Yitso 53

Nɔyelɔ ni Nɔ Kwɔ Fe Adesai ni Asumɔɔ Lɛ

BENI Yesu lɛ mɛi akpei abɔ lɛ yɛ naakpɛɛ gbɛ nɔ lɛ, efee mɛi lɛ naakpɛɛ. Amɛkɛɛ: “Anɔkwa, mɔ nɛ ji gbalɔ lɛ ni baa je lɛŋ lɛ.” Amɛmu sane naa akɛ jeee akɛ Yesu ji gbalɔ ni nɔ kwɔ fe Mose lɛ kɛkɛ, shi moŋ ebaafee nɔyelɔ ko ni asumɔɔ esane waa. No hewɔ amɛtee eyinɔ apam akɛ amɛbaamɔ lɛ ni amɛwo lɛ maŋtsɛ.

Shi, Yesu le nɔ ni gbɔmɛi lɛ kpaŋɔ yɛ ehe lɛ. No hewɔ lɛ eshi jɛmɛ oya koni no akaha amɛkɛ ekaa wo lɛ maŋtsɛ lɛ. Ewo mɛi babaoo ni yɔɔ jɛmɛ lɛ gbɛ ni amɛya ni efa ekaselɔi lɛ ni amɛbote lɛlɛ mli ni amɛku amɛsɛɛ kɛya Kapernaum. Kɛkɛ ni etee gɔji lɛ anɔ koni eyasɔle. Nakai gbɛkɛ lɛ, Yesu hi jɛmɛ ekometoo.

Beni eshwɛ fioo ni je baatsɛre lɛ, Yesu jɛ he ni edamɔ ni nɔ kwɔ nɛɛ ni ena akɛ ahum kpeteŋkpele ko miitswa waa yɛ ŋshɔ lɛ hiɛ. Akɛni be lɛ bɛŋkɛ Hehoo lɛ hewɔ lɛ, nyɔŋtsere lɛ miihe aye emuu, ni ekpɛmɔ lɛ ha Yesu na ekaselɔi lɛ tara lɛlɛ mli yɛ ŋshɔ lɛ hiɛ ni amɛmiibɔ mɔdɛŋ ni amɛwiri yɛ ŋshɔkei ni efee hamahama lɛ amli. Hii lɛ miiwiri kɛ amɛhewalɛ fɛɛ.

Beni Yesu na nakai lɛ, ekpeleke shi kɛjɛ gɔŋ lɛ nɔ ni ebɔi nyiɛmɔ kɛ ŋshɔkei lɛ foo kɛ lɛlɛ lɛ bɛŋkɛmɔ. Beni Yesu shɛɔ lɛlɛ lɛ masɛi lɛ, no mli lɛ lɛlɛ lɛ etee aaafee shitoi etɛ loo ejwɛ jɛkɛmɔ. Shi, etee nɔ enyiɛ aahu tamɔ nɔ ni eehe eho amɛhe kɛya. Beni kaselɔi lɛ na lɛ lɛ, amɛbolɔ amɛkɛɛ: ‘Enɛ lɛ ninaa ko nɛ!’

Kɛkɛ ni Yesu kɛ miishɛjemɔ here amɛ nɔ akɛ: “Nyɛnaa tsui; miŋ, nyɛkashea gbeyei.”

Shi Petro kɛɛ: “Nuŋtsɔ kɛji boŋ lɛ, fã mi koni matsɔ nu lɛ hiɛ kɛba oŋɔɔ.”

Ni Yesu ha lɛ hetoo akɛ: “Ba!”

Yɛ jɛmɛ nɔŋŋ kɛkɛ ni Petro je lɛlɛ lɛ mli ni ebɔi nu lɛ hiɛ nyiɛmɔ kɛ Yesu masɛi yaa. Shi beni Petro kwɛ ahum ni tswaa lɛ, etsui fã, ni ebɔi nu lɛ shishi yaa, ni ebolɔ akɛ: “Nuŋtsɔ, heremɔ mi!”

Amrɔ nɔŋŋ kɛkɛ ni Yesu kpa enine mli ni emɔ emli ni ekɛɛ lɛ akɛ: “Bo ni ohemɔkɛyeli faaa, mɛni hewɔ oje ŋwane?”

Beni Yesu kɛ Petro babote lɛlɛ lɛ mli lɛ, ahum lɛ kpa tswaa, ni efee kaselɔi lɛ naakpɛɛ. Shi ani esa akɛ efee amɛ naakpɛɛ? Eji amɛnu “nɔ ni aboloo lɛ tsɔɔ lɛ shishi” kɛtsɔ amɛhiɛ ni aaasɔ naakpɛɛ nii wulu ni Yesu fee aaafee ŋmɛlɛtswai fioo ni eho lɛ yɛ be mli ni ekɛ aboloi enumɔ kɛ looi bibii enyɔ lɛ mɛi akpei abɔ lɛ kulɛ, esaaa akɛ efeɔ amɛ naakpɛɛ akɛ eeenyɛ enyiɛ nu lɛ hiɛ ni efa ni ahum lɛ akpa tswaa. Shi kɛlɛ, agbɛnɛ kaselɔi lɛ bakoto Yesu ni amɛkɛɛ: “Lɛlɛŋ, Nyɔŋmɔ Bi jio.”

Etsɛɛɛ ni amɛshɛ Genesaret, ni ji shikpɔŋ tɛtrɛɛ fɛfɛo ni woɔ yibii waa ni bɛŋkɛ Kapernaum lɛ. Jɛmɛ amɛyafi amɛlɛlɛ lɛ yɛ. Shi beni amɛyimɔ shi kɛtee ŋshɔ lɛ naa lɛ, gbɔmɛi lɛ yoo Yesu ni amɛtsu kɛtee jɛi niiaŋ fɛɛ, ni ayatao mɛi ni he yeɔ lɛ kɛba. Beni akɛ mɛi ni amɛjwere amɛsaatsei anɔ nɛɛ ba ni amɛta Yesu atade naamui lɛ ahe pɛ kɛkɛ ni amɛhe wa amɛ.

Shi beni enɛ yaa nɔ lɛ, asafo babaoo ni na be mli ni elɛ mɛi akpei abɔ yɛ naakpɛɛ gbɛ nɔ lɛ na akɛ Yesu eshi jɛmɛ. No hewɔ lɛ beni lɛji bibii lɛ jɛ Tiberia amɛbashɛ shi lɛ, amɛyakwɔlɔ ni amɛkɛfo mli kɛtee Kapernaum ni amɛmiitao Yesu. Beni amɛna lɛ lɛ, amɛbi lɛ akɛ: “Rabi, te be ni oba biɛŋ?” Kɛkɛ ni Yesu ka amɛhiɛ, taakɛ bɔ ni etsɛŋ ni wɔbaana lɛ. Yohane 6:14-25; Mateo 14:22-36; Marko 6:45-56.

▪ Beni Yesu elɛ mɛi akpei abɔ lɛ yɛ naakpɛɛ gbɛ nɔ sɛɛ lɛ, mɛni gbɔmɛi lɛ taoɔ ni amɛfee lɛ agbɛnɛ?

▪ Mɛni Yesu na kɛjɛ gɔŋ ni etsi ehe kɛtee nɔ lɛ nɔ, ni no ha efee mɛni?

▪ Mɛni hewɔ ni esaaa akɛ nibii nɛɛ haa kaselɔi lɛ anaa kpɛɔ amɛhe lɛ?

▪ Mɛni ba yɛ be mli ni amɛyashɛ ŋshɔ lɛ naa lɛ?