Bɔ Ni Nyɛafee Nyɛtsɔmɔ Sɔɔlɔi Ni He Esa
“No hewɔ hu ni mitsu Timoteo ni ji misuɔmɔ bi kɛ anɔkwafo yɛ Nuŋtsɔ lɛ mli lɛ nyɛŋɔɔ, ni ebakai nyɛ migbɛ́i ni yɔɔ Kristo mli lɛ, bɔ ni mitsɔɔ [nii] yɛ asafo fɛɛ asafo mli, yɛ he fɛɛ he lɛ.”—1 KORINTOBII 4:17.
1, 2. Mɛni ji nɔ̃ oti ko ni he hiaa dani anyɛ agbalagbala mɔ ko kɛba anɔkwale lɛ mli? (Bɔfoi lɛ Asaji 8:12)
1 BENI afɔse mumɔ krɔŋkrɔŋ lɛ ashwie shi yɛ Pentekoste, afi 33 Ŋ.B. lɛ pɛ kɛkɛ ni Kristofoi asafo lɛ bɔi shweremɔ, ni amɛgbɛ amɛshwa oyayaayai (Bɔfoi lɛ Asaji 2:40-42; 4:4; 6:7; 11:19-21) Mɛni titri ha eye omanye lɛ? Mɛni hewɔ Yudafoi kɛ agbɛnɛ Samariabii kɛ Jeŋmajiaŋbii babaoo kpɛlɛ Kristo kɛ Nyɔŋmɔ Maŋtsɛyeli lɛ he sane lɛ nɔ nakai lɛ?—Bɔfoi lɛ Asaji 8:4-8; 10:44-48.
2 Dani mɔ ko aaakpɛlɛ Kristo sanekpakpa lɛ nɔ lɛ, belɛ esa akɛ nibii komɛi atsu nii yɛ emli. Klɛŋklɛŋ lɛ, esa akɛ mɔ lɛ ayoo Nyɔŋmɔ mlihilɛ ni esaaa wɔ ni ejie lɛ kpo etsɔɔ adesai yɛ bɔ ni etsɔ hiɛ etsu e-Bi lɛ kɛba shikpɔŋ nɔ ákɛ kpɔmɔ afɔleshaa nɔ̃ hewɔ lɛ. Taakɛ Biblia ŋmalɔ Yohane tsɔɔ mli lɛ: “Enɛ mli Nyɔŋmɔ suɔmɔ ni ekɛ sumɔɔ wɔ lɛ je kpo yɛ, ákɛ Nyɔŋmɔ tsɔ lɛ diɛŋtsɛ ebi koome lɛ kɛba je lɛŋ, koni wɔtsɔ enɔ wɔna wala. Enɛ mli suɔmɔ lɛ yɔɔ: Jeee wɔ ni wɔsumɔ Nyɔŋmɔ, shi moŋ ákɛ lɛ ni esumɔ wɔ, ni etsu ebi lɛ akɛ ebafee wɔhe eshai lɛ ahe kpatamɔ nɔ.”—1 Yohane 4:9, 10.
3. Mɛni hewɔ ehe hiaa akɛ mɔ ko hiɛ aaahi emumɔŋ nibii ni he hiaa lɛ lɛ anɔ lɛ?
3 Nɔ kroko ni he hiaa ji mɔ lɛ diɛŋtsɛ subaŋ yɛ mumɔŋ nibii ni he hiaa lɛ ahe. Yesu kɛɛ: “Miishɛɛ ji mɛi ni amɛhiɛ ka amumɔŋ hiamɔ nii ahe lɛ, akɛni amɛnɔ ji ŋwɛi maŋtsɛyeli lɛ hewɔ. Miishɛɛ ji mɛi ni jalɛ he hɔmɔ kɛ kumai yeɔ amɛ lɛ, akɛni amɛaatɔrɔ hewɔ lɛ.” (Mateo 5:3, 5, NW) Mɔ ni nɔ ko gbaaa enaa, ni ebuɔ ehe jalɔ lɛ jeee mɔ ni hiɛ yɔɔ mumɔŋ nibii ni he hiaa lɛ lɛ anɔ, ni ejeee mɔ ni kpɛlɛɔ anɔkwale nɔ. Kɛ Yehowa Odasefoi kɛ Maŋtsɛyeli lɛ he sane lɛ ha mɔ ni tamɔ nɛkɛ lɛ, nɔ ni ebaakɛɛ nɔŋŋ ji, ‘Mibɛ he miishɛɛ, miyɛ mi diɛŋtsɛ mijamɔ.’ Nakai nɔŋŋ hu mɔ ni kɛ ehe ewo heloo gbɛfaŋ nibii asɛɛdii mli vii lɛ naŋ be kɛhaŋ mumɔŋ saji—Mateo 6:33, 34; 7:7, 8; Luka 12:16-21.
4. Mɛɛ sanebimɔi abaasusu he agbɛnɛ?
4 Shi mɛi ni “amɛhiɛ yɔɔ amɛmumɔŋ hiamɔ nii anɔ,” ni amɛfee klalo akɛ amɛbaatao Nyɔŋmɔ kɛ e-Maŋtsɛyeli lɛ hu? Te aaatee tɛŋŋ ana amɛ ni ayoo amɛ? Ani nɔ ko yɛ ni wɔ akɛ Nyɔŋmɔ sɔɔlɔi lɛ wɔbaanyɛ wɔfee ni wɔha Nyɔŋmɔ Wiemɔ lɛ he sane lɛ afee nɔ ni shishinumɔ babaoo yɔɔ mli? Te wɔɔfee tɛŋŋ wɔfee sɔɔlɔi ni he esa babaoo hu?
Namɔ Gbɛ Esa Akɛ Wɔkɛtsu Nii?
5. Taakɛ Paulo tsɔɔ lɛ, mɛni Timoteo baatsɔɔ Korintobii lɛ?
5 Beni bɔfo Paulo ŋma eklɛŋklɛŋ wolo lɛ eyaha Kristofoi ni yɔɔ Korinto lɛ, ekɛɛ amɛ akɛ eetsu Timoteo, koni ‘ebakai amɛ [lɛ Paulo] egbɛ̀i ni yɔɔ Kristo Yesu mli lɛ.’ Ní amɛkɛ ‘gbɛ̀i’ aaatsu nii lɛ, shishitsɔɔmɔi komɛi wieɔ “shihilɛ gbɛ̀i,” “wala gbɛ” aloo “gbɛ ni mitsɔɔ nɔ mihiɔ shi” he. Shi Thayer Greekenglish Lexicon of the New Testament lɛ kɛ kuku nɛɛ he shishitsɔɔmɔ ko haa: “Gbɛ̀i ni mi akɛ Kristo sɔɔlɔ kɛ bɔfo lɛ minyiɛɔ sɛɛ yɛ nɔ ni akɛwo midɛŋ lɛ he nitsumɔ mli.” Akɛni Paulo mu sane lɛ naa kɛ wiemɔ “bɔ ni mitsɔɔ [nii] yɛ asafo fɛɛ asafo mli yɛ he fɛɛ he” hewɔ lɛ, shishinumɔ yɛ mli akɛ aaamu sane naa akɛ ewiemɔi lɛ kɔɔ esɔɔmɔ nitsumɔ lɛ diɛŋtsɛ he shi jeee lɛ diɛŋtsɛ ejeŋba akɛ Kristofonyo lɛ he.—1 Korintobii 4:17.
6. Mɛni hewɔ Yesu sɔɔmɔ nitsumɔ lɛ ji nɔ ni mɔ shi waa lɛ?
6 Yesu sɔɔmɔ lɛ jeee jabejabe. Ekɛ gbɛ pɔtɛɛ ko hu tsii nii yɛ eshiɛmɔ nitsumɔ lɛ mli. Ákɛ nɔkwɛmɔ nɔ lɛ, etsɔɔ ebɔfoi lɛ anii jogbaŋŋ, ni yɛ sɛɛ mli lɛ sanekpakpa jajelɔi 70 lɛ hu, yɛ gbɛ ni amɛaatsɔ nɔ amɛshiɛ kɛ hesaa. Gbɛ ni lɛ diɛŋtsɛ etsɔɔ nɔ ekɛ nɔkwɛmɔ nii, sanebimɔi kɛ Ŋmalɛi ni etsɛɔ ekɛtsuɔ nii yɛ be fɛɛ mli lɛ tsuɔ nii lɛ ji nɔkwɛmɔ nii kɛha amɛ. Eka he eji gbɛ ni hi fe fɛɛ ŋmɛnɛ.—Luka 9:1-6; 10:1-11.
7. Te wɔɔfee tɛŋŋ wɔha gbɔmɛi pii anu sanekpakpa lɛ he?
7 Akɛni Kristofoi asɔɔmɔ lɛ ji naanɔ wala loo gbele he sane hewɔ lɛ, te wɔɔfee tɛŋŋ wɔkɛ sanekpakpa lɛ aha gbɔmɛi lɛ ateŋ mɛi ni fa hu? Hɛɛ, te wɔɔfee tɛŋŋ wɔfee mɛi ni “yeee . . . mɔ ko la yi sɔ”? Kɛtsɔ sɔɔmɔ gbɛ fɛɛ gbɛ ni wɔɔna nɔ, ni nɔ ni fata he ji, taakɛ bɔfo Paulo jaje lɛ, “shia kɛ shia” sɔɔmɔ lɛ. Spania wolo ko wie Bɔfoi lɛ Asaji 20:20 he yɛ nɛkɛ gbɛ nɔ: “Gbɛ ni Paulo tsɔ nɔ eshiɛ yɛ Efeso lɛ nɛ.”—Bɔfoi lɛ Asaji 20:20-27.
Klɛŋklɛŋ Gbɛtsii Nii Lɛ
8, 9. (a) Mɛni ji klɛŋklɛŋ gbɛtsii nii yɛ sɔɔmɔ lɛ mli yɛ be babaoo mli? (b) Mɛni hewɔ Yesu nyɛ ekɛ ekãa babaoo wie lɛ?
8 Yɛ be babaoo mli lɛ, klɛŋklɛŋ gbɛtsii nii ni ehe hiaa akɛ wɔye nɔ kunim yɛ sɔɔmɔ lɛ mli ji wɔ diɛŋtsɛ. Mɛi komɛi nuɔ he akɛ amɛhiɛ gboɔ nii, amɛsako amɛhe ni atsɔseko amɛ tsɔ bɔ ni no aaaha amɛnyɛ amɛdamɔ gbɔmɛi ohiɛ. Shi te Yesu nu he eha tɛŋŋ? Ani etee rabi skul loo nikasemɔ hei lɛ eko kɛba tsɔsemɔ? Ani ena woloŋlee ni nɔ kwɔ? Ni kɛ̃lɛ, kɛ eshiɛ lɛ te lɛ diɛŋtsɛ emaŋbii lɛ nuɔ he amɛhaa tɛŋŋ? Mateo kɛɔ wɔ: “Ni eha amɛhe jɔ̃ amɛhe, ni amɛkɛɛ: Nɛgbɛ mɔ nɛɛ yańa nilee kɛ hewalɛ nii nɛɛ kɛjɛ?” Eji anɔkwale, Yesu ji gbɔmɔ ni yeɔ emuu, Nyɔŋmɔ Bi, shi egbɛ́ Iɛ ji nɔ ni ekaselɔi ni ‘atsɔseko amɛ’ lɛ ateŋ mɛi pii nyɛɔ amɛkɛtsuɔ nii. Mɛni ba amɛnɔ yɛ amɛjamɔŋ henyɛlɔi lɛ ateŋ po? “Agbɛnɛ beni amɛna Petro kɛ Yohane ekãa lɛ ni amɛyoo akɛ jeee woloŋlelɔi kɛ nilelɔi komɛi ji amɛ lɛ, efee amɛhiɛ yaa, ni amɛkɔ sɛɛ akɛ amɛkɛ Yesu hi shi.”—Mateo 13:54; Bɔfoi lɛ Asaji 4:13.
9 Shi nɛgbɛ ji he ni Yesu na nibii ni etsɔɔ nɛɛ fɛɛ kɛjɛ? Mɛni hewɔ eye omanye yɛ esɔɔmɔ lɛ mli nakai lɛ? Ani etamɔ ŋmɛnɛŋmɛnɛ beaŋ TV nɔ shiɛlɔi ni kɛ henumɔi babaoo gbalaa amɛtoibolɔi lɛ? Dabi. Nɔ ni Yesu damɔ nɔ lɛ ji sane ni waaa ni mli ka shi faŋŋ—ewie wiemɔi ni gbɔmɛi foji lɛ wieɔ ni amɛnuɔ shishi lɛ eko, ehiɛ yɛ amɛmumɔŋ hiamɔ nii anɔ, ni nɔ ni he hiaa fe fɛɛ lɛ, Yesu le akɛ e-Tsɛ lɛ fiɔ esɛɛ. Efee enɛ faŋŋ yɛ be mli ni ejaje nitsumɔ ni akɛwo edɛŋ akɛ sɔɔlɔ loo minister yɛ kpeehe lɛ ni yɔɔ lɛ diɛŋtsɛ emaŋ ni ji Nazaret yɛ Galilea lɛ. Ekane kɛjɛ gbalɔ Yesaia wolokpo lɛ mli: “Nuŋtsɔ lɛ [Yehowa] mumɔ lɛ yɛ minɔ, no hewɔ lɛ efɔ mi mu koni mijaje sanekpakpa lɛ mitsɔɔ ohiafoi; etsu mi koni mibatsa mɛi ni amɛtsui ekumɔ lɛ, koni mishiɛ heyeli mitsɔɔ nomi lɛ, kɛ hiŋmɛigbelemɔ ha shwilafoi, koni miŋmɛɛ shwilafoi lɛ ahe ni amɛye amɛhe, ni mishiɛ afi ko ni sa Nuŋtsɔ lɛ [Yehowa] hiɛ. Ni ebɔi amɛ kɛɛmɔ akɛ: Ŋmɛnɛ ŋmalɛ nɛɛ eba mli yɛ nyɛtoiiaŋ.”—Luka 4:16-21.
10, 11. (a.) Te esa akɛ wɔnu wɔsɔɔmɔ lɛ he wɔba tɛŋŋ? (b) Te Paulo ha hetoo eha tɛŋŋ?
10 Wɔyɛ nakai sɛɛfimɔ lɛ nɔŋŋ ŋmɛnɛ yɛ wɔsɔɔmɔ lɛ mli—Yehowa Nyɔŋmɔ, jeŋ muu fɛɛ Nuŋtsɔ Maŋtsɛ lɛ. Wɔmiishiɛ esane lɛ, enilee. Wɔdamɔɔ e-Wiemɔ lɛ nɔ, ni wɔkɛtsuɔ nii be fɛɛ be yɛ wɔ sanegbaai amli. No hewɔ Iɛ, ani esa akɛ wɔshe gbeyei yɛ shiɛmɔ ni wɔɔshiɛ wɔtsɔɔ mɛi ni le woloŋ fe wɔ aloo niiatsɛmɛi lɛ mli?
11 Paulo haa hetoo: “Nɛgbɛ nilelɔ yɔɔ? Nɛgbɛ woloŋmalɔ yɔɔ? Nɛgbɛ je nɛŋ naataalɔ yɔɔ? Ani Nyɔŋmɔ hako je lɛŋ nilee lɛ atsɔ kwashiaiasane? . . . Shi, anyɛmimɛi, nyɛkwɛa akɛ, nyɛtsɛmɔ lɛ, jeee heloo gbɛfaŋ nilelɔi pii, jeee hewolɔi pii, jeee abladei pii, shi moŋ je nɛŋ kwashiaianii lɛ Nyɔŋmɔ hala, koni ekɛwo nilelɔi ahiɛgbele; ni je nɛŋ gbɔjɔmɔ nii lɛ Nyɔŋmɔ hala koni ekɛwo nii ni he wa lɛ hiɛgbele; ni je nɛŋ gbɔjɔmɔ nii lɛ Nyɔŋmɔ hala koni ekɛwo nii ni he wa lɛ hiɛgbele; ni je nɛŋ nii ni abuuu kɛ nii ni ágbe he guɔ lɛ Nyɔŋmɔ hala, kɛ nibii ni jeee nɔ ko nɔ ko lɛ tete, koni eha nibii ni ji nɔ ko lɛ,afee yaka; bɔni afee ni heloo ko heloo,ko akashwã yɛ ehiɛ.”—1 Korintobii 1:18-29.
12. Omanye ni wɔyeɔ yɛ wɔsɔɔmɔ lɛ mli lɛ jɛɔ mɛni mli? (Yakobo 4:8)
12 Omanye ni ayeɔ yɛ sɔɔmɔ lɛ mli lɛ damɔɔɔ wɔ woloŋlee loo wɔ seshi ni wɔjɛ mli lɛ nɔ. Ejɛ Maŋtsɛyeli lɛ he sane lɛ diɛŋtsɛ ni jijeɔ yɛ mɔ ni hiɛ yɔɔ emumɔŋ nibii ni he hiaa lɛ lɛ anɔ lɛ tsui mli lɛ. Nɔ kroko ni fata he ji Yehowa tsuijurɔ kɛha nakai mɔ lɛ, ejaakɛ taakɛ Yesu kɛɛ lɛ: “Mɔ ko nyɛŋ aba miŋɔɔ, akɛ ja Tsɛ Iɛ ni tsu mi lɛ gbala lɛ da.”—Yohane 6:44, NW.
13. (a) Te Paulo kɛ Barnaba here shitee-kɛ-woo nɔ amɛha tɛŋŋ? (b) Te wɔɔfee tɛŋŋ ni wɔmii ashɛ wɔhe yɛ sɔɔmɔ lɛ mli yɛ be fɛɛ mli?
13 No hewɔ lɛ, kɛ wɔkɛ wɔhe fɔɔ Yehowa sɛɛfimɔ nɔ lɛ, wɔbaanyɛ wɔtsu wɔsɔɔmɔ lɛ he nii kɛ hekɛnɔfɔɔ taakɛ Paulo kɛ Barnaba fee yɛ klɛŋklɛŋ afii oha lɛ mli lɛ. Beni amɛshiɛ yɛ Ikoniom lɛ amɛsɔɔmɔ nitsumɔ lɛ kɛ mligbalamɔ diɛŋtsɛ ba gbɔmɛi lɛ asusumɔi amli ni ekɛ shitee-kɛ-woo hu ba. Ani enɛ ha amɛgbala amɛhe shi kɛjɛ he? Nɔ ni Luka ŋma lɛ kɛɔ wɔ akɛ: “Shi amɛtsɛ yɛ jɛmɛ kɛ̃, ni amɛkɛ ekãa wie Nuŋtsɔ lɛ [Yehowa] he, ni lɛ hu eye eduromɔ wiemɔ lɛ he odase ni eha atsɔ amɛnine nɔ afee okadii kɛ naakpɛɛ nii pii.” Nakai nɔŋŋ hu kɛ wɔná gbɔmɛi ni yɔɔ wɔshikpɔŋkuku lɛ mli lɛ ahe jwɛŋmɔ kpakpa, ni wɔshi nɔ ni baajɛ mli aba lɛ wɔwo Yehowa dɛŋ lɛ, sɔɔmɔ lɛ baafee miishɛɛ yɛ be fɛɛ mli, shi jeee tamɔ jatsu ko.—Bɔfoi lɛ Asaji 14:1-3; Yakabo 1:2, 3.
Bɔ Ni Gbɔmɛi Feɔ Amɛnii Yɛ He Amɛhaa
14. Te gbɔmɛi fee amɛ nii yɛ Paulo shiɛmɔ lɛ hewɔ amɛhaa tɛŋŋ?
14 Jeee gbɔmɛi fɛɛ kɛ tsuijurɔ here Yesu loo Paulo nɔ yɛ amɛshiɛmɔ nitsumɔ lɛ mli. Akɛ nɔkwɛmɔ nɔ lɛ, mɛni gbɔmɛi lɛ fee beni Paulo shiɛ yɛ Ateene lɛ? Nɔ ni aŋma afɔ shi lɛ kɛɔ akɛ: “Shi nilelɔi ni ji Epikuromɛi kɛ Stoamɛi lɛ ateŋ mɛi komɛi kɛ lɛ taa naa; ni mɛi komɛi kɛɛ: Mɛni naafuutsɛ nɛɛ baakɛɛ po? Mɛi komɛi hu kɛɛ: Etamɔ mɔ ni jajeɔ maŋsɛɛ wɔji ahe sane etsɔɔ; ejaakɛ eejaje Yesu kɛ shitee lɛ he sanekpakpa lɛ eetsɔɔ amɛ. Ni amɛŋɔ lɛ kɛtee Areopago (kojomɔ he) lɛ, ni amɛkɛɛ: Ani oooha wɔle nɔ̃ tsɔɔmɔ hee ni owieɔ he nɛɛ? Ejaakɛ oha wɔtoii enu maŋsɛɛ saji; hewɔ lɛ wɔmiitao shishi wɔle.”—Bɔfoi lɛ Asaji 17:18-20.
15. Te gbɔmɛi feɔ amɛ nii yɛ wɔsɔɔmɔ lɛ he amɛhaa tɛŋŋ? Shi mɛni esa akɛ wɔkai?
15 Esa akɛ wɔyoo akɛ wɔ sane lɛ kɛ bɔ ni adafitswaa woji kɛ shitee-kɛ-wolɔi tsɔɔ mli lɛ baanyɛ afee sɔrɔto ko aha gbɔmɛi ni yɔɔ wala mli bianɛ lɛ. Yɛ enɛ hewɔ lɛ, gbɔmɛi pii naa wɔhe jwɛŋmɔ fɔŋ yɛ nɔ ni amɛnuɔ ni awieɔ yɛ wɔhe lɛ hewɔ, ni amɛtsɔɔ hiɛ amɛkojoɔ sane lɛ ni amɛkpooɔ wɔ yɛ be mli ni amɛnuko wɔgbɛfaŋ yɛ sane lɛ mli po. Mɛi krokomɛi hu, tamɔ mɛi ni yɔɔ Ateene lɛ kpɛlɛ nɔ akɛ amɛbaabo sane lɛ toi pii dani amɛto amɛyiŋ. Shi kɛ̃lɛ, kɛ amɛbo toi po lɛ, amɛbaanyɛ amɛye Maŋtsɛyeli hiɛnɔkamɔ lɛ he fɛo akɛ nɔ ko ni ewa akɛ aaahe aye. Shi kaimɔ akɛ, Kristo kɛ esane lɛ amɛkpoɔ lɛ, shi jeee bo.—Bɔfoi lɛ Asaji 17:32-34; Mateo 12:30.
Gbɔi Ni Batsɔmɔ Nanemɛi
16. (a) Te wɔɔfee wɔ nii wɔha tɛ n kɛ gbɔi ba wɔshia lɛ? (b) Mɛni esa akɛ wɔhiɛkpamɔ wiemɔ lɛ atsu?
16 Kɛ gbɔi komɛi ba oshia lɛ te onuɔ he ohaa tɛŋŋ? Mɛɛ sanebimɔi baa ojwɛŋmɔ mli oyayaayai? Ekolɛ, Namɛi nɛ? Mɛni amɛtaoɔ? Ani amɛmiiba amɛbagba minaa? Kɛ wɔjie wɔhe kpo akɛ sɔɔlɔi yɛ mɔ ko shinaa naa lɛ, esa akɛ wɔkai enɛɛmɛi. No hewɔ lɛ esa akɛ wɔhiɛkpamɔ wiemɔ lɛ aba amɛgbeyeishemɔ lɛ shi yɛ sanebimɔi krokomɛi nɛɛ ahewɔ. Shi yɛ mɛɛ gbɛ nɔ? Ojogbaŋŋ, mɛɛ ŋaawoo Yesu kɛha yɛ nɔ ni esa akɛ efee wɔ hiɛkpamɔ wiemɔ lɛ he? Ekɛɛ akɛ: “Shi kɛ nyɛmiibote shia lɛ, nyɛŋaa shiatsɛ lɛ; ni kɛji shia lɛ sa lɛ, nyɛbaa nyɛ toiŋjɔlɛ lɛ abaa enɔ; shi kɛji esaaa lɛ, no lɛ nyɛ toiŋjɔlɛ lɛ akpale aba nyɛŋɔɔ ekoŋŋ.”—Mateo 10:12,13, NW.
17. Mɛɛ gbɛ nɔ wɔɔtsɔ wɔha gbɔmɛi atsui anyɔ amɛmli kɛtsɔ wɔhiɛkpamɔ wiemɔi anɔ?
17 “Nyɛhaa nyɛ toiŋjɔlɛ lɛ abaa enɔ.” Mɛni ji nɔ ni enɛ tsɔɔ? No ji akɛ, wɔmiisumɔ ni wɔ toiŋjɔlɛ aba gbɔmɔ fɛɛ gbɔmɔ kɛ shia fɛɛ shia nɔ yɛ wɔsɔɔmɔ lɛ mli. No hewɔ lɛ esa akɛ wɔ wiemɔi ni jɛɔ wɔdaaŋ klɛŋklɛŋ lɛ atsɔɔ akɛ wɔji Nyɔŋmɔ sɔɔlɔi ni sumɔɔ toiŋjɔlɛ. Kɛbashi ŋmɛnɛ gbi nɛɛ po lɛ Yudafoi kɛ Moslembii kɛ ŋamɔ Toiŋjɔlɛ ahao” aloo Toiŋjɔlɛ” (“Shalom aleichem” aloo “Shalom” yɛ Hebri wiemɔ mli, kɛ “Assalaam alaikum” aloo “Salaam,” yɛ Arabik mli) ŋaa mɛi. Shi wɔŋamɔi lɛ baafee nɔ ni yɔɔ sɔrɔto yɛ maji sɔrɔtoi ni wɔjɛ mli kɛ kusumii komɛi ahewɔ. Shi yiŋtoo lɛ ji nɔ kome too lɛ nɔŋŋ—ni wɔha gbɔmɔ lɛ tsui anyɔ emli koni ebo Maŋtsɛyeli lɛ he sane lɛ toi. Ekolɛ ogbɛi ni oootsi ta klɛŋklɛŋ kɛ he ni oyɔɔ lɛ po baaye abua yɛ enɛ gbɛfaŋ. Etsɔɔ akɛ obɛ nɔ ko ni okɛbaatee. Oyiŋtoo kɛ onɔkwayeli lɛ yɛ faŋŋ koni mɛi fɛɛ ana. Kɛkɛ lɛ oofee taakɛ Paulo wo ŋaa lɛ: “Nyɛkwɛa ni mɔ ko akawie bɔ ni nyɛbaa nyɛjeŋ nyɛhaa yɛ gbɔmɛi ahiɛ lɛ he efɔŋ. Yɛ gbɛnaa nii ni ka nyɛnɔ lɛ hewɔ lɛ, nyɛkɛ gbɔmɛi fɛɛ ahia shi yɛ toiŋjɔlɛ mli.”—Romabii 12:17, 18, Phillips.
18. Mɛɛ tɛ ni áfo afɔ shi esa akɛ ana yɛ wɔhe yɛ be fɛɛ mli yɛ wɔsɔɔmɔ lɛ mli?
18 Kɛji akɛ wɔkɛ wɔhe ewo sɔɔmɔ lɛ mli ni wɔjɛ shia kome mli kɛmiiya ekroko mli aloo wɔmiitsu nii yɛ gbɛjegbɛi anɔ lɛ, wɔtamɔ mɛi ni gbɔmɛi miikwɛ wɔ. Esa akɛ wɔsanegbaa kɛ wɔjeŋba afee nɔ ni anaŋ he sane ko ata aloo nɔ ni efɔŋ ko bɛ he. Shi kɛ̃lɛ, yɛ be mli ni esa akɛ wɔwiemɔ lɛ afee nɔ ni mli jɔ ni toiŋjɔlɛ yɔɔ mli lɛ, esaaa akɛ wɔkpaa nɔ ko fai yɛ he. Wɔhiɛ gbooo Nyɔŋmɔ sɔɔlɔi ni wɔji yɛ gbɔmɛi ahiɛ lɛ he.—Marko 8:38.
19, 20. (a) Te mɔ ko aaafee tɛŋŋ abɛŋkɛ mɛi ni suɔ amɛhe ni amɛsumɔɔɔ ni gbɔmɛi abɛŋkɛ amɛ yɛ gbɛjegbɛi anɔ lɛ? (b) Mɛni hewɔ Yesu ji mɔ ni he esa waa yɛ trukaa odaseyeli mli lɛ?
19 Maji komɛi yɛ ni emli gbɔmɛi lɛ suɔ amɛhe, ni nɔ ni amɛle kɛjɛ blema lɛ nɔŋŋ mli amɛhiɛɔ. Efeɔ amɛ hiɛgbele akɛ mɔ ko kɛ woji tɛtrɛbii aaatsɔɔ amɛ yɛ gbɛjegbɛi anɔ. Kɛji akɛ nɛkɛ sane lɛ ji lɛ, mɛni hewɔ otsɔɔɔ gbɛ ni ŋaalee babaoo yɔɔ mli nɔ okɛtsuuu nii? Obaanyɛ otsɔ ŋaa gbɛ nɔ okɛ mɔ ni yeee oyai tsɔ aje sanegbaa shishi, ni gbɔmɔ nɛɛ baanyɛ aŋɔ Biblia he woji ni okɛhaa lɛ lɛ nakai nɔŋŋ.
20 Yesu kɛ ŋaa gbɛ ni tamɔ nakai nɔŋŋ shiɛ. Akɛni Yudafoi ebuuu Samariabii kɛ yei hu hewɔ lɛ, Yesu kɛ ŋaa tsu nii yɛ gbɛ ni etsɔ nɔ ekɛ Samaria yoo ni bɛ jeŋba wie yɛ Yakobo nu bu lɛ he lɛ mli. Esanegbaa lɛ ji trukaa odaseyeli kɛ gbɛjegbɛi anɔ odaseyeli he nɔkwɛmɔ nɔ. Eji mɔbɔnalɛ kɛ tsɔsemɔ tsɔɔmɔ he nɔkwɛmɔ nɔ kpakpa.—Yohane 4:5-30.
21. Mɛɛ nɔ kroko ni he hiaa afee he nɔkwɛmɔ nɔ yɛ Paulo sɔɔmɔ lɛ mli?
21 Esa akɛ wɔsusu nɔ kroko ni he hiaa waa he yɛ be mli ni wɔkɛ Maŋtsɛyeli lɛ he sanekpakpa lɛ haa mɛi lɛ. Paulo ji mɔ ni he esa yɛ enɛ mli. Kwɛmɔ akɛ ooonyɛ oyoo enɛ kɛjɛ hiɛkpamɔ wiemɔi ni anaa yɛ Bɔfoi lɛ Asaji 13:16-20; 17:22 kɛ 22:1-3 lɛ mli lo. Kadimɔ akɛ yɛ shihilɛi lɛ fɛɛ eko mli lɛ, etaoɔ mi ekɛ gbɔmɛi lɛ loo toibolɔi lɛ akpa gbee yɛ nɔ ko mli. Etsɔɔ akɛ ekɛ amɛ jɛ he kome. Nɔ ni jɛ mli ba ji akɛ amɛbo lɛ toi, kɛ amɛkɛ lɛ kpaaa gbee po. Nakai nɔŋŋ hu wɔbaanyɛ wɔha wɔhiɛkpamɔ wiemɔ lɛ amɔ gbɔmɛi lɛ, ayoo nɔ kome ni ka wɔ kɛ shiatsɛ lɛ teŋ. Ekolɛ okadi akɛ gbekɛbii yɛ shia lɛ mli, ni ekolɛ fɔlɔ jio. Belɛ nyɛyi enyɔ lɛ fɛɛ baanyɛ akpɛlɛ nɔ kome nɔ, nyɛna nɔ ni nyɛaadamɔ nɔ nyɛbɔ naanyo. Ona nɔ ko ni obaadamɔ nɔ owie, ni obaatsɔ nɔ obote Maŋtsɛyeli lɛ he sane lɛ mli!—Mateo 18:1-6.
22. Mɛɛ sanebimɔi ebiɔ ni aha hetoo agbɛnɛ?
22 Shi nɛkɛ ŋaawooi nɛɛ ji shishijee lɛ pɛ. Mɛɛ gbɛ kroko he hiaa koni yɛ naagbee lɛ ana kaselɔ kroko? Hɛɛ, mɛni hu he hiaa koni eye ebua koni wekukpaa abaka mɔ ko kɛ Nyɔŋmɔ teŋ kɛtsɔ Kristo nɔ? Mɛɛ sui nɛkɛ baaha osɔɔmɔ lɛ afee nɔ ni mɔɔ shi babaoo?a
Te Obaaha Hetoo Oha Tɛŋŋ?
◻ Mɛni ji nibii ni yeɔ buaa ni haa mɔ ko kpɛlɛɔ Maŋtsɛyeli lɛ he sane lɛ nɔ?
◻ Te aaafee tɛŋŋ oye shɔɔfeemɔ kɛ hiɛ ni gboɔ nɔ̃ nɔ kunim yɛ sɔɔmɔ lɛ mli?
◻ Mɛni ji yiŋtoo titri ni yɔɔ wɔ hiɛkpamɔ wiemɔi amli yɛ sɔɔmɔ nitsumɔ lɛ mli?
◻ Mɛɛ gbɛ nɔ Yesu kɛ Paulo nɔkwɛmɔ nɔ lɛ baanyɛ aye abua wɔ yɛ mɛi ni wɔyaa amɛŋɔɔ lɛ mli?
[Wiemɔ ni akɔ ni akɛmiitsu nii ni yɔɔ baafa 15]
“Kwɛ bɔ ni ehi, bɔ ni eyɔɔ fɛo kɛ nyɛmimɛi fee ekome kɛhi shi lɛ.”—Lala 133:1.
[Shishigbɛ niŋmaa]
a Ajie kɛjɛ August 15, 1984 Watchtower lɛ mli.
[Mfoniri ni yɔɔ baafa 12]
Yesu tsɔɔ ekaselɔi Iɛ sɔɔmɔ lɛ mli gbɛ̀i ni mɔɔ shi ni hi fe fɛɛ
[Mfoniri ni yɔɔ baafa 19]
Mɛɛ sanebimɔi baa jwɛŋmɔ mli beni gbɔ ko eba oshinaa naa?