Já Yehowa Kome Too Pɛ

 1. Mɛni hewɔ esa akɛ wɔjá Yehowa kome too pɛ lɛ?

ESA akɛ wɔjá Yehowa kome too pɛ, ejaakɛ lɛ ebɔ wɔ ni lɛ ehã wɔ wala. (Kpo. 4:11) Shi kɛ́ wɔkwɛɛɛ ni ahi lɛ, nibii komɛi baahe wɔtsui, ni eyɛ mli akɛ wɔsumɔɔ Yehowa ni wɔbuɔ lɛ moŋ, shi wɔjáŋ ekome too pɛ. Mɛni baanyɛ ahã eba lɛ nakai? Dani wɔbaahã sanebimɔ nɛɛ hetoo lɛ, nyɛhãa wɔkwɛa nɔ ni atsɔɔ kɛ́ akɛɛ wɔjá Yehowa kome too pɛ.

 2. Kɛ́ akɛɛ wɔjá Yehowa kome too pɛ, tamɔ bɔ ni awie yɛ 2 Mose 34:14 lɛ, mɛni etsɔɔ?

² Yɛ Biblia lɛ mli lɛ, kɛ́ akɛɛ mɔ ko jáa Nyɔŋmɔ lɛ, etsɔɔ akɛ mɔ lɛ sumɔɔ Nyɔŋmɔ waa. No hewɔ lɛ, kɛ́ akɛɛ wɔjá Yehowa kome too pɛ lɛ, etsɔɔ akɛ wɔkɛ wɔtsui muu fɛɛ ahã lɛ, ni wɔsumɔ lɛ fe mɔ fɛɛ mɔ kɛ nɔ fɛɛ nɔ.​—Kanemɔ 2 Mose 34:14.

 3. Mɛni hewɔ esa akɛ wɔsumɔ Yehowa?

³ Shi mɛni hewɔ esa akɛ wɔsumɔ Yehowa? Nibii ni wɔkase yɛ ehe lɛ ahewɔ esa akɛ wɔsumɔ lɛ lɛ. Akɛ nɔkwɛmɔnɔ lɛ, wɔkase ni wɔna akɛ, Yehowa yɛ sui kpakpai pii. Agbɛnɛ hu, wɔle nibii ni esumɔɔ kɛ nibii ni esumɔɔɔ, ni wɔbɔɔ mɔdɛŋ akɛ wɔbaasumɔ nibii ni esumɔɔ lɛ ni wɔnyɛ nibii ni enyɛɔ lɛ. Kɛfata he lɛ, wɔle nɔ hewɔ ni ebɔ wɔ, ni wɔbɔɔ mɔdɛŋ akɛ wɔbaahi shi bɔ ni baahã nakai yiŋtoo lɛ aba mli. Wɔle hu akɛ, eŋmɛ wɔ gbɛ ni wɔkɛ lɛ abɔ naanyo, ni wɔbuɔ enɛ akɛ eji hegbɛ kpele. (Lala 25:14) Nɔ fɛɛ nɔ ni wɔkaseɔ yɛ mɔ ni bɔ wɔ lɛ he lɛ hãa suɔmɔ ni wɔyɔɔ kɛhã lɛ lɛ mli waa.​—Yak. 4:8.

 4. (a) Mɛni nɔ Abonsam baanyɛ atsɔ ehã suɔmɔ ni wɔyɔɔ kɛhã Yehowa lɛ he ajɔ? (b) Mɛni he wɔbaasusu yɛ nikasemɔ nɛɛ mli?

⁴ Nibii ni wɔshweɔ lɛ ekomɛi yɛ ni tɔmɔ bɛ he, shi ekomɛi hu yɛ ni wɔle akɛ amɛhiii. Kɛ̃lɛ, Abonsam baanyɛ atsɔ jeŋ fɔŋ nɛɛ ni kã ehewalɛ mli lɛ nɔ ehã nibii ni wɔshweɔ lɛ, nɔ ni hi lɛ jio, nɔ ni ehiii lɛ jio, ahe ahia wɔ fe Yehowa. (Efe. 2:1-3; 1 Yoh. 5:19) Oti ni ma ehiɛ ji, ni ehã nibii nɛɛ ahe wɔtsui koni suɔmɔ ni wɔyɔɔ kɛhã Yehowa lɛ he ajɔ. Yɛ nikasemɔ nɛɛ mli lɛ, wɔbaakwɛ gbɛi enyɔ ni ebaanyɛ etsɔ nɔ eshɛ oti nɛɛ he. Klɛŋklɛŋ lɛ, ebaanyɛ eka wɔ ni wɔyatiu ninámɔ sɛɛ, ni nɔ ni ji enyɔ lɛ, ebaanyɛ elaka wɔ ni wɔkɛ nibii ni esaaa ajie wɔhiɛtserɛ.

 5. Mɛni hewɔ esa akɛ wɔkwɛ jogbaŋŋ ni wɔkatsɔmɔ shikasuɔlɔi lɛ?

⁵ Wɔ fɛɛ wɔmiisumɔ ni wɔná niyenii kpakpa wɔye, atadei kpakpai wɔwo, kɛ he ko kpakpa wɔhi. Shi esa akɛ wɔkwɛ jogbaŋŋ ni wɔkasumɔ shika. Ŋmɛnɛ lɛ, mɛi ni yɔɔ Satan je lɛ mli lɛ ateŋ mɛi babaoo etsɔmɔ “shikasuɔlɔi,” ni heloonaa nibii ehe amɛtsui kɛ amɛjwɛŋmɔ fɛɛ. (2 Tim. 3:2) Yesu le akɛ, kɛ́ esɛɛnyiɛlɔi lɛ kwɛɛɛ ni ahi lɛ, amɛ hu amɛbaatsɔmɔ shikasuɔlɔi. Ewie akɛ: “Mɔ ko nyɛŋ etsɔ nyɔŋ ehã nuŋtsɔmɛi enyɔ; ejaakɛ no lɛ, ebaanyɛ mɔ kome ni ebaasumɔ mɔ kroko lɛ, loo ebaakpɛtɛ mɔ kome he ni ebuŋ mɔ kroko lɛ ehãŋ nɔ ko. Nyɛnyɛŋ nyɛtsɔmɔ nyɔji nyɛhã Nyɔŋmɔ kɛ Ninámɔ fɛɛ.” (Mat. 6:24) Kɛ́ Yehowa jálɔ ko miigbe ehe koni etsɔ niiatsɛ yɛ je nɛɛ mli lɛ, yɛ gbɛ ko nɔ lɛ, eetao esɔmɔ nuŋtsɔmɛi enyɔ, ni enyɛŋ esumɔ Yehowa kɛ etsui muu fɛɛ.

 6. Mɛni Yesu kɛɛ Laodikea asafo lɛ mli bii lɛ? Ni mɛni wɔkaseɔ yɛ mli?

⁶ Yɛ aaafee afi 96 Ŋ.B. lɛ, Laodikea asafo lɛ mli bii shi amɛtsitsi amɛwie akɛ, ‘niiatsɛmɛi ji amɛ ni amɛyɛ nii ni nɔ ko nɔ ko ehiaaa amɛ.’ Shi Yehowa kɛ Yesu na amɛ akɛ mɛi ni ‘miiye awerɛho ni nii yɔɔ mɔbɔ; ohiafoi kɛ shwilafoi kɛ mɛi ni hiɛ amɛhe efolo.’ No hewɔ lɛ, Yesu jaje amɛ, jeee yɛ niiatsɛmɛi ni amɛji lɛ hewɔ, shi moŋ yɛ bɔ ni amɛhã shikasuɔmɔ miifite amɛ kɛ Yehowa teŋ lɛ hewɔ. (Kpo. 3:14-17) Kɛ́ wɔ hu wɔna akɛ shikasuɔmɔ miiba wɔhiɛ lɛ, esa akɛ wɔfee nɔ ko kɛjie nakai susumɔ lɛ oya nɔŋŋ. (1 Tim. 6:7, 8) Kɛ́ wɔfeee nakai lɛ, shika kɛ heloonaa nibii baahe wɔtsui, ni wɔjamɔ lɛ esaŋ Yehowa hiɛ, ejaakɛ eji “Nyɔŋmɔ ni biɔ ni ajá ekome too pɛ.” (5 Mo. 4:24) Shi mɛni baanyɛ ahã wɔsumɔ shika?

7-9. Mɛni okase yɛ asafoŋ onukpa lɛ ni atsɛɔ lɛ David lɛ niiashikpamɔ lɛ mli?

⁷ Naa nyɛmi nuu asafoŋ onukpa ko ni bɔɔ mɔdɛŋ waa, ni yɔɔ United States lɛ niiashikpamɔ. Atsɛɔ lɛ David, ni ewie akɛ no mli lɛ ebɔɔ mɔdɛŋ waa yɛ he ni etsuɔ nii yɛ lɛ. Anɔkwa, etee ehiɛ waa yɛ nitsumɔ lɛ mli, ni ajwere lɛ po akɛ efata mɛi ni bɔɔ mɔdɛŋ waa yɛ nakai nitsumɔ lɛ mli yɛ maŋ muu lɛ fɛɛ mli lɛ ahe. Ewie akɛ: “Nakai beiaŋ lɛ, misusu akɛ jweremɔnii nɛɛ ji Yehowa dɛŋ jɔɔmɔ.” Shi ani eji anɔkwale akɛ Yehowa dɛŋ jɔɔmɔ ni?

⁸ Ebashɛ he ko ni David na akɛ eheloonaa nitsumɔ lɛ miifite ekɛ Yehowa teŋ naanyobɔɔ lɛ fiofio. Ewie akɛ: “Kɛ́ mitee asafoŋ kpeei loo shiɛmɔ po lɛ, be ni mahɛle shi lɛ, miisusu naagbai ni mikɛmiikpe yɛ nitsumɔhe lɛ ahe. Miná shika waa, shi nibii ni hãa mihaoɔ lɛ hu bafa, ni miná naagbai pii yɛ migbalashihilɛ mli.”

⁹ David na akɛ esa akɛ ekwɛ ni ekɛ Yehowa sɔɔmɔ lɛ aye klɛŋklɛŋ gbɛhe ekoŋŋ yɛ eshihilɛ mli. Ewie akɛ: “Mitswa mifai shi waa akɛ matsake.” Ekpɛ eyiŋ akɛ, ebaatse be ni ekɛtsuɔ nii lɛ nɔ, ni ekɛ enɛ yafɔ̃ enitsumɔtsɛ lɛ hiɛ. Ani ole nɔ ni ba? Ashwie lɛ! Shi David hãaa enɛ aje enijiaŋ wui. Ewie akɛ: “Enɔ jetsɛremɔ nɔŋŋ lɛ, miŋmala wolo nɔ nii koni ahã masɔmɔ akɛ gbɛgbalɔi awalɔ ni mifooo mli.” David kɛ eŋa lɛ bɔi shĩai kɛ tsũi amli saamɔ koni amɛná nɔ ko kɛkwɛ amɛhe. Etsɛɛɛ ni ebatsɔ daa gbɛgbalɔ, ni sɛɛ mli lɛ, eŋa hu bafata ehe. Eyɛ mli akɛ mɛi pii ebuuu nitsumɔ ni amɛtsuɔ kɛkwɛɔ amɛhe lɛ moŋ, shi amɛhãaa no agba amɛnaa kwraa. Shika ni baa amɛdɛŋ daa nyɔɔŋ nɔ lɛ shɛɛɛ nɔ ni amɛnáa be ko ni eho lɛ mlijaa nyɔŋma mli ekome po, shi amɛnyɛɔ amɛkɛkwɛɔ amɛhe. Ekã amɛtsui nɔ waa akɛ amɛkɛ Yehowa kɛ e-Maŋtsɛyeli lɛ baaye klɛŋklɛŋ gbɛhe, ni amɛna faŋŋ akɛ, Yehowa kwɛɔ mɛi ni feɔ nakai lɛ.​—Mat. 6:31-33.

10. Mɛni hewɔ esa akɛ wɔhã wɔhiɛ akã wɔtsui he? Ni te wɔbaafee tɛŋŋ wɔfee nakai?

¹⁰ Shikatsɛmɛi ji wɔ jio, ohiafoi ji wɔ jio, ehe miihia ni wɔhã wɔhiɛ akã wɔtsui he koni wɔkatsɔmɔ shikasuɔlɔi. Ekaba kɔkɔɔkɔ akɛ wɔbaahã wɔheloonaa nitsumɔ he ahia wɔ fe Yehowa sɔɔmɔ lɛ. Te obaafee tɛŋŋ ole kɛji okɛ oheloonaa nitsumɔ miiye Yehowa sɔɔmɔ lɛ hiɛ? Obaanyɛ obi ohe akɛ: ‘Ani mifɔɔ miheloonaa nitsumɔ lɛ he susumɔ kɛ́ mitee asafoŋ kpeei loo minyiɛ shiɛmɔ nɔ? Ani be fɛɛ be lɛ, miiye mitsui akɛ, wɔsɛɛ ko lɛ, mihe baafi mi? Ani shika kɛ heloonaa nibii miiwo mi kɛ mihefatalɔ lɛ teŋ béi? Ani mikɛ miishɛɛ baatsu nitsumɔ ko ni mɛi ebuuu, kɛ́ no baahã maná be pii kɛsɔmɔ Yehowa jogbaŋŋ fe bɔ ni mifeɔ amrɔ nɛɛ?’ (1 Tim. 6:9-12) Be ni ojwɛŋɔ sanebimɔi nɛɛ ahe lɛ, hã ehi ojwɛŋmɔ mli akɛ, Yehowa sumɔɔ wɔ, ni ewo mɛi fɛɛ ni kɛ amɛtsui fɛɛ jáa lɛ lɛ shi akɛ, ‘eshiŋ amɛ, ni ekwaŋ amɛ kɔkɔɔkɔ.’ Enɛ hewɔ bɔfo Paulo ŋma akɛ ‘shikasuɔmɔ akaba wɔshihilɛ mli’ lɛ.​—Heb. 13:5, 6.

11. Mɛɛ nɔ kpakpa baanyɛ ajɛ hiɛtserɛjiemɔ mli kɛba? Mɛɛ hewalɛ gbonyo hiɛtserɛjiemɔ ni esaaa baanyɛ aná yɛ wɔnɔ?

¹¹ Yehowa miisumɔ ni wɔná miishɛɛ, ni kɛ́ wɔjie wɔhiɛtserɛ lɛ, wɔnáa miishɛɛ. Biblia lɛ kɛɔ akɛ: “Nɔ kpakpa ko bɛ kɛhã gbɔmɔ fe enɛ, akɛ eye ni enu ni ená nii ni etsuɔ waa lɛ mli ŋɔɔmɔ.” (Jaj. 2:24) Shi, nibii ni mɛi kɛjieɔ amɛhiɛtserɛ yɛ je lɛ mli ŋmɛnɛ lɛ pii yɛ ni baanyɛ aye wɔ awui. Ebaanyɛ efite wɔjeŋba kpakpa lɛ, ni ehã wɔsumɔ nibii ni Nyɔŋmɔ Wiemɔ lɛ wieɔ eshiɔ lɛ loo wɔna amɛ akɛ amɛbɛ hiɛdɔɔ tsɔ.

12. Yɛ nɔ ni awie yɛ 1 Korintobii 10:21, 22 lɛ naa lɛ, mɛni hewɔ esaaa akɛ wɔkɛ nɔ fɛɛ nɔ kɛkɛ jieɔ wɔhiɛtserɛ?

¹² Wɔmiisumɔ ni wɔjá Yehowa kome too pɛ, ni no hewɔ lɛ, ‘wɔnyɛŋ Yehowa okpɔlɔ lɛ kɛ daimonioi akpɔlɔ lɛ fɛɛ nɔ nii wɔye.’ (Kanemɔ 1 Korintobii 10:21, 22.) Bei pii lɛ, kɛ́ okɛ mɔ ko ta okpɔlɔ he nyɛye nii lɛ, belɛ onaanyo ji lɛ. Kɛ́ wɔkɛ nibii ni yiwalɛ, mumɔi kɛshãramɔ, jeŋba sha, loo sui gbohii krokomɛi eyi mli obɔ lɛ jie wɔhiɛtserɛ lɛ, belɛ etamɔ nɔ ni Nyɔŋmɔ henyɛlɔi ehoo nii amɛhã wɔ ni wɔmiiye. Enɛ baaye wɔ awui, ni ebaafite wekukpaa ni yɔɔ wɔ kɛ Yehowa teŋ lɛ hu.

13-14. Mɛɛ gbɛ nɔ Yakobo 1:14, 15 lɛ hãa wɔnaa nɔ hewɔ ni esa akɛ wɔkwɛ jogbaŋŋ yɛ nibii ni wɔkɛjieɔ wɔhiɛtserɛ lɛ ahe? Okɛ enɛ he nɔkwɛmɔnɔ ahã.

¹³ Wɔbaanyɛ wɔkɛ hiɛtserɛjiemɔ ato niyenii he. Yɛ mɛɛ gbɛ nɔ? Wɔbaanyɛ wɔkpɛ wɔyiŋ yɛ nɔ ni wɔbaaye lɛ he. Shi kɛ́ niyenii lɛ ná ebote wɔdaaŋ ni wɔmi pɛ, gbɔmɔtso lɛ diɛŋtsɛ tsaa nɔ ni eshwɛ lɛ nɔ ehãa wɔ, ni egbalaa hewalɛ ni yɔɔ mli lɛ ni ekɛtsuɔ nii. Kɛ́ wɔye niyenii kpakpa lɛ, wɔbaaná gbɔmɔtsoŋ hewalɛ kpakpa, shi kɛ́ wɔyeee niyenii kpakpa lɛ, wɔnáŋ gbɔmɔtsoŋ hewalɛ kpakpa. Ekolɛ wɔnaŋ nɔ ni niyenii lɛ etsu yɛ wɔgbɔmɔtso lɛ mli lɛ amrɔ nɔŋŋ, shi be ni be shwieɔ mli lɛ, wɔbaana.

¹⁴ Nakai nɔŋŋ eji yɛ hiɛtserɛjiemɔ gbɛfaŋ. Wɔyɛ hegbɛ ni wɔhalaa nɔ ni wɔkɛbaajie wɔhiɛtserɛ loo wɔkɛbaawo wɔjwɛŋmɔ mli. Shi kɛ́ ená ebote wɔjwɛŋmɔ mli pɛ, ebaaná bɔ ni wɔsusuɔ nii ahe wɔhãa kɛ bɔ ni wɔnuɔ he wɔhãa yɛ nibii ahe lɛ nɔ hewalɛ. Kɛ́ wɔkɛ nibii kpakpai jie wɔhiɛtserɛ lɛ, wɔbaaná he sɛɛ, shi kɛ́ wɔkɛ nibii gbohii jie wɔhiɛtserɛ lɛ, wɔbaaye wɔhe awui. (Kanemɔ Yakobo 1:14, 15.) Kɛ́ wɔkɛ nibii gbohii jie wɔhiɛtserɛ lɛ, ekolɛ wɔnaŋ awui ni eye wɔ lɛ amrɔ nɔŋŋ, shi be ni be shwieɔ mli lɛ, wɔbaana faŋŋ. Enɛ hewɔ lɛ, Biblia lɛ bɔɔ wɔ kɔkɔ akɛ: “Nyɛkalakaa nyɛhe: Nyɔŋmɔ jeee mɔ ni aliɔ lɛ. Ejaakɛ nɔ fɛɛ nɔ ni gbɔmɔ duɔ lɛ, no nɔŋŋ ebaakpa hu; ejaakɛ mɔ ni duɔ nii ehãa eheloo lɛ baakpa fitemɔ kɛjɛ eheloo lɛ mli.” (Gal. 6:7, 8) Ani enɛ hãaa wɔna nɔ hewɔ ni ehe miihia ni wɔtsi wɔhe kwraa kɛje hiɛtserɛjiemɔ fɛɛ hiɛtserɛjiemɔ ni woɔ nibii ni Yehowa nyɛɔ lɛ ahe hewalɛ lɛ he?​—Lala 97:10.

15. Mɛni Yehowa eke wɔ ni hãa wɔnáa miishɛɛ?

¹⁵ Yehowa tsuji pii sumɔɔ JW Broadcasting^®, ni ji wɔ-TV steshɛŋ ni yɔɔ Intanɛt lɛ nɔ lɛ kwɛmɔ. Nyɛmi yoo ko ni atsɛɔ lɛ Marilyn lɛ wie akɛ: “JW Broadcasting yeɔ ebuaa mi ni mikɛ mijwɛŋmɔ maa nibii kpakpai anɔ, ni akɛni nibii ni ajieɔ yɛ nɔ lɛ fɛɛ hi hewɔ lɛ, ehe ehiaaa ni mihalaa mli. Kɛ́ mihe fee shoo loo mibɛ miishɛɛ lɛ, mikwɛɔ wiemɔ ko loo Leebi Jamɔ nifeemɔ ko ni woɔ mɔ hewalɛ. Kɛ́ mifee nakai lɛ, minuɔ he akɛ mibɛŋkɛ Yehowa kɛ esafo lɛ waa. Eji JW Broadcasting baaa kulɛ, mileee bɔ ni mishihilɛ baafee.” Ani bo hu ooná Yehowa nikeenii nɛɛ he sɛɛ? Daa nyɔɔŋ nɔ lɛ, afeɔ nifeemɔ hee yɛ JW Broadcasting lɛ nɔ, shi kɛfata he lɛ, akɛ vidioi, lalai ni hãa mɔ hemɔkɛyeli mli waa, kɛ nibii krokomɛi ni atswaa aboɔ toi babaoo woɔ nɔ, ni wɔbaanyɛ wɔkwɛ loo wɔtswa wɔbo toi be fɛɛ be ni wɔsumɔɔ.

16-17. Mɛni hewɔ esa akɛ wɔkwɛ be ni wɔfiteɔ yɛ hiɛtserɛjiemɔ he lɛ jogbaŋŋ? Ni te wɔbaafee tɛŋŋ wɔfee nakai?

¹⁶ Jeee nibii ni wɔkɛjieɔ wɔhiɛtserɛ lɛ pɛ esa akɛ wɔkwɛ lɛ jogbaŋŋ; esa akɛ wɔkwɛ be abɔ ni wɔyeɔ yɛ hiɛtserɛjiemɔ he lɛ hu. Kɛ́ wɔkwɛɛɛ ni ahi lɛ, wɔbaafite be pii yɛ hiɛtserɛjiemɔ he fe Yehowa sɔɔmɔ lɛ. Ewa hã mɛi pii akɛ amɛbaaye amɛhe nɔ koni amɛkafite be pii yɛ hiɛtserɛjiemɔ he. Naa nɔ ni nyɛmi yoo ko ni eye afii 18, ni atsɛɔ lɛ Abigail lɛ wie. Ewie akɛ: “Kɛ́ mitsu nii gbi muu fɛɛ ni etɔ mi lɛ, mikwɛɔ TV kɛjɔɔ mijwɛŋmɔ he. Shi bei komɛi lɛ, mihiɛ jeɔ mihe nɔ, ni minyɛɔ mitaa TV lɛ sɛɛ ŋmɛlɛtswai abɔ.” Nyɛmi nuu oblanyo ko ni atsɛɔ lɛ Samuel lɛ hu wie akɛ: “Bei komɛi lɛ, mikwɛɔ vidioi ni sɛɛ kɛlɛɛɛ yɛ Intanɛt lɛ nɔ. Mikɛɔ mihe akɛ makwɛ ekome pɛ, shi be ni mahɛle shi lɛ, ŋmɛlɛtswai etɛ loo ejwɛ ebaho ni mikã he miikwɛ vidioi nɛɛ lolo.”

¹⁷ Mɛni baaye abua bo ni okafite be pii yɛ hiɛtserɛjiemɔ he? Klɛŋklɛŋ lɛ, kwɛmɔ akɛ be enyiɛ ofiteɔ yɛ hiɛtserɛjiemɔ he. Gbɛ kome ni obaanyɛ otsɔ nɔ ona ji, ni obaakɔ otsi kome ni oŋmala be ni oye kɛkwɛ TV, okɛtee Intanɛt lɛ nɔ, loo okɛtswa gemi yɛ ofoŋ loo tablɛti nɔ yɛ nakai otsi lɛ mli lɛ ofɔ̃ shi. Kɛ́ onuɔ he akɛ be ni ofite lɛ fa tsɔ lɛ, kwɛmɔ akɛ obaanyɛ oje gbɛ oto be ohã nibii fɛɛ ni ofeɔ yɛ gbi lɛ mli lɛ lo, ni ofee nakai kɛhã gbii ni yɔɔ otsi lɛ mli lɛ fɛɛ. Too be ohã nibii ni he hiaa lɛ klɛŋklɛŋ, koni no sɛɛ lɛ, oto be kɛhã hiɛtserɛjiemɔ hu. Kɛ́ ofee fɛɛ ogbe naa lɛ, sɔlemɔ okpa Yehowa fai ni eye ebua bo ni okɛ gbɛjianɔ ni oto lɛ atsu nii. Kɛ́ oto onibii ahe gbɛjianɔ nɛkɛ lɛ, obaaná be kɛ hewalɛ kɛhã aŋkro nikasemɔ, weku jamɔ, kɛ asafoŋ kpeeiyaa. Agbɛnɛ hu, obaaná be kɛ hewalɛ kɛsɔmɔ Yehowa yɛ shiɛmɔ kɛ nitsɔɔmɔ nitsumɔ lɛ mli. Kɛfata he lɛ, akɛni okɛ Yehowa eye klɛŋklɛŋ gbɛhe hewɔ lɛ, ohenilee ebuŋ bo fɔ kɛ́ oojie ohiɛtserɛ.

18-19. Mɛni kɛ́ wɔfee lɛ, no baatsɔɔ akɛ wɔmiijá Yehowa kome too pɛ?

¹⁸ Bɔfo Petro wie Satan je lɛ naagbee lɛ kɛ jeŋ hee ni baa lɛ he, kɛkɛ ni ewo ŋaa akɛ: “Mɛi ni asumɔɔ, akɛni nyɛmiimɛ nibii nɛɛ hewɔ lɛ, nyɛbɔa mɔdɛŋ fɛɛ ni nyɛaanyɛ koni yɛ naagbee lɛ ena nyɛ akɛ mɛi ni muji kɛ kpa ko bɛ amɛhe, yɛ toiŋjɔlɛ mli.” (2 Pet. 3:14) Kɛ́ wɔkɛ ŋaa ni ewo nɛɛ tsu nii, ni wɔmia wɔhiɛ wɔba wɔjeŋ jogbaŋŋ, ni wɔjá Yehowa yɛ gbɛ ni etsɔɔ akɛ ajá lɛ lɛ nɔ lɛ, no baatsɔɔ faŋŋ akɛ, wɔkɛ wɔtsui fɛɛ ehã lɛ ni wɔmiijá ekome too pɛ.

¹⁹ Satan kɛ eje lɛ baaya nɔ amɛfee nɔ fɛɛ nɔ ni amɛbaanyɛ kɛka wɔ koni wɔhã nibii krokomɛi ahe ahia wɔ fe Yehowa sɔɔmɔ lɛ. (Luka 4:13) Shi ekɔɔɔ he eko nɔ ni baaba lɛ, wɔhãŋ mɔ ko mɔ ko loo nɔ ko nɔ ko ahe wɔtsui. Wɔtswa wɔfai shi akɛ, wɔkɛ wɔtsui muu fɛɛ baahã Yehowa, ni wɔbaajá ekome too pɛ, ejaakɛ lɛ pɛ esa akɛ ajá!