Yehowa Mli Hekɛnɔfɔɔ Kɛ Mɔ Yaa Henɔjɔɔmɔ Kɛ Baptisimɔ Mli

“Ŋɔɔ ohiɛ ofɔ Yehowa nɔ ni ofee ekpakpa; hii shikpɔŋ Iɛ nɔ ni oye anɔkwa.”​—LALA 37:⁠3.

 1. Mɛɛ odaseyeli ko ni jɛ gbɔmɛi ni le nii yɛ je lɛŋ gbɛfaŋ lɛ aŋɔɔ eba ni tsɔɔ bɔ ni eji buulufeemɔ akɛ akɛ hiɛ aaafɔ adesai hiɛnyiɛlɔi anɔ?

NAMƆ wɔbaanyɛ wɔkɛ wɔhe afɔ enɔ? Adesai hiɛnyiɛlɔi? Amɛ yinɔsane tsɔɔ akɛ eji kwashiai asane akɛ akɛ he aaafɔ adesa ni yeee emuu nɔ. Ni mɛi ni le nii yɛ je lɛŋ lɛ po yɔseɔ nakai anɔkwa sane lɛ! No hewɔ lɛ, Europa wolo tɛtrɛɛ ko ni wieɔ nitsumɔ mli saji ni ji Vision lɛ kɛɛ be ko akɛ “nɔ ni ehiii kwraa yɛ shihilɛi ni yaa nɔ bianɛ lɛ he ji akɛ mɔ ko mɔ ko enaaa gbɛ ni aaatsɔ nɔ aje mli.” Ni shika he lɛtemɔ he yinɔsane ŋmalɔ Robert Heilbroner kɛɛ akɛ: “Nɔ kroko yɛ ni miigbe wɔ. No ji jwɛŋmɔ ni ahiɛ akɛ mɔ ko bɛ ni kudɔɔ nɔ ko, akɛ mɔ ko mɔ ko bɛ ni awula lɛ jogbaŋŋ ni baanyɛ atsu naagbai ni kuɔ kɛbaa wɔnɔ lɛ ahe nii.”

 2. Mɛni ji nɔ ni abaanyɛ akɛɛ yɛ sɛɛnamɔi ni ejɛ ŋmɛnɛŋmɛnɛ beaŋ jeŋ nilee mli eba lɛ he?

² Eji anɔkwale akɛ gbɔmɛi etee hiɛ babaoo yɛ jeŋ nilee he nitsumɔi amli. Shi ani enɛɛmɛi fɛɛ he eba sɛɛnamɔ? Dabi, amɛhe bako sɛɛnamɔ. Taakɛ niŋmalɔ Lewis Mumford tsɔɔ mli lɛ: “Jwɛŋmɔ ni ahiɛ akɛ tsɔnei kɛ jeŋ nilee mli nɔyaa kɛ adesai asɛɛnamɔi baa lɛ . . . ebafee nɔ ni bɛ mli dɔŋŋ.” Enɛ he nɔkwɛmɔ nɔ ji kɔɔyɔɔ mli ebɔɔ ni nɛɔ tamɔ nu, ni miifite kpaakpoi kɛ faai amli ni agbɛnɛ eeye eebua kɛmiifite tsei akpekpei abɔ lɛ. Agbɛnɛ, mɔbɔ shihilɛ ni je lɛ yɔɔ mli​—awuiyeli, yiwalɛ, efɔŋfeemɔ, tsofai fɔji kɛ nitsumɔ kɛ daatɔɔ ni shwereɔ babaoo kɛ bɔlɛnamɔ mli helai sɔrɔtoi ni gbɛɔ shwaa kɛ shika helɛtemɔ he shihilɛ ni mli ewa waa lɛ​—fɛɛ yeɔ odase akɛ sɛɛnamɔ ko kwraa bɛ he akɛ wɔkɛ wɔhe aaafɔ adesai hiɛnyiɛlɔi lɛ anɔ.

 3. Nyɔŋmɔ Wiemɔ lɛ kɛ mɛɛ ŋaawoo ni kɔɔ he ni esa akɛ wɔkɛ wɔhekɛnɔfɔɔ afɔ lɛ haa wɔ?

³ Nyɔŋmɔ Wiemɔ lɛ woɔ wɔ ŋaa yɛ gbɛ ni ja nɔ akɛ: “Nyɛkaŋɔa nyɛhiɛ nyɛfoa lumɛi loo gbɔmɔ bi ko ni yelikɛbuamɔ ko bɛ edɛŋ lɛ nɔ. Kɛ emumɔ je emli lɛ, ekuɔ esɛɛ kɛyaa esu lɛ mli ekoŋŋ; nakai gbi lɛ nɔŋŋ eyiŋtoi lɛ laajeɔ.” (Lala 146:​3, 4) Kɛ jeee gbɔmɛi lɛ, belɛ, namɔ mɔ wɔbaanyɛ ni wɔkɛ wɔhe afɔ enɔ? Wɔbaanyɛ ni wɔkɛ wɔhe afɔ ŋwɛi kɛ shikpɔŋ Bɔlɔ lɛ nɔ, taakɛ wɔkaneɔ lɛ: “Ajɔɔ gbɔmɔ ni ŋɔɔ ehiɛ efɔɔ Yehowa nɔ, ni Yehowa ji ehiɛnɔkamɔ lɛ.”​—Yeremia 17:⁠7.

Mɛni Hewɔ Esa Akɛ Okɛ Ohiɛ Afɔ Yehowa Nɔ?

 4. Mɛni ji Yehowa sui titrii lɛ, ni amɛkɛ yiŋtoi kpakpai ni wɔɔnyɛ wɔdamɔ nɔ wɔkɛ wɔhiɛ afɔ enɔ haa wɔ yɛ mɛɛ gbɛ nɔ?

⁴ Wɔbaanyɛ ni wɔkɛ wɔhiɛ afɔ Yehowa nɔ yɛ yiŋtoo kpakpai ahewɔ. Klɛŋklɛŋ kwraa lɛ, wɔbaanyɛ ni wɔkɛ wɔhiɛ afɔ enɔ yɛ esui titrii ni ji​—suɔmɔ, nilee, jalɛsaneyeli, kɛ hewalɛ​—kɛ enaakpɛɛ sui krokomɛi lɛ ahewɔ. E-Wiemɔ lɛ maa nɔ mi kɛhaa wɔ akɛ lɛ ji hewalɛ fe fɛɛ tsɛ, ni esabalai lɛ ekome ji “Nyɔŋmɔ Ofe.” (1 Mose 28:⁠3) Mɛɛ nɔdaamɔ nɔ kɛha hekɛnɔfɔɔ enɛ ji! Mɔ ko mɔ ko bɛ ni baanyɛ ate shi awo ni eye omanye, ni mɔ ko mɔ ko bɛ ni baanyɛ afite eyiŋtoi. Agbɛnɛ hu lɛ ji Nilee ni Fe Fɛɛ Tsɛ, ni jeee akɛ ele naagbee kɛ shishijee kɛkɛ, ni wɔsɛɛ be tamɔ wolo ni agbele mli yɛ ehiɛ, shi moŋ lɛ emli nilee kɛ jwɛŋmɔi fɛɛ yɔɔ, taakɛ enibɔɔ nitsumɔi ni yɔɔ naakpɛɛ lɛ yeɔ he odase lɛ. Be ko bako ni etɔ shikome po yɛ bɔ ni ekɛ mɛi yeɔ haa lɛ mli da. (Yesaia 46:​10; Romabii 11:​33-35) Nɔ ni fe nakai lɛ, Yehowa ji mɔ ni sa akɛ akɛ hiɛ fɔɔ enɔ kwraa yɛ gbɛ ni yeɔ emuu nɔ, Nyɔŋmɔ anɔkwafo kɛ anɔkwayelɔ. Enyɛŋ emale. (5 Mose 32:4; Tito 1:2; Hebribii 6:18) Nɔ ni fe fɛɛ lɛ, akɛni suɔmɔ ni pɛsɛmkunya bɛ mli ji esu ni jeɔ kpo titri hewɔ lɛ, akɛɔ yɛ gbɛ ni ja nɔ akɛ: “Nyɔŋmɔ lɛ, suɔmɔ ji lɛ.”​—1 Yohane 4:​8, 16.

 5. Mɛɛ odaseyeli yɔɔ Nyɔŋmɔ Wiemɔ lɛ mli, ni tsɔɔ akɛ eji mɔ ni sa akɛ akɛ he fɔɔ enɔ?

⁵ Bɔ ni Yehowa kɛ adesai yeɔ haa lɛ hu yeɔ Nyɔŋmɔ ofe ni anyɛɔ akɛ hiɛ fɔɔ enɔ, mɔ ni yɔɔ nilee, mɔ ni yeɔ jalɛsane, mɔ ni yɔɔ suɔmɔ lɛ he odase. Mose ma nɔ mi eha Israelbii lɛ akɛ Yehowa toɔ kpaŋmɔ kɛ mɔbɔnalɛ ehaa mɛi ni sumɔɔ lɛ ni amɛyeɔ ekitai anɔ lɛ. (5 Mose 7:⁠9) Yehowa tsɔ hiɛ ebaa Noa ni sheɔ Nyɔŋmɔ gbeyei lɛ kɛ eweku lɛ yi kɛtsɔ Nu Afua kpeteŋkpele lɛ mli. Nyɔŋmɔ jie Lot jalɔ lɛ kɛ ebiyei enyɔ lɛ kɛjɛ Sodom kɛ Gomora la hiɛkpatamɔ lɛ mli. Yɛ sɛɛ mli lɛ, Nyɔŋmɔ jie Israelbii lɛ kɛjɛ Mizraim ni ekɛ Kanaan shikpɔŋ lɛ ha amɛ taakɛ ewo Abraham shi lɛ. (1 Mose 7:​23; 17:8; 19:​15-26) Ni ani Yehowa ejieee Hebribii etɛ ni ashɛrɛ amɛ ashwie la flɔnɔɔ mli lɛ kɛ agbɛnɛ Daniel hu kɛjɛɛɛ jatai abuu mli?​—Daniel 3:​27; 6:⁠23.

 6. Mɛɛ ŋmɛnɛŋmɛnɛ beaŋ odaseyeli yɔɔ ni tsɔɔ akɛ hiɛ ni akɛ fɔɔ Yehowa nɔ lɛ efeee efolo?

⁶ Yehowa ji mɔ ni wɔbaanyɛ wɔkɛ wɔhiɛ afɔ enɔ taakɛ bɔ ni ŋmɛnɛŋmɛnɛ beaŋ Odasefoi lɛ aniiashikpamɔi yeɔ he odase. Akɛ nɔkwɛmɔ nɔ lɛ, Adolf Hitler shwa ni epupuu ehe akɛ mabule Yehowa Odasefoi “ashwiei” lɛ shishi kɛjɛ Germane. Shi moŋ, abule Hitler kɛ e-Nazi kuu lɛ shishi, ni ŋmɛnɛ, nakai Odasefoi akuu lɛ eku ebɔ he shii toi abɔ kɛteke nɔ kɛyashɛ nɔ ni fe 119,000. Agbɛnɛ hu, Yehowa Odasefoi ohai abɔ ahe saji ni aŋmalaa yɛ Buu-Mɔɔ lɛ kɛ ehefatalɔ wolo tɛtrɛɛ ni ji Awake! lɛ mli lɛ yeɔ anɔkwale ni eji akɛ Yehowa ji Nyɔŋmɔ ni wɔbaanyɛ wɔkɛ wɔhiɛ afɔ enɔ lɛ yɛ anɔkwayeli mli lɛ he odase.

Nɔ Hewɔ Ni Mɛi Komɛi Kɛ Amɛhiɛ Efɔɔɔ Yehowa Nɔ

 7. Mɛni hewɔ mɔ aŋkro ko kɛɛ akɛ eji “Yehowa Nikwɛlɔ” lɛ?

⁷ Ni kɛlɛ, kwɛ bɔ ni mɛi fioo pɛ yɔɔ ni kɛ amɛhiɛ fɔɔ Yehowa nɔ ŋmɛnɛ! Mɛi ni amɛkase esui kɛ nitsumɔi lɛ po nyɛɛɛ ni amɛkɛ amɛhiɛ afɔ enɔ. Sane ko ni je kpo yɛ wolo ni ji U.S. Catholic (January 1979) lɛ mli lɛ kɛɔ yɛ mɔ ko ni tamɔ nɛkɛ he: “Beni mɔ ni pɛiɔ saji amli nɛɛ bi nuu lɛ jamɔ ni esumɔɔ lɛ, eha hetoo akɛ, ‘Misusuɔ akɛ Yehowa Nikwɛlɔ.’ Beni abi lɛ akɛ etsɔɔ mli lɛ, ekɛɛ, ‘Miheɔ nɔ ni Yehowa Odasefoi heɔ yeɔ lɛ miyeɔ jogbaŋŋ shi misumɔɔɔ ni mikɛ mihe awo mli.’” Wolo tɛtrɛɛ lɛ mu sane naa akɛ: “Yehowa Odasefonyo ni ejɔɔ ehe nɔ lɛ bɛ nɔ ni ebaahala akɛ ja ekɛ ehe wo mli vii diɛŋtsɛ.”

 8. Mɛɛ shishijee sui komɛi haa mɔ ko feɔ mɔ ni sumɔɔ akɛ ekɛ ehe aaawo Yehowa sɔɔmɔ mli?

⁸ Mɛni hewɔ mɛi komɛi sumɔɔɔ ni amɛkɛ amɛhe woɔ mli lɛ? Ejaakɛ amɛbɛ tsui ni ja lɛ. Esa akɛ mɔ lɛ afee mɔ ni “ajie ato naanɔ wala.” (Bɔfoi lɛ Asaji 13:48) Taakɛ Yesu wie yɛ ebɛbua ni kɔɔ nidulɔ lɛ he lɛ, mɛi ni woɔ yibii lɛ heɔ anɔkwale wiemɔ lɛ amɛwoɔ ‘tsui krɔŋŋ ni hi mli.’ (Luka 8:15) Hɛɛ, anɔkwale lɛ eŋɔɔɔ gbɔmɛi ni yeee anɔkwale lɛ anaa. Shishitoo taomɔ nii ji tsui ni ja. Nyɔŋmɔ Wiemɔ lɛ mli anɔkwale lɛ hu eŋɔɔɔ mɛi ni woɔ amɛhe nɔ lɛ anaa. Heshibaa su he miihia. (Yakobo 4:⁠6) Agbɛnɛ hu, anɔkwale lɛ eŋɔɔɔ mɛi ni susuɔ akɛ nɔ ko he ehiaaa amɛ, mɛi ni buɔ amɛhe jalɔi lɛ anaa. Shi eŋɔɔ mɛi ni amɛmumɔŋ nibii ahe hiaa amɛ, mɛi ni jalɛ he hɔmɔ kɛ kumai yeɔ amɛ ni dɔmɔɔ ntsɔi yɛ nihii nii ni afeɔ yɛ je lɛŋ ŋmɛnɛ lɛ hewɔ lɛ anaa.​—Mateo 5:​3, 6; Ezekiel 9:⁠4.

Hiɛ Ni Akɛfɔɔ Yehowa Nɔ Lɛ Kɛ Mɔ Yaa Henɔjoomɔ Mli

9, 10. (a) Mɛni he hiaa dani mɔ ko anyɛ ekɛ ehiɛ afɔ Yehowa nɔ, ni te mɛi ni hiɛ tsuijurɔ lɛ hereɔ nɔ amɛhaa tɛŋŋ? (b) Nɛkɛ gbɔmɛi nɛɛ naa hemɔkɛyeli yɛ namɛi amli?

⁹ Dani mɔ ko aaanyɛ ni ekɛ ehiɛ afɔ Yehowa nɔ lɛ, esa akɛ enu E-he da. Shi, “te aaafee tɛŋŋ ni amɛaabo amɛtsɛ mɔ ni amɛheko lɛ amɛyeko lɛ? Ni te aaafee tɛŋŋ ni amɛaahe mɔ ni amɛnuko ehe sane lɛ amɛye hu? Ni asaŋ, te aaafee tɛŋŋ ni amɛaanu kɛ shiɛlɔ ko bɛ lɛ?” (Romabii 10:14) Yɛ be mli ni Yehowa tsuji shiɛɔ lɛ, mɛi ni yɔɔ tsuijurɔ lɛ boɔ toi, taakɛ mɛi pii fee yɛ blema Tesalonika lɛ. Paulo ŋma yɛ mɛnɛɛmɛi ahe akɛ: “Beni nyɛnine shɛ Nyɔŋmɔ wiemɔ ni nyɛnu yɛ wɔnaa lɛ nɔ lɛ, nyɛmɔ mli akɛ Nyɔŋmɔ wiemɔ, taakɛ bɔ ni eji hu lɛlɛŋ lɛ, shi jeee akɛ gbɔmɛi awiemɔ ko ni, mɔ hu ni tsuɔ hewalɛ nii yɛ nyɛ ni nyɛheɔ nyɛyeɔ lɛ amli lɛ.”​—1 Tesalonikabii 2:⁠13.

¹⁰ Kɛ amɛkase Yehowa he nii lɛ, nɛkɛ gbɔmɛi ni hiɛ tsui kpakpa nɛɛ naa emli hemɔkɛyeli. Enɛ he miihia, ejaakɛ “kɛ hemɔkɛyeli bɛ lɛ, anyɛŋ Nyɔŋmɔ hiɛ asa; ejaakɛ mɔ ni baa Nyɔŋmɔ ŋɔɔ lɛ, ja ehe eye akɛ eyɛ, ni eji mɛi ni taoɔ esɛɛgbɛ lɛ anyɔmɔwolɔ hu.” (Hebribii 11:⁠6) Nɔ ni he hiaa hu ji hemɔkɛyeli ni aaana yɛ Nyɔŋmɔ Bi lɛ mli. “Ejaakɛ yiwalaheremɔ bɛ mɔ ko mɔ ko mli; ni asaŋ, gbɛi kroko hu bɛ ŋwɛi shishi ni aŋɔha gbɔmɛi ni esa akɛ atsɔ nɔ ahere wɔyiwala”​—hɛɛ, gbɛi ko gbɛi ko bɛ ja Yesu Kristo nɔ lɛ.​—Bɔfoi lɛ Asaji 4:⁠12.

11. Hiɛ ni akɛfɔɔ Yehowa nɔ lɛ baaha mɔ ko anyiɛ mɛɛ ŋaawoo ni bɔfo Petro kɛhaa lɛ sɛɛ?

¹¹ Kɛ mɔ kɛ ehiɛ fɔ Nyɔmɔ Wiemɔ lɛ, Yehowa, kɛ agbɛnɛ e-Bi Yesu Kristo nɔ lɛ, ebaatsirɛ lɛ ni ebo bɔfo Petro ŋaawoo ni ekɛha Yudafoi ni hi shi yɛ ebe lɛ mli lɛ toi: “No hewɔ lɛ nyɛtsakeɔ nyɛtsuiiaŋ, ni nyɛkua nyɛsɛɛ, koni agbe nyɛhe eshai lɛ. Bɔni afee ni hejɔɔmɔ yinɔ ajɛ Nuŋtsɔ lɛ hiɛ aba.” (Bɔfoi lɛ Asaji 3:​19, 20) Kɛ mɔ ko na Yehowa kɛ E-taomɔ nii ahe nilee lɛ, mɔ lɛ kaseɔ eleɔ akɛ nɔ ni Nyɔŋmɔ suɔmɔnaa nii ji kɛha lɛ ji ni ebatsɔ Yesu Kristo sɛɛnyiɛlɔ. Taakɛ Petro wie he lɛ: “Ejaakɛ enɛ nɔŋŋ hewɔ atsɛnyɛ, ejaakɛ Kristo hu na amanehulu ehanyɛ ni ekɛto okadi efɔ shi ehanyɛ, koni nyɛnyiɛ enanemaahei lɛ asɛɛ.” (1 Petro 2:21) Yesu ha nɔ ni yɔɔ mli lɛ fee faŋŋ beni ekɛɛ: “Kɛji mɔ ko miisumɔ akɛ enyiɛɔ misɛɛ lɛ, ha ni ekwa ehe ni ewo esɛŋmɔtso lɛ, ni enyiɛ misɛɛ.” (Mateo 16:24) No tsɔɔ akɛ mɔ lɛ baajɔɔ ehe nɔ eha Yehowa Nyɔŋmɔ koni efee esuɔmɔnaa nii ni enyiɛ Yesu Kristo nanemaa hei asɛɛ.

Henɔjɔɔmɔ Jeee Shiwoo Kroko Kɛkɛ

12. Yɛ mɛɛ gbɛ nɔ akɛ wiemɔ “shiwoo” lɛ fɔɔ nitsumɔ yɛ Kristendom?

¹² Yɛ Kristendom lɛ, wiemɔ “shiwoo” ji wiemɔ ko ni atiɔ mli akɛtsuɔ nii yɛ Kristofonyo ni mɔ ko batsɔɔ lɛ he. No hewɔ lɛ, akɛɔ akɛ Evangelical sɔlemɔ ni yɔɔ U. S. Amerika lɛ “maa shi ni mɔ ko woɔ ehaa Yesu lɛ nɔ mi.” Roma Katolek osɔfo ko wie “Katolek jamɔŋ shiwoo” he. Yɛ be mli ni efaa ehe ni ekɛwoɔ maŋkwramɔŋ lɛ he lɛ, Katolek osɔfo ko kɛɛ be ko akɛ: “Maŋkwramɔŋ ni mikɛ mihe wo lɛ ji (misɔfoyeli) lɛ he shiwoo lɛ mlilɛɛmɔ.” Ni nitsumɔi sɔrɔtoi tswaa adafi akɛ “Wɔwo Mɛi Ni Wɔkɛ Amɛ Yeɔ Jara lɛ Ashi.” Yɛ anɔkwale mli lɛ, belɛ, mɔ ko baanyɛ ni ekɛ shiwoi sɔrɔtoi aha yɛ be kome too lɛ nɔŋŋ mli. Nitsumɔ mli shiwoi, kwasafoŋ shiwoi, maŋkwramɔŋ shiwoi, kɛ jamɔ mli shiwoi.

13. Mɛni yɔɔ henɔjɔɔmɔ kɛha Yehowa lɛ mli?

¹³ Shi, henɔjɔɔmɔ kɛha Yehowa Nyɔŋmɔ lɛ jeee shiwoo kroko. Shiwoo nɛɛ tsɔɔ “gbeekpamɔ aloo yelikɛfuamɔ kɛha nɔ ko feemɔ yɛ wɔsɛɛ be mli.” Shi ni mɔ ko aaajɔo ehe nɔ lɛ tsɔɔ ‘akɛ mɔ lɛ etuu ehe kwraa eha ŋwɛinyo ko loo nitsumɔ krɔŋkrɔŋ ko sɔɔmɔ loo jamɔ.’ Mɛi pii sumɔɔ ni amɛwo shi moŋ, fe ni amɛaajɔɔ amɛhe nɔ. Ni ŋwanejee ko bɛ he akɛ, enɛ hewɔ amɛjamɔ bafeɔ tamɔ lala ko ni atswaa ni anuɔ he yɛ shɔŋŋ lɛ. Eŋɔɔ akɛ aaabo toi shi efiteee nɔ ko nɔ ko ni mɔ ko sumɔɔ diɛŋtsɛ akɛ eeefee.

14. Mɛni hewɔ shiwoo ko kɛkɛ lɛ jeee nɔ ni Yehowa Nyɔŋmɔ kpɛlɛɔ nɔ?

¹⁴ Henɔjɔɔmɔ kɛha Nyɔŋmɔ lɛ feɔ esuɔmɔnaa nifeemɔ lɛ nɔ ni he hiaa fe fɛɛ yɛ shihilɛ mli. Ebiɔ ni mɔ lɛ aye klɛŋklɛŋ kita kɛ nɔ ni da fe fɛɛ, Yesu Kristo kita nɛɛ nɔ, beni ekɛɛ: “Ni suɔmɔ Nuŋtsɔ [Yehowa] o-Nyɔŋmɔ lɛ kɛ otsui fɛɛ kɛ osusuma fɛɛ kɛ ojwɛŋmɔ fɛɛ kɛ onyɛmɔ fɛɛ.” Yesu ma bɔ ni ebiɔ ni asɔmɔ Nyɔŋmɔ kome pɛ lɛ nɔ mi beni ejajeɔ akɛ: “Mɔ ko nyɛŋ nuŋtsɔmɛi enyɔ asɔmɔ; ejaakɛ ekolɛ eeenyɛ mɔ kome ni eeesumɔ mɔ kroko lɛ; aloo eeekpɛtɛ mɔ kome he, m eeegbe mɔ kroko lɛ he guɔ. Nyɛnyɛŋ Nyɔŋmɔ kɛ mamona [nifalɛ] nyɛsɔmɔ.” (Marko 12:​30; Mateo 6:24) Belɛ eka shi faŋŋ akɛ shiwoo ko kɛkɛ jeee nɔ ni Yehowa kpɛlɛɔ nɔ.

Mɛni Hewɔ Nu Mli Baptisimɔ?

15. Mɛɛ okadii Yesu to yɛ Nyɔŋmɔ mli hemɔkɛyeli ni ejajeɔ yɛ mɛi fɛɛ ahiɛ lɛ mli?

¹⁵ Mɛni hewɔ esa akɛ baptisimɔ afee henɔjɔɔmɔ kɛ Nyɔŋmɔ hamɔ he okadi? Kɛ mɔ ko miisumɔ ni etsɔ Yehowa Odasefoi ateŋ mɔ ko lɛ, ebɛ nɔ ni ebaahala yɛ mli. Nakai nɔŋŋ hu eji anɔkwale kɛ eeesumɔ ni ale lɛ akɛ Kristofonyo, Yesu Kristo sɛɛnyiɛlɔ. Yehowa “Odasefonyo Anɔkwafo,” Yesu Kristo to okadi eha enɛ, ejaakɛ abaptisi lɛ yɛ Yordan Faa lɛ mli. Akɛni Yohane miibaptisi eshafeelɔi ni amɛtsake amɛtsui hewɔ lɛ, enuuu nɔ hewɔ ni Yesu sumɔɔ ni abaptisi lɛ lɛ shishi, shi Yesu kɛɛ lɛ akɛ: “Kpɛlɛmɔ kɛkɛ, shi nɛkɛ esa akɛ wɔgbeɔ jalɛ fɛɛ naa.” (Kpojiemɔ 1:5; Mateo 3:​13-17) Nyɔŋmɔ Bi lɛ tsɔ nɛkɛ gbɛ nɔ ejie ehemɔkɛyeli lɛ kpo etsɔɔ yɛ faŋŋ mli kɛtsɔ ehe ni ekɛha Yehowa, ni ekɛto Okadi eha mɛi fɛɛ ni sumɔɔ akɛ amɛaafee ŋwɛi suɔmɔnaa nii lɛ.

16. Mɛɛ famɔ Yesu kɛha esɛɛnyiɛlɔi lɛ yɛ baptisimɔ he, ni mɛni tsɔɔ akɛ ekaselɔi lɛ bo nakai famɔ lɛ toi?

¹⁶ Nɔ ni fe nakai lɛ, beni eshwɛ fioo ni eeeku esɛɛ kɛaaya e-Tsɛ ni yɔɔ ŋwɛi lɛ ŋɔɔ lɛ, Yesu fa esɛɛnyiɛlɔi lɛ akɛ: “Nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ mumɔ krɔŋkrɔŋ lɛ gbɛi amli, ni nyɛtsɔɔ amɛ ni amɛye nii fiaa ni mikɛɛnyɛ lɛ nɔ.” (Mateo 28:​19, 20) Nɔ ni aŋma afɔ shi yɛ Bɔfoi lɛ Asaji lɛ mli lɛ tsɔɔ akɛ Yesu kaselɔi lɛ kɛ ekaa bo nakai famɔ lɛ toi.​—Bɔfoi lɛ Asaji 2:​40, 41; 8:​12; 9:​17, 18; 19:⁠5.

17. Mɛni hewɔ nu kɛkɛ ni atsɔɔ ashwaa mɔ ko yiteŋ lɛ nyɛŋ afee baptisimɔ ni yeɔ emuu lɛ?

¹⁷ Mɛɛ gbɛ nɔ atsɔ abaptisi mɛnɛɛmɛi yɛ? No ji ni atsɔ nu kɛkɛ ashwa amɛyiteŋ, taakɛ afeɔ yɛ Kristendom sɔlemɔi babaoo mli lɛ? Dabida kwraa! Beni abaptisi Yesu sɛɛ lɛ, ‘efa kpo kɛjɛ nu lɛ mli eje kpo.’ Enɛ tsɔɔ yɛ faŋŋ mli akɛ amii lɛ nu yɛ nu mli. (Marko 1:​9, 10) Yɛ anɔkwale mli lɛ, nɔ ko nɔ ko bɛ ni baanyɛ afee baptisimɔ, ejaakɛ hela wiemɔ ni atsɔɔ shishi akɛ “baptize” (abaptisi) lɛ tsɔɔ “ni akɛwo nu mli, akɛhɔ mli.”​—Bɔfoi lɛ Asaji 8:​36-39.

18. Mɛni hewɔ numiimɔ ji mɔ lɛ henɔjɔɔmɔ kɛha Yehowa lɛ he okadi ni sa lɛ?

¹⁸ Nɛkɛ baptisimɔ nɛɛ ji henɔjɔɔmɔ he okadi ni sa. Nu lɛ shishi ni akɛ mɔ woɔ lɛ feɔ bɔ ni gbɔmɔ lɛ egbo kɛha etsutsu jeŋba lɛ he okadi. Enɔ ni awoɔ kɛjɛɔ nu lɛ mli lɛ feɔ enɔ ni awoɔ kɛbaa wala shihilɛ hee mli he okadi. Taakɛ bɔ ni yookpeemɔ he gbɛjianɔtoo yeɔ buaa ni ehaa ayemforo wu kɛ eŋa lɛ nuɔ amɛkpeemɔŋ shihilɛ lɛ shishi lɛ, nakai nɔŋŋ hu numiimɔ yɛ Odasefoi pii ahiɛ lɛ hu haa enɛ kaa mɔ ni abaptisiɔ lɛ lɛ jwɛŋmɔ mli kwraa. Ŋwanejee ko bɛ he: Yɛ baptisimɔ nifeemɔ Iɛ hewɔ lɛ, esa akɛ mɔ lɛ henɔjɔɔmɔ kɛha Yehowa lɛ aka mɔ lɛ jwɛŋmɔ mli kɛ ekaimɔ mli akɛ nifeemɔ ni he hiaa fe fɛɛ yɛ mɔ lɛ shihilɛ mli. Ekadiɔ tsakemɔ be kɛmiijɛ mɔ diɛŋtsɛ he ni esɔmɔɔ kɛmiiya Yehowa Nyɔŋmɔ sɔɔmɔ he.

19. Mɛni ji yiŋtoo kroko ni haa abaptisiɔ mɔ?

¹⁹ Nyɛkahaa wɔkua wɔhiɛ wɔshwieɔ anɔkwale ni eji akɛ nu mli baptisimɔ ji taomɔ nii kɛha henilee kpakpa ni anaa yɛ Yehowa hiɛ lɛ nɔ. Afee enɛ faŋŋ yɛ 1 Petro 3:​21, ni kaneɔ akɛ: “No nɔŋŋ agbɛnɛ ehereɔ wɔ hu wɔyiwala yɛ baptisimɔ ni akɛ no to he okadi lɛ mli, nɔ ni jeee hewolo nɔ muji jiemɔ, shi moŋ eji henilee kpakpa kpaŋmɔ ni akɛ Nyɔŋmɔ kpaŋɔ, kɛtsɔ Yesu Kristo shitee lɛ nɔ.”

Mɛɛ Afi Ayeɔ Dani Abaptisiɔ Mɔ?

20. Mɛni hewɔ fufɔbii nyɛŋ afee mɛi ni sa kɛha baptisimɔ lɛ?

²⁰ Yesu wiemɔ ni yɔɔ Mateo 28:​19, 20 lɛ tsɔɔ akɛ mɛi ni afee amɛ kaselɔi lɛ ji mɛi ni esa akɛ abaptisi amɛ. No hewɔ lɛ, no tsɔɔ akɛ anyɛŋ abaptisi fufɔoo loo gbekɛ bibioo yɛ Ŋmalɛ naa taomɔ nii kɛha baptisimɔ lɛ naa. Fufɔoo nyɛŋ ana Nyɔŋmɔ Wiemɔ lɛ, Nyɔŋmɔ ni ji Bɔlɔ kɛ e-Bi Yesu Kristo mli hemɔkɛyeli. Fufɔoo loo gbekɛ bibioo nyɛŋ anu shishi akɛ mumɔ krɔŋkrɔŋ lɛ ji Nyɔŋmɔ nifeemɔ loo nitsumɔ hewalɛ; ni enyɛŋ eshwa ehe kɛjɛ etsutsu eshai ahe ni ewo shi loo eka kita kɛ hiɛdɔɔ akɛ ebaafee Nyɔŋmɔ suɔmɔnaa nii.

21. Ani eja gbɛ akɛ aaabaptisi obalaŋtai?

²¹ Shi etamɔ nɔ ni Yehowa webii lɛ ateŋ mɛi komɛi efee keketee yɛ gbɛ kroko nɔ hu tsɔ. Fɔlɔi ni ji Kristofoi pii haa amɛbii mɛɔ yɛ be kakadaŋŋ mli kɛyashiɔ be mli ni amɛmiihe amɛbɛŋkɛ afii nyɔŋmai enyɔ dani ahaa amɛleɔ baptisimɔ he sane lɛ yɛ klɛŋklɛŋ kwraa. Wɔnuɔ yɛ be kɛ bei amli akɛ obalaŋtai pii jɔɔ amɛhe nɔ yɛ gbɛ ni ja nɔ yɛ amɛ diɛŋtsɛ amɛmɔdɛŋbɔɔ naa. Akɛ nɔkwɛmɔ nɔ lɛ, onukpa ko binuu ni yeko afii nyɔŋma lɛ miisumɔ waa ni abaptisi lɛ. No hewɔ lɛ, etsɛ kɛ onukpai kɛ gbekɛ lɛ susu sanebimɔi ni asaa ato aha mɛi ni sumɔɔ ni amɛna baptisimɔ lɛ he.a Bɔ ni amɛmu sane naa ji akɛ eyɛ mli akɛ gbekɛ lɛ edako bɔ ni sa moŋ, shi eji mɔ ni sa akɛ abaptisiɔ lɛ akɛ Yehowa Nyɔŋmɔ sɔɔlɔ ni ahala lɛ. Mɛi ni tee Gbɛgbamɔ Sɔɔmɔ Skul ni afee yɛ Bahamas nyɛsɛɛ nɛɛ lɛ shishi ji he fɛɛ sɔɔlɔi enyɔ ni yɔɔ biyoo ni eye afii nyɔŋma ni abaptisi lɛ!

22. Kɛ fɔlɔi tswa Kristofoi asui amɛwo amɛbii amli lɛ, mɛni amɛbaanyɛ amɛkpa gbɛ kɛjɛ amɛbii lɛ adɛŋ?

²² No hewɔ lɛ wɔnaa yɛ enɛ mli akɛ fɔlɔi komɛi ebɔɔɔ he mɔdɛŋ. Nɛgbɛ amɛkɛ ‘nibii ni la nyɛŋ asha’ tsuɔ nii ni amɛkɛtswaa Kristofoi asu kɛ baŋ yɛ amɛbii amli lɛ kɛyashɛɔ? (1 Korintobii 3:​10-15) Klɛŋklɛŋ kwraa lɛ, nakai feemɔ biɔ ni Yehowa jamɔ krɔŋŋ lɛ afee nɔ ni he hiaa fe fɛɛ yɛ fɔlɔi lɛ ashihilɛ mli. Kɛfata he lɛ, esa akɛ fɔlɔi lɛ abo ŋaawoo fɛfɛo ni akɛha yɛ 5 Mose 6:​6, 7 kɛ Efesobii 6:4 lɛ toi. Nɔ ni baajɛ mli aba ji akɛ ekolɛ ehe baahia ni fɔlɔi lɛ atsi amɛbii lɛ anaa koni akabaptisi amɛ mra tsɔ, moŋ fe ni ehe baahia akɛ aaatsɔɔ amɛ nii yɛ sɛɛ mli.

23. Kɛ mɔ ko shɛ henɔjɔɔmɔ kɛ baptisimɔ he lɛ, mɛni ekoŋŋ abiɔ yɛ edɛŋ?

²³ Yɛ be mli ni mɔ ko ejie ehe kpo akɛ ekɛ ehiɛ fɔɔ Yehowa nɔ kɛtsɔɔ henɔjɔɔmɔ kɛ nu mli baptisimɔ nɔ lɛ, esa akɛ eya nɔ ejie nakai hekɛnɔfɔɔ lɛ kpo. Nikasemɔ ni nyiɛ sɛɛ ni ji, “Sɔɔmɔ Akɛ Yehowa Nanemɛi Nitsulɔi Ni Kɛ Amɛhiɛ Fɔɔ Enɔ,” lɛ baaye abua wɔ ni wɔyoo nɔ ni kɔɔ enɛ he.b

[Shishigbɛ niŋmai]

Te Obaaha Hetoo Oha Tɛŋŋ?

◻ Mɛɛ anɔkwa aaji maa bɔ ni eji buuluianifeamɔ akɛ wɔkɛ wɔhiɛ aaafɔ adesai anɔ Iɛ nɔ mi?

◻ Mɛni hewɔ Yahowa sui kɛ bɔ ni akɛ mɛi yeɔ haa Iɛ haa wɔnaa yiŋtoo kpakpa nɔ ni wɔɔdamɔ wɔkɛ wɔha afɔ

◻ Mɛni hewɔ wɔhiɛ ni wɔkɛfɔɔ Yehowa nɔ Iɛ biɔ henɔjɔɔmɔ shi jeee shiwoo ko kɛkɛ lɛ?

◻ Te fɔlɔi aaafee tɛŋŋ ni amɛtɛo suɔmɔ ni amɛbii aana akɛ amɛaajɔɔ amɛhe nɔ amɛha Yehowa yɛ mra be mli Iɛ amɛwo amɛmli?

[Mfoniri ni yɔɔ baafa 19]

Wɔbaanyɛ ni wɔkɛ wɔhiɛ afɔ Yehowa nɔ akɛ Kpɔlɔ Kpeteŋkpele