Ha Ohiɛ Ahi Bo Diɛŋtsɛ Ogbɛjianɔtoo Nɔ Jogbaŋŋ
1 “Kɛji ootao ni agbe onitsumɔ ko naa lɛ, kɛkaha mɔ ko ni ji hejɔlɔ.” Yiŋtoo ni yɔɔ nɛkɛ wiemɔ nɛɛ sɛɛ ji efɔɔ kaa akɛ mɔ ni jeee hejɔlɔ lɛ toɔ ebe he gbɛjianɔ jogbaŋŋ ni no hewɔ lɛ ebaanyɛ etsu babaoo. Wɔ fɛɛ wɔyɛ ŋmɛlɛtswai 24 ni wɔkɛaatsu nii daa gbi. Kɛji wɔfiteɔ nakai be lɛ loo wɔkɛtsuɔ nii yɛ nilee naa lɛ damɔ wɔ diɛŋtsɛ wɔ gbɛjianɔtoo nɔ yɛ be babaoo mli.
2 Esa akɛ “nyɛtekea nɔ yɛ Nuŋtsɔ lɛ nitsumɔ lɛ mli” be fɛɛ be. (1 Kor. 15:58) Wɔyɛ kpeei ni wɔbaaya kɛ shiɛmɔ nitsumɔ lɛ ni wɔkɛ wɔhe baawo mli. Shi hesaamɔ tsɔɔ enɛɛmɛi fɛɛ hiɛ. Yɛ gbɛ kroko nɔ lɛ, esa akɛ wɔŋɔ be ni wɔkɛkase nii koni “wɔfee kaselɔi” yɛ gbɛ ni mɔɔ shi nɔ ni wɔwowoo wɔhe hewalɛ “yɛ suɔmɔ kɛ nitsumɔi kpakpai amli,” taakɛ afa wɔ akɛ wɔfee lɛ. (Mat. 28:19; Heb. 10:24) Daa gbi shihilɛ mli nibii, tamɔ heloo naa nitsumɔ, jara nɔ yaa, niyeli, shia saamɔ, gbɛfaa, skulyaa, kɛ wɔɔ, fɛɛ yɛ amɛgbɛhe. Akɛ be lɛ eko hu tsuɔ nii yɛ hiɛtserɛjiemɔ mli. Nɔ fɛɛ nɔ ni wɔkɛaawo egbɛhe ni sa lɛ kɛ nitsumɔ ko fɔɔ wɔnɔ ni esa akɛ wɔtsu he nii. Mɛɛ gbɛ nɔ abaatsɔ afee enɛ yɛ?
NI AAATO NIBII NI HE HIAA LƐ ANAA
3 Yesu kɛɛ: “Shi nyɛtaoa Nyɔŋmɔ maŋtsɛyeli lɛ kɛ ejalɛ lɛ tsutsu, ni akɛ nii nɛɛ fɛɛ aaafata he aha nyɛ.” (Mat. 6:33) Eka shi faŋŋ akɛ, kɛ eba wɔbe he nitsumɔ lɛ, esa akɛ Maŋtsɛyeli lɛ he nibii aye klɛŋklɛŋ gbɛhe yɛ wɔ gbɛjianɔtoo mli. Eji eeeba akɛ wɔɔto wɔbe he gbɛjianɔ taakɛ wɔfeɔ yɛ wɔshika gbɛfaŋ kulɛ, wɔkɛ ŋmɛlɛtswai abɔ ni wɔto ni wɔkɛyaa Kristofoi akpeei, kɛ nɔ ni wɔkɛfeɔ weku Biblia mli nikasemɔ kɛ teokrase nitsumɔi tamɔ shiɛmɔyaa kɛ aŋkroaŋkro nikasemɔ lɛ eyadiŋ nibii krokomɛi asɛɛ.
4 Esa akɛ wala shihilɛ mli hiamɔ nii ahi be he gbɛjianɔtoo fɛɛ gbɛjianɔtoo mli. Atoɔ be pɔtɛɛ akɛtsuɔ heloo naa nii koni mɔ kɛna lɛ kɛ eweku lɛ hiamɔ nii. Esa akɛ niyeli kɛ wɔɔ, kɛ agbɛnɛ hiɛ ni aaahi weku lɛ taomɔ nii fɛɛ anɔ lɛ afata he. Nɔ ni yeɔ klɛŋklɛŋ gbɛhe yɛ onukpai kɛ asafoŋ sɔɔlɔi agbɛjianɔtoo mli ji be ni amɛyeɔ ni amɛkɛsaa amɛhe ni amɛkɛtsuɔ teokrase gbɛnaa nii ahe nii lɛ. Mɛni hewɔ ni otaaa shi ni oto be he gbɛjianɔ yɛ nɛkɛ gbɛ nɔ, ni okwɛ kɛji okɛ nibii ni he ehiaaa tsɔ lɛ eye gbɛhe ni esaaa yɛ ogbɛjianɔtoo mli?
NI WƆƆFEE MƐI NI BƐ HAŊTSII
5 Beni Yesu kɛ ekaselɔi lɛ wieɔ amɛ nitsumɔ lɛ he lɛ, ekɛɛ amɛ akɛ: “No hewɔ lɛ kɛji ohiŋmɛii anɔ tse lɛ, ogbɔmɔtso muu lɛ aaayi kɛ la.” (Mat. 6:22) Mɛni ji nɔ ni enɛ biɔ? Nɔ ni etsɔɔ kɛkɛ ji akɛ ni mɔ ko shihilɛ aaafee nɔ ni bɛ haŋtsii. Nibii babaoo yɛ ni gbalaa mɔ jwɛŋmɔ ni baanyɛ ahe mɔ ko be. Amɛteŋ ekome ji televishin. Ekolɛ mɔ ko baata shi akɛ eekwɛ nɔ ko ni sɛɛ jɛkɛɛɛ tsɔ. Shi ebaana akɛ be ni eto akɛ lɛ diɛŋtsɛ ekɛbaakase nii aloo kɛ eweku lɛ baaho aya yɛ be mli ni eyaa nɔ ekwɛɔ nibii krokomɛi ni ajieɔ lɛ. Kwɛ bɔ ni ewaaa kwraa akɛ wɔɔfite wɔ gbɛkɛnaashi be fɛɛ ni wɔnaaa nɔ ko kwraa kɛjɛɛɛ mli! Mɛi babaoo leee be ni esa akɛ amɛgbɛɔ TV lɛ. Kɛji oyɛ nɛkɛ naagba nɛɛ, ekolɛ obaakpɛ oyiŋ akɛ eji nɔ ni hi fe fɛɛ akɛ okagbele televishin lɛ kwraa. Hiɛtserɛjiemɔ nibii, ni ji mɛi komɛi ahejɔɔmɔ nibii lɛ hu baanyɛ ahe be ni ato kɛha nibii ni he hiaa lɛ.
6 He ni akɛwoɔ kpɔiaŋgbɔlemɔ nifeemɔi amli, kwɛmɔ ni ayakwɛɔ enɛɛmɛi yɛ shwɛmɔ hei, aloo kwɛmɔ ni akwɛɔ yɛ TV nɔ lɛ baanyɛ ahe mɔ ko be ni he hiaa lɛ fɛɛ. Wumɛi, ŋamɛi, kɛ gbekɛbii fɛɛ baafee jogbaŋŋ koni amɛkwɛ ni amɛkaha amɛbe ni amɛkɛaakase nii ni amɛkɛfee ekome lɛ miije amɛdɛŋ. Esa akɛ wɔ fɛɛ wɔkwɛ jogbaŋŋ ni wɔkaha wɔshihilɛ fee haŋtsii kɛ kpɔiaŋgbɔlemɔ kɛ hiɛtserɛjiemɔ nibii.
7 Kɛ wɔŋmɛ gbɛ ni wɔ heloo naa nitsumɔ ko hé wɔhiamɔ nii ahe nitsumɔ be lɛ, ebaanyɛ ekɛ naagba ni hiɛdɔɔ yɔɔ mli aba. Mɛi komɛi baana akɛ amɛnitsumɔ ehe amɛbe fɛɛ aloo shika gbɛfaŋ hiɛyaa ehe amɛjwɛŋmɔ kwraa akɛ amɛbɛ be ko yɛ amɛ gbɛjianɔtoo mli dɔŋŋ kɛha kpeeiyaa, aloo kɛha shiɛmɔyaa aloo kɛha weku lɛ mumɔŋ hiamɔ nii ahe nitsumɔ. (Efe. 5:15, 16) Ehi akɛ wɔɔbi wɔhe akɛ: ‘Namɔ ji mɔ ni baana he miishɛɛ akɛ mikɛ be ni mijɔɔ nɔ momo miha Yehowa Nyɔŋmɔ jamɔ lɛ aaatsu mi daa gbi hiamɔ nii ahe nii?’
GBƐI NI WƆƆTSƆ NƆ WƆTSU BE HE NII JOGBAŊŊ
8 Ni mɔ ko aaato eshihilɛ he gbɛjianɔ jogbaŋŋ koni etsu ebe he nii ni emɔ shi lɛ biɔ ni mɔ lɛ kɛ mumɔŋ otii kɛ nibii ni jara wawai amamɔ ehiɛ. Enɛ ji samfele kɛha daa gbi be he gbɛjianɔtoo kpakpa. Kaatsi be ooto he najiaŋ. Kɛji oto be kɛha nitsumɔ ko lɛ, okɛ be lɛ atsu nakai nii lɛ he nii. Too be ni esa akɛ okɛgbe naa. Bɔɔ mɔdɛŋ ni okase nɔ ko yɛ be falɛ pɔtɛɛ ko mli ni okɛtsu nii yɛ oshiɛmɔ nitsumɔ lɛ mli aloo yɛ kpeei ashishi. Feemɔ nakai nɔŋŋ yɛ daa gbi nitsumɔi ni otsuɔ yɛ shia lɛ hu mli.
9 Kasemɔ bɔ ni okɛ be ni kulɛ obaafite lɛ aaatsu nii. Akɛ nɔkwɛmɔ nɔ lɛ, kɛji esa akɛ omɛ mɔ ko lɛ, okɛ nakai be lɛ atsu nii jogbaŋŋ ni okɛkane nii, aloo okɛŋma wolo, aloo okɛtsu nitsumɔ ko ni he hiaa lɛ he nii. Kɛji ofata mɛi komɛi ahe kɛdamɔ shi kɛha nɔ ko lɛ, obaanyɛ oje sanegbaa shishi ni otsɔ nɔ oye odase. Nɔ kroko ni he hiaa kɛha wɔ fɛɛ ji be ni esa akɛ wɔna kɛha hejɔɔmɔ bɔ ni sa koni wɔya nɔ wɔhi shi akɛ mɛi ni yɔɔ hewalɛ ni jwɛŋmɔ yɔɔ oya hu. Enɛ baaye abua bo ni otsu nii ni emɔ shi. Helai ni jɛɔ wɔ kpakpa ni awɔɔɔ kɛ hejɔɔmɔ ni anaaa mli baa lɛ baanyɛ atsi onaa koni okasusu nibii ni he hiaa yɛ oshihilɛ mli lɛ ahe gbɛjianɔtoo he.
BƆ NI OOOFEE NI OHA BO DIƐŊTSƐ OGBƐJIANƆTOO AYA HIƐ
10 Jarayelɔi fiteɔ be kɛ mɔdɛŋbɔɔ babaoo ni amɛkɛsusuɔ bɔ ni amɛaafee ni amɛtsu nɔ ko he nii yɛ jarayeli mli lɛ he. Nitsumɔtsɛ ni he esa lɛ naa akɛ kɛ eto enitsulɔi kɛ nibii ni ekɛtsuɔ nii lɛ he gbɛjianɔ jogbaŋŋ dani eje enitsumɔ lɛ shishi lɛ, etseɔ nyɔmɔbɔɔ nɔ. Eyooɔ akɛ kɛ gbɔmɛi kɛ nibii ni sa lɛ bɛ he ni sa akɛ amɛhi lɛ, ebaaha afite be kɛ shika babaoo ni enaŋ sɛɛ yɛ enitsumɔ lɛ mli. Shi kɛlɛ, wɔyɛ yiŋtoi ni hi fe enɛɛmɛi ni no hewɔ ni esa akɛ wɔto wɔbe he gbɛjianɔ lɛ. Nɔ ni fata he ji shwe ni wɔshweɔ akɛ wɔkɛ Yehowa aaahiɛ wekukpaa mli, ni wɔfee mɛi kaselɔi ni emɔ shi, ni wɔshɛ oti ni ji naanɔ wala ni ma wɔhiɛ lɛ he. No hewɔ lɛ, ehe miihia ni wɔma nɔ mi wɔha wɔhe akɛ wɔyɛ dɛŋdadei ni sa yɛ be ni sa hu mli.
11 Akɛ nɔkwɛmɔ nɔ lɛ, wɔyɛ asafoŋ kpeei enumɔ kɛha daa otsi. Nibii ni ato he gbɛjianɔ kɛha kpeei nɛɛ fɛɛ lɛ jɛ woji sɔrɔtoi amli. Ani wɔnine shɛɔ woji nɛɛ fɛɛ eko nɔ? Ani wɔkɛ Buu-Mɔɔ ni wɔkaseɔ nakai otsi Iɛ eto afa, aloo afiteɔ be ni akɛtaoɔ? Ni woji krokomɛi ni he hiaa, tamɔ Wɔ Maŋtsɛyeli Sɔɔmɔ lɛ, lala wolo, Biblia, kɛ wolo ni wɔkaseɔ yɛ Asafo Woloŋ Nikasemɔ shishi lɛ hu? Esa akɛ ana he ko pɔtɛɛ ni ato kɛha nɛkɛ woji nɛɛ fɛɛ ni akɛto jɛmɛ yɛ be mli ni akɛtsuuu nii lɛ. Yɛ nɛkɛ gbɛ nɔ lɛ, wɔbaana woji ni sa lɛ oya yɛ be mli ni wɔsaa wɔhe wɔhaa shiɛmɔyaa loo kpeei lɛ.
12 Onukpai lɛ kɛ asafoŋ sɔɔlɔi lɛ ji mɛi titri ni esa akɛ amɛhiɛ ahi amɛhe nɔ yɛ amɛ diɛŋtsɛ amɛbe he gbɛjianɔtoo he. Akɛni amɛyɛ nitsumɔ babaoo ni amɛbaatsu, yɛ heloo naa nitsumɔ kɛ asafoŋ nitsumɔ fɛɛ gbɛfaŋ hewɔ lɛ, enyɛɔ ebaa lɛ akɛ hiɛ kpaa “nii ni hi titri” lɛ anɔ aloo atsiɔ nomɛi atoɔ sɛɛ. (Fil. 1:10) Kɛ wɔkɛ ŋaawoo ni akɛha lɛ tsu nii ni wɔto nibii ni he hiaa lɛ naa yɛ wɔ be he gbɛjianɔtoo lɛ mli lɛ, ekɛ sɛɛnamɔ baaba. Ani oka enɛ okwɛ? Nyɛminuu ko yɛ nakai nibii ni eto naa lɛ yɛ wolo nɔ, ni esaa etoɔ naa ekoŋŋ dani kpee be shɛɔ. Yɛ nɛkɛ gbɛ nɔ lɛ, enyɛɔ etsuɔ babaoo ni ekwɛɔ akɛ etsu nii ni he hiaa asafo lɛ hu he nii.
13 Esa akɛ onukpai lɛ ana gbɛjianɔtoo ni hi jogbaŋŋ yɛ bɔ ni akɛ woji ni asafo lɛ ŋmalaa loo nɔ ni enine shɛɔ nɔ lɛ toɔ haa lɛ mli. Bei komɛi lɛ, woji ahe nitsumɔ nyɛɔ efutuɔ mɔ loo ehe nitsumɔ nyɛɔ enyaraa mɔ hiɛ kɛ atooo he gbɛjianɔ jogbaŋŋ. No hewɔ lɛ, ehi akɛ aaaŋɔ minitii fioo ko daa gbi ni akɛhala woji ni ehe hiaa ni akɛto loo akɛtsɔɔ mɛi krokomɛi lɛ ni ajie nɔ ni abaanyɛ akpata hiɛ lɛ kɛjɛ mli. Kɛji nyɛyɛ woji komɛi ni he hiaa ni onukpai krokomɛi lɛ akane yɛ nyɛdɛŋ lɛ, nyɛkwɛa ni nyɛkɛhaa oya. Kɛji oto he ko yɛ obagi Iɛ mli aloo okɛ woji ni onine shɛɔ nɔ lɛ woɔ wolo kotoku kome mli lɛ, ebaaye ebua bo ni ohiɛ ahi ohe nɔ yɛ woji loo nibii ni ehe hiaa ni atsu he nii lɛ ahe. Yɛ nɛkɛ gbɛ nɔ lɛ, woji ahe nitsumɔ ni he hiaa lɛ elaajeee ni esɛɛ etsɛɛɛ hu.
GBƐJIANƆTOO—EJI TSULƆ, JEEE NUŊTSƆ
14 Yɛ be mli ni oti obe he gbɛjianɔtoo lɛ mli lɛ, kpɛɛ oyiŋ yɛ bɔ ni esa akɛ oto bo diɛŋtsɛ obe he gbɛjianɔ lɛ he. Wɔsumɔɔɔ ni wɔtsɔmɔ mɛi ni kɛ shɛiifeemɔ taoɔ ni amɛfee mɛi ni tɔmɔ bɛ amɛnifeemɔ he, ni wɔto wɔ diɛŋtsɛ wɔshihilɛ he gbɛjianɔ keketee ni hegbɛ ko bɛ mli kɛha tsakemɔi. Kaimɔ akɛ, gbɔmɛi aŋkroaŋkroi ji wɔ fɛɛ ni wɔ fɛɛ wɔyɛ shihilɛi krɛdɛɛi komɛi amli. Oshijafoi ji wɔteŋ mɛi komɛi, ni mɛi komɛi hu ebote gbalashihilɛ mli. Nɔ ni baahi kɛha weku kome lɛ ehiŋ kɛhaŋ weku kroko. Esa akɛ wɔsusu wɔ aŋkroaŋkro kɛ wɔ weku shihilɛi ahe yɛ wɔ gbɛjianɔtoo lɛ mli. Esa akɛ wɔkɛ niiasɛɛyoomɔ atsu nii ni wɔfee mɛi ni nyɛɔ tsakeɔ nibii ni ekɛ Biblia mli tɛi ni afolɔ ashwie shi ni baaye abua wɔ ni wɔna be he gbɛjianɔtoo kpakpa lɛ akpa gbee.—Kwɛmɔ The Watchtower September 15, 1988, baafai 28-30; Awake! ni je kpo December 8, 1987, baafai 24-7; kɛ Awake! ni je kpo December 22, 1965, baafai 9-12.
15 Yɛ nyɛsɛɛ afii nɛɛ amli lɛ, nibii ni afeɔ lɛ kuku kɛtsɔ nii ni atoɔ naa atsuɔ he nii nɔ lɛ kɛ hiɛyaa eba yɛ gbɛ ni Yehowa shikpɔŋ nɔ gbɛjianɔtoo lɛ tsɔɔ nɔ etsuɔ nii lɛ mli. Mɛi komɛi baanu he akɛ amɛyɛ gbɛi komɛi ni akɛtsuɔ nii jogbaŋŋ ni hi kɛha amɛ. Amɛbaasumɔ ni Asafo lɛ awo mɛi krokomɛi hewalɛ ni amɛkɛ nakai gbɛi lɛ atsu nii, shi yɛ bei pii amli lɛ asusuɔ enɛɛmɛi ahe ni aŋmɛɛɔ he ejaakɛ anaa akɛ amɛjeee nɔ ni abaanyɛ akɛtsu nii yɛ gbɛjianɔtoo naa. No hewɔ lɛ, bɔni afee ni ekomefeemɔ ahi shi ni nitsumɔ lɛ hu amɔ shi jogbaŋŋ lɛ, eji nilee gbɛ akɛ wɔɔnyiɛ gbɛjianɔtoo mli gbɛi ni akpɛlɛ nɔ lɛ asɛɛ, ni wɔkɛ gbɛi ni atsɔɔ ni mɛi krokomɛi ni onitsumɔ aaasa amɛhe lɛ hu kɛtsuɔ nii ni amɛnuɔ shishi lɛ atsu nii.
16 Yehowa ji gbɛjianɔtolɔ kɛ toiŋjɔlɛ Nyɔŋmɔ (1 Kor. 14:33, 40) Eyɛ be ni eto ni ekɛbaatsu esuɔmɔnaa nii kɛ eyiŋtoo he nii. (Bɔfoi 1:7) Ejɛ suɔmɔ mli etsɔɔ nibii ni kɔɔ wɔhe akɛ adesai ni yeee emuu lɛ yɛ e-Wiemɔ lɛ mli. Kɛtsɔ gbɛtsɔɔmɔ ni jɛɔ Yesu Kristo ŋɔɔ ni tsɔɔ “tsulɔ anɔkwafo kɛ nilelɔ” lɛ nɔ lɛ, Yehowa kɛ gbɛtsɔɔmɔi ni baaye abua wɔ ni wɔtsu nitsumɔ ni he hiaa fe fɛɛ ni atsuɔ ŋmɛnɛ lɛ kɛgbe naa lɛ eha wɔ. (Mat. 24:45-47; 28: 19, 20; Jaj. 12:13) No hewɔ lɛ kɛ wɔnyiɛ Ŋmalɛ naa ŋaawoi ni anaa yɛ Asafo lɛ woji amli, kɛ nɛkɛ kaimɔi ni eba yɛ ebe naa ni atsɔɔ yɛ nɛkɛ wolo ni aŋma ahɔ eko mli nɛɛ sɛɛ lɛ, wɔbaafee mɛi ni wɔto wɔbe he gbɛjianɔ jogbaŋŋ koni wɔnyɛ wɔgbe wɔsɔɔmɔ lɛ naa kwraa.—2 Tim. 4:5.