Yehowa Jɔɔmɔ Feɔ Mɔ Niiatsɛ
“Ewa ha niiatsɛ akɛ eeebote ŋwɛi maŋtsɛyeli lɛ mli.”—MATEO 19:23.
1, 2. Mɛɛ sɔrɔtofeemɔ abaanyɛ ana yɛ ninámɔi sɔrɔtoi ateŋ?
KƐJI akɛ mɔ ko kɛɛ bo akɛ “Otsɔ niiatsɛ” lɛ, kulɛ mɛni? Mɛi pii amii baashɛ amɛhe kɛ́ akɛɛ amɛ nakai, ni kɛji akɛ no tsɔɔ akɛ amɛna shika, amɛhe shikpɔji, aloo amɛyɛ heloo gbɛfaŋ nibii babaoo. Shi susumɔ ninamɔ he sane nɛɛ he kɛjɛ ŋɛlɛ nɛɛ nɔ: “Yehowa jɔɔmɔ lɛ—no feɔ mɔ niiatsɛ, ni ekɛ deŋmegbomɔ ko fataaa he.”—Abɛi 10:22, NW.
2 Taakɛ Yehowa kɛ Israel maŋ lɛ blematsɛmɛi lɛ ye lɛ, ekɛ shweremɔ jɔɔ amɛ anɔkwayeli lɛ nɔ. (1 Mose 13:2; 5 Mose 28:11, 12; Hiob 42:10-12) Maŋtsɛ Salomo ji mɔ ni ajɔɔ lɛ nakai. Ebaná nii babaoo diɛŋtsɛ. Shi etsɔ niiashikpamɔ nɔ ekase akɛ shihilɛ ni damɔ heloo gbɛfaŋ ninamɔ nɔ lɛ ji “yakayaka nɔ ko kɛ kɔɔyɔɔ hakumɔ.” (Jajelɔ 2:4-11; 1 Maŋtsɛmɛi 3:11-13; 9:14, 28; 10:10) No hewɔ lɛ, beni Salomo ŋma akɛ: “Yehowa jɔɔmɔ lɛ—no feɔ mɔ niiatsɛ” lɛ belɛ jeee heloo gbɛfaŋ ninamɔ nɔ mi emaa lɛ. Eejaje anɔkwale ni eji akɛ, kɛji akɛ oyɛ Nyɔŋmɔ jɔɔmɔ lɛ, oshihilɛ bafeɔ nɔ ni hi babaoo fe mɛi ni sumɔɔɔ lɛ lɛ anɔ̃ kɛ akɛmiito he. Yɛ mɛɛ gbɛ nɔ?
3. Mɛɛ gbɛi anɔ oji niiatsɛ lɛlɛŋ kɛ Nyɔŋmɔ jɔɔmɔi yɛ onɔ?
3 Kɛ oji Kristofonyo lɛ, obaanyɛ ona Yehowa nɔkpɛlɛmɔ mli ŋɔɔmɔ bianɛ ni onine ashɛ jɔɔmɔi tamɔ ŋwɛi nilee nɔ kɛjɛ edɛŋ, Abaahere bo awo Kristofoi asafo ko ni tamɔ weku ni yɔɔ miishɛɛ, amɛkɛ amɛhe fɔɔ amɛhe nɔ, ni amɛyɔɔ ohe miishɛɛ lɛ mli. Nyɔŋmɔ mla lɛ baa oyi kɛjɛɔ helai kɛ osharai babaoo he. Oyɛ nɔ ni obaadamɔ nɔ ni ohiɛ aka ŋwɛi hebuu nɔ kɛtsɔ “amanehulu kpeteŋkpele” ni ka yiwalɛ gbɛjianɔtoo nɛɛ hiɛ lɛ mli—kɛ agbɛnɛ wala yɛ Paradeiso ni baŋ naagbee ni baanyiɛ sɛɛ aba shikpɔŋ nɔ lɛ mli. No hewɔ lɛ oona akɛ, yɛ nɛkɛ naakpɛɛ jɔɔmɔi kɛ gbɛkpamɔi nɛɛ ahewɔ lɛ, obaanyɛ okɛɛ yɛ anɔkwale mli akɛ: “Niiatsɛ ji mi!”—Mateo 24:21, 22.
4. Te ooofee tɛŋŋ okɛ mumɔŋ niiatsɛ ni oootsɔ lɛ awo oshara mli. (Kpojiemɔ 3:17, 18)
4 Shi oshara baanyɛ aba “niiatsɛ” ni oji yɛ Yehowa jɔɔmɔ hewɔ lɛ he kɛtsɔ ninamɔi krokomɛi anɔ—shika loo heloo gbɛfaŋ nibii babaoo. Wɔteŋ mɛi fioo ko pɛ (kɛ́ wɔyɛ shika babaoo loo fioo ko pɛ wɔyɔɔ) baakpɛlɛ nɔ amrɔ nɔŋŋ akɛ, ‘Shika he suɔmɔ ni miihe agbalami kɛya he ni oshara diɛŋtsɛ ka minɔ.’ Shi kaimɔ kɔkɔbɔɔ lɛ: “Nibii fɔji fɛɛ ashishifaa ji shika suɔmɔ ni mɛi komɛi di sɛɛ ni amɛdu gbɛ kɛjɛ hemɔkɛyeli lɛ mli ni amɛkɛ piŋmɔi babaoo egbulɔ amɛhe lɛ.” (1 Timoteo 6:10) Aŋma nɛkɛ sane nɛɛ yɛ be mli ni Kristofoi ni akpɛlɛ amɛnɔ lɛ fɛɛ ji mɛi ni akɛ Nyɔŋmɔ mumɔ lɛ efɔ amɛ mu ákɛ okadi ni tsɔɔ akɛ amɛbaanyɛ amɛkɛ Kristo atsɔmɔ ŋwɛi nɔyelɔi. Eka shi faŋŋ akɛ amɛteŋ mɛi komɛi kɛ bɔfoi lɛ kɛ mɛi krokomɛi ni kɛ Yesu nyiɛ lɛ kpe hiɛ kɛ hiɛ. Kɛ́ shika ha amɛteŋ mɛi komɛi “du gbɛ” lɛ, belɛ kwɛ bɔ ni oshara lɛ da kɛha wɔ ŋmɛnɛ! —2 Korintobii 5:5; Romabii 8:17, 23.
Niiatsɛ Lɛ Kɛ Yooma Lɛ
5. Mɛni ji Yesu jwɛŋmɔ yɛ ninámɔ he?
5 Yesu fɔɔ haomɔ ni ninámɔ kɛbaa lɛ he wiemɔ, ejaakɛ eji oshara ni ka mɔ fɛɛ mɔ hiɛ, mɛi ni yɔɔ nii kɛ mɛi ni bɛ nɔ ko lɛ fɛɛ. (Mateo 6:24-32; Luka 6:24; 12:15-21) Ákɛ nɔ ko ni obaadamɔ nɔ opɛi bo diɛŋtsɛ omli okwɛ lɛ, susumɔ nɔ ni Yesu kɛɛ be ko taakɛ agba he sane afɔ shi yɛ Mateo 19:16-24; Marko 10:17-30; kɛ Luka 18:18-30 lɛ he. Yɛ anɔkwale mli lɛ, mɛni hewɔ omɛɛɛ fioo bianɛ ni okane nɛkɛ saji nɛɛ ekome loo fɛɛ?
6, 7. (a) Mɛɛ sanegbaa ko tee nɔ yɛ Yesu kɛ obalanyo ko teŋ? (b) No sɛɛ lɛ, mɛɛ ŋaawoo Yesu kɛha?
6 Obalanyo nɔyelɔ ko ba Yesu ŋɔɔ ni ebabi lɛ akɛ: “Mɛni mafee koni mana naanɔ wala.” Ni Yesu gbala ejwɛŋmɔ kɛtee Mla lɛ nɔ, ni etsɔɔ akɛ Yehowa efɔko wɔ nibii ni he hiaa wɔ lɛ tsɔɔmɔ. Nuu lɛ ha hetoo akɛ eye Nyɔŋmɔ kitai lɛ anɔ ‘kɛ́jɛ egbekɛbiiashi.’ Etamɔ nɔ ni edamɔ agbo ni kɛ mɔ yaa wala mli lɛ naa, shi enu he akɛ nɔ ko eshwɛ Iɛ lolo. Ekolɛ esusu akɛ nɔkpakpa ko yɛ ni esa akɛ efee efata he, efee mɔ ko ni baahé gbɛi, ni no baafee naagbee nifeemɔ ni ekɛbaatsɔ agbó ni kɛ mɔ yaa naanɔ wala mli lɛ mli. Nibii babaoo yɛ Yesu hetoo lɛ mli ni kɔɔ ehe: “Yaahɔɔ nibii fɛɛ ni oyɔɔ lɛ ni oŋɔha ohiafoi, ni ooona jwetri yɛ ŋwɛi; ni oba obanyiɛ misɛɛ.” Mɛni jɛ mli ba? “Beni enu enɛ lɛ, eye ŋkɔmɔ naakpa, ejaakɛ eyɛ nii babaoo.” Kɛkɛ ni nɛkɛ nuu nɛɛ shi lɛ etee.—Luka 18:18, 21-23; Marko 10:22.
7 Yɛ no sɛɛ lɛ, Yesu wie akɛ: “Kwɛ bɔ ni ewa ha mɛi ni yɔɔ nii akɛ amɛaabote Nyɔŋmɔ maŋtsɛyeli lɛ mli! Ejaakɛ ejaraaa haaa yooma akɛ eeetsɔ abui hiŋmɛi mli tamɔ bɔ ni ejaraa haa niiatsɛ akɛ eeebote Nyɔŋmɔ maŋtsɛyeli lɛ mli lɛ.” (Luka 18:24, 25) Ani nakai ŋaawoo lɛ yɛ kɛha nɔyelɔ niiatsɛ lɛ pɛ? Aloo ekɔɔ ohe, kɛ oji niiatsɛ loo ohiafo? Nyɛhaa wɔkwɛa.
8. (a) Obalanyo Yudanyo nɔyelɔ lɛ tamɔ namɔ? (b) Mɛni ji etɔmɔ lɛ, ni mɛni hewɔ esa akɛ enɛ akɔ wɔhe lɛ?
8 Kɛji akɛ osusu ŋmɛnɛŋmɛnɛ beaŋ nɔ ko ni tamɔ nakai lɛ, eeeye ebua bo ni onu obalanyo nɔyelɔ lɛ shihilɛ lɛ shishi—Kristofonyo obalanyo ni he tse ni yɔɔ Biblia mli nilee ni sa, eyɛ jeŋba kpakpa, ejɛ weku ni yɔɔ nii babaoo mli. Ohiɛ baakɔ gbɔmɔ ni tamɔ nɛkɛ nɔ ŋmɛnɛ. Shi Yesu na akɛ nɔ ko wulu ko yɛ ni shɛɛɛ kwraa yɛ nɛkɛ obalanyo Yudanyo nɛɛ he: Eshika loo nii babaoo ni eyɔɔ lɛ he hiaa lɛ waa moŋ yɛ eshihilɛ mli. No hewɔ ni Yesu kɛ ŋaawoo ni tamɔ nakai lɛ ha lɛ. Obaanyɛ ona nɔ hewɔ ni Biblia sane nɛɛ ji nɔ ko ni kɔɔ wɔ fɛɛ wɔhe lɛ, kɛji akɛ wɔji niiatsɛmɛi loo ohiafoi. Shika kɛ heloo gbɛfaŋ nibii baanyɛ afee nɔ ko ni he hiaa wɔteŋ mɔ fɛɛ mɔ waa fe nɔ fɛɛ nɔ, kɛji akɛ wɔyɛ enɛɛmɛi momo po aloo wɔbɛ enɛ babaoo.
9. Te wɔfeɔ tɛŋ wɔleɔ akɛ Yesu ewieee eshiii ninamɔ yɛ nɛkɛ gbɛ nɔ?
9 Yesu ekɛɛɛ akɛ gbɔmɔ ni yɔɔ heloo gbɛfaŋ nibii babaoo lɛ nyɛŋ asɔmɔ Nyɔŋmɔ. Mɛi pii efee nakai. Obalanyo Yudanyo lɛ efee nakai—kɛyashɛ he ko. Zakeo toohelɔ lɛ ni eji nuu “niiatsɛ” lɛ hu yɛ. (Luka 19:2-10) Kristofoi ni afɔ amɛ mu ni hi shi yɛ klɛŋklɛŋ afii oha lɛ mli lɛ ateŋ mɛi komɛi ji niiatsɛmɛi, no hewɔ lɛ ŋaa ni awo amɛ ji akɛ: “amɛsumɔ nihamɔ, amɛnine akpɔ.” (1 Timoteo 6:17, 18; Yakobo 1:9, 10) Kristofoi komɛi yɛ ŋmɛnɛ ni amɛyɛ nii babaoo. Amɛjɛ amɛsuɔmɔ mli amɛkɛ shika efi maŋtsɛyeli nitsumɔ lɛ sɛɛ, amɛgbele amɛshiai amli amɛha kpee, ni amɛkɛ amɛtsɔnei etsu nii yɛ sɔɔmɔ nitsumɔ lɛ mli. Belɛ mɛni hewɔ Yesu wie taakɛ ewie yɛ niiatsɛ lɛ kɛ yooma lɛ he lɛ? Mɛni wɔbaanyɛ wɔkase kɛjɛ mli?
10. Te wɔbaamu sane naa wɔha tɛŋŋ yɛ Yesu ŋaawoo ni ekɛha yɛ nakai be lɛ mli lɛ hewɔ?
10 Taakɛ obaanyɛ oyoo lɛ, eji nɔ kome akɛ aaaje shishi ajá Nyɔŋmɔ; ni eji nɔ kroko hu akɛ aaaye anɔkwale kɛyashi naagbee. (Mateo 24:13; Filipibii 3:12-14) Ekolɛ enɛ ji nɔ ni yɔɔ Yesu jwɛŋmɔ mli yɛ be mli ni ekɛɛ: “Ejaraaa haaa yooma akɛ eeetsɔ abui hiŋmɛi mli tamɔ bɔ ni ejaraa haa niiatsɛ akɛ eeebote Nyɔŋmɔ maŋtsɛyeli lɛ mli lɛ.” (Mateo 10:25) Yooma ko nyɛŋ amia ehiɛ aaahu ni etsɔ abui ni akɛkpɛɔ nii hiŋmɛi mli, no hewɔ lɛ, eka shi faŋŋ akɛ Yesu miibu abɛ, eewo wiemɔ ko he babaoo ni esaaa akɛ aŋɔɔ lɛ akɛ nakai pɛpɛɛpɛ eji. No hewɔ lɛ etsɔɔ bɔ ni ewa waa akɛ niiatsɛ aaanyɛ afee nɔ ko. Mɛni? Jeee akɛ eeeje shishi esɔmɔ Nyɔŋmɔ kɛkɛ, dabi, shi moŋ, “ebote maŋtsɛyeli lɛ mli,” koni ena naanɔ wala diɛŋtsɛ. Bɔ fɛɛ bɔ ni eshidaamɔ yɔɔ yɛ shika gbɛfaŋ lɛ, Yesu ŋaawoo lɛ baanyɛ aye abua osusumɔ, omumɔŋ nɔyaa, kɛ naanɔ wala ni ooona.
Mɛni Hewɔ Ewa Nakai Kɛha Niiatsɛmɛi Lɛ
11. Yesu shiɛmɔ lɛ sa ohiafoi kɛ niiatsɛmɛi fɛɛ he yɛ mɛɛ gbɛ nɔ?
11 ‘Ashiɛ sanekpakpa lɛ atsɔɔ ohiafoi’ kɛtsɔ shiɛmɔ ni Yesu kɛ ebɔfoi lɛ shiɛ lɛ nɔ. (Mateo 11:5) Akuuu hiɛ ashwieee niiatsɛmɛi lɛ anɔ. Shi etamɔ nɔ ni ohiafoi lɛ babaoo yoo nibii ni he hiaa amɛ yɛ mumɔŋ lɛ ni amɛkpɛlɛ sane ni haa hiɛnɔkamɔ lɛ nɔ. (Mateo 5:3, 6; 9:35, 36) Niiatsɛ mɛi ni ji Yudafoi lɛ atsui enyɔ amɛmli yɛ bɔ ni nibii yaa nɔ lɛ he. (Okɛto Luka 6:20, 24, 25 he.) Kɛlɛ, mɛi komɛi yɛ ni esoro amɛ yɛ nakai be lɛ mli, ni mɛi yɛ ŋmɛnɛ hu ni esoro amɛ. Niiatsɛmɛi komɛi yɛ ni amɛkpɛlɛɔ Biblia mli sane lɛ nɔ ni amɛsɔmɔɔ Nyɔŋmɔ. Nɔ ni jɛɔ mli baa haa amɛ lɛ yɛ naakpɛɛ. Nakai eji yɛ Paulo gbɛfaŋ, mɔ ni haaa shihilɛ mli ni eyɔɔ lɛ atsi lɛ gbɛ lɛ. (Filipibii 3:4-8) Ni kɛlɛ, Yesu kɛɛ akɛ ebaawa waa aha niiatsɛ.
“Nii Pii Ahe Lakamɔ”
12, 13. (a) Yɛ ebɛbua lɛ ekome mli lɛ, mɛni ji nɔ ni Yesu tsɔɔ yɛ henaagbamɔi ahe? (b) Mɛni hewɔ naagba kroko ka niiatsɛmɛi anɔ lɛ?
12 Yɛ abɛbua ni kɔɔ dumɔwui ni amɛyashwie sũi kpakpai amli lɛ he lɛ, Yesu kɛɛ akɛ “ni ekomɛi hu yashwie ŋmei ateŋ, ni ŋmei lɛ hole amɛhe nɔ, ni amɛgbe nomɛi.” Shi etsɔɔ mli akɛ, “shi nɔ ni adu yɛ ŋmei ateŋ lɛ, lɛ ji mɔ ni nuɔ wiemɔ lɛ, ni je nɛŋ he naagbamɔ kɛ nii pii ahe lakamɔ lɛ gbeɔ wiemɔ lɛ, ni ewooo yibii.” (Mateo 13:7, 22) Etamɔ nɔ ni mɔ fɛɛ mɔ nuɔ “je nɛŋ henaagbamɔ” lɛ he. Ewaaa akɛ aaana akɛ nakai eji kɛha gbɔmɔ ni bɛ nɔ ko nɔ ko, ebɛ nitsumɔ, aloo eje kpa yɛ gbɛ ko nɔ lɛ gbɛfaŋ. Shi mɔ ni yɛ shika gbɛfaŋ lɛ eyɛ shweshweeshwe lɛ bɛ nɛkɛ henaagbamɔ nɛɛ, eyɛ mli akɛ ekolɛ kɛ eji nuu loo yoo lɛ, bɔ ni nibii ajara yaa ŋwɛi kɛ bɔ ni too ni awoɔ lɛ tsakeɔ, aloo oshara ákɛ aaanyɛ aju nibii lɛ saa ehe. No hewɔ lɛ, niiatsɛmɛi kɛ ohiafoi fɛɛ baanyɛ ana nibii ni gbaa amɛnaa.—Mateo 6:19-21.
13 Yesu tsɔɔ hu akɛ “nii pii ahe lakamɔ” lɛ baatsi mɛi komɛi agbɛ. Omanye ni oooye yɛ shika gbɛfaŋ lɛ baahe onɔ fɛɛ nɔ. Akpekpeiatsɛ Aristotle Onassis wie be ko akɛɛ “Kɛ oyashɛ he ko lɛ, shika bafeɔ nɔ ni he ehiaaa. Nɔ ni he hiaa ji omanyeyeli. Nɔ ni jwɛŋmɔ yɔɔ mli ji ni makpa bianɛ. Shi minyɛɛɛ mafee nakai. Nɔ ni esa akɛ mafee ji ni mikɛ mihiɛ afɔ nɔ ko ni yɔɔ ŋwɛi shɔŋŋ nɔ yɛ be fɛɛ mli—yɛ miishɛɛ ni minaa yɛ mli kɛkɛ lɛ hewɔ.” Nakai nɔŋŋ hu Kristofonyo baanyɛ ana akɛ eyɛ miishɛɛ akɛ eeepele ni ekwɔ nitsumɔ mli hiɛyaa atswerɛ lɛ. Aloo abaalaka lɛ ni egbele enitsumɔ lɛ mli yɛ be mli ni eyashɛ nɔ ni ekolɛ yɛ eshihilɛ eshishijee be mli lɛ, eeebu no akɛ “efa” lɛ he lɛ. Ni eeefo enitsumɔ lɛ nɔ loo eba lɛ shi (aloo ekpa kwraa) bɔni afee ni ebatsɔ be fɛɛ sɔɔlɔ lɛ, ‘ekumɔɔ eboŋoi [loo shiai] lɛ ni emamɔɔ ewuji.’ (Kwɛmɔ Luka 12:15-21) Ani enɛ aaanyɛ aba onɔ? Ani osusuɔ akɛ Nyɔŋmɔ baakojo mɔ fɛɛ mɔ ni yɔɔ shihilɛ ni tamɔ nɛkɛ mli lɛ akɛ ekɛ esusuma muu lɛ fɛɛ miisɔmɔ lɛ?—Mateo 22:37.
14. Abaanyɛ afee ninamɔ ni baanyɛ atsi Kristofonyo gbɛ lɛ he nɔkwɛmɔ nɔ yɛ mɛɛ gbɛ nɔ? (Abɛi 28:20)
14 Mɛi krokomɛi yɛ ninamɔ (aloo enamɔ he akɔnɔ) ni baanyɛ atsi Kristofonyo lɛ gbɛ koni ‘ekana naanɔ wala.’ Ekome ji akɛ ninamɔ he suɔmɔ baanyɛ atsirɛ lɛ ni ekɛ je lɛŋ nifeemɔi komɛi atsu nii, tamɔ esɛɛnamɔi ni etsiŋ fɛɛ ta aloo nibii komɛi ni afɔɔ feemɔ ni ejaaa yɛ nitsumɔ mli. Aloo kɛji akɛ Kristofoi komɛi ni yeɔ anɔkwale ni tsuɔ nii waa miitsu nii kɛmiiha lɛ lɛ, ekɛ lɛ diɛŋtsɛ eheloo naa sɛɛnamɔ baaye amɛmumɔŋ nɔyaa hiɛ. Akɛ nɔ kwɛmɔ nɔ lɛ, bɔni afee ni eha amɛnyɛ amɛkpɛtɛ amɛnitsumɔ lɛ he lɛ, ebaawo amɛ hewalɛ ni, amɛna shihilɛ mli sui komɛi ni haa amɛfiteɔ shika babaoo (aloo po ni amɛkɛ amɛhe awo nyɔmɔbɔɔ mli kɛha nɛkɛ fɛo nibii nɛɛ asɛɛdii) . Ni akɛni lɛ ji amɛnitsumɔtsɛ hewɔ lɛ, wekukpaa ni ka ekɛ amɛ teŋ lɛ baanyɛ abote asafo lɛ mli nibii komɛi amli.
15. Mɛɛ gbɛ nɔ ekolɛ mra be mli Kristofoi lɛ ateŋ mɛi komɛi nu awui ni ninámɔ yeɔ mɛi lɛ ekomɛi ahe yɛ? (Lala 73:3-8, 12, 27, 28)
15 Kristofoi komɛi ni yɔɔ nii babaoo yɛ klɛŋklɛŋ afii oha lɛ mli lɛ fata mɛi ni “nii pii ahe lakamɔ” nɛɛ du amɛ lɛ ahe. Yakobo ŋma ‘awerɛho nibii ni baa niiatsɛmɛi anɔ’ lɛ he sane. Amɛyɛ atadei ni jara wawai, amɛbua shika kɛ jwiɛtɛi naa yɛ amɛ apaafoi ni amɛtsɛrɛ amɛnyɔmɔwoo nɔ lɛ hewɔ, ni amɛshwishwii yɛ ninamɔ mli. (Yakobo 5:1-5) Nakai pɛpɛɛpɛ eji ŋmɛnɛ. Yɛ be babaoo mli lɛ, ninámɔ ŋmɛɔ gbɛ ni mɔ ko yeɔ niyenii ni hi kɛtekeɔ nɔ, ni enuɔ nii ni baanyɛ aye egbɔmɔtso lɛ awui. Nɔ ni jɛɔ mli baa hu ji daa gbɛfaa ni gbalaa lɛ kɛjɛɔ asafo lɛ he. Jeee ákɛ akɛ enɛ miitsɔɔ akɛ atadei fɛfɛji, shika, niyenii kɛ gbɛfaa ehiii diɛŋtsɛ. Shi nibii ni tamɔ nɛkɛ yeee ebuaaa “niiatsɛmɛi” ni Yakobo ŋma amɛhe sane lɛ; akɛni amɛmumɔŋ shidaamɔ eba shi yɛ Nyɔŋmɔ hiɛ hewɔ lɛ, ebi ni ‘amɛfo, amɛwo lele yɛ awerɛho nibii ni baa lɛ ahewɔ.’
16. Mɛni hewɔ Yesu kɛ ŋaawoo ni mli ka shi faŋŋ ni kɔɔ ninámɔ he nɛɛ ha, ni mɛni esa akɛ obi bo diɛŋtsɛ ohe?
16 Eka shi faŋŋ akɛ Yesu le piŋmɔ kɛ nibii ni tsiɔ mumɔŋ nɔyaa gbɛ ni niiatsɛmɛi kɛkpeɔ yɛ be babaoo mli lɛ. Ele hu akɛ nibii ni jara wawai lɛ baanyɛ afite diɛŋtsɛ aloo amɛfee nibii ni sɛɛnamɔ bɛ he, ni enɛ nyɛŋ aba lɛ nakai kɔkɔɔkɔ yɛ Kristofoi aninamɔ he. (Abɛi 11:28; Marko 10:29, 30) No hewɔ lɛ, ejurɔ diɛŋtsɛ Yesu feɔ wɔ fɛɛ yɛ be mli ni ekɛ kɔkɔbɔɔ nɛɛ ha lɛ: “Kwɛ bɔ ni ewa ha mɛi ni yɔɔ nii akɛ amɛaabote Nyɔŋmɔ Maŋtsɛyeli lɛ mli!” (Luka 18:24) Ekɔkɔbɔɔ lɛ he baanyɛ aba sɛɛnamɔ aha wɔ kɛji akɛ nibii fioo ko po wɔyɔɔ. Yɛ mɛɛ gbɛ nɔ? Kɛtsɔ tsĩ ni wɔɔtsimɔ shwe ni wɔshweɔ akɛ wɔɔtsɔmɔ niiatsɛmɛi bianɛ lɛ naa. Kristofoi heɔ yeɔ akɛ anɔkwale Yesu wie lɛ. Wɔheɔ nɔ ni Yesu wie yɛ e-Tsɛ lɛ he lɛ, yɛ nibii agbɛjianɔtoo nɛɛ naagbee he lɛ kɛ suɔmɔ ni esa akɛ wɔna lɛ wɔyeɔ ni wɔhiɔ shi yɛ naa. Nɛkɛ Anɔkwale Wielɔ nɛɛ hu kɛɛ akɛ: “Ejaraaa haaa yooma akɛ eeetsɔ abui hiŋmɛi mli, tamɔ bɔ ni ejaraa haa niiatsɛ akɛ eeebote Nyɔŋmɔ maŋtsɛyeli lɛ mli.” (Mateo 19:24) Ani oheɔ enɛ oyeɔ lɛlɛŋ? Ani onifemɔi, oshihilɛ gbɛ kɛ osui yeɔ odase akɛ oheɔ yeɔ?
Yaa Nɔ Ofee Niiatsɛ—Yɛ Nyɔŋmɔ Gbɛ Nɔ
17. Kristofoi pii kɛ amɛhe miiha niiatsɛmɛi ni amɛaatsɔmɔ yɛ Yehowa gbɛfaŋ Iɛ yɛ mɛɛ gbɛ nɔ?
17 Odaseyelii ni baa kɛjɛɔ je lɛŋ he fɛɛ he lɛ tsɔɔ akɛ Nyɔŋmɔ tsuji ateŋ mɛi ni fa miibo ŋaawoo ni anaa yɛ Mateo 19:16-24 lɛ toi ni amɛmiitsu he nii. Obalaŋtai Kristofoi pii miitswa amɛfai shi akɛ kɛji akɛ amɛgbe skul naa pɛ lɛ, amɛkɛ amɛhe baawo be-fɛɛ sɔɔmɔ nitsumɔ lɛ mli. Ŋamɛi ni baanyɛ atsu heloo gbɛfaŋ nitsumɔ ni amɛha weku lɛ ana shika babaoo lɛ ekpoo enɛ, ni amɛkɛ amɛbe babaoo miiwo Kristofoi anitsumɔ mli, amɛmiifee amɛhe kɛ mɛi krokomɛi mumɔŋ niiatsɛmɛi. Hii po ni Ŋmalɛ naa gbɛnaa nii jwere amɛnɔ akɛ amɛkwɛ amɛwekui aheloo naa nibii anɔ lɛ miitao gbɛi komɛi ni amɛbaatsɔ nɔ ni amɛkɛ amɛhe awo sɔɔmɔ nitsumɔ lɛ mli babaoo.
18, 19. Mɛi ni taoɔ Yehowa jɔɔmɔ lɛ efee mɛni?
18 Onukpa ko ni eye kɛjɛ afii 35 kɛyaa lɛ kpɛlɛ nɔ akɛ “ákɛ mafee be-fɛɛ sɔɔlɔ lɛ ji wiemɔi ni jɛɔ midaaŋ kɛkɛ.” Shika ni enaa afi lɛ fe Amerika shika dɔlai 25,000 (¢225,000) afi kome, ni kɛfata enɛ he lɛ, enitsumɔ lɛ woɔ lɛ shika fɛɛ shika ni efiteɔ lɛ he nyɔmɔ, ni eyɛ enitsumɔ he lɛ kar hu ni etaa mli. Kɛkɛ ni abi lɛ ni eha 1983 kpee shishi wiemɔ ni ji ‘Otii Kpakpai ni Okɛaamamɔ Shi Oha Ohe ni Onine Ashɛ Nɔ’ lɛ. Ejaje akɛ: “Yɛ be mli ni mikɛ miishɛɛ kaneɔ wiemɔ lɛ nɔ lɛ, mihiɛ gbo ni mihao waa akɛ mihenilee bɔi mi yii.” Ekɛ eŋa susu sane nɛɛ he dani kpee be Iɛ shɛ. Etsɛɛɛ ni eyatao nitsumɔ ni akɛ be fã tsuɔ ni eyafata eŋa he akɛ gbɛgbalɔ. Amɛyɛ gbɛgbamɔ sɔɔmɔ lɛ mli lolo, ni amɛkɛ miishɛɛ miina mumɔŋ jɔɔmɔi pii amli ŋɔɔmɔ.
19 Mɛi krokomɛi eshi hei ni shika nitsumɔi pii yɔɔ lɛ kɛtee hei ni amɛbaanyɛ amɛlɛɛ amɛmumɔŋ nitsumɔi lɛ amli yɛ lɛ. Wu kɛ ŋa ko ni jɛ Kanada ŋma yɛ gbɛgbamɔ ni amɛkɛ amɛhe wo mli yɛ Latin Amerika maŋ ko nɔ lɛ he akɛ: “Eyɛ mli akɛ nyɛmimɛi Iɛ ateŋ mɛi pii miiye ohia moŋ, shi anɔkwale lɛ he ekãa ni amɛyɔɔ lɛ yɛ naakpɛɛ. Amɛji ohiafoi yɛ je lɛ gbɛfaŋ, shi mumɔŋ lɛ amɛji akpekpeiatsɛmɛi. Wɔyɛ shiɛlɔi 38, amɛteŋ mɛi 10 ji daa gbɛgbalɔi. Wɔfeɔ kpeei sɔrɔtoi enyɔ, ejaakɛ mɛi ni baa kpee lɛ fa tsɔ—kɛjɛ 110 kɛyashi 140 kɛ aja mli. Esa akɛ onukpai enyɔ lɛ kɛ asafoŋ sɔɔlɔi etɛ lɛ akwɛ nɛkɛ kpeei nɛɛ fɛɛ nɔ. Wɔmiikase nɔ ni eji diɛŋtsɛ akɛ wɔkɛ Yehowa aaaye klɛŋklɛŋ gbɛhe lɛ ehee kɛmiijɛ wɔnyɛmimɛi heshibalɔi ohiafoi nɛɛ aŋɔɔ. Amɛmiitsɔɔ wɔ akɛ abaanyɛ ajɛ susuma muu fɛɛ mli asɔmɔ Yehowa ni shihilɛ mli ni wɔyɔɔ lɛ kɔɔɔ he eko.”
20. Te esa akɛ wɔnu heloo gbɛfaŋ niiatsɛmɛi ni wɔɔtsɔmɔ yɛ wɔtsui mli lɛ he wɔha tɛŋŋ?
20 Kristofoi ni tamɔ nɛkɛ lɛ bɛ nɔ ko pɔtɛɛ ni amɛbaadamɔ nɔ ni amɛhiɛ akɔ̃ niiatsɛ ko nɔ, kɛ mɔ lɛ yɛ asafo lɛ sɛɛ aloo emli, loo ni amɛkɛ amɛhe awo heloo gbɛfaŋ nibii asɛɛdii mli. Amɛle akɛ shika he miihia kɛha amɛ daa gbi shihilɛ. (Jajelɔ 5:3; 7:12) Ni amɛle hu akɛ Yesu wie anɔkwale—mumɔŋ gbɛtsii nii, haomɔi kɛ osharai ka niiatsɛmɛi pii ahiɛ. Nɔ kome ni tamɔ mpoatswaa ji, ni “niiatsɛmɛi ni yɔɔ je nɛŋ lɛ amɛkajwɛŋ nii wuji ni amɛkaŋɔ amɛhiɛ hu amɛfɔ nifalɛ ni bɛ shweshweeshwe lɛ nɔ, shi Nyɔŋmɔ hiɛkalɔ lɛ nɔ.”—Timoteo 6:17.
21 Nɔ ni yɔɔ mɔbɔ ji akɛ, obalanyo nɔyelɔ lɛ ni kɛ Yesu wie lɛ nyɛɛɛ adamɔ kaa lɛ naa. Mɛi krokomɛi ni tamɔ lɛ esɔmɔ Nyɔŋmɔ yɛ be ko mli, shi yɛ sɛɛ mli lɛ, amɛnuɔ piŋmɔi ahe ni amɛnine nyɛɔ shi yɛ mumɔŋ yɛ amɛninamɔ hewɔ. Nɔ ni tamɔɔɔ enɛ lɛ, Kristofoi anɔkwafoi akpekpei abɔ yɛ ni amɛtee nɔ amɛtsɔɔ akɛ: “Yehowa jɔɔmɔ lɛ, no feɔ mɔ niiatsɛ; ni ekɛ deŋmegbomɔ ko fataaa he.” (Abɛi 10:22, NW) Miishɛɛ yɛ amɛshihilɛ mli; amɛyɛ otii ni sɛɛnamɔ yɔɔ he ni amɛkɛmamɔ amɛhiɛ ni amɛnuɔ nɔ ni amɛnyɛ amɛtsu lɛ he. Amɛnitsumɔi kpakpai lɛ baahi shi kɛya naanɔ, ni ekɛ miishɛɛ babaoo haa amɛ bianɛ ni ebaafee nakai yɛ wɔsɛɛ be mli. Nyɛhaa wɔbɔa mɔdɛŋ ni wɔtsɔmɔa niiatsɛmɛi yɛ nakai gbɛ nɔ.—Filipibii 4:1; 1 Tesalonikabii 2:19, 20.a
[Shishigbɛ niŋmai]
a Ajie kɛjɛ June 15, 1986 Watchtower lɛ mli.
Susumɔi Komɛi Ni Abaanyɛ Ajwɛŋ He
◻ Mɛɛ ninamɔ nɛkɛ awieɔ he yɛ Abɛi 10:22?
◻ Mɛni ji nɔ ni Yesu wiemɔ ni kɔɔ niiatsɛ lɛ kɛ yooma lɛ he lɛ tsɔɔ?
◻ Mɛni hewɔ shihilɛ mli waa yɛ be babaoo mli kɛhaa niiatsɛmɛi lɛ?
◻ Te wɔɔfee tɛŋŋ wɔbɔ mɔdɛŋ ni wɔtsɔmɔ niiatsɛmɛi yɛ Nyɔŋmɔ gbɛfaŋ?
21. Mɛni ji nɔ ni mɛi ni diɔ mumɔŋ ninamɔ sɛɛ lɛ anine shɛɔ nɔ?
December Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)