Enyɛŋ Eba Mli Nakai!

“EJARAAA haaa yoma akɛ eeetsɔ abui hiŋmɛi mli, tamɔ bɔ ni ejaraa haa niiatsɛ akɛ eeebote Nyɔŋmɔ maŋtsɛyeli lɛ mli lɛ.” (Mateo 19:24) Yesu Kristo wie enɛ koni ekɛtsɔɔ ekaselɔi lɛ nikasemɔ ko. Obalanyo nɔyelɔ niiatsɛ ko ekpoo tsɛmɔ akɛ ebafee Yesu sɛɛnyiɛlɔ, koni ebana mumɔŋ hegbɛi pii ni yɔɔ naakpɛɛ lɛ mli gbɛfaŋnɔ lɛ. Nuu lɛ hala moŋ akɛ ekɛ ehe aaakpɛtɛ nii babaoo ni eyɔɔ lɛ he fe ni eeenyiɛ Mesia lɛ sɛɛ.

Jeee akɛ Yesu miikɛɛ akɛ niiatsɛ ko nyɛŋ ana naanɔ wala kwraa yɛ Maŋtsɛyeli gbɛjianɔtoo lɛ mli, ejaakɛ aŋkroaŋkroi komɛi ni yɔɔ nii babaoo batsɔmɔ esɛɛnyiɛlɔi. (Mateo 27:​57; Luka 19:​2, 9) Shi, niiatsɛ fɛɛ niiatsɛ ni yɔɔ suɔmɔ babaoo kɛha enii ni ena lɛ fe mumɔŋ nibii lɛ nyɛŋ ana nɛkɛ naanɔ wala nɛɛ. Ehiɛ ni aaahi emumɔŋ hiamɔ nii anɔ ni etao ŋwɛi yelikɛbuamɔ lɛ pɛ nɔ gbɔmɔ ni tamɔ nɛkɛ aaatsɔ ni enine ashɛ yiwalaheremɔ ni Nyɔŋmɔ kɛhaa lɛ nɔ.​—Mateo 5:3; 19:​16-26.

Anyɛŋ aŋɔ nɔkwɛmɔ nɔ ni kɔɔ yoma kɛ abui hiŋmɛi mli lɛ he lɛ akɛ eyɛ nakai pɔtɛɛ. Yesu kɛ sane-he-woo miitsu nii koni ekɛma sane ni wa ni ka niiatsɛmɛi ni bɔɔ mɔdɛŋ akɛ amɛaasa Nyɔŋmɔ hiɛ, yɛ be mli ni amɛhiɔ shi akɛ mɛi ni yɔɔ nii babaoo yɛ nakai beaŋ nɔŋŋ lɛ ahiɛ lɛ nɔ mi.​—1 Timoteo 6:​17-19.

Mɛi komɛi kɛɔ akɛ abui hiŋmɛi lɛ ji agbo fintɔŋŋ ko ni yɔɔ maŋtiase lɛ gbogbo mli ni yoma baanyɛ atsɔ mli kɛ tɔlɛ kɛ ajie ejatsu lɛ kɛjɛ enɔ. Shi Hela wiemɔ rha·phisʹ, ni atsɔɔ shishi akɛ “abui” yɛ Mateo 19:24 kɛ Marko 10:25 lɛ jɛ feemɔwiemɔ ko ni eshishi ji “akpɛ” lɛ mli. Wiemɔ, be·loʹne lɛ tsɔɔ nikpɛɛ abui yɛ Luka 18:​25, ni New World Translation lɛ kaneɔ yɛ jɛmɛ akɛ: “Yɛ anɔkwale mli lɛ, ewaaa haaa yoma akɛ eeetsɔ nikpɛɛ abui hiŋmɛi mli fe ni niiatsɛ aaabote Nyɔŋmɔ maŋtsɛyeli lɛ mli.” Woji sɔrɔtoi ni aŋmala lɛ fiɔ shishitsɔɔmɔ nɛɛ sɛɛ. W. E. Vine kɛɔ akɛ: “Etamɔ nɔ ni jwɛŋmɔ ni ahiɛ akɛ akɛ ‘abui hiŋmɛi’ aaato agboi loo shinaa bibii ahe lɛ ji ŋmɛnɛŋmɛnɛ beaŋ nɔ; blema nɔ ko ni aaana bɛ.”​—An Expository Dictionary of New Testament Words.

Wolo ko tsɔɔ mli akɛ, yoma agbo nɛɛ ni miibɔ mɔdɛŋ atsɔ nikpɛɛ abui bibioo hiŋmɛi mli lɛ “tamɔ Bokagbɛ bii awiemɔ-he-woo.” Ni The Babylonian Talmud wieɔ ekomɛi ni kɛ ŋaa tsuɔ pii akɛ efeɔ tamɔ nɔ ni aafee nɔ ni anyɛŋ afee lɛ he akɛ: “Amɛgbalaa shwuɔ kɛtsɔɔ abui hiŋmɛi mli.” No hewɔ lɛ Yesu kɛ sane-he-woo kɛ sɔrɔto-feemɔ ni jeɔ kpo faŋŋ tsu nii koni ekɛma nii ni nyɛŋ aba mli lɛ nɔ mi. Yoma loo shwuɔ nyɛŋ atsɔ nikpɛɛ abui hiŋmɛi mli. Shi yɛ ŋwɛi yelikɛbuamɔ hewɔ lɛ, niiatsɛ baanyɛ ashi ninamɔ he susumɔ ni etao naanɔ wala diɛŋtsɛ. Ni nakai ji bɔ ni mɛi fɛɛ ni yɔɔ tsuiŋ suɔmɔ akɛ amɛaakase ni amɛfee Ŋwɛi Flooflo Nyɔŋmɔ, Yehowa, suɔmɔnaa nii lɛ baanyɛ afee.