Yesu Kristo—Nyɔŋmɔ Suɔmɔ Bi
“Ni naa, gbee ko jɛ ŋwɛi kɛɛ: Mɔ nɛ ji misuɔmɔ bi ni mina ehe tsui Iɛ.”—MATEO 3:17.
1, 2. (a) Mɛɛ anɔkwale ko ni mli ka shi faŋŋ ji nɔ ni Biblia lɛ tsɔɔ yɛ Nyɔŋmɔ Ofe lɛ kɛ Yesu Kristo he? (b) Mɛni ji nɔ ni Kristendom jamɔi lɛ tsɔɔ?
ABAPTISI Yesu Kristo beni eye afii 30 kɛtsɔ numiimɔ nɔ. Beni eje kpo kɛjɛ nu lɛ mli lɛ, gbee ko jɛ ŋwɛi kɛɛ: “Mɔ nɛɛ ji misuɔmɔ bi, ni mina ehe tsui lɛ.” (Mateo 3:17) Nakai gbee lɛ ji Nyɔŋmɔ gbee. Yɛ be kroko mli, beni esɔleɔ ehaa Nyɔŋmɔ lɛ, Yesu kɛɛ: “Ataa, wo ogbɛi lɛ hiɛ nyam!” Ni beni Yesu kɛɛ nakai pɛ kɛkɛ ni Nyɔŋmɔ “gbee ko jɛ ŋwɛi kɛɛ: ‘Naa miwo ehiɛ nyam, ni masaa mawo ehiɛ nyam ekoŋŋ.’”—Yohane 12:28.
2 Gbekɛ po baanyɛ anu shishi kɛjɛ nɛkɛ saji nɛɛ amli akɛ wekukpaa ni ka Nyɔŋmɔ Ofe lɛ kɛ Yesu Kristo teŋ lɛ tamɔ tsɛ kɛ esuɔmɔ bi nɔ, amɛji gbɔmɛi sɔrɔtoi enyɔ. Ni kɛlɛ, Kristendom jamɔi lɛ ekpɛlɛɛɛ Biblia mli anɔkwale ni mli ka shi faŋŋ nɛɛ nɔ. Amɛmaa nɔ mi akɛ Yesu Kristo ji Nyɔŋmɔ Ofe lɛ diɛŋtsɛ, Triniti lɛ mli mɔ ni ji enyɔ, mɔ ni ji etɛ lɛ ji mumɔ krɔŋkrɔŋ lɛ.
3. Atsɔɔ yiŋfutumɔ ni kɔɔ Triniti tsɔɔmɔ lɛ he lɛ yɛ mɛɛ gbɛ nɔ?
3 Nakai tsɔɔmɔ lɛ kɛ yiŋfutumɔ kpele eba Kristendom jamɔi lɛ asɛɛnyiɛlɔi lɛ ateŋ ni enɛ ji yiŋtoo kome hewɔ ni New Catholic Encyclopedia lɛ tsɛɔ Triniti lɛ akɛ teemɔŋ sane lɛ. Yɛ anɔkwale mli lɛ, ekɛ yiŋfutumɔ baa osɔfoi lɛ ateŋ, ejaakɛ nakai ensaeklopedia lɛ hu kɛɔ akɛ: “Triniti tsɔɔmɔ lɛ he tsɔɔlɔi fioo ko pɛ yɔɔ Roma Katolek jamɔ nikasemɔ hei lɛ amli ni akɛ sanebimɔ ni ji, ‘Te feɔ tɛŋŋ ni mɔ ko shiɛɔ Triniti?’ lɛ yeko amɛhe fɛo. Ni kɛji akɛ sanebimɔ lɛ ji yiŋfutumɔ yɛ nikaselɔi lɛ agbɛfaŋ lɛ he okadi lɛ, belɛ ejeee yiŋfutumɔ he okadi ko ni baa shi yɛ amɛtsɔɔlɔi lɛ agbɛfaŋ.”
4. Mɛni ji sɔlemɔi lɛ atsɔɔmɔ titri yɛ Triniti lɛ he?
4 Nakai tsɔɔmɔ ni futuɔ mɔ jwɛŋmɔ lɛ ji Katolek kɛ Protestant jamɔi lɛ ahemɔkɛyeli titri. The Catholic Encyclopedia lɛ jaje akɛ: “Triniti lɛ ji wiemɔ ni akɛtsuɔ nii akɛtsɔɔ Kristofoi ajamɔ lɛ tsɔɔmɔ titri . . . No hewɔ lɛ, taakɛ Atanasio Hemɔkɛyeli Jajemɔ lɛ tsɔɔ lɛ, ‘Tsɛ lɛ Nyɔŋmɔ ni, Bi lɛ Nyɔŋmɔ ni, Mumɔ Krɔŋkrɔŋ lɛ Nyɔŋmɔ ni, ni kɛlɛ, jeee Nyɔŋmɔi etɛ yɔɔ shi Nyɔŋmɔ kome.’” Nakai nɔŋŋ hu Hela Ortodɔsk Sɔlemɔ lɛ ni yɔɔ Greece lɛ wie yɛ saneyeli he sane ko ni kɔɔ Yehowa Odasefoi lɛ ahe akɛ: “Kristojamɔ shishitoo tsɔɔmɔ ni Kristofoi fɛɛ jajeɔ hemɔkɛyeli yɛ mli . . . ni jamɔ lɛ loo tsɔɔmɔ lɛ kɔɔɔ he eko ji . . . Triniti lɛ, akɛ Nyɔŋmɔ ji Mɔ kome yɛ mɛi etɛ mli.” Hela Ortodɔsk Sɔlemɔi lɛ hu jaje akɛ: “Kristofoi ji mɛi ni kpɛlɛɔ Kristo nɔ akɛ Nyɔŋmɔ.’” Ekɛɛ akɛ mɛi ni ekpɛlɛɛɛ Triniti lɛ nɔ lɛ jeee Kristofoi shi mɛi ni ekwa hemɔkɛyeli lɛ.
5, 6. Mɛni hewɔ ehe hiaa akɛ wɔɔle anɔkwalei ni kɔɔ sane nɛɛ he lɛ?
5 Shi, kɛji nɛkɛ Kristendom “shishitoo” Triniti tsɔɔmɔ nɛɛ jeee anɔkwale lɛ, kɛ eji amale lɛ, belɛ nɔ ni tamɔɔɔ nakai lɛ baa mli. Anɔkwale Kristofoi baakpoo enɛ. Mɛi ni amɛkwa Kristojamɔ lɛ kɛ amɛhe baakpɛtɛ he. Ni mɛni baajɛ mli aba aha amɛ? Wɔkaneɔ yɛ Biblia lɛ mli naagbee wolo ni ji “Yesu Kristo kpojiemɔ ni Nyɔŋmɔ ŋɔha lɛ” lɛ mli yɛ mɛi ni naaa naanɔ wala yɛ Nyɔŋmɔ Maŋtsɛyeli lɛ mli lɛ ahe akɛ: “Shi maŋ lɛ sɛɛ lɛ, gbeei lɛ kɛ sulɔi lɛ kɛ ajwamaŋbɔlɔi lɛ kɛ awuiyelɔi lɛ kɛ amagajalɔi lɛ kɛ mɔ fɛɛ mɔ ni sumɔɔ amale ni emaleɔ lɛ yɔɔ jɛi.”—Kpojiemɔ 1:1; 22:15.
6 Yɛ bɔ ni ehe hiaa ha hewɔ lɛ, esa akɛ wɔle he ni nɛkɛ Triniti tsɔɔmɔ nɛɛ na eshishijee kɛjɛ kɛ nɔ hewɔ. Namɔ hɔ sɛɛ diɛŋtsɛ? Mɛni ji nɔ ni ŋmɛnɛŋmɛnɛ beaŋ Biblia he nilelɔi kɛɔ yɛ he? Shi dani wɔɔsusu nɛkɛ saji nɛɛ ahe lɛ, nyɛhaa wɔpɛia nɔ ni Nyɔŋmɔ diɛŋtsɛ Wiemɔ ni jɛ mumɔŋ lɛ kɛɔ lolo lɛ mli.—2 Timoteo 3:16, 17.
Jeee ‘Nyɔŋmɔ Ni Ji Bi’ Shi “Nyɔŋmɔ Bi”
7. Biblia lɛ kasemɔ ni yiŋkpɛɛ momo ko bɛ mli lɛ jieɔ mɛni kpo yɛ Yesu he?
7 Yesu ekɛkɔ da akɛ lɛ ji Nyɔŋmɔ ofe lɛ diɛŋtsɛ. Mɔ fɛɛ mɔ ni aaakane Biblia lɛ, ni yiŋ ni akpɛ momo ko bɛ mli, ni ebɛ jwɛŋmɔ ko ni eŋɔtee yɛ Triniti lɛ he lɛ baaye enɛ he odase. Akɛ nɔkwɛmɔ nɔ lɛ, Yesu kɛɛ yɛ Yohane 3:16 akɛ: “Nɛkɛ Nyɔŋmɔ sumɔɔ je lɛ, akɛ eŋɔ e-Bi koome lɛ eha.” Yɛ no sɛɛ kukuji enyɔ lɛ, Yesu kɛɛ ekoŋŋ akɛ lɛ ji “Nyɔŋmɔ Bi koome lɛ.” (Yohane 3:18) Beni Yudafoi lɛ folɔ Yesu naa akɛ ebɔ musu lɛ, eha hetoo akɛ: “Nyɛmiikɛɛ yɛ mɔ ni tsɛ lɛ efee lɛ krɔŋkrɔŋ ni etsu lɛ kɛba je lɛ mli lɛ hewɔ akɛ: Obɔ musu akɛni mikɛɛ akɛ: Nyɔŋmɔ Bi ji mi lɛ?” (Yohane 10:36) Yesu ekɛɛɛ akɛ eji ‘Nyɔŋmɔ ni ji Bi’ shi moŋ akɛ “Nyɔŋmɔ Bi” ji lɛ.
8. Mɛɛ odase asraafoiatsɛ ko kɛ mɛi ni kɛ lɛ yɔɔ lɛ ye?
8 Beni Yesu gbo lɛ, Roma asraafoi ni damɔ shi lɛ po le akɛ Yesu jeee Nyɔŋmɔ: “Shi asraafoi-oha-atsɛ lɛ kɛ mɛi ni kɛlɛ buɔ Yesu he lɛ, beni amɛna shikpɔŋhosomɔ lɛ kɛ nii ni afee lɛ, amɛshe gbeyei tsɔ, ni amɛkɛɛ: Lɛlɛŋ, Nyɔŋmɔ Bi nɛ!” (Mateo 27:54) Amɛkɛɛɛ akɛ, ‘Nyɔŋmɔ nɛ’ aloo ‘Nyɔŋmɔ ni ji Bi lɛ nɛ,’ ejaakɛ Yesu kɛ ekaselɔi lɛ tsɔɔ akɛ Yesu ji Nyɔŋmɔ Bi jeee Nyɔŋmɔ Ofe lɛ ni eba adesa su mli.
9, 10. Mɛɛ odase ni ma shi shiŋŋ aye yɛ Sanekpakpai amli yɛ wekukpaa ni ka Nyɔŋmɔ kɛ Yesu teŋ lɛ he?
9 Nyɔŋmɔ diɛŋtsɛ ye odase akɛ Yesu ji esuɔmɔ Bi, taakɛ Biblia mli niŋmalɔ Mateo kadi beni abaptisi Yesu lɛ. (Mateo 3:17) Biblia mli niŋmalɔi krokomɛi kadi nɛkɛ sane nɛɛ. Marko ŋma akɛ: “Ni gbee jɛ ŋwɛi kɛɛ: Bo ji misuɔmɔ Bi lɛ, bo ohe tsui minaal” (Marko 1:11) Luka kɛɛ: “Bo ji misuɔmɔ Bi lɛ, bo ohe tsuijurɔ minaa!” (Luka 3:22) Yohane Baptisilɔ lɛ ni baptisi Yesu lɛ ye ehe odase akɛ: “Ni mina, ni miye he odase akɛ Nyɔŋmɔ Bi lɛ nɛ.” (Yohane 1:34) No hewɔ lɛ, Nyɔŋmɔ diɛŋtsɛ, sanekpakpa lɛ ŋmalalɔi ejwɛ lɛ fɛɛ kɛ Yohane Baptisilɔ lɛ jaje yɛ faŋŋ mli akɛ Yesu ji Nyɔŋmɔ Bi. Ni yɛ sɛɛ mli be ko lɛ, yɛ be mli ni Yesu tsakemɔ lɛ ba lɛ, nɔ ko ni tamɔ nakai nɔŋŋ ba: “Ni [Nyɔŋmɔ] gbee jɛ atatu lɛ mli kɛɛ: misuɔmɔ Bi lɛ nɛ nyɛboa lɛ toi!”—Luka 9:35.
10 Ani Nyɔŋmɔ miikɛɛ akɛ lɛ nɔŋŋ ji e-Bi lɛ, ni lɛ diɛŋtsɛ etsu lɛ lɛ; ni akɛ ekpɛlɛ lɛ diɛŋtsɛ enɔ yɛ nɛkɛ saji nɛɛ amli? Dabi, Nyɔŋmɔ ni ji Tsɛ lɛ, Bɔlɔ lɛ miikɛɛ akɛ etsu e-Bi Yesu, gbɔmɔ aŋkro ni esoro lɛ kwraa lɛ kɛba koni ebatsu Nyɔŋmɔ nitsumɔ. No hewɔ lɛ, wiemɔ “Nyɔŋmɔ Bi” lɛ ji nɔ ni afɔɔ kɛ nitsumɔ yɛ Yesu he yɛ Hela Ŋmalɛ lɛ fɛɛ mli. Shi wɔnaaa shikome po akɛ akɛ wiemɔ ‘Nyɔŋmɔ ni ji Bi’ lɛ etsu nii, ejaakɛ Yesu jeee Nyɔŋmɔ ofe. Eji Nyɔŋmɔ Bi. Gbɔmɛi sɔrɔtoi enyɔ yɔɔ, ni jeee nyɔŋmɔjamɔ he nikasemɔ mli “teemɔŋ sane” ko baanyɛ atsake nakai anɔkwale lɛ.
Tsɛ lɛ Nɔ Kwɔ Fe Bi Lɛ
11. Yesu tsɔɔ akɛ Nyɔŋmɔ nɔ kwɔ fe lɛ yɛ mɛɛ gbɛ nɔ?
11 Yesu le akɛ ekɛ e-Tsɛ lɛ yeee egbɔ, shi moŋ, ehɔ eshishi yɛ nɔ fɛɛ nɔ mli. Ele akɛ eji suɔmɔ Bi ni yɔɔ suɔmɔ ni mli kwɔ kɛha e-Tsɛ lɛ. No hewɔ ni yɛ be kɛ bei amli lɛ, Yesu wieɔ wiemɔi tamɔ nɔ ni nyiɛ sɛɛ nɛɛ lɛ: “Bi lɛ diɛŋtsɛ nyɛŋ eto eyiŋ efee nɔ ko, ja nɔ ni enaa akɛ Tsɛ lɛ feɔ lɛ.” (Yohane 5:19) “Jeee mi diɛŋtsɛ misuɔmɔnaa nifeemɔ hewɔ mijɛ ŋwɛi miba, shi moŋ, mɔ ni tsu mi lɛ suɔmɔnaa nifeemɔ.” (Yohane 6:38) “Mi nitsɔɔmɔ lɛ jeee minɔŋ, shi moŋ mɔ ni tsu mi lɛ nɔŋ.” (Yohane 7:16) “Shi mi lɛ, mile lɛ [Nyɔŋmɔ], ejaakɛ eŋɔɔ mijɛ, ni lɛ etsu mi.” (Yohane 7:29) Mɔ ni nɔ kwɔ lɛ ji mɔ ni tsuɔ mɔ. Mɔ ni atsuɔ lɛ ji mɔ ni baa shi, tsulɔ lɛ. Nyɔŋmɔ ji mɔ ni tsuɔ mɔ lɛ. Yesu ji mɔ ni atsu lɛ lɛ. Amɛyeee egbɔ. Taakɛ Yesu tsɔɔ mli lɛ: “Nyɔŋ efeee enuŋtsɔ, ni asaŋ bɔfo efeee mɔ ni tsu lɛ lɛ.”—Yohane 13:16.
12. Mɛɛ nɔkwɛmɔ nɔ tsɔɔ akɛ Yesu hɔ Tsɛ lɛ shishi?
12 Afee enɛ hu faŋŋ yɛ nɔkwɛmɔ nɔ ni Yesu kɛha lɛ mli. Ekɛ e-Tsɛ ni ji Yehowa Nyɔŋmɔ, to weintrom nɔtsɛ ko ni fa gbɛ ni eshi weintrom lɛ eha apaafoi ni amɛkwɛ nɔ—ni eka shi faŋŋ akɛ amɛfeɔ Yudafoi osɔfoi lɛ ahe mfonirii lɛ he. Yɛ be ni sa mli lɛ, nɔtsɛ lɛ tsu etsulɔ koni eyahe weintrom lɛ mli yibii lɛ eko kɛba. Shi apaafoi lɛ yi tsulɔ lɛ ni amɛshwie lɛ kɛ edɛ efolo. Kɛkɛ ni nɔtsɛ lɛ tsu tsulɔ kroko, ni nakai nɔŋŋ amɛfee lɛ, etsu tsulɔ ni ji etɛ, amɛfee lɛ nakai nɔŋŋ. Kɛkɛ ni nɔtsɛ lɛ [Nyɔŋmɔ] kɛɛ: “Matsu mibi [Yesu] ni misumɔɔ lɛ; ekolɛ lɛ lɛ, kɛ amɛna lɛ lɛ, amɛhiɛ aaasɔ lɛ.” Shi apaafoi ni amɛfite lɛ kɛɛ: “Niyelɔ lɛ nɛ; nyɛbaa ni nyɛhaa wɔgbea lɛ, koni nii lɛ atsɔ wɔnɔ̃. Ni amɛtsirɛ eyisɛɛ kɛjɛ weintrom lɛ mli ni amɛyagbe lɛ.” (Luka 20:9-16) Enɛ hu feɔ lɛ faŋŋ ekoŋŋ akɛ Yesu hɔ Tsɛ lɛ shishi, ni Tsɛ lɛ tsu lɛ ni ebafee Tsɛ lɛ suɔmɔnaa nii.
13. Mɛɛ Biblia mli wiemɔi ni mli ka shi faŋŋ tsɔɔ akɛ Nyɔŋmɔ nɔ kwɔ fe Yesu?
13 Yesu diɛŋtsɛ kɛɛ: “Mitsɛ da fe mi.” (Yohane 14:28) Esa akɛ wɔhe Yesu wɔye, ejaakɛ ele anɔkwale ni kɔɔ wekukpaa ni ka ekɛ Tsɛ lɛ teŋ lɛ. Bɔfo Paulo hu le akɛ Nyɔŋmɔ nɔ kwɔ fe Yesu, ni ekɛɛ: “[Bi lɛ] lɛ diɛŋtsɛ hu eeeŋɔ ehe eto . . . [Nyɔŋmɔ] . . . shishi.” (1 Korintobii 15:28) Anaa enɛ ekoŋŋ yɛ Paulo wiemɔ ni yɔɔ 1 Korintobii 11:3 lɛ mli: “Kristo yitso ji Nyɔŋmɔ.” Yesu kpɛlɛ nɔ akɛ eyɛ Nyɔŋmɔ ko ni nɔ kwɔ beni ekɛɛ ekaselɔi lɛ akɛ: “Miiya ŋwɛi yɛ mi-Tsɛ kɛ nyɛ hu nyɛ-Tsɛ kɛ mi-Nyɔŋmɔ kɛ nyɛ hu nyɛ-Nyɔŋmɔ lɛ ŋɔɔ.”—Yohane 20:17.
14. Mɛɛ Ŋmalɛi krokomɛi tsɔɔ akɛ Yesu jeee Nyɔŋmɔ Ofe?
14 Yesu tsi bɔ ni Nyɔŋmɔ nɔ kwɔ lɛ ta beni kaselɔi lɛ ateŋ mɛi enyɔ nyɛ lɛ bi ni ebihii lɛ ateŋ mɔ kome ata Yesu ninejurɔ nɔ ni mɔ kroko lɛ hu ata ebɛku nɔ beni eeeba e-Maŋtsɛyeli lɛ mli lɛ. Eha lɛ hetoo akɛ: “Mininejurɔ kɛ mibɛku nɔ taramɔ lɛ, jeee minɔ ni mikɛhaa.” (Mateo 20:23) Eji Yesu ji Nyɔŋmɔ Ofe lɛ kulɛ, ebaanyɛ efee enɔ ni ekɛaaha. Shi jeee nakai sane lɛ ji. E-Tsɛ lɛ nɔ ni ni lɛ ekɛbaaha. Nakai nɔŋŋ hu beni egbe gbalɛ ni kɔɔ nibii agbɛjianɔtoo nɛɛ naagbee lɛ he lɛ, Yesu jaje akɛ: “Shi no gbi lɛ kɛ no ŋmlɛtswaa lɛ mɔ ko mɔ ko leee; ŋwɛibɔfoi lɛ hu leee, nibi lɛ tete leee, ja Tsɛ lɛ kome kɛkɛ.” (Marko 13:32) Eji Yesu ji Nyɔŋmɔ Ofe kulɛ, ebaale nakai gbi lɛ kɛ ŋmlɛtswaa lɛ. Shi eleee ejaakɛ ejeee Nyɔŋmɔ ni le nɔ fɛɛ nɔ. Eji Nyɔŋmɔ bi ni eleee nɔ fɛɛ nɔ ni Tsɛ lɛ le.
15. Beni Yesu baagbo lɛ, etsɔɔ akɛ ebaa ehe shi ehaa Nyɔŋmɔ yɛ mɛɛ gbɛ nɔ?
15 Beni Yesu baagbo lɛ, etsɔɔ akɛ ebaa ehe shi ehaa e-Tsɛ lɛ yɛ nɛkɛ sɔlemɔ nɛɛ mli: “Ataa, kɛji bo oosumɔ lɛ, jiemɔ kpulu nɛɛ kɛjɛ minɔ! Shi kɛlɛ, jeee bɔ ni mi misumɔɔ lɛ, shi moŋ, bɔ ni bo osumɔɔ.” (Luka 22:42) Namɔ Yesu sɔleɔ ehaa lɛ lɛ? Eesɔle eha lɛ diɛŋtsɛ ehe? Dabi, eesɔle eha e-Tsɛ ni yɔɔ ŋwɛi lɛ. Enɛ jeɔ kpo faŋŋ yɛ nɔ ni ekɛɛ nɛɛ mli: “Jeee bɔ ni mi misumɔɔ lɛ, shi moŋ bɔ ni bo osumɔɔ.” Kɛkɛ ni yɛ egbele mli lɛ, Yesu bo akɛ: “Mi-Nyɔŋmɔ, mi-Nyɔŋmɔ, mɛɛba okwa mi?” (Marko 15:34) Namɔ Yesu boɔ etsɛɔ lɛ lɛ? Eetsɛ lɛ diɛŋtsɛ ehe? Dabi, eetsɛ e-Tsɛ ni yɔɔ ŋwɛi lɛ.
16. Yɛ mɛɛ gbɛ nɔ Yesu gbele kɛ shitee lɛ tsɔɔ akɛ enyɛŋ efee Nyɔŋmɔ Ofe lɛ diɛŋtsɛ?
16 Beni Yesu gbo sɛɛ lɛ, ehi gbonyobu lɛ mli aaafee gbii etɛ. Namɔ tee lɛ shi? Akɛni egbo hewɔ lɛ, enyɛŋ ete shi lɛ diɛŋtsɛ. Ni kɛji akɛ egboko diɛŋtsɛ lɛ, belɛ enyɛŋ ewo kpɔmɔ nɔ lɛ jara kɛha Adam esha lɛ. Shi egbo diɛŋtsɛ, ni ebɛ dɔŋŋ aaafee gbii etɛ. Bɔfo Petro kɛɔ wɔ mɔ ni tee Yesu shi lɛ: “Lɛ nɔŋŋ Nyɔŋmɔ tee lɛ shi ni efɛne gbele piŋmɔi lɛ.” (Bɔfoi lɛ Asaji 2:24) Nyɔŋmɔ Ofe lɛ ni nɔ kwɔ lɛ tee mɔ ni nɔ kwɔɔɔ ni baa shi lɛ ni ji esuɔmɔ Bi Yesu shi kɛjɛ gbohii ateŋ. Akɛ nɔkwɛmɔ nɔ lɛ: Beni Yesu tee Lazaro shi kɛjɛ gbohii ateŋ lɛ, namɔ bafee mɔ ni kwɔ? Yesu nɔ kwɔ, ejaakɛ lɛ ji mɔ ni enyɛ ekɛ Lazaro ku sɛɛ ba kɛjɛ gbohii ateŋ. (Yohane 11:41-44) Nakai nɔŋŋ eji yɛ be mli ni Nyɔŋmɔ tee Yesu shi lɛ. Nyɔŋmɔ nɔ kwɔ, ejaakɛ ebaanyɛ ekɛ Yesu ajɛ gbohii ateŋ aba.
17. Mɛɛ Odaseyeli kroko yɔɔ ni tsɔɔ akɛ Yesu jeee Nyɔŋmɔ?
17 Yesu nyɛŋ afee Nyɔŋmɔ diɛŋtsɛ ni no ahi, ejaakɛ Nyɔŋmɔ bɔ Yesu. Kadimɔ bɔ ni Benjamin Wilson Emphatic Diaglott lɛ tsɔɔ Apokalips (Kpojiemɔ) shishi yɛ yitso 3, kuku 14: “Nɛkɛ nibii nɛɛ Amen lɛ kɛɔ, anɔkwafo kɛ anɔkwale odasefonyo [Yesu], Nyɔŋmɔ nibɔɔ lɛ shishijee.” Nakai nɔŋŋ Kolosebii 1:15, 16 wieɔ yɛ Yesu he akɛ: “Mɔ nɔŋŋ ni ji Nyɔŋmɔ ni anaaa lɛ lɛ subaŋ, bɔɔ nii fɛɛ ateŋ kromɔ bi lɛ. Ejaakɛ emli abɔ nii fiaa yɛ, nii ni yɔɔ ŋwɛi kɛ nii ni yɔɔ shikpɔŋ lɛ nɔ . . . nii lɛ fɛɛ lɛ, enɔ atsɔ abɔ, ni lɛ nɔŋŋ abɔ aha.” No hewɔ lɛ, Nyɔŋmɔ Ofe lɛ bɔ e-Bi lɛ tɛɛ yɛ ŋwɛi, ni “Lɛ enɔ atsɔ,” aloo “atsɔ enɔ” abɔ nibii krokomɛi ni eshwɛ lɛ fɛɛ, tamɔ bɔ ni nitsulɔ ni he esa baanyɛ ana nitsulɔ ni atsɔse lɛ ni baatsu nii aha lɛ lɛ. Yesu diɛŋtsɛ fataaa nibii ni “Lɛ enɔ atsɔ abɔ” lɛ he, ejaakɛ no mli lɛ Nyɔŋmɔ ebɔ lɛ momo. No hewɔ lɛ atsɛɔ lɛ “kromɔ bi,” “Bi koome.” Kɛ gbekɛ ko ji kromɔbi, bi koome lɛ, no etsɔɔɔ akɛ gbekɛ lɛ nɔŋŋ ji tsɛ lɛ. Etsɔɔ yɛ be fɛɛ mli akɛ gbɔmɛi sɔrɔtoi enyɔ yɔɔ, tsɛ kɛ bi.
Mumɔ Krɔŋkrɔŋ—Mɔ Ko Aloo Nifeemɔ Hewalɛ?
18. Mɛni Biblia lɛ tsɔɔ yɛ mumɔ krɔŋkrɔŋ lɛ he?
18 Shi Triniti lɛ mli mɔ ni ji etɛ lɛ hu, mumɔ krɔŋkrɔŋ lɛ, ni akɛɛ ekɛ Tsɛ kɛ Bi lɛ fɛɛ yeɔ egbɔ yɛ hewalɛ, heloo naa kɛ naanɔ lɛ hu? He ko he ko bɛ Biblia lɛ mli ni atsɔɔ akɛ mumɔ krɔŋkrɔŋ lɛ kɛ Nyɔŋmɔ kɛ Kristo yeɔ egbɔ. Akɛ nɔkwɛmɔ nɔ lɛ, beni abaptisiɔ Yesu lɛ, Marko 1:10 tsɔɔ akɛ mumɔ krɔŋkrɔŋ lɛ ba Yesu nɔ “tamɔ okpo” shi jeee yɛ adesa su mli. Mumɔ krɔŋkrɔŋ lɛ jeee gbɔmɔ ko ni miiba Yesu nɔ shi moŋ, eji Nyɔŋmɔ nifeemɔ hewalɛ. Nakai hewalɛ ni jɛ Nyɔŋmɔ ŋɔɔ lɛ ye bua Yesu koni etsa helai ni etee gbohii ashi. Taakɛ Luka 5:17 kɛɔ yɛ Diaglott lɛ mli lɛ: “Nuŋtsɔ [Nyɔŋmɔ] hewalɛ Kpeteŋkpele lɛ yɛ [Yesu] enɔ koni ekɛtsa mɛi.” Yɛ sɛɛ mli, yɛ Pentekoste lɛ, akɛ hewalɛ ni jɛ Nyɔŋmɔ ŋɔɔ nɛɛ hu ha bɔfoi lɛ koni amɛkɛtsa helai ni amɛkɛtee gbohii ashi. Ani enɛ ha amɛbafee ‘Nyɔŋmɔ fa’ ko? Dabi, aha amɛ hewalɛ kɛjɛ Nyɔŋmɔ ŋɔɔ kɛkɛ, kɛtsɔ Kristo nɔ ni amɛfee nibii ni adesai kɛkɛ nyɛŋ afee.
19. Mɛni hewɔ enyɛŋ eba akɛ mumɔ krɔŋkrɔŋ lɛ aaafee Triniti lɛ mli mɔ ni gbeɔ yi feɔ etɛ lɛ?
19 Nakai nifeemɔ hewalɛ lɛ nɔŋŋ ji nɔ ni atsi ta yɛ Efesobii 5:18, heni Paulo wo ŋaa nɛkɛ yɛ lɛ: “Nyɛyimɔa obɔ kɛ mumɔ lɛ.” Nakai nɔŋŋ hu Bɔfoi lɛ Asaji 7:55 kɛɔ yɛ Stefano he akɛ “mumɔ krɔŋkrɔŋ eyi lɛ obɔ.” Ni yɛ Pentekoste lɛ, “mumɔ krɔŋkrɔŋ bayimɔ [Yesu sɛɛnyiɛlɔi lɛ] amɛ fɛɛ amɛmli obɔbɔ.” (Bɔfoi lɛ Asaji 2:4) Ani adesa ko baanyɛ ayi adesa kroko mli obɔ? Dabi, shi hewalɛ ni baa kɛjɛɔ Nyɔŋmɔ ŋɔɔ lɛ baanyɛ ayi lɛ obɔ. Nakai mumɔ krɔŋkrɔŋ lɛ ji hewalɛ ni Nyɔŋmɔ kɛtsu nii ni ekɛbɔ jeŋ muu fɛɛ lɛ. Taakɛ 1 Mose 1:2 kɛɔ lɛ: “Ni Nyɔŋmɔ mumɔ [nifeemɔ hewalɛ] lɛ bu nui lɛ ahiɛ.”
20. Mɛɛ ninaa Stefano na ni tsɔɔ lolo akɛ Triniti lɛ jeee anɔkwale?
20 Beni atee Yesu shi lɛ sɛɛ lɛ, Stefano na ninaa ko yɛ ŋwɛi “ni ena Nyɔŋmɔ anunyam lɛ kɛ Yesu ni edamɔ Nyɔŋmɔ ninejurɔ nɔ.” (Bɔfoi lɛ Asaji 7:55) No hewɔ lɛ, gbɔmɛi sɔrɔtoi enyɔ ana yɛ ŋwɛi lɛ: (1) Nyɔŋmɔ kɛ (2) Yesu Kristo ni atee lɛ shi lɛ. Atsiii mumɔ krɔŋkrɔŋ ko ta yɛ ninaa nɛɛ mli ejaakɛ ejeee mɛi etɛ ni feɔ Triniti lɛ ateŋ mɔ ko. Akɛni mumɔ krɔŋkrɔŋ lɛ ji Nyɔŋmɔ nifeemɔ hewalɛ hewɔ lɛ, Nyɔŋmɔ ŋɔɔ ebaajɛ kɛaaba, shi jeee akɛ mɔ ko ni esoro lɛ. No hewɔ ni Stefano na mɛi enyɔ pɛ lɛ, shi jeee etɛ.
21, 22. (a) Mɛni nɔ jamɔŋ wolo ko niji ensaeklopedia kpɛlɛɔ yɛ mumɔ krɔŋkrɔŋ lɛ he? (b) Mɛni saji otii komɛi baahi wɔ nikasemɔ ni nyiɛ enɛ sɛɛ lɛ mli?
21 Yɛ mumɔ krɔŋkrɔŋ lɛ he lɛ, New Catholic Encyclopedia lɛ kpɛlɛɔ nɔ akɛ: “Kpaŋmɔ Momo lɛ susuuu Nyɔŋmɔ mumɔ lɛ he akɛ gbɔmɔ yɛ faŋŋ mli, ni efeee nakai hu yɛ jeŋnilee naa diɛŋtsɛ, ni asaŋ ejeee nakai hu yɛ Yudafoi aloo Shembii ashishinumɔ naa. Nyɔŋmɔ mumɔ lɛ ji Nyɔŋmɔ hewalɛ kɛkɛ. Kɛji akɛ yɛ bei komɛi amli lɛ, akɛdamɔɔ shi ahaa nɔ ko ni esoro no yɛ Nyɔŋmɔ he lɛ, belɛ ejɛ bɔ ni Yahwe mumɔ lɛ tsuɔ nii yɛ kponɔgbɛ loo yɛ sɛɛgbɛ lɛ hewɔ.” Ejaje hu akɛ: “Kpaŋmɔ Hee lɛ mli ŋmalɛi ni sa lɛ jieɔ Nyɔŋmɔ mumɔ lɛ kpo akɛ nɔ ko, shi jeee mɔ ko; anaa enɛ titri lɛ yɛ bɔ ni akɛ mumɔ lɛ to Nyɔŋmɔ hewalɛ lɛ he aha lɛ hewɔ.”
22 Yɛ anɔkwalei nɛɛ fɛɛ hewɔ lɛ, nɛkɛ Kristendom “shishitoo” tsɔɔmɔ ni ji Triniti lɛ nyɛŋ afee anɔkwale. Nyɔŋmɔ diɛŋtsɛ Wiemɔ lɛ teɔ shi ewoɔ nɔ ni amɛkɛɔ nɛɛ. Etsɔɔ yɛ faŋŋ mli akɛ Yehowa Nyɔŋmɔ ji Tsɛ ni yɔɔ suɔmɔ lɛ ni akɛ Yesu Kristo ji esuɔmɔ Bi ni yɔɔ suɔmɔ kpele kɛha e-Tsɛ akɛ eesumɔ ni efee toiboo kɛya gbele mli. Shi, mɛi komɛi kɛɔ akɛ Ŋmalɛi komɛi yɛ ni tamɔ nɔ ni efiɔ Triniti lɛ sɛɛ, no hewɔ lɛ, wɔbaasusu ekomɛi ahe yɛ wɔnikasemɔ ni nyiɛ enɛ sɛɛ lɛ mli. Agbɛnɛ hu wɔbaasusu nɔ hewɔ ni nɛkɛ tsɔɔmɔ; nɛɛ ebafee Kristendom tsɔɔmɔi lɛ fa ni he hiaa waa kɛ heni ejɛ hu he.a
[Shishigbɛ niŋmai]
a Ajie kɛjɛ June 1, 1988 Watchtower lɛ mli.
Te Obaaha Hetoo Tɛŋŋ?
◻ Mɛni ji nɔ ni Biblia lɛ tsɔɔ yɛ Nyɔŋmɔ kɛ Yesu he?
◻ Yɛ mɛɛ gbɛ nɔ Ŋmalɛi lɛ tsɔɔ wekukpaa ni ka Tsɛ lɛ kɛ Bi lɛ teŋ lɛ mli?
◻ Mɛni ji Ŋmalɛi komɛi ni tsɔɔ akɛ Nyɔŋmɔ nɔ kwɔ fe Yesu?
◻ Mɛni hewɔ mumɔ krɔŋkrɔŋ Iɛ nyɛŋ afee Triniti Iɛ fa lɛ?
[Mfoniri ni yɔɔ baafa 21]
Yesu jaje akɛ: “Mitsɛ da fe mi”