Adesai Anaakpɛɛ Tsamɔ Ebɛŋkɛ
“WƆNAKO enɛ eko dã!” Nakai ji bɔ ni mɛi ni kɛ amɛhiŋmɛii na bɔ ni Yesu tsa nuu ko ni miiye kuumɔ hela lɛ trukaa, yɛ naakpɛɛ gbɛ nɔ lɛ wie. (Marko 2:12) Yesu tsa shwilafoi, mumuii, kɛ akpakei hu, ni ekaselɔi lɛ hu fee nakai. Mɛɛ hewalɛ Yesu kɛfee enɛ? Mɛɛ gbɛfaŋnɔ hemɔkɛyeli ná yɛ mli? Mɛɛ shishinumɔ nɛkɛ klɛŋklɛŋ afii oha lɛ mli niiashikpamɔi nɛɛ haa wɔnáa yɛ naakpɛɛ tsamɔi ahe ŋmɛnɛ?—Mateo 15:30, 31.
“Ohemɔkɛyeli Etsao”
Hemɔkɛyeli tsalɔi ni yɔɔ ŋmɛnɛ lɛ sumɔɔ ni amɛtsĩ wiemɔ ni Yesu kɛ yoo ko ni lá eho lɛ aahu afii 12 sɔŋŋ, ní ba eŋɔɔ kɛha tsamɔ lɛ wie lɛ mli, akɛ: “Ohemɔkɛyeli etsao.” (Luka 8:43-48) Ani Yesu wiemɔ lɛ tsɔɔ akɛ yoo lɛ tsamɔ lɛ damɔ ehemɔkɛyeli nɔ? Ani eji “hemɔkɛyeli tsamɔ,” taakɛ akɛtsuɔ nii ŋmɛnɛ lɛ he nɔkwɛmɔ nɔ?
Kɛ́ wɔkane Biblia mli sane lɛ jogbaŋŋ lɛ, wɔnaa akɛ yɛ bei babaoo mli lɛ, Yesu kɛ ekaselɔi lɛ biii ni mɛi ni he yeɔ lɛ ajaje amɛ hemɔkɛyeli dani amɛtsa amɛ. Yoo ni atsĩ etã yɛ yiteŋgbɛ lɛ ba, ni ekɛɛɛ Yesu nɔ ko kwraa, kɛkɛ ni eyaje esɛɛ blɛoo, ni eta etade lɛ he, ni “amrɔ lɛ nɔŋŋ elá ni hoɔ lɛ lɛ sɛɛ fo.” Yɛ be kroko hu mli lɛ, Yesu tsa nuu ko ni fata mɛi ni eba ní amɛbamɔ lɛ kɛya lɛ ahe. Etsa nuu ko ni leee mɔ ni ji Yesu kwraa po.—Luka 22:50, 51; Yohane 5:5-9, 13; 9:24-34.
Belɛ, mɛɛ gbɛfaŋnɔ hemɔkɛyeli ná yɛ mli? Beni Yesu kɛ ekaselɔi lɛ yɔɔ Tiro kɛ Zidon kpokpaa nɔ lɛ, Foenike yoo ko ba ni ebabolɔ akɛ: “Naa mi mɔbɔ, Nuntsɔ, David bi; mibiyoo miina nɔ̃ kɛ daimonio.” Feemɔ bɔ ni ehao waa, beni ekpaa fai akɛ: “Nuntsɔ, feemɔ he eko oha mi!” lɛ he mfoniri yɛ ojwɛŋmɔ mli okwɛ. Yesu musuŋ tsɔ̃ lɛ yɛ ehewɔ, ni eha lɛ hetoo akɛ: “Oo yoo, ohemɔkɛyeli da! Afee ahao tamɔ bɔ ni otaoɔ lɛ!” Ni atsa ebiyoo lɛ “yɛ no ŋmɛlɛtswaa lɛ nɔ nɔŋŋ.” (Mateo 15:21-28) Eyɛ faŋŋ akɛ, hemɔkɛyeli yɛ sane lɛ mli, shi namɔ hemɔkɛyeli? Kadimɔ akɛ nyɛ lɛ hemɔkɛyeli ji nɔ ni Yesu jie yi lɛ, shi jeee gbekɛ ni he yeɔ lɛ nɔ̃. Ni hemɔkɛyeli yɛ mɛni mli? Yoo lɛ kɛ tsɛmɔ ni etsɛ Yesu akɛ “Nuntsɔ, David bi” lɛ miijaje eetsɔɔ yɛ faŋŋ mli akɛ Yesu ji Mesia ni awo shi yɛ ehe lɛ. Ejeee Nyɔŋmɔ mli hemɔkɛyeli kpojiemɔ folo ko kɛkɛ, loo hemɔkɛyeli ni eyɔɔ yɛ mɔ ni tsaa mɔ lɛ mli. Beni Yesu wie akɛ, “Ohemɔkɛyeli etsao” lɛ, eetsɔɔ akɛ eji amɛbɛ hemɔkɛyeli yɛ emli akɛ Mesia lɛ kulɛ, mɛi ni naa amanehulu lɛ baŋ eŋɔɔ akɛ etsa amɛ.
Wɔnyɛɔ wɔnaa kɛjɛɔ Ŋmalɛ mli nɔkwɛmɔ nii nɛɛ amli akɛ esoro tsamɔ ni Yesu tsa mɛi lɛ kwraa yɛ nɔ ni afɔɔ namɔ, loo nɔ ni akɛɔ akɛ atsa mɛi ŋmɛnɛ lɛ he. Henumɔ kpojiemɔ ni mli wa—bolɔmɔ, sɔlemɔ lalai alamɔ, yaafo, nɔ̃ ni nyɔɔ mɔ nɔ, kɛ nibii ni tamɔ nakai—jɛɛɛ gbɔmɛi asafoi babaoo lɛ aŋɔɔ, ni Yesu hu ejieee yiŋkãmɔ nifeemɔ ko kpo. Kɛfata he lɛ, Yesu nine enyɛɛɛ shi yɛ mɛi ni egbɔjɔ lɛ atsamɔ mli kɛ naajiemɔ akɛ amɛbɛ hemɔkɛyeli, aloo ákɛ amɛ shika ni amɛkɛhã lɛ faaa bɔ ni sa.
Helatsamɔi Kɛtsɔ Nyɔŋmɔ Hewalɛ Nɔ
Te Yesu kɛ ekaselɔi lɛ ahelatsamɔi lɛ ba lɛ eha tɛŋŋ? Biblia lɛ haa hetoo akɛ: “Ajie Nuntsɔ [Yehowa, NW] lɛ hewalɛ lɛ kpo yɛ jɛi ni ekɛtsa amɛ.” (Luka 5:17) Yɛ tsamɔi lɛ ekome sɛɛ lɛ, Luka 9:43 kɛɔ akɛ, “amɛ fɛɛ amɛnaa kpɛ amɛhe yɛ Nyɔŋmɔ hewalɛ kpeteŋkpele lɛ hewɔ.” Esa jogbaŋŋ akɛ Yesu gbalaaa jwɛŋmɔ kɛbaaa lɛ diɛŋtsɛ enɔ akɛ mɔ ni tsaa mɛi lɛ. Be ko lɛ ekɛɛ nuu ko ni eha eye ehe kɛjɛ daimonioi ahaomɔ shishi lɛ akɛ: “Yaa owe kɛ bo diɛŋtsɛ owekumɛi lɛ aŋɔɔ, ni oyagba amɛ niwuji ni Nuntsɔ [Yehowa, NW] lɛ efee ehao kɛ mɔbɔ ni enao lɛ.”—Marko 5:19.
Akɛni Yesu kɛ bɔfoi lɛ kɛ Nyɔŋmɔ hewalɛ tsaa mɛi lɛ hewɔ lɛ, eyɛ mlɛo akɛ aaana nɔ hewɔ ni jeee be fɛɛ be ehe hiaa ni mɔ ni atsaa lɛ lɛ ana hemɔkɛyeli kɛha tsamɔ lɛ. Shi kɛlɛ, hemɔkɛyeli ni mli wa waa he miihia yɛ mɔ ni tsaa mɔ lɛ gbɛfaŋ. No hewɔ lɛ, beni Yesu sɛɛnyiɛlɔi lɛ nyɛɛɛ amɛfã daimonio pɔtɛɛ ko ni he wa waa lɛ, Yesu kɛɛ amɛ nɔ hewɔ ni amɛnyɛɛɛ lɛ, akɛ: “Nyɛ hemɔkɛyeli ni faaa lɛ hewɔŋ.”—Mateo 17:20.
Yiŋtoo ni Yɔɔ Naakpɛɛ Tsamɔ Sɛɛ
Eyɛ mli akɛ Yesu tsa mɛi babaoo yɛ eshikpɔŋ nɔ sɔɔmɔ nitsumɔ lɛ mli fɛɛ moŋ, shi ediii ‘tsamɔ sɔɔmɔ’ sɛɛ titri. Enaakpɛɛ tsamɔi—ní eheee mɛi shika aloo ni eeebi ni ake lɛ shika yɛ he lɛ—fee nɔ ni yeɔ gbɛhe ni ji enyɔ kɛha nɔ ni he hiaa lɛ titri, ni ji ‘maŋtsɛyeli lɛ he sanekpakpa lɛ shiɛmɔ lɛ.’ (Mateo 9:35) Sane ni aŋma afɔ̃ shi lɛ kɛɔ akɛ, be ko lɛ, “ehere amɛ hiɛmɛɛ ni ejaje Nyɔŋmɔ maŋtsɛyeli lɛ he sane etsɔɔ amɛ, ni etsa mɛi ni tsamɔ ehia amɛ lɛ.” (Luka 9:11) Afɔɔ Yesu tsɛmɔ yɛ Sanekpakpa lɛ mli saji lɛ amli akɛ “Tsɔɔlɔ,” shi jeee akɛ “Tsalɔ.”
Belɛ, mɛni hewɔ ni Yesu tsa mɛi yɛ naakpɛɛ gbɛi anɔ lɛ mɔ? Titri lɛ, efee nakai koni ekɛma nɔ mi akɛ lɛ ji shiwoo Mesia lɛ. Beni awo Yohane Baptisilɔ lɛ tsuŋ yɛ gbɛ ni ejaaa nɔ lɛ, etao nɔmimaa ni tsɔɔ akɛ etsu nitsumɔ ni Nyɔŋmɔ tsu lɛ akɛ ebatsu lɛ egbe naa. Etsu lɛ diɛŋtsɛ ekaselɔi lɛ kɛtee Yesu ŋɔɔ koni amɛyabi lɛ akɛ: “Ani bo ji mɔ ni baa lɛ, aloo wɔkwɛ mɔ kroko gbɛ?” Kadimɔ nɔ ni Yesu kɛɛ Yohane kaselɔi lɛ: “Nyɛyaa ni nyɛyagbaa Yohane nɔ ni nyɛnuɔ kɛ nɔ ni nyɛnaa nɛɛ: Shwilafoi miina nii, ni obubuafoi miinyiɛ; kpitiyelɔi ahe miitse, ni toimulɔi miinu nii; gbohii miite shi, ni ohiafoi lɛ, aajaje sanekpakpa lɛ aatsɔɔ amɛ.”—Mateo 11:2-5.
Hɛɛ, anɔkwale ni eji akɛ jeee tsamɔ pɛ Yesu tsa mɛi, shi moŋ etsu naakpɛɛ nitsumɔi ni aŋmala ashwie shi yɛ Sanekpakpai lɛ mli lɛ mã nɔ mi faŋŋ akɛ lɛ ji “mɔ ni baa lɛ,” shiwoo Mesia lɛ. Ehe ehiaaa ni mɔ ko kwraa ‘akwɛ mɔ kroko gbɛ.’
Naakpɛɛ Tsamɔi Ŋmɛnɛ Hu?
Belɛ, ani esa akɛ wɔkpa gbɛ akɛ Nyɔŋmɔ baaye ehewalɛ he odase ŋmɛnɛ kɛtsɔ helatsamɔi anɔ? Dabi. Yesu tsɔ helai ni etsa yɛ naakpɛɛ gbɛi anɔ kɛtsɔ Nyɔŋmɔ hewalɛ nɔ lɛ anɔ ema nɔ mi ní ŋwanejee ko kwraa bɛ he akɛ lɛ ji Mesia ni Nyɔŋmɔ ewo shi yɛ ehe akɛ ebaaba lɛ. Aŋmala Yesu hewalɛ nitsumɔi lɛ yɛ Biblia lɛ mli koni mɛi fɛɛ akane. Ehe ehiaaa ni Nyɔŋmɔ aye ehewalɛ he odase dɔŋŋ kɛtsɔ nakai nifeemɔi lɛ ní eeeti mli eha gbɔmɛi ayinɔi fɛɛ lɛ nɔ.
Nɔ ni yɔɔ miishɛɛ ji akɛ, helatsamɔi kɛ naakpɛɛ nitsumɔi krokomɛi lɛ kɔneɔ mɔ yiŋ kɛyashiɔ he ko pɛ. Mɛi ni na Yesu naakpɛɛ nii lɛ ateŋ mɛi komɛi po heee yeee akɛ eyɛ eŋwɛi Tsɛ lɛ sɛɛfimɔ. “Tsɛbelɛ efee okadii wuji yɛ amɛhiɛ, shi kɛlɛ amɛheee enɔ amɛyeee.” (Yohane 12:37) No hewɔ ni, beni ewie naakpɛɛ duromɔ keenii sɔrɔtoi—gbalɛi, lilɛi sɔrɔtoi awiemɔ, helatsamɔi, kɛ nibii krokomɛi—ní Nyɔŋmɔ kɛha klɛŋklɛŋ afii oha lɛ mli Kristofoi asafo lɛ mli bii sɔrɔtoi lɛ ahe egbe naa lɛ, akɛ mumɔ tsirɛ bɔfo Paulo ni ewie akɛ: “Kɛji gbalɛi ni lɛ, amɛsɛɛ baafo; kɛji wiemɔi ni lɛ, abaafɔ̃ɔ; kɛji nilee ni lɛ, esɛɛ baafo. Ejaakɛ wɔnii ni wɔle lɛ, fã-kɛ-fã ni, ni wɔgbalɛ hu fã-kɛ-fã ni. Shi kɛ́ nɔ ni eye emuu lɛ ba lɛ, no lɛ nɔ ni ji fã-kɛ-fã lɛ sɛɛ aaafo.”—1 Korintobii 12:28-31; 13:8-10.
Lɛɛlɛŋ, Nyɔŋmɔ mli hemɔkɛyeli namɔ he miihia kɛha wɔ hilɛ-kɛhamɔ. Shi, mɔ ko hemɔkɛyeli ni eeeha edamɔ helatsamɔi ahe amale shiwoi anɔ lɛ kɛ nijiaŋwujee pɛ baaba. Kɛfata he lɛ, Yesu kɛ kɔkɔbɔɔ nɛɛ hã, yɛ naagbee be lɛ he akɛ: “Amale Kristoi kɛ amale gbalɔi baate shi ni amɛaafee okadii kɛ naakpɛɛ nibii wuji amɛtsɔɔ koni amɛkɛshishiu, kɛ aaahi lɛ, mɛi ni ahala amɛ lɛ tete.” (Mateo 24:24, NW) Yɛ shishiumɔ kɛ lakamɔi asɛɛ lɛ, daimonioi ahewalɛ kpojiemɔi hu baaba mli. Enɛ hewɔ lɛ, esaaa akɛ nifeemɔi komɛi ni akɛɔ akɛ anyɛɛɛ atsɔɔ shishi lɛ feɔ wɔ naakpɛɛ, ni eka shi faŋŋ akɛ, enɛɛmɛi jeee nɔdaamɔ nɔ kɛha Nyɔŋmɔ mli anɔkwa hemɔkɛyeli namɔ.
Akɛni mɔ ko kwraa tsaaa mɛi yɛ naakpɛɛ gbɛi anɔ ŋmɛnɛ tamɔ bɔ ni Yesu fee lɛ hewɔ lɛ, ani wɔmiilaaje nɔ ko? Dabi kwraa. Yɛ anɔkwale mli lɛ, yɛ naagbee lɛ, mɛi ni Yesu tsa amɛ lɛ ahe baanyɛ aye ekoŋŋ. Amɛ fɛɛ amɛgbɔlɔ ni amɛgboi. Helatsamɔ mli sɛɛnamɔi ni amɛná lɛ hi shi be kukuoo ko pɛ. Ni kɛlɛ, Yesu naakpɛɛ tsamɔi lɛ hiɛ shishinumɔ ni sɛɛ tsɛɔ ejaakɛ amɛfeɔ wɔsɛɛ be mli jɔɔmɔi ahe mfoniri.
Enɛ hewɔ lɛ, yɛ Nyɔŋmɔ Wiemɔ, Biblia lɛ mlitaomɔ sɛɛ lɛ, Alexandre kɛ Benedita, ni atsĩ amɛ tã kɛtsɔ hiɛ lɛ, kɛ amɛ hemɔkɛyeli wooo ŋmɛnɛŋmɛnɛ beaŋ hemɔkɛyeli tsamɔi kɛ mumɔŋ helatsamɔi amli dɔŋŋ. Shi yɛ nakai beaŋ nɔŋŋ lɛ, amɛhe amɛye akɛ naakpɛɛ helatsamɔi lɛ jeee nibii ni ba yɛ blema beaŋ pɛ kɛkɛ. Mɛni hewɔ? Taakɛ gbɔmɛi akpekpei abɔ ni yɔɔ je lɛŋ fɛɛ lɛ ji lɛ, amɛmiikpa jɔɔmɔi ni ji helatsamɔi ni baaba yɛ Nyɔŋmɔ Maŋtsɛyeli lɛ shishi lɛ agbɛ.—Mateo 6:10.
Hela kɛ Gbele Bɛ Dɔŋŋ
Taakɛ wɔna kɛtsɔ hiɛ lɛ, yiŋtoo titri ni yɔɔ Yesu sɔɔmɔ nitsumɔ lɛ sɛɛ lɛ jeee ni etsa helatsɛmɛi ní efee naakpɛɛ nii krokomɛi. Shi moŋ, ekɛ Nyɔŋmɔ Maŋtsɛyeli lɛ he sanekpakpa lɛ shiɛmɔ fee enitsumɔ titri. (Mateo 9:35; Luka 4:43; 8:1) Nakai Maŋtsɛyeli lɛ ji gbɛ ni Nyɔŋmɔ baatsɔ nɔ etsu adesai anaakpɛɛ tsamɔ he nii ni esaa fitemɔ ni esha kɛ emuu ni wɔyeee lɛ kɛba adesai aweku lɛ nɔ lɛ. Mɛɛ gbɛ nɔ ebaatsɔ, ni mɛɛ be ebaatsu enɛɛmɛi fɛɛ?
Beni egbaa nɔ ni baaba yɛ wɔsɛɛ be mli efɔ̃ɔ shi lɛ, Kristo Yesu kɛ gbalɛ mli ninaa ko hã bɔfo Yohane, akɛ: “Agbɛnɛ yiwalaheremɔ lɛ kɛ hewalɛ lɛ kɛ maŋtsɛyeli lɛ etsɔ wɔ-Nyɔŋmɔ lɛ nɔ̃, ni akɛ hegbɛ lɛ eha e-Kristo (mɔ ni efɔ lɛ mu) lɛ.” (Kpojiemɔ 12:10) Odaseyelii lɛ fɛɛ tsɔɔ akɛ ashɛ Nyɔŋmɔ shitee-kɛ-wolɔ kpele, ni ji Satan afɔ̃ shikpɔŋ lɛ niiaŋ kɛjɛ afi 1914 kɛbaa, ni amrɔ nɛɛ Maŋtsɛyeli lɛ miitsu nii akɛ nɔ ni yɔɔ diɛŋtsɛ! Akɛ Yesu eta maŋtsɛsɛi nɔ akɛ Mesia Maŋtsɛyeli lɛ nɔ Maŋtsɛ, ni efee klalo amrɔ nɛɛ akɛ ebaafee tsakemɔi wuji yɛ shikpɔŋ nɔ.
Yɛ wɔsɛɛ be ni ebɛŋkɛ kpaakpa mli lɛ, Yesu ŋwɛi nɔyeli lɛ baaye adesai ajalɛ gbɛjianɔtoo hee, ni ji “shikpɔŋ hee” ko nɔ. (2 Petro 3:13) Te shihilɛ lɛ baatamɔ aha tɛŋŋ? Naa ehe mfoniri ko ni yɔɔ nyam, ni atsɔ hiɛ akɛha: “Mina ŋwɛi hee kɛ shikpɔŋ hee; ejaakɛ tsutsu ŋwɛi lɛ kɛ tsutsu shikpɔŋ lɛ eho etee . . . Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpojiemɔ 21:1, 4.
Ani obaanyɛ ofee bɔ ni shihilɛ baatamɔ ahã, kɛji adesai atsamɔ yɛ naakpɛɛ gbɛ nɔ lɛ ba mli lɛɛlɛŋ lɛ he mfoniri yɛ ojwɛŋmɔ mli okwɛ? “Maŋbii lɛ ateŋ mɔ ko ekɛɛŋ akɛ: ‘Migbɔjɔ!’ Ejaakɛ mɛi ni yɔɔ mli lɛ, aaaŋɔ amɛ nishaianii lɛ afa amɛ.” Hɛɛ, Nyɔŋmɔ baatsu nɔ ni hemɔkɛyeli tsalɔi nyɛŋ amɛtsu kɔkɔɔkɔ lɛ. “Eeemi gbele kɛaatee naanɔ.” Lɛɛlɛŋ, “Nuntsɔ Yehowa aaatsumɔ hiɛaŋ fɛɛ yaafonui.”—Yesaia 25:8; 33:24.
[Mfoniri ni yɔɔ baafa 7]
Abaatsa adesai yɛ naakpɛɛ gbɛ nɔ yɛ Nyɔŋmɔ Maŋtsɛyeli lɛ shishi