YESU—Namɔ Ni?
JE LƐŊ woji ni wieɔ Yesu he lɛ faaa. Shi, ekomɛi yɛ, ni The Encyclopaedia Britannica lɛ kɛɔ nɛkɛ yɛ ehe: “Nɛkɛ saji ni ajɛ he kroko awie nɛɛ yeɔ odase akɛ mɛi ni teɔ shi woɔ Kristojamɔ yɛ blema bei lɛ amli lɛ po ejeee yinɔsane mli gbɔmɔ ni Yesu ji, ni niŋmalalɔi babaoo je he ŋwane yɛ klɛŋklɛŋ be mli kwraa yɛ nibii ni yeee emuu tsɔ nɔ yɛ afii ohai 18 lɛ naagbee, kɛ agbɛnɛ yɛ afii ohai 19 lɛ mli kɛ agbɛnɛ yɛ afii ohai 20 lɛ shishijee lɛ he ŋwane.”
Agbɛnɛ bi ohe sane nɛɛ, Kɛji akɛ Yesu shihilɛ lɛ ji adesa ko lɛ, kulɛ ani eeenyɛ eba akɛ eeehi shi aahu kɛbashi afi ohai 18 lɛ mli koni abayoo enɛ? Agbɛnɛ susumɔ anɔkwale ni eji akɛ gbɔmɛi fe akpekpei akpe kɛɔ akɛ amɛji Yesu sɛɛnyiɛlɔi ŋmɛnɛ lɛ he okwɛ. Hewalɛ ni enitsɔɔmɔ lɛ ena yɛ kusumii, tsɔsemɔ kɛ nɔyeli nɔ—yɛ jeŋ yinɔsane gbɛ fɛɛ nɔ—lɛ ji nɔ ko ni anyɛŋ aje he ŋwane. Ani etamɔ nɔ ni shishinumɔ yɛ mli akɛ aaakɛɛ akɛ enɛɛmɛi fɛɛ jɛ nɔ ko ni bɛ shishifa tamɔ adesa?
Kɛji akɛ Islam shishitolɔ lɛ, ni ji Arabia gbalɔ Muhammad ji gbɔmɔ diɛŋtsɛ lɛ, mɛɛ yiŋtoo ni damɔ shi shiŋŋ wɔyɔɔ ni wɔkɛaahe wɔye akɛ Yesu Kristo, Kristojamɔ shishitolɔ lɛ jeee gbɔmɔ pɔtɛɛ? Ekolɛ ehi shi afii 600 dani Muhammad ba, shi kadimɔ akɛ Buddhajamɔ shishitolɔ, Siddhartha Gautama—Buddha, aloo “Nilelɔ Lɛ”—hi shi po dani eba, fe afi 500 dani Yesu ba. Ni kɛlɛ, kɛji akɛ Buddha ji gbɔmɔ pɔtɛɛ lɛ, mɛni nɔ wɔɔdamɔ ni wɔhe wɔye akɛ jeee nakai Yesu ji?
Germany yinɔsaneŋmalɔ kɛ shitsaa kɛ blema nibii ataolɔ Hans Einsle ŋma akɛ Yudanyo yinɔsaneŋmalɔ Flavius Josephus, Roman niŋmalalɔi Suetonius kɛ Pliny, kɛ titri lɛ Roman yinɔsaneŋmalɔ Tacitus “fɛɛ maa yinɔsane mli gbɔmɔ ni Yesu ji lɛ kɛ anɔkwalei titrii ni kɔɔ eshihilɛ he lɛ nɔ mi.”
Ani Efe Gbɔmɔ Folo ko Kɛkɛ?
Yesu hi shi—shi akɛ mɛni? Mɛi komɛi kɛɔ akɛ eji gbɔmɔ folo ko kɛkɛ, eyɛ mli akɛ amɛkpɛlɛɔ nɔ akɛ eeenyɛ efee mɔ ni le nii waa, ni ji mɔ ni wieɔ anɔkwale. Ehenyɛlɔi ni hi shi yɛ klɛŋklɛŋ afii oha lɛ mli lɛ po kpɛlɛ nɔ nakai, akɛ: “Tsɔɔlɔ, wɔle akɛ anɔkwafo jio, ni okpaaa gbɔmɛi amli; ejaakɛ okwɛɛɛ gbɔmɛi ahiɛŋtsei anɔ, shi moŋ otsɔɔ Nyɔŋmɔ gbɛ lɛ yɛ anɔkwale mli.”—Marko 12:13, 14.
Shi mɛi krokomɛi susuɔ akɛ Yesu fe gbɔmɔ folo ko kɛkɛ. Mɛni hewɔ? Ejaakɛ, nɔ kome ji akɛ, enyɛɔ efeɔ nibii ni adesai foji nɛɛ nyɛɛɛ afee. Akɛ nɔkwɛmɔ nɔ lɛ, ani okɛ mɔ ko ekpe ni nyiɛ nui anɔ pɛŋ, ni haa nu tsɔɔ wein, kɛ loi bibii enyɔ kɛ aboloi akwaabɔi enumɔ lɛ gbɔmɛi 5,000, ni gbeleɔ shwilafoi ahiŋmɛii, aloo eteɔ gbohii ashi?—Mateo 14:25, 26; Marko 8:22-25; Yohane 2:1-11; 6:1-13; 11:30-44.
Yesu baanyɛ ayoo nibii ni adesai nyɛŋ ayoo. Beni yoo ko kɛɛ lɛ akɛ ebɛ wu lɛ, Yesu ha hetoo akɛ: “Ojogbaŋŋ okɛɛ akɛ: Mibɛ wu lɛ; ejaakɛ ogbã wumɛi enumɔ, ni mɔ ni ogbaa agbɛnɛ nɛɛ, jeee owu ji lɛ.” Yoo lɛ naa kpɛ ehe ni emu sane naa akɛ: “Nuŋtsɔ, miina akɛ gbalɔ jio.” (Yohane 4:16-19) Kɛha bɔ ni Yesu tsɔ hiɛ ena bɔ ni Petro baakwa lɛ lɛ he nɔkwɛmɔ nii lɛ, kwɛmɔ Luka 22:31-34, 54-62.
Yesu yɛ hegbɛ ko ni yɔɔ naakpɛɛ. Eha gbɔmɛi anaa “kpɛ amɛhe yɛ enitsɔɔmɔ lɛ hewɔ, ejaakɛ eetsɔɔ amɛ nii akɛ mɔ ni yɔɔ hegbɛ, shi jeee tamɔ woloŋmalɔi lɛ.” (Marko 1:22) Agbɛnɛ, Yesu ha “ekaselɔi nyɔŋma kɛ enyɔ lɛ . . . mumɔi fɔji lɛ anɔ hegbɛ akɛ amɛfamɔ amɛ ni amɛtsa hela fɛɛ hela kɛ hejaramɔ fɛɛ hejaramɔ.”—Mateo 10:1.
Ani Wɔbaanyɛ Wɔhe Amaniɛbɔi lɛ Wɔye?
Shi obaakɛɛ akɛ, ‘Mɛɛ fioo. Ani enyɛŋ eba akɛ awo nibii ni Yesu fee lɛ ahe tsɔ?’ Belɛ jeee F. F. Bruce, Biblia Wiemɔ-kɛ-shimɔi kɛ Emlitsɔɔmɔ lɛ he nilelɔ yɛ University of Manchester ni ekpa nitsumɔ ni ŋma nɛkɛ lɛ: “Anyɛɛɛ atsɔ yinɔsane mli naataomɔi anɔ afee anɔkwale ni blema niŋmai amli nɔ fɛɛ nɔ ji lɛ he nɔkwɛmɔ nɔ jogbaŋŋ, kɛ yɛ Biblia lɛ mli aloo esɛɛ. Efa akɛ aaanyɛ ana hekɛnɔfɔɔ ko yɛ anɔkwafo ni nimŋalɔ lɛ ji lɛ mli; kɛ anyɛ ama enɛ nɔ mi lɛ, enyɛɔ ebaa akɛ emlitsɔɔmɔ lɛ feɔ anɔkwale. . . . Enyɛŋ eba akɛ Kpaŋmɔ Hee lɛ baafee nɔ ni anyɛɛɛ akɛ he afɔ eyinɔsane nɔ akɛni Kristofoi kpɛlɛ nɔ akɛ wolo ni yɔɔ ‘krɔŋkrɔŋ’ hewɔ.”
Nɔ fɛɛ nɔ wieɔ haa Sanekpakpa lɛ ŋmalalɔi lɛ akɛ anyɛɔ akɛ he fɔɔ amɛnɔ. Eyɛ mli akɛ bɔ ni amɛtsɔɔ amɛgbalaa sane mli amɛhaa lɛ yɛ sɔrɔto yɛ bei komɛi amli moŋ, shi amɛteee shi amɛwooo mɔ ko, taakɛ bɔni odasefoi enyɔ ni ena oshara ko yɛ gbɛjegbɛ nɔ lɛ eteee shi wooo amɛhe kɛ mɔ ko kɛɛ akɛ kar tsuru ni jɛ abɛku gbɛ lɛ bashi kar ko ni tamɔ baa ŋmɔŋ ni miiba kɛmiijɛ ninejurɔ gbɛ lɛ, yɛ be mli ni mɔ kroko lɛ kɛɔ akɛ Mercedes kar ni miiho wuoyigbɛ lɛ yashi Renault kar ni miiho kooyigbɛ lɛ. Yɛ anɔkwale ni eji akɛ sɔrɔtofeemɔi bibii yɔɔ Sanekpakpa lɛ amli lɛ maa nɔ mi waa akɛ amɛji anɔkwale. Eji amɛŋmalalɔi lɛ miisumɔ ni amɛlaka mɛi ni amɛhe adesa ko amɛye kulɛ, kulɛ amɛbaaha amɛsaji ni amɛŋmala lɛ fɛɛ akɛɛ nɔ kometoo lɛ nɔŋŋ.
Yesu henyɛlɔi lɛ po fi amaniɛbɔi ni kɔɔ ehe lɛ sɛɛ akɛ eji anɔkwale. Wɔkaneɔ akɛ: “Akɛ mumui ko ni daimonioi yɔɔ emli ba eŋɔɔ. Ni beni efa daimonioi lɛ, mumui lɛ wie. . . . Shi Farisifoi lɛ kɛɛ: ‘Daimonioi alumɔ lɛ naa efaa daimonioi lɛ!’” (Mateo 9:32-34) Kadimɔ akɛ Farisifoi lɛ ejeee ŋwane akɛ Yesu efee naakpɛɛ nii. Amɛkpoo kɛkɛ akɛ amɛaakɛɛ akɛ nyɛmɔ ni akɛfeɔ nakai lɛ jɛ Nyɔŋmɔ mumɔ krɔŋkrɔŋ lɛ nitsumɔ.
Odaseyeli kroko ni tsɔɔ akɛ saji ni aŋmala ni kɔɔ Yesu he lɛ ji anɔkwale, lɛ ji anɔkwalei ni eji akɛ, kɛ anyiɛ shishitoo mlai ni yɔɔ etsɔɔmɔi lɛ mli lɛ asɛɛ lɛ, etsuɔ nii loo sɛɛnamɔi baa he lɛlɛŋ lɛ. Amɛkɛ omanyeyeli kɛ shihilɛ ni miishɛɛ yɔɔ mli baa. Kɛfata he lɛ, gbalɛi ni baahe bei dani amɛba mli ni Yesu gba lɛ, tamɔ nɔ ni aŋma afɔ shi yɛ Mateo yitso 24, Marko yitso 13 kɛ Luka yitso 21 lɛ eba mli yɛ wɔgbii nɛɛ amli.
Yesu—“Ani lɛ Ji Kpaŋmɔ Momo lɛ Mli Yehowa Lɛ”?
Eka shi faŋŋ akɛ, Yesu jeee gbɔmɔ folo ko kɛkɛ. Eyɛ sɔrɔto ejaakɛ taakɛ Biblia lɛ kɛɔ lɛ, ŋwɛi wala mli eyɔɔ dani eba shikpɔŋ lɛ nɔ. (Yohane 6:38, 62) No hewɔ lɛ eyɛ nilee kɛ nyɛmɔi ni fe adesai foji nɛɛ anɔ. Enɛ yeɔ buaa wɔ ni wɔnuɔ enaakpɛɛ nii kɛ nilee ni ekaaa lɛ shishi.
Shi ani no tsɔɔ akɛ kɛ Yesu yɛ shihilɛ mli dani ebatsɔ adesa lɛ belɛ eji Nyɔŋmɔ? Teacher’s Manual ni ji wolo ko lɛ kɛɔ akɛ: “Be fɛɛ be ni Yesu aaawie Lɛ diɛŋtsɛ ehe akɛ ‘mi ji’ lɛ, . . . ekɛ Ehe tsɔɔ akɛ Kpaŋmɔ Momo lɛ mli Yehowa lɛ.” Ani eji anɔkwale?
Taakɛ King James Version loo Ga Biblia lɛ tsɔɔ 2 Mose 3:13, 14 shishi lɛ, Mose bi akɛ: “Kɛ mitee Israelbii lɛ aŋɔɔ, ni mikɛɛ amɛ akɛ: Nyɛtsɛmɛi a-Nyɔŋmɔ lɛ tsu mi nyɛŋɔɔ nɛɛ ni amɛbi mi akɛ: Te egbɛiŋ? lɛ, te mikɛɛ amɛ tɛŋŋ? Ni Nyɔŋmɔ kɛɛ Mose akɛ: MIJI MƆ NI MIJI. Ni ekɛɛ: Bɔ ni okɛɛ Israelbii lɛ nɛ: MIJI tsu mi nyɛŋɔɔ nɛɛ.” The Pentateuch and Haftorahs (Hebri ŋmalɛ ni Ŋleshi shishitsɔɔmɔ hɔlɔ shishi, kɛ emlitsɔɔmɔ ni Dr. J. H. Hertz ŋma yɛ nɛkɛ ŋmalɛ nɛɛ he) lɛ kɛɔ akɛ yɛ wiemɔ kuku “Miji mɔ ni miji . . . lɛ he lɛ, aama bɔ ni shihilɛ mli ni Nyɔŋmɔ yɔɔ lɛ jieɔ ehe kpo diɛŋtsɛ lɛ nɔ mi.” No hewɔ lɛ ekɛ nitsumɔ akɛ sabla loo gbɛi kɛha Nyɔŋmɔ lɛ sa ejaakɛ akɛni ejie amɛ kɛjɛ Mizraim nyɔŋyeli mli hewɔ lɛ, Nyɔŋmɔ miijie shihilɛ mli ni eyɔɔ lɛ kpo yɛ ewebii lɛ ahe yɛ gbɛ ni ekaaa nɔ. Hertz kɛɛ akɛ “ŋmɛnɛŋmɛnɛ beaŋ shishitsɔɔmɔi pii nyiɛɔ Rashi (blema French Biblia kɛ Talmud he wielɔ ni he gbɛi) lɛ nɔkwɛmɔ nɔ lɛ sɛɛ yɛ bɔni etsɔɔ shishi akɛ ‘Maji bɔ ni Maji’” lɛ. Enɛ kɛ bɔ ni New World Translation loo Jeŋ Hee Shishitsɔɔmɔ lɛ tsɔɔ shishi akɛ: “MAJIE BƆ NI MIJI Lɛ KPO MATSƆƆ” lɛ kpaa gbee.
King James Version lɛ kɛ Yesu wiemɔ “Miji” lɛ tsu nii ekoŋŋ kɛkɔ lɛ diɛŋtsɛ ehe yɛ Yohane 8:58 akɛ: “Dani Abraham yɔɔ lɛ, miji.” Shi wiemɔ nɛɛ yɛ sɔrɔto kwraa yɛ nɔ ni akɛtsu nii yɛ 2 Mose 3:14 lɛ he. Yesu kɛ enɛ tsuuu nii akɛ gbɛi loo sabala shi moŋ ekɛmiitsɔɔ shihilɛ ni eyɔɔ mli dani ebatsɔ adesa lɛ mli. No hewɔ lɛ, taakɛ New World Translation lɛ tsɔɔ lɛ, gbɛ ni ja ni sa akɛ atsɔ nɔ atsɔɔ Yohane 8:58 shishi ji: “dani Abraham aaaba shihilɛ mli lɛ, no mli lɛ miyɛ.”
Eka shi faŋŋ akɛ, Ŋmalɛ nɔdaamɔ nɔ ko bɛ ni aaadamɔ nɔ akɛɛ akɛ Yesu ji Yehowa lɛ nɔŋŋ ni yɔɔ Hebri Ŋmalɛi lɛ amli lɛ. Teacher’s Manual ni atsɔ hiɛ atsɛ wiemɔ kɛjɛ mli lɛ po kpɛlɛɔ nɔ akɛ: “Akɛ Kristo yɛ shihilɛ mli dani E-fɔmɔ yɛ Bethlehem lɛ diɛŋtsɛ etsɔɔɔ akɛ lɛ ji Nyɔŋmɔ Lɛ (Ebaanyɛ ehi shi akɛ ŋwɛi bɔfo) .” Yɛ anɔkwale mli lɛ, enɛ ji nɔ ni Biblia lɛ tsɔɔ. Beni ebako shikpɔŋ nɔ akɛ adesa lɛ, no mli lɛ Yesu ji “nyɔŋmɔ ko”, aloo mɔ krɔŋkrɔŋ, shi jeee Nyɔŋmɔ lɛ, Yehowa Nyɔŋmɔ Ofe lɛ.—Yohane 1:1-3; 1 Tesalonikabii 4:16.
[Mfonirii ni yɔɔ baafa 5]
Yesu naakpɛɛ nii lɛ yeɔ odase akɛ eji mɔ ni fe adesa ko kɛkɛ