Yitso 58

Abolooi lɛ kɛ Masha Lɛ

GBƆMƐI asafo babaoo ko eba Yesu ŋɔɔ yɛ Dekapolis maji lɛ amli. Mɛi pii jɛ shɔŋŋ kɛba nɛkɛ kpokpaa ni Jeŋmajiaŋbii fa yɛ jɛmɛ nɛɛ nɔ koni amɛbabo lɛ toi ni etsa amɛhelai lɛ. Amɛhiɛ kɛntɛŋi agboi loo flɔtɔi ni amɛfɔɔ kɛ niyenii teremɔ kɛ amɛmiifa gbɛ kɛmiitsɔ Jeŋmajiaŋbii ashikpɔŋ nɔ lɛ kɛba.

Shi, yɛ naagbee lɛ, Yesu tsɛ ekaselɔi lɛ ni ekɛɛ: “Mimusuŋ miitsɔ mi yɛ asafo lɛ hewɔ, ejaakɛ amɛkɛ mi ehi shi gbii etɛ sɔŋŋ, ni amɛnaaa nɔ ko amɛye. Ni kɛji miha amɛkɛ amɛmusuŋ hɔmɔ yiŋ kɛmiiya amɛwe lɛ, amɛyaatɔ biti yɛ gbɛ teŋ; ejaakɛ amɛteŋ mɛi komɛi ajɛɛhe jɛkɛ.”

Ni kaselɔi lɛ bi lɛ akɛ: “Nɛgbɛ aaana aboloo yɛ, yɛ ŋa nɛɛ nɔ, ni aaashɛ mɛnɛɛmɛi anaa?”

Yesu bi amɛ akɛ: “Abolooi enyiɛ nyɛyɔɔ?”

Amɛha hetoo akɛ: “Kpawo, kɛ looi bibii fioo ko.”

Kɛkɛ ni efa ni gbɔmɛi lɛ atara shi, ni Yesu kɔlɔ abolooi lɛ kɛ looi lɛ, ni esɔle eha Nyɔŋmɔ, ni ekumɔ mli, ni ekɛbɔi ekaselɔi lɛ hamɔ. Ni amɛ hu, amɛkɛha gbɔmɛi lɛ, ni amɛ fɛɛ amɛye ni amɛtɔrɔ. Sɛɛ mli lɛ, beni abua nɔ ni shwɛ lɛ naa lɛ, ana kafui lɛ obɔbɔi kpawo, eyɛ mli akɛ hii aaafee 4,000, kɛ yei kɛ gbekɛbii hu fɛɛ ye eko!

Ni Yesu wo asafo lɛ gbɛ amɛtee, ni ekɛ ekaselɔi lɛ bote lɛlɛ mli, ni amɛfo kɛtee Galilea Ŋshɔ lɛ anaigbɛ naabu lɛ. Kɛkɛ ni agbɛnɛ Farisifoi lɛ, ni jamɔ mli kuu ni ale amɛ akɛ Sadukifoi lɛ fata amɛhe lɛ bɔ mɔdɛŋ ni amɛka Yesu yɛ biɛ kɛtsɔ bimɔ ni amɛbi lɛ ni efee ŋwɛi okadi ko etsɔɔ amɛ lɛ nɔ.

Shi akɛni Yesu le akɛ amɛmiibɔ mɔdɛŋ ni amɛka lɛ hewɔ lɛ, eha amɛ hetoo akɛ: “Gbɛkɛ mli lɛ, nyɛkɛɔ akɛ: ‘Jeŋ baatse, ejaakɛ ŋwɛi etsu.’ Ni leebi lɛ nyɛkɛɔ akɛ: ‘Ŋmɛnɛ, nugbɔ baanɛ; ejaakɛ ŋwɛi etsu ni ehiɛ eha.’ Osatofoi, nyɛle ŋwɛi hiɛ nibii amli buu, shi yinɔi lɛ ahe okadii lɛ nyɛnyɛɛɛ nyɛbu lo?”

Enɛ hewɔ lɛ, Yesu tsɛ amɛ yinɔbii fɔji kɛ gbalafitelɔi ni ebɔ amɛ kɔkɔ akɛ, taakɛ ekɛɛ Farisifoi lɛ kɛtsɔ hiɛ lɛ, ahaŋ amɛ okadi ko akɛ ja Yona okadi lɛ. Kɛkɛ ni ekɛ ekaselɔi lɛ bote lɛlɛ mli ni amɛyi mli kɛmiiya Betsaida yɛ Galilea Ŋshɔ lɛ kooyi-boka gbɛ ŋshɔ lɛ naa. Beni amɛyaa lɛ, kaselɔi lɛ kai akɛ amɛhiɛ ekpa nɔ ni amɛaakɔlɔ abolooi, ejaakɛ aboloo kome pɛ amɛhiɛ.

Akɛni Yesu jwɛŋmɔ yɔɔ kpe ni ekɛ Farisifoi kɛ Sadukifoi ni fiɔ Herode sɛɛ lɛ kpe etsɛko tsɔ lɛ nɔ hewɔ lɛ, ewo amɛ ŋaa akɛ: “Nyɛkwɛa jogbaŋŋ, ni nyɛhiɛ ahia nyɛhe nɔ yɛ Farisifoi lɛ amãsha kɛ Herode mãsha lɛ hewɔ.” Eka shi faŋŋ akɛ mãsha ni etsi ta lɛ ha kaselɔi lɛ susu akɛ Yesu miiwie amɛhiɛ ni ekpa aboloo ni amɛkɛaaba nɔ lɛ he, no hewɔ lɛ amɛbɔi sane lɛ naataomɔ yɛ amɛteŋ. Ni Yesu yoo amɛnaataomɔ lɛ, ekɛɛ: “Mɛni hewɔ nyɛwiewieɔ yɛ nyɛteŋ akɛ aboloo ni nyɛhiɛɛɛ lɛ hewɔŋ?”

Etsɛko tsɔ ni Yesu tsɔ naakpɛɛ gbɛ nɔ eha mɛi akpei abɔ aboloo, ni ekolɛ efee naagbee naakpɛɛ nii nɛɛ, gbi kome loo gbii enyɔ pɛ nɛ. Esa akɛ amɛle akɛ jeee heloo naa aboloo diɛŋtsɛ he ewieɔ lɛ. Ekai amɛ akɛ: “Beni mikumɔ abolooi enumɔ lɛ mli miha mɛi akpei enumɔ lɛ, fufuji kafui enyiɛ nyɛhole?”

Amɛha hetoo akɛ: “Nyɔŋma-kɛ-enyɔ.”

“Ni beni mikumɔ kpawo lɛ mli miha mɛi akpei ejwɛ lɛ hu lɛ, fufuji flɔtɔi enyiɛ nyɛhole?”

Amɛkɛɛ: “Kpawo.”

Ni Yesu bi amɛ akɛ: “Te tɛŋŋ ni nyɛnaaa nii anaa lolo nɛɛ? Te tɛŋŋ ni nyɛnaaa naa akɛ jeee aboloo hewɔ ni mikɛɛ nyɛ akɛ nyɛhiɛ ahia nyɛhe nɔ yɛ Farisifoi kɛ Sadukifoi lɛ amãsha lɛ hewɔ lɛ?”

Yɛ naagbee lɛ kaselɔi lɛ nu oti lɛ shishi. Mãsha, ni yɔɔ hewalɛ ko ni haa nii shaa ni ehaa bodobodo fuɔ lɛ, ji wiemɔ ko ni akɛdamɔɔ shi ahaa fitemɔ. No hewɔ lɛ kaselɔi lɛ nu shishi agbɛnɛ akɛ Yesu kɛmiifee okadi, ni akɛ eebɔ amɛ kɔkɔ ni amɛkwɛ amɛhe nɔ jogbaŋŋ yɛ “Farisifoi kɛ Sadukifoi lɛ atsɔɔmɔ lɛ hewɔ,” ejaakɛ nakai tsɔɔmɔ lɛ yɛ hewalɛ ni fiteɔ mɔ. Marko 8:1-21; Mateo 15:32–16:12.

▪ Mɛni hewɔ ni gbɔmɛi lɛ hiɛ kɛntɛŋi wuji kɛfaa gbɛ lɛ?

▪ Beni Yesu shi Dekapolis lɛ, mɛɛ lɛlɛ mli gbɛi efa?

▪ Mɛɛ sane naataomɔ ko ba kaselɔi lɛ ateŋ yɛ Yesu wiemɔ ni kɔɔ mãsha lɛ he lɛ hewɔ?

▪ Mɛni Yesu wiemɔi ni ji “Farisifoi kɛ Sadukifoi amãsha” lɛ tsɔɔ?