Ani Nɔ ko Tsirɛɔ Bo Koni Ofee Nii Tamɔ Bɔ ni Yesu Fee Lɛ?

“Ena mɛi babaoo, ni emusuŋ tsɔ lɛ yɛ amɛhewɔ, ejaakɛ amɛtamɔ tooi ni bɛ kwɛlɔ; ni ebɔi amɛ nibii pii tsɔɔmɔ.”—MARKO 6:34.

 1. Mɛni hewɔ aŋkroaŋkroi jieɔ sui ni sa yijiemɔ kpo ni anuɔ enɛ shishi lɛ?

AŊKROAŊKROI pii éjie sui kpakpai ni sa yijiemɔ kpo yɛ yinɔsane bei fɛɛ mli. Ni obaanyɛ onu nɔ hewɔ lɛ shishi. Yehowa Nyɔŋmɔ yɛ ni ejieɔ suɔmɔ, mlihilɛ, ejurɔfeemɔ, kɛ sui krokomɛi ni wɔbuɔ nomɛi waa lɛ akpo. Abɔ gbɔmɛi yɛ Nyɔŋmɔ subaŋ nɔ. No hewɔ lɛ wɔbaanyɛ wɔna nɔ hewɔ ni mɛi pii jieɔ suɔmɔ, mlihilɛ, mɔbɔnalɛ, kɛ Nyɔŋmɔ sui krokomɛi akpo kɛyashɛɔ he ko, tamɔ bɔ ni mɛi pii tsɔɔ akɛ amɛyɛ henilee ko lɛ. (1 Mose 1:26; Romabii 2:14, 15) Shi ekolɛ obaanyɛ oyoo akɛ, mɛi komɛi jieɔ nɛkɛ sui kpakpai nɛɛ akpo oya fe bɔ ni mɛi krokomɛi feɔ.

 2. Mɛni ji nitsumɔi kpakpai komɛi ni gbɔmɛi baanyɛ atsu, ni ekolɛ amɛbaanu he akɛ amɛmiikase Kristo?

2 Ekolɛ ole hii kɛ yei ni fɔɔ helatsɛmɛi asaramɔ loo amɛyeɔ amɛbuaa amɛ, amɛjieɔ musuŋtsɔlɛ kpo amɛtsɔɔ mɛi ni eje kpa, aloo amɛkeɔ ohiafoi anii babaoo. Agbɛnɛ hu susumɔ aŋkroaŋkroi ni amɛ musuŋtsɔlɛ tsirɛɔ amɛ koni amɛkɛ amɛshihilɛ be atsu nii yɛ kpitiyelɔi loo awusai ashihilɛhei, ni jɛɔ amɛsuɔmɔ mli amɛtsuɔ nii yɛ helatsamɔhei loo gbɔiatoohei kɛha ohiafoi, aloo gbɔmɛi ni bɔɔ mɔdɛŋ ni amɛye amɛbua mɛi ni bɛ shihilɛhei loo abobalɔi lɛ ahe okwɛ. Eeenyɛ efee akɛ amɛteŋ mɛi komɛi nuɔ he akɛ amɛmiikase Yesu, ni to okadi efɔ̃ shi kɛha Kristofoi lɛ. Wɔkaneɔ yɛ Sanekpakpai lɛ amli akɛ Kristo tsa helatsɛmɛi ni elɛ mɛi ni hɔmɔ yeɔ amɛ lɛ. (Marko 1:34; 8:1-9; Luka 4:40) Suɔmɔ, mlijɔlɛ, kɛ mɔbɔnalɛ ni Yesu jie lɛ kpo lɛ jieɔ “Kristo” ni lɛ hu ekaseɔ eŋwɛi Tsɛ lɛ “jwɛŋmɔ” lɛ kpo.—1 Korintobii 2:16.

 3. Bɔni afee ni wɔná Yesu nitsumɔi kpakpai lɛ ahe jwɛŋmɔ ni ŋmɛɔ pɛpɛɛpɛ lɛ, mɛni ehe hiaa ni wɔsusu he?

3 Shi ani oyoo akɛ, ŋmɛnɛ, mɛi ni Yesu suɔmɔ kɛ musuŋtsɔlɛ lɛ ená amɛnɔ hewalɛ lɛ ateŋ mɛi pii kuɔ amɛhiɛ amɛshwieɔ nɔ titri ni kɔɔ Kristo jwɛŋmɔ lɛ he lɛ nɔ? Wɔbaanyɛ wɔyoo enɛ kɛtsɔ Marko yitso 6 lɛ hesusumɔ jogbaŋŋ nɔ. Wɔkaneɔ yɛ jɛmɛ akɛ gbɔmɛi kɛ helatsɛmɛi ba Yesu ŋɔɔ koni etsa amɛ. Wɔkaseɔ kɛjɛɔ sane muu lɛ fɛɛ hu mli akɛ, beni ena akɛ hɔmɔ miiye gbɔmɛi akpei abɔ lɛ ni amɛ́ba emasɛi lɛ, Yesu tsɔ naakpɛɛ gbɛ nɔ elɛ amɛ. (Marko 6:35-44, 54-56) Helatsɛmɛi ni etsa amɛ kɛ mɛi ni hɔmɔ yeɔ amɛ lɛ ni elɛ amɛ lɛ jieɔ suɔmɔ ni musuŋtsɔlɛ yɔɔ mli kpo, shi ani enɛɛmɛi ji gbɛ̀i titrii ni Yesu tsɔ nɔ eye ebua mɛi krokomɛi lɛ? Ni mɛni ji gbɛ ni hi fe fɛɛ ni wɔɔtsɔ nɔ wɔkase esuɔmɔ, mlihilɛ, kɛ mɔbɔnalɛ he nɔkwɛmɔnɔ ni yeɔ emuu lɛ, taakɛ ekase Yehowa lɛ?

Nɔ ko Tsirɛ Lɛ Koni Etsu Mumɔŋ Hiamɔ Nii Ahe Nii

 4. Mɛɛ shihilɛ nɔ adamɔ aŋma sane ni yɔɔ Marko 6:30-34 lɛ?

4 Mɛi ni ebɔle Yesu he lɛ anii fee lɛ mɔbɔ, titri lɛ yɛ amɛmumɔŋ hiamɔ nii lɛ ahewɔ. Nakai hiamɔ nii lɛ ji nii ni he hiaa titri, babaoo po fe gbɔmɔtsoŋ hiamɔ nii. Susumɔ sane ni yɔɔ Marko 6:30-34 lɛ he okwɛ. Nɔ ni ba ni aŋma afɔ̃ shi yɛ jɛmɛ lɛ tee nɔ yɛ Galilea Ŋshɔ lɛ naa, kɛmiibɛŋkɛ Hehoo ni aye yɛ afi 32 Ŋ.B. lɛ. Bɔfoi lɛ ná miishɛɛ, ni yɛ yiŋtoo kpakpa hewɔ. Akɛni amɛgbe gbɛfaa kakadaŋŋ ko naa hewɔ lɛ, amɛba Yesu ŋɔɔ, ŋwanejee ko bɛ he akɛ amɛhe miitswa shi ni amɛgba lɛ amɛ niiashikpamɔi lɛ. Shi asafo babaoo ko bua amɛhe naa. Amɛyi fa aahu akɛ Yesu kɛ ebɔfoi lɛ nyɛɛɛ aye nii aloo ni amɛaajɔɔ amɛhe po. Yesu kɛɛ bɔfoi lɛ akɛ: “Nyɛ sɔŋŋ nyɛbaa ni wɔtea ŋa lɛ nɔ he ko banee, ni nyɛyajɔɔa nyɛhe fioo.” (Marko 6:31) Amɛbote lɛlɛ mli, ekolɛ yɛ Kapernaum masɛi, ni amɛtsɔ Galilea Ŋshɔ lɛ hiɛ kɛtee he ko ni yɔɔ dioo. Shi asafoi lɛ jo foi kɛtsɔ ŋshɔ lɛ naa ni amɛyashɛ jɛmɛ dani lɛlɛ lɛ yashɛ. Mɛni Yesu baafee yɛ enɛ he? Ani ehao akɛ aatutua eteemɔhe lɛ po? Dabi kwraa!

 5. Te Yesu nu asafoi ni ba eŋɔɔ lɛ he eha tɛŋŋ, ni mɛni efee yɛ he?

5 Yesu musuŋ tsɔ lɛ yɛ gbɔmɛi akpei abɔ ni ena amɛ, ni helatsɛmɛi ni kɛ miishɛɛ miimɛ lɛ lɛ fata he lɛ ahewɔ. (Mateo 14:14; Marko 6:44) Beni egbalaa jwɛŋmɔ kɛyaa nɔ ni tée Yesu musuŋtsɔlɛ shi kɛ bɔ ni E-tsu he nii eha lɛ nɔ lɛ, Marko ŋma akɛ: “Ena mɛi babaoo, ni emusuŋ tsɔ lɛ yɛ amɛhewɔ, ejaakɛ amɛtamɔ tooi ni bɛ kwɛlɔ; ni ebɔi amɛ nibii pii tsɔɔmɔ.” (Marko 6:34) Yesu na nɔ ni fe gbɔmɛi babaoo ko kɛkɛ. Ena aŋkroaŋkroi ni mumɔŋ nibii ahe miihia amɛ. Amɛtamɔ tooi ni bɛ yelikɛbuamɔ ko ni amɛ́gbɛ amɛshwã, ni bɛ tookwɛlɔ ko ni baanyiɛ amɛhiɛ kɛya lɛɛhei ni yɔɔ frɔfrɔ, aloo ni amɛbu amɛhe. Yesu le akɛ jamɔ mli hiɛnyiɛlɔi ni amɛnaaa mɔbɔ, ni kulɛ esa akɛ amɛfee tookwɛlɔi ni kwɛɔ tooi lɛ anɔ lɛ gbeɔ gbɔmɛi foji lɛ ahe guɔ ni amɛkuɔ amɛhiɛ amɛshwieɔ amɛmumɔŋ hiamɔ nii anɔ. (Ezekiel 34:2-4; Yohane 7:47-49) Yesu kɛ amɛ baaye yɛ gbɛ ni yɔɔ srɔto nɔ, ebaafee nɔ ni hi fe fɛɛ kɛha amɛ. Eje shishi etsɔɔ amɛ saji ni kɔɔ Nyɔŋmɔ Maŋtsɛyeli lɛ he lɛ he nii.

 6, 7. (a) Mɛɛ hiamɔ nii titri Sanekpakpai lɛ jie lɛ kpo yɛ bɔ ni Yesu tsuɔ gbɔmɛi lɛ ahiamɔ nii ahe nii lɛ hewɔ? (b) Mɛɛ kanyamɔ Yesu kɛshiɛ ni ekɛtsɔɔ mɛi anii?

6 Kadimɔ bɔ ni eto saji anaa eha kɛ bɔ ni etsu saji ni he hiaa titri lɛ ahe nii klɛŋklɛŋ yɛ sane ko ni tamɔ nakai nɔŋŋ mli. Luka ni ji tsofafeelɔ ni yɔɔ mɛi krokomɛi agbɔmɔtsoŋ hewalɛnamɔ he miishɛɛ waa lɛ ji mɔ ni ŋma enɛ. ‘Asafoi lɛ tiu Yesu kɛtee; ni ehere amɛ hiɛmɛɛ ni ejaje Nyɔŋmɔ maŋtsɛyeli lɛ he sane etsɔɔ amɛ, ni etsa mɛi ni tsamɔ ehia amɛ lɛ.’ (Luka 9:11; Kolosebii 4:14) Eyɛ mli akɛ ebɛ lɛ nakai yɛ sane fɛɛ sane ni kɔɔ naakpɛɛ nii he lɛ he moŋ, shi mɛni ji nɔ ni Luka sane ni jɛ mumɔŋ lɛ kadi no klɛŋklɛŋ kwraa? No ji anɔkwale ni eji akɛ Yesu tsɔɔ gbɔmɛi lɛ anii lɛ.

7 Enɛ kɛ nɔ ni ama nɔ mi ni wɔnaa yɛ Marko 6:34 lɛ kpãa gbee diɛŋtsɛ. Nakai kuku lɛ tsɔɔ nɔ titri ni tsirɛ Yesu koni ejie emɔbɔnalɛ lɛ kpo yɛ faŋŋ mli. Etsɔɔ gbɔmɛi lɛ anii, ni etsu amɛmumɔŋ hiamɔ nii ahe nii. Yesu etsɔ hiɛ ekɛɛ yɛ esɔɔmɔ nitsumɔ lɛ shishijee mli akɛ: “Esa akɛ miyajajeɔ Nyɔŋmɔ maŋtsɛyeli lɛ he sanekpakpa lɛ mitsɔɔ maji krokomɛi hu, ejaakɛ no hewɔ atsu mi.” (Luka 4:43) Ni kɛlɛ, kɛji akɛ wɔsusu akɛ Yesu jaje Maŋtsɛyeli shɛɛ sane lɛ akɛ nitsumɔ ko ni kã enɔ kɛkɛ, akɛ ekɛ henumɔ ko kɛkɛ tsu shiɛmɔ nitsumɔ ni kã enɔ lɛ jabejabe ni miishɛɛ ko bɛ mli lɛ, no lɛ wɔmiilaka wɔhe. Dabi, esuɔmɔ kɛ mɔbɔnalɛ kɛha gbɔmɛi lɛ ji nɔ titri ni kanya lɛ ni ha eshiɛ sanekpakpa lɛ etsɔɔ amɛ. Nɔ ni hi fe fɛɛ ni Yesu baanyɛ atsu—kɛha helatsɛmɛi, mɛi ni daimonioi haoɔ amɛ, ohiafoi, loo mɛi ni hɔmɔ yeɔ amɛ lɛ po ji—ni eye ebua amɛ ni amɛle, ni amɛkpɛlɛ, ni amɛsumɔ anɔkwale ni kɔɔ Nyɔŋmɔ Maŋtsɛyeli lɛ he lɛ nɔ. Nakai anɔkwale lɛ ji nɔ ni he hiaa titri yɛ nii ni Maŋtsɛyeli lɛ baatsu ni ekɛbu jeŋ muu fɛɛ maŋtsɛ ni Yehowa ji lɛ bem ni ekɛ naanɔ jɔɔmɔi abaha adesai lɛ mli.

 8. Te Yesu nu eshiɛmɔ kɛ enitsɔɔmɔ lɛ he eha tɛŋŋ?

8 Ekãa ni Yesu kɛshiɛ Maŋtsɛyeli lɛ he sane lɛ kɔɔ nɔ tuuntu hewɔ ni eba shikpɔŋ nɔ lɛ he. Yesu kɛɛ Pilato kɛmiiba eshikpɔŋ nɔ sɔɔmɔ nitsumɔ lɛ naagbee gbɛ lɛ akɛ: “Mi lɛ, enɛ hewɔ afɔ mi ni enɛ hewɔ nɔŋŋ miba je lɛ mli, koni mibaye anɔkwale lɛ he odase. Mɔ fɛɛ mɔ ni jɛ anɔkwale lɛ mli lɛ nuɔ migbee.” (Yohane 18:37) Wɔtsɔ hiɛ wɔle yɛ nikasemɔi enyɔ ni tsɔ hiɛ lɛ amli akɛ Yesu ji gbɔmɔ ni yɔɔ mlijɔlɛ henumɔi—ekwɛɔ mɔ, anyɛɔ abɛŋkɛɔ lɛ, esusuɔ mɔ he, anyɛɔ akɛ he fɔ̃ɔ enɔ, ni nɔ ni fe fɛɛ lɛ, esumɔɔ mɔ. Ehe miihia ni wɔhiɛ asɔ nakai sui kpakpai ni ehiɛ nɛɛ kɛji akɛ wɔmiisumɔ ni wɔnu Kristo jwɛŋmɔ lɛ shishi lɛɛlɛŋ. Ehe miihia ni wɔyoo hu akɛ nɔ ni fata Kristo jwɛŋmɔ lɛ he ji bɔ ni ebu eshiɛmɔ kɛ nitsɔɔmɔ nitsumɔ lɛ akɛ amɛhe hiaa waa lɛ.

Ewo Mɛi Krokomɛi Ahewalɛ ni Amɛye Odase

 9. Namɛi esa akɛ shiɛmɔ kɛ nitsɔɔmɔ afee nɔ ni he hiaa amɛ titri?

9 Bɔ ni eha shiɛmɔ kɛ nitsɔɔmɔ nitsumɔ lɛ fee nɔ ni he hiaa—akɛ suɔmɔ kɛ mɔbɔnalɛ kpojiemɔ lɛ—jeee nɔ ni yɔɔ kɛha Yesu pɛ. Ewo esɛɛnyiɛlɔi lɛ hewalɛ ni amɛkase eyiŋtoi ni ekɛfeɔ nii, nibii ni he hiaa lɛ titri, kɛ enifeemɔi. Ákɛ nɔkwɛmɔnɔ lɛ, beni Yesu hala ebɔfoi 12 lɛ sɛɛ lɛ, mɛni amɛbaatsu agbɛnɛ? Marko 3:14, 15 kɛɔ wɔ akɛ: “Ehala mɛi nyɔŋma kɛ enyɔ, koni amɛkɛ lɛ abahi shi, ni etsu amɛ shiɛmɔ, ni amɛná hegbɛ amɛkɛtsa helai lɛ, ni amɛkɛfa daimonioi lɛ hu.” (Wɔma efã ko nɔ mi.) Ani onaa hiamɔ nii titri ko kɛha bɔfoi lɛ yɛ enɛ mli?

10, 11. (a) Beni Yesu tsuɔ bɔfoi lɛ, mɛni ekɛɛ amɛ akɛ amɛyafee? (b) Yɛ shihilɛ mli ni etsu bɔfoi lɛ yɛ lɛ hewɔ lɛ, mɛni titri abaagbala jwɛŋmɔ kɛya nɔ?

10 Yɛ be ko sɛɛ lɛ, Yesu ha mɛi 12 lɛ nyɛ amɛtsa mɛi krokomɛi ahelai ni amɛfamɔ daimonioi. (Mateo 10:1; Luka 9:1) Kɛkɛ ni etsu amɛ koni amɛya “Israel we tooi ni elaaje lɛ aŋɔɔ.” Koni amɛyafee mɛni? Yesu kɛɛ amɛ akɛ: “Ni nyɛyaa nɛɛ, nyɛshiɛa nyɛkɛɛa akɛ: Ŋwɛi maŋtsɛyeli lɛ eshɛ shi etã. Nyɛtsáa helatsɛmɛi, nyɛhaa kpitiyelɔi ahe atsea, nyɛteea gbohii ashi, nyɛfamɔa daimonioi.” (Mateo 10:5-8; Luka 9:2) Yɛ anɔkwale mli lɛ, mɛni amɛtsu? “Ni amɛyiŋ amɛtee, ni [1] amɛyashiɛ amɛtsɔɔ mɛi akɛ amɛtsake amɛtsui. Ni [2] amɛfamɔ daimonioi pii, ni amɛfɔfɔɔ helatsɛmɛi pii amu ni amɛtsá amɛ.”—Marko 6:12, 13.

11 Akɛni atsĩii nitsɔɔmɔ tã klɛŋklɛŋ yɛ saji nɛɛ fɛɛ eko mli hewɔ lɛ, ani bɔ ni ato saji anaa aha taakɛ wɔkadi nɛɛ kɛ shishinumɔ kroko miifata saji ni he hiaa titri lɛ he loo yiŋtoi ni yɔɔ sɛɛ lɛ ahe? (Luka 10:1-8) Ojogbaŋŋ, esaaa akɛ wɔkuɔ wɔhiɛ wɔshwieɔ shii abɔ ni atsiɔ nitsɔɔmɔ tã dani helatsamɔ baa lɛ nɔ. Susumɔ sane muu lɛ fɛɛ he yɛ biɛ okwɛ. Dani Yesu aaatsu bɔfoi 12 lɛ, no mli lɛ shihilɛ mli ni asafoi lɛ yɔɔ lɛ esa ehe waa. Wɔkaneɔ akɛ: “Yesu kpa maji lɛ kɛ akrowai lɛ fɛɛ nɔ, ni etsɔɔ nii yɛ amɛkpeehei lɛ, ni eshiɛɔ maŋtsɛyeli lɛ he sanekpakpa lɛ, ni etsáa hela fɛɛ hela kɛ hejaramɔ fɛɛ hejaramɔ yɛ maŋ lɛŋ. Shi beni ena mɛi babaoo lɛ, emusuŋ tsɔ lɛ yɛ amɛhewɔ, akɛni etɔ amɛ ni amɛfee yuyaa tamɔ tooi ni bɛ kwɛlɔ lɛ. Kɛkɛ ni ekɛɛ ekaselɔi lɛ akɛ: Nikpamɔ lɛ fa moŋ, shi nitsulɔi lɛ faaa. No hewɔ lɛ nyɛkpaa nikpamɔ nuntsɔ lɛ fai, koni ewo nitsulɔi agbɛ kɛba enikpamɔ lɛ mli!”—Mateo 9:35-38.

12. Yesu kɛ ebɔfoi lɛ anaakpɛɛ nitsumɔi lɛ baanyɛ atsu mɛɛ yiŋtoo kroko ni fata he lɛ he nii?

12 Akɛni amɛkɛ lɛ yɔɔ hewɔ lɛ, bɔfoi lɛ baanyɛ aná Kristo jwɛŋmɔ lɛ eko. Amɛbaanyɛ amɛnu he akɛ, gbɔmɛi lɛ ahe suɔmɔ kɛ musuŋtsɔlɛ diɛŋtsɛ ni amɛyɔɔ lɛ fata Maŋtsɛyeli lɛ shiɛmɔ kɛ ehe nitsɔɔmɔ—ni baafee amɛnitsumɔi kpakpai lɛ fã titri lɛ ahe. Yɛ enɛ kɛ gbeekpamɔ naa lɛ, heloonaa nitsumɔi kpakpai, tamɔ helatsɛmɛi atsamɔ fee babaoo fe mɛi ni ehia amɛ ni aye abua amɛ kɛkɛ. Taakɛ obaanyɛ osusu he lɛ, tsamɔi kɛ niyenii ni atsɔɔ naakpɛɛ gbɛ nɔ akɛhaa lɛ baanyɛ agbala gbɔmɛi babaoo. (Mateo 4:24, 25; 8:16; 9:32, 33; 14:35, 36; Yohane 6:26) Shi, yɛ gbɔmɔtsoŋ yelikɛbuamɔ ni eji lɛ sɛɛ lɛ, nakai nitsumɔi lɛ tsirɛ mɛi ni naa lɛ koni amɛyoo akɛ Yesu ji Nyɔŋmɔ Bi kɛ “gbalɔ” ni Mose gba yɛ ehe lɛ.—Yohane 6:14; 5 Mose 18:15.

13. Gbalɛ ni yɔɔ 5 Mose 18:18 lɛ ma mɛɛ nitsumɔ nɔ mi kɛha “gbalɔ” ni baaba lɛ?

13 Mɛni hewɔ ákɛ Yesu ji “gbalɔ” lɛ sa kadimɔ waa nakai lɛ? Ojogbaŋŋ, mɛni ji nitsumɔ titri ni agba afɔ̃ shi kɛha nakai mɔ lɛ? Ani “gbalɔ” lɛ baahe gbɛi yɛ naakpɛɛ helatsamɔi ni efeɔ lɛ loo musuŋtsɔlɛ gbɛ ni etsɔɔ nɔ ekɛ niyenii haa mɛi ni hɔmɔ yeɔ amɛ lɛ hewɔ? Mose Wolo ni Ji Enumɔ lɛ yitso 18:18 gba akɛ: “Mibatee gbalɔ ko shi maha amɛ kɛaajɛ amɛnyɛmimɛi lɛ ateŋ tamɔ bo [Mose], ni mikɛ miwiemɔi lɛ aaawo enaa, ni eeewie nii fɛɛ ni mawo lɛ he kita lɛ etsɔɔ amɛ.” No hewɔ lɛ, akɛni bɔfoi lɛ kase bɔ ni amɛaaná ni amɛjie mlijɔlɛ henumɔi akpo hewɔ lɛ, amɛbaanyɛ amɛmu sane naa akɛ Kristo jwɛŋmɔ lɛ baaje kpo yɛ amɛshiɛmɔ kɛ nitsɔɔmɔ nitsumɔ lɛ hu mli. No baafee nɔ ni hi fe fɛɛ ni amɛaanyɛ amɛfee amɛha gbɔmɛi. Kɛtsɔ no nɔ lɛ, helatsɛmɛi kɛ ohiafoi anine baashɛ sɛɛnamɔi ni hiɔ shi daa nɔ, jeee nɔ ni anáa yɛ adesa wala be kuku loo shikome loo shii enyɔ niyenii pɛ mli kɛkɛ lɛ.—Yohane 6:26-30.

Ná Kristo Jwɛŋmɔ lɛ Ŋmɛnɛ

14. “Kristo jwɛŋmɔ” lɛ ni wɔɔná lɛ kɔɔ wɔshiɛmɔ lɛ he yɛ mɛɛ gbɛ nɔ?

14 Wɔteŋ mɔ ko bɛ ni baasusu Kristo jwɛŋmɔ lɛ he akɛ eji nɔ ko ni ekaaa kɛha klɛŋklɛŋ afii oha lɛ mli bii lɛ—kɛha Yesu kɛ klɛŋklɛŋ kaselɔi lɛ ni Paulo ŋma yɛ amɛhe akɛ: “Wɔhiɛ Kristo jwɛŋmɔ” lɛ. (1 Korintobii 2:16) Ni wɔbaakpɛlɛ nɔ amrɔ nɔŋŋ akɛ gbɛnaa nii kã wɔnɔ akɛ wɔshiɛ sanekpakpa lɛ ni wɔfee kaselɔi. (Mateo 24:14; 28:19, 20) Kɛlɛ, sɛɛnamɔ yɛ he akɛ wɔɔsusu yiŋtoi ni wɔ diɛŋtsɛ wɔkɛtsuɔ nakai nitsumɔ lɛ he. Esaaa akɛ ejɛɔ nitsumɔ ko ni wɔnuɔ he kɛkɛ akɛ ekã wɔnɔ lɛ mli. Suɔmɔ kɛha Nyɔŋmɔ ji yiŋtoo titri hewɔ ni wɔkɛ wɔhe woɔ sɔɔmɔ nitsumɔ lɛ mli lɛ, ni yɛ anɔkwale mli lɛ, ní wɔɔtamɔ Yesu lɛ fata musuŋtsɔlɛ ni aaatsirɛ wɔ ni wɔshiɛ ni wɔtsɔɔ nii lɛ he.—Mateo 22:37-39.

15. Mɛni hewɔ musuŋtsɔlɛ ji wɔ maŋ sɔɔmɔ nitsumɔ lɛ fã ni sa jogbaŋŋ lɛ?

15 Abaanyɛ akpɛlɛ nɔ akɛ, jeee be fɛɛ be eyɔɔ mlɛo akɛ aaaná musuŋtsɔlɛ aha mɛi ni heee nibii ni wɔheɔ wɔyeɔ lɛ amɛyeee, titri lɛ kɛ wɔkɛ shikpilikpiifeemɔ kpe, amɛkpoo wɔ, loo amɛte shi amɛwo wɔ lɛ. Ni kɛlɛ, kɛji akɛ wɔɔŋmɛɛ suɔmɔ kɛ musuŋtsɔlɛ ni wɔyɔɔ kɛha gbɔmɛi lɛ ahe lɛ, wɔbaalaaje kanyamɔ ni he hiaa ni haa wɔnáa Kristofoi asɔɔmɔ nitsumɔ lɛ mli gbɛfaŋnɔ lɛ. Belɛ te wɔɔfee tɛŋŋ wɔná musuŋtsɔlɛ? Wɔbaabɔ mɔdɛŋ ni wɔna gbɔmɛi tamɔ bɔ ni Yesu na amɛ lɛ, akɛ “etɔ amɛ ni amɛfee yuyaa tamɔ tooi ni bɛ kwɛlɔ.” (Mateo 9:36) Ani jeee nɛkɛ mɛi pii tamɔ ŋmɛnɛ? Apasa jamɔ mli tookwɛlɔi ekpoo amɛ ni amɛshwila amɛhiŋmɛi yɛ mumɔŋ. Yɛ enɛ hewɔ lɛ, amɛleee gbɛtsɔɔmɔ kpakpa ni anaa yɛ Biblia lɛ mli lɛ loo Paradeiso shihilɛi ni etsɛŋ ni Nyɔŋmɔ Maŋtsɛyeli lɛ kɛbaaba wɔ shikpɔŋ lɛ nɔ lɛ ahe nɔ ko. Amɛkɛ daa gbi shihilɛ mli haomɔi kpeɔ—ni nɔ ni fata he ji ohia, weku mli béi, hela, kɛ gbele—ni amɛbɛ Maŋtsɛyeli lɛ he hiɛnɔkamɔ ko kwraa. Wɔyɛ nɔ ni he hiaa amɛ lɛ: Nyɔŋmɔ Maŋtsɛyeli ni ato ama shi yɛ ŋwɛi bianɛ lɛ he sanekpakpa ni hereɔ mɔ yiwala lɛ!

16. Mɛni hewɔ esa akɛ wɔsumɔ akɛ wɔɔgba mɛi krokomɛi sanekpakpa lɛ he sane lɛ?

16 Kɛji akɛ osusu mɛi ni ebɔleo kɛkpe lɛ amumɔŋ hiamɔ nii ahe nɛkɛ lɛ, ani otsui tsirɛɛɛ bo ni osumɔ akɛ ooofee nɔ fɛɛ nɔ ni ooonyɛ koni ogba amɛ Nyɔŋmɔ yiŋtoo ni suɔmɔ yɔɔ mli lɛ ahe saji? Hɛɛ, wɔnitsumɔ lɛ ji musuŋtsɔlɛ nitsumɔ. Kɛji akɛ wɔnuɔ he wɔhaa gbɔmɛi tamɔ bɔ ni Yesu fee lɛ, ebaaje kpo yɛ wɔgbee mli, bɔ ni wɔfeɔ wɔhiɛ wɔhaa, kɛ gbɛ ni wɔtsɔɔ nɔ wɔtsɔɔ mɛi anii lɛ mli. Enɛɛmɛi fɛɛ baaha wɔ shɛɛ sane lɛ afee nɔ ni ŋɔɔ mɛi abɔ ni “ajie ato naanɔ wala lɛ” naa.—Bɔfoi lɛ Asaji 13:48.

17. (a) Mɛni ji gbɛ̀i komɛi ni wɔɔtsɔ nɔ wɔjie wɔsuɔmɔ kɛ musuŋtsɔlɛ kpo wɔtsɔɔ mɛi krokomɛi? (b) Mɛni hewɔ enɛ jeee sane ni kɔɔ ejurɔfeemɔ nitsumɔi ni wɔtsuɔ aloo maŋ sɔɔmɔ nitsumɔ lɛ ni wɔkɛ wɔhe woɔ mli lɛ he lɛ?

17 Esa akɛ wɔsuɔmɔ kɛ musuŋtsɔlɛ lɛ aje kpo yɛ wɔshihilɛ gbɛ lɛ fɛɛ mli. Nɔ ni fata enɛ he ji wɔmli ni aaahi aha mɛi ni efi amɛ, helatsɛmɛi, kɛ ohiafoi—ni wɔfee nɔ ni sa ni wɔɔnyɛ ni wɔkɛjie amɛ kɛjɛ amɛpiŋmɔ lɛ mli. Ekɔɔ mɔdɛŋ ni wɔbɔɔ yɛ wiemɔ kɛ nifeemɔ mli koni wɔkɛshɛje mɛi ni amɛsuɔlɔi egboi lɛ amii lɛ he. (Luka 7:11-15; Yohane 11:33-35) Kɛlɛ, esaaa akɛ nɛkɛ suɔmɔ, mlihilɛ, kɛ mɔbɔnalɛ nitsumɔi ni ajieɔ lɛ kpo nɛɛ feɔ nɔ pɛ ni wɔkɛ wɔnitsumɔi kpakpai lɛ tsuɔ he nii, taakɛ eji yɛ gbɔmɛi komɛi ni kɛɛ ejurɔfeemɔ nitsumɔi amɛtsuɔ lɛ ahe lɛ. Nɔ ni sɛɛ tsɛɔ ni sa kadimɔ waa ji mɔdɛŋbɔi ni Nyɔŋmɔ sui ni tamɔ nakai kanyaa, shi ajieɔ lɛ kpo yɛ Kristofoi ashiɛmɔ kɛ nitsɔɔmɔ nitsumɔ lɛ mli gbɛfaŋnɔ ni anáa lɛ amli lɛ. Kaimɔ nɔ ni Yesu wie yɛ Yudafoi ajamɔ mli hiɛnyiɛlɔi lɛ ahe lɛ: “Nyɛhaa kowɛ kɛ anisi kɛ kumino mlijaa nyɔŋmanyɔŋma, shi mla lɛ mli nii ni he jaraa ni ji kojomɔ kɛ mɔbɔnalɛ kɛ hemɔkɛyeli lɛ moŋ lɛ nyɛshiɔ; shi kulɛ eja akɛ nyɛfeɔ enɛɛmɛi, ni nyɛkashi eko lɛ hu.” (Mateo 23:23) Kɛha Yesu lɛ, ejeee enɛ loo ekroko lɛ—ákɛ eeeye ebua gbɔmɛi yɛ amɛgbɔmɔtsoŋ hiamɔ nii amli aloo ni eeetsɔɔ amɛ mumɔŋ saji ni haa wala. Yesu fee enyɔ lɛ fɛɛ. Ni kɛlɛ, eyɛ faŋŋ akɛ enitsɔɔmɔ nitsumɔ lɛ baa klɛŋklɛŋ, ejaakɛ ejurɔ ni efee lɛ baanyɛ aye abua amɛ kɛya naanɔ.—Yohane 20:16.

18. Esa akɛ Kristo jwɛŋmɔ lɛ ni wɔsusuɔ he lɛ atsirɛ wɔ kɛya mɛni he?

18 Kwɛ bɔ ni wɔbaanyɛ wɔda shi akɛ Yehowa ejie Kristo jwɛŋmɔ lɛ kpo etsɔɔ wɔ! Wɔbaanyɛ wɔtsɔ Sanekpakpai lɛ anɔ wɔle gbɔmɔ ni fe mɔ fɛɛ mɔ ni ehi shi pɛŋ lɛ susumɔi, henumɔi, sui kpakpai, nitsumɔi, kɛ nibii ni he hiaa lɛ titri lɛ jogbaŋŋ. Ekã wɔnɔ akɛ wɔkane, wɔjwɛŋ nɔ, ni wɔkɛ nɔ ni Biblia lɛ jieɔ lɛ kpo yɛ Yesu he lɛ atsu nii yɛ wɔshihilɛ mli. Kaimɔ akɛ, kɛ wɔɔfee wɔnii tamɔ Yesu fee lɛɛlɛŋ lɛ, belɛ klɛŋklɛŋ lɛ esa akɛ wɔkase bɔ ni ejwɛŋ, bɔ ni enu nii ahe eha, ni wɔŋmɛ saji wɔkwɛ taakɛ efee lɛ, yɛ gbɛ ni hi fe fɛɛ ni wɔɔnyɛ akɛ adesai ni yeee emuu lɛ nɔ. Belɛ nyɛhaa wɔtswaa wɔfai shi akɛ wɔbaaná ni wɔbaajie Kristo jwɛŋmɔ lɛ kpo. Gbɛ ko bɛ ni hi ni wɔɔtsɔ nɔ wɔhi shi, gbɛ ko bɛ ni hi ni wɔɔtsɔ nɔ wɔkɛ gbɔmɛi aye, ni gbɛ ko bɛ ni hi kɛha wɔ kɛ mɛi krokomɛi ni wɔɔtsɔ nɔ wɔbɛŋkɛ mɔ ni jie Yehowa, wɔ-Nyɔŋmɔ ni mli jɔ lɛ sui akpo yɛ gbɛ ni yeɔ emuu nɔ lɛ he kpaakpa fe enɛ.—2 Korintobii 1:3; Hebribii 1:3.

Te Obaaha Hetoo Oha Tɛŋŋ?

• Mɛɛ shishinumɔ Biblia lɛ kɛhaa yɛ bɔ ni Yesu fɔɔ gbɔmɛi ni ehia amɛ lɛ ahiamɔ nii ahe nitsumɔ lɛ he?

• Mɛni Yesu ma nɔ mi yɛ esɛɛnyiɛlɔi lɛ agbɛtsɔɔmɔ mli?

• Te wɔɔfee tɛŋŋ wɔjie “Kristo jwɛŋmɔ” lɛ kpo yɛ wɔnitsumɔi amli?

[Baafa muu mfoniri ni yɔɔ baafa 23]

[Mfoniri ni yɔɔ baafa 24]

Mɛni ji nɔkpakpa ni fe fɛɛ ni Kristofoi baanyɛ afee aha mɛi krokomɛi?