“Nyɛkayea Nyɛtsuii”
“Nyɛkayea nyɛtsuii; nyɛhea Nyɔŋmɔ nɔ nyɛyea, ni mi hu nyɛhea minɔ nyɛyea.”—YOHANE 14:1.
1. Mɛni hewɔ Yesu wiemɔi ni yɔɔ Yohane 14:1 lɛ ji wiemɔi ni ekɛha yɛ ebe naa pɛpɛɛpɛ lɛ?
GBI LƐ ji Nisan 14 afi 33 Ŋ.B. Gbɔmɛi akuu fioo ko miikpe yɛ ŋwɛitsu ko nɔ yɛ Yerusalem beni hulu enyɔ shi. Amɛhiɛnyiɛlɔ lɛ kɛ shɛɛ wiemɔ kɛ ŋaawoo kɛ hewalɛwoo miiha amɛ. Ewiemɔ lɛ fa ko ji: “Nyɛkayea nyɛtsuii.” (Yohane 14:1) Ewiemɔi lɛ eba yɛ ebe naa pɛpɛɛpɛ, ejaakɛ etsɛŋ nibii ni hosoɔ mɔ baaba. Amɔ lɛ nakai gbɛkɛ lɛ, akojo lɛ, ni abu lɛ fɔ akɛ agbe lɛ.
2. Mɛni hewɔ nakai gbi lɛ he hiaa waa nakai lɛ, ni mɛni ye ebua ekaselɔi lɛ?
2 Obaanyɛ obu nɛkɛ gbi nɛɛ akɛ be ni he hiaa fe fɛɛ yɛ yinɔsane mli, ejaakɛ esaa adesai fɛɛ awɔsɛɛ be he. Hiɛnyiɛlɔ ni ji Yesu afɔleshaa gbele lɛ ha blema gbalɛi pii ba mli ni ekɛ nɔ ni abaadamɔ nɔ akɛ naanɔ wala aha mɛi ni baahe lɛ aye lɛ ha. (Yesaia 53:7; Yohane 3:16) Shi bɔfoi lɛ anaa kpɛ amɛhe ni amɛhiɛ efee amɛ yaa yɛ piŋmɔ ni amɛtsɔ mli nakai gbɛkɛ lɛ hewɔ. Amɛyiŋ futu ni amɛshe gbeyei yɛ be ko mli. Petro po kpoo Yesu. (Mateo 26:69-75) Shi, beni bɔfoi anɔkwafoi lɛ nine shɛ shiwoo yelikɛbualɔ, ni ji mumɔ krɔŋkrɔŋ lɛ nɔ lɛ, amɛna ekaa ni amɛmii shɛ amɛhe. (Yohane 14:16, 17) No hewɔ lɛ, beni Petro kɛ Yohane kɛ shitee kɛ woo ni mli wa kpe ni amɔmɔ amɛ lɛ, amɛsɔle amɛha Nyɔŋmɔ kɛha yelikɛbuamɔ koni “amɛkɛ ekaa babaoo” ashiɛ ewiemɔ lɛ. Aha amɛsɔlemɔ lɛ hetoo.—Bɔfoi lɛ Asaji 4:1-3, 29-31.
3. Mɛni hewɔ gbɔmɛi babaoo ehao waa ŋmɛnɛ nakai lɛ?
3 Ŋmɛnɛ, jeŋ ni ehao babaoo mli wɔyɔɔ nɛɛ. Nibii agbɛjianɔtoo momo nɛɛ naagbee lɛ hiɛ foi kɛmiiba. (2 Timoteo 3:1-5) Gbɔmɛi akpekpei abɔ yɛ ni bɔ ni weku shihilɛ efite ni jeŋba eba shi eha lɛ saa amɛhe aloo amɛhaoɔ waa diɛŋtsɛ hu yɛ helai komɛi ni yɔɔ naakpɛɛ ni baa babaoo, maŋkwramɔŋ shiŋŋfeemɔ ni bɛ, nitsumɔ ni anaaa atsu, hɔmɔ, awuyeli kɛ nuklea tawuu he gbeyeishemɔ lɛ hewɔ. Mɛi pii atsui ekumɔ yɛ wɔsɛɛ be he gbeyeishemɔ hewɔ. Taakɛ Yesu gba fɔ shi lɛ, “Ni jeŋmaji afimɔ lɛ aaaba shikpɔŋ lɛ nɔ ni amɛaafee yeyeeye, . . . Nɔ aaanyɔnyɔɔ gbɔmɛi anɔ yɛ gbeyei kɛ nibii ni baa je lɛŋ lɛ agbɛkwɛmɔ hewɔ.”—Luka 21:25, 26.
4. Mɛni nibii baanyɛ aha Kristofoi ahao kɛ nɔnyɛɛ?
4 Nibii ni haoɔ mɔ nɛɛ baanyɛ asa Kristofoi ahe yɛ gbɛ ni hiɛdɔɔ yɔɔ mli nɔ. Nɔnyɛɛ ba amɛnɔ yɛ amɛjamɔ he jwɛŋmɔ fɔŋ ni anaa aloo shitee-kɛ-woo ni jɛ wekumɛi adɛŋ, nanemɛi adɛŋ, nanemɛi nitsulɔi, nanemɛi skulbii kɛ nɔyeli lɛ mli onukpai adɛŋ hewɔ. (Mateo 24:9) No hewɔ lɛ, te wɔɔfee tɛŋŋ wɔfee dioo, ni wɔkaha nɔ ko miigba wɔnaa yɛ be ni mli wawai nɛɛ amli hu? Te wɔɔfee tɛŋŋ wɔna jwɛŋmɔŋ toiŋjɔlɛ yɛ be mli ni shihilɛ lɛ mli waa lɛ? Te wɔɔfee tɛŋŋ wɔkpee wɔsɛɛ be kɛ hekɛnɔfɔɔ? Mɛni baaye abua wɔ ni wɔye yeyeeye feemɔ ni mli kwɔ ni yaa nɔ agbɛnɛ yɛ be fɛɛ mli lɛ nɔ? Be ni Yesu kɛ ŋaawoo ni yɔɔ Yohane 14:1 lɛ kɛha lɛ mli wɔyɔɔ nɛɛ, no hewɔ lɛ, nyɛhaa wɔtɛjea wɔhiɛ wɔkwɛa nɛkɛ ŋaawoo nɛɛ.
Te Wɔɔfee Tɛŋŋ Wɔye Tsuiyeli nɔ Kunim?
5. Mɛɛ ŋaawoo ni woɔ mɔ hewalɛ Ŋmalɛ lɛ kɛhaa wɔ?
5 Yɛ be mli ni ekɛ hewalɛwoo ni suɔmɔ yɔɔ mli eha amɛ akɛ ‘amɛkaye amɛtsui’ lɛ, Yesu kɛɛ ebɔfoi lɛ akɛ: “Nyɛhea Nyɔŋmɔ nɔ nyɛyea, ni mi hu nyɛhea minɔ nyɛyea.” (Yohane 14:1) Ŋmalɛi ni jɛ mumɔŋ lɛ hu kɛ ŋaawoo ni tamɔ nakai nɔŋŋ haa wɔ: “Shɛ ojatsu lɛ ofɔ Yehowa nɔ, ni lɛ eeehiɛ omli.” “Gbɛ ni onyiɛ nɔ lɛ, ŋɔɔ fɔ Yehowa nɔ, ni oŋɔ ohiɛ hu ofɔ enɔ, ni eeefee.” (Lala 55:22; 37:5) Paulo kɛ ŋaawoo ni hiɛdɔɔ yɔɔ mli nɛɛ ha Filipibii lɛ: “Nyɛkahaoa yɛ nɔ ko nɔ ko he, shi moŋ nɔ fɛɛ nɔ mli lɛ, nyɛkɛ sɔlemɔ kɛ faikpamɔ kɛ shidaa atsia nyɛtutɔmɔi lɛ ata yɛ Nyɔŋmɔ hiɛ; ni Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Kristo Yesu mli.”—Filipibii 4:6, 7.
6, 7. (a) Mɛni ji gbɛ kome ni aaatsɔ nɔ aba haomɔ loo nɔnyɛɛ shi? (b) Te wɔɔfee tɛŋŋ wɔha wekukpaa ni bɛŋkɛ kpaakpa aba wɔkɛ Yehowa teŋ?
6 Tsuiyelii loo yeyeeyefeemɔ ni naagbai kɛ gbɛnaa nii ni tsii kɛbaa lɛ baanyɛ asa wɔgbɔmɔtsoŋ hewalɛnamɔ kɛ agbɛnɛ su ni wɔhiɛ lɛ he yɛ bei komɛi amli. Shi, tsofafeemɔ mli nilelɔ ko ŋma yɛ wolo ni ji Don’t Panic lɛ mli ni ekɛɛ: “Kɛ gbɔmɛi nyɛɔ amɛkɛ mɛi krokomɛi ni amɛyɔɔ bulɛ kɛha amɛ lɛ gbaa amɛnaagbai ahe sane lɛ, . . . ehaa nɔnyɛɛ ni baa mɛi anɔ lɛ shi babaoo.” Kɛji akɛ nɛkɛ sane lɛ ji yɛ sane ni akɛ adesa kroko gbaa lɛ he lɛ, kwɛ bɔ ni ebaafee yelikɛbuamɔ babaoo moŋ akɛ akɛ Nyɔŋmɔ aaawie. Ejaakɛ namɔ po wɔɔnyɛ wɔna bulɛ ni fe fɛɛ wɔha lɛ fe Yehowa?
7 Enɛ hewɔ ni wekukpaa ni bɛŋkɛ kpaakpa ni aaaka Kristofoi kɛ lɛ teŋ ŋmɛnɛ lɛ he hiaa waa nakai lɛ. Yehowa tsuji ni amɛdara yɛ mumɔŋ lɛ le enɛ jogbaŋŋ, no hewɔ lɛ, amɛkwɛɔ jogbaŋŋ koni amɛkwa bɔ ni amɛkɛ je lɛŋ bii aaabɔ aloo hiɛtserɛjiemɔi komɛi ni tamɔ nakai ni aaanyɛ agbɔjɔ wekukpaa ni ka amɛkɛ lɛ teŋ lɛ. (1 Korintobii 15:33) Amɛle bɔ ni ehe hiaa akɛ amɛkɛ Yehowa aaawie yɛ sɔlemɔ mli, jeee shikome aloo shii enyɔ gbi kome, shi shii abɔ. Kristofoi obalaŋtai loo mɛi heei titri ji mɛi ni he hiaa akɛ amɛbaana wekukpaa ni bɛŋkɛ kpaakpa nɛkɛ yɛ amɛkɛ Yehowa teŋ kɛtsɔ daa nikasemɔ kɛ e-Wiemɔ lɛ nɔjwɛŋmɔ nɔ kɛ agbɛnɛ kɛtsɔ Kristofoi anaanyobɔɔ kɛ sɔɔmɔ nɔ. Awoɔ wɔ hewalɛ akɛ: “Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ.”—Yakobo 4:8.
Ŋaawoo Ni Yesu Kɛha
8, 9. Mɛɛ ŋaawoo kpakpa wɔbaanyɛ wɔkɛtsu shika aloo ohia mli naagbai ni baa wɔnɔ lɛ ahe nii?
8 Nitsumɔ ni anaaa atsu kɛ ohia etsɔ haomɔ ni mli wa yɛ maji babaoo nɔ. Yesu kɛ ŋaawoo kpakpa ha yɛ nɛkɛ naagbai nɛɛ ahe: “Nyɛkafea yeyeeye yɛ nyɛwala hewɔ, nɔ ni nyɛaaye kɛ nɔ ni nyɛaanu aloo nyɛgbɔmɔtso lɛ hewɔ, nɔ ni nyɛaawo. Ani wala efeee ŋmaa, ni gbɔmɔtso efeee atade?” (Mateo 6:25) Hɛɛ, susuma lɛ kɛ gbɔmɔtso lɛ, aloo gbɔmɔ muu lɛ fɛɛ he hiaa waa kwraa fe niyenii kɛ atade. Nyɔŋmɔ tsuji baanyɛ ana nɔmimaa akɛ ebaaye ebua amɛ ni amɛnine ashɛ nibii ni he hiaa amɛ lɛ anɔ. Yesu kɛ nɔkwɛmɔ nɔ nɛɛ ha: “Nyɛkwɛa ŋwɛi loofɔji lɛ: amɛduuu nii, asaŋ amɛkuuu, asaŋ amɛbuaaa naa amɛwooo aboŋoi amli; shi nyɛtsɛ ni yɔɔ ŋwɛi lɛ lɛɔ amɛ kɛ. Ani nyɛhiii aaahu fe amɛ?” (Mateo 6:26) Wɔnyɛŋ wɔsusu he akɛ Nyɔŋmɔ kɛ nibii ni he hiaa baaha bɔɔ nii ni yɔɔ tsɛji ni kɛlɛ eku ehiɛ eshwie etsuji ni ji adesai ni jara wa waa kɛha lɛ ni Kristo kɛ ewala fɔ shi eha amɛ lɛ anɔ.
9 Kɛkɛ ni Yesu ma enɛ nɔ mi waa kɛtsɔ ŋa nɔ fɔfɔi ni gbooo deŋme ni asaŋ amɛtseee baa, ni kɛlɛ, “Salomo kɛ enunyam lɛ fɛɛ tete, ewulaaa tamɔ mɛnɛɛmɛi ateŋ mɔ kome” lɛ ni ekɛto he lɛ nɔ. Ale Maŋtsɛ Salomo nɔyeli be lɛ akɛ emli eyi obɔ kɛ anunyam. (Salomo Lalai 3:9, 10) Kɛkɛ ni Yesu kɛ miishɛjemɔ bi akɛ: [Nyɔŋmɔ] efeŋ nɔ ni “fe enɛ kɛhaŋ nyɛ?”—Mateo 6:28-32.
10. (a) Yesu wie ewiemɔi ni shɛjeɔ mɔ mii lɛ etsɔɔ namɛi? (b) Mɛɛ ŋaawoo ekɛha yɛ wɔsɛɛ be he?
10 Shi, Yesu tee nɔ etsɔɔ akɛ enɛ yɛ kɛha mɛi ni “taoɔ maŋtsɛyeli lɛ kɛ ejalɛ lɛ” pɛ. Nɛkɛ anɔkwale Kristofoi ni yɔɔ jeŋ fɛɛ lɛ le nɔ ni Nyɔŋmɔ Maŋtsɛyeli lɛ ji diɛŋtsɛ ni amɛkɛ enɛ yeɔ klɛŋklɛŋ gbɛhe yɛ amɛshihilɛ mli. Kɛha amɛ lɛ, Yesu ŋaawoo lɛ kɔɔ amɛhe akɛ: “Nyɛkahaoa nyɛhe nyɛtoa wɔ; ejaakɛ wɔ diɛŋtsɛ aaahao yɛ enii ahe. Gbi fɛɛ gbi nɔ efɔŋ lɛ fa ha lɛ.” (Mateo 6:33, 34) Yɛ gbɛ kroko nɔ lɛ, tsu naagba fɛɛ naagba ni aaate shi lɛ he nii. Ni kaahao yakatswaa yɛ wɔsɛɛ be he.
11, 12. Mɛɛ gbɛ nɔ Kristofoi komɛi enu he akɛ Yehowa yeɔ ebuaa amɛ kɛtsɔɔ amɛsɔlemɔi ahetoo ni ehaa lɛ nɔ?
11 Shi mɛi pii sumɔɔ ni amɛhao yɛ wɔsɛɛ be he, titri lɛ kɛji akɛ nibii miifite kɛmiiya. Shi Kristofoi baanyɛ, ni esa akɛ amɛtsɔ amɛhe kɛya Yehowa ŋɔ yɛ hemɔkɛyeli mli. Susumɔ Eleanor sane lɛ sane lɛ he. Ewu bɛ hewalɛ kwraa, ni enyɛɛɛ etsu nii afi muu. Yoo nɛɛ yɛ gbekɛbii bibii enyɔ, tsɛ ni egbɔ ni esa akɛ ekwɛ lɛ, no hewɔ lɛ enyɛɛɛ ni ekɛ ebe fɛɛ atsu nii yɛ enɛ hu hewɔ. Amɛsɔle amɛbi Yehowa kɛha yelikɛbuamɔ. Gbi ko leebi, yɛ enɛ sɛɛ be kukuo mli lɛ, amɛna ni wolo kotoku ko ka shinaa lɛ shi. Shika babaoo ko yɛ mli—nɔ ni fa ni baaha amɛya nɔ amɛhi shi kɛyashi be mli ni ewu lɛ aaanyɛ atsu nii ekoŋŋ. Amɛhiɛ esɔ enɛ waa yɛ yelikɛbuamɔ ni eba yɛ ebe naa pɛpɛɛpɛ lɛ he. Nɔ ko bɛ Biblia lɛ mli ni wɔɔdamɔ nɔ wɔkpa gbɛ akɛ nɔ ko ni tamɔ nakai baaba Kristofonyo fɛɛ Kristofonyo ni nɔ ko he hiaa lɛ lɛ nɔ, shi wɔbaanyɛ wɔna nɔmimaa akɛ Yehowa baanu wɔbolɔmɔi lɛ ahe ni akɛ eyɛ nyɛmɔ ni ekɛaaye abua wɔ yɛ gbɛi sɔrɔtoi anɔ.
12 Kristofonyo yoo okulafo ko yɛ Afrika wuoyigbɛ ni ehe bahia ni etao nitsumɔ ni enyɛ ekwɛ ebii bibii enyɔ. Shi eesumɔ waa ni ekɛ gbi fa atsu nii bɔni afee ni ena be ekɛ gbekɛbii lɛ ahi shi. Beni ena nitsumɔ sɛɛ lɛ, anyɛ enɔ ni ekpa nitsumɔ lɛ yɛ be mli ni nitsumɔtsɛ lɛ to eyiŋ akɛ eetao woloŋmalɔ ni kɛ ebe fɛɛ baatsu nii. Akɛni ebɛ nitsumɔ dɔŋŋ hewɔ lɛ, nɛkɛ nyɛmiyoo nɛɛ kɛ hiɛdɔɔ sɔle eha Yehowa kɛha yelikɛbuamɔ. Otsii etɛ sɛɛ lɛ, etsutsu nitsumɔtsɛ lɛ tsɛ lɛ akɛ ebaanyɛ eba ebatsu nii gbi fa taakɛ etaoɔ lɛ. Kwɛ miishɛɛ ni ena! Enu he akɛ Yehowa eha esɔlemɔi lɛ ahetoo.
Nyɛkpaa Yehowa Fai
13. (a) Mɛni ji “faikpamɔ” shishi? (b) Mɛɛ Ŋmalɛ mli nɔkwɛmɔ nii ni kɔɔ faikpamɔ he wɔyɔɔ?
13 Ofainɛ kadimɔ akɛ yɛ be mli ni Paulo ewo ŋaa akɛ, “Nyɛkahaoa yɛ nɔ ko nɔ ko he” lɛ sɛɛ lɛ, ekɛfata he akɛ, “shi moŋ nɔ fɛɛ nɔ mli lɛ, nyɛkɛ sɔlemɔ kɛ faikpamɔ kɛ shidaa atsia nyɛtutɔmɔi lɛ ata yɛ Nyɔŋmɔ hiɛ.” (Filipibii 4:6) Mɛni hewɔ etsi “faikpamɔ” ta lɛ? Wiemɔ lɛ shishi tsɔɔ “nibimɔ kɛ hehiamɔ,” aloo ‘faikpamɔ sɔlemɔ.’ Etsɔɔ hehiamɔ ni akɛkpaa Nyɔŋmɔ fai, tamɔ yɛ haomɔ loo oshara kpeteŋkpele be mli. Beni Paulo ji gbokɛlɛfonyo lɛ ebi enanemɛi Kristofoi lɛ ni amɛsɔle amɛha lɛ koni enyɛ ekɛ ekaa ashiɛ “sanekpakpa lɛ . . . akɛ bɔfo yɛ kɔsɔŋkɔsɔ mli.” (Efesobii 6:18-20) Roma asraafonyo nukpa Kornelio hu “kpaa Nyɔŋmɔ fai daa.” Kwɛ miishɛɛ ni ebaana yɛ be mli ni bɔfo ko kɛɛ lɛ akɛ: “Osɔlemɔi kɛ nijuji ni ofeɔ lɛ eshɛ ŋwɛi ni ebafee kaimɔ nɔ yɛ Nyɔŋmɔ hiɛ”! Ni kwɛ hegbɛ ni ena akɛ eeefee klɛŋklɛŋ Jeŋmajiaŋbii ni akɛ mumɔ krɔŋkrɔŋ lɛ fɔ amɛ mu lɛ ateŋ mɔ ko!—Bɔfoi lɛ Asaji 10:1-4, 24, 44-48.
14. Te wɔɔfee tɛŋŋ wɔle kɛji akɛ Yehowa fai ni wɔkpaa kɛ hiɛdɔɔ lɛ ji nɔ ko ni esa akɛ afee shikome pɛ?
14 Esa kadimɔ jogbaŋŋ akɛ nɛkɛ fai ni akpaa Yehowa lɛ jeee nɔ ni afeɔ lɛ shikome pɛ. Yesu tsɔɔ nii yɛ E-gɔŋ nɔ Shiɛmɔ ni ehe gbɛi lɛ mli akɛ: “Nyɛyaa nɔ nyɛbia, ni akɛaaha nyɛ; nyɛyaa nɔ nyɛtaoa, ni nyɛaana; nyɛyaa nɔ nyɛshia, ni aaagbele aha nyɛ.” (Mateo 7:7, New World Translation.) Biblia mli shishitsɔɔmɔi pii tsɔɔ shishi akɛ: “Nyɛbia . . . nyɛtaoa . . . nyɛshia.” Shi shishijee Hela lɛ hiɛ jwɛŋmɔ ni tsɔɔ nii ni ayaa nɔ afeɔ kɛtsaraa nɔ.
15. (a) Mɛni hewɔ Nehemia fee ehiɛ mɔbɔmɔbɔ yɛ be mli ni ekɛ wein haa Maŋtsɛ Artashasta lɛ? (b) Mɛni ji nɔ ni Nehemia etsɔ hiɛ ewie momo fe sɔlemɔ kuku ko kɛkɛ ni ekɛha?
15 Beni Nehemia sɔmɔɔ Persia maŋtsɛ Artashasta akɛ edaawolɔ lɛ, maŋtsɛ lɛ bi lɛ nɔ hewɔ ni efee ehiɛ mɔbɔmɔbɔ Iɛ. Nehemia kɛɛ akɛ fɛɛ jɛ akɛ enu akɛ Yerusalem ekumɔ ni efite kwraa. Kɛkɛ ni maŋtsɛ lɛ bi akɛ: “Mɛni ji nɔ ni otaoɔ?” Amrɔ nɔŋŋ pɛ kɛkɛ ni Nehemia bi ni Yehowa aye abua lɛ, ŋwanejee ko bɛ he akɛ yɛ be kuku mli, dioo. Kɛkɛ ni ebi ni aŋmɛ lɛ gbɛ ni eku esɛɛ eya Yerusalem ni eyatswa emaŋ ni esumɔɔ ni ekumɔ lɛ ekoŋŋ ema shi. Akpɛlɛ enibimɔ lɛ nɔ. (Nehemia 2:1-6) Shi, dani nakai nibimɔ lɛ aaaba lɛ, no mli lɛ, Nehemia kɛ gbii pii esɔle, ni ekpa Yehowa fai kɛha yelikɛbuamɔ (Nehemia 1:4-11) Ani onaa nikasemɔ ni yɔɔ enɛ mli kɛha bo lɛ?
Yehowa Haa Hetoo
16. (a) Mɛɛ hegbɛ krɛdɛɛ ko Abraham na mli ŋɔɔmɔ? (b) Mɛɛ yelikɛbuamɔ nibii ni mli wa waa wɔyɔɔ ni baanyɛ aye abua wɔ sɔlemɔi ahetoo hamɔ?
16 Be ko lɛ, Abraham na sane ni ekɛ Yehowa gbaa kɛtsɔ ŋwɛibɔfoi anɔ lɛ mli ŋɔɔmɔ. (1 Mose 22:11-18; 18:1-33) Eyɛ mli akɛ ebaaa lɛ nakai ŋmɛnɛ dɔŋŋ moŋ, shi akɛ yelikɛbuamɔ nibii ni yɔɔ hewalɛ ni yɛ no mli lɛ Abraham bɛ lɛ ejɔɔ wɔ. Ekome ji Biblia muu lɛ—gbɛtsɔɔmɔ kɛ miishɛjemɔ jɛɛhe ni etaaa kɔkɔɔkɔ lɛ. (Lala 119:106; Romabii 16:4) Yɛ be babaoo mli lɛ, Biblia lɛ nyɛɔ ekɛ gbɛtsɔɔmɔ loo hewalɛwoo ni he hiaa wɔ lɛ haa wɔ, ni Yehowa yeɔ ebuaa wɔ koni wɔkai wiemɔi lɛ diɛŋtsɛ. Yɛ bei komɛi amli lɛ, wolo ni ato Biblia mli wiemɔi komekomei anaa yɛ mli aloo woji babaoo ni akɛkaseɔ Biblia lɛ ni Yehowa kɛha kɛtsɔ egbɛjianɔtoo lɛ nɔ lɛ baanyɛ ekɛ hetoo lɛ aha wɔ. Nɛkɛ woji nɛɛ amli wiemɔi ni ato fɛɛ naa ni atsɛɔ lɛ index lɛ hu ji wolo kroko ni yeɔ buaa wɔ babaoo. Ni wɔnine shɛɔ saji ni wɔtaoɔ aloo ehe hiaa wɔ lɛ anɔ.
17. Mɛɛ gbɛi krokomɛi anɔ hu Yehowa baanyɛ atsɔ nɔ aha wɔsɔlemɔi ahetoo, ni Kristofoi ni nuɔ nii ahe ni yɔɔ mlihilɛ lɛ baanyɛ aye abua yɛ mɛɛ gbɛ nɔ?
17 Kɛ naagba ko miihao wɔ aloo wɔmiinu awerɛho loo nijiaŋwujee he lɛ, hetoi kɛha sɔlemɔi lɛ hu baanyɛ aba kɛtsɔ gbɛi krokomɛi anɔ. Akɛ nɔkwɛmɔ nɔ lɛ, Biblia mli wiemɔ yɛ asafoŋ kpee shishi aloo Yehowa Odasefoi akpee shishi baanyɛ ahiɛ “tsofa” ni he hiaa wɔ lɛ. Yɛ bei komɛi amli hu lɛ, sane ni wɔkɛ Kristofonyo kroko aaagba lɛ kɛ nɔ ni wɔtaoɔ lɛ baaha wɔ. Asafoŋ onukpai nyɛɔ amɛkɛ hewalɛwoo loo ŋaawoo haa yɛ be babaoo mli. Wɔtsui mli fɛɛ ni wɔɔjɛ wɔfɔse wɔhaomɔi kɛjɛ mli wɔshwie Kristofonyo ko ni eda yɛ mumɔŋ ni mli hi ni nuɔ nii ahe ni eboɔ sane toi jogbaŋŋ nɔ lɛ baanyɛ aha wɔnu he akɛ wɔhe ewa wɔ. Nakai enɛ ji titri lɛ, kɛji akɛ nɛkɛ naanyo nɛɛ yeɔ ebuaa wɔ koni wɔsusu Biblia mli saji ahe. Nɛkɛ sanegbaa nɛɛ baanyɛ ajie jatsu ni tsii kɛjɛ wɔjwɛŋmɔ kɛ wɔtsui mli.—Abɛi 12:25; 1 Tesalonikabii 5:14.
18. Mɛɛ nitsumɔi krɛdɛi baaye abua Kristofoi ni amɛye nɔnyɛɛ loo shihilɛ ni haa amɛnii feɔ mɔbɔ lɛ anɔ kunim, ni eye ebua obalayoo gbɛgbalɔ ko yɛ mɛɛ gbɛ nɔ?
18 Nɔnyɛi ni jɛ haomɔi kɛ naagbai amli efa yɛ nɛkɛ “jaramɔ bei” ni mli wa nɛɛ mli. (2 Timoteo 3:1) Gbɔmɛi anijiaŋ jeɔ wui ni amɛhiɛnɔkamɔ feɔ yaka yɛ yiŋtoi sɔrɔtoi ahewɔ. Enɛ hu baanyɛ aba Kristofoi anɔ, ni ebaanyɛ efee niiashikpamɔ ni eŋɔɔɔ kwraa. Shi amɛteŋ mɛi pii ena akɛ sanekpakpa lɛ shiɛmɔ eye ebua amɛ ni amɛje haomɔi ni baa amɛnɔ yɛ be kukuo mli nɛɛ amli. Ani oka enɛ okwɛ? Kɛ oonu he akɛ ekolɛ obɛ miishɛɛ lɛ, bɔɔ mɔdɛŋ ni okɛ ohe awo Maŋtsɛyeli sɔɔmɔ lɛ eko mli. Mɛi krokomɛi ni okɛ amɛ aaagba Nyɔŋmɔ Maŋtsɛyeli lɛ he sane lɛ baanyɛ aye abua bo yɛ be babaoo mli ni etsake ojwɛŋmɔŋ shikamɔ kɛjɛ nibii ni ejaaa lɛ anɔ kɛya nibii ni ja lɛ anɔ. Yehowa he wiemɔ kɛ e-Wiemɔ lɛ kɛ nitsumɔ baaha ona miishɛɛ—emumɔ lɛ yibii lɛ eko—eha onu he yɛ gbɛ sɔrɔto nɔ. (Galatabii 5:22) Obalayoo gbɛgbalɔ ko hu na akɛ kɛ ekɛ ehe wo Maŋtsɛyeli nitsumɔ lɛ mli vii lɛ eyoɔ akɛ “kɛ ekɛ enaagbai to mɛi anaagbai krokomɛi ahe lɛ, enɔ lɛ bafeɔ bibii ni esɛɛ etsɛɛɛ kwraa.”
19. Yɛ mɛɛ gbɛ nɔ Kristofonyo ko ni bɛ gbɔmɔtsoŋ hewalɛ tsɔ lɛ ye jwɛŋmɔ ni ejaaa lɛ nɔ kunim?
19 Yɛ bei komɛi amli lɛ, hewalɛ ni bɛ, kɛ ekolɛ naagbai loo haomɔi ni fata he lɛ kɛ nɔnyɛɛ baaba mɔ ko nɔ. Enɛ baaha mɔ ko ate shi nyɔɔŋ teŋ ni ehao, taakɛ bɔ ni eba Kristofonyo yoo ko ni eye kɛjɛ afii nyɔŋmai enumɔ kɛyaa ni bɛ gbɔmɔtsoŋ hewalɛ tsɔ lɛ nɔ lɛ. Shi ena akɛ sɔlemɔ ni jɛ tsuiŋ tɔɔ lɛ ji yelikɛbuamɔ nɔ kpele. Be fɛɛ be ni eeete shi ni eeenu he akɛ ehao lɛ, etoɔ etsui shi esɔleɔ ehaa Yehowa. Etsɛɛɛ kɛkɛ lɛ enu he akɛ ehe etse lɛ. Agbɛnɛ enaa akɛ ehe jɔɔ lɛ kɛji akɛ ekai Biblia mli saji ni shɛjeɔ mɔ mii tamɔ nɔ ni yɔɔ Lala 23 lɛ nɛkɛ yɛ ejwɛŋmɔ mli ni eti mli. Nakai nɔŋŋ hu Yehowa mumɔ lɛ, ni tsuɔ wɔsɔlemɔ lɛ he nii aloo etsuɔ nii kɛtsɔɔ e-Wiemɔ lɛ nɔ lɛ baaye abua bo ni ona jwɛŋmɔ hee ni miishɛɛ yɔɔ mli oto nɔ ni eba shi lɛ najiaŋ. Yɛ sɛɛ mli lɛ, gbɔmɔ lɛ baanyɛ ajwɛŋ enaagbai lɛ ahe kɛ jwɛŋmɔ ni ŋmɛɔ pɛpɛɛpɛ ni yɔɔ kpoo, enaa bɔ ni eeefee ni eye nɔ kunim aloo enuɔ he akɛ awaje lɛ koni enyɛ edamɔ naa.
20. Mɛni hewɔ eeenyɛ efee akɛ sɔlemɔi komɛi ahetoo shashaoɔ shi lɛ?
20 Enɛ ji bɔ ni sɔlemɔ hetoo baanyɛ aba lɛ he nɔkwɛmɔ nɔ. Shi yɛ bei komɛi amli lɛ, etamɔ nɔ ni tsabaa lɛ shashaoɔ shi. Mɛni hewɔ? Ekolɛ esa akɛ hetoo lɛ amɛ Nyɔŋmɔ diɛŋtsɛ be ni sa lɛ. Etamɔ nɔ ni yɛ ekomɛi amli lɛ Nyɔŋmɔ ŋmɛɔ gbɛ koni mɛi ni kpaa lɛ fai lɛ ajie bɔ ni amɛjwɛŋɔ nɔ ni amɛwieɔ he lɛ he waa amɛhaa lɛ kpo, bɔ ni nɔ ni amɛshweɔ nɛɛ mli wa ha, bɔ ni amɛhetu-kɛhamɔ lɛ ji anɔkwale ha. Lalatsɛmɛi lɛ ateŋ mɔ ko na niiashikpamɔ ni tamɔ nɛkɛ!—Lala 88:14, 15; okɛto 2 Korintobii 12:7-10 he.
21. Mɛni hewɔ eji hegbɛ kpele akɛ mɔ ko aaaji Yehowa Odasefoi lɛ ateŋ mɔ ko ŋmɛnɛ, ni mɛɛ gbɛ nɔ wɔɔtsɔ wɔjie hiɛdɔɔ kpo yɛ?
21 Yɛ fɛɛ mli lɛ, ni akɛ Nyɔŋmɔ Ofe lɛ aaagba sane yɛ sɔlemɔ mli lɛ ji niiashikpamɔ ni woɔ mɔ hemɔkɛyeli hewalɛ ni baanyɛ awó wɔ nɔ kɛjɛ nijiaŋwujee mli kɛya hekɛnɔfɔɔ mli. Kwɛ bɔ ni wɔmii shɛɔ wɔhe akɛ wɔɔle akɛ eboɔ sɔlemɔi atoi ni ehaa hetoo! Taakɛ Paulo ŋma eyaha asafo ni yɔɔ Filipi lɛ, esa akɛ wɔkɛ wɔsɔlemɔi kɛ faikpamɔi aha “kɛ shidaa.” (Filipibii 4:6) Hɛɛ, esa akɛ wɔgbele wɔtsuii amli yɛ shidaa mli wɔha Yehowa daa gbi ni ‘wɔda shi yɛ nɔ fɛɛ nɔ mli.’ (1 Tesalonikabii 5:18) Nɔ ni baajɛ enɛ mli aba ji ekomefeemɔ ni mli wa ni kɛ toiŋjɔlɛ baaba abaha wɔ. Nikasemɔ ni nyiɛ sɛɛ lɛ tsɔɔ bɔ ni enɛ he hiaa Yehowa tsuji yɛ nɛkɛ haomɔ kɛ oshara bei nɛɛ amli.
[Shishigbɛ niŋmai]
Yɛ bɔ ni New World Translation of the Holy Scriptures lɛ tsɔɔ shishi pɛpɛɛpɛ lɛ kɛ gbeekpamɔ naa lɛ, Charles B. Williams tsɔɔ shishi akɛ: “Nyɛyaa nɔ nyɛbia . . . nyɛyaa nɔ nyɛtaoa . . . nyɛyaa nɔ nyɛshia . . . ni aaagbele shinaa lɛ aha nyɛ.”—The New Testament: A Translation in the Language of the People.
Esoro hiɛ mɔbɔmɔbɔfeemɔ ni ba yɛ be kukuo mli lɛ yɛ nɔnyɛɛ loo haomɔ ni sɛɛ tsɛɔ, ni yɛ be babaoo mli lɛ eji henumɔ loo jwɛŋmɔŋ shihilɛ ko ni hiɛdɔɔ yɔɔ mli lɛ he. Kwɛmɔ Awake! ni akala yɛ October 22, 1987 lɛ, baafa 3-16.
Ajie kɛjɛ February 15, 1988 Watchtower lɛ mli.
◻ Mɛni nibii baaha Kristofoi ahao?
◻ Mɛni baaye ebua wɔ ni wɔye tsuiyeli loo yeyeeyefeemɔ nɔ kunim?
◻ Te Kristofoi aaafee tɛŋŋ ana nɔmimaa akɛ Nyɔŋmɔ baaye abua amɛ ni amɛnine ashɛ amɛhiamɔ nii ni sa Iɛ anɔ?
◻ Mɛni ji “faikpamɔ” shishi, ni mɛɛ gbɛ nɔ tsutsu nɔkwɛmɔ nii Iɛ feɔ bɔ ni Yehowa here enɛɛmɛi anɔ eha Iɛ he mfoniri?
◻ Yehowa baanyɛ aha wɔsɔlemɔi ahetoo yɛ mɛɛ gbɛi sɔrɔtoi anɔ?
◻ [Nikasemɔ lɛ he Sanebimɔi]
[Mfoniri ni yɔɔ baafa 21]
‘Nyɛŋwɛi Tsɛ lɛ lɛɔ loofɔji. Ani nyɛjara waaa fe amɛ?’