Yitso 48

Yairo Shia lɛ Shimɔ kɛ Nazaret Yaa Ekoŋŋ

ETƆ Yesu waa yɛ gbi lɛ mli—efa gbɛ kɛtsɔ ŋshɔ hiɛ kɛjɛ Dekapolis maji lɛ amli, etsa yoo ni la hoɔ lɛ lɛ hela lɛ, ni etee Yairo biyoo lɛ shi. Shi gbi lɛ bako naagbee. Ŋwanejee ko bɛ he akɛ beni Yesu shiɔ Yairo shia lɛ shwilafoi enyɔ nyiɛ esɛɛ, amɛmiibolɔ akɛ: “Naa wɔ mɔbɔ, David Bi!”

Akɛni amɛtsɛ Yesu akɛ “David Bi” hewɔ lɛ, nɛkɛ hii nɛɛ miitsɔɔ hemɔkɛyeli akɛ Yesu ji David maŋtsɛsɛi lɛ gboshiniyelɔ, ni no hewɔ lɛ lɛ ji Mesia ni awo shi yɛ ehe lɛ. Shi kɛlɛ, Yesu efooo bolɔmɔ ni amɛbolɔɔ kɛha yelikɛbuamɔ lɛ mli, ekolɛ koni ekɛka amɛ ekwɛ akɛ amɛaaya nɔ lolo lo. Shi hii lɛ anijiaŋ ejeee wui. Amɛnyiɛ Yesu sɛɛ kɛtee he ni etoɔ lɛ, ni beni ebote shia lɛ mli lɛ, amɛnyiɛ esɛɛ kɛtee.

Jɛmɛ ni Yesu bi amɛ akɛ: “Nyɛheɔ nyɛyeɔ akɛ manyɛ enɛ mafee lo?”

Amɛkɛ hiɛnɔkamɔ ha hetoo akɛ: “Hɛɛ, Nuŋtsɔ.”

No hewɔ lɛ, Yesu ta amɛhiŋmɛii ahe ni ekɛɛ: “Bɔ ni nyɛheɔ nyɛyeɔ lɛ, afee nakai aha nyɛ.” Amrɔ lɛ nɔŋŋ ni amɛna nii! Kɛkɛ ni Yesu bɔ amɛ kɔkɔ waa akɛ: “Nyɛkakwɛa ni mɔ ko miile.” Shi akɛni mlifilimɔ eyi amɛ obɔbɔ hewɔ lɛ, amɛku amɛhiɛ amɛshwie Yesu famɔ lɛ nɔ ni amɛwie ehe yɛ kpokpaa lɛ nɔ fɛɛ.

Beni mɛi nɛɛ shi nɔŋŋ lɛ, mɛi komɛi kɛ nuu ko ni daimonio yɔɔ emli ni daimonio lɛ haaa enyɛ ewie ba eŋɔɔ. Yesu fa daimonio lɛ, kɛkɛ ni amrɔ nɔŋŋ ni nuu lɛ bɔi wiemɔ. Ni mɛi babaoo ni yɔɔ jɛmɛ lɛ naa kpɛ amɛhe yɛ naakpɛɛ nii nɛɛ ahe ni amɛkɛɛ: “Anako nɛkɛ nɔ ko pɛŋ yɛ Israel!”

Farisifoi lɛ hu yɛ jɛmɛ. Amɛnyɛŋ amɛkpoo naakpɛɛ nii lɛ, shi amɛkɛ amɛyitsoŋwalɛ ni haaa amɛhe lɛ amɛye lɛ wie amɛshi Yesu yɛ ehewalɛ nitsumɔi lɛ ajɛɛhe lɛ he, ni amɛkɛɛ: “Daimonioi alumɔ lɛ naa efaa daimonioi lɛ!”

Yɛ nɛkɛ nibii nɛɛ asɛɛ etsɛɛɛ lɛ, Yesu ku esɛɛ etee emaŋ yɛ Nazaret, ni yɛ nɛkɛ be nɛɛ mli lɛ ekaselɔi lɛ fata ehe. Aaafee afi ni tsɔ hiɛ lɛ mli lɛ, eyasara kpee he lɛ ni eyatsɔɔ nii yɛ jɛmɛ. Eyɛ mli akɛ kɛjɛ shishijee lɛ gbɔmɛi lɛ nya ewiemɔi ni ŋɔɔ lɛ ahe moŋ, shi sɛɛ mli lɛ amɛmli fu yɛ etsɔɔmɔi lɛ ahewɔ, ni amɛbɔ mɔdɛŋ ni amɛgbe lɛ. Agbɛnɛ Yesu kɛ mɔbɔnalɛ bɔ mɔdɛŋ shikome ekoŋŋ ni eye ebua etsutsu nanemɛi lɛ.

Eyɛ mli akɛ yɛ hei komɛi lɛ mɛi babaoo baa Yesu ŋɔɔ moŋ, shi biɛ nɛɛ lɛ amɛfeee nakai. No hewɔ lɛ, etee kpee he lɛ ni eyatsɔɔ nii yɛ jɛmɛ yɛ Hejɔɔmɔ Gbi lɛ nɔ. Mɛi ni nu ewiemɔi lɛ anaa kpɛ amɛhe. Amɛbi akɛ: “Nɛgbɛ mɔ nɛ yana nilee kɛ hewalɛ nii nɛɛ kɛjɛ? Ani jeee ŋaalɔ lɛ bi lɛ nɛ? Ani jeee enyɛ atsɛɔ Maria, kɛ enyɛmimɛi hii Yakobo kɛ Yosef kɛ Simon kɛ Yuda lɛ? Ni enyɛmimɛi yei lɛ, ani jeee amɛ fɛɛ amɛkɛ wɔ yɔɔ? Nɛgbɛ mɔ nɛ yana nii nɛɛ fɛɛ kɛjɛ mɔ?”

Ni amɛsusu amɛyiŋ akɛ: ‘Yesu ji nuu folo ko kɛkɛ tamɔ wɔ nɔŋŋ. Wɔle beni eda, ni wɔle eweku hu. Te aaafee tɛŋ ni efee Mesia lɛ hu?’ No hewɔ lɛ yɛ odaseyeli—enilee kpele kɛ naakpɛɛ nii lɛ—fɛɛ sɛɛ lɛ, amɛkpoo lɛ. Akɛni amɛle lɛ waa hewɔ lɛ, enɛ ha ewekumɛi lɛ diɛŋtsɛ po anaji tɔtɔ, no hewɔ lɛ Yesu mu sane naa akɛ: “Akpaaa gbalɔ woo, akɛ ja emaŋ kɛ ewekumɛi ateŋ kɛ ewe kɛkɛ.”

Lɛlɛŋ, Yesu naa kpɛ ehe yɛ hemɔkɛyeli ni amɛbɛ nɛɛ hewɔ. No hewɔ lɛ efeee naakpɛɛ nii ko yɛ jɛmɛ akɛ ja helatsɛmɛi fioo ko ni ekɛ eniji shwie amɛnɔ ni etsa amɛ lɛ pɛ kɛkɛ. Mateo 9:27-34; 13:54-58; Marko 6:1-6; Yesaia 9:7.

▪ Mɛni shwilafoi lɛ tsɔɔ akɛ amɛheɔ amɛyeɔ kɛtsɔ tsɛmɔ ni amɛtsɛ Yesu akɛ “David Bi” lɛ nɔ?

▪ Mɛɛ sane naatsɔɔmɔ Farisifoi lɛ kpɛlɛ nɔ kɛha naakpɛɛ nii ni Yesu fee lɛ?

▪ Mɛni hewɔ eji mɔbɔnalɛ nifeemɔ akɛ Yesu aaaku esɛɛ eya ni eyawa mɛi ni yɔɔ Nazaret lɛ?

▪ Te ahere Yesu nɔ yɛ Nazaret aha tɛŋŋ, ni mɛni hewɔ?