔ enɛ he lɛ ji mimumɔŋ nyɛmimɛi hii kɛ yei.

“Enɛ hewɔ lɛ, bɔ ni mipuemɔ yɔɔ ha lɛ bahe mijwɛŋmɔ fɛɛ, aahu akɛ, mumɔŋ nibii bahe gbɛhe ni ji enyɔ yɛ mishihilɛ mli. Ebafee tamɔ nɔ ni mi miishɛɛnamɔ damɔ mihɛ dalɛ nɔ. Afii babaoo eho, ni agbɛnɛ ni mibatsɔ yoo ni eda kɛ Kristofonyo ni eda yɛ mumɔŋ nɛɛ, minaa nibii yɛ gbɛ sɔrɔto nɔ. Eyɛ mli akɛ mikwɛɔ bɔ ni mipuemɔ ji ha lɛ moŋ, shi miyɔse akɛ mumɔŋ hefɛo ji nɔ ni he hiaa titri, ni no ji nɔ ni haa mitsui nyɔɔ mimli babaoo diɛŋtsɛ. Beni mibanu shishi nakai lɛ, minyɛ mikɛ Maŋtsɛyeli lɛ he nibii ye gbɛhe ni sa jogbaŋŋ.”

Sara ji blema beaŋ yoo anɔkwafo ni hiɛ nɛkɛ susumɔ ni ŋmɛɔ pɛpɛɛpɛ nɛɛ eko. Eyɛ mli akɛ Biblia lɛ wieɔ egbɔmɔtsoŋ hefɛo he beni eye fe afii 60 lɛ moŋ, shi egbalaa jwɛŋmɔ kɛbaa esui kpakpai lɛ anɔ titri—ni ji tsuiŋ gbɔmɔ ni aŋɔtee lɛ. (1 Mose 12:11; 1 Petro 3:4-6) Ejie mlijɔlɛ kɛ mumɔ ni yɔɔ kpoo kpo etsɔɔ, ni eba ehe shi ni ebo ewu toi. Bɔ ni mɛi krokomɛi kwɛɔ Sara haa lɛ gbaaa enaa tsɔ. Eyɛ mli akɛ ewekumɛi yɛ nii waa moŋ, shi ejɛ esuɔmɔ mli ekɛ nɔ ni fe afii 60 hi shi yɛ buui amli. Ejɛ mlijɔlɛ ni pɛsɛmkunya bɛ mli mli ni efi ewu sɛɛ; eji yoo ni yɔɔ hemɔkɛyeli. No ji nɔ ni ha efee yoo ni he yɔɔ fɛo diɛŋtsɛ lɛ.—Abɛi 31:30; Hebribii 11:11.

Akɛ Kristofoi lɛ, nɔ ni wɔsumɔɔ ji ni wɔha wɔ mumɔŋ hefɛo aya hiɛ, hefɛo ni kɛ ana daa gbi lɛ, ebaanyɛ eda ni ehi shi kɛya naanɔ lɛ. (Kolosebii 1:9, 10) Wɔbaanyɛ wɔtsu wɔ mumɔŋ hefɛo lɛ he nii yɛ gbɛi titrii enyɔ nɔ.

Wɔhe bafeɔ fɛo waa yɛ Yehowa hiɛ kɛ wɔkɛ wɔhe wo sɔɔmɔ ni haa mɔ yi naa wala lɛ mli lɛ. (Yesaia 52:7; 2 Korintobii 3:18–4:2) Kɛfata he lɛ, yɛ be mli ni wɔkaseɔ koni wɔjie Kristofoi asui akpo lɛ, wɔhe feɔ fɛo waa. Hegbɛ ni baaha wɔ mumɔŋ hefɛo aya hiɛ lɛ fa: “Nyɛsumɔsumɔa nyɛhe; mɔ fɛɛ mɔ kɛ woo aha enaanyo tsutsu. . . . Nyɛ mumɔ lɛ he adɔa la. . . . Nyɛbɔa gbɔfeemɔ he mɔdɛŋ. . . . Nyɛkɛ mɛi ni nyaa lɛ anyaa, ni nyɛkɛ mɛi ni foɔ lɛ afoa. . . . Nyɛkaŋɔa efɔŋ nyɛtoa mɔ ko mɔ ko efɔŋ najiaŋ. . . . Nyɛkɛ gbɔmɛi fɛɛ ahia shi yɛ hejɔlɛ mli.” (Romabii 12:10-18) Sui ni tamɔ nɛkɛ ni wɔɔwo lɛ baaha wɔhe afee fɛo yɛ Nyɔŋmɔ kɛ wɔnanemɛi adesai fɛɛ ahiɛ, ni ebaaha gboshinii ni wɔná, ni ji kanyamɔi kɛha eshafeemɔ lɛ puemɔ ni bɛ fɛo lɛ aba shi.—Galatabii 5:22, 23; 2 Petro 1:5-8.

Wɔbaanyɛ Wɔwuu Wɔshi Je lɛ Mumɔ Lɛ!

Je lɛ mumɔ ni ebɔɔ yɔɔ mli lɛ baanyɛ aye wɔ emuuyeli mlihiɛmɔ awui yɛ gbɛi sɔrɔtoi ni yɔɔ nigii nɔ. Ehaŋ nibii ni wɔyɔɔ lɛ aha wɔtsui anyɔ wɔmli, ni ebaaha wɔfee yeyeeye ni wɔkɛ wɔ diɛŋtsɛ wɔhiamɔ nii kɛ nibii ni wɔsumɔɔ aye Nyɔŋmɔ nɔ̃ lɛ hiɛ. Aloo yɛ nɔ najiaŋ ni esa akɛ wɔná Nyɔŋmɔ susumɔi lɛ, ebaaha wɔná gbɔmɛi asusumɔi koni wɔha hiɛtserɛjiemɔ loo gbɔmɔtsoŋ hefɛo afee nɔ ni he hiaa fe nine.—Okɛto Mateo 16:21-23 he.

Satan etswa efai shi akɛ ebaafite wɔ mumɔŋ shidaamɔ, ni je lɛ mumɔ lɛ ji edɛŋdadei titri ni ekɛtsuɔ nii lɛ ateŋ ekome. Kaimɔ akɛ Abonsam baanyɛ atsake gbɛi ni ekɛtsuɔ nii lɛ kɛjɛ nɔ ni tamɔ jata ni miihuu nɔ kɛya onufu ni hiɛ tɛ̃ nɔ. (1 Mose 3:1; 1 Petro 5:8) Yɛ bei komɛi amli lɛ je lɛ yeɔ Kristofonyo ko nɔ kunim kɛtsɔɔ yiwaa ni naa wa nɔ, shi yɛ bei babaoo mli lɛ ekɛ ebɔɔ ni gbeɔ lɛ bɛlɛoo tsuɔ nii. Naagbee oshara lɛ titri ji nɔ ni Paulo wieɔ he lɛ: “Miishe gbeyei akɛ aleenɔ, taakɛ bɔ ni onufu lɛ kɛ ekutumpɔo lɛ laka Hawa lɛ, nakai nɔŋŋ aaafite nyɛ hu nyɛjwɛŋmɔi kɛjɛ krɔŋŋfeemɔ ni nyɛjie nyɛtsɔɔ Kristo lɛ mli.”—2 Korintobii 11:3.

Bɔni afee ni wɔbu wɔhe kɛjɛ onufu lɛ ŋaalee lɛ he lɛ, ehe miihia ni wɔyɔse nibii ni ‘jɛ je lɛ mli’ ni egbɛ eshwa ni mɛi fɛɛ nuɔ he lɛ ni wɔkpoo kwraa. (1 Yohane 2:16) Esaaa akɛ alakaa wɔ ni wɔheɔ wɔyeɔ akɛ je lɛ susumɔi lɛ nyɛŋ aye wɔ awui. Satan nibii agbɛjianɔtoo lɛ kɔɔyɔɔ ni ebɔɔ yɔɔ mli lɛ eshɛ he ni yɔɔ gbeyei waa.—Efesobii 2:2.

Shii abɔ ni wɔnyɛɔ wɔyɔseɔ je lɛ susumɔi lɛ, belɛ wɔbaanyɛ wɔwuu wɔshi kɛtsɔ Yehowa tsɔɔmɔ ni yɔɔ krɔŋŋ lɛ ni wɔkɛaawo wɔjwɛŋmɔ kɛ wɔtsui amli lɛ nɔ. Nyɛhaa wɔkɛa, taakɛ Maŋtsɛ David kɛɛ lɛ, akɛ: “Yehowa, tsɔɔmɔ mi ogbɛi lɛ, ha male otempɔŋi lɛ! Ha manyiɛ onɔkwale lɛ mli, ni otsɔɔ mi nii; ejaakɛ bo ji miyiwalaheremɔ Nyɔŋmɔ lɛ.”—Lala 25:4, 5.

[Shishigbɛ niŋmai]

[Mfoniri ni yɔɔ baafa 26]

Mɔdɛŋ ni abɔɔ koni atiu shihilɛ kpakpa sɛɛ lɛ baanyɛ ajie wɔjwɛŋmɔ kɛjɛ mumɔŋ otii anɔ