Yitso 27

Mateo Tsɛmɔ Lɛ

BENI Yesu tsa nuu ni ekumɔ lɛ sɛɛ lɛ, eshi Kapernaum ni etee Galilea Ŋshɔ lɛ naa. Ni gbɔmɛi asafo babaoo ba eŋɔɔ ekoŋŋ, ni ebɔi amɛ nitsɔɔmɔ. Beni enyiɛ gbɛ kɛyaa lɛ, ena Mateo, ni atsɛɔ lɛ akɛ Levi hu lɛ, ni eta toohelɔi anitsumɔ he lɛ. Bɔ ni Yesu fɔ nine ekɛtsɛ lɛ ji akɛ: “Nyiɛmɔ misɛɛ.”

Ekolɛ, Mateo le Yesu tsɔɔmɔi lɛ jogbaŋŋ momo, taakɛ bɔ ni Petro, Andrea, Yakobo kɛ Yohane le momo beni atsɛ amɛ lɛ. Ni Mateo hu kpɛlɛ tsɛmɔ lɛ nɔ, tamɔ amɛ hu amɛfee lɛ nɔŋŋ. Kɛkɛ ni ete shi, ni eshi nitsumɔ ni ka enɔ akɛ toohelɔ lɛ efɔ shi, ni enyiɛ Yesu sɛɛ.

Yɛ sɛɛ mli lɛ, Mateo ŋmɛ okpɔlɔ kpele ko yɛ eshia lɛ, ekolɛ koni ekɛye tsɛmɔ ni enine eshɛ nɔ lɛ he gbijurɔ. Ni Mateo tsutsu nanemɛi lɛ hu ba jɛmɛ, kɛfata Yesu kɛ E-kaselɔi lɛ ahe. Yɛ bei babaoo mli lɛ, nɛkɛ hii nɛɛ ananemɛi Yudafoi lɛ ebuuu amɛ ejaakɛ amɛheɔ too amɛhaa Roma nɔyelɔi ni amɛnyɛɔ amɛ lɛ. Ni kɛfata he lɛ, amɛkɛ shishiumɔ heɔ shika babaoo yɛ gbɔmɛi lɛ adɛŋ fe too ni sa akɛ amɛwo lɛ.

Ni Farisifoi lɛ na Yesu kɛ mɛi ni tamɔ nɛkɛ yɛ okpɔlɔŋmɛɛ lɛ shishi lɛ, amɛbi ekaselɔi lɛ akɛ: “Mɛɛ hewɔ nyɛtsɔɔlɔ lɛ kɛ toohelɔi kɛ eshafeelɔi yeɔ nii lɛ?” Ni sanebimɔ lɛ fo Yesu toi naa lɛ, eha Farisifoi lɛ ahetoo akɛ: “Mɛi ni yɔɔ hewalɛ lɛ, tsofatsɛ he ehiaaa amɛ, shi moŋ mɛi ni heɔ yeɔ lɛ. Shi nyɛyaa ni nyɛyakasea nɔ ni ji enɛ shishi: ‘Mɔbɔnalɛ mitaoɔ, ni jeee afɔle!’ Ejaakɛ mibaaa jalɔi atsɛmɔ, shi eshafeelɔi moŋ ni amɛtsake amɛtsui.”

Etamɔ nɔ ni Mateo fɔ nine etsɛ nɛkɛ toohelɔi nɛɛ kɛba eshia koni amɛbabo Yesu toi ni amɛnine ashɛ mumɔŋ tsamɔ nɔ. No hewɔ lɛ Yesu kɛ amɛ bɔ bɔni afee ni eye ebua amɛ ni amɛna amɛkɛ Nyɔŋmɔ teŋ wekukpaa kpakpa. Yesu kpooo gbɔmɛi nɛɛ, taakɛ bɔ ni Farisifoi ni buɔ amɛhe jalɔi lɛ feɔ lɛ. Shi moŋ, akɛni niiahenumɔ ni eyɔɔ kɛha amɛ lɛ tsirɛ lɛ hewɔ lɛ, esɔmɔ akɛ mumɔŋ tsofatsɛ kɛha amɛ.

Enɛ hewɔ lɛ, bɔ ni Yesu jie mɔbɔnalɛ kpo etsɔɔ eshafeelɔi lɛ etsɔɔɔ akɛ ekɛ amɛhe eshai lɛ kpaa gbee shi moŋ eji nakai mɔbɔnalɛ henumɔ ni ejie kpo etsɔɔ mɛi ni he yeɔ yɛ heloo mli lɛ nɔŋŋ kpojiemɔ. Akɛ nɔkwɛmɔ nɔ lɛ, kaimɔ be mli ni ekɛ musuŋtsɔlɛ kpa enine mli ni eta kpitiyelɔ lɛ he, ni ekɛɛ lɛ akɛ: “Miisumɔ. Ohe atse” lɛ. Eba akɛ wɔ hu wɔɔjie musuŋtsɔlɛ kpo wɔtsɔɔ kɛtsɔ mɛi ni ehia amɛ lɛ ni wɔɔye wɔbua amɛ lɛ nɔ, ni titri lɛ koni wɔye wɔbua amɛ yɛ mumɔŋ. Mateo 8:3; 9:9-13; Marko 2:13-17; Luka 5:27-32.

▪ Nɛgbɛ Mateo yɔɔ beni Yesu na lɛ lɛ?

▪ Mɛni ji Mateo nitsumɔ, ni mɛni hewɔ Yudafoi krokomɛi lɛ ebuuu amɛ lɛ?

▪ Mɛɛ wiemɔ ko awie ashi Yesu, ni te eha hetoo tɛŋŋ?

▪ Mɛni hewɔ Yesu kɛ eshafeelɔi lɛ bɔ lɛ?