Yitso 47

Yaafonui Tsɔ Miishɛɛ Babaoo

BENI Yairo na akɛ atsa yoo ni la hoɔ lɛ lɛ hela lɛ, ŋwanejee ko bɛ he akɛ hekɛnɔfɔɔ ni eyɔɔ yɛ Yesu naakpɛɛ hewalɛ lɛ mli lɛ mli bawa. Mra mli yɛ gbi lɛ mli lɛ, Yairo bi Yesu ni ebaye ebua ebiyoo ni eye afii 12, ni heɔ agbo lɛ. Shi, agbɛnɛ, nɔ ni Yairo sheɔ he gbeyei lɛ ba mli. Beni Yesu yaa nɔ ekɛ yoo lɛ wieɔ lolo lɛ, hii komɛi ba ni amɛbakɛɛ Yairo blɛoo akɛ: “Obiyoo lɛ egbo; mɛɛba ogbaa tsɔɔlɔ lɛ naa lolo?”

Kwɛ bɔ ni adafitswaa nɛɛ kumɔɔ mɔ tsui ehaa! Susumɔ he okwɛ: Nuu nɛɛ, ni abuɔ lɛ waa yɛ maŋ lɛ mli nɛɛ nyɛɛɛ ehe nɔ ko efee yɛ be mli ni enu akɛ ebiyoo lɛ egbo lɛ. Shi, Yesu nu sane ni akɛɔ lɛ lɛ. No hewɔ lɛ, etsɔ ehiɛ ni ekɛ hewalɛwoo kɛɛ Yairo akɛ: “Kaashe gbeyei; he oye kɛkɛ.”

Yesu fata nuu ni awerɛho emɔ lɛ waa nɛɛ he kɛku sɛɛ kɛtee eshia. Beni amɛshɛ lɛ, amɛna akɛ jɛmɛ efee hoo kɛ yaafo kɛ bolɔmɔ. Mɛi babaoo ebua amɛhe naa, ni amɛmiigbala amɛhe mai kɛ yaafo. Beni Yesu bote shia lɛ mli lɛ, ebi akɛ: “Mɛɛba nyɛfee hoo ni nyɛfoɔ nɛkɛ? Gbekɛ lɛ gboko, shi wɔ ewɔɔ.”

Beni amɛnu enɛ lɛ, gbɔmɛi lɛ bɔi Yesu ŋmɔɔ kɛ fɛoyeli ejaakɛ amɛle akɛ gbekɛyoo lɛ egbo diɛŋtsɛ. Shi kɛlɛ, Yesu kɛɛ wɔ ewɔɔ. Ekɛ hewalɛ ni Nyɔŋmɔ kɛha lɛ lɛ baatsu nii ni ekɛtsɔɔ akɛ abaanyɛ atsiɛ gbɔmɛi ahiɛ kɛjɛ gbele mli taakɛ bɔ ni abaanyɛ atsiɛ amɛhiɛ kɛjɛ wɔ mli ni ewaaa kwraa lɛ.

Agbɛnɛ Yesu ha ashwie mɛi lɛ fɛɛ kɛtee agbo lɛ naa ni ashi Petro, Yakobo, Yohane, kɛ gbekɛyoo lɛ nyɛ kɛ etsɛ pɛ. Kɛkɛ ni ekɛ mɛi enumɔ nɛɛ tee he ni gbekɛyoo lɛ ka lɛ. Yesu mɔ gbekɛyoo lɛ nine mli ni ekɛɛ: “Talʹi·ta kuʹmi,” ni eshishi ji: “Gbekɛyoo, miikɛɛo akɛ: Tee shi!” Kɛkɛ ni amrɔ nɔŋŋ ni gbekɛ lɛ te shi ni ebɔi nyiɛmɔ! Nɔ ni efɔlɔi lɛ na nɛɛ ha amɛyiŋ futu amɛ kɛ miishɛɛ kpele.

Beni efa akɛ aha gbekɛ lɛ niyenii sɛɛ lɛ, Yesu fa Yairo kɛ eŋa lɛ akɛ amɛkagba mɔ ko mɔ ko nɔ ni ba lɛ. Shi nɔ ni Yesu kɛɛ amɛ nɛɛ fɛɛ sɛɛ lɛ, nii nɛɛ he sane gbɛ kɛtee jɛi kpokpai lɛ fɛɛ nɔ. Enɛ ji gbohiiashitee lɛ ateŋ nɔ ni ji enyɔ ni Yesu fee. Mateo 9:18-26; Marko 5:35-43; Luka 8:41-56.

▪ Mɛɛ sane abakɛɛ Yairo, ni mɛɛ gbɛ nɔ Yesu wo lɛ hewalɛ yɛ?

▪ Te nibii yaa nɔ tɛŋŋ yɛ be mli ni amɛshɛ Yairo shia lɛ?

▪ Mɛni hewɔ ni Yesu kɛɛ akɛ gbekɛ ni egbo lɛ miiwɔ lɛ?

▪ Namɛi ji mɛi enumɔ ni fata Yesu he ni ye shitee lɛ he odase lɛ?