Yitso 62

Heshibaa He Nikasemɔ

BENI Yesu tsa gbekɛnuu ni daimonio yɔɔ emli lɛ yɛ kpokpaa ni bɛŋkɛ Kaisaria Filipi lɛ sɛɛ lɛ, etao akɛ agbɛnɛ eku esɛɛ kɛya shia yɛ Kapernaum. Shi kɛlɛ, eesumɔ ni ekɛ ekaselɔi lɛ pɛ afa gbɛ lɛ koni esaa amɛ lolo kɛha egbele lɛ kɛ gbɛnaa nii ni baajwere amɛnɔ yɛ sɛɛ mli lɛ. Egbala mli etsɔɔ amɛ akɛ: “Abaaŋɔ gbɔmɔ Bi lɛ awo gbɔmɛi adɛŋ, ni amɛaagbe lɛ, ni gbi ni ji gbi etɛ lɛ aaatee lɛ shi ekoŋŋ.”

Eyɛ mli akɛ Yesu etsɔ hiɛ ewie enɛ he momo, ni bɔfoi etɛ lɛ na beni atsake lɛ ni awie “eyaa” lɛ he lɛ kɛ amɛ hiŋmɛii moŋ, shi esɛɛnyiɛlɔ lɛ nuuu sane lɛ shishi. Eyɛ mli akɛ amɛteŋ mɔ ko ejeee ŋwane akɛ abaagbe lɛ, taakɛ Petro fee kɛtsɔ hiɛ lɛ moŋ, shi kɛlɛ amɛmiishe gbeyei akɛ amɛaabi lɛ ehe sane babaoo.

Yɛ naagbee lɛ amɛbashɛ Kapernaum, ni ebatsɔ tamɔ shia kɛha Yesu yɛ esɔɔmɔ nitsumɔ lɛ mli fɛɛ lɛ. Petro kɛ bɔfoi lɛ ateŋ mɛi krokomɛi babaoo hu amaŋ ni. Jɛmɛ ni mɛi ni heɔ sɔlemɔ tsu he too lɛ banina Petro. Ekolɛ akɛni amɛmiitao ni amɛkɛ Yesu awo sane mli akɛ eku kusum ko mli hewɔ lɛ, amɛbi lɛ akɛ: “Ani nyɛtsɔɔlɔ lɛ haa [sɔlemɔ tsu] afi onia lɛ?”

Petro ha hetoo akɛ: “Ehaa.”

Yesu, ni ekolɛ eba shia lɛ mli yɛ no sɛɛ etsɛɛɛ lɛ le nɔ ni tee nɔ lɛ. No hewɔ lɛ dani Petro aaawo sane lɛ nɔ tete po lɛ, Yesu bi lɛ akɛ: “Te osusuɔ tɛŋŋ, Simon? Shikpɔŋ lɛ nɔ maŋtsɛmɛi lɛ, namɛi adɛŋ amɛheɔ too loo onia yɛ? Yɛ amɛ diɛŋtsɛ amɛbii lɛ adɛŋ aloo mɛi kpɔji adɛŋ?”

Petro ha lɛ hetoo akɛ: “Yɛ mɛi kpɔji adɛŋ.”

Ni Yesu kɛɛ: “Belɛ bii lɛ yeɔ amɛhe mɔ.” Akɛni Yesu Tsɛ ji jeŋ muu fɛɛ Maŋtsɛ, Mɔ ni ajaa lɛ yɛ sɔlemɔ tsu lɛ mli hewɔ lɛ, yɛ anɔkwale mli lɛ, ejeee nɔ ni mla biɔ akɛ Nyɔŋmɔ Bi lɛ awo sɔlemɔ tsu he too lɛ. Yesu kɛɛ: “Shi beni afee ni wɔkatsɔ amɛnaa lɛ, yaa ŋshɔ lɛ naa oyafɔ kpoŋ, ni loo klɛŋklɛŋ ni aaabakɔ kpoŋ lɛ, sha lɛ, ni kɛ ogbɛ edaaŋ lɛ, ooona shika ni naa shiɔ yii enyɔ; kɔ ni oŋɔha amɛ, oha mikɛo fɛɛ.”

Beni kaselɔi lɛ babua amɛhe naa yɛ be mli ni amɛku amɛsɛɛ kɛjɛ Kapernaum, ekolɛ yɛ Petro shia lɛ, amɛbi akɛ: “Namɔ ji agbo yɛ ŋwɛi maŋtsɛyeli lɛ mli?” Yesu le nɔ ni tsirɛ amɛ ni amɛbi sane nɛɛ, ejaakɛ ele nɔ ni yaa nɔ yɛ amɛteŋ beni amɛnyiɛ esɛɛ yɛ be mli ni amɛkuɔ amɛsɛɛ kɛjɛɔ Kaisaria Filipi lɛ. No hewɔ lɛ ebi amɛ akɛ: “Mɛni sane nyɛye yɛ nyɛteŋ yɛ gbɛ lɛ nɔ lɛ?” Shi kaselɔi lɛ ahiɛ fee amɛ yaa, ni amɛfee dioo, ejaakɛ amɛmiitao naa yɛ mɔ ni ji agbo yɛ amɛ fɛɛ amɛteŋ lɛ he.

Yɛ nɔ ni miihe ashɛ afii etɛ ni Yesu kɛtsɔɔ amɛ nii lɛ fɛɛ sɛɛ lɛ, ani eyɛ naakpɛɛ akɛ naataomɔ ni tamɔ nɛkɛ aaaba kaselɔi lɛ ateŋ? Ojogbaŋŋ, ejieɔ hewalɛ ni mli wa ni adesai emuuyeli ni bɛ lɛ yɔɔ yɛ amɛnɔ lɛ kpo, kɛ agbɛnɛ hewalɛ ni jamɔ hu ena yɛ amɛnɔ. Yudafoi ajamɔ ni akɛtsɔse kaselɔi lɛ maa gbɛhe loo hegbɛ ni aaana yɛ nɔ fɛɛ nɔ mli lɛ nɔ mi. Kɛfata he hu lɛ, ekolɛ Petro nu he akɛ enɔ kwɔ fe amɛ fɛɛ, yɛ Yesu shiwoo akɛ enine baashɛ Maŋtsɛyeli lɛ naa “samfei” komɛi anɔ lɛ hewɔ. Yakobo kɛ Yohane hu baanyɛ ana jwɛŋmɔi ni tamɔ nakai nɔŋŋ yɛ hegbɛ ni amɛna akɛ amɛye Yesu tsakemɔ lɛ he odase lɛ hewɔ.

Shi bɔ fɛɛ bɔ ni fee lɛ, Yesu fee nɔkwɛmɔ nɔ ko ni kanyaa mɔ ni ekɛsaa amɛsubaŋi nɛɛ. Etsɛ gbekɛ bibioo ko, ni eha ebadamɔ amɛteŋ, ni ekɛ eniji shwie enɔ, ni ekɛɛ: “Kɛji nyɛtsakeee ni nyɛtsɔmɔ tamɔ gbekɛbii bibii lɛ, nyɛboteŋ ŋwɛi maŋtsɛyeli lɛ mli. No hewɔ lɛ, mɔ fɛɛ mɔ ni baa ehe shi tamɔ gbekɛ nɛɛ lɛ, lɛ ji agbo yɛ ŋwɛi maŋtsɛyeli lɛ mli. Ni mɔ fɛɛ mɔ ni ŋɔɔ gbekɛ fioo kome ni tamɔ mɔ nɛ yɛ migbɛi anɔ lɛ, eŋɔɔ mi.”

Mɛɛ gbɛ ni yɔɔ naakpɛɛ etsɔ nɔ ejaje ekaselɔi lɛ nɛkɛ! Yesu mli fuuu amɛ ni eeetsɛ amɛ hewolɔi, hiɛjoolɔi aloo henɔwolɔi. Dabi, shi moŋ efee enitsɔɔmɔ ni ekɛjajeɔ amɛ lɛ he mfoniri kɛtsɔ gbekɛbii anɔkwɛmɔ nɔ ni ekɛtsu nii lɛ nɔ, mɛi ni ale amɛ akɛ amɛbaa amɛhe shi ni amɛtsiɔ amɛhe kwraa kɛjɛɔ henɔwomɔ he ni anaaa onukpayeli he jwɛŋmɔ ko kwraa yɛ amɛteŋ lɛ. Enɛ hewɔ lɛ Yesu tsɔɔ akɛ ehe miihia ni ekaselɔi lɛ ana sui ni anaa yɛ gbekɛbii heshibalɔi ahe nɛɛ eko. Taakɛ Yesu mu sane naa lɛ: “Mɔ ni ji bibioo yɛ nyɛ fɛɛ nyɛteŋ lɛ, lɛ nɔŋŋ ji agbo.” Mateo 17:22-27; 18:1-5; Marko 9:30-37; Luka 9:43-48.

▪ Beni amɛku amɛsɛɛ amɛtee Kapernaum lɛ, mɛɛ tsɔɔmɔ Yesu saa ti mli ekoŋŋ, ni te ahere nɔ aha tɛŋŋ?

▪ Mɛni hewɔ mla ko fiii Yesu nɔ akɛ ewo sɔlemɔ tsu he too lɛ, shi mɛni hewɔ ni ewo lɛ?

▪ Mɛni ekolɛ no kɛ naataomɔ lɛ ba kaselɔi lɛ ateŋ lɛ, ni mɛɛ gbɛ nɔ Yesu tsɔ ejaje amɛ yɛ?