Yitso 24

Nɔ Hewɔ ni Yesu Ba Shikpɔŋ Nɔ

ETƆ Yesu waa yɛ gbi ni ekɛ ekaselɔi ejwɛ lɛ ye yɛ Kapernaum lɛ mli, ni eba naagbee kɛ Kapernaum maŋ lɛ mlibii ni kɛ amɛmɛi fɛɛ ni he yeɔ lɛ ba eŋɔɔ koni etsa amɛ yɛ nakai gbɛkɛ lɛ. Enaaa be ko kwraa kɛha lɛ diɛŋtsɛ ehe.

Amrɔ nɛɛ enɔ jetsɛremɔ leebi maŋkpa nɛ. Beni duŋ ewo lolo lɛ, Yesu te shi ni ekometoo eje kpo. Ni enyiɛ kɛtee he ko banee, yɛ he ni ebaanyɛ esɔle yɛ eha e-Tsɛ lɛ yɛ teemɔŋ. Shi be ni Yesu na eha ehe nɛɛ sɛɛ etsɛɛɛ ejaakɛ beni Petro kɛ mɛi krokomɛi lɛ yɔse akɛ etee he ko lɛ, amɛje kpo koni amɛyatao lɛ.

Beni amɛna Yesu lɛ, Petro kɛɛ: “Bo mɛi fɛɛ taoɔ nɛɛ.” Kapernaum maŋ lɛ mlibii lɛ miitao ni Yesu kɛ amɛ ahi shi. Amɛhiɛ esɔ nɔ ni efee eha amɛ lɛ yɛ anɔkwale mli! Shi ani oti ni Yesu kɛba shikpɔŋ nɔ ji ni ebatsa mɛi yɛ naakpɛɛ gbɛ nɔ kɛkɛ? Mɛni ji nɔ ni ekɛɛ yɛ enɛ he?

Taakɛ saji ni yɔɔ Biblia lɛ mli lɛ ekome kɛɔ lɛ, Yesu ha ekaselɔi lɛ ahetoo akɛ: “Nyɛhaa wɔyaa maji ni jwere wɔhewɔhewɔ nɛɛ amli, koni mayashiɛ yɛ jɛi hu; ejaakɛ no hewɔ miba.” Eyɛ mli akɛ gbɔmɛi lɛ wo Yesu hewalɛ ni ehi shi moŋ, shi ekɛɛ amɛ akɛ: “Esa akɛ miyajajeɔ Nyɔŋmɔ maŋtsɛyeli lɛ he sanekpakpa lɛ mitsɔɔ maji krokomɛi hu, ejaakɛ no hewɔ atsu mi.”

Hɛɛ, yiŋtoo titri hewɔ ni Yesu ba shikpɔŋ nɛɛ nɔ ji ni ebashiɛ Nyɔŋmɔ Maŋtsɛyeli, ni baatse e-Tsɛ gbɛi ahe ni ena adesai anaagbai fɛɛ anaa tsabaa kɛya naanɔ lɛ he sane. Shi kɛlɛ, Yesu tsa mɛi yɛ naakpɛɛ gbɛ nɔ, koni ekɛye odase akɛ Nyɔŋmɔ ji mɔ ni tsu lɛ. Nakai nɔŋŋ hu, afii ohai abɔ ni etsɔ hiɛ lɛ, Mose fee naakpɛɛ nii bɔni afee ni ekɛma hegbɛ ni eyɔɔ akɛ Nyɔŋmɔ tsulɔ lɛ nɔ mi.

Agbɛnɛ, beni Yesu shi Kapernaum koni eyashiɛ yɛ maji krokomɛi amli lɛ, ekaselɔi ejwɛ lɛ kɛ lɛ tee. Mɛi ejwɛ nɛɛ ji Petro kɛ enyɛminuu Andrea, kɛ Yohane kɛ enyɛminuu Yakobo. Obaakai akɛ yɛ otsi ni tsɔ nɛkɛ be nɛɛ hiɛ lɛ mli lɛ, Yesu fɔ nine etsɛ amɛ koni amɛbafee enanemɛi nitsulɔi ni kɛ lɛ baafa gbɛ.

Gbɛ ni Yesu kɛ ekaselɔi ejwɛ lɛ fa ni amɛyashiɛ yɛ Galilea fɛɛ lɛ ye omanye waa diɛŋtsɛ! Yɛ anɔkwale mli lɛ, enitsumɔi lɛ ahe amaniɛbɔɔ gbɛ shwa kɛyashɛ Siria niiaŋ po tɔɔ. Gbɔmɛi asafoi babaoo ni jɛ Galilea, Yudea, kɛ Yordan Faa lɛ sɛɛ niiaŋ fɛɛ banyiɛ Yesu kɛ ekaselɔi lɛ asɛɛ. Marko 1:35-39; Luka 4:42, 43; Mateo 4:23-25; 2 Mose 4:1-9, 30, 31.

▪ Mɛni ba yɛ gbi ni etɔ Yesu waa yɛ Kapernaum lɛ nɔ jetsɛremɔ?

▪ Mɛni hewɔ atsu Yesu kɛba shikpɔŋ nɔ lɛ, ni mɛɛ yiŋtoo yɔɔ naakpɛɛ nibii ni efee lɛ sɛɛ?

▪ Namɛi fata Yesu he kɛfa gbɛ kɛtee Galilea ni eyashiɛ yɛ jɛmɛ lɛ, ni te ahere nibii ni Yesu fee lɛ nɔ aha tɛŋŋ?