Yesu Wo Ŋaa yɛ Nanetɔ̃tɔmɔ kɛ Esha He

Etsɛko tsɔ ni Yesu fee nɔkwɛmɔnɔ ko ni tsɔɔ su ni esa akɛ esɛɛnyiɛlɔi lɛ ajie lɛ kpo. Esa akɛ amɛna amɛhe tamɔ gbekɛbii, mɛi ni baa shi kɛ mɛi ni bɛ gbɛhe ko. Esa akɛ ekaselɔi lɛ ‘ahere gbekɛbii bibii tamɔ nɛkɛ yɛ egbɛ́i mli ni no baatsɔɔ akɛ amɛhere Yesu hu.’​—Mateo 18:5.

Etsɛko tsɔ ni bɔfoi lɛ je ŋwane yɛ mɔ ni ji agbo fe fɛɛ lɛ he, no hewɔ lɛ, amɛbaana Yesu wiemɔi nɛɛ akɛ kunemɔ. Amrɔ nɛɛ bɔfo Yohane miiwie sane kroko ni eba lɛ he, ekɛɛ: “Wɔna mɔ ko ni kɛ ogbɛ́i lɛ miifãmɔ daimonioi, ni wɔbɔ mɔdɛŋ akɛ wɔtsĩ lɛ gbɛ ejaakɛ efataaa wɔ mɛi ni wɔnyiɛ osɛɛ lɛ ahe.”​—Luka 9:49.

Ani Yohane susuɔ akɛ bɔfoi lɛ pɛ yɔɔ hegbɛ akɛ amɛtsaa mɛi loo amɛfãmɔɔ daimonioi? Kɛ́ nakai ni lɛ, te feɔ tɛŋŋ ni nuu Yudafonyo nɛɛ nyɛɔ efãmɔɔ mumɔi fɔji mɔ? Ekolɛ Yohane susuɔ akɛ akɛni nuu lɛ fataaa Yesu kɛ bɔfoi lɛ ahe hewɔ lɛ, esaaa akɛ etsuɔ hewalɛ nitsumɔi.

Hetoo ni Yesu kɛhã lɛ hã Yohane naa kpɛ ehe, ekɛɛ akɛ: “Nyɛkabɔa mɔdɛŋ akɛ nyɛbaatsĩ lɛ gbɛ, ejaakɛ mɔ ko bɛ ni baatsu hewalɛ nitsumɔ ko yɛ migbɛ́i mli ni baanyɛ awie nɔ ko fɔŋ yɛ mihe oya nɔŋŋ. Ejaakɛ mɔ fɛɛ mɔ ni eteee shi ewooo wɔ lɛ yɛ wɔgbɛfaŋ. Ni mɔ fɛɛ mɔ ni hãa nyɛ nu kpulu kome ni nyɛnu akɛni Kristo nii ji nyɛ hewɔ lɛ, lɛɛlɛŋ, miikɛɛ nyɛ akɛ, ejuromɔnɔ eŋmɛŋ lɛ kɔkɔɔkɔ.”​—Marko 9:39-41.

Hɛɛ, amrɔ nɛɛ, ehe ehiaaa ni nuu lɛ afata Kristo he kɛtsɔɔ akɛ eyɛ egbɛfaŋ. Anako ato Kristofoi asafo lɛ shishi, no hewɔ lɛ, kɛ́ nuu lɛ fataaa Yesu he kɛfãaa gbɛ lɛ, no etsɔɔɔ akɛ eete shi eewo Yesu loo eeye eebua ni amale jamɔ ko ahe shi. Ekã shi faŋŋ akɛ nuu lɛ yɛ hemɔkɛyeli yɛ Yesu gbɛ́i lɛ mli ni nɔ ni Yesu wie lɛ tsɔɔ akɛ nuu lɛ juromɔnɔ lɛ eŋmɛŋ lɛ kɔkɔɔkɔ.

Nɔ ni tamɔɔɔ nakai lɛ, kɛ́ bɔfoi lɛ awiemɔ loo amɛnifeemɔ hã nuu lɛ nane tɔ̃tɔ lɛ, eji hiɛdɔɔ sane. Yesu kɛɛ akɛ: “Mɔ fɛɛ mɔ ni tɔ̃tɔɔ bibii nɛɛ ni heɔ yeɔ lɛ ateŋ mɔ kome nane lɛ, kulɛ ebaahi ehã lɛ moŋ kɛji akɛ wiɛtɛ ni teji gbalaa ŋmɔ ekuɛ ni ashɛ lɛ afɔ̃ ŋshɔ mli.” (Marko 9:42) Kɛkɛ ni Yesu kɛɛ esa akɛ esɛɛnyiɛlɔi lɛ afo nɔ ko ni jara wa kɛhã amɛ tamɔ amɛniji loo amɛnaji amɛshɛrɛ amɛshwie loo amɛfamɔ amɛhiŋmɛii po kɛ́ nomɛi hãa amɛnane tɔ̃tɔɔ. Ehi akɛ nibii ni jara wa tamɔ nakai baaŋmɛɛ amɛ koni amɛbote Nyɔŋmɔ Maŋtsɛyeli lɛ mli moŋ fe ni amɛbaahiɛ nibii nɛɛ amli ni ashɛ amɛ afɔ̃ Gehena (Hinom Jɔɔ). Ekã shi faŋŋ akɛ bɔfoi lɛ ena jɔɔ ni bɛŋkɛ Yerusalem ni ashãa jwɛii yɛ jɛmɛ nɛɛ dã, no hewɔ lɛ amɛbaanyɛ amɛnu shishi akɛ edamɔ shi kɛhã naanɔ hiɛkpatamɔ.

Yesu bɔ kɔkɔ hu akɛ: “Nyɛkwɛa jogbaŋŋ koni nyɛkagbe bibii nɛɛ ateŋ mɔ kome he guɔ, ejaakɛ miikɛɛ nyɛ akɛ amɛbɔfoi ni yɔɔ ŋwɛi lɛ kwɛɔ mi-Tsɛ ni yɔɔ ŋwɛi lɛ hiɛ daa.” Te mɛi “bibii” nɛɛ ajara wa hã e-Tsɛ lɛ tɛŋŋ? Yesu gba amɛ sane ko ni kɔɔ nuu ko ni yɔɔ gwantɛŋi 100 ni amɛteŋ ekome du gbɛ lɛ he. Nuu lɛ shi gwantɛŋi 99 lɛ ni etee eyatao nɔ ni edu gbɛ lɛ, ni be ni ena lɛ lɛ, emii shɛ ehe yɛ no he fe gwantɛŋi 99 lɛ. Yesu wie kɛshi sɛɛ akɛ: “Mi-Tsɛ ni yɔɔ ŋwɛi lɛ sumɔɔɔ akɛ bibii nɛɛ ateŋ ekome po hiɛ kpãtãa.”​—Mateo 18:10, 14.

Eeenyɛ efee akɛ ŋwane ni Yesu bɔfoi lɛ je yɛ mɔ ni ji agbo fe fɛɛ lɛ he lɛ hewɔ ekɛɛ amɛ akɛ: “Nyɛhãa ŋoo ahia nyɛmli, ni nyɛkɛ nyɛhe ahia shi yɛ toiŋjɔlɛ mli” lɛ. (Marko 9:50) Ŋoo hãa niyenii ŋɔɔ. Okadifeemɔŋ ŋoo hãa efeɔ mlɛo akɛ aaakpɛlɛ mɔ ko wiemɔ nɔ, ni no hãa abaa toiŋjɔlɛ yi, shi ŋwanejee efeee nakai.​—Kolosebii 4:6.

Bei komɛi lɛ, saji ni yɔɔ hiɛdɔɔ teɔ shi, ni Yesu tsɔɔ bɔ ni esa akɛ atsu amɛhe nii ahã. Yesu kɛɛ akɛ: “Kɛ́ onyɛmi fee esha ko lɛ, yaa ni oyatsɔɔ lɛ etɔmɔ lɛ, okɛ lɛ yi enyɔ kɛkɛ. Kɛ́ ebo bo toi lɛ, no lɛ onine eshɛ onyɛmi lɛ nɔ.” Ni kɛ́ ebooo toi hu? Yesu wo ŋaa akɛ: “Ŋɔɔ mɔ kome loo mɛi enyɔ ofata ohe koni yɛ odasefoi enyɔ loo etɛ awiemɔ naa lɛ, sane fɛɛ sane ama shi.” Shi kɛ́ no hu ejajeee sane lɛ, esa akɛ amɛyakɛɛ “asafo lɛ,” ni tsɔɔ akɛ amɛyakɛɛ asafoŋ onukpai lɛ, mɛi ni akɛwo amɛdɛŋ akɛ amɛkojo saji ni tamɔ nakai lɛ. Ni kɛ́ efɔŋfeelɔ lɛ booo amɛ hu toi lɛ? “Buu lɛ tamɔ jeŋmajiaŋbii lɛ ateŋ mɔ ko, kɛ toohelɔ,” mɛi ni Yudafoi lɛ kɛbɔɔɔ naanyo lɛ.​—Mateo 18:15-17.

Esa akɛ asafoŋ nɔkwɛlɔi lɛ kɛ Nyɔŋmɔ Wiemɔ lɛ atsu nii jogbaŋŋ. Kɛ́ amɛna akɛ efɔŋfeelɔ ko yeɔ fɔ, ni esa akɛ atsɔse lɛ lɛ, “afi” amɛkojomɔ lɛ “yɛ ŋwɛi momo.” Shi kɛ́ amɛna akɛ mɔ ko yeɔ bem lɛ, “afɛne yɛ ŋwɛi.” Sɛɛ mli kɛ́ ato Kristofoi asafo lɛ shishi lɛ, gbɛtsɔɔmɔi nɛɛ baaye abua jogbaŋŋ. Yɛ sane mlikwɛmɔ ni yɔɔ hiɛdɔɔ tamɔ nɛkɛ gbɛfaŋ lɛ, Yesu kɛɛ akɛ: “He ni mɛi enyɔ loo mɛi etɛ ebua amɛhe naa yɛ, yɛ migbɛ́i mli lɛ, miyɛ amɛteŋ yɛ jɛmɛ.”​—Mateo 18:18-20.