Yitso 63

Ŋaawoo ni Tsakeɔ Mɔ ni Etee nɔ Ekɛha

BENI Yesu kɛ ebɔfoi lɛ ka he amɛyɔɔ shia lɛ mli lolo yɛ Kapernaum lɛ, amɛwie nɔ kroko he kɛfata naataomɔ ni te shi yɛ bɔfoi lɛ ateŋ yɛ mɔ ni ji onukpa yɛ amɛteŋ lɛ he. Sane nɛɛ tamɔ nɔ ni ba yɛ be mli ni amɛkuɔ amɛsɛɛ kɛjɛɔ Kapernaum, beni Yesu diɛŋtsɛ fataaa amɛhe lɛ. Bɔfo Yohane bɔɔ amaniɛ akɛ: “Wɔna mɔ ko ni kɛ ogbɛi faa daimonioi, ni wɔtsi lɛ gbɛ, ejaakɛ enyiɛɛɛ wɔsɛɛ.”

Eka shi faŋŋ akɛ Yohane naa bɔfoi lɛ akɛ kuu pɛ ni ale amɛ akɛ mɛi ni tsaa mɔ. No hewɔ lɛ enuɔ he akɛ nuu lɛ miitsu hewalɛ nitsumɔi yɛ gbɛ ni ejaaa nɔ, ejaakɛ efataaa amɛkuu lɛ he.

Shi kɛlɛ, Yesu wo amɛ ŋaa akɛ: “Nyɛkatsia lɛ gbɛ; ejaakɛ mɔ ko bɛ ni ekɛ migbɛi aaatsu hewalɛ nitsumɔ ko ni eeenyɛ mihe efɔŋ ewie oya. Ejaakɛ mɔ ni eteee shi ewooo wɔ lɛ, efata wɔhe. Ejaakɛ mɔ fɛɛ mɔ ni aaaha nyɛ nu kpulu kome nyɛnu yɛ migbɛi anɔ, akɛni Kristo nii ji nyɛ hewɔ lɛ, lɛlɛŋ, miikɛɛ nyɛ akɛ enyɔmɔwoo eŋmɛŋ lɛ.”

Ehe ehiaaa ni nɛkɛ nuu nɛɛ anyiɛ Yesu sɛɛ yɛ gbɔmɔtsoŋ dani akɛɛ akɛ eyɛ emasɛi. No mli lɛ atoko Kristofoi asafo lɛ amako shi, no hewɔ lɛ fatamɔ ni efataaa amɛkuu lɛ he lɛ etsɔɔɔ akɛ eyɛ asafo kroko ko mli. Nuu lɛ yɛ hemɔkɛyeli diɛŋtsɛ yɛ Yesu gbɛi amli ni enɛ hewɔ lɛ enyɛ efamɔ daimonioi lɛ yɛ omanyeyeli mli. Eetsu nitsumɔ ko ni kɛ akɛto he lɛ etamɔ nɔ ni Yesu kɛɛ akɛ esa nyɔmɔwoo lɛ pɛpɛɛpɛ. Yesu tsɔɔ akɛ akɛni efee enɛ hewɔ lɛ, enyɔmɔwoo eŋmɛŋ lɛ kɔkɔɔkɔ.

Shi kɛji bɔfoi lɛ awiemɔi kɛ nifeemɔi tɔ̃tɔ̃ nuu nɛɛ naji hu? Enɛ baafee hiɛdɔɔ sane waa diɛŋtsɛ! Yesu kɛɛ: “Ni mɔ ni aaatɔtɔ mɛi bibii nɛɛ ni heɔ minɔ yeɔ lɛ ateŋ mɔ kome nane lɛ, faŋ nɔ ni aŋɔ wiɛ aŋmɔ ekuɛ ni ashɛ lɛ afɔ ŋshɔŋ.”

Yesu kɛɛ esɛɛnyiɛlɔi lɛ akɛ amɛjie nɔ fɛɛ nɔ ni jara wa ha amɛ tamɔ nine, nane, aloo hiŋmɛi ni baanyɛ atɔ̃tɔ̃ amɛnaji lɛ kɛjɛ amɛshihilɛ mli. Ehi akɛ amɛaahi shi ni nibii ni amɛsumɔɔ nɛɛ bɛ amɛhe ni amɛbote Nyɔŋmɔ Maŋtsɛyeli lɛ mli moŋ fe ni amɛaahiɛ mli ni ashɛrɛ amɛ ashwie Gehena (he ko ni atsiɔ jwɛi ashwieɔ ni la tsoɔ yɛ mli ni bɛŋkɛ Yerusalem), ni feɔ naanɔ hiɛkpatamɔ he mfoniri lɛ.

Yesu bɔ amɛ kɔkɔ hu akɛ: “Nyɛkwɛa jogbaŋŋ koni nyɛkagbe mɛi bibii nɛɛ ateŋ mɔ kome he guɔ; ejaakɛ miikɛɛ nyɛ akɛ, amɛbɔfoi ni yɔɔ ŋwɛi lɛ kwɛɔ mi-Tsɛ ni yɔɔ ŋwɛi lɛ hiɛ daa nɛɛ.” Kɛkɛ ni ekɛ nɔkwɛmɔ nɔ ko tsɔɔ bɔ ni “mɛi bibii” nɛɛ ajara wa ha lɛ mli, beni ewie nuu ko ni yɔɔ tooi oha ni ekome laaje lɛ he lɛ. Yesu tsɔɔ mli akɛ nuu lɛ baashi 99 lɛ koni eyatao nɔ ni elaaje lɛ, ni kɛ ena lɛ lɛ, ebaana no he miishɛɛ fe 99 lɛ. Kɛkɛ ni Yesu mu sane lɛ naa akɛ: “Nakai nɔŋŋ ni nyɛ-Tsɛ ni yɔɔ ŋwɛi lɛ sumɔɔɔ akɛ bibii nɛɛ ateŋ mɔ kome laajeɔ.”

Ekolɛ akɛni ekaselɔi lɛ anaataomɔ lɛ yɛ ejwɛŋmɔ mli lolo hewɔ lɛ, Yesu wo amɛ hewalɛ akɛ: “Nyɛhaa ŋoo ahia nyɛmli, ni nyɛhia shi yɛ hejɔlɛ mli yɛ nyɛteŋ!” Ŋoo haa niyenii ni eŋɔɔɔ kwraa lɛ ŋɔɔ. No hewɔ lɛ, mfonirifeemɔ mli ŋoo haa efeɔ mlɛo akɛ aaakpɛlɛ mɔ ko wiemɔ nɔ. Kɛ wɔyɛ ŋoo ni tamɔ nɛkɛ lɛ, ebaaye ebua ni wɔbaa toiŋjɔlɛ yi.

Shi yɛ emuu ni adesai yeee hewɔ lɛ, bei komɛi lɛ naataomɔi ni mli wawai baanyɛ aba. Yesu kɛ gbɛɛtsɔɔmɔi ha yɛ bɔ ni aaafee atsu enɛɛmɛi ahe nii lɛ he. Yesu kɛɛ: “Shi kɛji onyɛmi ko tɔ onɔ lɛ, yaa ni oyatsɔɔ lɛ etɔmɔ lɛ okɛ lɛ yii enyɔ kɛkɛ. Kɛji eboo toi lɛ, nyɛmi efee nyɛmi.” Kɛji ebooo toi lɛ, Yesu wo ŋaa akɛ, “ŋɔɔ mɔ kome loo mɛi enyɔ ofata ohe, koni odasefoi enyɔ loo etɛ naa lɛ, sane fɛɛ sane ama shi.”

Yesu kɛɛ akɛ, naagbee nii ni esa akɛ afee pɛ ji, esa akɛ akɛ sane lɛ aha “asafo lɛ,” ni ji, nɔkwɛlɔi ni gbɛnaa nii jwere amɛnɔ ni amɛbaanyɛ amɛkpɛ amɛyiŋ yɛ saneyeli mli lɛ. Kɛji nɔtɔlɔ lɛ kɛ amɛyiŋkpɛɛ lɛ tsuuu nii lɛ, Yesu mu sane naa akɛ, “buu lɛ tamɔ wɔŋjalɔ kɛ toohelɔ.”

Yɛ be mli ni amɛkpɛɔ yiŋ ni tamɔ nɛkɛ lɛ, esa akɛ nɔkwɛlɔi lɛ kɛ amɛhe akpɛtɛ gbɛtsɔɔmɔi ni yɔɔ Yehowa Wiemɔ lɛ mli lɛ he gbagbalii. No hewɔ lɛ, kɛ amɛna akɛ mɔ ko eye fɔ ni esa toigbalamɔ lɛ, no lɛ amɛkojomɔ lɛ ‘afĩ yɛ ŋwɛi momo.’ Ni kɛji amɛ “fɛne yɛ shikpɔŋ nɔ,” ni ji akɛ, amɛbu mɔ ko bem lɛ, no mli lɛ “afɛne yɛ ŋwɛi.” Yesu wie nakai kojomɔ saji ahe susumɔi lɛ ahe akɛ, “he ni mɛi enyɔ loo mɛi etɛ ebua amɛhe naa yɛ, yɛ migbɛi anɔ lɛ, miyɛ amɛteŋ yɛ jɛi.” Mateo 18:6-20; Marko 9:38-50; Luka 9:49, 50.

▪ Mɛni hewɔ ehe ehiaaa akɛ aaanyiɛ Yesu sɛɛ yɛ egbii lɛ amli lɛ?

▪ Te mɔ bibioo ko nane ni aaatɔ̃tɔ̃ lɛ ji hiɛdɔɔ sane ha tɛŋŋ, ni mɛɛ gbɛ nɔ Yesu fee bɔ ni nakai mɛi bibii lɛ ahe hiaa lɛ he nɔkwɛmɔ nɔ yɛ?

▪ Ekolɛ mɛni tsirɛ Yesu ni ekɛ hewalɛwoo ha ebɔfoi lɛ koni amɛha ŋoo ahi amɛmli lɛ?

▪ Te nii ‘fii’ kɛ ‘fɛnemɔ’ he hiaa ha tɛŋŋ?