Bɔ ni Kristo Tsakemɔ lɛ Saa Ohe Ehaa
Bianɛ hii ejwɛ ko kwɔ gɔŋ ko ni kwɔ. Nɔ ko ni yɔɔ naakpɛɛ ba yɛ gɔŋ ni kwɔ nɛɛ nɔ. Beni Yesu Kristo kaselɔi etɛ ni amɛhiɛ efee amɛ yaa lɛ kwɛɔ nɔ ni yaa nɔ lɛ, etsake yɛ amɛhiɛ. Bo toi yɛ be mli ni Sanekpakpa ŋmalɔ Marko bɔɔ sane ni yɔɔ miishɛɛ nɛɛ he amaniɛ lɛ:
YESU ŋɔ Petro kɛ Yakobo kɛ Yohane, ni ekɛ amɛ kɛkɛ tee gɔŋ ni kwɔ ko nɔ yɛ afa banee; ni Yesu tsake yɛ amɛhiɛ. Ni etadei lɛ kpɛ ni eyɛ futafuta bɔ ni niiahefɔlɔ ko bɛ shikpɔŋ nɛɛ nɔ ni aaanyɛ aha eyɛ nakai. Ni Elia kɛ Mose jie amɛhe kpo amɛtsɔɔ amɛ, ni amɛkɛ Yesu bawie. Ni Petro here nɔ ni ekɛɛ Yesu akɛ: ‘Rabi, ehi ha wɔ akɛ wɔɔhi biɛ; ni ha wɔfee buui etɛ, onɔ ekome, kɛ Mose nɔ ekome, kɛ Elia nɔ ekome.’ Shi eleee nɔ ni ekɛɔ; ejaakɛ amɛjijaa. Ni atatu bakete amɛnɔ, ni gbee ko jɛ atatu lɛ mli kɛɛ: ‘Mɔ nɛɛ ji misuɔmɔ Bi lɛ, nyɛboa lɛ toi!’ Ni amrɔ lɛ, beni amɛkwɛɔ amɛhe lɛ, amɛnaaa mɔ ko mɔ ko dɔŋŋ, akɛ ja Yesu kɛ amɛ kɛkɛ.”—Marko 9:2-8.
Bo lɛ susumɔ enɛ he! Yesu hiɛ miikpɛ tamɔ hulu. (Mateo 17:2) Etadei lɛ miikpele kaŋkaŋ, “ni eyɛ futafuta bɔ ni niiahefɔlɔ ko bɛ shikpɔŋ nɛɛ nɔ ni aaanyɛ aha eyɛ nakai.” Nyɔŋmɔ diɛŋtsɛ gbee ni mli wa lɛ jaje wiemɔ ko yɛ e-Bi lɛ he. Mɛɛ naakpɛɛ nii nɛ!
Hela wiemɔ ni akɛtsu nii yɛ biɛ akɛ “etsake” lɛ shishi ji “ni atsake kɛya su kroko mli.” Ejeɔ kpo hu yɛ Romabii 12:2, he ni awo Kristofoi ŋaa yɛ akɛ ‘nyɛtsakea nyɛhe’ kɛtsɔ nyɛjwɛŋmɔ ni nyɛaafee lɛ ehee lɛ nɔ lɛ.—An Expository Dictionary of New Testament Words, ni W. E. Vine fee lɛ, Kpo IV, baafa 148.
Hɛɛ, naakpɛɛ nɔ ko ba beni atsake Yesu yɛ Hehoo gbijurɔ ni aye yɛ afi 32 Ŋ.B. lɛ sɛɛ be ko lɛ. Mɛni kɛ nɛkɛ naakpɛɛ nii nɛ ba? Ani ehiɛ yiŋtoo krɛdɛɛ ko? Mɛni hewɔ akɛ Mose kɛ Elia bawo mli lɛ? Ni Kristo tsakemɔ lɛ saa ohe yɛ mɛɛ gbɛ nɔ?
Nibii ni Tsɔ Enɛ Hiɛ Ba
Dani amɛaakwɔ kɛaaya gɔŋ lɛ nɔ lɛ, no mli lɛ Yesu kɛ ekaselɔi lɛ yɛ Kaisarea Filipi niiaŋ. Akɛni nɛkɛ maŋ nɛɛ ka Hermon Gɔŋ lɛ wuoyi-anaigbɛ ni ekɛ lɛ teŋ jɛkɛmɔ aaafee shitoo 15 loo kilomitai 25 hewɔ lɛ, ekolɛ tsakemɔ lɛ ba yɛ eyiteŋ somoromoi lɛ ekome nɔ.
Beni amɛnyiɛ kɛyaa “gɔŋ ni kwɔ” lɛ nɔ lɛ, Yesu bi ekaselɔi lɛ akɛ: “Namɔ mɛi kɛɛɔ akɛ miji?” Amɛha hetoo akɛ: “Yohane Baptisilɔ lɛ; ni mɛi komɛi kɛɔ akɛ Elia, ni mɛi krokomɛi hu kɛɛɔ akɛ, gbalɔi lɛ ateŋ mɔ kome jio.” Kɛkɛ ni Kristo bi amɛ akɛ: “Shi nyɛ lɛ, namɔ nyɛkɛɛɔ akɛ miji?” Petro ha hetoo akɛ: “Bo ji Kristo lɛ.” Kɛkɛ ni Yesu “tswa amɛnaa ma akɛ amɛkakɛɛ mɔ ko mɔ ko ehe sane. Ni ebɔi amɛ tsɔɔmɔ akɛ, ja gbɔmɔ Bi lɛ na amanehulu pii, ni onukpai lɛ kɛ osɔfonukpai lɛ kɛ woloŋmalɔi lɛ kwa lɛ, ni agbe lɛ, ni gbii etɛ sɛɛ [lɛ] ete shi ekoŋŋ.”—Marko 8:27-31.
Yesu tee nɔ ekɛ nɛkɛ shiwoo nɛɛ ha: “Mɛi komɛi yɛ mɛi ni damɔ biɛ lɛ ateŋ ni amɛsaŋ amɛnaa gbele kɛyashi beyinɔ ni amɛaana Nyɔŋmɔ maŋtsɛyeli lɛ akɛ [eba] yɛ hewalɛ mli.” (Marko 9:1; Mateo 16:28) Nɛkɛ shiwoo nɛɛ ba mli “no sɛɛ gbii ekpaa,” beni Yesu sɔleɔ ni etsake yɛ Petro, Yakobo, kɛ Yohane hiɛ lɛ. Luka kɛɛ enɛ ba mli “aaafee gbii kpaanyɔ” sɛɛ, eka shi faŋŋ akɛ ekɛ gbi ni akɛ shiwoo lɛ ha lɛ kɛ gbi ni eba mli lɛ fata he.—Mateo 17:1, 2; Marko 9:2; Luka 9:28.
Ejeee Lamɔ loo Nɔ Ko Ni Bɛ Pɔtɛɛ
Yesu tsakemɔ lɛ jeee lamɔ. Bɔfoi etɛ lɛ elaŋ lamɔ kome too lɛ nɔŋŋ, ni Yesu tsɛ lɛ “ninaa.” Enɛ etsɔɔɔ nɔ ko ni bɛ pɔtɛɛ, ejaakɛ atsɔɔ Hela wiemɔ ni akɛtsu nii yɛ Mateo 17:9 lɛ shishi yɛ hei krokomɛi akɛ ‘nɔ ni anaa.’ (Bɔfoi lɛ Asaji 7:31) No hewɔ lɛ mɛi ni naa nɔ ni yaa nɔ lɛ ahiɛ kamɔ, no hewɔ lɛ amɛkɛ amɛhiŋmɛii kɛ amɛtoii na ni amɛnu nɔ ni yaa nɔ lɛ diɛŋtsɛ.—Luka 9:32.
Akɛni amɛhiɛ kamɔ shi amɛleee nɔ ni amɛbaakɛɛ hewɔ lɛ, Petro wo ŋaa akɛ amamɔ buui etɛ—ekome kɛha Yesu, Mose, kɛ Elia. (Luka 9:33) Atatu ni bakete amɛnɔ beni Petro wie lɛ tsɔɔ gɔŋ lɛ nɔ ni Nyɔŋmɔ yɔɔ yɛ faŋŋ mli, taakɛ eji yɛ Israel kpeebuu lɛ mli yɛ ŋa lɛ nɔ lɛ. (2 Mose 40:34-38; Luka 9:34) Ni eji anɔkwale akɛ bɔfoi lɛ efeŋ mɛi ni ewɔ yɛ be mli ni “Tsɛ Nyɔŋmɔ” lɛ jaje akɛ: “Misuɔmɔ Bi lɛ nɛ; nyɛboa lɛ toi!” lɛ.—2 Petro 1:17, 18; Luka 9:35.
Nɔ Hewɔ ni Ana Mose Lɛ
Beni tsakemɔ lɛ ba lɛ, no mli lɛ Mose “leee nɔ ko nɔ ko,” ejaakɛ etsɔ hiɛ egbo afii ohai babaoo. (Jajelɔ 9:5, 10) Taakɛ David ji lɛ, no mli lɛ ateeko lɛ shi, no hewɔ lɛ ebɛ jɛmɛ lɛ diɛŋtsɛ. (Bɔfoi lɛ Asaji 2:29-31) Shi mɛni hewɔ ana Mose kɛ Kristo yɛ ninaa nɛɛ mli lɛ?
Nyɔŋmɔ ekɛɛ Mose akɛ: “Mibatee gbalɔ ko shi maha amɛ kɛaajɛ amɛnyɛmimɛi lɛ ateŋ tamɔ bo, ni mikɛ miwiemɔi lɛ aaawo enaa, ni eeewie nii fɛɛ ni mawo lɛ he kita lɛ etsɔɔ amɛ.” (5 Mose 18:18) Petro kɛ nɛkɛ gbalɛ nɛɛ to Yesu Kristo diɛŋtsɛ he. (Bɔfoi lɛ Asaji 3:20-23) Yɛ Yesu sɛɛ lɛ, Mose ji gbalɔ ni da fe fɛɛ ni Nyɔŋmɔ etsu kɛba Israel maŋ lɛ ŋɔɔ.
Nibii yɛ ni je amɛhe yɛ Mose kɛ Mose Kpeteŋkpele, Yesu Kristo teŋ. Akɛ nɔkwɛmɔ nɔ lɛ, beni amɛji gbekɛbii lɛ, nɔyelɔi yiwalɔi wo mɛi enyɔ lɛ fɛɛ awala he gbeyei, shi Nyɔŋmɔ kwɛ koni abaa fufɔobii nɛɛ ayi. (2 Mose 1:20–2:10; Mateo 2:7-23) Hii enyɔ lɛ fɛɛ hi ŋmaa gbii 40 yɛ amɛnitsumɔ akɛ Yehowa tsuji krɛdɛɛ lɛ shishijee mli. (2 Mose 24:18; 34:28; 5 Mose 9:18, 25; Mateo 4:1, 2) Ni Mose kɛ Yesu fɛɛ tsɔ Nyɔŋmɔ hewalɛ nɔ amɛfee naakpɛɛ nii.—2 Mose 14:21-31; 16:11-36; Lala 78:12-54; Marko 4:41; Luka 7:18-23; Yohane 14:11.
Nyɔŋmɔ kɛ Mose tsu nii koni ejie Israel kɛjɛ Mizraim nyɔŋyeli mli, taakɛ bɔ ni Yesu kɛ mumɔŋ heyeli baa lɛ. (2 Mose 12:37–14:31; Yohane 8:31, 32) Mose na hegbɛ akɛ eeefee Mla kpaŋmɔ ni ka Nyɔŋmɔ kɛ Israelbii lɛ ateŋ lɛ teŋdamɔlɔ, yɛ be mli ni Yesu ji kpaŋmɔ hee lɛ Teŋdamɔlɔ. (2 Mose 19:3-9; 34:3-7; Yeremia 31:31-34; Luka 22:20; Hebribii 8:3-6; 9:15) Yehowa kɛ Mose tsu nii hu koni ekɛfee gbɛi eha E-he yɛ Israelbii lɛ, kɛ Mizraimbii lɛ, kɛ mɛi krokomɛi ahiɛ, taakɛ bɔ ni Yesu Kristo wo Yehowa gbɛi krɔŋkrɔŋ lɛ nɔ gojoo lɛ. (2 Mose 9:13-17; 1 Samuel 6:6; Yohane 12:28-30; 17:5, 6, 25, 26) Ha ni Nyɔŋmɔ ha Mose pue kɛ Yesu ni etsake lɛ tsɔɔ akɛ, Kristo baasɔmɔ yɛ gbɛhei nɛɛ amli yɛ gbɛ ni da kwraa nɔ.
Nɔ Hewɔ ni Elia Pue Lɛ
Eyɛ mli akɛ ateeko gbalɔ Elia ni egbo lɛ shi moŋ, shi esa jogbaŋŋ akɛ eeepue yɛ ninaa tsakemɔ lɛ mli. Elia tsu nitsumɔ kpele yɛ jamɔ krɔŋŋ ni eku sɛɛ ekɛma shi lɛ kɛ Yehowa gbɛi lɛ ni etse he yɛ Israelbii lɛ ateŋ lɛ mli. Yesu Kristo fee nakai nɔŋŋ yɛ be mli ni eyɔɔ shikpɔŋ nɔ lɛ ni ebaafee babaoo po koni eto jamɔ krɔŋŋ ema shi ni ebu eŋwɛi Tsɛ lɛ bem kɛtsɔ Mesia Maŋtsɛyeli lɛ nɔ.
Gbalɔ Maleaki tsɔɔ akɛ Elia nitsumɔ lɛ feɔ wɔsɛɛ be mli nitsumɔ ko he mfoniri. Nyɔŋmɔ wie kɛtsɔ Maleaki nɔ akɛ: “Naa, matsu gbalɔ Elia kɛaaba nyɛŋɔɔ, dani Yehowa gbi wulu kpele ni he yɔɔ gbeyei lɛ aaashɛ. Ni eeedɔrɔ tsɛmɛi atsuii kɛba amɛbii ahe, kɛ bii hu atsuii kɛba amɛtsɛmɛi ahe, koni mikaba ni mibaha shikpɔŋ lɛ ye musu.”—Maleaki 3:23, 24.
Nɛkɛ gbalɛ nɛɛ na emlibaa fioo yɛ Yohane Baptisilɔ lɛ nitsumɔ lɛ mli. Yesu tsɔɔ akɛ nakai eji, yɛ etsakemɔ lɛ sɛɛ, beni ekaselɔi lɛ bi lɛ nɔ hewɔ ni woloŋmalɔi lɛ kɛɔ akɛ esa akɛ Elia atsɔ hiɛ aba klɛŋklɛŋ—dani Mesia lɛ apue lɛ. Yesu kɛɛ: “Elia miiba lɛlɛŋ, ni ebato nibii fɛɛ gbɛjianɔ ekoŋŋ. Shi miikɛɛ nyɛ akɛ, Elia eba momo, ni amɛyooo lɛ, shi moŋ amɛfee lɛ nɔ fɛɛ nɔ ni amɛsumɔɔ. Nakai nɔŋŋ gbɔmɔ Bi lɛ hu baana amane yɛ amɛdɛŋ.” Nɔ ni aŋma lɛ kɛfataa he akɛ: “Kɛkɛ ni kaselɔi lɛ kɔ sɛɛ akɛ, Yohane Baptisilɔ lɛ hewɔ ekɛ amɛ wieɔ lɛ.”—Mateo 17:10-13.
Yohane tsu nitsumɔ ko ni tamɔ Elia nɔ lɛ beni ebaptisi Yudafoi ni tsake amɛtsui yɛ esha ni amɛfee amɛshi Mla kpaŋmɔ lɛ hewɔ lɛ. Nɔ ni he hiaa babaoo lɛ, Yohane ji Mesia lɛ hiɛnyiɛlɔ, ni lɛ ji mɔ ni kɛ Yesu Kristo tsɔɔ mɛi. (Mateo 11:11-15; Luka 1:11-17; Yohane 1:29) Shi mɛni hewɔ Yohane nitsumɔ lɛ ji Maleaki gbalɛ lɛ mlibaa fioo lɛ?
Ana Elia ni kɛ Yesu miiwie yɛ nɛkɛ ninaa nɛɛ mli. Enɛ ba mli yɛ Yohane Baptisilɔ lɛ gbele sɛɛ, ni tsɔɔ akɛ abaatsu Elia nitsumɔ ko yɛ wɔsɛɛ be mli. Agbɛnɛ, gbalɛ lɛ tsɔɔ akɛ abaatsu nitsumɔ nɛɛ “dani Yehowa gbi wulu kpele ni he yɔɔ gbeyei lɛ aaashɛ.” Nɔ ni fata nakai nii ni baa kɛ foi lɛ he ji “Nyɔŋmɔ Ofe lɛ gbi wulu lɛ nɔ ta lɛ” yɛ Har-Magedon, loo Armagedon. (Kpojiemɔ 16:14-16) Enɛ tsɔɔ akɛ nitsumɔ ko ni tamɔ Elia kɛ esɛɛyelɔ Elisha nitsumɔi lɛ baatsɔ Nyɔŋmɔ ŋwɛi Maŋtsɛyeli lɛ ni aaato ama shi yɛ wɔsɛɛ be mli nɛɛ hiɛ. Ni Yehowa Odasefoi ni yɔɔ ŋmɛnɛŋmɛnɛ beaŋ lɛ etee nɔ amɛtsu nitsumɔ ko ni kɔɔ jamɔ krɔŋŋ ni aaato ama shi ekoŋŋ kɛ Nyɔŋmɔ gbɛi lɛ ni aaawo nɔ lɛ he fe afii oha.—Lala 145:9-13; Mateo 24:14.
Eyiŋtoo
Tsakemɔ lɛ waje Yesu kɛha piŋmɔi kɛ gbele ni ebaatsɔ mli lɛ. Nu ni enu eŋwɛi Tsɛ lɛ gbee ni miiwie ehe akɛ E-Bi ni ekpɛlɛ enɔ lɛ baawo Yesu hemɔkɛyeli hewalɛ. Shi mɛni ji nɔ ni tsakemɔ lɛ fee kɛha mɛi krokomɛi?
Yesu tsakemɔ lɛ waje mɛi ni na lɛ hu ahemɔkɛyeli. Ema nɔ mi yɛ amɛjwɛŋmɔi amli akɛ Yesu Kristo ji Nyɔŋmɔ Bi. Yɛ anɔkwale mli lɛ, akɛni Yehowa Naawielɔ Nukpa, Wiemɔ lɛ, yɛ amɛteŋ hewɔ lɛ, amɛnu ni Nyɔŋmɔ diɛŋtsɛ gbee miijaje akɛ: “Mɔ nɛɛ ji misuɔmɔ Bi ni minaa ehe tsui lɛ.” Eyɛ mli akɛ Yehowa eye odase ko ni tamɔ nakai yɛ be mli ni abaptisi Yesu lɛ moŋ, shi Nyɔŋmɔ kɛfata he yɛ tsakemɔ lɛ mli akɛ esa akɛ ekaselɔi lɛ abo E-Bi lɛ toi.—Mateo 3:13-17; 17:5; Yohane 1:1-3, 14.
Tsakemɔ lɛ woɔ hemɔkɛyeli hewalɛ yɛ gbɛ kroko hu nɔ. Yɛ ninaa lɛ mli lɛ, Yesu kɛ “Mose” kɛ “Elia” wie “[Kristo lɛ] jeŋ naa ni ebaaya eyagbe yɛ Yerusalem lɛ” he. (Luka 9:31) Atsɔɔ “ebaaya” shishi kɛjɛ Hela wiemɔ eʹxo·dos mli. Eka shi faŋŋ akɛ nɛkɛ ebaaya loo shi ni ashiɔ he ko ayaa nɛɛ kɔɔ Yesu gbele lɛ kɛ shi ni Nyɔŋmɔ aaatee lɛ kɛba mumɔŋ shihilɛ mli lɛ fɛɛ he. (1 Petro 3:18) No hewɔ lɛ tsakemɔ lɛ wo hemɔkɛyeli yɛ Kristo shitee lɛ mli lɛ mli hewalɛ. Ni titri lɛ etswa hemɔkɛyeli ema shi diɛŋtsɛ kɛtsɔ odaseyeli ni tsɔɔ mɔ yiŋ ni ekɛha akɛ Yesu baafee Nyɔŋmɔ Mesia Maŋtsɛyeli lɛ nɔ Maŋtsɛ lɛ nɔ. Agbɛnɛ hu, ninaa lɛ tsɔɔ akɛ Maŋtsɛyeli lɛ baafee anunyam nɔ.
Tsakemɔ lɛ hu waje hemɔkɛyeli yɛ Ŋmalɛ naa gbalɛ mli. Aaafee afii 32 sɛɛ (aaafee afi 64 Ŋ.B.) lɛ, no mli lɛ Petro kaiɔ nɛkɛ niiashikpamɔ nɛɛ lolo, ni eŋma akɛ: “Ejaakɛ jeee adesãi ni ata yɛ ŋaa mli asɛɛ wɔnyiɛ wɔjaje wɔ-Nuŋtsɔ Yesu Kristo hewalɛ kɛ ebaa lɛ he sane wɔtsɔɔ nyɛ, shi moŋ wɔji edasefoi ni na enunyam kpeteŋkpele lɛ kɛ wɔhiŋmɛii. Ejaakɛ ena woo kɛ anunyam kɛjɛ Tsɛ Nyɔŋmɔ lɛ ŋɔɔ, beni nakai gbee lɛ jɛ anunyam kpeteŋkpele lɛ mli ba eŋɔɔ akɛ: ‘Mɔ nɛɛ ji misuɔmɔ Bi, ni minaa ehe tsui lɛ.’ Ni nɛkɛ gbee nɛɛ wɔ diɛŋtsɛ wɔnu akɛ ŋwɛi ejɛ, beni wɔkɛ lɛ yɔɔ gɔŋ krɔŋkrɔŋ lɛ nɔ lɛ. Ni ama gbalɛ wiemɔ lɛ nɔ mi aha wɔ fe tsutsu lɛ, nɔ ni kɛji nyɛŋɔ nyɛhiɛ nyɛto akɛ la ni tsoɔ yɛ he ko ni woɔ duŋ, kɛyashi beyinɔ ni je aaatsɛre ni toloo lɛ aaate shi yɛ nyɛtsuii amli lɛ, no lɛ nyɛmiifee jogbaŋŋ.”—2 Petro 1:16-19.
Nɔ ni Etsɔɔ Kɛha Bo
Hɛɛ, Petro bu Yesu tsakemɔ lɛ akɛ Nyɔŋmɔ gbalɛ wiemɔ lɛ nɔmimaa kɛ hewalɛ. Ekolɛ ninaa nɛɛ he bɔfo Yohane hu wieɔ beni ekɛɛ: “Ni Wiemɔ lɛ tsɔ heloo, ni ebashi buu yɛ wɔteŋ, ni wɔna enunyam lɛ akɛ tsɛ lɛ bi koome lɛ anunyam, ni duromɔ kɛ anɔkwale eyi lɛ obɔ.” (Yohane 1:14) Nakai nɔŋŋ hu tsakemɔ lɛ baanyɛ atswa ohemɔkɛyeli yɛ Yehowa gbalɛ wiemɔ lɛ mli lɛ ama shi.
Tsakemɔ lɛ kɛ nibii ni ba ni fata he lɛ baanyɛ awaje ohemɔkɛyeli akɛ Yesu Kristo ji Nyɔŋmɔ Bi kɛ Mesia ni awo shi yɛ ehe lɛ. Ebaanyɛ ewo ohemɔkɛyeli yɛ Yesu shitee kɛmiiya mumɔŋ shihilɛ mli yɛ ŋwɛi lɛ mli hewalɛ. Esa akɛ ninaa ni yɔɔ naakpɛɛ nɛɛ hu aha hemɔkɛyeli ni oyɔɔ yɛ Nyɔŋmɔ nɔyeli lɛ mli lɛ afa, ejaakɛ tsakemɔ lɛ ji Kristo anunyam kɛ Maŋtsɛyeli hewalɛ lɛ ni atsɔɔ hiɛ anaa.
Ewoɔ mɔ hemɔkɛyeli hewalɛ titri akɛ aaale akɛ Kristo tsakemɔ lɛ gbala jwɛŋmɔ kɛba wɔ gbi nɛɛ anɔ, beni ba ni Kristo eba lɛ ji anɔkwale diɛŋtsɛ lɛ. (Mateo 24:3-14) Kɛjɛ 1914 kɛbaa nɛɛ, eeye nɔ akɛ Maŋtsɛ ni Nyɔŋmɔ ehala lɛ yɛ ŋwɛi. Etsɛŋ ni ekɛ nɔyeli hegbɛ kɛ hewalɛ ni Nyɔŋmɔ kɛha lɛ lɛ baatsu nii ni ekɛte shi ewo ŋwɛi nɔyeli lɛ henyɛlɔi fɛɛ, koni egbele gbɛ kɛha jeŋ hee ko. (2 Petro 3:13) Obaanyɛ ona ejɔɔmɔi ni bɛ naagbee lɛ amli ŋɔɔmɔ kɛ ona hemɔkɛyeli yɛ naakpɛɛ nibii ni afee he mfoniri yɛ Yesu Kristo tsakemɔ lɛ mli lɛ amli.