Yitso 44

Ahum Kpeteŋkpele ko ni Aha Efee Dioo

YESU etsu nii babaoo yɛ gbi lɛ mli, ni mɛi babaoo ni etsɔɔ amɛ nii yɛ ŋshɔ lɛ naa kɛ ekaselɔi lɛ ni yɛ sɛɛ mli lɛ etsɔɔ amɛ abɛbua lɛ shishi yɛ teemɔŋ lɛ fata he. Beni je na lɛ, ekɛɛ: “Nyɛhaa wɔfoa ŋshɔ lɛ kɛyaa esɛɛ gbɛ.”

Nɔ ni yɔɔ Galilea Ŋshɔ lɛ boka gbɛ ji kpokpaa ni atsɛɔ lɛ Dekapolis lɛ, ni ejɛ Hela wiemɔ deʹka, ni eshishi ji “nyɔŋma,” kɛ poʹlis, ni shishi ji “maŋ” lɛ mli. Dekapolis maji lɛ ji Hela kusumii ashikwɛ̃ɛ hei, eyɛ mli akɛ ŋwanejee ko bɛ he akɛ Yudafoi pii ashihilɛ he hu ji jɛmɛ. Shi kɛlɛ, nii fioo ko pɛ Yesu tsu yɛ nɛkɛ kpokpaa nɛɛ nɔ. Ni yɛ esaramɔ lɛ mli po, taakɛ wɔbaana yɛ sɛɛ mli lɛ, aŋmɛɛɛ lɛ gbɛ ni esɛɛ atsɛ yɛ jɛmɛ.

Beni Yesu kɛɛ ekaselɔi lɛ ni amɛha ashi kɛya ŋshɔ lɛ sɛɛ gbɛ lɛ, amɛkɛ lɛ bote lɛlɛ mli kɛtee. Shi kɛlɛ, mɛi na amɛ beni amɛshiɔ jɛmɛ lɛ. Etsɛɛɛ kɛkɛ ni mɛi krokomɛi hu bote amɛlɛji amli koni amɛyafata amɛhe. Jɛmɛ kɛ ŋshɔ lɛ sɛɛ jɛkɛɛɛ. Yɛ anɔkwale mli lɛ, Galilea Ŋshɔ lɛ tamɔ kpaakpo agbo ko ni ekɛlɛ aaafee shitoi 13 ni he ni lɛɛ fe fɛɛ lɛ aaafee shitoi 7 1/2.

Shishinumɔ yɛ he akɛ etɔ Yesu waa. No hewɔ lɛ, ni amɛbote lɛlɛ lɛ mli ni amɛyi gbɛ nɔŋŋ kɛkɛ ni eyaka lɛlɛ lɛ sɛɛ gbɛ, ni etsɔle sune ko, ni eho ewɔ vii. Bɔfoi lɛ ateŋ mɛi babaoo ji amlakui ni yɔɔ niiashikpamɔ, ni amɛhɛ aahu yɛ Galilea Ŋshɔ lɛ mli. No hewɔ lɛ amɛ amɛkudɔɔ lɛlɛ lɛ kɛyaa.

Shi gbɛfaa nɛɛ eyafeee nɔ ni yɔɔ mlɛo. Akɛni kɔɔyɔɔ ni tswaa yɛ kpaakpo ni baa shi fe ŋshɔ hiɛ kwɔlɛ aaafee ninetalɔi 700 lɛ hiɛ lɛ mli edɔ fioo, ni kɔɔyɔɔ ŋanii hu tswaa kɛjɛɔ gɔji ni bɛŋkɛ jɛmɛ lɛ anɔ kɛbaa hewɔ lɛ, bei komɛi lɛ kɔɔyɔɔ ni naa wa tswaa kɛkpelekeɔ shi kɛbaa ni ehaa ahum tswaa trukaa yɛ kpaakpo lɛ hiɛ. Nakai ji bɔ ni ba agbɛnɛ. Etsɛɛɛ kɛkɛ ni ŋshɔkei lɛ bɔi lɛlɛ lɛ tswaa waa ni ebɔi mli yaa, ni enɛ ha amɛbɔi fɔɔ. Shi kɛlɛ, Yesu tee nɔ ewɔ!

Amlakui ni yɔɔ niiashikpamɔ nɛɛ tsu nii waa koni amɛkɛkudɔ lɛlɛ lɛ. Ŋwanejee ko bɛ he akɛ amɛkudɔ lɛlɛ yɛ ahum mli da. Shi yɛ enɛ mli lɛ bɔ ni amɛbaanyɛ amɛfee fɛɛ amɛfeɔ lɛ. Akɛni amɛmiishe gbeyei akɛ amɛwala baaŋmɛɛ amɛ hewɔ lɛ, amɛtsiɛ Yesu. Amɛbolɔ akɛ: ‘Nuŋtsɔ, ani osusuuu wɔhe? Wɔmiishiu! Heremɔ wɔ, shi wɔbaagboi!’

Beni ewo ehe nɔ lɛ, Yesu fa kɔɔyɔɔ lɛ kɛ ŋshɔ lɛ akɛ: “Bu onaa ni ofee diŋŋ.” Kɛkɛ ni ahum lɛ kpa tswaa ni ŋshɔ lɛ hu ŋmɛ diŋŋ. Kɛkɛ ni etsɔ ehiɛ ni ebi kaselɔi lɛ akɛ: ‘Mɛɛba nyɛsheɔ gbeyei nɛkɛ? Ani nyɛbɛ hemɔkɛyeli ko kwraa?’

Enɛ hewɔ lɛ, gbeyei sɔrɔto ko mɔmɔ ekaselɔi lɛ. Ni amɛbibii amɛhe akɛ: ‘Namɔ diɛŋtsɛ ji nuu nɛɛ? Ejaakɛ efaa kɔɔyɔɔ lɛ kɛ nui lɛ, ni amɛboɔ lɛ toi.’

Mɛɛ hewalɛ Yesu jie kpo nɛkɛ! Kwɛ bɔ ni ehaa wɔ nɔmimaa akɛ wɔɔle akɛ wɔ-Maŋtsɛ lɛ yɛ hewalɛ yɛ adebɔɔ mli nibii anɔ, ni akɛ kɛji ekɛ ejwɛŋmɔ fɛɛ ma wɔ shikpɔŋ nɛɛ nɔ yɛ e-Maŋtsɛyeli nɔyeli be lɛ mli lɛ, mɛi fɛɛ baahi shi shweshweeshwe ni amɛsheŋ adebɔɔ mli osharai agbeyei!

Beni ahum lɛ kpa tswaa lɛ sɛɛ be fioo ko lɛ, Yesu kɛ ekaselɔi lɛ yashɛ ŋshɔ lɛ bokagbɛ naabu lɛ shweshweeshwe. Ekolɛ ahaaa lɛji krokomɛi lɛ kɛ ahum ni naa wa nɛɛ akpe ni no ha amɛku amɛsɛɛ amɛtee shia shweshweeshwe. Marko 4:35–5:1; Mateo 8:18, 23-27; Luka 8:22-26.

▪ Mɛni ji Dekapolis lɛ, ni nɛgbɛ eyɔɔ?

▪ Mɛɛ adebɔɔ mli nibii komɛi haa ahum ni naa wa tswaa yɛ Galilea Ŋshɔ lɛ hiɛ lɛ?

▪ Beni kaselɔi lɛ na akɛ amɛ hesaa yɛ lɛlɛ kudɔmɔ mli lɛ nyɛŋ ahere amɛyiwala lɛ, mɛni amɛfee?